སྐྱེ་བ་སྔོན་གྱི་ལས་དབང་ཨེ་རེད་བརྩེ་བའི་དབུ་ཁྱུད་ཁྱོད་ལ་བྲིས། །
ཚེ་རབས་འདི་ཡི་འཕྲལ་རྐྱེན་ཨེ་རེད་གཏན་གྱི་འདུན་མ་ཁྱོད་ལ་གླེང་། །
ལས་འཕྲོའི་བག་ཆགས་སད་པ་ཨེ་རེད་ཁྱོད་ནི་སྲོག་གི་ཀ་བར་གྱུར། །
འཁོར་བའི་ནགས་ཀླུང་སྟུག་པོ་འདི་ནས་ཁྱོད་ནི་ཁོ་བོའི་ འཁྲི་ཤིང་ཡིན། །
ཕ་ཡུལ་གཅིག་གི་ཆུང་འདྲིས་མིན་ཡང་གཞོན་པའི་སྣང་བ་འདྲེས་ནས་ཡོད། །
ཚེ་རབས་གཅིག་གི་ལོ་རྒྱུས་མེད་ཀྱང་བླ་ཚེ་སྲོག་གི་བདག་མོ་ཡིན། །
སྐྱེ་བ་གཅིག་གི་བག་ཆགས་ཟེར་བ་ཚེ་ཐོག་འདི་ནས་སད་པ་ན། །
སེམས་པ་གཅིག་ཏུ་འདྲེས་པའི་ཟིན་ཐོ་བཤད་ན་མངར་སྐྱུར་ཚོར་བ་མང་། །
དགའ་སྐྱོ་གཉིས་ཀྱི་འཚོ་བའི་བར་ནས་གསང་བའི་དམ་ཚིག་སྲུང་རོགས་ཡིན། །
འགྲོ་འདུག་གཉིས་ཀྱི་གོམ་འགྲོས་བར་ནས་ཁྱོད་ནི་ང་ཡི་ཞེན་ཆགས་ཡིན། །
ཉིན་མཚན་གཉིས་ཀྱི་དུས་ཚིགས་བར་ནས་ཁྱོད་ནི་རེ་བའི་ལྷ་མོ་ཡིན། །
ཤི་གསོན་གཉིས་ཀྱི་འགག་མདོའི་བར་ནས་ཁྱོད་ནི་ཁོ་བོའི་ཕྱི་མིག་ཡིན། །
དགའ་བའི་ཉི་ཟླའི་འོད་སྐོར་ནང་གི་བརྩེ་བའི་འཇིག་རྟེན་ཁྱོད་རང་ཡིན། །
དུང་བའི་ཚིག་གི་སྒྱུ་འཕྲུལ་ནང་ལ་མི་ཚེའི་གསང་བ་སྦས་ནས་འདུག །
འཛུམ་པའི་འོད་ཀྱི་ཚེམས་ཕྲེང་བར་ནས་སྐྱིད་པའི་འོ་མཚོ་གཞུར་གྱིན་གདའ། །
ང་ཡི་སྙིང་གི་དགའ་དགའ་མ་འདི་ང་ཡི་འཚོ་བའི་སྐྱབས་མགོན་ཡིན། །
བག་ཆགས་ཟབ་མོའི་ཁུག་སོ་རེ་ནས་དྲན་པའི་འཕྲིན་ཡིག་ཁྱོད་ལ་བྲིས། །
ལོ་དང་ཟླ་བའི་རྨི་ལམ་བར་ལ་ཁྱོད་ཀྱི་མཛེས་པའི་ཞལ་རས་རྨིས། །
དགའ་སྐྱོ་གཉིས་ཀྱི་འཚོ་བའི་ཁྲོད་ནས་བརྗེད་ཐབས་མེད་པའི་སྙིང་གཅེས་ཁྱོད། །
ང་ཡི་འཁོར་བ་ཆུང་ཆུང་འདི་ཡི་བརྩེ་ཡ་དགོད་གྲོགས་ཡིན་པ་འདྲ། །
འདས་དོན་ལོ་ཟླའི་རབ་ཁ་རེ་ལ་བརྩེ་དུང་ཟབ་མོའི་གཏམ་རྒྱུད་ཡོད། །
ཚོར་བའི་རླབས་ཀྱི་ཁུག་པ་རེ་ལ་ཡིད་སེམས་འདྲེས་པའི་སྒྲུང་རིང་ཡོད། །
འཇིག་རྟེན་སྲིད་པའི་གྲུ་ཟུར་རེ་ལ་ཁྱོད་དང་ང་ཡི་གནས་མལ་ཞིག །
རེ་བས་སྒུག་པའི་ཉིན་ཞག་བརྩིས་ན་རྣམ་ཤེས་དགུན་གྱི་ཆུ་མོ་རེད། །
དབུས་གཙང་ལྷ་ས་ཆོས་ཀྱི་གྲོང་ལ་མཇལ་བ་ཁྲི་དང་འབུམ་ཚོ་རེད། །
བརྩེ་པའི་ལག་ཟུང་དམ་དུ་སྦྲེལ་ནས་ལྷན་ཅིག་འགྲོགས་མཁན་ཉུང་རྒྱུ་མེད། །
ང་ཡི་སེམས་ཀྱི་མཛའ་གཅུགས་ཁྱོད་རང་གཏན་དུ་མཐོང་རྒྱུ་མེད་པ་འདི། །
སྐལ་བ་སྟོང་གི་ལན་ཆགས་གང་ཞིག་ཁོ་བའི་མགོ་ལ་འཁོར་བ་འདྲ། །
བྲིས་པའི་སྙན་ངག་རེ་རེའི་བརྗོད་སྙིང་ཁྱོད་ཀྱི་སྐུ་ཡི་མཛེས་པ་ཡིན། །
སྒོམ་པའི་སེམས་ཀྱི་རེ་བ་རེ་རེ་ཁྱོད་དང་ཐུག་འཕྲད་ཡོང་བ་ཡིན། །
འགྲོ་འདུག་བར་གྱི་དྲན་རྒྱུ་ཟེར་ན་ཁྱོད་ལས་གཞན་ཞིག་ང་ལ་མེད། །
ད་ནི་ང་ཡི་བྱམས་པ་ཁྱོད་ཀྱིས་ལྷན་འཛོམས་དུས་ཚིགས་གནང་རོགས་མཛོད། །
ཚངས་མགུར་རེ་རེ་དབྱངས་ལ་གྱེར་དུས་ཁྱོད་ཀྱི་བརྩེ་བའི་སྙིང་གཏམ་དྲན། །
ཞེ་འདང་ཁ་བའི་འདབ་མ་རེ་རེ་ལྷ་སའི་ཕྱོགས་ནས་ཁྱེད་ཕྱོགས་འཐོར། །
སྐྱོ་བ་དྲག་པོའི་ལུས་སེམས་བརྡུངས་ནས་ཆང་ཁང་ནང་དུ་དབང་མེད་དེད། །
ཆང་གྲོགས་མེད་པའི་ཁེར་རྐྱང་སྣང་བ་བཤད་ན་གེ་སར་སྒྲུང་ལས་རིང་། །
སྤྲིན་པ་ལྷོ་ལ་ཆས་པའི་ཚུལ་འདིས་འཚོ་བའི་ཉི་ཟླ་ཕྲོགས་པ་དང་། །
སྡོང་ལོ་རླུང་གིས་དེད་པའི་ཚུལ་འདིས་མིག་ཆུ་ཁྲག་ལ་འདྲེས་པ་འདི། །
མི་ཚེ་ཤུལ་ལམ་རིང་མོའི་ནང་གི་སེམས་མཐུན་ཁྱོད་དང་ལྷན་ཅིག་ཏུ། །
ཚེ་ཡི་ཟློས་གར་འཁྲབ་དབང་མེད་པའི་སྐྱོ་བ་དྲག་པོ་ཡིན་པ་འདྲ། །
མི་ཚེ་ལྕགས་སྨྱུག་ལྷན་དུ་རྫོགས་པའི་དགེ་ཆོས་མཆོག་གིས་གསུངས་པ་བཞིན། །
ཡུན་རིང་འདྲིས་པའི་བག་ཆགས་ཟབ་མོ་བརྗེད་རྒྱུ་མི་འདུག་རོགས་ལོ་མ། །
ངེས་མེད་ཡུལ་གྲུ་གང་སར་སྙེག་པའི་འཁྱམ་པོ་བདག་གི་དྲན་ཤིང་ཁྱོད། །
དྲན་པ་ཟབ་མོའི་སྙིང་རྩ་འཕར་དུས་མིག་ཆུ་ཕྲེང་ཐག་འཐོར་ནས་སོང་། །
མ་ཕྲད་ལོ་ཟླའི་སྡུག་བསྔལ་ཟེར་ན་དམར་ནག་གཤིན་རྗེའི་ཁྲིམས་ར་རེད། །
མ་དྲན་ཉིན་གཅིག་མེད་པ་འདི་ནི་སེམས་པ་ཁྱོད་ལ་སོང་བས་ཡིན། །
མ་བཟོད་སེམས་ཀྱི་སྨྲེ་སྔགས་རེ་རེ་ཡི་གེའི་ཚོགས་ལ་བཅོལ་ནས་ནི། །
མ་ཡུམ་སློབ་གྲྭའི་གླིང་ཁ་འདི་ནས་ཁྱོད་ལ་སྤྲིངས་ཡོད་མཚོ་ཡག་ལགས། །