ལོ་ངོ་བཞི་བཅུའི་རིང་ལམ་འདིའི་ཐོག་ནས་འགྲོ་འོང་བྱས།

ནུ་མོ། ཁྲེང་ཏུའུ་ལ་ཐོན་རྒྱུར་དུས་ཚོད་ག་ཙམ་འདུག

ཐོན་ལ་ཁད་རེད། ད་ལྟ་ཕྱི་དྲོའི་ཆུ་ཚོད་བཞི་པ་རེད། ཕལ་ཆེར་ཆུ་ཚོད་གཉིས་ནང་ཐོན་ས་རེད།

ཁྲེང་ཏུའུ་ལ་བུ་ཕྲུག་བསུ་རུ་འགྲོ་བའི་ནུ་མོ་གཡག་དར་མྱུར་བགྲོད་གཞུང་ལམ་ཐོག་འགྲོ་བཞིན་ཁ་པར་ལམ་ནས་ལམ་འདིའི་ཐོག་གི་མཐོང་ཐོས་མྱོང་གསུམ་གླེང་། སྔ་དྲོའི་ཆུ་ཚོད་བརྒྱད་པའི་ཐོག་དཀར་མཛེས་རྫོང་ནས་ལམ་ལ་ཆས་ཏེ། ད་ལྟ་ཁྲེང་ཏུའུ་ལ་ཐོན་རྒྱུར་ཆུ་ཚོད་གཉིས་ཀྱི་ལམ་ཐག་མ་གཏོགས་མི་འདུག །འདི་ང་རང་ཆུང་དུས་ཡིན་ན་བློ་ལ་འཆར་མི་ཐུབ་པ་ཞིག་རེད་ཅེས་བཤད།

ངའི་ཡབ་མེས་ཀྱི་ཕ་ཡུལ་ཧོ་ནན་རེད། སྤོ་བོ་དམག་ཞབས་ཐིམ་པའི་དམག་མི་ཞིག་ཡིན་པའི་ངོས་ནས། ངའི་ཁྱིམ་ཕ་ཡུལ་དང་བར་ཐག་སྤྱི་ལེ་2000ལྷག་ཡོད་པའི་དཀར་མཛེས་རྫོང་དུ་གཞིས་ཆགས་པ་དང་། ས་ཐག་རིང་བས་ཕ་ཡུལ་དྲན་པའི་གདུང་བ་ཤིན་ཏུ་ཆེ།

ཁོད་སྙོམས་པའི་གཞུང་ལམ།

ལོ་སུམ་ཅུ་ལ་ཐོན་པའི་ངས་ལོ་དྲུག་གི་སྐབས་སུ་ཨ་མྱེས་དང་ཕ་མ་གཉིས་ཕ་ཡུལ་ལ་ལོག་ནས་གཉེན་ཉེར་ཐུག་པར་འགྲོ་བའི་གནས་ཚུལ་དྲན་བཞིན་འདུག །དཀར་མཛེས་ནས་ལམ་ལ་ཆས་ཏེ་སྐྱེལ་འདྲེན་སྤྱི་གཉེར་ཁང་གི་བཅིངས་འགྲོལ་འགྲུལ་སྐྱེལ་རླངས་འཁོར་རྙིང་པར་བསྡད་དེ་ཡམ་ཡོམ་ངང་ཁྲེང་ཏུའུ་ཕྱོགས་སུ་སྐྱོད་སྐབས། རླངས་འཁོར་ཞན་པའི་ཁར་འགྲོ་ལམ་ཀྱག་ཀྱོག་ཡིན་པས་ཁྲེང་ཏུའུ་བར་སྤྱི་ལེ་800ལས་མེད་མོད། ལམ་བར་ནས་ཉིན་བཞི་འགོར་གྱི་ཡོད། ཉིན་དང་པོར་འགྲུལ་སྐྱེལ་རླངས་འཁོར་གྱིས་འབད་བརྩོན་ཆེན་པོས་ང་ཚོ་ལ་ལུང་གི་ཀྱག་ཀྱོག་གི་ལམ་བུའི་ཐོག་བསྐྱོད་པ་དང་ཕྱི་དྲོའི་དུས་སུ་རྟའུ་རྫོང་དུ་ངལ་གསོ་རྒྱག་པ་དང་ཉིན་གཉིས་པའི་ལམ་ལ་གྲ་སྒྲིག་བྱེད་བཞིན་ཡོད། ཉིན་གཉིས་པར་འགྲུལ་སྐྱེལ་རླངས་འཁོར་གྱི་སྒུལ་བྱེད་འཕྲུལ་འཁོར་གྱིས་སྒྲ་ཆེན་པོ་དང་བཅས་ང་ཚོ་དལ་བུར་དམུ་རྗེ་ཉག་ག་བརྒལ་བ་དང་ཕྱི་དྲོ་དར་མདོ་འབྱོར་རྗེས་ད་དུང་བློ་སེམས་མི་བདེ་བའི་ངང་འུ་ལག་རི་བོའི་གཞུང་ལམ་ཤར་གཏོང་ཡིན་མིན་སྐད་ཆ་འདྲི་དགོས། རྒྱུ་མཚན་ནི་སྐབས་དེའི་ཆར་དུས་སུ་འུ་ལག་རི་བོ་རྟག་ཏུ་ལམ་ཉིལ་བའི་རྐྱེན་གྱིས་རླངས་འཁོར་འགྲོ་ཐུབ་ཀྱི་མེད་པས་རེད། དེ་ནས་ཞག་གཅིག་ལ་ངལ་གསོས་རྗེས། འགྲུལ་བཞུད་ཀྱི་ཉིན་གསུམ་པ་དེ་ཡིན་པས་ང་ཚོ་སྔ་ས་ནས་དར་མདོ་ནས་ལམ་ལ་ཆས་ཏེ་དམག་སྡེ་བཅོ་བརྒྱད་པའི་འཐབ་འཛིང་པ་ཚོས་ཚེ་སྲོག་ལ་བརྟེན་ནས་ཤར་གཏོང་བྱུང་བའི་འུ་ལག་རི་བོའི་གཞུང་ལམ་ཐོག་ཁྱར་ཁྱོར་ངང་མདུན་དུ་བསྐྱོད་པ་དང་། ཕྱོགས་གཅིག་ནས་འགྲོ་ལམ་ཀྱག་ཀྱོག་ཆེ་ལ་ལུས་པོ་ཡོངས་རྫོགས་སྒྲིམ་དགོས་པ་དང་ཕྱོགས་གཞན་ཞིག་ནས་སྒེའུ་ཁུང་ཕྱི་རོལ་གྱི་མཛེས་ལྗོངས་ལ་ལྟ་བཞིན་ཡོད་པས་དངོས་འབྲེལ་མིག་ལྷ་ཡུལ་དུ་ཡོད་པ་དང་གཟུགས་པོ་དམྱལ་བར་ཡོད་པས་ཉིན་གཅིག་གཡོ་འགུལ་བྱས་རྗེས་གཡག་རྔ་ལ་འབྱོར་གྱི་ཡོད། ཉིན་བཞི་པར་ངེད་བཟའ་མི་གང་པོ་གཡག་རྔ་གྲོང་ཁྱེར་ནས་ལམ་ལ་ཆས་པ་དང་། ཕྱི་དྲོའི་དུས་སུ་ད་གཟོད་ཁྲེང་ཏུའུ་ལ་ཐོན་ཐུབ་བྱུང་། འདི་ལྟ་བུའི་འགྲུལ་བཞུད་ད་དུང་དཀར་མཛེས་སུ་ཕྱིར་ལོག་སྐབས་ཡང་བསྐྱར་ཐེངས་གཅིག་བརྒྱུད་དགོས་པས་ལུས་སེམས་ཐང་ཆད་པ་དེ་སྐད་ཆའི་ཐོག་ནས་བརྗོད་ཐབས་བྲལ། ངའི་ཨ་མས་ཕ་ཡུལ་དུ་ཐེངས་གཅིག་ལོག་ན་དངོས་གནས་དཀའ་ལས་ཁག་པོ་འདུག།།ཉིན་30ཡི་གུང་གསེང་ལམ་བར་དུ་ཉིན་10ཙམ་འགོར་གྱི་འདུག་ཟེར།

2000ལོར་ངས་སློབ་ཆེན་ལ་རྒྱུགས་འཕྲོད་སོང་། རྡོག་ཁྲེས་ཁུར་ནས་ཁྲེང་ཏུའུ་ལ་སློབ་གཉེར་བྱེད་དུ་སོང་། སྐབས་དེ་དུས་ཀྱི་འགྲོ་ལམ་རིམ་བཞིན་རྒྱ་ཆེ་ལ་ཁོད་སྙོམས་པོ་ཡོད་པ་དང་། དེ་སྔ་དར་རྩེ་མདོ་བར་ཉིན་གཉིས་ཀྱི་ལམ་ཐག་ཡོད་མོད། དེ་དུས་ཆུ་ཚོད་12ཙམ་གྱིས་སླེབས་ཀྱི་ཡོད་པས། གལ་ཏེ་ཁྲེང་ཏུའུ་རུ་བྲེལ་བ་ཆེ་བའི་བྱ་བ་ཡོད་ཚེ་ད་དུང་ཉིན་གཅིག་ཁྲེང་ཏུའུ་རུ་འབྱོར་བའི་འགྲུལ་སྐྱེལ་རླངས་འཁོར་གྱི་སྤ་སེ་ཡང་ཉོ་ཐུབ་ཀྱི་ཡོད་པ་དང་། ཁྲེང་ཏུའུ་རུ་སླེབས་སྐབས་དགོང་མོའི་ཆུ་ཚོད་11ཡོལ་ཙམ་ཡིན་རུང་ང་ཚོ་ས་མཐོར་འཚོ་བ་སྐྱེལ་མཁན་ཚོར་སྟབས་བདེ་ཆེན་པོ་བསྐྲུན་ཡོད། སློབ་གྲྭར་མིང་ཐོ་འགོད་དུ་འགྲོ་སྐབས་འུ་ལག་རི་བོའི་ཕུག་ལམ་ལས་མཇུག་འགྲིལ་ནས་རླངས་འཁོར་ཤར་གཏོང་ཐུབ་ནས་ལོ་ཕྱེད་ཙམ་སོང་མ་ཐག་ཡིན་པ་དང་། འགྲུལ་སྐྱེལ་རླངས་འཁོར་ཕུག་ལམ་ནང་སྐྱོད་སྐབས་ངོ་མཚར་དང་སྐྱིད་སྣང་དེ་ད་བར་བརྗེད་ཐབས་བྲལ། རྒྱལ་ཁབ་ངོ་མ་ངར་བ་རེད། ཕུག་ལམ་དེ་ལྟ་བུ་ཚང་མ་ཤར་གཏོང་ཐུབ་པས། ང་ཚོ་དཀར་མཛེས་ཁུལ་ནས་ཕར་འགྲོ་ཚུར་འོང་བྱེད་པར་དེ་སྔོན་ལས་དུས་ཚོད་མང་པོ་གྲོན་ཆུང་ཐུབ་པ་དང་། གལ་ཆེ་ཤོས་ནི་སྔར་ལས་བདེ་འཇགས་རེད་ཅེས་ངའི་ཨ་ཕ་ཐེངས་དང་པོར་འུ་ལག་རི་བོའི་ཕུག་ལམ་བརྒྱུད་རྗེས་དེ་ལྟར་བཤད།

རྒྱལ་ལམ་317གྱི་གསེར་མཁར་ཡུལ་ཤོག་གི་ལམ་དུམ།

ལོ་ཚོད་ཇེ་ཆེར་སོང་བ་དང་ཆབས་ཅིག་ཉེ་འགྲམ་གྱི་འགྱུར་ལྡོག་ཀྱང་ཇེ་ཆེར་འགྲོ་བཞིན་ཡོད་པ་དང་། ཟས་གོས་འགྲོ་འདུག་སྤྱོད་གསུམ་ལ་མཆོང་སྐྱོད་ལྟ་བུའི་འཕེལ་རྒྱས་བྱུང་ཡོད། གཡག་དར་མྱུར་བགྲོད་གཞུང་ལམ་ཐོག་རླངས་འཁོར་ཤར་གཏོང་ཐུབ་པའི་གནས་ཚུལ་དེ་2018ལོར་དཀར་མཛེས་ཁུལ་ཡོངས་ལ་ཁྱབ་པ་དང་། དེ་དུས་ངས་རླངས་འཁོར་ཉོས་ནས་ལོ་གཉིས་མ་ལོན་པས། སེམས་སུ་ཁྲེང་ཏུའུ་རུ་འགྲོ་ན་ཡང་ཉིན་ཕྱེད་ལས་མི་དགོས་པས་དོན་དག་ཆུང་ཆུང་ཞིག་རེད། སྔ་དྲོའི་ཆུ་ཚོད་བརྒྱད་པ་ཡོལ་ཙམ་ལ་གཉིད་ཡག་པོ་ཞིག་ཉལ་རྗེས། མལ་ལས་ལངས་ནས་ཞོགས་ཟས་བཟས་ཚར་རྗེས་རང་ཉིད་ཀྱི་རླངས་འཁོར་ཆུང་ཆུང་བཏང་ནས་བློ་བདེ་བག་ཕེབས་ངང་ཁྲེང་ཏུའུ་ཕྱོགས་སུ་རྒྱུག་གི་ཡོད། སྔོན་ཆད་ཀྱག་ཀྱོག་གི་འགྲོ་ལམ་དེ་དག །

ད་ལྟ་ལེགས་བཅོས་བྱས་པས་དྲང་མོ་ཁོད་ཡངས་ཡིན་ལ། རླངས་འཁོར་ཆུང་བའི་མྱུར་ཚད་དེ་ཆེས་མཐོ་བའི་འགྲོས་ཚད་ཚོད་འཛིན་སྟེང་བདེ་འཇགས་ངང་བསྐྱོད་ཐུབ། རླངས་འཁོར་གཡག་དར་མྱུར་བགྲོད་གཞུང་ལམ་དུ་ཐོན་རྗེས། དེ་བས་སྐྱིད་སྣང་ཤར་བ་དང་མྱུར་ཚད་གཏན་འཁེལ་བཀོད་སྒྲིག་བྱས་རྗེས། རོལ་དབྱངས་ཉན་ནས་བག་ཕེབས་ངང་ཁྲེང་ཏུའུ་ཕྱོགས་སུ་མགྱོགས་མྱུར་ངང་སྐྱོད་བཞིན་ཡོད། གསར་དུ་ཤར་གཏོང་ཐུབ་པའི་མྱུར་བགྲོད་ཕུག་ལམ་ནང་ཕུག་ལམ་ངོས་ཀྱི་ཚོན་སྒྲོན་མཐོང་དུས་སེམས་ཁམས་དེ་བས་སྐྱིད། ད་ཆ་འུ་ལག་རི་བོའི་ཕུག་ལམ་གསར་པའི་ནང་འཛུལ་མ་ཐག་ཐེན་ཆོན་རྫོང་དང་བར་ཐག་རིང་པོ་མེད་པའི་ཚོར་སྣང་ཡོང་གི་འདུག །གང་ལགས་ཤེ་ན་དེ་སྔོན་རྟག་ཏུ་ཟ་བའི་ཤིན་ཀོའུ་རྫོང་གི་སྲན་ཞོ་དང་བྱ་དེ་ཟ་རྒྱུའི་གོ་སྐབས་མེད་པར་གྱུར་ཞེས་ངའི་ནུ་མོས་ནམ་རྒྱུན་དེ་ལྟར་བཤད།

ད་ཆའི་ས་མཐོའི་འགྲོ་ལམ་ནི་ང་ཆུང་དུས་བསམ་ཡུལ་ལས་འདས་པ་ཞིག་ཡིན་པ་དང་ལམ་ངོས་ཁོད་སྙོམས་པ་དང་ལམ་གཞི་དྲང་མོ་ཡིན་པས། ལྗིད་ཐེག་རླངས་འཁོར་ནང་དངོས་ཟོག་གང་བླུགས་ཀྱང་བརྟན་པོའི་ངང་མྱུར་བགྲོད་གཞུང་ལམ་ཐོག་སྐྱོད་ཐུབ་ཀྱི་ཡོད། ཉིན་ཤས་གོང་གསར་འགྱུར་ནང་དར་མདོ་ནས་བྲག་འགོ་རྫོང་བར་གྱི་མྱུར་བགྲོད་གཞུང་ལམ་ཡང་རྣམ་གྲངས་བཙུགས་པ་ཁྱབ་བསྒྲགས་བྱས་པ་དང་། གཞི་རྩའི་འཛུགས་སྐྲུན་མཁས་པའི་ཀྲུང་གོས་མྱུར་བགྲོད་གཞུང་ལམ་བསྐྲུན་པར་དུས་ཚོད་དེ་བས་ཐུང་བ་དང་སྤུས་ཚད་དེ་བས་མཐོ་བས་ང་ལས་འཁྱུར་ངལ་གསོ་མ་བརྒྱབ་གོང་མྱུར་སྐྱོད་གཞུང་ལམ་དེ་ལོངས་སུ་སྤྱོད་ཐུབ་པའི་ཡིད་ཆེས་ཡོད། སྐབས་དེ་དུས་ཁྲེང་ཏུའུ་རུ་སླེབས་པའི་དུས་ཚོད་དེ་ཆུ་ཚོད་10ནས་ཐུང་དུ་འགྲོ་རྒྱུ་ཡིན་པས་གཟའ་མཇུག་ཏུ་ཁྲེང་ཏུའུ་རུ་རྩེད་མོ་རྩེ་བར་འགྲོ་བའི་འདུན་པ་དངོས་འབྲེལ་མངོན་འགྱུར་ཐུབ་རྒྱུ་རེད། །