སྤུ་རྒྱལ་དུས་ཀྱི་འཕྱོངས་རྒྱས་ས་ཆའི་ལོ་རྒྱུས་གླེང་བ་།

དེ་ཡང་རང་རེའི་ཆོས་འབྱུང་དེབ་ཐེར་དང་བོན་གྱི་བསྟན་འབྱུང་དེ་བཞིན་དུ་རྒྱའི་ཐང་ཡིག་གསར་རྙིང་ལས། སྤུ་རྒྱལ་བཙན་པོའི་དུས་སུ་འཕྱོངས་རྒྱས་ཞེས་པའི་ད་ལྟའི་སྲིད་འཛིན་ཁྱབ་ཁོངས་སུ་སྤྱོད་པའི་ཐ་སྙད་དེ་ཉིད་མི་སྤྱོད་པར། འཕྱིང་(འཆིང་)

ཡུལ་ལམ་འཕྱིང་(འཆིང་)ལུང་དུ་གྲགས་ཤིང་། རུ་ལྔ་ལས་དབུས་ཀྱི་གཡོ་རུའི་ཁོངས་སུ་གཏོགས་ལ་རྒོད་ཀྱི་སྟོང་སྡེ་དྲུག་བཅུ་རྩ་བཞིའི་གྲས་ཤིག་ཡིན་པར། ཆོས་འབྱུང་མཁས་པའི་དགའ་སྟོན་ལས་གཙང་ལ་གཡས་རུ་དང་རུ་ལག །དབུས་ལ་དབུ་རུ་དང་གཡོ་རུ་ཡན་ལག་གསུམ་པའི་རུ་སྟེ་ལྔར་ཕྱེའོ། །དེ་རྣམས་ཡུལ་གྱི་དབང་རིས་ནི། འཆིང་ང་འཆིང་ཡུལ་མགོས་དང་སྣུབས་ཀྱི་ཡུལ་ཞེས་ཡར་ལུང་འཕྱིང་ལུང་གཉིས་གཡོ་རུའི་སྟོང་སྡེ་བཅུའི་གྲས་སུ་གཏོགས་པར་གསལ་བ་དང་དེ་བཞིན་དེང་གི་འཕྱོངས་རྒྱས་རྫོང་ལྷ་ཡུལ་ཤང་ཁོངས་ཀྱི་འཕྱོས་གྲོང་ནི་སྤུ་རྒྱལ་དུས་ཀྱི་ཡར་ལུང་སོགས་ཁར་གྲགས་པ་དེ་ཉིད་ཡིན་ཞིང་ཡར་ལུང་སོགས་ཁར་ཁུ་དང་གཉགས་ཀྱི་ཡུལ་ཞེས་གསལ་བ་ཙམ་ལས་དེ་མིན་གྱི་ལོ་རྒྱུས་ཐད་ལ་གསལ་ཆ་དེ་ཙམ་གྱིས་ཆེན་པོ་མ་ཐོན་ལ། དེ་བས་འཕྱོངས་རྒྱས་ཞེས་པའི་ས་མིང་དེ་དུས་ནམ་ཞིག་ལ་བྱུང་བའི་སྐོར་ལ་གསལ་ཆ་ཐོན་མེད། འོན་ཀྱང་ཏུན་ཧོང་གཏེར་ཡིག་གི་ནང་དུ་འཕྱོངས་རྒྱས་མངའ་ཁོངས་ཀྱི་ཡུལ་ལུང་འགའ་རེའི་ས་མིང་མངོན་རྒྱུ་ཡོད་དེ། ཏུན་ཧོང་ཤོག་དྲིལ་p1287ཏེ་སྲས་ཤ་ཁྱི་དང་ཉ་ཁྱིའི་སྐོར་(ཐིག་ཕྲེང་50ནས་54)དུ་གཅུང་ཉ་ཁྱྀ་ནི་ཡབ་ཀྱི་མདད་གཏོང་ངོ་། གཅེན་ཤ་ཁྱྀ་ནི་ཡབ་ཀྱི་སྐུ་མཚལ་གཉེར་དུ་གཤེགསོ། ཉ་ཁྱྀ་ནི་རྐོང་དཀར་པོ་ལགསོ། དམག་སུམ་སྟོང་སུམ་རྒྱ་ཞིག་དང་ཆསྟེ་གཤེགསོ། མཁར་པྱིང་བར་གཤེགསོ། ཡུལ་ཡབ་ཀྱི་རྗེ་མྱི་བཞུགས་ན། པྱི་འབྲོག་གདེངས་པྱོལ་པྱོལ་གྱི་ཆའོ། དོག་ཡབ་ཀྱི་ཆར་མ་མཆིསྣ། ས་འོན་བུ་སྤུར་ཁོག་ཁོག་ཅེས་གསུངས་སོ། །མེན་པ་འཕྲེང་བའྀ་ལ་འདའ་སོ། །ཏིང་སྲབ་རོང་རྀངས་འདའས་སོ། །བ་ཆོས་གུང་ཐང་དུ་གཤེག་སོ་ཞེས་བཙན་པོ་སྤུ་དེ་གུང་རྒྱལ་གྱིས་མཁར་འཕྱིང་བ་སྟག་རྩེ་ནས་ལོ་ངམ་གྱི་མཁར་མྱང་རོ་ཤམ་པོར་དམག་དྲངས་དུས་སུ་འཕྱོངས་རྒྱས་ཀྱི་ཡུན་ཚན་དུ་འགྱུར་པའི་མེན་པ་འཕྲེང་བའི་ལ་དང་ཏིང་སྲབ་རོང་རིངས་ཀྱི་ས་མིང་གཉིས་མངོན་རྒྱུ་ཡོད་པ་སྣང་།

ཡང་ཏུན་ཧོང་ཤོག་དྲིལ་p1287ཏེ་སྟག་བུ་སྙ་གཟིགས་ཀྱི་སྐབས། སྤུ་རྒྱལ་གྱི་ཆབ་སྲིད་ཉམས་རྒུད་སོང་བར་སླར་གསོ་བྱས་པའི་སྐོར་ལ་མྱང་བས་མནོན་དང་གསུམ། བྲོ་ལེན་ཆིང་མཁར་པྱིང་བར་མཆིས་ནས། ཉིན་ཞིང་ནྀ་ཕག་ཚལ་གྱི་ཤིང་ཁུང་ན་སྐུགས་སོ། མཚན་ཞིང་ནྀ་པྱིང་བར་མཆི་སྟེ། དབུ་སྙུང་བྲོ་མནའ་གཅོད་པའྀ་ཚེ། ཡར་མྱྀ་འབངས་ཀྱིས་དཔྱད་པའ། མྱྀ་བཟངས་ནི་རྟ་བཟངས་ཤིག །ཉྀན་ཞིང་ནྀ་ཕག་ཚལ་ན། མཚན་ཞིང་ནི་པྱིང་བར་མཆིའ། དགྲ་འམ་ནྀ་ཟིང་ཅིའུ་ཞེས་དཔྱད་དོ། འུང་གི་རྗེས་ལ། ཟིང་པོ་རྗེ་ལ་དྲ་མ་མ་རྒྱལ་སྟག་བུ་དགུང་དུ་གཤེགསོ་ཞེས་བློན་པོ་མྱང་མང་པོ་རྗེ་ཞང་སྣང་དང་། ཕང་ཏོ་རེ་དབྱི་ཚབ། ཞང་མནོན་བཟང་ཏོ་རེ། དེ་བཞིན་ཚེས་སྤོང་ནག་སེང་རྣམས་ཚོགས་ནས་ཟིང་པོ་རྗེ་སྟག་སྐྱ་བོར་དམག་དྲངས་རྒྱུའི་གྲོས་བྱས་ཀྱང་། དམག་མ་དྲངས་གོང་ལ་བཙན་པོ་སྐུ་གཤེགས་པས་དེ་མུར་ལུས་པའོ། །དེ་ཡང་ཏུན་ཧོང་ཤོག་དྲིལ་དེའི་ནང་དུ་ཐོན་པའི་ཕག་ཚལ་ཅེས་པའི་ས་མིང་དེ་ཉིད་ནི་དེང་གི་འཕྱོངས་རྒྱས་རྫོང་རི་བོ་བདེ་ཆེན་དགོན་གྱི་དགོན་གཤམ་ན་གནས་པའི་དགོན་དེར་དོ་དམ་བྱེད་མཁན་གྱི་ལས་བྱེད་མི་སྣ་སྡོད་ཁུལ་དེ་ཡིན་ནོ། །

བཙན་པོའི་བང་སོའི་རྒྱང་རིང་གི་སྣང་བརྙན།

དེ་ནས་དུས་ཕྱིས་ཀྱི་ཆོས་འབྱུང་དེབ་ཐེར་དང་བོན་གྱི་བསྟན་འབྱུང་རྣམས་ལས་མཁར་འཕྱིང་བ་སྟག་རྩེའི་ལོ་རྒྱུས་དང་གཅིག །བང་སོའི་ལོ་རྒྱུས་དང་གཉིས་ནི་སྲོང་བཙན་ཡར་སྔོན་གྱི་འཕྱོངས་རྒྱས་ས་ཆའི་ལོ་རྒྱུས་ལ་མེད་དུ་མི་རུང་བའི་ཆ་ཤས་ཤིག་ཡིན་ལ། ཕྱོགས་གཞན་ཞིག་ནས་བལྟས་ན་འཕྱིང་བ་སྟག་རྩེའི་ལོ་རྒྱུས་དང་བང་སོའི་ལོ་རྒྱུས་ནི་འཕྱོངས་རྒྱས་ཡུལ་ལུང་སྤྱིའི་ལོ་རྒྱུས་ཀྱི་བསྡུས་རིས་ལྟ་བུར་སྣང་བས་དེར་ཁ་གསལ་ཚིག་ཉུང་གི་ཆ་ནས་བྲི་བའི་དགོས་པ་ཆེར་མཐོང་བས་གླེང་བར་བྱའོ། །

སྐུ་མཁར་འཕྱིང་བ་སྟག་རྩེ་དེ་ཉིད་བཙན་པོ་སྤུ་དེ་གུང་རྒྱལ་གྱི་ལོ་རྒྱུས་གླེང་སྐབས་སུ་ཐོག་མར་ཐོན་ཡོང་བར་ནི་གོང་དུ་བརྗོད་ཟིན་པའི་ཏུན་ཧོང་གཏེར་ཡིག་ཙམ་དུ་མ་ཟད། ད་དུང་ཆོས་འབྱུང་དེབ་ཐེར་མང་པོའི་ནང་དུ་མངོན་རྒྱུ་ཡོད་པར། མཁས་པ་ལྡེའུས་མཛད་པའི་རྒྱ་བོད་ཆོས་འབྱུང་རྒྱས་པར་ངར་ལས་སྐྱེས་ཀྱིས་ལག་དཔོན་བྱས་ནས་སྐུ་མཁར་ཕྱིང་པ་རྩེ་དྲུག་བརྩིགས་ཞེས་དང་། རྒྱལ་རབས་གསལ་མེ་རུ་སྤོ་བའི་ཡུལ་ནས། སྲས་བྱ་ཁྲི་གདན་དྲངས་ཏེ། ཡར་ལུངས་སུ་བཞུགས། སྐུ་མཁར་བྱིང་ང་སྟག་རྩེ་བརྩིགས་ཞེས་པ། དུས་ཕྱིས་ཀྱི་རྒྱ་བོད་ཡིག་ཚང་ཆེན་མོ་དང་དཔྱིད་ཀྱི་རྒྱལ་མོའི་གླུ་དབྱངས་དེ་བཞིན་ཆོས་འབྱུང་མཁས་པའི་དགའ་སྟོན་སོགས་ཀྱི་བཞེས་པ་གོང་དང་མཐུན་ལ། ཡང་བཙན་པོའི་དུས་ཀྱི་རྡོ་བརྐོས་ཡི་གེ་དང་ཆོས་འབྱུང་དེབ་ཐེར་རེ་འགའ་དེ་བཞིན་བོན་གྱི་བསྟན་འབྱུང་དུ་སྐུ་མཁར་འཕྱིང་བ་སྟག་རྩེ་ནི་བཙན་པོ་སྤུ་དེ་གུང་རྒྱལ་གྱི་དུས་སུ་བཞེངས་པའི་དགོངས་པ་དང་མི་མཐུན་པ་ཡང་ཡོད་དེ། ཀོང་པོ་གཡུང་དྲུང་འཛིན་གྱི་རྡོ་བརྐོས་ཡི་གེའི་ཡིག་ཕྲེང་4ནས་5པར་ཉ་ཁྲི་བཙན་པོ་མྱི་ཡུལ་གྱྀ་རྗེར། ལྷ་རྀ་གྱང་དོར་གཤེགས་པ་ཚུན་ཆད། དྲྀ་གུམབཙན་པོ་ཕན་ཆད། གདུང་རབས་བདུན་གྱྀ་བར་དུ། །ཕྱིང་བ་སྟག་རྩེ་ན་བཞུགས་བཞུགས། །ཞེས་པ་དང་ལ་དྭགས་རྒྱལ་རབས་སུ་རྒྱལ་པོ་གཉའ་ཁྲི་བཙན་པོའི་བཞུགས་ཡུལ་ལ། ཡར་ལུང་སོགས་དང་སྐུ་མཁར་ཕྱིང་བ་སྟག་རྩེའི་ནང་བཞུགས་ཞེས་བསྟན་པ། བོན་གྱི་བསྟན་འབྱུང་གྲགས་པ་གླིང་གྲགས་དུ་དགོངས་པ་གཙང་མ་ཡར་ལུང་སོག་ཁར་གཟིགས། གནས་གཙང་མ་རྩེ་མོ་བྱུང་རྒྱལ་ལ་བབ། སྐུ་མཁར་བྱེ་མ་སྟག་རྩེ་བརྩིགས་ཅེས་པའོ། །དེ་ཡང་གཡང་མོ་མཚོ་ལགས་ཀྱི་གཉའ་ཁྲི་བཙན་པོ་ཞིབ་འཇུག་ཏུ། སྤྱིར་རྒྱལ་པོ་གཅིག་ལ་སྐུ་མཁར་གཉིས་སམ་དུ་མ་ཡོད་པ་ནི་ཡ་མཚན་གྱི་རྒྱུ་རུ་མི་འགྲོ་བ་དང་གཅིག །ཡོངས་གྲགས་ལ་མཁར་ལ་སྔ་བ་ཡུམ་བུ་བླ་སྒང་ཡིན་པའི་དོན་ནི་ཡུམ་བུ་བླ་སྒང་ནི་ཕྱིས་སུ་བཞེངས་པའི་སྐུ་མཁར་དག་གི་མ་དཔེ་ལྟ་བུ་ཡིན་པས་དེ་ལྟར་གྲགས་སྲིད་པ་དང་གཉིས་བཅས་ཕྱོགས་གཉིས་ནས་བསམས་ན། ཕྱིང་བ་སྟག་རྩེ་ནི་རྒྱལ་པོ་གཉའ་ཁྲི་བཙན་པོས་ཡུམ་བུ་བླ་སྒང་ལ་དཔེ་བྱས་ཏེ་བཞེངས་པའི་འཇིག་རྟེན་སྲིད་ལུགས་ཕྱག་བཞེས་མཛད་སའི་ཕོ་བྲང་ངམ་ཡང་ན་སྤུ་དེ་གུང་རྒྱལ་གྱིས་ཡུམ་བུ་བླ་སྒང་ལ་དཔེ་བྱས་ཏེ་བཞེངས་པ་གང་རུང་ཞིག་ཡིན་པར་རིགས་ཞེས་གསུངས་སོ། །ཁོ་བོས་འདོད་ཚུལ་དེ་ཅུང་མི་འཐད་སྙམ་སྟེ། སྤྱིར་མཁར་ལ་སྔ་བ་ཡུམ་བུ་བླ་སྒང་ཡིན་པ་ནི་ཆོས་འབྱུང་དེབ་ཐེར་ཕལ་མོ་ཆེའི་དགོངས་པ་ཡིན་ཡང་བཀའ་ཆེམས་བཀའ་ཁོལ་མ་རུ་རྗེ་གཉའ་ཁྲི་བཙན་པོ་དེ་ཡར་ལུང་བཙན་ཐང་སྒོ་བཞིར་ཆགས་ཕེབས་ནས་ཕོ་བྲང་བཏབ་ཡིན། ཕོ་བྲང་ནི་ས་དང་རྡོ་ལ་མ་བརྩིགས། རི་དྭགས་ཤྭ་བ་དང་འབྲོང་། གཅན་གཟན་སྟག་གཟིག་པགས་པ་ལ་གུར་དུ་ཕུབ་ནས་བྱས་པ་ཡིན་ནོ་ཞེས་དང་ཡང་དེབ་ཐེར་དེ་ཉིད་དུ་ལྷ་ཐོ་ཐོ་རི་གཉན་ཤལ་བྱ་བ་དེས་ཡུལ་ཡར་ལུང་ཤེར་དུ་ཕོ་བྲང་ཡུམ་བུ་བླ་སྒང་ཞེས་བྱ་བ་ཤེལ་དཀར་གྱི་མཁར་འདྲ་བ་ཅིག་བཙུགས་ནས་ཞེས་གསལ་བ། དེ་བཞིན་བུ་སྟོན་ཆོས་འབྱུང་དུ་ཨི་ཤོ་ལེགས་ཀྱིས་འཕྱིང་བ་སྟག་རྩེ་བརྩིགས་ཏེ་མཁར་སྔ་ཤོས་ཡིན་ནོ་ཞེས་འཁོད་པའི་ཆ་ནས་ཁོ་བོས་དེར་ཡིག་ཚང་ངོས་སུ་སྤྱི་འཁོད་ལུང་དུ་འདྲེན་ཐོག་ཡོངས་གྲགས་སུ་ཞེས་བརྗོད་དེ་མི་མཐུན་ཕྱོགས་རྣམས་ལ་འགྲེལ་བརྗོད་གང་ཡང་བྱ་མི་དགོས་པའི་ཚིག་སྦྱོར་སྤྱོད་མཁན་ཚོར་འདྲི་བ་རེ་ཟུང་འདོན་པའི་སྤོབས་པ་བསྐྱེད་ཆེད་ཙམ་དུའོ། །དེ་ནས་ཏུན་ཧོང་གཏེར་ཡིག་ཏུ་གཉའ་ཁྲི་བཙན་པོ་དང་འབྲེལ་བའི་ལོ་རྒྱུས་གླེང་སྐབས་སུ་ཡུམ་བུ་བླ་སྒང་ཞེས་པའི་ཚིག་འབྲུ་མེད་པ་དང་བཙན་པོ་སྤུ་དེ་གུང་རྒྱལ་དང་འབྲེལ་བའི་ལོ་རྒྱུས་གླེང་སྐབས་སུ་ལོ་ངམ་དང་མ་འཐབ་སྔོན་དུ་མཁར་ཕྱིང་བར་གཤེགསོ་ཞེས་པའི་གཤེགས་ལས་སྐུ་མཁར་འཕྱིང་བ་སྟག་རྩེ་ནི་ཆོས་འབྱུང་དེབ་ཐེར་དུ་མཁར་ཉང་རོ་ཤམ་པོ་ཕབ་ནས་འཕྱིང་བའི་རྨང་བཏིང་ཞེས་པ་དང་འགལ་བར་འགྲོ་བས་ཉང་རོ་ཤམ་པོ་ཕབ་ནས་འཕྱིང་བ་སྟག་རྩེ་ཉམ་གསོ་བྱས་པའི་ཚུལ་དུ་སྣང་། ཡང་བཙན་པོའི་དུས་ཀྱི་རྡོ་བརྐོས་ཡི་གེ་ལས་ཀོང་པོ་གཡུང་དྲུང་འཛིན་གྱི་རྡོ་བརྐོས་ཡི་གེའི་ངོས་སུ་ཉ་ཁྲི་བཙན་པོ་མྱི་ཡུལ་གྱི་རྗེར། ལྷ་རི་གྱང་དོར་གཤེགས་པ་ཚུན་ཆད། དྲི་གུམ་བཙན་པོ་ཕན་ཆད། གདུང་རབས་བདུན་གྱི་བར་དུ། །

ཕྱིང་བ་སྟག་རྩེ་ན་བཞུགས་བཞུགས། །ཞེས་ཕྱིང་བ་སྟག་རྩེ་དེ་ཉིད་གཉའ་ཁྲི་བཙན་པོའི་དུས་སུ་བཞེངས་པར་གསལ་ཞིང་། ཡང་ཕྱིང་བ་སྟག་རྩེ་དེ་ཉིད་ཡུམ་བུ་བླ་སྒང་ལ་དཔེ་བླངས་ནས་འཇིག་རྟེན་སྲིད་ལུགས་ཕྱག་བཞེས་མཛད་སའི་ཕོ་བྲང་ལ་ངོས་བཟུང་བར་ཏུན་ཧོང་གཏེར་ཡིག་གི་དོན་ཆེན་གནད་བསྡུས་ལོ་ཚིགས་སུ་བཙན་པོ་ཚང་གི་གདུང་མཆོད་གཏོང་ཡུལ་ནི་འཕྱིང་བ་སྟག་རྩེ་ཡིན་པ་ལས་གཉན་པོ་གསང་བར་བྱེད་པའི་ཡུམ་བུ་བླ་སྒང་ནི་གཏན་ནས་མ་ཡིན། དེ་ཙམ་དུ་མ་ཟད་བཙན་པོ་འདུས་སྲོང་མང་པོ་རྗེའི་གླུ་མཆིད་དུ་ཕྱིང་བ་སྟག་རྩེ་ན་སྤུ་རྒྱལ་གྱི་གདུང་མི་ཆད་ཞེས་བླངས་པ་ལས་སྤུ་རྒྱལ་བཙན་པོའི་གདུང་རྒྱུད་ཀྱི་ཁུངས་གཏུགས་ས་ནི་མཁར་འཕྱིང་བ་སྟག་རྩེ་ཡིན་པར་གསལ་བའོ། །

རྫོང་རིའི་རྡོ་བརྐོས་ཡི་གེ

དེ་ནས་ལེགས་དྲུག་གི་དུས་སུ་མཁར་འཕྱིང་བ་སྟག་རྩེའི་རྨང་གཞིའི་སྟེང་དུ་གཡུ་རྩེ། དབུ་རྩེ། ཁྲི་རྩེ་འབུམ་སྟུག །མཐོང་རྩེ་བཅས་འཕྱིང་ས་རྩེ་དྲུག་བརྩིགས་ལ་དུས་ཕྱིས་ཀྱི་སྤུ་རྒྱལ་བཙན་པོ་རིམ་བྱོན་རྣམས་ཀྱི་སྐུ་མཁར་འཕྱིང་བ་སྟག་རྩེ་རུ་འཇིག་རྟེན་སྲིད་ཀྱི་མཛད་པ་བསྐྱངས་ཤིང་། སྤུ་རྒྱལ་སྟག་རི་སྙ་གཟིགས་ཀྱི་དུས་སུ་མཁར་འཕྱིང་བ་སྟག་རྩེ་ནས་མངའ་ཐང་རྒྱ་བསྐྱེད་པའི་གྲོས་བཤམས་ཏེ། གནམ་རི་སྲོང་བཙན་དང་ཁྲི་སྲོང་བཙན་ཡབ་སྲས་གཉིས་ཀྱི་དུས་སུ་སྤུ་རྒྱལ་ཆབ་སྲིད་ཀྱི་ལྟེ་བ་རིམ་བཞིན་འཕྱིང་བ་སྟག་རྩེས་ནས་གྱེས་ཀྱང་། མཐར་བཙན་པོ་རྣམས་གཤེགས་དུས་སུ་འཕྱིང་བ་སྟག་རྩེར་གདུང་མཆོད་སྤེལ་བའི་ཚུལ་ལས་འཕྱིང་བ་སྟག་རྩེ་ནི་སྤུ་རྒྱལ་བཙན་པོ་ཚང་གི་སྲིད་ཕྱོགས་ཀྱི་མཛད་པ་ཁོ་ན་བསྐྱངས་ས་མ་ཡིན་པ་ཤུགས་ལས་ཤེས་སོ། །

བཙན་པོ་གནམ་རི་སྲོང་བཙན་གྱི་དུས་སུ། སྤུ་རྒྱལ་གྱི་སྲིད་དབང་གི་ལྟེ་བ་ནི་སྔར་བཞིན་འཕྱོངས་རྒྱས་ཁུལ་དུ་ཡོད་པར། ཏུན་ཧོང་ཤོག་དྲིལ་p1287ཏེ་གནམ་རི་སྲོང་བཙན་གྱིས་ཟིང་པོ་རྗེ་སྟག་སྐྱ་བོ་སོགས་བརླགས་ནས་སྤུ་རྒྱལ་གྱི་ཆབ་སྲིད་སླར་གསོ་མཛད་པའི་སྐོར།(ཐིག་ཕྲེང་236ནས་239)ཐང་ལ་ནི་རྩེ་བཆད་ཆིང་། ཡུ་སྣའི་ནི་མཁར་པབ་ཆིང་།

པྱིང་བའི་ནི་སྣོན་དུ་བགྱིས། སྔ་ནས་ནི་མཐོ་བ་ལ། ད་ཙམ་ནི་དགུང་ལ་རེག ངས་པོ་ནི་སྒང་དྲས་ཤིང་། ཡར་མོ་ནི་ཁོལ་དུ་སྩལད། སྔ་ན་ནི་ཆེ་བ་ལ། ད་ཙམ་ནི་མཐའ་ཡང་ཡས། ཞེས་སྤུ་རྒྱལ་བཙན་པོའི་དམག་གི་ཟིང་པོ་རྗེའི་བླ་རི་གཉན་ཆེན་ཐང་ལྷའི་རྩེ་བཅད་དེ། ཡར་ལྷ་ཤམ་པོའི་སྨད་དུ་བསྣན་ཞིང་། འཕན་ཡུལ་ཕག་གི་ཡུལ་སྣའི་མཁར་ཕབ་སྟེ། ཕྱི་དབང་སྟག་རྩེའི་མཁར་གྱི་ཁ་སྣོན་དུ་བྱས་ལ་ཡུལ་ངས་པོའི་སྒང་དྲས་ནས་ཡར་ཀླུང་གི་བྲན་དུ་བྱས་པ་དེ་ལས་སྐབས་དེའི་སྤུ་རྒྱལ་གྱི་སྲིད་དབང་གི་ལྟེ་བ་ནི་སྔར་བཞིན་འཕྱོངས་རྒྱས་ཁུལ་དུ་ཡོད་པ་བདེན་པས་སྒྲུབ། དེ་ཙམ་དུ་མ་ཟད་རྒྱའི་ཡིག་ཚང་རྒྱལ་རབས་དཔྱད་སྐྱོང་མེ་ལོང་ཤོག་གྲངས་190མཐའ་མཚམས་དྲུག་པ། བོད་ཅེས་པའི་ཤོག་གྲངས་ནང་དུ་འཁོད་དོན། ཏོ་ཁཡེ་ཁྲི་ལོ་581ནས་600དེའི་ཡབ་སློན་བཙན་སློན་ནམ་བཙན་དེས་ལོ་50རིང་ཕྱི་དབང་སྟག་རྩེར་ལྟེ་གནས་བྱས་ཏེ། རྒྱལ་ཁབ་ཀྱི་ས་མཚམས་ནི། ལྷོ་ནུབ་རྒྱ་གར་དུ་བྱས། ཐང་རྒྱལ་རབས་ཀྱི་འགོ་སྟོད་དུ། དམག་ཧྲག་ཁྲི་སྐོར་ཡད་པའི་རྒྱལ་ཁབ་སྟོབས་ཆེན་ཞིག་ཡིན་པར་གྲགས་ཞེས་གསལ་པོར་འཁོད་ཡོད་པ་ལས་སྲོང་བཙན་ཡར་སྔོན་གྱི་སྤུ་རྒྱལ་བོད་ཀྱི་སྲིད་འབྱོར་རིག་གསུམ་གྱི་ལྟེ་གནས་ནི་འཕྱོངས་རྒྱས་ཁུལ་དེ་རང་ཡིན་པ་ནི་སྨོས་མེད་ལགས། །

བང་སོའི་མདུན་གྱི་རྡོའི་སེང་གེ

དེ་ནས་སྲོང་བཙན་ཡར་སྔོན་གྱི་འཕྱོངས་རྒྱས་ས་ཆའི་ལོ་རྒྱུས་ལས་བང་སོའི་ལོ་རྒྱུས་བསྟན་པར། བཙན་པོ་གྲི་གུམ་བཙན་པོའི་སྤུར་འཕྱོངས་རྒྱས་གྲང་མོ་གྲང་ཆུང་དུ་བཏབ་པ་ནས་རྒྱ་དུར་བཙུགས་པའི་སྲོལ་དེ་ཉིད་དར་ལ། ཕྱིས་ཀྱི་བཙན་པོ་རིམ་བྱོན་རྣམས་ཀྱི་བང་སོའང་འཕྱོངས་རྒྱས་ཁུལ་ཁོ་ན་ཉིད་དུ་བཏབ་པར། ཡོངས་གྲགས་སུ་སྟེང་གཉིས་བང་སོ་གཡའ་དང་རྫ་ལ་བཏབ། ལེགས་དྲུག་གི་བང་སོ་གཡའ་སྤང་མཚམས་སུ་བཏབ། ལྡེ་བརྒྱད་བང་སོ་ཆུ་བོའི་གཞུང་ལ་བཏབ། བཙན་ལྔའི་བང་སོ་ཕྱིང་ལུང་དར་ཐང་དུ་བཏབ་ཅེས་གྲགས་ལ། ཆོས་འབྱུང་དེབ་ཐེར་འགའ་ཞིག་དུ་བང་སོ་བཏབ་ཁུལ་གྱི་གཡའ་སྤང་དང་ཆུ་བོ་གང་ཡིན་བསྟན་པར། ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད་དུ་ལེགས་དྲུག་གི་སྤུར་དོན་མཁར་གཡའ་སྤངས་མཚམས་སུ་བཏབ་བོ། །ཞེས་དང་། བཀའ་ཆེམས་ཀ་ཁོལ་མ་རུ་སྡེ་བརྒྱད་བང་སོ་ཤམ་པོའི་ཆུ་ལ་བཏབ་བོ་ཞེས་པ་ལས། བཙན་པོ་རིམ་བྱོན་གྱི་བང་སོ་ནི་འཕྱོངས་རྒྱས་ཁུལ་ཉིད་དུ་བཏབ་པ་ནི་སྨོས་མེད་ལགས། དེ་ནས་བཙན་པོ་ཁྲི་སྙ་ཟུང་བཙན་ནས་འཕྱོངས་རྒྱས་དོན་མཁར་མདའ་རུ་བང་སོ་བཙུགས་པའི་སྲོལ་བྱུང་ཞིང་གནམ་རི་སྲོང་བཙན་བར་བཙན་པོ་འབྲོ་སྙ་ལྡེའུ་མཛེ་ནད་ཀྱི་རྐྱེན་པས་ཞང་མདར་གསོན་དུར་དུ་བཞུགས་པ་ཕུད་དེ་བྱིང་གི་བཙན་པོ་རྣམས་ཀྱི་བང་སོ་ཁུལ་དེ་ཉིད་དུ་བཏབ་པའོ། །དེ་ཡང་བང་སོ་བཏབ་ཡུལ་དང་འབྲེལ་བའི་འཕྱོངས་རྒྱས་ཡུལ་གྱི་ས་མིང་མང་དག་ཅིག་ཡོད་པ། དཔེར་ན་གྲང་མོ་གྲང་ཆུང་དང་དོན་མཁར་མདའ་དེ་བཞིན་ཕྱིང་ལུང་དར་ཐང་སོགས་ལ་ཁོ་བོས་དུས་ཕྱིས་འཕྱོངས་རྒྱས་ཡུལ་གྱི་ས་མིང་སྐོར་གླེང་དུས་སུ་ཆེད་དུ་དཔྱད་བརྗོད་ཞུ་རྒྱུ་ལགས། །

རྒྱའི་ཡིག་ཚང་ལྟར་ན་བཙན་པོ་སྲོང་བཙན་སྒམ་པོའི་དུས་སུ་སྤུ་རྒྱལ་གྱི་རྒྱལ་ས་དབུས་ཕྱོགས་ལྷ་སར་ཡིན་པར། ཐང་གི་ལམ་སྲོལ་གནད་བསྡུད་སུ་འཁོད་པའི་བོད། ཏང་ཞང་། བུད་མེད་རྒྱལ་ཁབ་སོགས་ཀྱི་སྐོར་ལས། དེའི་རྒྱལ་སའི་མིང་ལ་ར་ས་མཁར་ཟེར་ཞེས་འཁོད་ཀྱང་། ཏུན་ཧོང་ཤོག་དྲིལ་དུ་བཙན་པོ་སྲོང་བཙན་གྱི་དུས་སུ་མཁར་འཕྱིང་བ་སྟག་རྩེ་ནི་སྔར་བཞིན་བཙན་པོའི་བྲང་ས་ཡིན་པ་གང་ཞིག་རྒྱལ་བློན་དང་བཙུན་མོའི་གླུ་མཆིད་དུ་ཡང་ཡང་ཐོན་པར་དཔེར་ན། ཏུན་ཧོང་ཤོག་དྲིལ་p1287སྟེ་(ཐིག་ཕྲེང་321ནས་324)བཙན་པོས་སྤུང་སད་གསོལ་བ་བཞིན་གནང་སྟེ། མགར་ཡུལ་སྲུང་ཕོ་བྲང་ས་འདྲིར་བཀའ་སྩལ་ནས། ཡུལ་ཟུང་ཁྲི་བོམས་སུ་མཆིས་ཏེ་བརྟགས་ན། དཀུ་གང་པུབ་པར་ཡུལ་ཟུང་གྀས་ཚོར་ནས། ཡུལ་ཟུང་སླར་བྲོསྟེ་བཙན་པོའི་སྙན་དུ་གསོལ་ཏོ། ཡུལ་ཟུང་སླར་བྲོས་པའྀ་རྗེས་ལ། ཁྱུང་པོ་སྤུང་སད་རང་ལྕེབསྟེགུམ་ནས། མགོ་བཆད་དེ། བུ་ངག་རེ་ཁྱུང་བསྐུར་ནས། སྐུར་མཁར་པྱིང་བར་མཆྀས་སོ་ཞེས་དང་། བཙན་མོ་སྲས་མ་དཀར་གྱིས་ཞང་ཞུང་དབང་དུ་བསྡུ་རྒྱུའི་འཕྲིན་གླུ་བླངས་བར།(ཐིག་ཕྲེང་415ནས་416) ཐུར་ཐུར་ནྀ་པྱིང་བའྀ་བཅུད། རུ་རྒྱུས་ནྀ་ལྡོང་ཏོང་སྩལད། ཤ་ལྐོ་ནི་ལྷེ་རྔེགས་སྩལད། ཅེས་གསལ་བའོ། །

བཙན་པོ་སྲོང་བཙན་སྒམ་པོའི་དུས་ནས་བཟུང་སྤུ་རྒྱལ་བཙན་པོའི་སྲིད་དབང་སྲ་བརྟན་ཡོང་ཆེད། སྲིད་འཛིན་སྒྲིག་གཞི་དང་ཁྲིམས་ལུགས་བརྟན་ལ་ཕབ་ཅིང་། འཕྱོངས་རྒྱས་ནི་གཡོ་རུའི་སྟོང་སྡེའི་ཁོངས་སུ་གཏོགས་པ་མ་ཟད། སྟོང་དཔོན་ནི་ཚེ་སྤོང་ཡི་རུས་མཚན་གྱི་མི་སྣ་ཞིག་ཡིན་ལ། ཚེ་སྤོང་ཡི་རུས་མཚན་ནི་བཙན་པོ་ཚང་གི་ཁྱིམ་རྒྱུད་དང་འབྲེལ་བ་ཤུགས་ཆེན་ཡོད་པར། བཙན་པོ་སྲོང་བཙན་སྒམ་པོ་དེ་བཞིན་མུ་ནེ་བཙན་པོ། ཁྲི་ལྡེ་སྲོང་བཙན་བཅས་ཀྱི་ཡུམ་ནི་ཚེ་སྤོང་རུས་མཚན་ཡིན་པའི་ཆ་ནས་སྤུ་རྒྱལ་བཙན་པོའི་དུས་སུ་འཕྱོངས་རྒྱས་ཀྱི་གལ་ཆེའི་གནས་བབ་ཤུགས་སུ་རྟོགས་ཐུབ། །

གཞན་ཡང་ཏུན་ཧོང་གཏེར་ཡིག་ལ་གཞིགས་ཚེ། བཙན་པོ་འདུས་སྲོང་མང་པོ་རྗེའི་དུས་སུའང་། འཕྱོངས་རྒྱས་ཁུལ་དེ་ཉིད་ནི་སྔར་རྒྱུན་བཞིན་སྤུ་རྒྱལ་བཙན་པོའི་ཆབ་སྲིད་ལ་གལ་འགངས་ལྷག་ཏུ་ཆེ་བར་སྣང་སྟེ། ཏུན་ཧོང་ཤོག་དྲིལ་p1287སྟེ། བཙན་པོ་འདུས་སྲོང་གི་གླུ་མཆིད་(ཐིག་ཕྲེང་470ནས་471)དུ་པྱ་མདའྀ་ནི་ཁང་སྐྱ་དང་།

པྱིང་བའྀ་ནི་སྟག་རྩེ་གཉིས། གང་མཐོ་ནི་གག་དམའ་བ། ཡར་ལྷ་ནྀ་ཤམ་པོ་མཁྱེན་ཞེས་དང་།(ཐིག་ཕྲེང་477ནས་478)དུ་པྱྀང་བའི་ནི་སྟག་རྩེ་ན། སྤུ་རྒྱལ་ནི་གདུང་མྱྀ་འཆད་ཅེས་མ་གཞི་རྒྱལ་པོ་སྲོང་བཙན་སྒམ་པོའི་དུས་སུ་སྲིད་དབང་གི་ལྟེ་བ་ཡར་ལུང་འཕྱོངས་རྒྱས་ཁུལ་དུ་མ་ཡིན་ཞིང་། དམར་པོ་རིའི་སྟེང་དུ་ཕོ་བྲང་དམར་པོ་གསར་བཞེངས་མཛད་ཚུལ་ཡང་བཀའ་ཆེམས་ཀ་ཁོལ་མ་རུ་ཞིབ་པར་འཁོད་ཀྱང་། ཏུན་ཧོང་གཏེར་ཡིག་གི་ངོས་སུ་འཕྱིང་བ་སྟག་རྩེ་དེ་ཉིད་རྒྱལ་བློན་ཀུན་གྱི་གཙུག་ཏུ་བཀུར་བའི་ངང་ཚུལ་ལ་བརྟག་ན་འཕྱོངས་རྒྱས་ཁུལ་དེ་ཉིད་ཀྱི་སྤུ་རྒྱལ་བཙན་པོའི་ཆབ་སྲིད་ལ་ཐོན་པའི་ནུས་པར་ཤེས་ཚོར་གསར་པ་ཞིག་ཡོང་ངེས་ལགས། དེ་བཞིན་དུ་བཙན་པོ་འདུས་སྲོང་མང་པོ་རྗེའི་དུས་སུ་དེང་གི་འཕྱོངས་རྒྱས་ཡུལ་ཚན་དུ་གྱུར་པའི་ཐང་པོ་ཆེ་ནི་སྤུ་རྒྱལ་བོད་ཀྱི་དཀར་ཡོལ་བཟོ་ས་ཡིན་པར། རྒྱ་བོད་ཡིག་ཚང་ཆེན་མོ་རུ་དེ་ཡི་རྟིང་ལ་རླུང་ནམ་འཕྲུལ་རྒྱལ་དུས། །མཁས་པའི་བཟོ་བོས་སོག་ནག་ཐང་པོ་ཆེར། །འཆིང་བུའི་རྒྱུ་ལ་རྣ་ཐོས་དཔེ་བྱས་ནས། །སུམ་ཅུ་རྩ་གཉིས་ཆེ་ཆུང་འབྲིང་གསུམ་སྟོན། །རབ་དང་འབྲིང་དཀར་ཐ་མ་སྔོ་ཆས་ཆེ། །བོད་ཡུལ་དབུས་གཙང་མཐིལ་ན་ནོར་བུ་ལས། །གྲུབ་པའི་འབྲུག་རྒྱབ་གྲགས་པ་དེ་རྩལ་ལོ། །ཞེས་པའོ། །

བཙན་པོ་ཁྲི་ལྡེ་གཙུག་བཙན་གྱི་དུས་སུ་ཏུན་ཧོང་གཏེར་ཡིག་གི་དོན་ཆེན་གནད་བསྡུས་ལོ་ཚིགས་ལས་དགུན་ཕྱྀང་བར་བཙན་པོ་ཡབ་(ཀྱི་)གྱྀ་མདད་བཏང་ཞེས་དང་། པྱིང་(ཕྱིང)བར་ཕྱྀ་ཁྲི་མ་ལོད་གྱྀ་(ཀྱི)མདད་བཏང་། ཞེས་བཙན་པོ་ཁྲི་ལྡེ་གཙུག་བཙན་དང་འབྲོ་བཟའ་ཁྲི་མ་ལོད་ཀྱི་གདུང་མཆོད་ནི་འཕྱོངས་རྒྱས་འཕྱིང་བ་སྟག་རྩེའི་ཕོ་བྲང་དུ་བཏང་བའི་ཚུལ་ལས་བཙན་པོ་དང་བཙན་མོ་རྣམས་ཡུལ་ལུང་གཞན་དུ་ཚེ་ཡི་འཕེན་པ་རྫོགས་ཀྱང་མཐར་འཕྱིང་བའི་རིང་ཁང་དུ་འདས་མཆོད་སྒྲུབ་ཅིང་འཕྱོངས་རྒྱས་ཁུལ་དུ་བང་སོ་བརྩིགས་པའི་སྲོལ་ནི་ཡབ་མེས་ཀྱི་དུས་ལྟར་གནས་པ་མཐོང་ཐུབ་པའོ། །

དེ་ནས་རིམ་པར་བཙན་པོ་ཁྲི་སྲོང་ལྡེ་བཙན་དང་མུ་ནེ་བཙན་པོ། ཁྲི་ལྡེ་སྲོང་བཙན། ཁྲི་གཙུག་ལྡེ་བཙན་བཅས་བྱོན་ཞིང་། དེ་ཡང་བཙན་པོ་ཁྲི་གཙུག་ལྡེ་བཙན་སྐུ་དུས་སུ་བཞེངས་པར་ངེས་པའི་སྟོད་ལུང་མཚུར་ཕུའི་དགོན་གྱི་ཤར་ངོས་ཀྱི་རྡོ་རིང་ཡི་གེའི་ཡིག་ཕྲེང་1ནས་9པར་ཞང་ཚེས་པོང་གསལ་སྟོའི་བུ་ཚ། གཙྀགས་གནང་བའི་བླ་དཔེ་ནི། །ཕྱིང་བའྀ་སྐུན་མཁར་ན། །གཙྀགས་ཆེན་པོ་གཞན་གྱྀ་ཟླ་ལ་བཞག། །

ཅེས་བཙན་པོའི་བཀའ་གཙིགས་ཀྱི་ཡི་གེ་དག་སྐུ་མཁར་འཕྱིང་བ་སྟག་རྩེ་ན་བདག་གཉེར་བྱེད་པའི་ཁུངས་སྣེ་ལས་བཙན་པོ་ཁྲི་ལྡེ་སྲོང་བཙན་གྱི་དུས་སུའང་འཕྱོངས་རྒྱས་ཀྱི་ཁུལ་ཉིད་ནི་སྤུ་རྒྱལ་ཆབ་སྲིད་ཀྱི་ལྟེ་བའི་ཁུལ་ཞིག་ཏུ་ངེས་ལ། བཙན་པོ་རྣམས་གཤེགས་དུས་སུ་ཡང་ཡབ་མེས་ཀྱི་ལུགས་བཞིན་འཕྱོངས་རྒྱས་སུ་བང་སོ་བཏབ་པའི་སྲོལ་གྱི་རྒྱུན་མི་ཉམས་ཤིང་། བན་བོན་གཉིས་ཀྱི་བར་རྩོད་པ་ཇི་ལྟར་རྣོ་ངར་ཅན་དུ་གྱུར་ཡང་། བང་སོ་འཕྱོངས་རྒྱས་སུ་བཏབ་པའི་སྲོལ་ནི་སྔར་བཞིན་གནས་པའོ། །

མཐར་སྤུ་རྒྱལ་བཙན་པོ་ཁྲི་དར་མའི་དུས་སུ་བན་བོན་གཉིས་ཀྱི་དབྱེ་བར་བཅད་པའི་དབང་བསྒྱུར་གྲལ་རིམ་བར་གྱི་འཐབ་རྩོད་ནི་ཉིན་རེ་བཞིན་མ་འདས་པར་རྣོ་ངར་ཅན་དུ་འགྱུར་ཐོག །བཙན་པོ་ཉིད་ཀྱི་ཡང་སྲིད་དབང་སྲ་བརྟན་ཡོང་ཆེད་བན་དེ་རྣམས་ལ་འཐབ་རྩོད་དྲག་པོ་གནང་ཞིང་འདུལ་བའི་བསྟན་པ་བསྣུབས་པའི་རྒྱུ་རུ་བྱས་ནས་ལྷ་ལུང་དཔལ་གྱི་རྡོ་རྗེས་གཙུག་ལག་ཁང་གི་མདུན་དུ་དུག་མདའ་བརྒྱབ་ནས་བཀྲོངས་པར། ཡབ་མེས་ཀྱི་ལུགས་བཞིན་བཙན་པོའི་སྤུར་འཕྱོངས་རྒྱས་ཡུལ་དུ་དྲངས་ནས་བང་སོ་བཏབ་ཀྱང་། སྐབས་དེའི་སྤུ་རྒྱལ་སྤྱི་ཚོགས་ནང་དབང་བསྒྱུར་གྲལ་རིམ་དབར་རྩོད་པའི་རྒྱུན་མི་ཆད་པའི་དབང་གི་ལོ་རྒྱུས་ཡིག་ཚང་རྣམས་སུ་ཡང་བཙན་པོ་ཉིད་ཀྱི་བང་སོ་བང་རིམ་འཁོར་ལོ་ཅན་དུ་གྲགས་པ་དེ་རྩིག་པའི་འཕྲོ་ལུས་ཅེས་སུ་འཁོད། དུས་ཕྱིས་བཙན་པོའི་སྲས་གནམ་བདེ་འོད་སྲུང་ཡར་ལུང་འཕན་མདར་འདས་ནས་བློན་འབངས་རྣམས་ཀྱི་བཙན་པོའི་བང་སོ་འཕྱོངས་རྒྱས་སུ་བཏབ་སྟེ། དུས་དེ་ནས་བཟུང་བཙན་པོའི་བང་སོ་རྩིག་པའི་རྒྱུན་ནུབ་པ་དང་སྦྲགས་འཕྱོངས་རྒྱས་དང་སྤུ་རྒྱལ་བར་གྱི་ལོ་ངོ་བརྒྱ་ཕྲག་དུ་མའི་སྦྲེལ་ཐག་དེ་ཉིད་ཀྱང་ཆད་དོ། །