སི་ཁྲོན་མཛོད་དགེ་བརླན་ས་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དོ་དམ་ཅུས་ནི་སི་ཁྲོན་ཞིང་ཆེན་མཛོད་དགེ་རྫོང་དུ་ཡོད་པ་དང་། རྫོང་དང་ཁྲུའུ་རིམ་པའི་བྱ་གཞག་ལས་ཁུངས་ཞིག་ཡིན། སྒྲིག་ཁོངས་ལས་གནས་31ཡོད་པ་དང་། ད་སྐབས་ལས་དོན་མི་སྣ་27ཡོད། དེ་རུ་དོ་དམ་ལས་གནས་5དང་ཆེད་ལས་ལག་རྩལ་ལས་གནས་21 ལས་བརྩོན་ལས་གནས་1ཡོད། མཛོད་དགེ་བརླན་ས་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་ནི་འབྲི་ཆུའི་སྟོད་རྒྱུད་ཀྱི་ཆུ་ཁུངས་གསོ་ཁུལ་གལ་ཆེན་ཞིག་དང་རྨ་ཆུའི་སྟོད་རྒྱུད་ཀྱི་མཁོ་སྤྲོད་ཁུལ་གལ་ཆེན་ཞིག་ཡིན་ལ། རྒྱལ་ཁབ་ཀྱི་བརླན་སའི་སྐྱེ་ཁམས་ནུས་ཁུལ་གལ་ཆེན་ཞིག་ཀྱང་ཡིན་པ་མ་ཟད། མི་རིགས་ཁག་འགྲོ་འོང་དང་སྤེལ་རེས། མཉམ་འདྲེས་བཅས་ཀྱི་བདེ་སྐྱིད་ལྡན་པའི་ཁྱིམ་གཞིས་ཤིག་ཀྱང་ཡིན།
མཛོད་དགེ་གླིང་ས་མཐོང་བ་ཀུན་སྨོན་དུ་བོད་རིགས་དང་ཆའང་རིགས། ཧུའེ་རིགས། རྒྱ་རིགས་སོགས་མི་རིགས་ཁག་གི་བུ་དང་བུ་མོ་ཁྲི་8.1འཚར་ལོངས་བྱུང་། མི་རིགས་ཁག་གི་མང་ཚོགས་ཀྱིས་ཐུན་མོང་གི་དད་སེམས་ལ་བརྟེན་ནས་ཚེ་སྲོག་གི་ས་མཐོའི་སྤང་ལྗོངས་དེ་སྲུང་སྐྱོང་བྱེད་བཞིན་ཡོད། ཉེ་བའི་ལོ་ཤས་རིང་། ཞི་ཅིན་ཕིང་གི་སྐྱེ་ཁམས་དཔལ་ཡོན་གྱི་དགོངས་པའི་ཁྲིད་སྟོན་འོག །དོ་དམ་ཅུས་ཀྱིས་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་སྐྱེ་ཁམས་སྲུང་སྐྱོང་བརྒྱུད་རིམ་ཧྲིལ་པོར་ཁྱབ་པར་བྱས་ཏེ། མཛོད་དགེ་རྒྱལ་ཁབ་སྤྱི་གླིང་འཛུགས་སྐྲུན་ལ་སྐུལ་འདེད་ཤུགས་ཆེན་བཏང་ནས། མི་རིགས་མཐུན་སྒྲིལ་ཡར་ཐོན་དང་སྐྱེ་ཁམས་ཤེས་དཔལ་འཛུགས་སྐྱོང་གི“མཉམ་དཀྲོལ་རོལ་དབྱངས”ཡག་པོ་བརྩམས་ཡོད། སྔ་རྗེས་སུ“སི་ཁྲོན་ཞིང་ཆེན་རང་བྱུང་སློབ་གསོའི་རྟེན་གཞི”དང་། “རྔ་བ་ཁུལ་གྱི་མི་རིགས་མཐུན་སྒྲིལ་ཡར་ཐོན་དཔེ་སྟོན་ལས་ཁུངས”“སྔོན་ཐོན་གཞི་རིམ་ཏང་རྩ་འཛུགས”སོགས་ཀྱི་མཚན་སྙན་ཐོབ་པ་རེད།
མཉམ་འདྲེས་བྱེད་ཐབས་གསར་གཏོད་བྱས་ནས“བརྟན་འཛུགས་ཀྱི་རོལ་དབྱངས”ལེགས་པོ་དཀྲོལ།
མཛོད་དགེའི་བརླན་ས།
དོ་དམ་ཅུས་ཀྱིས་མི་རྩ་བར་འཛིན་པ་དང་སྐྱེ་ཁམས་གཙོ་བོར་བཟུང་སྟེ། བརླན་སའི་སྐྱེ་ཁམས་སླར་གསོ་དང་ཆུའི་སྐྱེ་ཁམས་སྲུང་སྐྱོང་སླར་གསོའི་ལས་དོན་སྤེལ་བའི་དུས་མཚུངས་སུ་མི་རིགས་མཐུན་སྒྲིལ་ཡར་ཐོན་ལས་དོན་ཟབ་སྤེལ་བྱས་ནས། མཛོད་དགེ་རྒྱལ་ཁབ་སྤྱི་གླིང་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ལེགས་བསྐྱེད་ཀྱི་གཞི་རྟེན་གལ་ཆེན་ཞིག་ཏུ་བསྒྱུར་ཡོད། སྲུང་སྐྱོང་ཁུལ་གྱི་རང་བྱུང་སློབ་གསོའི“སྐྱོད་གསུམ”བྱ་སྤྱོད་ལ་སྐུལ་འདེད་བཏང་སྟེ་མི་རིགས་མཐུན་སྒྲིལ་ཡར་ཐོན་གྱི་སེམས་འདུན་གཅིག་ཏུ་སྒྲིལ་ཤུགས་ཆེ་རུ་བཏང་།
“སྐྱེ་ཁམས་སེ་འབྲུ་སྒྲོག་འགྲེལ་རུ་ཁག”གཞི་རྟེན་བྱས་ཏེ་གྲོང་སྡེ་དང་དུད་ཚང་དུ་བསྐྱོད་པ་སོགས་ཕུན་སུམ་ཚོགས་པའི་བྱེད་སྒོ་དང་སྒྲོག་འགྲེལ་ལས་སྒོ་སྤེལ་བ་བརྒྱུད། མི་རིགས་ཁག་གི་མང་ཚོགས་རྣམས་ལ་ཀྲུང་ཧྭ་མི་རིགས་འཚོ་གནས་དང་འཕེལ་རྒྱས་ཐད་ཀྱི་སྐྱེ་ཁམས་སྲུང་སྐྱོང་གི་གལ་ཆེའི་རང་བཞིན་ལ་ངོས་འཛིན་ལེགས་པོ་བསྐྱེད་པ་དང་། ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་བརླན་སར་རྐང་ཚུགས་ཤིང་མྱུ་གུ་འབུས་ཐུབ་པས། བརླན་ས་སློབ་ཁང་བྱས་ནས་བྱིས་པའི་ཁོར་ཡུག་སློབ་གསོའི་དཔེ་རིས་ཀློག་དེབ་དཔེ་སྐྲུན་དང་། རྒྱ་བོད་སྐད་གཉིས་ཀྱི་སློབ་གཞི་རྩོམ་སྒྲིག །མཛོད་དགེ་བརླན་སའི་ཚན་རིག་ཁྱབ་གདལ་སློབ་གསོའི་ལྟེ་གནས་འཛུགས་པ། སྲུང་སྐྱོང་ཁུལ་ཁོར་ཡུག་སློབ་གསོའི་དཔེ་སྟོན་སློབ་གྲྭར་མི་རིགས་ཁག་གི་གྲོགས་པོ་ཆུང་ཆུང་མཉམ་དུ་ཞུགས་པའི་བརླན་ས་སྲུང་སྐྱོང་དང་། རི་སྐྱེས་སྲོག་ཆགས་དང་རྩི་ཤིང་ལ་གཅེས་སྤྲས་བྱེད་པའི་དྲིལ་བསྒྲགས་བྱེད་སྒོ་སྤེལ་བ་བཅས་བྱས་ནས། ལོ་ཆུང་བྱིས་པའི་རྒྱལ་གཅེས་དང་མི་རིགས་མཐུན་སྒྲིལ་གྱི་ས་བོན་ལེགས་པོ་བཏབ། བརླན་ས་ལས་སྟེགས་བྱས་ཏེ་འདབ་ཆགས་བྱ་རིགས་ལ་ལྟ་སྐོར་གྱི་འགྲན་བསྡུར་ཆེན་མོ་དང་། སྐྱེ་ཁམས་པར་ལེན་འགྲེམས་སྟོན། བརླན་སའི་ཤེས་བྱ་འཆད་ཁྲིད་སོགས་བྱས་པ་བརྒྱུད། “རྨ་ཆུའི་ཡུལ་སྐོར་རིག་གནས་དུས་ཆེན”དང“མཛོད་དགེ་བརླན་སའི་རྩྭ་ཐང་སྲུང་སྐྱོང་དང་སྐྱེ་དངོས་སྣ་མང་རང་བཞིན་གྱི་ཞིབ་འཇུག་སློབ་སྦྱོང་ཚོགས་འདུ”སོགས་བྱེད་སྒོ་རབ་དང་རིམ་པ་སྤུས་ཚད་མཐོན་པོས་སྤེལ་ནས། རྒྱལ་ཡོངས་ཀྱི་ས་གནས་ཁག་གི་མི་ཐེངས་ཁྲི་10ལྷག་གི་ཡིད་དབང་བཀུག །
ཟླ་ལྔ་པའི་ནང་དུ་ཆུ་བྱ་རྣམས་ཀྱིས་འཕུར་རྩལ་ངོམ་བཞིན་ཕྱོགས་བཞིའི་སྐུ་མགྲོན་མཛོད་དགེར་འཛོམས། “དེ་གར་སྲོག་ཆགས་ཧ་ཅང་མང་པོ་ཡོད། བྱ་རིགས་མང་པོ་མཐོང་ཐུབ་པ་མ་ཟད་རང་བྱུང་ཁམས་ཆེན་མོའི་མཛེས་སྡུག་ལ་མྱོང་རོལ་བྱེད་ཐུབ”ཅེས་ཁྲེང་ཏུའུ་ནས་ཡོང་བའི་འདབ་ཆགས་བྱ་རིགས་ལ་ལྟ་སྐོར་བྱེད་སྒོའི་ནང་ཞུགས་མཁན་སློབ་མ་ཝང་ཙི་ཁྲིན་གྱིས་སེམས་འགུལ་ཐེབས་པའི་ངང་དེ་ལྟར་བཤད། གྲོགས་ཚོམས་སུ་འདབ་ཆགས་བྱའི་རིགས་ལ་དགའ་བའི་ཡུལ་སྐོར་བ་མང་པོ་ཞིག་གིས་ཉམས་མྱོང་མཉམ་སྤྱོད་བྱེད་པ་དང་འབྲེལ་སྐྱེ་ཁམས་སྲུང་སྐྱོང་དར་སྤེལ་བཏང་སྟེ། ཚང་མར་དྲ་ཐོག་ནས་བརླན་སའི་འདབ་ཆགས་བྱ་རིགས་ལ་ལྟ་སྐོར་ཐུབ་པར་བྱས་ཏེ། མི་རིགས་ཁག་གི་མང་ཚོགས་རྣམས་ཀྱིས་ཐུན་མོང་ཐོག་སྐྱེ་ཁམས་ཁོར་ཡུག་སྲུང་སྐྱོང་བྱ་རྒྱུར་ཁྲིད་སྟོན་བྱས།
གསར་གཏོད་ཀྱི་བྱེད་ཐབས་རབ་དང་རིམ་པ་ལས་མི་རིགས་ཁག་གིས་སྤེལ་རེས་དང་མཉམ་འདྲེས་ཁྲོད་ལག་གདང་སྦྲེལ་ནས་མཛེས་སྡུག་ལྡན་ལ་བདེ་ཞིང་སྐྱིད་པའི་ཁྱིམ་གཞིས་མཉམ་དུ་སྐྲུན་པའི་གསོན་ཉམས་དོད་པའི་རི་མོ་བཀོད་བཞིན་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ལེགས་པོ་བསྐྱེད།
གཟེངས་བསྟོད་གནང་བའི་ཡུལ་དངོས།
སྲུང་སྐྱོང་གི་འགན་འཁྲི་འཁུར་ནས“སྐྱེ་ཁམས་སྒྲ་དབྱངས”ལེགས་པོ་དཀྲོལ།
རྨ་ཆུའི་ཆུ་བོ་ནི་སྐྱེ་ཁམས་ཞི་མཐུན་ཡིན་པའི་དབང་གིས་མཛེས་ཤིང་ལྟ་ན་སྡུག །མི་རིགས་ཁག་མཐུན་སྒྲིལ་ཡིན་པའི་དབང་གིས་དར་རྒྱས་ཕུན་སུམ་ཚོགས་པར་གྱུར། དོ་དམ་ཅུས་ཀྱིས་རོང་འབྲོག་མང་ཚོགས“ཕྱུགས་འཚོ་མཁན”ནས“རྩྭ་སྲུང་མཁན”དུ་འགྱུར་བར་ཁྲིད་སྟོན་བྱས་པ་དང་། རོང་འབྲོག་མང་ཚོགས་སྐྱེ་ཁམས་བཅོས་སྐྱོང་ནང་ཞུགས་པར་ལྕག་སྐུལ་བྱས་ནས་རྒྱུན་མཐུད་བབ་འཕར་བྱུང་ཡོད། སྤྱི་ཕན་རང་བཞིན་གྱི་ལས་གནས་8792སྤྱི་འདོམས་བཀོད་སྒྲིག་བྱས་ཡོད། རྒྱལ་ཁབ་སྤྱི་གླིང་ཁུལ་དུ་སྤྱི་ཕན་རང་བཞིན་གྱི་ལས་གནས་ཁྱོན་ཡོངས་ལ་ཁྱབ་པར་བྱས། མཛོད་དགེ་རྫོང་གི་ཆུ་སྔར་ལས་དྭངས་ལ་རྩྭའི་སྐྱེ་འཚར་སྔར་ལས་ལེགས་པ། སྐྱེ་ཁམས་སྔར་ལས་འཆམ་མཐུན་ཡོད་པ་བཅས་མངོན་འགྱུར་བྱུང་། མཐའ་འཁོར་གྱི་རོང་འབྲོག་མང་ཚོགས་དང་། སློབ་སྦྱོང་དང་ཡུལ་སྐོར་དུ་ཡོང་མཁན་ལས་བྱེད་མང་ཚོགས་རྣམས་ཀྱིས་བརླན་ས་སྲུང་སྐྱོང་དང་ཁྱིམ་གཞིས་སྲུང་སྐྱོང་བྱེད་པའི་སེམས་པ་སྔར་བས་ཇེ་བརྟན་དུ་གྱུར་ཡོད།
དམངས་ཀྱི་ཆེད་དུ་སྐྱེ་ཁམས་ལེགས་གཉེར་དང་སྐྱེ་ཁམས་ཀྱིས་དམངས་ལ་དགེ་མཚན་འདོན་པ། ལོ་མང་པོའི་རིང་ལ་དོ་དམ་ཅུས་ཀྱིས་སྐྱེ་ཁམས་སྲུང་སྐྱོང་བ་དང་འཛུགས་སྐྲུན་པ། འཕེལ་རྒྱས་པ་བཅས་ཀྱི་འགན་འཁྲི་ལྕི་མོ་ཁུར་ཡོད། རིམ་རྩིས་བྱས་ན་མ་དངུལ་སྒོར་དུང་ཕྱུར་4.8བཏང་སྟེ“སྲུང་སྐྱོང་གི་བྱ་སྤྱོད་ཆེན་པོ་བདུན”དང“བཅོས་སྐྱོང་གི་ལས་གཞི་ཆེན་པོ་བདུན”ལག་ལེན་དུ་བསྟར་ཏེ་འབྱུང་རྩ་ནས་སྐྱེ་ཁམས་སྲུང་སྐྱོང་བྱེད་ཤུགས་ཆེ་རུ་གཏོང་བ་དང་བརླན་སར་བཀག་སྡོམ་སོགས་བྱས་པས། བརླན་སའི་རྒྱ་ཁྱོན་ཆེ་རུ་ཕྱིན་པ་དང་སྐྱེ་ཁམས་ཁོར་ཡུག་མངོན་གསལ་དོད་པོས་ཇེ་ལེགས་སུ་ཕྱིན་ནས“ཐོན་སྐྱེད”དང“སྐྱེ་ཁམས”འཁོར་རྒྱུག་ལེགས་པའི་ལྗང་མདོག་གི་མཛེས་སྡུག་བསྐྲུན།
སྲུང་སྐྱོང་ཁུལ་གྱི་སྐོར་སྲུང་བ་ཞིག་ཡིན་པའི་ངོས་ནས་རིག་ཁོས་དུས་དང་རྣམ་པ་ཀུན་ཏུ་ཁྲུང་ཁྲུང་སྐེ་ནག་གི་སྐྱེ་འཕེལ་དང་འགྲོ་འདུག་བློ་ལ་ངེས་ནས་ཡོད། དཔྱིད་ཟླ་གསུམ་པར་ཁྲུང་ཁྲུང་སྐེ་ནག་བཟའ་ཚང་གཉིས་དུས་ལྟར་རིག་ཁོ་བཟའ་ཟླ་གཉིས་ཀྱི་ལྟ་ཞིབ་ས་ཚིགས་སུ་སླེབས་ཡོད། རིག་ཁོ་བཟའ་ཟླ་གཉིས་ཀྱིས་ཀྱང་ཡུན་རིང་འདྲིས་པའི་ཁྲུང་ཁྲུང་སྐེ་ནག་བཟའ་ཚང་གང་པོར་མདུན་བསུ་བྱས། རིག་ཁོ་བཟའ་ཟླ་གཉིས་ཉིན་ལྟར་བྱ་ཚང་གི་ཉེ་འགྲམ་དུ་བསྐྱོད་དེ་ཁྲུང་ཁྲུང་སྐེ་ནག་གི་བྱ་ཕྲུག་གསོ་བར་རེ་སྒུག་བྱས། ཁྲུང་ཁྲུང་སྐེ་ནག་བཟའ་ཚང་གཉིས་ཀྱིས་རིག་ཁོ་བཟའ་ཟླ་གཉིས་ཀྱི་གཤིས་བཟང་བབ་ཆགས་སྲུང་སྐྱོང་བྱེད་ཀྱི་ཡོད། རིག་ཁོ་བཟའ་ཟླ་གཉིས་ཀྱིས་ཀྱང་མི་དང་སྲོག་ཆགས་བར་གྱི་ཡིད་ཆེས་དེར་སྲུང་སྐྱོང་བྱེད་ཀྱི་ཡོད།
བྱེ་ཐང་སྤང་ལྗོངས་སྔོན་མོར་བསྒྱུར། འདབ་ཆགས་བྱ་ཡི་ལུས་སེམས་བརླན་སར་འཁོར། མཛོད་དགེ་བརླན་སའི་ཁྲུང་ཁྲུང་སྐེ་ནག་གི་གྲངས་འབོར་ཡང་407ནས་1100བར་འཕར་བ་དང་། མི་རིགས་མཐུན་སྒྲིལ་ཡར་ཐོན་གྱི་སྐྱེ་ཁམས་མཚོན་རྟགས་སུ་གྱུར་ཡོད། ད་དུང་ཁོ་ཚོ་དང་འདྲ་བའི་མི་མང་པོ་ཞིག་གིས་མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་མཛེས་སྡུག་ལྡན་པའི་ཁྱིམ་གཞིས་སྲུང་སྐྱོང་བྱེད་བཞིན་ཡོད།
རིན་ཐང་བརྗེ་སྒྱུར་དམ་འཛིན་བྱས་ནས“མཐུན་སྦྱོར་སྒྲ་དབྱངས”ལེགས་པོ་དཀྲོལ།
མཛོད་དགེའི་ངང་དཀར་མཚེའུ།
དོ་དམ་ཅུས་ཀྱིས་རྨ་ཆུའི་བཞུར་རྒྱུད་ཀྱི་སྐྱེ་ཁམས་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་ཀྱི་འཐབ་ཇུས་གོ་སྐབས་དམ་འཛིན་བྱས་ནས། ལྗང་མདོག་དཔལ་འབྱོར་གྱི་ཐབས་ལམ་གསར་པ་སྟེ། A4རིམ་པའི་མཛེས་ལྗོངས་ཁུལ“མཚོ་ཁྲ”བསྐྲུན་པ་དང་། “ས་མཐོའི་གཅེས་ནོར”སོགས་ཁྱད་ཆོས་ལྡན་པའི་ཐོན་རྫས་ཐོན་སྐྱེད་བྱས་ཏེ། རྨ་ཆུའི་རིག་གནས་དང་རྒྱང་སྐྱོད་སྙིང་སྟོབས་ཀྱི་དུས་རབས་རིན་ཐང་དང་གཏིང་ཟབ་པའི་ནང་དོན་སྔོག་འདོན་བྱས། རྒྱལ་ཁབ་སྤྱི་གླིང་གི་ཚན་རིག་ཞིབ་འཇུག་དང་ཚན་རིག་ཁྱབ་གདལ་སློབ་གསོའི་རྟེན་གཞི། སྐྱེ་ཁམས་ཡུལ་སྐོར་ཐོན་ཁུངས་བཅས་སྡེབ་སྒྲིག་བྱས་ཏེ། “འཛིན་བྱང་གི་ཡོང་འབབ་དང་སྐྱེ་ཁམས་ཁ་གསབ། ངལ་ནུས། ཡུལ་སྐོར་ལམ་ཐིག་རིན་སྤོར། མཁའ་ལམ་བཀོད་པའི་སྣེ་ཁྲིད། སྒྲིག་བཀོད་འཐུས་ཚང”བཅས་ཟུང་དུ་སྦྲེལ་བའི་རིམ་པ་མང་བའི་ཁ་གསབ་བྱེད་སྟངས་ལ་བརྟེན་ནས། ས་གནས་ཀྱི་སྐྱེ་ཁམས་ལྗང་མདོག་འཕེལ་རྒྱས་ཀྱི་ཟུར་བསྣན་རིན་ཐང་མཐོར་འདེགས་ལ་སྐུལ་ཁྲིད་བྱས།
མཚོ་སྐོར་དང་འདབ་ཆགས་ལ་ལྟ་སྐོར་བྱ་རྒྱུ་ནི་ཁྲོན་ནུབ་ས་མཐོའི་ཡུལ་སྐོར་གྱི་གདམ་ག་ཡག་ཤོས་ཤིག་ཏུ་གྱུར་ཡོད་ལ། ཡུལ་སྐོར་བ་རྣམས་ལ་རང་བྱུང་ཁམས་ཀྱི་ཐུན་མིན་ཁྱད་ཆོས་ཉམས་ལེན་བྱེད་དུ་འཇུག་ཐུབ། བརླན་སའི་སྲུང་སྐྱོང་གྲུབ་འབྲས་མིག་མཐོང་ལག་ཟིན་ཏུ་གྱུར་པས་མི་མང་པོ་ཁོར་ཡུག་སྲུང་སྐྱོང་ལ་ཞུགས་པར་སྐུལ་ཁྲིད་བྱས། རིག་གནས་ཡུལ་སྐོར་གྱི་ལམ་ཐིག་གསར་པའི་ལས་རྣམ་གསར་པས་རོང་འབྲོག་མང་ཚོགས་ལ་སྐྱེ་ཁམས་ཡུལ་སྐོར་ཁྲོད་བབ་འཕར་ཕྱུག་འགྱུར་དང་ས་གནས་ཀྱི་དཔལ་འབྱོར་རྒྱུན་མཐུད་འཕེལ་རྒྱས་འགྲོ་བར་སྐུལ་ཁྲིད་བྱས། 2023ལོར་ཡུལ་སྐོར་སྣེ་ལེན་མི་ཐེངས་ཁྲི་313.5ཟིན་པས་ཟིན་ཐོ་གསར་པ་བཏོད། ཡུལ་སྐོར་གྱི་སྤྱིའི་ཡོང་འབབ་སྒོར་དུང་ཕྱུར་20བརྒལ་ཡོད། རིམ་རྩིས་བྱས་ན་སྐྱེ་ཁམས་ཁ་གསབ་སྒོར་ཁྲི་9340སྤྲད་ཡོད། གྲངས་གཞི་ནི་མི་རིགས་མཐུན་སྒྲིལ་ཡར་ཐོན་གྱི་སྒྲ་དབྱངས་སྙན་ཤོས་དེ་ཡིན་པ་དང་། ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ཇེ་བརྟན་དུ་གཏོང་ཆེད་བསམ་བློ་དང་དངོས་པོའི་རྨང་གཞི་བརྟན་པོ་བཏིང་ཡོད།
མཛོད་དགེ་བརླན་སའི་འཕོ་འགྱུར་ནི་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ལེགས་པོ་བསྐྱེད་པའི་གསལ་འགྲེལ་ཞིག །དོ་དམ་ཅུས་ཀྱིས་སྐྱེ་ཁམས་འཕེལ་རྒྱས་བརྗོད་གཞིར་དམིགས་ནས། “ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ཇེ་ཟབ་ཏུ་གཏོང་བ་དང་སྐྱེ་ཁམས་དཔལ་ཡོན་འཛུགས་སྐྱོང་ཟུང་དུ་འབྲེལ་བའི”དུང་བརྡ་བསྒྲགས་ནས། “སྔོ་ལྗང་རི་ཀླུང་”དང“ཁ་བས་གཡོགས་པའི་རི་ཀླུང་”མཛོད་དགེ་རྫོང་གི་མི་རིགས་ཁག་གི་མང་ཚོགས་ཀྱི“གཏན་འཇགས་རྒྱུ་དངོས”དང“ནོར་འཛོམས་གཞོང་པ”རུ་བསྒྱུར་ནས། སྐྱེ་ཁམས་སྲུང་སྐྱོང་དང་འཚོ་བའི་ཆ་རྐྱེན་ཇེ་ལེགས་སུ་བཏང་ནས། སྐྱེ་ཁམས་ཀྱི་ཁེ་ཕན་ལོངས་སུ་སྤྱོད་དགོས། །
མཛོད་དགེ་རྩྭ་ཐང་གི་སྐྱེ་ཁམས་དྲིལ་བསྒྲགས་རུ་ཁག