མི་དམངས་འཐུས་མིའི་ཚོགས་ཆེན་གྱི་ལམ་ལུགས་རྒྱུན་འཁྱོངས་དང་འཐུས་སྒོ་ཚང་དུ་གཏོང་བ་དང་། མི་དམངས་ཀྱིས་རང་ཁྱིམ་རང་བདག་འགན་སྲུང་བྱེད་དགོས།※

གཅིག།

ང་ཚོས་རྒྱལ་ཁབ་ཀྱི་དབང་ཆ་ཡོད་ཚད་མི་དམངས་ལ་དབང་བའི་རྩ་ཁྲིམས་ཀྱི་ལྟ་བ་རྒྱུན་འཁྱོངས་བྱས་ཏེ། ཁྱབ་ཆེས་ཆེ་བའི་སྒོ་ནས་མི་དམངས་སྐུལ་སློང་དང་སྒྲིག་འཛུགས་བྱས་ཏེ་རྩ་ཁྲིམས་དང་བཅའ་ཁྲིམས་ཀྱི་གཏན་འབེབས་ལྟར་རིམ་པ་ཁག་གི་མི་དམངས་འཐུས་མིའི་ཚོགས་ཆེན་བརྒྱུད་དེ་རྒྱལ་ཁབ་ཀྱི་དབང་ཆ་སྤྱོད་པ་དང་། ཐབས་ལམ་དང་བྱེད་སྟངས་སྣ་ཚོགས་ཀྱི་ཐོག་ནས་རྒྱལ་ཁབ་དང་སྤྱི་ཚོགས་ཀྱི་ལས་དོན་དོ་དམ་དང་། དཔལ་འབྱོར་དང་རིག་གནས་ཀྱི་ལས་དོན་དོ་དམ། མཉམ་དུ་འཛུགས་སྐྲུན་དང་མཉམ་དུ་ལོངས་སྤྱོད། མཉམ་དུ་འཕེལ་རྒྱས་བཅས་བྱས་ཏེ་རྒྱལ་ཁབ་དང་སྤྱི་ཚོགས་དང་མི་སྒེར་བཅས་ཀྱི་ལས་དབང་གི་བདག་པོ་ཆགས་པར་བྱེད་དགོས། ང་ཚོས་རྩ་ཁྲིམས་ཀྱིས་གཏན་འཁེལ་བྱས་པའི་དམངས་གཙོ་གཅིག་སྡུད་ལམ་ལུགས་ཀྱི་རྩ་དོན་དང་། རྒྱལ་ཁབ་སྲིད་དབང་གི་སྒྲིག་སྲོལ། བྱེད་སྒོའི་ཚད་གཞི་བཅས་ལྟར་མི་དམངས་འཐུས་མིའི་ཚོགས་ཆེན་གྱིས་གཅིག་གྱུར་ཐོག་རྒྱལ་ཁབ་ཀྱི་དབང་ཆ་སྤྱོད་རྒྱུ་ལག་བསྟར་དང་། ཇུས་ཐག་གཅོད་དབང་དང་། ལག་བསྟར་བྱེད་དབང་། ལྟ་སྐུལ་བྱེད་དབང་བཅས་ལུགས་མཐུན་གྱི་ལས་བགོས་ཡོད་ལ་ཕན་ཚུན་མཐུན་སྦྱོར་ཡང་ཡོད་པ་ལག་བསྟར། རྒྱལ་ཁབ་ལས་ཁུངས་ཀྱིས་ཁྲིམས་བཀོད་ཀྱི་དབང་མཚམས་དང་ལས་རིམ་ལྟར་འགན་དབང་སྤྱོད་པ་དང་འགན་འཁྲི་སྒྲུབ་རྒྱུ་འགན་ལེན། རྒྱལ་ཁབ་ལས་ཁུངས་ཀྱིས་གཅིག་གྱུར་དང་ནུས་ལྡན་ངང་བྱ་གཞག་ཁག་སྒྲིག་འཛུགས་བྱ་རྒྱུ་འགན་ལེན་བཅས་བྱེད་དགོས།

(2012ལོའི་ཟླ་12ཚེས་4ཉིན་རྒྱལ་སའི་ལས་རིགས་ཁག་གིས་ད་སྤྱོད་རྩ་ཁྲིམས་ཡོངས་བསྒྲགས་ལག་བསྟར་བྱས་ནས་ལོ་ངོ་30འཁོར་བར་དྲན་གསོ་ཞུ་བའི་ཚོགས་ཆེན་ཐོག་གནང་བའི་གསུང་བཤད།)

གཉིས།

ལོ་ངོ་60ཡི་གོང་ལ། ང་ཚོའི་མི་དམངས་སྤྱི་མཐུན་རྒྱལ་ཁབ་གསར་འཛུགས་གནང་མཁན་རྣམ་པས། ཡོངས་ཁྱབ་ཏུ་བདམས་ཐོན་བྱུང་བའི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་1200ལྷག་དང་མཉམ་དུ་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་དང་པོའི་གྲོས་ཚོགས་ཐེངས་དང་པོ་འཚོགས་ཏེ་《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་》གྲོས་འཆམ་བྱུང་། དེ་ནས་བཟུང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་བའི་ཆབ་སྲིད་ལམ་ལུགས་ཏེ་མི་དམངས་འཐུས་མིའི་ཚོགས་ཆེན་གྱི་ལམ་ལུགས་བཙུགས་པ་རེད། ཀྲུང་གོ་ལྟ་བུའི་ལོ་ངོ་5000ལྷག་རིང་གི་ཤེས་དཔལ་ལོ་རྒྱུས་ལྡན་པ་དང་། མི་གྲངས་དུང་ཕྱུར་ཁ་ཤས་ལྡན་པའི་རྒྱལ་ཁབ་ཏུ་མི་དམངས་ཀྱིས་རང་ཁྱིམ་རང་བདག་བྱེད་པའི་ཆབ་སྲིད་ལམ་ལུགས་གསར་པ་བཙུགས་པ་དེ་ཀྲུང་གོའི་ཆབ་སྲིད་འཕེལ་རྒྱས་བྱུང་བའི་ལོ་རྒྱུས་ཙམ་མ་ཟད། འཛམ་གླིང་གི་ཆབ་སྲིད་འཕེལ་རྒྱས་བྱུང་བའི་ལོ་རྒྱུས་ཐོག་ཏུའང་དུས་རབས་འབྱེད་པའི་དོན་སྙིང་ལྡན་པ་རེད།

(2014ལོའི་ཟླ་9ཚེས་5ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་བཙུགས་ནས་ལོ་ངོ་60འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད།)

གསུམ།

ཀྲུང་གོར་མི་དམངས་འཐུས་མིའི་ཚོགས་ཆེན་གྱི་ལམ་ལུགས་ལག་བསྟར་བྱེད་པ་ནི་ཀྲུང་གོའི་མི་དམངས་ཀྱིས་མིའི་རིགས་ཀྱི་ཆབ་སྲིད་ལམ་ལུགས་ལོ་རྒྱུས་ཐོག་གི་གསར་གཏོད་རླབས་པོ་ཆེ་ཞིག་དང་། ཉེ་རབས་ནས་བཟུང་ཀྲུང་གོའི་ཆབ་སྲིད་འཚོ་བའི་བློ་ཕམ་ཡིད་གདུང་ཆེ་བའི་བསླབ་བྱ་ཕྱོགས་བསྡོམས་གཏིང་ཟབ་བྱས་པ་ལས་བྱུང་བའི་གཞི་རྩའི་བསྡོམས་ཚིག་ཅིག། ལོ་ངོ་100ལྷག་རིང་ཀྲུང་གོའི་སྤྱི་ཚོགས་ལ་འཕོ་འགྱུར་དྲག་པོ་བྱུང་བ་དང་ཡོ་འཁྱོམ་ངང་འཕེལ་རྒྱས་བྱུང་བའི་ལོ་རྒྱུས་ཀྱི་འབྲས་བུ། ཀྲུང་གོའི་མི་དམངས་ཡར་ལངས་ནས་བདག་པོ་བྱས་ཤིང་རང་གི་ལས་སྐལ་རང་ལག་ཏུ་དམ་པོར་བཟུང་བའི་ལྡོག་མེད་ཀྱི་གདམ་ག་བཅས་ཡིན།

བཞི།

མི་དམངས་འཐུས་མིའི་ཚོགས་ཆེན་ལམ་ལུགས་ལ་སྐྱེ་སྟོབས་ཆེན་པོ་དང་ཁྱད་འཕགས་རང་བཞིན་མངོན་གསལ་ལྡན་པའི་གནད་འགག་ནི་དེ་ཉིད་མི་དམངས་ཀྱི་ཁྲོད་དུ་ཟབ་མོར་ཟུག་ཡོད་པ་དེ་ཡིན། ང་ཚོའི་རྒྱལ་ཁབ་ཀྱི་མིང་དང་། ང་ཚོའི་རིམ་པ་སོ་སོའི་རྒྱལ་ཁབ་ལས་ཁུངས་ཀྱི་མིང་ཚང་མར་“མི་དམངས་”ཞེས་པའི་མིང་ཡོད་པ་འདི་ནི་ང་ཚོས་ཀྲུང་གོའི་སྤྱི་ཚོགས་རིང་ལུགས་ཀྱི་སྲིད་དབང་ལ་བཟུང་བའི་གཞི་རྩའི་ངེས་གནས་ཡིན། ཀྲུང་གོའི་མི་དམངས་འཐུས་ཚོགས་རིམ་པ་ཁག་གི་འཐུས་མི་ཁྲི་260ལྷག་ཚང་མས་ལྷག་བསམ་རྣམ་དག་གིས་མི་དམངས་ཀྱི་ཁེ་ཕན་དང་འདོད་བློ་མཚོན་པ་དང་། བཅའ་ཁྲིམས་ལྟར་རྒྱལ་ཁབ་ཀྱི་དབང་ཆ་སྤྱོད་པར་ཞུགས་དགོས། རྒྱལ་ཁབ་ཀྱི་ལས་ཁུངས་རིམ་པ་ཁག་དང་དེའི་ལས་བྱེད་མི་སྣས་ལས་ཀ་གང་ཞིག་བྱས་ནའང་མཐར་གཏུགས་ནས་བཤད་ན་ཚང་མ་མི་དམངས་ལ་ཞབས་འདེགས་ཞུ་ཆེད་ཡིན། གཞི་རྩའི་ངེས་གནས་འདི་ག་དུས་ཡིན་ཡང་ཟ་ཟིར་དང་སྣང་ཆུང་བྱེད་མི་རུང་།

ལྔ།

རྒྱལ་ཁབ་ཀྱི་ཆབ་སྲིད་ལམ་ལུགས་ཇུས་འགོད་བྱེད་པ་དང་འཕེལ་རྒྱས་གཏོང་བར། ལོ་རྒྱུས་དང་དོན་དངོས་དང་། རིགས་པའི་གཞུང་ལུགས་དང་ལག་ལེན། རྣམ་པ་དང་ནང་དོན་བཅས་གཞི་མཐུན་གཅིག་གྱུར་བྱ་རྒྱུར་ངེས་པར་དུ་མཐོང་ཆེན་བྱེད་དགོས། རྒྱལ་ཁབ་ཀྱི་གནས་ཚུལ་དང་དོན་དངོས་ལ་བསྟུན་རྒྱུ་རྒྱུན་འཁྱོངས་བྱེད་དགོས་པ་སྟེ། དུས་ཡུན་རིང་པོའི་ནང་བྱུང་བའི་ལོ་རྒྱུས་སྲོལ་རྒྱུན་ཁོང་དུ་ཆུད་དགོས་པ་མ་ཟད། བརྒྱུད་མྱོང་བའི་འཕེལ་རྒྱས་ཀྱི་འགྲོ་ལམ་དང་། གསོག་འཇོག་བྱས་པའི་ཆབ་སྲིད་ཀྱི་ཉམས་མྱོང་། ཆགས་ཡོད་པའི་ཆབ་སྲིད་ཀྱི་རྩ་དོན་བཅས་ཀྱང་ཁོང་དུ་ཆུད་དགོས་ལ། དེར་མ་ཟད་ད་དུང་མངོན་སུམ་གྱི་བླང་བྱ་ཁོང་དུ་ཆུད་དགོས་ཤིང་མངོན་སུམ་གྱི་གནད་དོན་ཐག་གཅོད་བྱ་རྒྱུར་ཡང་དམིགས་དགོས་པ་ལས། ལོ་རྒྱུས་ཀྱི་རྒྱུན་གཅོད་མི་རུང་ལ། ཆབ་སྲིད་ལམ་ལུགས་ཐད་ཀྱི་རང་བྱོན་ཞིག་གློ་བུར་དུ་འདྲ་སྤོ་བྱེད་པའི་བསམ་པ་སྐྱེ་མི་རུང་། ཆབ་སྲིད་ལམ་ལུགས་ནི་ཆབ་སྲིད་ཀྱི་འབྲེལ་བ་མཐུན་སྦྱོར་དང་། ཆབ་སྲིད་ཀྱི་སྒྲིག་ལམ་བཟོ་བ། རྒྱལ་ཁབ་འཕེལ་རྒྱས་ཡོང་བར་སྐུལ་འདེད། རྒྱལ་ཁབ་ཀྱི་བརྟན་བརླིང་སྲུང་སྐྱོང་བཅས་བྱེད་སྤྱད་ཡིན་པས། སྤྱི་ཚོགས་དང་ཆབ་སྲིད་ཀྱི་ཆ་རྐྱེན་བྱེ་བྲག་ཅན་ལས་འདས་ཏེ་སྤྱི་མཚན་སྒོས་དཔྱད་འཇོག་བྱེད་དུ་མེད་པ་དང་། རྩོམ་བརྒྱ་ལུགས་གཅིག་དང་ནད་བརྒྱ་སྨན་གཅིག་ཡོང་མི་སྲིད། ཆབ་སྲིད་ལམ་ལུགས་ཐད་རྒྱལ་ཁབ་གཞན་དག་ལ་ཡོད་པ་གང་ཞིག་ང་ཚོར་མེད་ན་སྟབས་བདེའི་སྒོ་ནས་ཞན་ཆ་རེད་བསམས་ནས་ཚུར་འདྲེན་པ་དང་། ཡང་ན་ང་ཚོར་ཡོད་པ་གང་ཞིག་རྒྱལ་ཁབ་གཞན་དག་ལ་མེད་ན་དེ་ལྷག་མ་རེད་བསམས་ནས་སྟབས་བདེའི་སྒོ་ནས་མེད་པར་བཟོ་བའི་ལྟ་བ་དེ་གཉིས་ནི་སླ་བཅོས་དང་ཕྱོགས་ལྷུང་ཅན་ཡིན་པས་ཡང་དག་མ་རེད།

དྲུག།

རྒྱལ་ཁབ་གང་ཞིག་གི་ཆབ་སྲིད་ལམ་ལུགས་དེ་དམངས་གཙོ་དང་ནུས་ལྡན་ཡིན་མིན་ལ་གདེང་འཇོག་བྱེད་ཚེ། གཙོ་བོ་རྒྱལ་ཁབ་དེའི་འགོ་ཁྲིད་རིམ་པ་ཁྲིམས་ལྟར་སྲོལ་ལུགས་ལྡན་པའི་ངང་བརྗེ་སྒྱུར་བྱེད་ཐུབ་མིན་དང་། མི་དམངས་ཡོངས་ཀྱིས་ཁྲིམས་ལྟར་རྒྱལ་ཁབ་ཀྱི་ལས་དོན་དང་། སྤྱི་ཚོགས་ཀྱི་ལས་དོན། དཔལ་འབྱོར་དང་རིག་གནས་བྱ་གཞག་བཅས་ལ་དོ་དམ་བྱེད་ཐུབ་མིན། མི་དམངས་མང་ཚོགས་ཀྱིས་རང་ཉིད་ཀྱི་ཁེ་ཕན་དང་དགོས་མཁོ་ལྷུག་པོར་བརྗོད་ཐུབ་མིན། སྤྱི་ཚོགས་ཀྱི་ཕྱོགས་ཚང་མ་རྒྱལ་ཁབ་ཀྱི་ཆབ་སྲིད་འཚོ་བར་ནུས་ལྡན་ངང་ཐེ་ཞུགས་བྱེད་ཐུབ་མིན། རྒྱལ་ཁབ་ཀྱི་ཇུས་ཐག་གཅོད་སྟངས་ཚན་རིག་ཅན་དང་དམངས་གཙོ་ཅན་དུ་འགྱུར་ཐུབ་མིན། ཕྱོགས་གང་ཅིའི་ཤེས་ལྡན་མི་སྣ་དྲང་སྙོམས་འགྲན་རྩོད་ཀྱི་ཐོག་ནས་རྒྱལ་ཁབ་ཀྱི་འགོ་ཁྲིད་དང་དོ་དམ་མ་ལག་ཏུ་ཞུགས་ཐུབ་མིན། སྲིད་སྐྱོང་ཏང་གིས་རྩ་ཁྲིམས་དང་བཅའ་ཁྲིམས་ཀྱི་གཏན་འཁེལ་ལྟར་རྒྱལ་ཁབ་ཀྱི་ལས་དོན་ལ་འགོ་ཁྲིད་བྱེད་ཐུབ་མིན། དབང་ཆ་སྤྱོད་པར་ཚོད་འཛིན་དང་ལྟ་སྐུལ་ནུས་ལྡན་ཐེབས་ཐུབ་མིན་བཅས་ལ་བལྟ་དགོས།

(2014ལོའི་ཟླ་9ཚེས་5ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་བཙུགས་ནས་ལོ་ངོ་60འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གི་གསུང་བཤད།)

བདུན།

སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་འཕེལ་རྒྱས་གཏོང་བའི་གནད་འགག་ནི་ང་ཚོའི་དགེ་མཚན་དང་ཁྱད་ཆོས་ཆེ་རུ་གཏོང་དགོས་པ་ཡིན་པ་ལས། ང་ཚོའི་དགེ་མཚན་དང་ཁྱད་ཆོས་ཉམས་དམས་སུ་གཏོང་དགོས་པ་མ་ཡིན། ང་ཚོས་ཏང་གིས་ཁྱོན་ཡོངས་ལ་སྤྱི་འདོམས་དང་། ཕྱོགས་གང་ཅི་མཐུན་སྦྱོར་བྱེད་པའི་འགོ་ཁྲིད་ཀྱི་སྲོག་ཤིང་ནུས་པ་འདོན་སྤེལ་བྱ་རྒྱུ་རྒྱུན་འཁྱོངས་དང་། ཏང་གིས་ཚན་རིག་དང་མཐུན་པར་སྲིད་སྐྱོང་དང་། དམངས་གཙོའི་སྒོ་ནས་སྲིད་སྐྱོང་། ཁྲིམས་ལྟར་སྲིད་སྐྱོང་བཅས་བྱེད་པའི་ཆུ་ཚད་མཐོ་རུ་གཏོང་རྒྱུ་རྒྱུན་འཁྱོངས་བྱས་ནས། ཏང་གིས་མི་དམངས་ལ་འགོ་ཁྲིད་བྱས་ཏེ་རྒྱལ་ཁབ་ནུས་ལྡན་གྱིས་བཅོས་སྐྱོང་ཡོང་རྒྱུ་འགན་ལེན་བྱེད་དགོས་པ་དང་། མང་ཚོགས་ལ་འགོ་འཁྲིད་མཁན་མེད་ཅིང་སྲན་ཕུང་ཐོར་བ་ལྟ་བུའི་གནས་ཚུལ་བཀག་འགོག་ཏན་ཏིག་བྱེད་དགོས། ང་ཚོས་རྒྱལ་ཁབ་ཀྱི་དབང་ཆ་ཡོད་ཚད་མི་དམངས་ཀྱི་ཡིན་པ་རྒྱུན་འཁྱོངས་བྱས་ནས། མི་དམངས་ཀྱིས་ཁྲིམས་ལྟར་དམངས་གཙོས་འདེམས་བསྐོ་བྱེད་པར་འགན་ལེན་བྱེད་དགོས་ལ། མི་དམངས་ཀྱིས་ཁྲིམས་ལྟར་དམངས་གཙོས་ཇུས་ཐག་གཅོད་པ་དང་། དམངས་གཙོས་དོ་དམ། དམངས་གཙོས་ལྟ་སྐུལ་བཅས་བྱེད་པའང་འགན་ལེན་བྱེད་དགོས་པ་དང་། འདེམས་བསྐོ་བྱེད་སྐབས་ཁས་ལེན་མང་པོ་བྱེད་ཅིང་འདེམས་བསྐོ་བྱས་རྗེས་ཁ་ཡ་བྱེད་མཁན་གཅིག་ཀྱང་མེད་པའི་སྣང་ཚུལ་བཀག་འགོག་ཏན་ཏིག་བྱེད་དགོས། ང་ཚོས་ཀྲུང་གོའི་གུང་ཁྲན་ཏང་གིས་འགོ་ཁྲིད་བྱེད་པའི་ཏང་མང་མཉམ་ལས་དང་ཆབ་སྲིད་གྲོས་མོལ་ལམ་ལུགས་རྒྱུན་འཁྱོངས་དང་འཐུས་སྒོ་ཚང་དུ་གཏོང་བ་དང་། སྤྱི་ཚོགས་ཐོག་གི་སྟོབས་ཤུགས་ཁག་མཉམ་ལས་དང་མཐུན་སྦྱོར་ཡོང་བར་ཤུགས་བརྒྱབ་སྟེ། ཏང་ཤོག་ཁག་བར་རྩོད་རེས་རྒོལ་རེས་དང་གཅིག་མགོ་གཅིག་གནོན་བྱེད་པའི་སྣང་ཚུལ་བཀག་འགོག་ཏན་ཏིག་བྱེད་དགོས། ང་ཚོས་མི་རིགས་ས་ཁོངས་རང་སྐྱོང་ལམ་ལུགས་རྒྱུན་འཁྱོངས་དང་འཐུས་སྒོ་ཚང་དུ་གཏོང་བ་དང་། འདྲ་མཉམ་མཐུན་སྒྲིལ་རོགས་རེས་ཞི་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྲ་བརྟན་དུ་བཏང་ནས་མི་རིགས་ཁག་ཞི་མཐུན་མཉམ་གནས་དང་། ཕྱར་བ་གྲུ་འདེགས། ཞི་མཐུན་གོང་འཕེལ་བཅས་ཡོང་བར་སྐུལ་འདེད་བཏང་སྟེ། མི་རིགས་བར་འགལ་བ་འབྱུང་བ་དང་མི་རིགས་བར་གདོང་ཐུག་འབྱུང་བའི་སྣང་ཚུལ་བཀག་འགོག་ཏན་ཏིག་བྱེད་དགོས། ང་ཚོས་གཞི་རིམ་མང་ཚོགས་ཀྱི་རང་སྐྱོང་ལམ་ལུགས་རྒྱུན་འཁྱོངས་དང་འཐུས་སྒོ་ཚང་དུ་གཏོང་བ་དང་། གཞི་རིམ་དམངས་གཙོ་འཕེལ་རྒྱས་གཏོང་ཞིང་། མི་དམངས་ཀྱིས་ཁྲིམས་ལྟར་དམངས་གཙོའི་ཁེ་དབང་ཐད་ཀར་སྤྱོད་པར་འགན་སྲུང་བྱས་ཏེ། མི་དམངས་ལ་མིང་ཐོག་ཏུ་དབང་ཆ་ཡོད་ཀྱང་དོན་དངོས་སུ་དབང་ཆ་མེད་པའི་སྣང་ཚུལ་བཀག་འགོག་ཏན་ཏིག་བྱེད་དགོས། ང་ཚོས་དམངས་གཙོ་གཅིག་སྡུད་ལམ་ལུགས་ཀྱི་ལམ་ལུགས་དང་རྩ་དོན་རྒྱུན་འཁྱོངས་དང་འཐུས་སྒོ་ཚང་དུ་གཏོང་བ་དང་། རྒྱལ་ཁབ་ལས་ཁུངས་ཁག་གི་ནུས་པ་དང་ལས་ཆོད་ཆེ་རུ་གཏོང་བ་དང་། མཐུན་སྦྱོར་དང་གཞོགས་འདེགས་བྱེད་ཤུགས་ཆེ་རུ་གཏོང་བར་སྐུལ་སྤེལ་བྱས་ཐོག། རྒྱལ་སྲིད་སྐྱོང་བའི་བསྒྲིལ་ཤུགས་ཆེན་པོ་ཆགས་པར་བྱས་ཏེ། ཕན་ཚུན་འགོག་རྐྱེན་བཟོ་བ་དང་ནང་དམེ་ཚབས་ཆེན་བཟོ་བའི་སྣང་ཚུལ་བཀག་འགོག་ཏན་ཏིག་བྱེད་དགོས།

བརྒྱད།

ཏང་ཨུའི་སྐབས་བརྗེ་དང་ཡང་ན་མི་དམངས་འཐུས་ཚོགས་དང་། སྲིད་གཞུང་། སྲིད་གྲོས་བཅས་སྐབས་བརྗེ་གང་ཡིན་རུང་། ཚང་མས་བཟོ་པའི་གྲལ་རིམ་གྱིས་འགོ་ཁྲིད་བྱེད་ཅིང་བཟོ་ཞིང་མནའ་འབྲེལ་གྱིས་རྨང་གཞིར་བྱས་པའི་མི་དམངས་དམངས་གཙོའི་སྲིད་དབང་སྒེར་འཛིན་གྱི་རྒྱལ་ཁབ་སྒྲིག་སྲོལ་མཚོན་དགོས་པ་དང་། གཞི་རྩའི་མང་ཚོགས་ཀྱི་འཐུས་མིའི་བསྡུར་ཚད་འགན་ལེན་བྱེད་དགོས། ཏང་སྲིད་ལས་བྱེད་པ་དང་ཁེ་ལས་ཀྱི་འགན་ཁུར་པས་གཞི་རྩའི་མང་ཚོགས་ལ་སྤྲོད་དགོས་པའི་མིང་སྐལ་འཐེན་སྤྱོད་བྱེད་མི་རུང་། ལྐོག་གཡོས་དོན་སྒྱུར་དང་ལྐོག་ཏུ་བརྗེ་སྒྱུར་གྱི་གཡོ་ཐབས་སྤྱད་མི་ཆོག། ཀྲུང་གོའི་གུང་ཁྲན་ཏང་གིས་འགོ་ཁྲིད་བྱེད་པའི་སྤྱི་ཚོགས་རིང་ལུགས་ཀྱི་རྒྱལ་ཁབ་ཏུ་དབང་ཆ་ཡོད་ཚད་མི་དམངས་ལ་དབང་བ་ཡིན་པས། གོ་གནས་དང་། རྒྱུ་ནོར། འབྲེལ་བ་བཅས་ལ་གཞིགས་ནས་ཆབ་སྲིད་ཀྱི་དབང་ཆ་བགོ་བཤའ་རྒྱག་མི་རུང་།

(2017ལོའི་ཟླ་1ཚེས་6ཉིན་ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ལྷན་སྐབས་བཅོ་བརྒྱད་པའི་ཚང་འཛོམས་གྲོས་ཚོགས་ཐེངས་བདུན་པའི་ཐོག་གནང་བའི་གསུང་བཤད།)

དགུ།

ང་ཚོ་སྐྱོད་བཞིན་པ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆབ་སྲིད་གོང་དུ་སྤེལ་བའི་འགྲོ་ལམ་ཞིག་ཡིན་པ་དང་། མི་དམངས་དམངས་གཙོ་ནི་བརྒྱུད་རིམ་ཧྲིལ་པོའི་དམངས་གཙོ་ཞིག་ཡིན། ཁྲིམས་འཛུགས་ཀྱི་ཇུས་གཅོད་གལ་ཆེན་ཡོད་ཚད་ནི་གོ་རིམ་ལྟར་དམངས་གཙོའི་ནང་མོལ་བྱས་ཤིང་། ཚན་རིག་དང་མཐུན་པའི་ཇུས་ཐག་གཅོད་པ་དང་དམངས་གཙོས་ཇུས་ཐག་གཅོད་པར་བརྟེན་ནས་ཐོན་པ་ཡིན།

(2019ལོའི་ཟླ་11ཚེས་2ཉིན་ཧྲང་ཧའེ་གྲོང་ཁྱེར་ཁྲང་ཉིང་ཆུས་ཧུང་ཆའོ་སྲང་ལམ་ཀུའུ་པེ་གྲོང་མིའི་ལྟེ་གནས་སུ་རྟོག་ཞིབ་གནང་སྐབས་ཀྱི་གསུང་བཤད།)

བཅུ།

ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག། ཁྲིམས་ལྟར་རྒྱལ་ཁབ་སྐྱོང་བ་རྒྱུན་འཁྱོངས་བྱེད་པར་ཐོག་མར་རྩ་ཁྲིམས་ལྟར་རྒྱལ་ཁབ་སྐྱོང་བ་རྒྱུན་འཁྱོངས་བྱེད་དགོས་པ་དང་། ཁྲིམས་ལྟར་སྲིད་དོན་སྐྱོང་བ་རྒྱུན་འཁྱོངས་བྱེད་པར་ཐོག་མར་རྩ་ཁྲིམས་ལྟར་སྲིད་དོན་སྐྱོང་བ་རྒྱུན་འཁྱོངས་བྱེད་དགོས་ཞེས་གསལ་པོར་བཏོན་ཡོད། ང་ཚོས་རྩ་ཁྲིམས་ལྟར་རྒྱལ་ཁབ་སྐྱོང་བ་དང་རྩ་ཁྲིམས་ལྟར་སྲིད་དོན་སྐྱོང་བ་ཞེས་བཤད་པ་དེ་ནུབ་ཕྱོགས་ཀྱི་“ཁྲིམས་སྲིད་”ཟེར་བ་དང་ངོ་བོའི་ཐོག་ནས་ཁྱད་པར་ཡོད་པས་དེ་གཉིས་ཉ་ཉུང་མཉམ་བསྲེས་བྱེད་མི་རུང་། རྩ་ཁྲིམས་ལྟར་རྒྱལ་ཁབ་སྐྱོང་བ་དང་རྩ་ཁྲིམས་ལྟར་སྲིད་དོན་སྐྱོང་བ་རྒྱུན་འཁྱོངས་བྱ་རྒྱུའི་ངོས་ནས་བཤད་ན། རྩ་ཁྲིམས་ནང་གཏན་ལ་ཕབ་པའི་ཀྲུང་གོའི་གུང་ཁྲན་ཏང་གི་འགོ་ཁྲིད་གོ་གནས་རྒྱུན་འཁྱོངས་བྱས་ནས་གཡོ་འགུལ་མི་གཏོང་བ་དང་། རྩ་ཁྲིམས་ནང་གཏན་ལ་ཕབ་པའི་མི་དམངས་དམངས་གཙོའི་སྲིད་དབང་སྒེར་འཛིན་གྱི་རྒྱལ་ཁབ་ཀྱི་སྒྲིག་སྲོལ་དང་མི་དམངས་འཐུས་མིའི་ཚོགས་ཆེན་ལམ་ལུགས་ཀྱི་སྲིད་ལུགས་རྒྱུན་འཁྱོངས་བྱས་ནས་གཡོ་འགུལ་མི་གཏོང་བ་བཅས་ཚུད་ཡོད།

(2020ལོའི་ཟླ་11ཚེས་16ཉིན་ཀྲུང་དབྱང་གི་ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བའི་ལས་དོན་ཚོགས་འདུའི་ཐོག་གནང་བའི་གསུང་བཤད།)

བཅུ་གཅིག།

ལོ་ངོ་60ལྷག་དང་ལྷག་པར་དུ་བསྒྱུར་བཅོས་སྒོ་འབྱེད་བྱས་ནས་ལོ་ངོ་40ལྷག་སོང་རིང་། མི་དམངས་འཐུས་མིའི་ཚོགས་ཆེན་གྱི་ལམ་ལུགས་ཀྱིས་ཏང་གིས་མི་དམངས་ལ་འགོ་ཁྲིད་བྱས་ཏེ་དཔལ་འབྱོར་མགྱོགས་མྱུར་འཕེལ་རྒྱས་ཡོང་བའི་ངོ་མཚར་དང་སྤྱི་ཚོགས་ཡུན་རིང་བརྟན་བརླིང་ཡིན་པའི་ངོ་མཚར་བཏོད་པར་ལམ་ལུགས་ཀྱི་འགན་སྲུང་གལ་ཆེན་མཁོ་འདོན་བྱས་ཡོད།

མི་དམངས་འཐུས་མིའི་ཚོགས་ཆེན་གྱི་ལམ་ལུགས་ནི་རང་རྒྱལ་གྱི་རྒྱལ་ཁབ་གནས་ཚུལ་དང་དོན་དངོས་དང་མཐུན་པ་དང་། སྤྱི་ཚོགས་རིང་ལུགས་ཀྱི་རྒྱལ་ཁབ་ཀྱི་ངོ་བོ་མཚོན་པ། མི་དམངས་ཀྱིས་རང་ཁྱིམ་རང་བདག་བྱེད་པར་འགན་ལེན། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་ཡོང་བར་འགན་སྲུང་བཅས་བྱེད་པའི་ལམ་ལུགས་བཟང་པོ་ཞིག་ཡིན་ལ། ང་ཚོའི་ཏང་གིས་མི་དམངས་ཀྱི་འགོ་ཁྲིད་དེ་མིའི་རིགས་ཀྱི་ཆབ་སྲིད་ལམ་ལུགས་ལོ་རྒྱུས་ཐོག་གི་གསར་གཏོད་རླབས་པོ་ཆེ་ཞིག་དང་། རང་རྒྱལ་གྱི་ཆབ་སྲིད་འཕེལ་རྒྱས་ཀྱི་ལོ་རྒྱུས་དང་ཐ་ན་འཛམ་གླིང་གི་ཆབ་སྲིད་འཕེལ་རྒྱས་ཀྱི་ལོ་རྒྱུས་ཐོག་དོན་སྙིང་གལ་ཆེན་ལྡན་པའི་ཆབ་སྲིད་ལམ་ལུགས་གསར་རྐྱང་ཞིག་ཀྱང་ཡིན་པ་ལག་ལེན་ལས་ར་སྤྲོད་བྱུང་ཡོད།

(2021ལོའི་ཟླ་10ཚེས་13ཉིན་ཀྲུང་དབྱང་གི་མི་དམངས་འཐུས་ཚོགས་ཀྱི་ལས་དོན་གྲོས་ཚོགས་ཐོག་གནང་བའི་གསུང་བཤད།)

བཅུ་གཉིས།

མི་དམངས་འཐུས་མིའི་ཚོགས་ཆེན་གྱི་ལམ་ལུགས་ཀྱིས་ཀྲུང་གོའི་གུང་ཁྲན་ཏང་གི་འགོ་ཁྲིད་རྒྱུན་འཁྱོངས་དང་། མར་ཁེ་སིའི་རིང་ལུགས་ཀྱི་རྒྱལ་ཁབ་སྐོར་གྱི་རིགས་པའི་གཞུང་ལུགས་ཀྱི་གཞི་རྩའི་རྩ་དོན་རྒྱུན་འཁྱོངས། མི་དམངས་དམངས་གཙོའི་སྲིད་དབང་སྒེར་འཛིན་གྱི་རྒྱལ་ཁབ་སྒྲིག་གཞི་དང་འཚམ་མཐུན་བཅས་བྱས་ཏེ། རྒྱལ་ཁབ་སྤྱི་ཚོགས་རིང་ལུགས་ཀྱི་འགྲོ་ལམ་དེད་ནས་མདུན་དུ་བསྐྱོད་པར་འགན་ལེན་ནུས་ལྡན་བྱེད་པ་ཡིན། མི་དམངས་འཐུས་མིའི་ཚོགས་ཆེན་གྱི་ལམ་ལུགས་ཀྱིས་རྒྱལ་ཁབ་ཀྱི་དབང་ཆ་ཡོད་ཚད་མི་དམངས་ལ་དབང་བ་རྒྱུན་འཁྱོངས་དང་། ཚད་གང་ཆེའི་ཐོག་ནས་མི་དམངས་ཀྱིས་རང་ཁྱིམ་རང་བདག་བྱེད་པ་འགན་སྲུང་། ཏང་གི་འགོ་ཁྲིད་དང་། མི་དམངས་ཀྱིས་རང་ཁྱིམ་རང་བདག་བྱེད་པ། ཁྲིམས་ལྟར་རྒྱལ་ཁབ་སྐྱོང་བ་གསུམ་གཞི་མཐུན་པར་གཅིག་གྱུར་བཅས་བྱས་ཏེ། རྒྱལ་ཁབ་ཀྱི་བཅོས་སྐྱོང་དེ་འཇགས་ཟིང་དར་རྒུད་ཀྱི་ལོ་རྒྱུས་རེས་འཁོར་གྱི་ཡུན་ཚད་ལས་ཐར་ཐུབ་པའི་འགན་ལེན་ནུས་ལྡན་བྱེད་པ་ཡིན། མི་དམངས་འཐུས་མིའི་ཚོགས་ཆེན་གྱི་ལམ་ལུགས་ཀྱིས་རྒྱལ་ཁབ་ཀྱི་མདུན་ལམ་དང་ལས་དབང་དང་འབྲེལ་བ་ཡོད་པའི་གནད་ཆེའི་ཆབ་སྲིད་ཀྱི་འབྲེལ་བ་རབ་དང་རིམ་པ་ཡང་དག་པར་ཐག་གཅོད་དང་། རྒྱལ་ཁབ་ཀྱིས་གཅིག་གྱུར་དང་ཆོད་ཆེའི་སྒོ་ནས་བྱ་གཞག་ཁག་སྒྲིག་འཛུགས་བྱ་རྒྱུ་མངོན་འགྱུར། རྒྱལ་ཁབ་ཀྱི་གཅིག་གྱུར་དང་མི་རིགས་ཀྱི་མཐུན་སྒྲིལ་སྲུང་སྐྱོང་བཅས་བྱས་ཏེ། རྒྱལ་ཁབ་ཀྱི་ཆབ་སྲིད་འཚོ་བར་སྐྱེ་སྟོབས་དང་གསོན་ཤུགས་རྒྱས་ལ་བརྟན་བརླིང་དང་སྒྲིག་ལམ་ཡང་ལྡན་པ་འགན་ལེན་ནུས་ལྡན་བྱེད་པ་ཡིན།

བཅུ་གསུམ།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་ཀྲུང་དབྱང་གིས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བའི་འཐབ་ཇུས་ཀྱི་ཁྱོན་ཡོངས་དང་འཛམ་གླིང་གི་ལོ་བརྒྱའི་རིང་བྱུང་མ་མྱོང་བའི་འཕོ་འགྱུར་ཆེན་པོར་གཅིག་འདོམས་བྱས་ཏེ། ཏང་གི་འགོ་ཁྲིད་རྒྱུན་འཁྱོངས་དང་འཐུས་ཚང་དུ་གཏོང་བ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་སྲ་བརྟན་གཏོང་བའི་འཐབ་ཇུས་ཀྱི་མཐོ་ཚད་ནས་འགོ་བརྩམས་ཏེ། མི་དམངས་འཐུས་མིའི་ཚོགས་ཆེན་ལམ་ལུགས་ཀྱི་རིགས་པའི་གཞུང་ལུགས་དང་ལག་ལེན་གྱི་གསར་གཏོད་ལ་མུ་མཐུད་དུ་སྐུལ་འདེད་བཏང་བ་དང་། འདུ་ཤེས་གསར་པ་དང་བསམ་བློ་གསར་པ་དང་བླང་བྱ་གསར་པ་བཅས་རབ་དང་རིམ་པ་བཏོན་ཡོད། གཙོ་བོར་གཤམ་གསལ་གྱི་ཕྱོགས་འགའ་ཡོད་དེ།

གཅིག་ནི་ངེས་པར་དུ་ཀྲུང་གོའི་གུང་ཁྲན་ཏང་གི་འགོ་ཁྲིད་རྒྱུན་འཁྱོངས་བྱེད་དགོས། ཏང་གིས་ཁྱོན་ཡོངས་སྤྱི་འདོམས་དང་ཕྱོགས་གང་ཅི་མཐུན་སྦྱོར་བྱེད་པའི་འགོ་ཁྲིད་སྲོག་ཤིང་གི་ནུས་པ་རྒྱུན་འཁྱོངས་དང་། ཏང་ཀྲུང་དབྱང་གི་དབང་གྲགས་དང་གཅིག་སྡུད་གཅིག་གྱུར་གྱི་འགོ་ཁྲིད་མཐའ་གཅིག་ཏུ་སྲུང་སྐྱོང་། ཏང་གི་རིགས་པའི་གཞུང་ལུགས་དང་། ལམ་ཕྱོགས། བྱེད་ཕྱོགས་སྲིད་ཇུས། ཐབས་ཇུས་བཀོད་སྒྲིག་བཅས་རྒྱལ་ཁབ་ཀྱི་ལས་དོན་ནང་དུ་ཕྱོགས་ཡོངས་ནས་ལག་ལེན་མཐར་ཕྱིན་བྱེད་པ་དང་ནུས་ལྡན་གྱིས་ལག་བསྟར་ཡོང་རྒྱུ་འགན་ལེན་བྱེད་དགོས་པ་དང་། རྒྱལ་ཁབ་ཀྱི་སྲིད་དབང་ལས་ཁུངས་ཀྱིས་རྩ་ཁྲིམས་དང་བཅའ་ཁྲིམས་ལྟར་ཧུར་བརྩོན་རང་འགུལ་དང་། རང་ཚུགས་འགན་འཁུར། མཐུན་སྦྱོར་གཅིག་གྱུར་བཅས་ཀྱི་སྒོ་ནས་ལས་དོན་སྒྲུབ་པར་རྒྱབ་སྐྱོར་དང་འགན་ལེན་བྱེད་དགོས། ཏང་གི་འགོ་ཁྲིད་ལ་ཤུགས་སྣོན་དང་ལེགས་སྒྱུར་བྱེད་པ་དང་། ཏང་གི་འདོད་བློ་ཁྲིམས་བཀོད་ཀྱི་ལས་རིམ་བརྒྱུད་དེ་རྒྱལ་ཁབ་ཀྱི་འདོད་བློ་རུ་སྒྱུར་མཁས་པོ་དང་། ཏང་རྩ་འཛུགས་ཀྱིས་འོས་སྦྱོར་བྱས་པའི་འོས་མི་ཁྲིམས་བཀོད་ཀྱི་ལས་རིམ་བརྒྱུད་དེ་རྒྱལ་ཁབ་སྲིད་དབང་ལས་ཁུངས་ཀྱི་འགོ་ཁྲིད་མི་སྣར་སྒྱུར་མཁས་པོ། རྒྱལ་ཁབ་ཀྱི་སྲིད་དབང་ལས་ཁུངས་ལ་བརྟེན་ནས་ཏང་གིས་རྒྱལ་ཁབ་དང་སྤྱི་ཚོགས་ལ་འགོ་ཁྲིད་བྱ་རྒྱུ་ལག་བསྟར་བྱེད་མཁས་པོ། ཏང་དང་རྒྱལ་ཁབ་ཀྱི་དབང་གྲགས་སྲུང་སྐྱོང་དང་། ཏང་ཡོངས་དང་རྒྱལ་ཡོངས་ཀྱི་མཐུན་སྒྲིལ་གཅིག་གྱུར་སྲུང་སྐྱོང་བཅས་བྱེད་དགོས།

གཉིས་ནི་ངེས་པར་དུ་ལམ་ལུགས་ཀྱི་མ་ལག་སྤྱད་དེ་མི་དམངས་ཀྱིས་རང་ཁྱིམ་རང་བདག་བྱེད་པ་འགན་སྲུང་བྱ་རྒྱུ་རྒྱུན་འཁྱོངས་བྱེད་དགོས། མི་དམངས་ལྟེ་བར་འཛིན་པ་རྒྱུན་འཁྱོངས་དང་། རྒྱལ་ཁབ་ཀྱི་དབང་ཆ་ཡོད་ཚད་མི་དམངས་ལ་དབང་བ་རྒྱུན་འཁྱོངས། མི་དམངས་ཀྱིས་མི་དམངས་འཐུས་མིའི་ཚོགས་ཆེན་བརྒྱུད་ནས་རྒྱལ་ཁབ་ཀྱི་དབང་ཆ་སྤྱོད་པར་རྒྱབ་སྐྱོར་དང་འགན་ལེན། དམངས་གཙོའི་ལམ་ལུགས་ཆ་ཚང་དུ་གཏོང་བ། དམངས་གཙོའི་རྣམ་པ་ཕུན་སུམ་ཚོགས་པོར་གཏོང་བ། དམངས་གཙོའི་ཐབས་ལམ་རྒྱ་སྐྱེད་གཏོང་བ། མི་དམངས་འདྲ་མཉམ་ངང་ཞུགས་པ་དང་འདྲ་མཉམ་ངང་འཕེལ་རྒྱས་ཡོང་བའི་ཁེ་དབང་འགན་ལེན། སྔར་བས་ཁྱབ་རྒྱ་ཆེ་བ་དང་། སྔར་བས་མཐར་ཕྱིན་པ། སྔར་བས་ཆ་ཚང་བ་བཅས་ཀྱི་བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་གཏོང་བ་བཅས་བྱེད་དགོས།

གསུམ་ནི་ངེས་པར་དུ་ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་རྒྱུ་རྒྱུན་འཁྱོངས་བྱེད་དགོས། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་འགྲོ་ལམ་དུ་བསྐྱོད་རྒྱུ་རྒྱུན་འཁྱོངས་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་འཛུགས་སྐྲུན། སྤྱི་ཚོགས་རིང་ལུགས་ཀྱི་ཁྲིམས་སྐྱོང་རྒྱལ་ཁབ་འཛུགས་སྐྲུན། སྤྱི་ཚོགས་རིང་ལུགས་ཀྱི་ཁྲིམས་སྐྱོང་དགོངས་དོན་དར་སྤེལ། རྩ་ཁྲིམས་དང་བཅའ་ཁྲིམས་ལྟར་རྒྱལ་ཁབ་ཀྱི་བྱ་གཞག་ཁག་དང་ལས་དོན་ཁག་ལ་སྐུལ་འདེད། སྤྱི་ཚོགས་ཀྱི་དྲང་སྙོམས་དང་དྲང་བདེན་སྲུང་སྐྱོང་། འགྲོ་བ་མིའི་ཐོབ་ཐང་ལ་བརྩི་འཇོག་དང་འགན་སྲུང་བཅས་བྱས་ཏེ། རྒྱལ་ཁབ་ཀྱི་ལས་དོན་ཁག་ཁྲིམས་སྐྱོང་ཅན་དུ་འགྱུར་བར་བྱེད་དགོས།

བཞི་ནི་ངེས་པར་དུ་དམངས་གཙོ་གཅིག་སྡུད་ལམ་ལུགས་རྒྱུན་འཁྱོངས་བྱེད་དགོས། མི་དམངས་ཀྱིས་མི་དམངས་འཐུས་མིའི་ཚོགས་ཆེན་བརྒྱུད་ནས་གཅིག་གྱུར་ཐོག་རྒྱལ་ཁབ་ཀྱི་དབང་ཆ་སྤྱོད་རྒྱུ་རྒྱུན་འཁྱོངས་བྱ་རྒྱུ་དང་། མི་དམངས་འཐུས་མིའི་ཚོགས་ཆེན་རིམ་པ་ཁག་དམངས་གཙོས་འདེམས་བསྐོ་བྱས་ནས་ཐོན་རྒྱུ་དང་། དེས་མི་དམངས་ལ་འགན་འཁྲི་འཁུར་རྒྱུ་དང་། མི་དམངས་ཀྱི་ལྟ་སྐུལ་དང་ལེན་བྱ་རྒྱུ། རྒྱལ་ཁབ་སྲིད་འཛིན་ལས་ཁུངས་དང་། ལྟ་ཞིབ་ལས་ཁུངས། འདྲི་གཅོད་ལས་ཁུངས། ཞིབ་དཔྱོད་ལས་ཁུངས་བཅས་རིམ་པ་ཁག་ཚང་མ་མི་དམངས་འཐུས་མིའི་ཚོགས་ཆེན་བརྒྱུད་ནས་ཐོན་རྒྱུ་དང་། དེ་དག་གིས་མི་དམངས་འཐུས་ཚོགས་ལ་འགན་འཁྲི་འཁུར་རྒྱུ་དང་། མི་དམངས་འཐུས་ཚོགས་ཀྱི་ལྟ་སྐུལ་དང་ལེན་བྱ་རྒྱུ། ཇུས་ཐག་གཅོད་དབང་དང་། ལག་བསྟར་བྱེད་དབང་། ལྟ་སྐུལ་བྱེད་དབང་བཅས་ལས་བགོས་ལུགས་མཐུན་ཡིན་ལ་ཕན་ཚུན་མཐུན་སྦྱོར་ཡང་ཡིན་པ་ལག་བསྟར་བྱས་ཏེ། རྒྱལ་ཁབ་ཀྱི་ལས་ཁུངས་ཀྱིས་ཁྲིམས་བཀོད་ཀྱི་དབང་ཚད་དང་ལས་རིམ་ལྟར་འགན་དབང་སྤྱོད་པ་དང་འགན་འཁྲི་བསྒྲུབ་རྒྱུ་འགན་ལེན་བྱེད་པ་དང་། ཏང་ཀྲུང་དབྱང་གིས་གཅིག་གྱུར་འགོ་ཁྲིད་རྒྱུན་འཁྱོངས་བྱས་འོག། ས་གནས་ཀྱི་རང་འགུལ་རང་བཞིན་དང་ཧུར་བརྩོན་རང་བཞིན་འདོན་སྤེལ་གང་ལེགས་བྱས་ཏེ། རྒྱལ་ཁབ་ཀྱིས་གཅིག་གྱུར་དང་གོ་འཕེར་བའི་སྒོ་ནས་བྱ་གཞག་ཁག་སྒྲིག་འཛུགས་དང་སྐུལ་འདེད་གཏོང་རྒྱུ་འགན་ལེན་བྱེད་དགོས།

ལྔ་ནི་ངེས་པར་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆབ་སྲིད་འཕེལ་རྒྱས་ཀྱི་འགྲོ་ལམ་རྒྱུན་འཁྱོངས་བྱེད་དགོས། ཏང་གི་འགོ་ཁྲིད་རྒྱུན་འཁྱོངས་དང་། མི་དམངས་ཀྱིས་རང་ཁྱིམ་རང་བདག་བྱེད་པ། ཁྲིམས་ལྟར་རྒྱལ་ཁབ་སྐྱོང་བ་བཅས་གཞི་མཐུན་པར་གཅིག་གྱུར་བྱེད་པའི་སྲོག་ཤིང་ནི་ཏང་གི་འགོ་ཁྲིད་རྒྱུན་འཁྱོངས་བྱེད་པ་དེ་ཡིན། མི་དམངས་འཐུས་མིའི་ཚོགས་ཆེན་གྱི་ལམ་ལུགས་ནི་ཏང་གི་འགོ་ཁྲིད་རྒྱུན་འཁྱོངས་དང་། མི་དམངས་ཀྱིས་རང་ཁྱིམ་རང་བདག་བྱེད་པ། ཁྲིམས་ལྟར་རྒྱལ་ཁབ་སྐྱོང་བ་བཅས་གཞི་མཐུན་པར་གཅིག་གྱུར་བྱེད་པའི་རྩ་བའི་ཆབ་སྲིད་ལམ་ལུགས་ཀྱི་བཀོད་སྒྲིག་ཡིན་པ་དང་། དེས་ཏང་གིས་མི་དམངས་ལ་སྣེ་ཁྲིད་དེ་ཁྲིམས་ལྟར་རྒྱལ་ཁབ་བཅོས་སྐྱོང་ནུས་ལྡན་བྱེད་པ་འགན་ལེན་བྱེད་པ་ཡིན། མིའི་རིགས་ཀྱི་ཆབ་སྲིད་དཔལ་ཡོན་གྱི་དགེ་མཚན་ལྡན་པའི་གྲུབ་འབྲས་ལ་དཔེ་ལྟ་ཆོག་མོད། འོན་ཀྱང་ནུབ་ཕྱོགས་ཀྱི་ཆབ་སྲིད་ལམ་ལུགས་ཀྱི་དཔེ་སྲོལ་འདྲ་བཤུ་གཏན་ནས་བྱེད་མི་རུང་།

དྲུག་ནི་ངེས་པར་དུ་རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་སྐུལ་འདེད་གཏོང་རྒྱུ་རྒྱུན་འཁྱོངས་བྱེད་དགོས། མི་དམངས་འཐུས་མིའི་ཚོགས་ཆེན་གྱི་ལམ་ལུགས་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལམ་ལུགས་ཀྱི་གྲུབ་ཆ་གལ་ཆེན་ཞིག་ཡིན་ལ། རྒྱལ་ཁབ་བཅོས་སྐྱོང་མ་ལག་གི་གྲུབ་ཆ་གལ་ཆེན་ཞིག་ཀྱང་ཡིན། མི་དམངས་ཀྱིས་རང་ཁྱིམ་རང་བདག་བྱེད་པའི་ལམ་ལུགས་ཀྱི་མ་ལག་རྒྱུན་འཁྱོངས་དང་འཐུས་ཚང་དུ་གཏོང་བ་དང་། སྤྱི་ཚོགས་རིང་ལུགས་ཀྱི་དམངས་གཙོའི་ཆབ་སྲིད་ལམ་ལུགས་ཅན་དང་ཚད་ལྡན་ཅན་དང་ལས་རིམ་ཅན་དུ་རྒྱུན་ཆད་མེད་པར་སྐུལ་འདེད་བཏང་སྟེ། ལམ་ལུགས་ཀྱི་དགེ་མཚན་དེ་བཅོས་སྐྱོང་ཕན་འབྲས་སུ་སྔར་ལས་ལྷག་པར་བསྒྱུར་དགོས།

བཅུ་བཞི།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ང་ཚོས་དམངས་གཙོའི་ཆབ་སྲིད་ཀྱི་འཕེལ་རྒྱས་ཆོས་ཉིད་ཀྱི་ངོས་འཛིན་ཇེ་ཟབ་ཏུ་བཏང་ནས། བརྒྱུད་རིམ་ཧྲིལ་པོའི་མི་དམངས་དམངས་གཙོའི་གནད་ཆེའི་ལྟ་བ་བཏོན་ཡོད། རང་རྒྱལ་གྱི་བརྒྱུད་རིམ་ཧྲིལ་པོའི་མི་དམངས་དམངས་གཙོ་ལ་ལམ་ལུགས་ཀྱི་ལས་རིམ་ཆ་ཚང་ཞིག་ལྡན་ཡོད་པར་མ་ཟད། ཐེ་ཞུགས་ཀྱི་ལག་ལེན་ཆ་ཚང་ཞིག་ཀྱང་ལྡན་ཡོད་པ་ཡིན། རང་རྒྱལ་གྱི་བཟོ་པའི་གྲལ་རིམ་གྱིས་འགོ་ཁྲིད་བྱེད་ཅིང་བཟོ་ཞིང་མནའ་འབྲེལ་གྱིས་རྨང་གཞིར་བྱས་པའི་མི་དམངས་དམངས་གཙོའི་སྲིད་དབང་སྒེར་འཛིན་གྱི་རྒྱལ་ཁབ་སྒྲིག་གཞི་དང་། མི་དམངས་འཐུས་མིའི་ཚོགས་ཆེན་ལམ་ལུགས་ཀྱི་སྲིད་དབང་སྒྲིག་གཞི། ཀྲུང་གོའི་གུང་ཁྲན་ཏང་གིས་འགོ་ཁྲིད་བྱེད་པའི་ཏང་མང་མཉམ་ལས་དང་ཆབ་སྲིད་གྲོས་མོལ་ལམ་ལུགས། མི་རིགས་ས་ཁོངས་རང་སྐྱོང་ལམ་ལུགས། གཞི་རིམ་མང་ཚོགས་ཀྱི་རང་སྐྱོང་ལམ་ལུགས་སོགས་གཞི་རྩའི་ཆབ་སྲིད་ལམ་ལུགས་ལག་བསྟར་བྱེད་པ་དང་། ཆེས་རྒྱ་ཆེ་བའི་རྒྱལ་གཅེས་འཐབ་ཕྱོགས་གཅིག་གྱུར་སྲ་བརྟན་དང་འཕེལ་རྒྱས་བཏང་བའི་ཐོག་ནས་ཕྱོགས་ཡོངས་དང་རྒྱ་ཆེ་ལ་འབྲེལ་མཐུད་དམ་ཚགས་ཡོང་བའི་མི་དམངས་ཀྱིས་རང་ཁྱིམ་རང་བདག་བྱེད་པའི་ལམ་ལུགས་མ་ལག་ཆགས་ཡོད་པ་དང་། སྣ་མང་ཤར་བགྲོད་སྲོལ་ལྡན་བཅས་ཀྱི་དམངས་གཙོའི་ཐབས་ལམ་བསྐྲུན་ཡོད། མི་དམངས་ཡོངས་རྫོགས་ཀྱིས་ཁྲིམས་ལྟར་དམངས་གཙོས་འདེམས་བསྐོ་དང་། དམངས་གཙོས་གྲོས་མོལ། དམངས་གཙོས་ཇུས་གཅོད། དམངས་གཙོས་དོ་དམ། དམངས་གཙོས་ལྟ་སྐུལ་བཅས་ལག་བསྟར་བྱེད་ཀྱི་ཡོད་པ་དང་། ཁྲིམས་ལྟར་ཐབས་ལམ་དང་བྱེད་སྟངས་སྣ་ཚོགས་བརྒྱུད་ནས་རྒྱལ་ཁབ་ཀྱི་ལས་དོན་དོ་དམ་དང་། དཔལ་འབྱོར་དང་རིག་གནས་ཀྱི་བྱ་གཞག་དོ་དམ། སྤྱི་ཚོགས་ཀྱི་ལས་དོན་དོ་དམ་བཅས་བྱེད་ཀྱི་ཡོད། རང་རྒྱལ་གྱི་བརྒྱུད་རིམ་ཧྲིལ་པོའི་མི་དམངས་དམངས་གཙོ་ལས་གོ་རིམ་དམངས་གཙོ་དང་འབྲས་བུ་དམངས་གཙོ་དང་། ལས་རིམ་དམངས་གཙོ་དང་དོན་དངོས་དམངས་གཙོ། ཐད་ཀའི་དམངས་གཙོ་དང་གཞན་བརྒྱུད་དམངས་གཙོ། མི་དམངས་དམངས་གཙོ་དང་རྒྱལ་ཁབ་ཀྱི་འདོད་བློ་བཅས་ཕན་ཚུན་གཅིག་གྱུར་བྱུང་ཡོད་པ་དང་། དེ་ནི་འབྲེལ་ཐག་ཡོངས་དང་། ཕྱོགས་མཐའ་ཡོངས། ཀུན་ལ་ཁྱབ་པ་བཅས་ཀྱི་དམངས་གཙོ་ཡིན་པ་དང་། ཁྱབ་རྒྱ་ཆེ་ཤོས་དང་། དོན་དངོས་དང་མཐུན་ཤོས། གོ་ཆོད་ཤོས་བཅས་ཀྱི་སྤྱི་ཚོགས་རིང་ལུགས་ཀྱི་དམངས་གཙོའང་ཡིན། ང་ཚོས་བརྒྱུད་རིམ་ཧྲིལ་པོའི་མི་དམངས་དམངས་གཙོ་འཛུགས་སྐྲུན་ལ་མུ་མཐུད་དུ་སྐུལ་འདེད་བཏང་ནས། མི་དམངས་ཀྱིས་རང་ཁྱིམ་རང་བདག་བྱེད་པ་དེ་ཏང་གིས་རྒྱལ་སྲིད་སྐྱོང་བའི་སྲིད་ཇུས་དང་ཐབས་བཀོད་ཀྱི་ཐོག་ནས་བྱེ་བྲག་དང་མངོན་སུམ་དུ་མཚོན་དགོས་པ་དང་། ཏང་དང་རྒྱལ་ཁབ་ལས་ཁུངས་ཀྱི་ཕྱོགས་སོ་སོ་དང་རིམ་པ་སོ་སོའི་ལས་དོན་གྱི་ཐོག་ནས་བྱེ་བྲག་དང་མངོན་སུམ་དུ་མཚོན་དགོས་ཤིང་། མི་དམངས་ཀྱིས་དགའ་སྐྱིད་ལྡན་པའི་འཚོ་བར་བཅངས་པའི་རེ་སྨོན་མངོན་འགྱུར་བྱེད་པའི་ལས་དོན་གྱི་ཐོག་ནས་བྱེ་བྲག་དང་མངོན་སུམ་དུ་མཚོན་དགོས།

བཅོ་ལྔ།

མི་དམངས་འཐུས་མིའི་ཚོགས་ཆེན་གྱི་ལམ་ལུགས་ནི་རང་རྒྱལ་གྱི་བརྒྱུད་རིམ་ཧྲིལ་པོའི་མི་དམངས་དམངས་གཙོ་མངོན་འགྱུར་བྱེད་པའི་ལམ་ལུགས་ཀྱི་རྟེན་གཞི་གལ་ཆེན་ཞིག་ཡིན། ཏང་གི་འགོ་ཁྲིད་འོག། མི་དམངས་ལུགས་ལྡན་ངང་ཆབ་སྲིད་ལ་ཐེ་ཞུགས་བྱེད་རྒྱ་རྒྱུན་ཆད་མེད་པར་ཆེ་རུ་སྐྱེད་པ་དང་། ཁྲིམས་སྐྱོང་གི་ཐོག་ནས་འགྲོ་བ་མིའི་ཐོབ་ཐང་འགན་སྲུང་བྱེད་པར་ཤུགས་སྣོན། མི་དམངས་ལ་ཁྲིམས་ལྟར་ཁྱབ་རྒྱ་ཆེ་བའི་ཁེ་དབང་དང་རང་དབང་ལོངས་སུ་སྤྱོད་རྒྱུ་ཡོད་པ་འགན་ལེན་བཅས་བྱེད་དགོས། མི་དམངས་ཀྱིས་ཁྲིམས་ལྟར་འདེམས་བསྐོའི་ཁེ་དབང་སྤྱོད་རྒྱུ་དང་། དམངས་གཙོས་འདེམས་བསྐོ་བྱས་ནས་མི་དམངས་འཐུས་ཚོགས་ཀྱི་འཐུས་མི་བདམས་ཐོན་ཡོང་རྒྱུ་འགན་ལེན་བྱེད་དགོས་པ་དང་། མི་དམངས་ཀྱི་གནས་ཚུལ་ཤེས་དབང་དང་། ཐེ་ཞུགས་བྱེད་དབང་། འདོད་བློ་མཚོན་དབང་། ལྟ་སྐུལ་བྱེད་དབང་བཅས་མི་དམངས་འཐུས་ཚོགས་ལས་དོན་གྱི་ཕྱོགས་སོ་སོ་དང་ལྷུ་ཚིགས་སོ་སོ་དང་བརྒྱུད་རིམ་ཧྲིལ་པོར་དོན་འཁྱོལ་བྱ་རྒྱུ་འགན་ལེན་བྱེད་དགོས་ཤིང་། ཏང་དང་རྒྱལ་ཁབ་ཀྱིས་ཇུས་གཅོད་དང་། ལག་བསྟར། ལྟ་སྐུལ་དོན་འཁྱོལ་བཅས་བྱེད་པའི་ལྷུ་ཚིགས་ཁག་ཏུ་མི་དམངས་ཀྱི་སྐད་ཆ་ཐོས་ཐུབ་པ་འགན་ལེན་ཏན་ཏིག་བྱེད་དགོས། མི་དམངས་འཐུས་ཚོགས་ཀྱི་དམངས་གཙོ་དང་མི་དམངས་ཀྱི་འདོད་བློ་མཚོན་པའི་ལས་སྟེགས་དང་རྟེན་གཞི་འཐུས་ཚང་དུ་གཏོང་བ་དང་། མི་དམངས་ཀྱི་འདོད་བློ་བསྡུ་ལེན་དང་། མི་དམངས་ཀྱི་བློ་གྲོས་གཅིག་སྒྲིལ་བྱེད་པའི་ལས་དོན་ལམ་སྲོལ་ཆ་ཚང་དུ་གཏོང་བ། མི་དམངས་འཐུས་ཚོགས་ཀྱི་གྲོས་མོལ་དང་ཁྲིམས་འཛུགས་ཀྱི་གྲོས་མོལ་ལ་སྐུལ་འདེད་གཏོང་བ་བཅས་ཀྱི་ཐོག་ནས་ཕྱོགས་སོ་སོའི་སྤྱི་ཚོགས་ཀྱི་གནས་ཚུལ་དང་མི་དམངས་ཀྱི་འདོད་བློ་དེ་ཆེས་རྒྱ་ཆེ་བའི་མི་དམངས་ཀྱི་རྩ་བའི་ཁེ་ཕན་དང་གཅིག་གྱུར་ཡོང་བར་བྱེད་དགོས། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དམངས་གཙོ་དང་མི་དམངས་འཐུས་མིའི་ཚོགས་ཆེན་ལམ་ལུགས་ཀྱི་ཞིབ་འཇུག་དང་དྲིལ་བསྒྲགས་ལས་དོན་ལ་ཤུགས་བརྒྱབ་ནས་རང་རྒྱལ་གྱི་ཆབ་སྲིད་ལམ་ལུགས་ཀྱི་ཁྱད་ཆོས་དང་དགེ་མཚན་གསལ་པོར་བཤད་དགོས་པ་དང་། ཀྲུང་གོའི་དམངས་གཙོའི་གཏམ་རྒྱུད་ཡག་པོར་བཤད་དགོས།

བཅུ་དྲུག།

མི་དམངས་འཐུས་ཚོགས་ཀྱི་འཐུས་མི་འདེམས་བསྐོ་བྱ་རྒྱུ་ནི་མི་དམངས་འཐུས་མིའི་ཚོགས་ཆེན་ལམ་ལུགས་ཀྱི་རྨང་གཞི་དང་མི་དམངས་ཀྱིས་རང་ཁྱིམ་རང་བདག་བྱེད་པའི་མཚོན་ཚུལ་གལ་ཆེན་ཞིག་ཡིན། དམངས་གཙོས་འདེམས་བསྐོ་དང་། དམངས་གཙོས་གྲོས་མོལ། དམངས་གཙོས་ཇུས་གཅོད། དམངས་གཙོས་དོ་དམ། དམངས་གཙོས་ལྟ་སྐུལ་བཅས་བྱེད་པའི་ལྷུ་ཚིགས་ཚང་མ་འབྲེལ་མཐུད་བྱས་ཏེ། བརྒྱུད་རིམ་ཧྲིལ་པོའི་མི་དམངས་དམངས་གཙོ་རྒྱུན་ཆད་མེད་པར་འཕེལ་རྒྱས་བཏང་ནས་མི་དམངས་ཀྱིས་རང་ཁྱིམ་རང་བདག་བྱེད་པར་འགན་ལེན་དེ་བས་ལེགས་པ་བྱེད་དགོས། འདེམས་བསྐོའི་བརྒྱུད་རིམ་ཧྲིལ་པོར་ལྟ་སྐུལ་བྱེད་ཤུགས་ཆེ་རུ་བཏང་ནས་འདེམས་བསྐོའི་ཁྲོད་ཀྱི་ཚུལ་མིན་སྤྱོད་ཚུལ་ཞིབ་བཤེར་ཐག་གཅོད་མཐའ་གཅིག་ཏུ་བྱེད་པ་དང་། འདེམས་བསྐོའི་ལས་དོན་སྤྱོད་བཟང་གཞུང་དྲང་ཡོང་བ་འགན་ལེན་དང་འདེམས་བསྐོའི་འབྲས་བུ་མི་དམངས་ཀྱི་འདོད་བློ་དང་འཚམ་པའི་འགན་ལེན་བྱེད་དགོས།

(2021ལོའི་ཟླ་11ཚེས་5ཉིན་པེ་ཅིན་གྲོང་ཁུལ་མི་དམངས་འཐུས་ཚོགས་ཀྱི་འཐུས་མི་སྐབས་བརྗེའི་འདེམས་བསྐོའི་འདེམས་ཤོག་འཕེན་པར་ཞུགས་སྐབས་ཀྱི་གསུང་བཤད།)

བཅུ་བདུན།

མི་དམངས་ཀྱིས་རང་ཁྱིམ་རང་བདག་བྱེད་པའི་ལམ་ལུགས་ཀྱི་འགན་སྲུང་ལ་ཤུགས་རྒྱག་དགོས། རང་རྒྱལ་གྱི་རྩ་བའི་ཆབ་སྲིད་ལམ་ལུགས་དང་། གཞི་རྩའི་ཆབ་སྲིད་ལམ་ལུགས། གལ་ཆེའི་ཆབ་སྲིད་ལམ་ལུགས་བཅས་རྒྱུན་འཁྱོངས་དང་འཐུས་ཚང་དུ་གཏོང་བ་དང་། དམངས་གཙོའི་ཐབས་ལམ་རྒྱ་སྐྱེད་དང་དམངས་གཙོའི་རྣམ་པ་ཕུན་སུམ་ཇེ་ཚོགས་སུ་བཏང་སྟེ། མི་དམངས་ཀྱིས་ཁྲིམས་ལྟར་ཐབས་ལམ་དང་རྣམ་པ་འདྲ་མིན་སྣ་ཚོགས་ལ་བརྟེན་ནས་རྒྱལ་ཁབ་ཀྱི་ལས་དོན་དོ་དམ་དང་། དཔལ་འབྱོར་དང་རིག་གནས་བྱ་གཞག་དོ་དམ། སྤྱི་ཚོགས་ཀྱི་ལས་དོན་དོ་དམ་བཅས་བྱེད་པར་འགན་ལེན་ཏན་ཏིག་བྱེད་དགོས། མི་དམངས་ཀྱིས་མི་དམངས་འཐུས་མིའི་ཚོགས་ཆེན་བརྒྱུད་དེ་རྒྱལ་ཁབ་ཀྱི་དབང་ཆ་སྤྱོད་པར་རྒྱབ་སྐྱོར་དང་འགན་ལེན་བྱེད་པ་དང་། རིམ་པ་ཁག་གི་མི་དམངས་འཐུས་ཚོགས་ཚང་མ་དམངས་གཙོས་བདམས་ཐོན་བྱུང་ནས་མི་དམངས་ལ་འགན་འཁུར་བ་དང་། མི་དམངས་ཀྱི་ལྟ་སྐུལ་དང་ལེན་བྱ་རྒྱུ་འགན་ལེན་བྱེད་དགོས། མི་དམངས་འཐུས་ཚོགས་དང་དེའི་རྒྱུན་ལས་ཨུ་ཡོན་ལྷན་ཁང་གིས་ཁྲིམས་ལྟར་ཁྲིམས་འཛུགས་ཀྱི་དབང་ཆ་དང་། ལྟ་སྐུལ་གྱི་དབང་ཆ། ཐག་གཅོད་ཀྱི་དབང་ཆ། བསྐོ་འཐེན་གྱི་དབང་ཆ་བཅས་སྤྱོད་པར་རྒྱབ་སྐྱོར་དང་འགན་ལེན་བྱེད་དགོས། མི་དམངས་འཐུས་ཚོགས་ཀྱིས་སྲིད་འཛིན་ལས་ཁུངས་དང་། ལྟ་ཞིབ་ལས་ཁུངས། འདྲི་གཅོད་ལས་ཁུངས། ཞིབ་དཔྱོད་ལས་ཁུངས་བཅས་ལ་ལྟ་སྐུལ་བྱེད་པའི་ལམ་ལུགས་ཆ་ཚང་དུ་བཏང་ནས་རྒྱལ་ཁབ་ཁྲིམས་སྐྱོང་གི་གཅིག་གྱུར་དང་། ལ་རྒྱ། དབང་གྲགས་བཅས་སྲུང་སྐྱོང་བྱེད་དགོས། མི་དམངས་འཐུས་ཚོགས་ཀྱི་འཐུས་མིའི་ལས་ཀ་སྒྲུབ་ནུས་འཛུགས་སྐྲུན་བྱ་རྒྱུར་ཤུགས་བརྒྱབ་སྟེ་མི་དམངས་འཐུས་ཚོགས་ཀྱི་འཐུས་མི་དང་མི་དམངས་མང་ཚོགས་བར་གྱི་འབྲེལ་གཏུག་དམ་ཟབ་ཏུ་གཏོང་དགོས། དམངས་ཀྱི་འདོད་བློ་བསྡུ་ལེན་དང་དམངས་ཀྱི་བློ་གྲོས་གཅིག་སྒྲིལ་བྱ་རྒྱུའི་ལས་ཀའི་ལམ་སྲོལ་ཆ་ཚང་དུ་གཏོང་བ་དང་། གཞི་རིམ་གྱི་ཁྲིམས་འཛུགས་འབྲེལ་གཏུག་ས་ཚིགས་འཛུགས་སྐྲུན་ཡག་པོ་བྱེད་དགོས། བཟོ་ཚོགས་དང་། གུང་གཞོན་ཚོགས་པ། བུད་མེད་མཉམ་འབྲེལ་ལྷན་ཚོགས་སོགས་མང་ཚོགས་ཚོགས་པའི་རྩ་འཛུགས་བསྒྱུར་བཅོས་དང་འཛུགས་སྐྲུན་ཟབ་སྤེལ་བྱས་ནས་ཟམ་པ་དང་སྦྲེལ་ཐག་ལྟ་བུའི་ནུས་པ་འདོན་སྤེལ་ནུས་ལྡན་བྱེད་དགོས། ཀྲུང་གོའི་འགྲོ་བ་མིའི་ཐོབ་ཐང་འཕེལ་རྒྱས་ཀྱི་འགྲོ་ལམ་ཐོག་བསྐྱོད་རྒྱུ་རྒྱུན་འཁྱོངས་བྱེད་པ་དང་། གོ་ལ་ཧྲིལ་པོའི་འགྲོ་བ་མིའི་ཐོབ་ཐང་བཅོས་སྐྱོང་ནང་ཧུར་ཐག་གིས་ཞུགས་པ། འགྲོ་བ་མིའི་ཐོབ་ཐང་གི་བྱ་གཞག་ཕྱོགས་ཡོངས་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་བཅས་བྱེད་དགོས།

(2022ལོའི་ཟླ་10ཚེས་16ཉིན་ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་ཉི་ཤུ་པའི་ཐོག་གནང་བའི་སྙན་ཞུ།)

བཅོ་བརྒྱད།

ཆབ་སྲིད་ལམ་ལུགས་ཀྱི་གདེང་ཚོད་ཇེ་བརྟན་དུ་གཏོང་བ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཆབ་སྲིད་འཕེལ་རྒྱས་ཀྱི་འགྲོ་ལམ་དུ་བློ་བརྟན་འགྱུར་མེད་ཀྱིས་བསྐྱོད་པ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་བ། རྩ་ཁྲིམས་ནང་གཏན་ལ་ཕབ་པའི་ཀྲུང་གོའི་གུང་ཁྲན་ཏང་གི་འགོ་ཁྲིད་གོ་གནས་གཡོ་འགུལ་མི་གཏོང་བ་རྒྱུན་འཁྱོངས། རྩ་ཁྲིམས་ནང་གཏན་ལ་ཕབ་པའི་མི་དམངས་དམངས་གཙོའི་སྲིད་དབང་སྒེར་འཛིན་གྱི་རྒྱལ་ཁབ་ཀྱི་སྒྲིག་གཞི་དང་མི་དམངས་འཐུས་མིའི་ཚོགས་ཆེན་ལམ་ལུགས་ཀྱི་སྲིད་དབང་གི་སྒྲིག་གཞི་གཡོ་འགུལ་མེད་པར་རྒྱུན་འཁྱོངས་བཅས་བྱས་ཏེ། རྒྱལ་ཁབ་གཞན་གྱི་བྱེད་ལུགས་བྱེད་སྟངས་འདྲ་སྤོ་གཏན་ནས་མི་བྱེད།

(2022ལོའི་ཟླ་12ཚེས་19ཉིན་གྱི་《དུས་རབས་གསར་པའི་ཀྲུང་གོའི་རྩ་ཁྲིམས་ལག་ལེན་གྱི་ལེ་ཚན་གསར་པ་རྩོམ་པ་སྟེ། ད་ལྟ་སྤྱོད་བཞིན་པའི་རྩ་ཁྲིམས་ཡོངས་བསྒྲགས་ལག་བསྟར་བྱས་ནས་ལོ་ངོ་40འཁོར་བར་དྲན་གསོ་ཞུ་བ།》)

བཅུ་དགུ།

བརྒྱུད་རིམ་ཧྲིལ་པོའི་མི་དམངས་དམངས་གཙོ་འཕེལ་རྒྱས་ཧུར་ཐག་གཏོང་དགོས་པ་དང་། ཏང་གི་འགོ་ཁྲིད་རྒྱུན་འཁྱོངས་དང་། མི་དམངས་ཀྱིས་རང་ཁྱིམ་རང་བདག་བྱེད་པ། ཁྲིམས་ལྟར་རྒྱལ་ཁབ་སྐྱོང་བ་བཅས་གཞི་མཐུན་པར་གཅིག་གྱུར་དམ་ཚགས་བྱེད་པ་དང་། མི་དམངས་ཀྱིས་རང་ཁྱིམ་རང་བདག་བྱེད་པའི་ལམ་ལུགས་མ་ལག་འཐུས་ཚང་དུ་བཏང་སྟེ། མི་དམངས་ཀྱི་འདོད་བློ་མངོན་འགྱུར་དང་། མི་དམངས་ཀྱི་ཁེ་དབང་འགན་སྲུང་། མི་དམངས་ཡོངས་ཀྱི་ཧུར་བརྩོན་རང་བཞིན་དང་། རང་འགུལ་རང་བཞིན། གསར་གཏོད་རང་བཞིན་བཅས་སྐུལ་སྤེལ་གང་ལེགས་བྱེད་དགོས།

(2023ལོའི་ཟླ་3ཚེས་13ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་དང་པོའི་ཐོག་གནང་བའི་གསུང་བཤད།)

ཉི་ཤུ།

“ཟུང་འབྲེལ་གཉིས་པ་”ཡིས་ང་ཚོར་བསམ་བློ་དང་རིག་གནས་ཀྱི་རང་འགུལ་ཁོང་དུ་ཆུད་པར་བྱས་པར་མ་ཟད། འགྲོ་ལམ་དང་། རིགས་པའི་གཞུང་ལུགས། ལམ་ལུགས་བཅས་ལ་ནུས་ལྡན་ངང་བྱེད་ནུས་ཀྱང་ཐོན་ཡོད། ཕྱོགས་འདི་ནས་བལྟས་ན། ང་ཚོའི་ཏང་གིས་གསར་དུ་བཏོད་པའི་མི་དམངས་འཐུས་མིའི་ཚོགས་ཆེན་གྱི་ལམ་ལུགས་དང་། ཆབ་སྲིད་གྲོས་མོལ་ལམ་ལུགས་དེ་དང་ཀྲུང་ཧྭའི་ཤེས་དཔལ་གྱི་དམངས་རྩ་བར་འཛིན་པའི་བསམ་བློ་དང་། གནམ་འོག་ཐུན་མོང་ཐོག་བཅོས་སྐྱོང་བྱེད་པའི་བསམ་བློ། “སྤྱི་མཐུན་”དང་“གྲོས་མོལ་”གྱི་སྲིད་ཇུས་ལག་བསྟར་སྲོལ་རྒྱུན། “མཉམ་སྡུད་མཉམ་གནས་དང་། མཐུན་པ་ཡོང་ཐབས་དང་མི་མཐུན་པ་སོར་འཇོག་”གི་ཆབ་སྲིད་བློ་གྲོས་བཅས་ཚང་མར་འབྲེལ་བ་ཟབ་མོ་ཡོད། ང་ཚོས་རྒྱལ་ཕྲན་མཉམ་འབྲེལ་ལམ་ལུགས། རྒྱལ་ཁབ་མཉམ་འབྲེལ་ལམ་ལུགས་སྤྱོད་ཀྱི་མེད་པར། ལམ་ལུགས་སྣ་གཅིག་ཅན་གྱི་རྒྱལ་ཁབ་ཀྱི་རྣམ་པ་གཏན་འཁེལ་བྱས་ཤིང་། མི་རིགས་ས་ཁོངས་རང་སྐྱོང་ལམ་ལུགས་ལག་བསྟར་བྱས་པ་དེ་ནང་དུ་གོང་བུར་འགྲིལ་བ་དང་ཕྱོགས་མང་གཞི་གཅིག་ཅན་གྱི་ཀྲུང་ཧྭ་མི་རིགས་འཕེལ་རྒྱས་ཀྱི་འཕེལ་ཕྱོགས་ཆེན་པོ་དང་ཀུན་ནས་མཐུན་པར་མ་ཟད། ཀྲུང་གོ་ཡོངས་སུ་མཉམ་གྲགས། ཡུལ་ཀུན་སྲོལ་ལུགས་གཅིག་མཐུན། ཕྱོགས་བཞི་མཚམས་བརྒྱད་ཁྱིམ་གཅིག་ཡིན་པ་བཅས་ཀྱི་ཀྲུང་གོའི་རིག་གནས་གཅིག་གྱུར་ཆེན་པོའི་སྲོལ་རྒྱུན་རྒྱུན་འཛིན་བྱས་པ་ཡིན། དེ་བས་གལ་འགངས་ཆེ་བ་ཞིག་སྟེ་“ཟུང་འབྲེལ་གཉིས་པ་”ནི་བསམ་བློའི་བཅིངས་འགྲོལ་བསྐྱར་མ་ཞིག་ཡིན་ཞིང་། ང་ཚོས་སྔར་ལས་རྒྱ་ཆེ་བའི་རིག་གནས་ཀྱི་བར་སྟོང་ནང་ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་ཀྱི་རྩ་ཆེའི་ཐོན་ཁུངས་བེད་སྤྱོད་གང་ལེགས་དང་། འབྱུང་འགྱུར་ལ་ཁ་ཕྱོགས་པའི་རིགས་པའི་གཞུང་ལུགས་དང་ལམ་ལུགས་ཐད་ཀྱི་གསར་གཏོད་འཚོལ་ཞིབ་བྱེད་དགོས།

(2023ལོའི་ཟླ་6ཚེས་2ཉིན་རིག་གནས་འཛིན་སྐྱོང་སྤེལ་གསུམ་སྐོར་གྱི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད།)

རྡོ་རྗེ་ཚེ་བརྟན་གྱིས་བསྒྱུར།

ཡོང་བཞིན་ཡོད།