ཐེགས་ཆེན་གནམ་གྱི་བླ་གབ་ཡོངས་སྟེགས་པའི། །
བརླིང་བརྗིད་གངས་ཀྱི་རི་བོའི་མགུལ་མ་ནས། །
སྙན་ཚིག་ཏིང་འཛིན་སྤྲོ་བའི་ཞི་གནས་ལ། །
བྱིན་རླབས་ཚིག་གི་དངོས་གྲུབ་ཅི་དགའ་སྩོལ། །
ཡིད་ཀྱིས་འདྲེན་པའི་ཚིག་གི་རོལ་མོ་ནི། །
དྲུག་འགྱུར་སྙན་དགུས་རམ་འདེགས་ཀྱིས་སྐྱོར་ཚེ། །
ངོ་མཚར་རྣ་དབང་གསོ་བའི་བདུད་རྩིའི་ངག །
མ་འབད་རང་བྱུང་འབྱུང་བའི་དངོས་གྲུབ་འབར། །
ཡིད་ཀྱི་དད་པ་འཐོར་བའི་དག་ཞིང་ནས། །
གསོལ་འདེབས་དབྱངས་ཀྱི་སྒྲ་སྙན་དཀྲོལ་བ་ན། །
ངག་རིག་བྱིན་རླབས་འཇོ་བའི་ཚངས་སྲས་མ། །
ཚིག་བརྗོད་མགྲིན་པའི་བདུད་རྩི་ད་སྩོལ་ཅིག །
ངུར་སྨིག་མདངས་ལྡན་འཁྱིལ་བའི་གླེང་ག་ནས། །
སྙན་ཚིག་མེ་ཏོག་འདབ་ལོ་གཡོ་བ་ཡིས། །
དད་གསུམ་དྲི་བསུང་ཁྲོལ་བའི་སློབ་བུ་ལ། །
ཕྱག་གི་སྙིམ་པ་སྩོལ་ནས་མི་ཕེབས་སམ། །
ཁ་བའི་ཟེགས་མ་འཐོར་བའི་སྒང་གཞིས་ནས། །
དབྱངས་གསལ་ངག་གི་སྒྲ་དབྱངས་འཐེན་པ་ནི། །
མེས་པོའི་བླ་ཡིད་འཁོར་བའི་གངས་རི་འདིའི། །
བླ་སྲོག་སྲུང་བའི་དཔའ་ཆས་གྱོན་པ་ཡིན། །
ཉི་ཟླའི་ཕ་ཁྱིམ་གྲགས་པའི་མཐོ་སྒང་གི། །
དགེ་མཚན་སྙན་པའི་དབྱངས་རྟ་དྲུག་འགྱུར་ཅན། །
མེས་པོའི་རུས་ཀྱི་རང་མདངས་མ་ཡལ་བ། །
ས་ཆེན་གངས་དཀར་འགྲམ་ནས་ངས་འདི་བླངས། །
ཁ་འབབ་ཆུ་བཞིའི་གཏེར་མཛོད་གངས་དཀར་རི། །
ཕ་མེས་བླ་སྲོག་འཁོར་བའི་ལྷ་རི་ཡིན། །
སེམས་ཀྱི་འགྱུར་ཁུག་སྒྲོན་པའི་ཀ་ཁའི་དབྱངས། །
དྲི་ཟའི་གདངས་ལ་རྒྱུས་ནས་སླར་ཡང་བཏེགས། །
རིན་ཆེན་གཏེར་གྱིས་བལྟམས་པའི་ཞིང་ཁམས་འདིར། །
ལན་གཅིག་མི་ལུས་བླངས་པའི་བསོད་ནམས་ནི། །
གཞན་པའི་དགེ་མཚན་གང་གིས་མི་འགྲན་པས། །
ངས་འདི་ཕུན་ཚོགས་དགེ་བའི་མཚན་མར་འཛིན། །
ཕ་མེས་རིགས་རུས་ཅན་གྱིས་བསྐྲུན་པའི་ཆོས། །
ངོ་མཚར་དགེ་ལེགས་འབར་བའི་ལང་ཚོ་ཅན། །
འདི་གཅིག་འཕྲད་པའི་སྐལ་བ་རབ་སྦོམ་པས། །
ང་ནི་སེམས་ཀྱི་འདུན་པ་གང་ནས་ཡོད། །
ལྷག་བསམ་ཟླ་བ་ཚེས་པའི་ཞལ་རས་མདངས། །
རིགས་ཞེན་རླུང་བུས་དལ་གྱིས་བསྒུལ་བ་ན། །
དགེ་ལེགས་འོད་དཀར་ཞི་བའི་རྣ་ཆ་ཅན། །
ས་མཐོའི་སྲིད་པ་འདི་ཡི་རྒྱན་དུ་འཕྲོ། །
རང་གར་བྲིས་པའི་སྙན་ཚིག་ཁ་ཤས་འདི། །
སེམས་ཀྱི་ལྗོངས་རྒྱུ་ཡིན་པའི་དོན་ལ་ཞོག །
འཆར་ཡན་གླེང་ལ་བསུན་པའི་མི་ཚོགས་ལ། །
དོ་ཕོག་སྲིད་ན་དགོངས་འགལ་མེད་པར་ཞུ། །