ཕྱོགས་ཡོངས་ནས་སྒྱུར་བཅོས་སྒོ་འབྱེད་ཟབ་སྤེལ་བྱས་ཏེ་ཀྲུང་གོའི་ལུགས་ཀྱི་དེང་རབས་ཅན་ལ་རྒྱུན་མཐུད་ངང་སྒུལ་ཤུགས་ཆེན་པོ་སྣོན་དགོས།

གཅིག།

སྒྱུར་བཅོས་སྒོ་འབྱེད་ནི་དེང་རབས་ཀྲུང་གོའི་ལས་དབང་ཐག་གཅོད་བྱེད་པའི་གནད་འགག་གི་ཐབས་ཤེས་ཤིག་ཡིན་ལ། “ལོ་བརྒྱ་གཉིས་”ཀྱི་འབད་འཐབ་དམིགས་འབེན་མངོན་འགྱུར་བྱེད་པ་དང་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་གནད་འགག་གི་ཐབས་ཤེས་ཤིག་ཀྱང་ཡིན། ང་ཚོའི་ད་ལྟའི་གནད་འགག་གི་ཐབས་ཤེས་ནི་སྒྱུར་བཅོས་སྒོ་འབྱེད་ཡིན། ལག་ལེན་གྱི་གོང་འཕེལ་ལ་རྫོགས་མཐའ་མེད་པ་དང་། བསམ་བློ་བཅིངས་འགྲོལ་གཏོང་རྒྱུར་རྫོགས་མཐའ་མེད་ལ། སྒྱུར་བཅོས་སྒོ་འབྱེད་ལའང་རྫོགས་མཐའ་མེད་པ་དང་། མཚམས་འཇོག་པ་དང་ཕྱིར་སྣུར་བྱས་ན་ཐར་ལམ་ཡོད་པ་མ་རེད། ད་ལྟ་སྒྱུར་བཅོས་ལ་སྐུལ་འདེད་གཏོང་བར་འགལ་བ་མང་པོ་དང་དཀའ་ཚེགས་ཆེན་པོ་འཕྲད་མོད། འོན་ཀྱང་སྒྱུར་བཅོས་མ་བྱས་ན་འགྲིག་གི་མ་རེད། ང་ཚོས་སྤོབས་པ་བསྐྱེད་དེ་སྒྱུར་བཅོས་སྒོ་འབྱེད་ཀྱི་ཁ་ཕྱོགས་ཡང་དག་པ་རྒྱུན་འཁྱོངས་བྱེད་དགོས་པ་དང་། གཉའ་རུས་མཁྲེགས་པོ་འཐོག་ཕོད་པ་དང་ཆུ་ཀློང་གཉན་པོ་བརྒལ་ཕོད་དགོས་ལ། བསམ་པའི་འདུ་ཤེས་ཐོག་གི་འགལ་རྐྱེན་གཏོར་ཕོད་དགོས་ལ། ཁེ་ཕན་སྲ་འགྱུར་གྱི་བཀག་རྒྱ་ཡང་གཏོར་ཕོད་དགོས་པ་དང་། སྒྱུར་བཅོས་བྱེད་མཚམས་མི་འཇོག་པ་དང་སྒོ་འབྱེད་ཀྱི་གོམ་མཚམས་མི་འཇོག་པ་བྱེད་དགོས།

(2012ལོའི་ཟླ་12ཚེས་7ཉིན་ནས་ཚེས་11ཉིན་བར་ཀོང་ཏུང་དུ་ལས་ཀར་རྟོག་ཞིབ་གནང་སྐབས་ཀྱི་གསུང་བཤད།)

གཉིས།

སྒྱུར་བཅོས་སྒོ་འབྱེད་ནི་གཏིང་ཟབ་པའི་གསར་བརྗེ་ཞིག་ཡིན་པས། ངེས་པར་དུ་ཡང་དག་པའི་ཁ་ཕྱོགས་རྒྱུན་འཁྱོངས་བྱེད་དགོས་པ་དང་། ཡང་དག་པའི་འགྲོ་ལམ་དེད་དེ་སྐུལ་འདེད་གཏོང་དགོས། ཁ་ཕྱོགས་ཀྱིས་འགྲོ་ལམ་གཏན་འཁེལ་བྱེད་པ་དང་། འགྲོ་ལམ་གྱིས་ལས་དབང་གཏན་འཁེལ་བྱེད་པ་རེད། རང་རྒྱལ་གྱི་སྒྱུར་བཅོས་སྒོ་འབྱེད་ལ་གྲུབ་འབྲས་ཆེན་པོ་ཐོབ་ཐུབ་པའི་གནད་འགག་ནི། ང་ཚོས་ཏང་གི་གཞི་རྩའི་ལམ་ཕྱོགས་དེ་ཏང་དང་རྒྱལ་ཁབ་ཀྱི་སྲོག་རྩར་བརྩིས་ནས་དཔལ་འབྱོར་འཛུགས་སྐྲུན་ལྟེ་བར་འཛིན་རྒྱུ་དེ་གཞི་རྩའི་རྩ་དོན་བཞི་དང་སྒྱུར་བཅོས་སྒོ་འབྱེད་ཀྱི་གཞི་རྩའི་གནད་གཉིས་པོ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལག་ལེན་རླབས་པོ་ཆེའི་ནང་གཅིག་གྱུར་བྱ་རྒྱུ་ཐོག་མཐའ་བར་གསུམ་དུ་རྒྱུན་འཁྱོངས་བྱེད་པ་སྟེ། བཀག་སྡོམ་རེངས་གྱུར་གྱི་ལམ་རྙིང་དུ་མི་སྐྱོད་ལ་དར་ཆ་བརྗེ་སྒྱུར་གྱི་ལོག་ལམ་དུ་ཡང་མི་འགྲོ་བ་དེ་ཡིན། སྒྱུར་བཅོས་སྒོ་འབྱེད་བྱེད་པར་ངེས་པར་དུ་བསམ་བློ་བཅིངས་འགྲོལ་གཏོང་ཕོད་པ་བྱེད་དགོས། ཡིན་ན་ཡང་བསམ་བློ་བཅིངས་འགྲོལ་གཏོང་བར་ཁ་ཕྱོགས་དང་ལངས་ཕྱོགས། རྩ་དོན་བཅས་ལྡན་དགོས་པས། སྒྱུར་བཅོས་སྒོ་འབྱེད་བྱེད་པར་ཡང་ཁ་ཕྱོགས་དང་ལངས་ཕྱོགས། རྩ་དོན་བཅས་ལྡན་དགོས། མི་ལ་ལས་སྒྱུར་བཅོས་སྒོ་འབྱེད་ནི་ནུབ་ཕྱོགས་ཀྱི་“ཡོངས་ཁྱབ་རིན་ཐང་”དང་ནུབ་ཕྱོགས་ཆབ་སྲིད་ལམ་ལུགས་ཀྱི་ཕྱོགས་སུ་བསྒྱུར་དགོས། དེ་མིན་ཚེ་སྒྱུར་བཅོས་སྒོ་འབྱེད་མ་ཡིན་ཞེས་མཚན་ཉིད་འཇོག་གི་ཡོད། དེ་ནི་ང་ཚོའི་སྒྱུར་བཅོས་སྒོ་འབྱེད་ལ་འཁྱོག་བཤད་བྱས་པ་རེད། དབྱེ་འབྱེད་མེད་པའི་སྒོ་ནས་ཀྲུང་གོའི་སྒྱུར་བཅོས་ཕྱོགས་ག་གེ་མོའི་ཐད་ནས་རྗེས་སུ་ལུས་ཡོད་ཅེས་ཤོད་མི་རུང་། ཕྱོགས་ག་གེ་མོ་དང་དུས་སྐབས་ག་གེ་མོའི་རིང་ལ་མགྱོགས་ས་དང་དལ་ས་ཡོད་ནའང་། སྤྱིའི་ཆ་ནས་བཤད་ན་ཀྲུང་གོའི་སྒྱུར་བཅོས་ཐད་ཕྱོགས་གང་ཞིག་སྒྱུར་བཅོས་བྱས་ཟིན་པ་དང་ཕྱོགས་གང་ཞིག་སྒྱུར་བཅོས་མ་བྱས་པའི་གནས་ཚུལ་ཡོད་པ་མ་རེད། གནད་དོན་གྱི་ངོ་བོ་ནི་གང་ཞིག་བསྒྱུར་བ་དང་གང་ཞིག་མི་བསྒྱུར་ལ། བསྒྱུར་མི་རུང་བ་ཁ་ཤས་ནི་དུས་ཡུན་ཇི་འདྲའི་རིང་པོ་སོང་ཡང་བསྒྱུར་མི་རུང་བ་དེ་ཡིན། ང་ཚོས་བཟང་ལད་ངན་ཆགས་བྱེད་མི་ཉན། འཛམ་གླིང་གོང་འཕེལ་འགྲོ་བཞིན་ཡོད་པ་དང་། སྤྱི་ཚོགས་ཡར་ཐོན་འགྲོ་བཞིན་ཡོད་པས། སྒྱུར་བཅོས་སྒོ་འབྱེད་མ་བྱས་ན་འཆི་ལམ་དུ་འགྲོ་རྒྱུ་རེད་ལ། སྤྱི་ཚོགས་རིང་ལུགས་ཀྱི་ཁ་ཕྱོགས་ཁས་མི་ལེན་པའི་“སྒྱུར་བཅོས་སྒོ་འབྱེད་”སྤེལ་བའང་འཆི་ལམ་དུ་འགྲོ་རྒྱུ་རེད། ཁ་ཕྱོགས་ཀྱི་གནད་དོན་ཐད་ང་ཚོས་ངེས་པར་དུ་རིག་པ་གསལ་པོ་བྱེད་དགོས། ང་ཚོའི་ཁ་ཕྱོགས་ནི་སྤྱི་ཚོགས་རིང་ལུགས་ལམ་ལུགས་ཀྱི་རང་ངོས་འཐུས་ཚང་དང་འཕེལ་རྒྱས་ཡོང་བར་རྒྱུན་ཆད་མེད་པར་སྐུལ་འདེད་གཏོང་རྒྱུ་དེ་ཡིན་པ་ལས། སྤྱི་ཚོགས་རིང་ལུགས་ཀྱི་ལམ་ལུགས་ལ་རྒྱུད་བརྗེ་སླར་སྒྲིག་བྱེད་པ་མ་ཡིན། ང་ཚོས་གཞི་རྩའི་རྩ་དོན་བཞི་སྟེ་རྒྱལ་ཁབ་འཛུགས་པའི་གཞི་རྩ་འདི་རྒྱུན་འཁྱོངས་བྱེད་དགོས་པ་སྟེ། གཞི་རྩའི་རྩ་དོན་བཞིར་བརྟེན་ནས་སྒྱུར་བཅོས་སྒོ་འབྱེད་ཀྱི་ཁ་ཕྱོགས་ཡང་དག་པ་འགན་ལེན་བྱེད་དགོས་པ་དང་། སྒྱུར་བཅོས་སྒོ་འབྱེད་བརྒྱུད་དེ་གཞི་རྩའི་རྩ་དོན་བཞི་ལ་དུས་རབས་ཀྱི་གོ་དོན་གསར་པ་སྣོན་དགོས་ལ། འགལ་རྐྱེན་སྣ་ཚོགས་བསལ་ནས་བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ཐོག་བསྐྱོད་དགོས།

(2012ལོའི་ཟླ་12ཚེས་31ཉིན་སྐབས་བཅོ་བརྒྱད་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་གཉིས་པའི་ཐོག་གནང་་བའི་གསུང་བཤད།)

གསུམ།

ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་འཐུས་ཚང་དང་འཕེལ་རྒྱས་གཏོང་རྒྱུ་རྒྱུན་འཁྱོངས་བྱས་ཏེ་རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་སྐུལ་འདེད་གཏོང་རྒྱུ་དེ་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པའི་སྤྱིའི་དམིགས་འབེན་དུ་འཛིན་དགོས། བློ་མཐུན་ཏེང་ཞའོ་ཕིན་གྱིས་1992ལོར་ད་དུང་ལོ་ངོ་30ཙམ་སོང་མཚམས་ང་ཚོར་ཕྱོགས་གང་ཅིའི་ཐད་ནས་སྔར་ལས་གནད་དུ་སྨིན་པ་དང་སྔར་ལས་གཏན་འཁེལ་བའི་ལམ་ལུགས་ཆ་ཚང་ཞིག་གཞི་ནས་ཆགས་ཐུབ་རྒྱུ་རེད་ཅེས་བསྟན་གནང་ཡོད། ཐེངས་འདིའི་ཚང་འཛོམས་གྲོས་ཚོགས་ཐོག་བློ་མཐུན་ཏེང་ཞའོ་ཕིན་གྱི་འཐབ་ཇུས་ཀྱི་བསམ་བློའི་རྨང་གཞིའི་སྟེང་དུ་རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་སྐུལ་འདེད་གཏོང་དགོས་པ་བཏོན་ཡོད། འདི་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་འཐུས་ཚང་དང་འཕེལ་རྒྱས་གཏོང་བའི་ལྡོག་མེད་ཀྱི་བླང་བྱ་ཡིན་ལ། སྤྱི་ཚོགས་རིང་ལུགས་ཀྱི་དེང་རབས་ཅན་མངོན་འགྱུར་བྱེད་པར་ཡོད་དགོས་པའི་ནང་དོན་ཡང་ཡིན། ང་ཚོས་ཐེངས་འདིའི་ཚང་འཛོམས་གྲོས་ཚོགས་ཐེངས་གསུམ་པའི་ཐོག་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པའི་གནད་དོན་སྐོར་ལ་ཞིབ་འཇུག་བྱ་རྒྱུ་ཐག་བཅད་པའི་རྒྱུ་མཚན་ནི། ཁྱབ་ཁོངས་གཅིག་གི་སྒྱུར་བཅོས་ལ་སྐུལ་འདེད་གཏོང་རྒྱུ་ཁོ་ན་མ་ཡིན་ལ། ཁྱབ་ཁོངས་འགའི་སྒྱུར་བཅོས་ལ་སྐུལ་འདེད་གཏོང་རྒྱུ་ཙམ་ཡང་མ་ཡིན་པར། ཁྱབ་ཁོངས་ཡོངས་ཀྱི་སྒྱུར་བཅོས་ལ་སྐུལ་འདེད་གཏོང་རྒྱུ་སྟེ། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པའི་སྤྱི་ཁོག་གི་ཕྱོགས་ནས་བསམ་བློ་བཏང་བ་ཞིག་ཡིན།

(2013ལོའི་ཟླ་11ཚེས་12ཉིན་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་གྲོས་ཚོགས་ཐེངས་གཉིས་པའི་ཐོག་གནང་བའི་གསུང་བཤད།)

བཞི།

མི་དམངས་ནི་ལོ་རྒྱུས་གསར་གཏོད་མཁན་ཡིན་པ་དང་། ང་ཚོའི་སྟོབས་ཤུགས་ཀྱི་འབྱུང་ཁུངས་ཡིན། སྒྱུར་བཅོས་སྒོ་འབྱེད་ལ་རྒྱ་ཆེའི་མི་དམངས་མང་ཚོགས་ཀྱིས་བློ་སེམས་རྩེ་གཅིག་གི་རྒྱབ་སྐྱོར་བྱེད་པ་དང་ཧུར་བརྩོན་གྱིས་ཐེ་ཞུགས་བྱེད་པའི་ཆེས་གཞི་རྩར་གྱུར་པའི་རྒྱུ་མཚན་ནི། ང་ཚོས་ཐོག་མ་ཉིད་ནས་སྒྱུར་བཅོས་སྒོ་འབྱེད་ཀྱི་བྱ་གཞག་དེ་མི་དམངས་མང་ཚོགས་ཀྱི་ཁྲོད་དུ་གཞི་ཟབ་མོར་ཚུགས་ཡོད་པས་རེད། ཚང་འཛོམས་གྲོས་ཚོགས་ཀྱི་ཆོད་དོན་ལས་སྒྱུར་བཅོས་སྒོ་འབྱེད་ཀྱི་ཉམས་མྱོང་རྩ་ཆེན་ཕྱོགས་བསྡུས་བྱས་ཡོད་པ་དང་། དེ་དག་ལས་གལ་ཆེ་ཤོས་ནི་ངེས་པར་དུ་མི་གཙོ་བོར་འཛིན་རྒྱུ་རྒྱུན་འཁྱོངས་བྱས་ཏེ། མི་དམངས་ཀྱི་བྱེད་པོའི་གོ་གནས་ལ་བརྩི་འཇོག་བྱེད་དགོས་པ་དང་། མང་ཚོགས་ཀྱི་གསར་གཏོད་སྙིང་སྟོབས་འདོན་སྤེལ་བྱེད་དགོས་པ། མི་དམངས་ལ་རྩེ་གཅིག་ཏུ་བརྟེན་ནས་སྒྱུར་བཅོས་ལ་སྐུལ་འདེད་གཏོང་དགོས་པ་བཅས་རེད། མི་དམངས་ཀྱི་རྒྱབ་སྐྱོར་དང་ཐེ་ཞུགས་མེད་པ་ཡིན་ན་སྒྱུར་བཅོས་གང་ཞིག་ཡིན་ཡང་འགྲུབ་ཐབས་མེད། དཀའ་ངལ་དང་འགྲན་སློང་གང་འདྲ་ཞིག་ལ་ཐུག་ཀྱང་མི་དམངས་ཀྱི་རྒྱབ་སྐྱོར་དང་ཐེ་ཞུགས་ཡོད་ཕྱིན། སེལ་མི་ཐུབ་པའི་དཀའ་ངལ་གང་ཡང་མེད་པ་དང་བརྒལ་མི་ཐུབ་པའི་འགག་སྒོ་གང་ཡང་མེད། ང་ཚོས་ཏང་གི་མང་ཚོགས་ལམ་ཕྱོགས་ལག་བསྟར་བྱས་ཏེ། མི་དམངས་དང་གཅིག་སེམས་གཅིག་འབྲེལ་དང་། མི་དམངས་དང་བདེ་སྡུག་མཉམ་མྱོང་། མི་དམངས་དང་མཐུན་སྒྲིལ་འབད་འཐབ་བཅས་བྱེད་དགོས།

གནད་ཆེའི་སྒྱུར་བཅོས་གང་ཞིག་སྐུལ་འདེད་བཏང་ཡང་། ཚང་མས་མི་དམངས་ཀྱི་ལངས་ཕྱོགས་སུ་ལངས་ནས་སྒྱུར་བཅོས་ལ་ཐུག་པའི་གནད་དོན་གལ་ཆེན་ཤེས་རྟོགས་དང་ཐག་གཅོད་ཡག་པོ་བྱེད་དགོས་པ་དང་། མི་དམངས་ཀྱི་ཁེ་ཕན་ལ་དམིགས་ནས་སྒྱུར་བཅོས་ཀྱི་བསམ་བཀོད་དང་སྒྱུར་བཅོས་ཀྱི་ཐབས་ཚུལ་འགོད་དགོས། ཧན་རྒྱལ་རབས་ཀྱི་ཝང་ཧྥུ་ཡིས་“ཁྱུང་ཆེན་མཁའ་ལ་ལྡིང་བ་ནི་གཤོག་སྒྲོ་གཅིག་ལ་བརྟེན་པ་མིན་པ་དང་། གྱི་ལིང་འགྲོས་ཁ་མྱུར་བ་ནི་སུག་པ་གཅིག་ལ་བརྟེན་པ་མིན་”ཞེས་གསུངས་པ་ལྟར། ཀྲུང་གོས་གནམ་འཕང་གཅོད་པ་དང་བང་ཁ་མྱུར་དགོས་ན་མི་དམངས་དུང་ཕྱུར་13གྱི་སྟོབས་ཤུགས་ལ་བརྟེན་དགོས།

ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པའི་འཕེལ་རིམ་ནང་དུ་འབྲེལ་བ་རྙོག་འཛིང་ཡིན་པ་དང་བརྡར་ཤ་གཅོད་དཀའ་བའི་གནད་དོན་ལ་ཐུག་ཚེ། མང་ཚོགས་ཀྱི་གནས་ཚུལ་དངོས་གང་འདྲ་ཞིག་ཡིན་པ་དང་། མང་ཚོགས་ཀྱིས་ཡང་སྙིང་གང་ཞིག་ལ་རེ་ལྟོས་བྱེད་པ། མང་ཚོགས་ཀྱི་ཁེ་ཕན་ཇི་ལྟར་བྱས་ནས་འགན་སྲུང་བྱེད་དགོས་པ། མང་ཚོགས་ཀྱིས་ང་ཚོའི་སྒྱུར་བཅོས་བློ་ལ་འབབ་ཀྱི་ཡོད་མེད་བཅས་ལ་བསམ་བློ་ནན་པོ་གཏོང་དགོས་པ་དང་། སྒྱུར་བཅོས་ཐབས་ཇུས་ཀྱི་ཚན་རིག་དང་མཐུན་པའི་རང་བཞིན་ཆེ་རུ་གཏོང་དགོས་ན་ཆེས་གལ་ཆེ་བ་ཞིག་ནི་མང་ཚོགས་ཀྱི་བསམ་འཆར་དང་གྲོས་འགོ་རྒྱ་ཆེར་ཉན་རྒྱུ་དང་། མང་ཚོགས་ཀྱིས་གསར་གཏོད་བྱས་པའི་ཉམས་མྱོང་གསར་པ་དུས་ཐོག་ཏུ་ཕྱོགས་བསྡོམས་བྱ་རྒྱུ། སྒྱུར་བཅོས་ལ་སྐུལ་འདེད་གཏོང་བའི་མང་ཚོགས་ཀྱི་ཧུར་བརྩོན་རང་བཞིན་དང་། རང་འགུལ་རང་བཞིན། གསར་གཏོད་རང་བཞིན་བཅས་སྒོ་ཀུན་ནས་སྐུལ་སློང་བྱ་རྒྱུ། ཆེས་རྒྱ་ཆེ་བའི་མི་དམངས་ཀྱི་བློ་གྲོས་དང་སྟོབས་ཤུགས་དེ་སྒྱུར་བཅོས་ཐོག་བསྒྲིལ་རྒྱུ། མི་དམངས་དང་མཉམ་དུ་སྒྱུར་བཅོས་མདུན་དུ་སྐུལ་སྤེལ་གཏོང་རྒྱུ་བཅས་རེད།

(2013ལོའི་ཟླ་11ཚེས་12ཉིན་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་གྲོས་ཚོགས་ཐེངས་གཉིས་པའི་ཐོག་གནང་བའི་གསུང་བཤད།)

ལྔ།

ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་བར། ངེས་པར་དུ་སྤྱི་ཚོགས་ཀྱི་ཐོན་སྐྱེད་ནུས་ཤུགས་འཕེལ་རྒྱས་འགྲོ་བ་དང་འཚམ་པར་བྱས་ནས་ཐོན་སྐྱེད་འབྲེལ་བ་ལེགས་སྒྲིག་བྱེད་དགོས་པ་དང་། དཔལ་འབྱོར་རྨང་གཞི་འཕེལ་རྒྱས་འགྲོ་བ་དང་འཚམ་པར་བྱས་ནས་སྟེང་གི་བཀོད་པ་འཐུས་ཚང་དུ་གཏོང་དགོས། སྒྱུར་བཅོས་སྒོ་འབྱེད་བྱས་ནས་ལོ་ངོ་35འདས་རིང་དུ་རང་རྒྱལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གནད་ཆེའི་གྲུབ་འབྲས་ཐོབ་པའི་རྩ་བའི་རྒྱུ་མཚན་ནི། ང་ཚོས་ཐོན་སྐྱེད་འབྲེལ་བ་ཟམ་མི་འཆད་པར་ལེགས་སྒྲིག་བྱས་པ་བརྒྱུད་སྤྱི་ཚོགས་ཀྱི་ཐོན་སྐྱེད་ནུས་ཤུགས་ལ་འཕེལ་རྒྱས་ཀྱི་སྐྱེ་སྟོབས་སྐུལ་སློང་བྱས་པ་དང་། སྟེང་གི་བཀོད་པ་ཟམ་མི་འཆད་པར་འཐུས་ཚང་དུ་བཏང་བ་བརྒྱུད་དཔལ་འབྱོར་རྨང་གཞི་འཕེལ་རྒྱས་ཀྱི་བླང་བྱ་དང་འཚམ་པར་བྱས་པས་རེད། ང་ཚོས་དཔལ་འབྱོར་སྒྲིག་སྲོལ་སྒྱུར་བཅོས་བྱེད་པ་དང་། ཆབ་སྲིད་སྒྲིག་སྲོལ་དང་། རིག་གནས་སྒྲིག་སྲོལ། སྤྱི་ཚོགས་སྒྲིག་སྲོལ། སྐྱེ་ཁམས་དཔལ་ཡོན་སྒྲིག་སྲོལ། ཏང་འཛུགས་སྐྲུན་གྱི་ལམ་ལུགས་བཅས་སྒྱུར་བཅོས་བྱེད་པ་ཚང་མ་དམིགས་ཡུལ་དེའི་ཆེད་དུ་ཡིན།

ང་ཚོས་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་དགོས་ཞེས་བཏོན་པ་ནི། རང་རྒྱལ་སྤྱི་ཚོགས་ཀྱི་གཞི་རྩའི་འགལ་བའི་འགུལ་སྐྱོད་ཀྱི་འགྱུར་ལྡོག་དང་བསྟུན་ནས་སྤྱི་ཚོགས་འཕེལ་རྒྱས་ལ་སྐུལ་འདེད་གཏོང་རྒྱུ་དེ་ཡིན། སྤྱི་ཚོགས་ཀྱི་གཞི་རྩའི་འགལ་བ་ནི་ནམ་ཡང་རྒྱུན་ཆད་མེད་པར་འཕེལ་རྒྱས་འགྲོ་བཞིན་ཡོད་པས། ཐོན་སྐྱེད་འབྲེལ་བ་ལེགས་སྒྲིག་དང་སྟེང་གི་བཀོད་པ་འཐུས་ཚང་དུ་གཏོང་བར་གང་ལ་དེ་འཚམ་གྱིས་རྒྱུན་ཆད་མེད་པར་སྤེལ་དགོས། ངས་ལག་ལེན་གྱི་གོང་འཕེལ་ལ་རྫོགས་མཐའ་མེད་པ་དང་། བསམ་བློ་བཅིངས་འགྲོལ་གཏོང་རྒྱུར་རྫོགས་མཐའ་མེད་ལ། སྒྱུར་བཅོས་སྒོ་འབྱེད་ལའང་རྫོགས་མཐའ་མེད་པ་དང་། སྒྱུར་བཅོས་སྒོ་འབྱེད་ལ་དུས་ད་ལྟ་བ་ལས་དུས་འདས་པ་མེད་ཅེས་བཤད་མྱོང་ཡོད། འདི་ནི་ལོ་རྒྱུས་དངོས་གཙོ་རིང་ལུགས་ཀྱི་རྣམ་འགྱུར་ཡིན།

(2013ལོའི་ཟླ་12ཚེས་3ཉིན་སྐབས་བཅོ་བརྒྱད་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་བཅུ་གཅིག་པའི་ཐོག་གནང་བའི་གསུང་བཤད།)

དྲུག།

ང་ཚོས་ཐེངས་འདིའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་གྲོས་དོན་ལ་བསམ་བློ་གཏོང་སྐབས་སུ། ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པའི་ཇུས་གཞི་ཞིག་གཏན་འབེབས་བྱེད་དགོས་ཞེས་བཏོན་པ་ལས། དཔལ་འབྱོར་སྒྲིག་སྲོལ་གྱི་སྒྱུར་བཅོས་ཁོ་ནར་དང་དོད་བྱེད་པའམ། ཡང་ན་དཔལ་འབྱོར་སྒྲིག་སྲོལ་དང་སྤྱི་ཚོགས་སྒྲིག་སྲོལ་གྱི་སྒྱུར་བཅོས་ཁོ་ནར་དང་དོད་བྱེད་པ་མ་ཡིན། བསམ་བློ་དེ་ལྟར་བཏང་བ་ནི་ང་ཚོའི་མདུན་དུ་ལྷགས་པའི་འགལ་བ་དང་གནད་དོན་མངོན་གསལ་ཅན་ཐག་གཅོད་བྱེད་དགོས་ན། ཁྱབ་ཁོངས་རྐྱང་པ་དང་རིམ་པ་རྐྱང་པའི་སྒྱུར་བཅོས་ཁོ་ནར་བརྟེན་ན་ཕན་འབྲས་ཐོན་དཀའ་བས། ངེས་པར་དུ་རྩེ་རིམ་ཇུས་འགོད་དང་སྤྱི་ཡོངས་འཆར་འགོད་ལ་ཤུགས་བརྒྱབ་ནས་སྒྱུར་བཅོས་ཁག་གི་འབྲེལ་ལྡན་རང་བཞིན་དང་། རྒྱུད་རིམ་རང་བཞིན། མཉམ་སྒྲུབ་རང་བཞིན་བཅས་ཆེ་རུ་གཏོང་དགོས་པས་ཡིན། ཐོན་སྐྱེད་འབྲེལ་བ་ལས་འཚམ་པོ་མེད་པའི་གནད་དོན་ཐག་གཅོད་ཡག་པོ་བྱེད་པ་དང་། སྟེང་གི་བཀོད་པ་ལས་འཚམ་པོ་མེད་པའི་གནད་དོན་ཐག་གཅོད་ཡག་པོ་བྱས་ན། གཞི་ནས་ཕྱོགས་བསྡུས་ཀྱི་ཕན་ནུས་ཐོན་ཐུབ།

དེ་དང་སྦྲགས་ནས་ང་ཚོས་དཔལ་འབྱོར་འཛུགས་སྐྲུན་ལྟེ་བར་འཛིན་པ་དང་། དཔལ་འབྱོར་སྒྲིག་སྲོལ་སྒྱུར་བཅོས་ཀྱི་སྣེ་ཁྲིད་ནུས་པ་འདོན་སྤེལ་བྱེད་དགོས་པ་གཙིགས་སུ་བཟུང་ནས་ནན་བཤད་བྱས་ཡོད། དེ་ཡང་གསལ་པོར་བཤད་ན། རང་རྒྱལ་གྱི་ད་ལྟའི་དུས་རིམ་གྱི་སྤྱི་ཚོགས་ཀྱི་གཞི་རྩའི་འགལ་བའི་ཕྱོགས་གཙོ་བོ་དམ་འཛིན་བྱེད་དགོས་ན། གཙོ་གནད་ནི་འཕེལ་རྒྱས་གཏོང་རྒྱུ་དེ་ཡིན། འཕེལ་རྒྱས་གཏོང་བ་ཞེས་པའི་ལས་འགན་ཨང་དང་པོ་དེར་རྩེ་གཅིག་ཏུ་དམིགས་ནས་ཕྱོགས་གང་ཅིའི་སྒྱུར་བཅོས་བཀོད་སྒྲིག་བྱས་ཏེ། སྤྱི་ཚོགས་ཀྱི་ཐོན་སྐྱེད་ནུས་ཤུགས་བཅིངས་འགྲོལ་དང་འཕེལ་རྒྱས་བཏང་ནས་སྒྱུར་བཅོས་ལ་སྣེ་ཁྲིད་ཀྱི་ནུས་པ་ཆེན་པོ་འདོན་སྤྲོད་བྱས་ན། གཞི་ནས་ཐོན་སྐྱེད་འབྲེལ་བ་དང་ཐོན་སྐྱེད་ནུས་ཤུགས་བར་དང་། སྟེང་གི་བཀོད་པ་དང་དཔལ་འབྱོར་རྨང་གཞི་བར་འཚམ་པོ་ཡོང་བར་སྐུལ་འདེད་སྔར་ལས་ལྷག་པར་བྱེད་ཐུབ། རང་རྒྱལ་གྱི་སྒྱུར་བཅོས་སྒོ་འབྱེད་བྱས་ཚུན་གྱི་ལག་ལེན་ལས། སྤྱི་ཚོགས་ཀྱི་ཐོན་སྐྱེད་ནུས་ཤུགས་བཅིངས་འགྲོལ་དང་འཕེལ་རྒྱས་གཏོང་རྒྱུ་དམ་པོར་བཟུང་ན། ཕྱོགས་སོ་སོའི་སྒྱུར་བཅོས་གཞན་དག་སྐུལ་སྤེལ་ཆེན་པོ་གཏོང་ཐུབ་པ་དང་། ཕྱོགས་སོ་སོའི་སྒྱུར་བཅོས་གཞན་དག་ལ་གང་ལ་དེ་འཚམ་གྱིས་སྐུལ་འདེད་གཏོང་བར་ཤུགས་རྐྱེན་ཐེབས་ཐུབ་པ་ར་སྤྲོད་བྱས་ཡོད།

(2013ལོའི་ཟླ་12ཚེས་3ཉིན་སྐབས་བཅོ་བརྒྱད་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་བཅུ་གཅིག་པའི་ཐོག་གནང་བའི་གསུང་བཤད།)

བདུན།

ཀྲུང་གོ་འདི་བཞིན་མི་གྲངས་དུང་ཕྱུར་13ལྷག་ཡོད་པའི་རྒྱལ་ཁབ་ཅིག་ཏུ་སྒྱུར་བཅོས་ཟབ་སྤེལ་བྱེད་ན་ལས་སླ་པོ་ཞིག་གཏན་ནས་མིན། ཀྲུང་གོའི་སྒྱུར་བཅོས་ལོ་ངོ་30ལྷག་འདས་ཏེ་ཆུ་གཏིང་སར་སླེབས་ཡོད་པ་ལ། ལས་སླ་གྲས་དང་དགའ་ས་སྤྲོ་ས་ཚང་མ་བསྒྲུབས་ཚར་ཡོད་པ་དང་། ཤ་ཞིམ་པོ་ཚང་མ་ཟས་ཚར་ནས་ཤུལ་དུ་ལུས་ཡོད་པ་ནི་འཐོག་དཀའ་བའི་གཉའ་རུས་མཁྲེགས་པོ་རྐྱང་རྐྱང་ཡིན་པ་རེད། དེས་ང་ཚོར་སྤོབས་པ་ཆེ་ཙམ་དང་གོམ་སྟབས་བརྟན་ཙམ་བྱེད་དགོས་པའི་བླང་བྱ་བཏོན་ཡོད། སྤོབས་པ་ཆེ་དགོས་པ་ནི། སྒྱུར་བཅོས་དཀའ་ཚེགས་ཇི་ཙམ་ཆེ་ཡང་མདུན་དུ་སྐུལ་འདེད་གཏོང་དགོས་པ་དང་། འགན་འཁྲི་འཁུར་ཕོད་པ་དང་གཉའ་རུས་མཁྲེགས་པོ་འཐོག་ཕོད་ཅིང་ཆུ་ཀློང་གཉན་པོ་བརྒལ་ཕོད་པ་བཅས་བྱེད་དགོས་པ་དེ་རེད། གོམ་སྟབས་བརྟན་པོ་སྤོ་དགོས་པ་ནི། ཁ་ཕྱོགས་ངེས་པར་དུ་འཕྱུགས་མེད་ཡིན་དགོས་པ་དང་། མདུན་སྐྱོད་ངེས་པར་དུ་བརྟན་པོ་ཡིན་དགོས་ཤིང་། ལྷག་པར་དུ་མགོ་རྟིང་གོ་སློག་གི་ནོར་འཁྲུལ་ནི་འབྱུང་མི་ཉན་པ་དེ་རེད།

(2014ལོའི་ཟླ་2ཚེས་7ཉིན་ཨུ་རུ་སུ་བརྙན་འཕྲིན་ཁང་གི་ཆེད་དམིགས་བཅར་འདྲི་དང་ལེན་ཞུ་སྐབས་ཀྱི་གསུང་ལན།)

བརྒྱད།

ང་ཚོས་རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་སྐུལ་འདེད་གཏོང་བར་ཕྱོགས་གང་དུ་བསྐྱོད་དགོས་སམ་ཞེ་ན། འདི་ནི་རྩ་བར་གྱུར་པའི་གནད་དོན་ཞིག་ཡིན་པས་ངེས་པར་དུ་ལན་ཡག་པོ་འདེབས་དགོས། གནད་དོན་དེར་བསམ་བློ་གཏོང་ན། ངེས་པར་དུ་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པའི་སྤྱིའི་དམིགས་འབེན་ལ་ཆ་ཚང་བའི་སྒོ་ནས་གོ་བ་ལེན་པ་དང་ཤེས་རྟོགས་བྱེད་དགོས། འདི་ནི་ཚིག་གཉིས་ལས་གྲུབ་པའི་ནང་དོན་ཆ་ཚང་ཞིག་ཡིན་པ་སྟེ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་འཐུས་ཚང་དང་འཕེལ་རྒྱས་གཏོང་དགོས་པ་དང་། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་སྐུལ་འདེད་གཏོང་དགོས་ཞེས་པ་དེ་ཡིན། དེའི་ནང་དུ་ཚིག་སྔ་མ་དང་ཚིག་ཕྱི་མ་གཉིས་ཀྱི་འབྲེལ་བའི་གནད་དོན་ཞིག་ཡོད་པ་སྟེ། ཚིག་སྔ་མས་རྩ་བའི་ཁ་ཕྱོགས་གཏན་འཁེལ་བྱས་ཡོད་དེ། ང་ཚོའི་ཁ་ཕྱོགས་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ཡིན་པ་ལས་འགྲོ་ལམ་གཞན་མིན་པ་རེད། དེའང་ངས་རྟག་པར་བཤད་པའི་ང་ཚོས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་དུ་བློ་བརྟན་འགྱུར་མེད་ཀྱིས་སྐྱོད་དགོས་པ་ལས། བཀག་སྡོམ་རེངས་གྱུར་གྱི་ལམ་རྙིང་དུ་མི་སྐྱོད་ལ་དར་ཆ་བརྗེ་སྒྱུར་གྱི་ལོག་ལམ་དུ་ཡང་མི་འགྲོ་བ་དེ་ཡིན། ཚིག་ཕྱི་མས་རྩ་བའི་ཁ་ཕྱོགས་ཀྱི་ཁྲིད་སྟོན་འོག་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་འཐུས་ཚང་དང་འཕེལ་རྒྱས་གཏོང་བའི་ཁྲིད་ཕྱོགས་གསལ་པོ་གཏན་འཁེལ་བྱས་ཡོད། ཚིག་འདི་གཉིས་ཀ་འཛོམས་ན་གཞི་ནས་ཆ་ཚང་བ་ཡིན། ཚིག་ཕྱི་མ་ལས་ཚིག་སྔ་མ་མེད་ནའང་ཆ་ཚང་བ་མིན།

(2014ལོའི་ཟླ་2ཚེས་17ཉིན་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་དོན་འཁྱོལ་བྱས་ཏེ་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱ་རྒྱུའི་སྐོར་གྱི་ཆེད་དོན་ཞིབ་མོལ་འཛིན་གྲྭའི་ཐོག་གནང་བའི་གསུང་བཤད།)

དགུ།

ས་ཁུལ་ཁག་དང་སྡེ་ཁག་སོ་སོས་ཁྱོན་ཡོངས་ཀྱི་འདུ་ཤེས་དང་འགན་འཁྲིའི་འདུ་ཤེས་བརྟན་པོ་འཆང་དགོས་པ་དང་། སྒྱུར་བཅོས་དམ་འཛིན་བྱ་རྒྱུ་དེ་ཆབ་སྲིད་ཀྱི་འགན་འཁྲི་གལ་ཆེན་ཞིག་ལ་བརྩིས་ནས། སྒྱུར་བཅོས་ཀྱི་ཆོད་སེམས་དང་གདེང་ཚོད་ཇེ་བརྟན་དུ་གཏོང་དགོས་པ་དང་། སྒྱུར་བཅོས་སྐུལ་སྤེལ་གཏོང་བའི་བསམ་བློའི་རང་རྟོགས་དང་བྱ་སྤྱོད་ཀྱི་རང་རྟོགས་ཤུགས་ཆེ་རུ་གཏོང་དགོས་ཤིང་། སྒྱུར་བཅོས་ཀྱི་སྐུལ་འདེད་པ་བྱེད་པར་མ་ཟད་སྒྱུར་བཅོས་ཀྱི་ལག་ལེན་པ་ཡང་བྱེད་པ་དང་། ལྕགས་གཟེར་འདེབས་པའི་སྙིང་སྟོབས་ཀྱིས་སྒྱུར་བཅོས་དོན་འཁྱོལ་བྱ་རྒྱུ་དམ་འཛིན། འགག་རྩ་དམ་འཛིན་དང་གནད་འཁེལ་ཤུགས་འདོན་བྱེད་པ། གཉའ་རུས་མཁྲེགས་པོ་འཐོག་ཕོད་པ་བཅས་ཀྱིས་ཕན་འབྲས་མ་ཐོན་བར་དུ་ལྷོད་བ་མེད་པར་འཛིན་དགོས་ཤིང་ཡང་དང་བསྐྱར་དུ་འཛིན་དགོས།

(2016ལོའི་ཟླ་2ཚེས་23ཉིན་ཀྲུང་དབྱང་གི་ཕྱོགས་ཡོངས་སྒྱུར་བཅོས་ཟབ་སྤེལ་འགོ་ཁྲིད་ཚོ་ཆུང་གི་གྲོས་ཚོགས་ཐེངས་ཉེར་གཅིག་པའི་ཐོག་གནང་བའི་གསུང་བཤད།)

བཅུ།

ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱ་རྒྱུ་རྒྱུན་འཁྱོངས་བྱེད་དགོས། སྤྱི་ཚོགས་རིང་ལུགས་ཁོ་ནས་གཞི་ནས་ཀྲུང་གོ་སྐྱོབ་ཐུབ་པ་དང་། སྒྱུར་བཅོས་སྒོ་འབྱེད་ཁོ་ནས་གཞི་ནས་ཀྲུང་གོ་དང་། སྤྱི་ཚོགས་རིང་ལུགས། མར་ཁེ་སིའི་རིང་ལུགས་བཅས་འཕེལ་རྒྱས་གཏོང་ཐུབ་པས། ངེས་པར་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་རྒྱུན་འཁྱོངས་བྱེད་ཅིང་འཐུས་ཚང་དུ་གཏོང་བ་དང་། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་མུ་མཐུད་སྐུལ་འདེད་གཏོང་བ། དུས་བབ་དང་མི་མཐུན་པའི་བསམ་བློ་འདུ་ཤེས་དང་སྒྲིག་སྲོལ་ལམ་སྲོལ་ཐད་ཀྱི་ཞན་ཆ་མཐའ་དག་མཐའ་གཅིག་ཏུ་རྩ་བརླག་གཏོང་བ། ཁེ་ཕན་གཏན་ཆགས་སུ་གྱུར་བའི་སྒོ་ར་གཏོར་བ། མིའི་རིགས་ཀྱི་ཤེས་དཔལ་གྱི་དགེ་མཚན་ལྡན་པའི་གྲུབ་འབྲས་བསྡུ་ལེན། རྒྱུད་རིམ་ལྡན་ཞིང་འཐུས་སྒོ་ཚང་བ་དང་ཚན་རིག་དང་མཐུན་ཞིང་ཚད་ལྡན་ཡིན་ལ་ཕན་འབྲས་ལྡན་པར་འཁོར་སྐྱོད་བྱེད་པའི་ལམ་ལུགས་ཀྱི་མ་ལག་འཛུགས་པ། རང་རྒྱལ་སྤྱི་ཚོགས་རིང་ལུགས་ལམ་ལུགས་ཀྱི་ཁྱད་འཕགས་རང་བཞིན་སྒོ་ཀུན་ནས་འདོན་སྤེལ་བཅས་བྱེད་དགོས།

(2017ལོའི་ཟླ་10ཚེས་18ཉིན་ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་བཅུ་དགུ་པའི་ཐོག་གནང་བའི་སྙན་ཞུ།)

བཅུ་གཅིག།

ཀྲུང་གོའི་མི་དམངས་ལ་ཕུགས་འདུན་རླབས་པོ་ཆེའི་སྙིང་སྟོབས་ཡོད་པ་དང་། ཀྲུང་ཧྭ་མི་རིགས་ལ་འཕོ་འགྱུར་གཏོང་བ་དང་སྒོ་འབྱེད་བྱེད་པའི་སྙིང་སྟོབས་ཀྱིས་ཁེངས་ཡོད། ལོ་ངོ་སྟོང་ཕྲག་འགའི་གོང་ལ་ཀྲུང་ཧྭ་མི་རིགས་ཀྱི་མེས་པོ་རྣམས་ཀྱིས་“ཀྲོའུ་ནི་མངའ་སྡེ་རྙིང་ན་ཡང་། །དེ་ཡི་ལས་འགན་གསར་པར་འགྱུར། །”ཞེས་པའི་སྙིང་སྟོབས་ཀྱི་རྒྱུན་བསྐྱངས་ནས་ཀྲུང་ཧྭའི་ཤེས་དཔལ་སྐྲུན་པའི་ལག་ལེན་རླབས་པོ་ཆེའི་འགོ་བརྩམས་པ་རེད། གནའ་བོའི་དུས་ནས་བཟུང་། ཀྲུང་གོའི་ས་གཞི་ཆེན་མོའི་ཐོག་ཁྲིམས་སྒྱུར་ལུགས་སྒྱུར་སྟོབས་སྤེལ་གྱི་ལས་འགུལ་བགྲང་ལས་འདས་པ་བྱུང་ཞིང་། “རྒྱལ་དོན་སྐྱོང་བར་ཚུལ་ལུགས་མཚུངས་མི་དགོས། །སྲིད་ལ་ཕན་ན་གནའ་སྲོལ་བསྐྱུར་ཀྱང་ཆོག།” ཅེས་པ་ལ་སོགས་པའི་སྤོབས་ཉམས་ལྡན་པའི་ལེགས་བཤད་ཡོད། གནའ་བོའི་དུས་ནས་བཟུང་སྟེ། ཀྲུང་ཧྭ་མི་རིགས་ཀྱིས་“གནམ་འོག་སྤྱི་མཐུན་ཆེན་པོ་”དང་། “རྒྱལ་ཕྲན་ཁྲི་སྟོང་མཐུན་པར་གནས་པའི་”བློ་ཁོག་ཡངས་པོར་བརྟེན་ནས། གདེང་ཚོད་ཡོད་ལ་བློ་དཀྱེལ་ཡང་ཆེ་བའི་སྒོ་ནས་ཡུལ་གྲུ་གཞན་གྱི་མི་རིགས་དབར་འགྲོ་འོང་དང་རིག་གནས་སྤེལ་རེས་བྱས་ཏེ། ཚོང་པའི་རྔ་མོང་ལེ་བར་སྟོང་ལ་བསྟར། དྲིལ་བུའི་སྒྲ་ཡང་ལེ་བར་སྟོང་ལ་ཁྱབ་པའི་དར་གོས་ཚོང་ལམ་སྟེང་གི་དགའ་གླུ་རིང་མོ་ལེན་མྱོང་ལ། ཐང་རྒྱལ་རབས་སྐབས་སུ་གནམ་འོག་མི་སྣ་ཁྲང་ཨན་མཁར་ལ་འདུས་པའི་དར་རྒྱས་ཀྱི་རྣམ་པ་ཡང་བསྐྲུན་མྱོང་། “དམ་པ་གོ་ལའི་འཁོར་འགྲོས་བཞིན། །ངལ་མེད་བརྩོན་པ་ལྷུར་ལེན་བྱ། །”ཞེས་པ་དང་། “དམ་པ་གཡོ་མེད་ས་གཞི་བཞིན། །ཁུར་རྣམས་སུན་མེད་འདེགས་པར་བྱ། །”ཞེས་པའི་ལུགས་སྒྱུར་དང་སྒོ་འབྱེད་ཀྱི་སྙིང་སྟོབས་འདི་ལྟ་བུར་བརྟེན་པས། ད་གཟོད་ཀྲུང་ཧྭའི་ཤེས་དཔལ་ནི་མིའི་རིགས་ཀྱི་ལོ་རྒྱུས་ཐོག་ལོ་ངོ་5000ལྷག་ཙམ་འཕེལ་རྒྱས་བྱུང་ཞིང་རྒྱུན་ཆད་མ་མྱོང་བར་འོད་སྟོང་འཕྲོ་བའི་ཤེས་རིག་ཉག་ཅིག་ཏུ་གྱུར་པ་རེད། ལོ་ངོ་སྟོང་ཕྲག་འགའི་རིང་གི་ལོ་རྒྱུས་ཆེན་མོའི་ཆ་ནས་བལྟས་ན། ལུགས་སྒྱུར་དང་སྒོ་འབྱེད་ནི་སྤྱིའི་ཆ་ནས་ཀྲུང་གོའི་ལོ་རྒྱུས་ཀྱི་རྒྱུན་རྣམ་ཞིག་རེད། ཀྲུང་ཧྭ་མི་རིགས་ཀྱིས་སྒྱུར་བཅོས་སྒོ་འབྱེད་ཀྱི་རྣམ་འགྱུར་ཐོག་ནས་མུ་མཐུད་འབྱུང་འགྱུར་ཕྱོགས་སུ་བསྐྱོད་པར་ལོ་རྒྱུས་ཀྱི་འབྱུང་རྩ་གཏིང་ཟབ་དང་རིག་གནས་ཀྱི་རྨང་གཞི་ཟབ་མོ་ཡོད།

(2018ལོའི་ཟླ་12ཚེས་18ཉིན་སྒྱུར་བཅོས་སྒོ་འབྱེད་བྱས་ནས་ལོ་ངོ་40འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད།)

བཅུ་གཉིས།

ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་ནི་དུས་རབས་ཀྱི་དབྱེ་མཚམས་ཕྱེ་བ་ཞིག་ཡིན་ཞིང་། སྒྱུར་བཅོས་སྒོ་འབྱེད་དང་སྤྱི་ཚོགས་རིང་ལུགས་ཀྱི་དེང་རབས་ཅན་འཛུགས་སྐྲུན་བྱེད་པའི་ལོ་རྒྱུས་ཀྱི་དུས་སྐབས་གསར་པ་བཏོད་པ་རེད། ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དེའང་དུས་རབས་ཀྱི་དབྱེ་མཚམས་ཕྱེ་བ་ཞིག་ཡིན་ཞིང་། དེས་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པ་དང་རྒྱུད་རིམ་ལྡན་ཞིང་ཆ་ཚང་བའི་ཇུས་འགོད་ཀྱིས་སྒྱུར་བཅོས་ལ་སྐུལ་འདེད་གཏོང་བའི་དུས་རབས་གསར་པ་བཏོད་པ་དང་། རང་རྒྱལ་གྱི་སྒྱུར་བཅོས་སྒོ་འབྱེད་ཀྱི་རྣམ་པ་གསར་པ་ཞིག་གསར་གཏོད་བྱས་ཡོད། ང་ཚོས་སྔར་བྱུང་མྱོང་མེད་པའི་ཆོད་སེམས་དང་ཤུགས་ཚད་ལ་བརྟེན་ནས་ཕྱོགས་ཡོངས་ནས་སྒྱུར་བཅོས་ཟབ་སྤེལ་ལ་སྐུལ་འདེད་བཏང་སྟེ་དཀའ་གནད་མི་ཉུང་བ་ཞིག་སེལ་བ་དང་། ཛ་དྲག་དང་ཉེན་ཁ་མི་ཉུང་བ་ཞིག་ལས་སྒྲོལ་ཐུབ་ཡོད་པ་དང་། སྒྱུར་བཅོས་ལ་ཕྱོགས་ཡོངས་ནས་ཤུགས་རྒྱག་པ་དང་། ཕྱོགས་མང་ནས་ཚད་བརྒལ་ཐུབ་པ། གཏིང་ཇེ་ཟབ་ཏུ་སྤེལ་བ་བཅས་བྱས་པས་ཁྱབ་ཁོངས་གཙོ་བོའི་སྒྱུར་བཅོས་ཀྱི་སྒྲོམ་གཞི་གཙོ་བོ་གཞི་རྩའི་ཆ་ནས་གཏན་འཁེལ་ཐུབ་ནས་བྱ་གཞག་ཁག་འཕེལ་རྒྱས་ཡོང་བར་སྐུལ་འདེད་ནུས་ལྡན་ཐེབས་ཡོད།

(2019ལོའི་ཟླ་7ཚེས་5ཉིན་ཏང་དང་རྒྱལ་ཁབ་ཀྱི་སྒྲིག་གཞིའི་སྒྱུར་བཅོས་ཟབ་སྤེལ་བྱེད་པའི་ཕྱོགས་བསྡོམས་ཚོགས་འདུའི་ཐོག་གནང་བའི་གསུང་བཤད།)

བཅུ་གསུམ།

དུས་རབས་གསར་པའི་སྒྱུར་བཅོས་སྒོ་འབྱེད་ལ་ནང་དོན་དང་ཁྱད་ཆོས་གསར་པ་མང་པོ་ཡོད་ཅིང་། དེ་དག་ལས་ཧ་ཅང་གལ་ཆེ་བ་ཞིག་ནི་ལམ་ལུགས་འཛུགས་སྐྲུན་དེ་སྔར་བས་གལ་གནད་ཆེ་རུ་ཕྱིན་པ་དང་། སྒྱུར་བཅོས་དེ་སྒྲིག་སྲོལ་དང་ལམ་སྲོལ་གྱི་གནད་དོན་གཏིང་ཟབ་པོ་སྔར་བས་མང་པོར་འཕྲད་པ། སྒྱུར་བཅོས་ཀྱི་རྩེ་རིམ་ཇུས་འགོད་ཀྱི་བླང་བྱ་སྔར་བས་མཐོ་བ། སྒྱུར་བཅོས་ཀྱི་མ་ལག་རང་བཞིན་དང་། སྤྱི་ཁོག་རང་བཞིན། མཐུན་སྦྱོར་རང་བཞིན་བཅས་ཀྱི་བླང་བྱ་སྔར་བས་ནན་པ། དེ་དག་དང་འབྲེལ་བའི་སྒྲིག་སྲོལ་ལམ་ལུགས་དང་མ་ལག་འཛུགས་པའི་ལས་འགན་སྔར་བས་ལྕི་བ་བཅས་ཡིན། དུས་རབས་གསར་པར་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱ་རྒྱུར་ཇུས་འགོད་བྱེད་པར། ངེས་པར་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་རྒྱུན་འཁྱོངས་དང་འཐུས་ཚང་དུ་གཏོང་རྒྱུ་དང་། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་སྐུལ་འདེད་གཏོང་རྒྱུ་གཙོ་བོ་བྱེད་པ་དང་། རང་རྒྱལ་འཕེལ་རྒྱས་ཀྱི་བླང་བྱ་དང་དུས་རབས་འཕེལ་རྒྱུན་གྱི་གནད་ཟིན་པ། ལམ་ལུགས་འཛུགས་སྐྲུན་དང་བཅོས་སྐྱོང་ནུས་པའི་འཛུགས་སྐྲུན་སྔར་བས་མངོན་གསལ་དོད་པའི་གོ་གནས་སུ་འཇོག་པ། ཁྱབ་ཁོངས་ཁག་དང་ཕྱོགས་སོ་སོའི་སྒྲིག་སྲོལ་དང་ལམ་སྲོལ་སྒྱུར་བཅོས་མུ་མཐུད་དུ་ཟབ་སྤེལ་བྱེད་པ་བཅས་ཀྱི་ཐོག་ནས་ཕྱོགས་གང་ཅིའི་ལམ་ལུགས་སྔར་བས་འཐུས་ཚང་དང་སྔར་བས་གཏན་ཆགས་ཡོང་བར་སྐུལ་འདེད་གཏོང་བ་དང་། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་སྐུལ་འདེད་གཏོང་དགོས།

(2019ལོའི་ཟླ་10ཚེས་28ཉིན་གྱི་《〈ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་རྒྱུན་འཁྱོངས་དང་འཐུས་སྒོ་ཚང་དུ་གཏོང་བ་དང་། རྒྱལ་ཁབ་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བར་སྐུལ་འདེད་གཏོང་བའི་གནད་དོན་གལ་ཆེན་འགའ་ཞིག་སྐོར་གྱི་ཀྲུང་གུང་ཀྲུང་དབྱང་གི་ཆོད་དོན་〉སྐོར་གྱི་གསལ་བཤད།》)

བཅུ་བཞི།

ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ཚུན། ཏང་ཀྲུང་དབྱང་གིས་སྔར་ཡོད་མ་མྱོང་བའི་ཆོད་སེམས་དང་ནུས་ཤུགས་བཏོན་ནས་བསམ་བློ་དང་འདུ་ཤེས་ཀྱི་བཀག་རྒྱ་སེལ་བ་དང་། ཁེ་ཕན་གཏན་ཆགས་སུ་གྱུར་བའི་སྒོ་ར་གཏོར་ཞིང་། ཕྱོགས་གང་ཅིའི་སྒྲིག་སྲོལ་དང་ལམ་སྲོལ་གྱི་སྐྱོན་ཆ་མཐའ་གཅིག་ཏུ་སེལ་བ་དང་། ཕྱི་རོལ་ཡུལ་གྱི་ཁོར་ཡུག་འགྱུར་ལྡོག་ལས་བྱུང་བའི་ཉེན་ཁ་དང་འགྲན་སློང་ལ་ཁ་གཏད་ཧུར་ཐག་འཇལ་ཏེ་རྔམ་བརྗིད་ཆེ་ལ་ཟིལ་རླབས་དགུང་དུ་འཕྱུར་བའི་སྒྱུར་བཅོས་ཀྱི་འཕེལ་རིམ་བཏོད་ཡོད། ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་གཏན་འཁེལ་བྱས་པའི་དམིགས་འབེན་ལས་འགན་ལ་ཕྱོགས་ཡོངས་ནས་སྐུལ་འདེད་བཏང་བ་དང་། ཁྱབ་ཁོངས་ཁག་གི་རྨང་གཞིའི་རང་བཞིན་གྱི་ལམ་ལུགས་སྒྲོམ་གཞི་གཞི་རྩའི་ཆ་ནས་གཏན་འཁེལ་བྱུང་ཞིང་། ཁྱབ་ཁོངས་མང་པོར་ལོ་རྒྱུས་རང་བཞིན་གྱི་འཕོ་འགྱུར་དང་། མ་ལག་རང་བཞིན་གྱི་བསྐྱར་བཞེངས། སྤྱི་ཡོངས་རང་བཞིན་གྱི་བསྐྱར་སྒྲིག་བཅས་མངོན་འགྱུར་བྱུང་བས། མ་ལག་ཆ་ཚང་ཞིང་། ཚན་རིག་དང་མཐུན་ལ་ཚད་ལྡན་ཡིན་པ། འཁོར་སྐྱོད་དོན་འབྲས་ལྡན་པ་བཅས་ཀྱི་ལམ་ལུགས་མ་ལག་ཆགས་པར་སྐུལ་འདེད་བཏང་བ་དང་། ཕྱོགས་སོ་སོའི་ལམ་ལུགས་སྔར་བས་འཐུས་ཚང་དང་སྔར་བས་གཏན་ཆགས་ཡོང་བར་རྨང་གཞི་བརྟན་པོ་བཏིང་ཞིང་། ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པར་ལོ་རྒྱུས་རང་བཞིན་གྱི་གྲུབ་འབྲས་རླབས་པོ་ཆེ་ཐོབ་ཡོད། སྒྱུར་བཅོས་ཀྱི་གདེང་ཚོད་བརྟན་དུ་གཏོང་དགོས་པ་དང་། སྒྱུར་བཅོས་ཀྱི་བསྒྲིལ་ཤུགས་གཅིག་ཏུ་འདྲིལ་བ། ཡང་འབད་བསྐྱར་འབད་བྱེད་པ། བློ་རྩ་བརྟན་པོས་ཡར་བརྩོན་བྱེད་པ་བཅས་ཀྱི་ཐོག་ནས་འཕེལ་རྒྱས་ཀྱི་དུས་རིམ་གསར་པའི་སྒྱུར་བཅོས་ལ་ཐོད་བརྒལ་སྔར་ལས་ཆེན་པོ་ཡོང་བ་དང་བྱས་རྗེས་སྔར་ལས་ཆེན་པོ་འཇོག་པར་སྐུལ་འདེད་གཏོང་དགོས།

ལོ་འདི་དག་རིང་གི་སྒྱུར་བཅོས་ལས་དོན་ལ་ཕྱིར་དྲན་བྱས་ཚེ། ང་ཚོས་བཏོན་པའི་གསར་གཏོད་ཀྱི་རིགས་པའི་གཞུང་ལུགས་རབ་དང་རིམ་པ་དང་། ལག་བསྟར་བྱས་པའི་ཐབས་བཀོད་གལ་ཆེན་རབ་དང་རིམ་པ། མངོན་འགྱུར་བྱུང་བའི་ཐོད་བརྒལ་གལ་ཆེན་རབ་དང་རིམ་པ་བཅས་ཚང་མར་གསར་བརྗེའི་རང་བཞིན་ལྡན་པ་དང་། སྒྱུར་བཅོས་སྒོ་འབྱེད་ལ་བརྟེན་ནས་ཏང་དང་རྒྱལ་ཁབ་ཀྱི་བྱ་གཞག་ཁག་ལ་སྐུལ་འདེད་གཏོང་བར་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་ལོ་རྒྱུས་རང་བཞིན་གྱི་འཕོ་འགྱུར་བྱུང་བའི་རྣམ་པ་གསར་པ་བཏོད་ཡོད།

(2020ལོའི་ཟླ་12ཚེས་30ཉིན་ཀྲུང་དབྱང་གི་ཕྱོགས་ཡོངས་སྒྱུར་བཅོས་ཟབ་སྤེལ་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་བདུན་པའི་ཐོག་གནང་བའི་གསུང་བཤད།)

བཅོ་ལྔ།

སྒྱུར་བཅོས་སྒོ་འབྱེད་ཟབ་སྤེལ་བྱ་རྒྱུ་རྒྱུན་འཁྱོངས་བྱེད་དགོས། སྒྱུར་བཅོས་གསར་གཏོད་ཟབ་སྤེལ་བྱེད་པ་དང་། བློ་བརྟན་འགྱུར་མེད་ཀྱིས་སྒོ་འབྱེད་རྒྱ་ཆེ་རུ་གཏོང་བ། གཏིང་རིམ་ཟབ་མོའི་སྒྲིག་སྲོལ་དང་ལམ་སྲོལ་གྱི་འགོག་རྐྱེན་སེལ་གང་ཐུབ་བྱེད་པ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལམ་ལུགས་ཀྱི་དགེ་མཚན་རྒྱུན་ཆད་མེད་པར་མངོན་པར་མཚོན་པ། སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱེད་པའི་སྒུལ་ཤུགས་དང་གསོན་ཤུགས་རྒྱུན་ཆད་མེད་པར་ཇེ་ཆེར་གཏོང་བ་བཅས་བྱས་ཏེ། རང་རྒྱལ་གྱི་ལམ་ལུགས་ཀྱི་དགེ་མཚན་དེ་སྔར་ལས་ལྷག་པའི་སྒོ་ནས་རྒྱལ་ཁབ་བཅོས་སྐྱོང་གི་ཕན་ནུས་སུ་བསྒྱུར་དགོས།

(2022ལོའི་ཟླ་10ཚེས་16ཉིན་ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་ཉི་ཤུ་པའི་ཐོག་གནང་བའི་སྙན་ཞུ།)

བཅུ་དྲུག།

སྒྱུར་བཅོས་ཞེས་པའི་གནད་འགག་གི་ཐབས་ཤེས་འདི་ཡག་པོར་སྤྱོད་དགོས་པ་དང་། སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྒྱུར་བཅོས་ཀྱི་ཁ་ཕྱོགས་རྒྱུན་འཁྱོངས་བྱས་ཐོག། སྒྱུར་བཅོས་ཀྱི་མ་ལག་འདུས་གྲུབ་དང་མཐུན་སྦྱོར་ཆོད་ཆེ་ཡོང་བར་ཤུགས་རྒྱག་པ་དང་། སྒྲིག་སྲོལ་རང་བཞིན་གྱི་འགལ་རྐྱེན་དང་། ལམ་སྲོལ་རང་བཞིན་གྱི་འགོག་རྐྱེན། གསར་གཏོད་རང་བཞིན་གྱི་སྲིད་ཇུས་བཅས་ཐག་གཅོད་བྱས་པའི་སྒྱུར་བཅོས་ཀྱི་གྲུབ་འབྲས་སྲ་བརྟན་དང་གཏིང་ཟབ་ཏུ་བཏང་ནས། ཁྱབ་ཁོངས་གལ་ཆེན་དང་འགག་རྩའི་ལྷུ་ཚིགས་སུ་ཐོད་བརྒལ་གསར་པ་ཡོང་བར་བྱེད་དགོས།

(2022ལོའི་ཟླ་10ཚེས་23ཉིན་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དང་པོའི་ཐོག་གནང་བའི་གསུང་བཤད།)

བཅུ་བདུན།

ཏང་གི་ཚོགས་ཆེན་ཉི་ཤུ་པས་གནད་ཆེའི་སྒྱུར་བཅོས་ཀྱི་ཐབས་ཚུལ་རབ་དང་རིམ་པ་བཏོན་པ་དང་། དེ་ནི་ཏང་ཀྲུང་དབྱང་གིས་དུས་རབས་གསར་པ་དང་འཐབ་ལམ་གསར་པར་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པར་བཏོན་པའི་གནད་ཆེའི་ཐབས་ཇུས་བཀོད་སྒྲིག་ཅིག་ཡིན། ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་དམིགས་འབེན་ལ་རྩེ་གཅིག་ཏུ་དམིགས་ཏེ། འཐབ་ཇུས་རང་བཞིན་དང་། གསར་སྐྲུན་རང་བཞིན། སྣེ་ཁྲིད་རང་བཞིན་བཅས་ཀྱི་སྒྱུར་བཅོས་ཁག་ཅིག་བཏོན་པ་དང་། སྒྱུར་བཅོས་ཀྱི་མ་ལག་འདུས་གྲུབ་དང་མཐུན་སྦྱོར་ཆོད་ཆེ་ཡོང་བར་ཤུགས་བརྒྱབ་ནས། ཁྱབ་ཁོངས་གལ་ཆེན་དང་འགག་རྩའི་ལྷུ་ཚིགས་སུ་ཐོད་བརྒལ་གསར་པ་བྱུང་ཡོད། སྤྱི་ཚོགས་རིང་ལུགས་ཀྱི་གཞི་རྩའི་དཔལ་འབྱོར་ལམ་ལུགས་རྒྱུན་འཁྱོངས་དང་འཐུས་ཚང་དུ་བཏང་སྟེ། གཞུང་ཁོངས་རྒྱུ་ནོར་དང་གཞུང་ཁོངས་ཁེ་ལས་ཀྱི་སྒྱུར་བཅོས་སྔར་བས་ཟབ་སྤེལ་བྱེད་དགོས་པ་དང་། གཞུང་ཁོངས་ཁེ་ལས་ཀྱི་འགྲན་རྩོད་ནུས་པ་ཆེ་རུ་གཏོང་དགོས། དམངས་གཉེར་ཁེ་ལས་འཕེལ་རྒྱས་ཀྱི་ཁོར་ཡུག་ལེགས་སྒྱུར་བྱས་ཏེ། དམངས་གཉེར་དཔལ་འབྱོར་འཕེལ་རྒྱས་ཀྱི་ཡིད་ཆེས་བསྐྱེད་དགོས་པ་དང་། དམངས་གཉེར་ཁེ་ལས་ཡར་རྒྱས་གོང་འཕེལ་འགྲོ་བར་སྐུལ་འདེད་གཏོང་དགོས། ཀྲུང་གོའི་ཁྱད་ཆོས་ལྡན་པའི་དེང་རབས་ཁེ་ལས་ལམ་ལུགས་འཐུས་ཚང་དུ་གཏོང་བ་དང་། ཚད་གཞི་མཐོ་བའི་ཚོང་རའི་མ་ལག་འཛུགས་སྐྲུན་བྱེད་པ། སྤྱི་ཁོག་དཔལ་འབྱོར་བཅོས་སྐྱོང་མ་ལག་འཐུས་ཚང་དུ་གཏོང་བ་བཅས་ཀྱི་ཐོག་ནས། ཐོན་ཁུངས་བཀོད་སྒྲིག་ཁྲོད་ཀྱི་ཚོང་རའི་ཐག་གཅོད་རང་བཞིན་གྱི་ནུས་པ་སྒོ་ཀུན་ནས་འདོན་སྤེལ་དང་སྲིད་གཞུང་གི་ནུས་པ་སྔར་ལས་ལྷག་པར་འདོན་སྤེལ་བྱེད་དགོས། དེང་རབས་དངུལ་རྩའི་ལྟ་སྐུལ་དོ་དམ་ལ་ཤུགས་སྣོན་དང་། དངུལ་རྩ་བརྟན་པོ་ཡོང་བའི་འགན་སྲུང་མ་ལག་ལ་ཤུགས་བརྒྱབ་ནས། མ་རྩ་སྐྱོན་བྲལ་ངང་འཕེལ་རྒྱས་ཡོང་བར་ཁྲིམས་ལྟར་ཚད་ལྡན་དུ་གཏོང་བ་དང་ཁྲིད་སྟོན་བྱེད་དགོས། ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་སྐུལ་སྤེལ་གཏོང་བ་དང་། གོམ་པ་བརྟན་པོའི་ངང་ནས་སྒྲིག་སྲོལ་དང་། ལམ་ལུགས། དོ་དམ། ཚད་གཞི་སོགས་ལམ་ལུགས་ཅན་དུ་སྒོ་འབྱེད་རྒྱ་སྐྱེད་བྱས་ཏེ། “རྒྱུད་གཅིག་ལམ་གཅིག་”མཉམ་སྐྲུན་ལ་སྤུས་ཚད་མཐོན་པོའི་ངང་སྐུལ་འདེད་གཏོང་དགོས། དཔལ་འབྱོར་སྒྲིག་སྲོལ་སྒྱུར་བཅོས་གཙོ་གནད་དུ་བཟུང་ནས་སྐུལ་འདེད་གཏོང་བ་དང་སྦྲགས་ནས། སློབ་གསོ་ཚན་རྩལ་ཤེས་ལྡན་མི་སྣ་དང་། ཆབ་སྲིད། ཁྲིམས་སྐྱོང་། རིག་གནས། སྤྱི་ཚོགས། སྐྱེ་ཁམས། རྒྱལ་ཁབ་བདེ་འཇགས། ཏང་འཛུགས་སྐྲུན་བཅས་ཁྱབ་ཁོངས་ཀྱི་སྒྱུར་བཅོས་ལ་གཅིག་འདོམས་ངང་འཆར་འགོད་ཡག་པོ་བྱེད་དགོས། སྒྱུར་བཅོས་དོན་འཁྱོལ་གྱི་ལམ་སྲོལ་འཐུས་ཚང་དུ་གཏོང་བར་མཐོང་ཆེན་དང་། སྒྱུར་བཅོས་ཀྱི་ཐབས་ཚུལ་དོན་འཁྱོལ་བྱས་ནས་འབྲས་བུ་ཐོན་པར་སྐུལ་འདེད་བཏང་སྟེ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་ཀྱི་དགེ་མཚན་རྒྱུན་ཆད་མེད་པར་མངོན་པ་དང་། སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱེད་པའི་སྒུལ་ཤུགས་དང་སྐྱེ་སྟོབས་རྒྱུན་ཆད་མེད་པར་ཆེ་རུ་བཏང་ནས་རང་རྒྱལ་ལམ་ལུགས་ཀྱི་དགེ་མཚན་དེ་སྔར་ལས་ལྷག་པའི་སྒོ་ནས་རྒྱལ་ཁབ་བཅོས་སྐྱོང་གི་ཕན་ནུས་སུ་བསྒྱུར་དགོས།

(2023ལོའི་ཟླ་2ཚེས་28ཉིན་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པའི་གྲོས་ཚོགས་ཐེངས་གཉིས་པའི་ཐོག་གནང་བའི་གསུང་བཤད།)

བཅོ་བརྒྱད།

ད་ལོ་ནི་ཏང་གི་ཚོགས་ཆེན་ཉི་ཤུ་པའི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པའི་ལོ་དང་པོ་ཡིན་ཞིང་། སྒྱུར་བཅོས་སྒོ་འབྱེད་བྱས་ནས་ལོ་ངོ་45འཁོར་བ་དང་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ནས་ལོ་ངོ་10འཁོར་བའི་ལོ་ཡང་ཡིན། དུས་རབས་གསར་པ་དང་འཐབ་ལམ་གསར་པའི་དམིགས་འབེན་ལས་འགན་མངོན་འགྱུར་བྱེད་དགོས་ན། ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱ་རྒྱུ་དེ་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་རྩ་བའི་སྒུལ་ཤུགས་སུ་འཛིན་པ་དང་། ཁྱོན་ཡོངས་བརྟན་པོ་ཡོང་བ་དང་། འཕོ་འགྱུར་ལ་ཁ་གཏད་འཇལ་བ། རྣམ་པ་གསར་པ་གཏོད་པ་བཅས་ཀྱི་འཛིན་བྱེད་གལ་ཆེན་དུ་བཟུང་སྟེ། ཁ་ཕྱོགས་ཡང་དག་པ་ཟིན་པ་དང་། བདེན་སྲུང་གསར་གཏོད། དོན་དངོས་སྒྲུབ་པ་བཅས་བྱས་ཏེ། འཐབ་ལམ་གསར་པའི་ཐོག་སྒྱུར་བཅོས་སྒོ་འབྱེད་ཀྱི་ལེའུ་གསར་པ་རྩོམ་དགོས།

(2023ལོའི་ཟླ་4ཚེས་21ཉིན་སྐབས་ཉི་ཤུ་པའི་ཀྲུང་དབྱང་གི་ཕྱོགས་ཡོངས་སྒྱུར་བཅོས་ཟབ་སྤེལ་ཨུ་ཡོན་ལྷན་ཁང་གི་གྲོས་ཚོགས་ཐེངས་དང་པོའི་ཐོག་གནང་བའི་གསུང་བཤད།)

བཅུ་དགུ།

སྒྱུར་བཅོས་སྒོ་འབྱེད་སྔར་བས་ཟབ་སྤེལ་བྱེད་དགོས། སྒྱུར་བཅོས་སྒོ་འབྱེད་ནི་དེང་རབས་ཀྲུང་གོས་གོམ་སྟབས་ཆེན་པོས་དུས་རབས་ཀྱི་རྗེས་ཟིན་པའི་ཐབས་མཆོག་གལ་ཆེན་ཞིག་ཡིན་ལ། ཀྲུང་གོའི་དེང་རབས་ཅན་ལ་རྒྱལ་ཕམ་གང་ཡོང་གི་གནད་འགག་གི་ཐབས་ཤེས་ཤིག་ཡིན། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར། ངེས་པར་དུ་ཕྱོགས་ཡོངས་ནས་སྒྱུར་བཅོས་སྒོ་འབྱེད་སྔར་ལས་ལྷག་པར་ཟབ་སྤེལ་བྱས་ཏེ། སྤྱི་ཚོགས་ཀྱི་ཐོན་སྐྱེད་རྒྱུན་ཆད་མེད་པར་བཅིངས་འགྲོལ་དང་འཕེལ་རྒྱས་གཏོང་དགོས་པ་དང་། སྤྱི་ཚོགས་ཀྱི་སྐྱེ་སྟོབས་རྒྱུན་ཆད་མེད་པར་བཅིངས་འགྲོལ་དང་ཆེ་རུ་བསྐྱེད་དགོས། ང་ཚོས་དུས་རབས་ཀྱི་འཕེལ་ཕྱོགས་གསར་པ་དང་། ལག་ལེན་འཕེལ་རྒྱས་ཀྱི་བླང་བྱ་གསར་པ། མི་དམངས་མང་ཚོགས་ཀྱི་རེ་སྒུག་གསར་པ་བཅས་དང་འཚམ་པར་བྱེད་དགོས་པ་དང་། སྒྱུར་བཅོས་མཐའ་འཁྱོལ་བྱེད་པའི་ཆོད་སེམས་བརྟན་པོ་ཐོག་ནས། ནན་ཏན་ངོ་མ་བྱེད་ཅིང་བཙན་ཤེད་ལ་མི་སྐྲག་པ་དང་། གནད་ལ་འཕིགས་པར་ཤུགས་འདོན་པ་དང་། མཐུན་སྦྱོར་ངང་ཤུགས་འདོན་པ། བསྟུད་མར་ཤུགས་འདོན་པ་བཅས་ཀྱི་ཐོག་ནས་ཀྲུང་གོའི་ལུགས་ཀྱི་དེང་རབས་ཅན་ལ་བདེ་བླག་ངང་སྐུལ་འདེད་གཏོང་བར་འགོག་རྐྱེན་བཟོ་བའི་ལམ་སྲོལ་དང་སྒྲིག་སྲོལ་གྱི་བཀག་རྒྱ་ཐམས་ཅད་མཐའ་གཅིག་ཏུ་སེལ་དགོས། དཔལ་འབྱོར་སྒྲིག་སྲོལ་སྒྱུར་བཅོས་ཟབ་སྤེལ་བྱས་ནས་ཐོན་ཁུངས་བཀོད་སྒྲིག་ཁྲོད་ཀྱི་ཚོང་རའི་ཐག་གཅོད་རང་བཞིན་གྱི་ནུས་པ་སྒོ་ཀུན་ནས་འདོན་སྤེལ་དང་། སྲིད་གཞུང་གི་ནུས་པ་སྔར་ལས་ལྷག་པར་འདོན་སྤེལ། འཕེལ་རྒྱས་ཀྱི་བཀོད་པ་གསར་པ་མགྱོགས་པོར་སྐྲུན་པ། རྒྱལ་ཡོངས་གཅིག་གྱུར་གྱི་ཚོང་ར་ཆེན་པོ་འཛུགས་པ། སྤྱི་ཁོག་དཔལ་འབྱོར་བཅོས་སྐྱོང་མ་ལག་འཐུས་ཚང་དུ་གཏོང་བ། རིགས་ཁག་གི་གཉེར་སྐྱོང་བྱེད་པོའི་སྐྱེ་སྟོབས་སྐུལ་སློང་བཅས་བྱས་ཏེ། སྤུས་ཚད་མཐོ་བའི་འཕེལ་རྒྱས་ལ་ཕན་ཐོགས་པའི་སྒྲིག་སྲོལ་དང་ལམ་སྲོལ་མགྱོགས་པོར་ཆགས་པ་བྱེད་དགོས། ཚན་རྩལ་སྒྲིག་སྲོལ་སྒྱུར་བཅོས་ཟབ་སྤེལ་དང་། རྒྱལ་ཡོངས་སྒྲིག་སྲོལ་དཔེ་གསར་ཅན་གྱི་དགེ་མཚན་འདོན་སྤེལ། རྒྱལ་ཁབ་ཀྱི་འཐབ་ཇུས་ཚན་རྩལ་སྟོབས་ཤུགས་ཆེ་རུ་གཏོང་བ། ཁེ་ལས་ཀྱི་ཚན་རྩལ་གསར་གཏོད་ཀྱི་བྱེད་པོའི་གོ་གནས་མཐོ་རུ་གཏོང་བ། གསར་གཏོད་ཐོན་ཁུངས་ལེགས་སྒྱུར་དང་བགོ་སྒྲིག། འགག་རྩའི་སྲོག་ཤིང་ལག་རྩལ་འགག་སྒྲོལ་ཧུར་ཐག་བཅས་བྱས་ཏེ། ཆུ་ཚད་མཐོ་བའི་ཚན་རྩལ་རང་ཚུགས་རང་དར་མངོན་འགྱུར་ཡོང་བར་སྐུལ་འདེད་གཏོང་དགོས། རིག་གནས་སྒྲིག་སྲོལ་དང་། སྤྱི་ཚོགས་སྒྲིག་སྲོལ། སྐྱེ་ཁམས་དཔལ་ཡོན་སྒྲིག་སྲོལ་སོགས་ཁྱབ་ཁོངས་ཁག་གི་སྒྱུར་བཅོས་ལ་མཐུན་སྦྱོར་ངང་སྐུལ་འདེད་བཏང་སྟེ། ཕྱོགས་ཐམས་ཅད་ནས་ཀྲུང་གོའི་ལུགས་ཀྱི་དེང་རབས་ཅན་ལ་སྒུལ་ཤུགས་གསར་པ་རྒྱུན་ཆད་མེད་པར་སྣོན་དགོས།

(2023ལོའི་ཟླ་12ཚེས་26ཉིན་བློ་མཐུན་མའོ་ཙེ་ཏུང་སྐུ་འཁྲུངས་ནས་ལོ་ངོ་130འཁོར་བར་དྲན་གསོ་ཞུ་བའི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད།)

ཉི་ཤུ།

ཐོན་སྐྱེད་འབྲེལ་བ་དེ་ངེས་པར་དུ་ཐོན་སྐྱེད་ནུས་ཤུགས་འཕེལ་རྒྱས་ཀྱི་བླང་བྱ་དང་འཚམ་པོ་ཡོང་དགོས། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་དགོས་ན། ངེས་པར་དུ་ཕྱོགས་ཡོངས་ནས་སྒྱུར་བཅོས་ཟབ་སྤེལ་སྔར་ལས་ལྷག་པར་བྱས་ཏེ་དེ་དང་འཚམ་པའི་ཐོན་སྐྱེད་འབྲེལ་བ་དཔེ་གསར་ཅན་ཆགས་པར་བྱེད་དགོས། སྤུས་གསར་ཐོན་སྐྱེད་ནུས་ཤུགས་ལ་སྲིད་གཞུང་གིས་སྔོན་ཚུད་ནས་འཆར་འགོད་ཁྲིད་སྟོན་དང་ཚན་རིག་དང་མཐུན་པའི་སྲིད་ཇུས་ཀྱི་རྒྱབ་སྐྱོར་བྱེད་དགོས་ལ། ཚོང་རའི་ལམ་སྲོལ་གྱིས་སྙོམས་སྒྲིག་དང་ཁེ་ལས་སོགས་བྱེད་པོ་བྱེ་བྲག་པས་རྒྱུན་ཆད་མེད་པར་གསར་གཏོད་ཀྱང་བྱེད་དགོས་ཏེ། དེ་ནི་སྲིད་གཞུང་གི་“གཟུགས་ལྡན་ལག་པ་”དང་ཚོང་རའི་“གཟུགས་མེད་ལག་པ་”གཉིས་ཀྱིས་ཐུན་མོང་དུ་གསོ་སྐྱོང་དང་སྐུལ་འདེད་བྱས་ནས་ཆགས་པ་ཞིག་ཡིན། དེར་བརྟེན། དཔལ་འབྱོར་སྒྲིག་སྲོལ་དང་ཚན་རྩལ་སྒྲིག་སྲོལ་སོགས་ཀྱི་སྒྱུར་བཅོས་ཟབ་སྤེལ་བྱས་ཏེ། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བར་འགོག་རྐྱེན་བཟོ་བའི་འགག་གནད་ཤུགས་བཏོན་ནས་སེལ་བ་དང་། ཚད་གཞི་མཐོ་བའི་ཚོང་རའི་མ་ལག་འཛུགས་པ། ཐོན་སྐྱེད་བདག་རྐྱེན་བགོ་སྒྲིག་བྱེད་སྟངས་གསར་གཏོད་བཅས་བྱས་པའི་ཐོག་ནས། སྔོན་ཐོན་དང་སྤུས་ལེགས་ཀྱི་ཐོན་སྐྱེན་བདག་རྐྱེན་སྣ་ཚོགས་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བའི་ཕྱོགས་སུ་བདེ་བླག་ངང་འཁོར་རྒྱུག་ཐུབ་པར་བྱེད་དགོས། དེ་དང་སྦྲགས་ནས་ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་རྒྱ་སྐྱེད་བཏང་སྟེ་སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་འགྲོ་བར་རྒྱལ་སྤྱིའི་ཁོར་ཡུག་བཟང་པོ་བསྐྲུན་དགོས།

(2024ལོའི་ཟླ་1ཚེས་31ཉིན་སྐབས་ཉི་ཤུ་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་བཅུ་གཅིག་པའི་ཐོག་གནང་བའི་གསུང་བཤད།)

ཉེར་གཅིག།

ཕྱོགས་ཡོངས་ནས་སྒྱུར་བཅོས་སྒོ་འབྱེད་ཟབ་སྤེལ་བྱས་ནས་འཕེལ་རྒྱས་ཀྱི་ནང་སྐྱེས་སྒུལ་ཤུགས་དང་སྐྱེ་སྟོབས་རྒྱུན་མཐུད་ངང་ཆེ་རུ་བསྐྱེད་དགོས། ཕྱོགས་ཡོངས་ནས་སྒྱུར་བཅོས་ཟབ་སྤེལ་སྔར་ལས་ལྷག་པར་བྱེད་པའི་གནད་ཆེའི་ཐབས་ཚུལ་འཆར་འགོད་བྱས་ཏེ། སྤུས་ཚད་མཐོ་བའི་འཕེལ་རྒྱས་སྐུལ་སྤེལ་བྱེད་པ་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་སྟོབས་ཤུགས་ཆེན་པོ་སྣོན་དགོས། ཆུ་ཚད་མཐོ་བའི་སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྒྲིག་སྲོལ་འཛུགས་པར་དམིགས་ནས་བདག་རྐྱེན་ཚོང་ར་ཅན་དུ་འགྱུར་བའི་སྒྱུར་བཅོས་ཟབ་སྤེལ་དང་། ཚད་གཞི་མཐོ་བའི་ཚོང་རའི་མ་ལག་འཛུགས་སྐྲུན། ཐོན་དབང་སྲུང་སྐྱོབ་དང་། ཚོང་རར་ཞུགས་འཐུས། དྲང་གཞག་འགྲན་རྩོད། སྤྱི་ཚོགས་ཡིད་རྟོན་སོགས་ཚོང་རའི་དཔལ་འབྱོར་གྱི་རྨང་གཞིའི་ལམ་ལུགས་མགྱོགས་པོར་འཐུས་ཚང་དུ་གཏོང་དགོས། “གཡོ་འགུལ་སྤུ་ཙམ་མེད་པ་གཉིས་”དོན་འཁྱོལ་བྱེད་པའི་སྒྲིག་སྲོལ་དང་ལམ་སྲོལ་རྒྱུན་ཆད་མེད་པར་འཐུས་ཚང་དུ་བཏང་སྟེ། དམངས་གཉེར་ཁེ་ལས་དྲང་གཞག་ངང་ཚོང་རའི་འགྲན་རྩོད་ནང་ཞུགས་པར་འགོག་རྐྱེན་བཟོ་བའི་བཀག་རྒྱ་ནུས་ལྡན་ངང་སེལ་བ་དང་། དམངས་གཉེར་དཔལ་འབྱོར་དང་དམངས་གཉེར་ཁེ་ལས་ཡར་རྒྱས་གོང་འཕེལ་འགྲོ་བར་རྒྱབ་སྐྱོར། གཉེར་སྐྱོང་བྱེད་པོ་ཁག་གི་ནང་སྐྱེས་སྒུལ་ཤུགས་དང་གསར་གཏོད་ཀྱི་སྐྱེ་སྟོབས་སྐུལ་སློང་བཅས་བྱེད་དགོས། ཚན་རྩལ་སྒྲིག་སྲོལ་དང་། སློབ་གསོའི་སྒྲིག་སྲོལ། ཤེས་ལྡན་མི་སྣའི་སྒྲིག་སྲོལ་སོགས་སྒྱུར་བཅོས་ཟབ་སྤེལ་བྱས་ཏེ། སྤུས་གསར་ཐོན་སྐྱེད་ནུས་ཤུགས་འཕེལ་རྒྱས་གཏོང་བར་འགོག་རྐྱེན་བཟོ་བའི་འགག་གནད་ཤུགས་བཏོན་ནས་སེལ་དགོས། ལམ་ལུགས་ཅན་དུ་སྒོ་འབྱེད་བྱེད་ཤུགས་ཆེ་རུ་བཏང་ནས། ཚོང་ར་ཅན་དང་། ཁྲིམས་སྐྱོང་ཅན། རྒྱལ་སྤྱི་ཅན་བཅས་ཀྱི་ཚོང་གཉེར་ཁོར་ཡུག་རྩེ་གྲ་མུ་མཐུད་དུ་འཛུགས་སྐྲུན་དང་། ཆུ་ཚད་སྔར་ལས་མཐོ་བའི་སྒོ་འབྱེད་ཅན་གྱི་དཔལ་འབྱོར་གྱི་དགེ་མཚན་གསར་པ་བཞེངས་སྐྲུན་བྱེད་དགོས།

(2024ལོའི་ཟླ་3ཚེས་5ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་བཞི་པའི་གྲོས་ཚོགས་ཐེངས་གཉིས་པའི་ཐོག་ཅང་སུའུ་འཐུས་མི་ཚོགས་པའི་གྲོས་ཞིབ་ལ་ཞུགས་སྐབས་གནང་བའི་གསུང་བཤད།)

ཉེར་གཉིས།

སྔར་ལས་ལྷག་པར་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པར་གནད་དོན་ཁྲིད་ཕྱོགས་སུ་འཛིན་རྒྱུ་འབུར་དུ་ཐོན་པར་བྱས་ཏེ། འཕེལ་རྒྱས་ཀྱི་བཀོད་པ་གསར་པ་སྐྲུན་པ་དང་སྤུས་ཚད་མཐོ་བའི་འཕེལ་རྒྱས་སྐུལ་སྤེལ་བྱེད་པར་འགོག་རྐྱེན་བཟོ་བའི་འགག་གནད་དུ་གྱུར་པའི་གནད་དོན་དང་། འཕེལ་རྒྱས་ཀྱི་ཁོར་ཡུག་དང་དམངས་འཚོའི་ཁྱབ་ཁོངས་ཀྱི་ཞན་ཆ་དང་དཀའ་གནད་དུ་གྱུར་པའི་གནད་དོན། སྤྱི་ཚོགས་ཀྱི་དྲང་སྙོམས་དྲང་བདེན་ལ་རྒྱབ་འགལ་བྱེད་པའི་ཚ་གནད་དུ་གྱུར་པའི་གནད་དོན་བཅས་ཤུགས་ཆེན་པོ་བཏོན་ནས་ཐག་གཅོད་དང་། ཉེན་ཁ་ཚབས་ཆེན་འགོག་ཟོན་དང་ཁྱད་གསོད་ནུས་ལྡན་བྱས་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྒུལ་ཤུགས་དང་སྐྱེ་སྟོབས་རྒྱུན་ཆད་མེད་པར་སྣོན་དགོས།

(2024ལོའི་ཟླ་3ཚེས་21ཉིན་ཧུའུ་ནན་དུ་རྟོག་ཞིབ་གནང་སྐབས་ཀྱི་གསུང་བཤད།)

བསོད་ནམས་དབང་རྒྱལ་གྱིས་བསྒྱུར།