ཡུལ་བབ་ཀྱི་ཁྱད་ཆོས་དང་བསྟུན་ནས་གསར་འགྱུར་ཁྱབ་སྤེལ་གྱི་ཐབས་ལམ་གསར་པ་སྔོག་འདོན་བྱེད་པ།

འཕྲིན་སྦྱོར་གསར་པ་མགྱོགས་མྱུར་འཕེལ་རྒྱས་ཕྱིན་པ་དང་བསྟུན་ནས་སྲོལ་རྒྱུན་གྱི་གསར་འགྱུར་འཕྲིན་སྤེལ་དེ་དེང་གི་དུས་རབས་ཀྱི་ཀློག་པ་པོའི་དགོས་མཁོ་བསྐང་ཐུབ་ཀྱི་མེད། གསར་འགྱུར་ལས་དོན་པ་ཞིག་ཡིན་པའི་ངོས་ནས་བརྗོད་ན། དེ་སྔོན་གྱི་སྲོལ་རྒྱུན་གྱི་འཕྲིན་སྦྱོར་ཁོ་ནར་བརྟེན་ནས་བསྡད་མི་རུང་བར་ངེས་པར་དུ་དུས་རབས་ཀྱི་འཕེལ་རྒྱས་དང་བསྟུན་པ་དང་རང་གི་གསར་འགོད་ཀྱི་ནུས་པའམ་ཡང་ན་རྩོམ་སྒྲིག་གི་ནུས་པ་སོགས་ཕྱོགས་གང་ཐད་ནས་ཧུར་ཐག་སྒོས་ནུས་པ་ཇེ་མཐོར་བཏང་ནས་འཕྲིན་སྦྱོར་མཉམ་འདྲེས་དུས་སྐབས་ཀྱི་ཚད་ལྡན་གྱི་གསར་འགྱུར་ལས་དོན་མི་སྣ་ཞིག་ལ་འགྱུར་རྒྱུར་འབད་བརྩོན་བྱེད་དགོས། རྩོམ་པ་པོས་བདེ་ཆེན་ཉིན་རེའི་ཚགས་པར་ཁང་བོད་ཡིག་རྩོམ་སྒྲིག་པུའུ་ཡི་གསར་འགྱུར་ལས་དོན་གྱི་གནས་ཚུལ་དང་ཟུང་འབྲེལ་བྱས་ནས་འཕྲིན་སྦྱོར་མཉམ་འདྲེས་ཀྱི་ཁོར་ཡུག་འོག་གསར་འགྱུར་ལས་དོན་པ་ཚོའི་སྲོལ་རྒྱུན་གྱི་ལས་ཀ་བྱེད་སྟངས་དང་ལས་ཀའི་འདུ་ཤེས་ལ་འགྱུར་ལྡོག་བཏང་ནས། རང་ཉིད་ཀྱི་བཅར་འདྲི་བྱེད་སྟངས་དང་རྩོམ་སྒྲིག་བྱེད་སྟངས་ཐད་ཆེད་ལས་ཀྱི་བྱང་ཚད་མཐོ་རུ་བཏང་ནས་གསར་འགྱུར་གྱི་ནང་དོན་ཕུན་སུམ་ཚོགས་པོ་བཟོ་དགོས་ལ། དེ་བཞིན་བདེ་ཆེན་ཡུལ་གྱི་ཡུལ་བབ་ཀྱི་ཁྱད་ཆོས་དང་བསྟུན་ནས་གསར་འགྱུར་ཁྱབ་སྤེལ་དང་དྲིལ་བསྒྲགས་ཀྱི་ཐབས་ལམ་གསར་པ་སྔོག་འདོན་བྱེད་རྒྱུ་ཐད་རང་གི་ལྟ་བ་རགས་ཙམ་བཤད་པར་བྱ།

གཅིག།།ཆར་རྗེས་ཀྱི་ཤ་མོ་བརྡོལ་བ་བཞིན་ཇེ་ལེགས་ཇེ་རྒྱས་སུ་འགྲོ་བཞིན་པའི་བདེ་ཆེན་ཉིན་རེའི་ཚགས་པར་ཁང་གི་བོད་ཡིག་འཕྲིན་སྦྱོར།

དེ་ཡང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་། ཁུལ་ཨུ་དང་ཁུལ་སྲིད་གཞུང་བཅས་ཀྱི་ཐུགས་ཁུར་འོག་1995ལོའི་ཟླ་3པར་བདེ་ཆེན་བོད་རིགས་རང་སྐྱོང་ཁུལ་དུ་བདེ་ཆེན་བོད་ཡིག་ཚགས་པར་དངོས་སུ་གཏོད་པ་དང་། 2013ལོའི་ཟླ་5པར་སེམས་ཀྱི་ཉི་ཟླ་བོད་ཡིག་དྲ་བ་དངོས་སུ་ཕྱི་ཕྱོགས་སུ་སྒོ་ཕྱེས། སེམས་ཀྱི་ཉི་ཟླ་བོད་ཡིག་དྲ་བའི་ཀློག་པ་པོ་ནི་རང་རྒྱལ་གྱི་བོད་འབྲེལ་ས་ཁུལ་ཕུད། པེ་ཅིང་དང་ཧྲང་ཧའེ། ཀྲེ་ཅང་། ཀང་ཏུང་སོགས་རྒྱལ་ནང་གི་ཀློག་པ་པོ་ཡོད་ལ། ཨ་མེ་རི་ཁ་དང་འཇར་པན། རྒྱ་གར། ཨོ་སི་ཁྲོ་རི་ལི་ཡ། བལ་པོ་སོགས་ཕྱིའི་རྒྱལ་ཁབ་ཀྱི་ཀློག་པ་པོ་ཡང་ཡོད་པས། བདེ་ཆེན་གྱི་སྲིད་འབྱོར་རིག་གསུམ་ཕྱི་ཕྱོགས་སུ་ཁྱབ་བསྒྲགས་བྱེད་པའི་སྟེགས་བུ་གལ་ཆེན་ཞིག་ཏུ་གྲུབ་ཡོད། 2015ལོའི་ཟླ་6པར་བདེ་ཆེན་བོད་ཡིག་འཕྲིན་སྟེགས་སྤེལ་བ་དང་། 2017ལོའི་ཟླ་6པའི་ཚེས་18ཉིན་སེམས་ཀྱི་ཉི་ཟླ་APPསྤེལ་པ་སོགས་བྱས་ནས། དུས་རབས་གསར་པའི་རླབས་རྒྱུན་འོག །བདེ་ཆེན་ཉིན་རེའི་ཚགས་པར་ཁང་བོད་ཡིག་རྩོམ་སྒྲིག་པུའུ་ཡི་འཕྲིན་སྦྱོར་དག་ཀྱང་ཆར་རྗེས་ཀྱི་ཤ་མོ་བརྡོལ་བ་བཞིན་ཉིན་རེ་ནས་ཉིན་རེ་ཇེ་ལེགས་ཇེ་རྒྱས་སུ་སོང་ཡོད་པ་རེད།

གཉིས། ནུས་པ་བཞི་གོང་མཐོར་བཏང་ནས་གསར་འགྱུར་ཁྱབ་སྤེལ་གྱི་ཕན་འབྲས་ལེགས་སུ་གཏོང་།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རྒྱལ་ཡོངས་ཀྱི་དྲིལ་བསྒྲགས་བསམ་བློའི་ལས་དོན་ཚོགས་འདུའི་ཐོག་དྲིལ་བསྒྲགས་བསམ་བློའི་ལས་བྱེད་པས་ཤེས་བྱ་གསར་པ་རྒྱུན་ཆད་མེད་པར་ཁོང་དུ་ཆུད་པ་དང་། ཁྱབ་ཁོངས་གསར་པར་རྒྱུས་མངའ་ཡོད་པ། མཐོང་རྒྱ་གསར་པ་གཏོད་པ། འཇོན་ཐང་ཆེ་རུ་གཏོང་བ། བརྟག་ཞིབ་བྱེད་ཤུགས་ཆེ་རུ་གཏོང་བ། འགྲོ་ནུས་དང་ལྟ་ནུས་བསམ་ནུས་འབྲི་ནུས་བཅས་རྒྱུན་མཐུད་ཤུགས་ཆེར་བཏང་ནས་ཆབ་སྲིད་ཀྱི་བྱང་ཚད་མཐོ་བ་དང་། འཇོན་ཐང་ཆེ་བ། བདེན་འཚོལ་གསར་གཏོད། རྒྱལ་ཁ་ལེན་ཐུབ་པ་བཅས་ཀྱི་དྲིལ་བསྒྲགས་བསམ་བློའི་དཔུང་ཁག་ཅིག་ཧུར་ཐག་གཏོད་དགོས་ཞེས་གསུངས་གནང་བ་བཞིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བསམ་བློའི་དགོངས་དོན་ལྟར་ང་ཚོ་གསར་འགྱུར་ལས་དོན་པས་འགྲོ་ནུས་དང་། ལྟ་ནུས། བསམ་ནུས། འབྲི་ནུས་བཅས་ཀྱི་བྱེད་ནུས་བཞི་གོང་མཐོར་གཏོང་རྒྱུ་ནི་ཁ་ཚ་དགོས་གཏུགས་ཤིག་ཡིན་པ་གསལ་པོ་རེད། དུས་རབས་གསར་པའི་གསར་འགོད་པ་ཞིག་ཡིན་ན། སྤྱི་ཚོགས་ཀྱི་འཕེལ་རྒྱས་དང་བསྟུན་ནས་རང་གི་ནུས་པ་ཡང་ཇེ་མཐོར་གཏོང་དགོས། འཕྲིན་སྦྱོར་མཉམ་འདྲེས་ཀྱི་དུས་རབས་འདིའི་གསར་འགོད་པ་ནི་ཕྱོགས་བསྡུས་རང་བཞིན་དང་འཇོན་ནུས་ཅན་གྱི་གསར་འགོད་ཅིག་ཡིན་དགོས། དཔེར་ན་གསར་འགྱུར་འབྲི་ཤེས་པར་མ་ཟད། པར་ལེན་ཤེས་པ་དང་། བརྙན་ཕབ་ཤེས་པ། དེ་མིན་པར་ངོས་སྒྲིག་བཟོ་བྱེད་ཤེས་པ་སོགས་ཡིན་པ་བྱེད་དགོས།

ང་ཚོ་ནི་སྤྱི་ཚོགས་འཕེལ་རྒྱས་ཀྱི་ཟིན་ཐོ་འགོད་མཁན་དང་གསར་འགྱུར་འགོད་མཁན་ཡིན་པར་མ་ཟད། རིག་གནས་འཛིན་སྐྱོང་སྤེལ་གསུམ་གྱི་འོས་འགན་ཡང་ཕྲག་ཏུ་བབས་ཡོད། དེའང་བདེ་ཆེན་མཐོ་སྒང་དུ་ངོ་མཚར་འོད་སྟོང་འཕྲོ་བའི་མི་རིགས་རིག་གནས་ཡོད་པས། ང་ཚོས་བརྙན་ལམ་དང་ཡང་ན་དུས་རབས་གསར་པའི་གསར་འགྱུར་སྒྲོག་སྤེལ་གྱི་ཐབས་ལམ་སྣ་ཚོགས་ལ་བརྟེན་ནས་ཕྱི་ཕྱོགས་སུ་རང་ས་གནས་ཀྱི་རིག་གནས་དྲིལ་བསྒྲགས་དང་ནང་ཁུལ་དུ་རིག་གནས་རྒྱུན་འཛིན་དང་དར་སྤེལ་བྱེད་པར་རང་ནུས་ཅི་ཡོད་འདོན་དགོས་པར་བསམ།

གསུམ། ཡུལ་བབ་ཀྱི་ཁྱད་ཆོས་དང་བསྟུན་ནས་གསར་འགྱུར་ཁྱབ་སྤེལ་གྱི་ཐབས་ལམ་གསར་པ་སྔོག་འདོན་བྱེད།

འཕྲིན་སྦྱོར་ཡོངས་ཀྱི་དུས་རབས་སུ། ངེད་བདེ་ཆེན་ཉིན་རེའི་ཚགས་པར་ཁང་གི་བོད་ཡིག་རྩོམ་སྒྲིག་པུའུ་ཡི་གསར་འགྱུར་ལས་དོན་མི་སྣས་གང་ལེགས་ཀྱིས་གསར་འགྱུར་ཁྱབ་སྤེལ་ཀྱི་ཆོས་ཉིད་ནན་གྱིས་བརྩི་སྲུང་བྱས་ནས། ཡུལ་བབ་ཀྱི་ཁྱད་ཆོས་དང་བསྟུན་ཏེ་གསར་འགྱུར་ཁྱབ་སྤེལ་གྱི་ཐབས་ལམ་དང་ནང་དོན་སོགས་ཟམ་མི་ཆད་པར་ཇེ་ལེགས་དང་ཇེ་རྒྱས་སུ་བཏང་ནས་ཏང་གི་སྲིད་ཇུས་དུས་ཐོག་ཏུ་ས་གནས་མང་ཚོགས་ལ་དྲིལ་བསྒྲགས་བྱས་པར་མ་ཟད། བདེ་ཆེན་གྱི་སྲིད་འབྱོར་རིག་གསུམ་ཡང་དྲ་ལམ་དང་ཚགས་པར་སོགས་བརྒྱུད་ནས་རྒྱལ་ཁབ་ཕྱི་ནང་དུ་དྲིལ་བསྒྲགས་བྱས་པས། ཏང་གི་སྲིད་ཇུས་བཟང་པོའི་འོད་ཟེར་ལས་བདེ་ཆེན་མཐོ་སྒང་དུ་གནམ་ས་བླ་འོག་ཏུ་འགྱུར་བ་ལྟ་བུའི་འཕེལ་རྒྱས་བྱུང་བར་འཛམ་གླིང་ལ་དྲིལ་བསྒྲགས་བྱས་ལ། ཏང་གི་དམངས་ཕན་སྲིད་ཇུས་ཀྱང་ས་གནས་རང་གི་མང་ཚོགས་ལ་དྲིལ་བསྒྲགས་བྱས་ནས། མང་ཚོགས་རྣམས་དུས་དང་རྣམ་པ་ཀུན་ཏུ་རྒྱལ་ཁབ་ཀྱི་གསར་འགྱུར་དང་རྒྱལ་ཁབ་ཀྱི་དམངས་ཕན་སྲིད་ཇུས་དང་། དེ་མིན་འཕྲོད་བསྟེན་བདེ་ཐང་དང་མི་རིགས་རིག་གནས་སོགས་ཀྱི་ཤེས་བྱའང་རང་ཉིད་ཀྱི་ཡིད་ལ་འབྱོར་ཡོད་པ་རེད། འོན་ཀྱང་བདེ་ཆེན་མཐོ་སྒང་ནི་བོད་འབྲེལ་ས་ཁུལ་གཞན་དང་མི་འདྲ་པར། གྲངས་ཉུང་མི་རིགས་མང་པོ་འདུས་སྡོད་བྱེད་པའི་ཡུལ་གྲུ་ཞིག་ཡིན་ལ། གནས་འདིའི་བོད་མི་རྣམས་ཀྱིས་བོད་སྐད་བཤད་ཤེས་མོད། བོད་ཡིག་ཤེས་མཁན་ཅུང་ཉུང་། བོད་སྐད་ཡང་སྡེ་པ་རེ་རེའམ་ཡང་ན་རྫོང་སོ་སོའི་བར་ནའང་ཁྱད་པར་ཡོད་པ་རེད།

གསར་འགྱུར་གྱི་ཁྱབ་སྤེལ་བྱེད་ཡུལ་རྒྱ་ཇེ་ཆེ་དང་གསར་འགྱུར་གླེང་ཕྱོགས་ཀྱི་ནུས་པ་ཧུར་ཐག་འདོན་ཆེད། ངེད་བདེ་ཆེན་ཉིན་རེའི་ཚགས་པར་ཁང་གི་བོད་ཡིག་རྩོམ་སྒྲིག་པུའུ་ཡིས་2019ལོའི་ཟླ་3པར་ཡུལ་བབ་ཀྱི་ཁྱད་ཆོས་དང་བསྟུན་ནས་ས་གནས་རང་གི་ཁྱད་ཆོས་འབུར་དུ་ཐོན་པར་བྱས་ཏེ་བདེ་ཆེན་བོད་ཡིག་འཕྲིན་སྟེགས་སུ་ཡུལ་སྐད་ཀྱི་ཐོག་ནས་གསར་འགྱུར་སྒྲོག་སྤེལ་བྱེད་པའི་ལེ་ཚན་ཞིག་གཏོད་པས་རང་ས་གནས་སུ་གསར་འགྱུར་བརྒྱུད་སྤེལ་གྱི་ཕན་འབྲས་མངོན་གསལ་དོད་པོས་ཆེ་རུ་ཕྱིན་ཡོད་ལ། བོད་རིགས་ཀློག་པ་པོ་རྣམས་ཀྱི་དགའ་བསུའང་ཐོབ་ཡོད་པ་རེད། དཔེར་ན་རྒྱལ་གཅེས་མི་སྣ་ཟངས་འབུམ་སྤྲུལ་སྐུ་ཞེས་པ་ལ་འཕྲིན་སྟེགས་ཀྱི་རྡེབ་ཚད་ཁྲི་ཡན་ལའང་ཕེབས་ཡོད་པ་རེད། འདིའི་ཐོག་ནས་ཡུལ་སྐད་ཀྱི་ལམ་ནས་གསར་འགྱུར་ཁྱབ་སྤེལ་བྱས་ཚེ་བདེ་ཆེན་ཡུལ་གྱི་ཀློག་པ་པོ་སྐོར་ཞིག་གིས་བོད་སྐད་གོ་ཡང་བོད་ཡིག་མི་ཤེས་པའི་དགོས་མཁོ་སྐང་བར་མ་ཟད། ཏང་གི་སྲིད་ཇུས་ཀྱང་ས་གནས་མང་ཚོགས་ལ་ཁྱབ་བསྒྲགས་ལེགས་པོ་བྱས་ཡོད་པས་ཏང་གི་འཕྲིན་སྦྱོར་གྱིས་རྒྱ་ཆེའི་མང་ཚོགས་ལ་ཞབས་ཞུ་ལེགས་པོ་སྒྲུབ་ཡོད་པ་རེད། དེ་བས་དེང་ཕྱིན་གྱི་ལས་ཀའི་ཁྲོད་དུའང་ཡུལ་བབ་ཀྱི་ཁྱད་ཆོས་གཞིར་བཟུང་གསར་འགྱུར་ཁྱབ་སྤེལ་གྱི་ཐབས་ལམ་སྣ་ཚོགས་སྔོག་འདོན་བྱེད་རྒྱུ་ནི་ཧ་ཅང་དགོས་གལ་རང་བཞིན་གྱི་དོན་ཆེན་ཞིག་ཡིན་པར་འདོད།

བཞི། མཐུན་སྒྲིལ་གྱི་ཨ་ལོང་དམ་པོར་འགྲིལ་ནས་གསར་འགྱུར་དྲིལ་བསྒྲགས་ཀྱི་ལས་དོན་ལེགས་པར་སྒྲུབ།

རྒྱལ་པོ་ལུགས་ཀྱི་བསྟན་བཅོས་ལས། མང་པོ་བསྡོམས་ནས་གྲོས་བྱས་ན། ཆེན་པོ་ཡིས་ཀྱང་ཐུབ་པར་དཀའ། སྲོག་ཆགས་གྲོག་མའི་ཚོགས་འདུས་པས། སེང་གེའི་ཕྲུ་གུ་བསད་ཅེས་གྲགས་ཞེས་ཟེར་བ་གནང་བཞིན། ལས་དང་བྱ་བ་གང་ལ་འཇུག་ནའང་མང་པོ་གཅིག་ཏུ་བློ་མཐུན་ན་མི་འགྲུབ་པའི་བྱ་བ་ཅི་ཡང་མེད་པ་དང་། མཐུན་སྒྲིལ་ནི་སྟོབས་ཤུགས་ཡིན་པས། ང་ཚོའི་གསར་འགྱུར་ལས་དོན་འདི་ལེགས་པོ་ཞིག་སྒྲུབ་དགོས་ཚེ་མཐུན་སྒྲིལ་མཉམ་ལས་བྱེད་རྒྱུ་ནི་གཙོ་བོ་ཡིན་པ་རེད། ང་ཚོའི་བདེ་ཆེན་ཉིན་རེའི་ཚགས་པར་ཁང་བོད་ཡིག་རྩོམ་སྒྲིག་པུའུ་ལ་དཔེར་བཞག་ན། ལས་སྒྲུབ་མི་སྣ་ལ་ལ་བརྙན་ཕབ་པར་མཁས་པ་དང་། ལ་ལ་གསར་འགྱུར་འབྲི་བར་མཁས་པ། ལ་ལ་ཡུལ་སྐད་ཀྱི་ལམ་ནས་གསར་འགྱུར་སྒྲོག་འདོན་བྱེད་པར་མཁས་པ། ལ་ལ་པར་རྒྱག་པར་མཁས་པ་སོགས་རང་རང་ལ་ཁྱད་ཆོས་ཡོད་པས། ལས་སྒྲུབ་ཀྱི་གོ་རིམ་ཁྲོད་ཕན་ཚུན་སློབ་སྦྱོང་དང་རོགས་རམ་བྱེད་ནས་ཐུན་མོང་ཐོག་ཡར་རྒྱས་གོང་འཕེལ་བྱུང་ན་ཧ་ཅང་ལེགས་སྙམ། གཞན་ས་འགུལ་དང་མེ་སྐྱོན་སོགས་ཐོལ་བྱུང་གསར་འགྱུར་དང་། ཏང་གི་ཚོགས་ཆེན་སོགས་གལ་ཆེའི་གསར་འགྱུར་མདུན་དུ་གསར་འགོད་པ་གཅིག་ལ་བརྟེན་ནས་གསར་འགྱུར་འདི་མགྱོགས་མྱུར་དང་ཕྱོགས་ཡོངས་ནས་ཁྱབ་སྤེལ་བྱེད་དགོས་ཚེ་ལེགས་པོ་ཞིག་མི་འཁྱོངས་པས། ཕན་ཚུན་གཞོགས་འདེགས་དང་ཐུན་མོང་ཐོག་མཐུན་སྒྲིལ་མཉམ་ལས་བྱེད་རྒྱུ་དེ་ཤིན་ཏུ་གལ་ཆེའོ་སྙམ། །