གཅིག །བསྟན་འཛིན་སྐ་བྲིས་ཀྱི་འབྱུང་ཁུངས།
ལོ་ཆེན་འདི་ནི་རྒྱལ་པོ་ཁྲི་སྲོང་ལྡེའུ་བཙན་སྐབས་བྱོན་པའི་ལོ་ཙཱ་བ་ཞིག་སྟེ། སྐ་ཅོག་ཞང་གསུམ་གྱི་ཡ་གྱལ་ཡིན། དབུ་རུ་འཕན་ཡུལ་སྐ་བ་ཞེས་པའི་སར་ཡབ་སྐ་བ་བློ་ལྡན་དང་། ཡུམ་འབྲོ་བཟའ་མཛེས་མ་གཉིས་ཀྱི་སྲས་སུ་འཁྲུངས། སློབ་དཔོན་ཆེན་པོས་ལོ་ཙཱར་ལུང་གི་བསྔགས་པ་བཞིན་སྒྲ་སྐད་ལོ་ཙཱ་ལ་མཁས་པའི་ཕུལ་དུ་ཕྱིན། མཁན་པོའི་མདུན་བསྙེན་པ་རྫོགས་ཤིང་སློབ་དཔོན་གྱི་མདུན་ནས་སྔགས་སྦྱངས་པས་མཁས་པའི་ཕུལ་དུ་ཕྱིན། བོད་ཀྱི་ཡི་གེ་འབྲི་བ་པོ་ཐམས་ཅད་ཀྱི་ཕྱི་མོ་ཡིན་ཏེ་ཁྲིད་རྒྱུན་མ་ཉམས་པ་དེང་སང་ཡང་དར་རྒྱས་ཆེ། ལོ་ཙཱ་བ་འདི་ཉིད་ཀྱིས་བསྒྱུར་ཞུས་གནང་བའི་གཞུང་ལུགས་ཤིན་ཏུ་མང་ངོ་། །
གཉིས། བསྟན་འཛིན་སྐ་བྲིས་ཀྱི་རྒྱུན་འཛིན་པ།
བྲིས་རབས་དང་པོ་ཨོ་རྒྱན་བསྟན་འཛིན།
བྲིས་རབས་དང་པོ་གཏེར་སྟོན་ཨོ་རྒྱན་བསྟན་འཛིན།
བྲིས་རབས་དང་པོའི་ཕྱག་བྲིས།
ཨོ་རྒྱན་བསྟན་འཛིན་ནི་སྤྱི་ལོ་1916སྟེ་བོད་རབ་བྱུང་བཅུ་དྲུག་པའི་མེ་ཕོ་འབྲུག་ལ་བྱང་རྫ་ཆབ་དྭངས་མའི་འགྲམ་ངོགས་སུ་ཡུལ་ལ་དགེ་བཅུ་ཚང་བའི་ཨ་རིག་ཕུག་ཁང་དགོན་གྱི་ཉེ་འགྲམ་དུ་ཡབ་འཇིགས་མེད་ནམ་མཁའི་ཉི་མའི་གདུང་རིགས་རྫ་པ་བརྩོན་འགྲུས་དང་། ཡུམ་ཨ་སེ་བ་ཡན་ཚང་ཞེས་པའི་ཁྱིམ་རྒྱུད་དེའི་བུ་མོ་གཡུ་མཚོ་གཉིས་ཀྱི་སྲས་སུ་སྐུ་འཁྲུངས། ཁོང་ནི་དབུ་ཅན་དང་དབུ་མེད་ཕྱག་བྲིས་ཀྱི་འབྲི་རྩལ་ཧ་ཅང་ལེགས་པར་མ་ཟད་ཁྱད་པར་དུ་དབུ་མེད་ཡིག་གཟུགས་འབྲི་རྩལ་ལ་མཁས་པའི་ཕུལ་དུ་ཕྱིན། ལོ་ཙཱ་བ་སྐ་བ་དཔལ་བརྩེགས་དང་ནེའུ་ཆུང་དབྱིངས་ཀྱི་དྷཱ་ཀི་སོགས་སྐྱེ་བའི་ཕྲེང་བར་ལོ་ཙཱ་བ་དང་ཡིག་མཁན་གྱི་བག་ཆགས་སད་པའི་མཐུ་ཡིན་པར་རྒན་རབས་པ་རྣམས་ཀྱི་ཞལ་རྒྱུན་དུ་གྲགས། ཡང་བཤད་རྒྱུན་གཞན་ཞིག་ལ། ཨོ་རྒྱན་བསྟན་པའི་སྣང་བྱེད་ཀྱིས་བོད་ཡུལ་སྟོད་སྨད་ཀུན་ཏུ་སྐ་བ་དཔལ་བརྩེགས་ཀྱི་བྲིས་རྒྱུན་བཙལ་བས། འཕན་པོའི་ས་ཕྱོགས་ཀྱི་ཁྲོ་མོ་བྲག་ཞེས་དཔལ་ལྡན་བརྩེགས་པ་ཟེར་བའི་དབུ་སྐྲ་དཀར་པོ་བགྲེས་ཉམས་ཅན་ཞིག་བཞུགས་པ་དང་ཞལ་ཏ་མང་དུ་གནང་བས། དཔལ་བརྩེགས་བྲིས་རྒྱུན་ཁོ་བོས་ཤེས་གསུངས་པས་དེ་ལས་སྦྱང་གནང་མཛད་པས་བྲིས་རྒྱུན་འདི་ཡང་བྱུང་བར་མངོན་ལ་ཁོང་གི་ཕྱག་བྲིས་ཐད་ཀྱི་ཁྱད་ཆོས་གཙོ་བོ་ནི་འབྲི་བྱེད་ཡོ་བྱད་ཀྱི་ཆ་རྐྱེན་ཤིན་ཏུ་ཞན་ཡང་ལག་གཡོན་སོར་བཞིའི་སྟེང་དུ་ཤོག་བུ་བཞག་སྟེ་སྣག་སྨྱུག་སོགས་གང་ལོན་ལོན་གྱིས་བྲིས་ཀྱང་ཡིག་གཟུགས་ལ་འགྱུར་བ་མེད་ཅིང་མགྱོགས་བུལ་ལ་ཡང་བཀག་འགོག་མེད་པ་ཞིག་ཡིན་ཟེར་སྲོལ་འདུག །ཕ་ཡུལ་གྱི་ཡིག་མཁན་པ་མང་དག་ཅིག་ཁོང་གི་དངོས་ཤུགས་ཟུར་གསུམ་གྱིས་བྲིས་རྒྱུན་དུ་གྲགས། ཕྱག་བྲིས་ཀྱི་པོད་གྲངས་ཧ་ཅང་མང་བར་གྲགས་ཀྱང་དུས་འགྱུར་གྱི་དབང་གིས་ཕལ་ཆེར་འཐོར་ཞིག་ཏུ་སོང་། ཁྱད་པར་ཁོང་གིས་སྐུ་ཚེ་ཧྲིལ་པོར་ཕྱག་བྲིས་ཕོན་ཆེན་འབྲི་བ་སོགས་མཛད་འཕྲིན་རྒྱ་ཆེར་བསྐྱངས་ནས་མཐར་སྤྱི་ལོ་1968རབ་བྱུང་བཅུ་དྲུག་པའི་ས་སྤྲེལ་ལོའི་ས་ག་ཟླ་བའི་ཚེས་མགོར་ཡར་ངོས་ཚེས་བཅུའི་ཉིན་ལྷ་རྗེ་གསང་རྡོར་ཚང་གི་ཁྱིམ་ནས་མ་ཆུའི་སྟོད་དུ་སྐུ་འདས་སོང་བར་གྲགས།
བྲིས་རབས་དང་པོའི་ཕྱག་བྲིས།
བྲིས་རབས་གཉིས་པ་གུ་དྲག་བསྟན་འཛིན།
རིག་འཛིན་རྡོ་རྗེ་སྙིང་པོ་རྩལ་ལམ་བླ་མ་གུ་དྲག་བསྟན་འཛིན་ནི་སྤྱི་ལོ་1957སྟེ་བོད་རབ་བྱུང་བཅུ་དྲུག་པའི་གསེར་འཕྱང་ཞེས་པ་མེ་མོ་བྱ་ཡི་ལོ་ལ་ཡབ་ཨོ་རྒྱན་བསྟན་འཛིན་དང་ཡུམ་འཇིགས་འཚེངས་གཉིས་ཀྱི་སྲས་སུ་ཨ་རིག་རྫ་བུ་ལེགས་ཞེས་པའི་ས་ཆར་སྐུ་འཁྲུངས། ཨ་ཡ་བཀྲ་དོན་ཟེར་བ་ཞིག་བོད་ཡིག་འབྲི་ཀློག་གི་རྩ་བའི་དགེ་རྒན་དང་། ཤེས་རབ་མེ་འབར། རོང་རྒྱབ་བློ་གྲོས་རྒྱ་མཚོ། མཁན་ཆེན་པདྨ་ཚེ་དབང་སོགས་དགེ་བའི་བཤེས་གཉེན་དུ་མ་བསྟེན་ནས་ཨ་རིག་ཕུག་ཁང་དགོན་བདེ་ཆེན་ཆོས་འཁོར་ལྷུན་པོའི་ལས་ཆེན་ལྔའི་མཚན་གནས་ཐོག་ཕྱག་རྗེས་ཆེ་བའི་གསེར་གྱི་རྟགས་མ་ཐོབ། མི་གཞི་ཀུན་སྤྱོད་དང་བཅས་པ་ཤིན་ཏུ་ལེགས་པའི་ཚད་དུ་གྲགས། མི་ཚེའི་སྐྱིད་སྡུག་གང་ལ་ཡང་སུན་སྣང་དང་ཁྲོ་བ་གཏན་ནས་མེད། དགུང་ལོ་ཆུང་ངུའི་དུས་ནས་རྡོ་གཡའ་མ་ཙམ་གྱི་ཆ་རྐྱེན་འོག་བོད་ཡིག་འབྲི་ཀློག་དང་རིག་པའི་གནས་ཀུན་ལ་རང་སྦྱོང་གི་བརྩོན་པ་བསྐྱེད་ནས་ཤིན་ཏུ་མཁས་པར་གྲགས། རྒན་རབས་པ་འགའ་ཡི་བཀའ་གསུང་དང་གཞན་རང་ཉིད་ཀྱི་བག་ཆགས་སོགས་ཀྱིས་ཡབ་ཀྱི་བྲིས་གཟུགས་ཀྱིས་ཐུགས་ཡིད་རབ་ཏུ་འཕྲོག་ནས་ཡབ་ཀྱི་བྲིས་གཟུགས་ཕྱག་ལ་འཕྲོད་པས་ཡིག་གཟུགས་ཀྱི་མཛེས་པ་ཡོད་ཚད་བླངས། ཕྱག་བྲིས་དབུ་མེད་དེ་ལ་ཡིག་ཆེན་ཡིག་འབྲིང་ཡིག་ཆུང་གསུམ་དང་རྐང་པ་རིང་ཐུང་སོགས་ཀྱི་དབྱེ་བས་ད་གཟོད་བླ་མ་གུར་བསྟན་གྱི་ཡིག་གཟུགས་ཞེས་ཧ་ཅང་དར་ཁྱབ་དང་སྙན་གྲགས་ཆེ་བ་བྱུང་། གཞན་ཡང་ཞལ་གདམས་དང་མན་ངག་སོགས་ཕལ་ཆེར་འོལ་ཚོད་ཀྱིས་ཕྱོགས་གཅིག་ཏུ་དྲིལ་ན་པོད་བརྒྱ་ཕྲག་ལྷག་ཙམ་ཡོད་པ་སྨྲོས་མི་དགོས་ལ། ད་ལྟ་ཁྱིམ་གཞིས་དེ་ནའང་པོད་བཅུ་ཕྲག་ལྔ་དྲུག་ཙམ་མཉམ་དུ་ཡོད་པ་ཡིན། ཕྱག་བྲིས་བྱས་ནས་དག་མགྱོགས་སྐྱེན་གཙང་ལྡན་པ་བྲིས་པ་རབ་ཀྱི་མཚན་ཉིད་ལྡན་པ་བྲིས་རབས་གཉིས་པ་འདི་བྱུང་བ་ཡིན། སྤྱི་ལོ་2021ལོ་སྟེ་བོད་རབ་བྱུང་བཅུ་བདུན་པའི་ཀུན་ལྡན་ཞེས་པ་ལྕགས་ཕོ་བྱི་བའི་ཟླ་བཅུ་གཅིག་གི་ཚེས་བདུན་ཏེ་དགུན་ཉི་ཟློག་གི་ཉིན་དང་པོའི་དེར་སྐུ་འདས་གྲོང་དུ་སོང་བར་གྲགས།
བྲིས་རབས་གཉིས་པ་གུ་དྲག་བསྟན་འཛིན།
གསུམ། བསྟན་འཛིན་སྐ་བྲིས་ཀྱི་ཁྱད་ཆོས།
བྲིས་གཟུགས་འདི་དག་གི་ཁྱད་ཆོས་གཙོ་བོ་ནི་འདོན་ཀློག་བདེ་ལ་ཡུན་རིང་བལྟས་ཀྱང་མིག་ཚེགས་ཆུང་བ། གཞན་མཛེས་ཆ་ལྡན་ལ་ཤེས་སླ་བ་སོགས་ཁྱད་ཆོས་མང་པོར་ལྡན། ཡིག་ཆེན་འདིས་སྒྲུབ་པ་ཆེན་པོའི་ཆོ་ག་བྲིས་ན་རྔམ་བརྗིད་ལྡན་ལ་རྒྱས་སྤྲོས་ཆེ་བས་སྒྲུབ་ཆེན་ཚོམ་བུ་ཚོགས་སྒྲུབ་ལ་བཞུགས་པ་ལྟ་བུ་ཡིན། ཡིག་འབྲིང་འདི་ནི་ཁྲིད་ཡིག་གཞུང་བཤད་སོགས་ལ་བྲིས་ན་གྲལ་འགྲིགས་ལ་རྐང་སྙོམས་པས་གཞོན་པས་ཐོས་བསམ་བྱས་པ་དང་འདྲ། ཡིག་ཆུང་འདི་ནི་ཟིན་བྲིས་སོགས་དང་ཆེ་འབྲིང་གཉིས་ཀྱི་མཚམས་རྣམས་སུ་སྤྱོད་ཆེ་བས་ཅུང་ཟད་འཁྱུག་ལ་སྐྱེན་པས་གཞོན་ནུ་མས་རྩེད་བྲོ་བྱེད་པ་དང་འདྲ། བྲིས་རབས་དང་པོའི་འཁྱུག་ཡིག་འདི་ནི་ཤོག་སེར་དངོས་ལས་ཕབ་པའི་ལུང་བསྟན་དང་ཉམས་མགུར་སོགས་བྲིས་ན་ཁྱད་ཆོས་གཞན་ལས་ལྷག་པ་ཞིག་ཡོད་པར་གྲགས་སོ། །
བྲིས་རབས་གཉིས་པའི་ཕྱག་བྲིས།
བཞི། བསྟན་འཛིན་སྐ་བྲིས་ཀྱི་ཁྱབ་གདལ་དང་རྒྱུན་འཛིན་སྐོར།
ད་ནི་དམ་པ་འདི་དག་གི་དགོངས་པ་དབྱིངས་སུ་གཤེགས་ནའང་ཁོང་རྣམ་པ་རྗེས་རབས་པ་རྣམས་ཀྱིས་ཐུགས་སྟོབས་ཆེན་པོས། དུས་རབས་ཀྱི་འཕེལ་ཕྱོགས་དང་བསྟུན་ཏེ། མེས་པོ་གོང་མའི་ཤུལ་བཞག་གི་ཕ་ནོར་རྩ་ཆེན་དག་མི་ཉམས་རྒྱུན་འཛིན་བྱེད་རྒྱུ་ཕྲག་ཏུ་བབ་པའི་འོས་འགན་ཡིན་སྟབས། འཐུས་སྒོ་ཇེ་ཚང་དུ་གཏོང་བ་དང་བྲིས་རྒྱུན་འདི་ཉིད་རྒྱུད་འཛིན་དར་སྤེལ་གྱི་ཕྱོགས་ལ་ལས་དཀའ་ཉུང་ཙམ་རེ་སྒྲུབ་དང་བསྒྲུབ་འཆར་ཡོད་པ་དང་། ད་དུང་ལོ་འདི་དག་གི་རིང་ལ་དཀའ་སྤྱད་འབད་འབུངས་མང་དུ་བྱས་ནས་གཅིག་ནས་དམ་པ་འདི་ཉིད་ཀྱི་མཛད་ཕྲིན་ལ་ཞབས་ཞུ་དང་། ཕྱོགས་གཞན་ནས་བོད་གངས་ཅན་གྱི་ཕ་སྐད་མ་ཡིག་ཆོས་དང་རིག་གཞུང་ལ་ཕུལ་བའི་སེམས་འདུན་གཙང་མའི་སྒོས། ལོ་ཆེན་སྐ་བ་དཔལ་བརྩེགས་དང་། གཏེར་སྟོན་ཨོ་རྒྱན་བསྟན་འཛིན་དང་ཡབ་རྗེ་གུ་དྲག་བསྟན་འཛིན་ཏེ་བསྟན་འཛིན་རྣམ་པ་གཉིས་ཀྱི་ཕྱག་བྲིས་འདི་ཉིད་ལ། བསྟན་འཛིན་སྐ་བྲིས་ཞེས་པའི་མཚན་བླ་ཐབས་སུ་གསོལ་ཏེ། དེང་རབས་གློག་རྡུལ་ལ་ཕབ་པའི་ཡིག་གཟུགས་བཞི་དང་། སྲོལ་རྒྱུན་གྱི་སྐུང་ཡིག་སྣ་མང་ཞིག་གསར་སྣོན་གྱི་ལག་རྩལ་སྤྱད་ནས་འཐུས་ཚང་བྱས་ནས། འཛམ་གླིང་ཡུལ་གྲུ་སོ་སོ་ན་བཞུགས་པའི་རྒྱ་ཆེའི་སྤྱོད་མཁན་རྣམ་པས་བརྒྱ་འདུ་སོགས་དྲྭ་ཐོག་ནས་རིན་མེད་སྒོས་ཕབ་ལེན་བྱེད་ཆོག་པ་དེ་འདྲ་གནང་འདུག་པས། མི་རིང་བར་ཡོངས་ཀྱི་སྤྱན་སྔར་བསྟར་ཐུབ་པ་མཛད་རྒྱུ་དང་། རྗེ་འདི་གཉིས་ཀྱི་གསུང་ཆོས་གཙོར་མཛད་པའི་ཁྱིམ་རྒྱུད་བླ་རབས་རྣམས་ཀྱི་གསུང་ཐོར་བུ་དག་ཕྱོགས་གཅིག་ཏུ་བསྒྲིགས་ནས་ཕྱོགས་མཐར་སྤེལ་བ། ཁྱད་པར་ད་བཞུགས་ཀྱི་བྲིས་རབས་གསུམ་པ་དག་ཕྱོགས་གཅིག་ཏུ་བསྡུས་ཏེ། ཕྱག་བྲིས་འདི་ཉིད་རྒྱུན་མི་འཆད་པའི་ཆེད་སློབ་བུ་དོན་གཉེར་ཅན་དག་ལ་ཟབ་སྦྱོང་གི་མཐུན་རྐྱེན་སྦྱར་ཏེ་བྲིས་རབས་བཞི་པ་ལྔ་པ་སོགས་སྤེལ་བ་བཅས་སྒོ་ཀུན་ནས་འབད་པ་ལྷོད་མེད་གནང་བཞིན་པའོ། །
རྒྱུན་འཛིན་བྲིས་རབས་གསུམ་པ།