ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག །རང་རྒྱལ་གྱི་བཟོ་པའི་གྲལ་རིམ་གྱིས་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏོང་བའི་ནང་གཙོ་ཤུགས་དམག་དཔུང་གི་ནུས་པ་འདོན་སྤེལ་བྱས་ཡོད་དེ། བཟོ་པའི་ལས་འགུལ་གྱི་བྱ་གཞག་ལ་ལོ་རྒྱུས་རང་བཞིན་གྱི་གྲུབ་འབྲས་ཐོབ་པ་དང་བཟོ་ཚོགས་ཀྱི་ལས་དོན་ལ་ཕྱོགས་ཡོངས་ནས་ཡར་ཐོན་ཡོང་བ་མངོན་འགྱུར་བྱུང་ཡོད། འདས་པའི་ལོ་5ཡི་རིང་། རྒྱ་ཆེའི་ལས་བཟོ་མང་ཚོགས་ནི་ཏང་དང་བློ་སེམས་མཐུན་ཞིང་ཏང་དང་མཉམ་དུ་འབད་འབུངས་བྱས་ཏེ། དཔལ་འབྱོར་འཛུགས་སྐྲུན་དང་ཚན་རྩལ་གསར་གཏོད། དབུལ་བྲལ་འགག་སྒྲོལ། གྲོང་གསེབ་དར་རྒྱས་གཏོང་བ། རིམས་ནད་སྔོན་འགོག་ཚོད་འཛིན། ཉེན་སེལ་གུད་སྐྱོབ་སོགས་ལས་དོན་གལ་ཆེའི་ནང་དུ། དམག་འཐབ་དྲག་པོ་རྒྱག་ཕོད་པ་དང་འགན་འཁྲི་ལྕི་མོ་འཁུར་ཐུབ་པའི་དུས་རབས་ཀྱི་ཉམས་འགྱུར་མངོན་ཡོད། རྒྱལ་ཡོངས་སྤྱི་ཁྱབ་བཟོ་ཚོགས་དང་བཟོ་ཚོགས་རིམ་པ་ཁག་གིས་ལས་བཟོ་པའི་བསམ་བློ་ཆབ་སྲིད་ཀྱི་སྣེ་ཁྲིད་ལ་ཤུགས་རྒྱག་པ་དང་། ཐོན་ལས་ལས་བཟོ་པའི་དཔུང་ཁག་འཛུགས་སྐྲུན་དང་སྒྱུར་བཅོས་ལ་སྐུལ་འདེད་བཏང་ནས་ངལ་རྩོལ་པའི་ཁེ་དབང་འགན་སྲུང་དང་། ངལ་རྩོལ་ཁྱབ་ཁོངས་ཀྱི་ཆབ་སྲིད་བདེ་འཇགས་ལ་སྲུང་སྐྱོང་བྱས་ནས་བཟོ་ཚོགས་ཁོངས་གཏོགས་ཀྱི་སྒྱུར་བཅོས་གཏིང་ཟབ་ཏུ་སྤེལ་ནས་ཆབ་སྲིད་རང་བཞིན་དང་སྔོན་ཐོན་རང་བཞིན། མང་ཚོགས་རང་བཞིན་བཅས་ལ་རྒྱུན་ཆད་མེད་པར་ཤུགས་བརྒྱབ་ཡོད། བཟོ་པའི་གྲལ་རིམ་གྱིས་བྱས་རྗེས་གལ་ཆེན་བཞག་པ་དང་བཟོ་ཚོགས་ལས་དོན་ལ་གྲུབ་འབྲས་གསར་པ་ཐོབ་པར་ཏང་ཀྲུང་དབྱང་གིས་གདེང་འཇོག་གང་ལེགས་བྱས་ཡོད།
ཐེངས་འདིའི་ཚོགས་ཆེན་ཐོག་མ་འོངས་པའི་དུས་སྐབས་ཤིག་རིང་གི་བཟོ་ཚོགས་ལས་དོན་ལ་བཀོད་སྒྲིག་བྱས་ཡོད་དེ། འདིར་ངས་ཡང་བསྐྱར་ནན་བཤད་འགའ་བྱ་རྒྱུ་ཡིན།
གཅིག །ཏང་གིས་བཟོ་ཚོགས་ལ་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་བྱེད་དགོས། རང་རྒྱལ་གྱི་བཟོ་པའི་ལས་འགུལ་གྱི་ལས་དོན་ནི་ཏང་གི་འགོ་ཁྲིད་འོག་འཕེལ་རྒྱས་བྱུང་བ་དང་བཟོ་ཚོགས་ནི་ཏང་གིས་འགོ་ཁྲིད་པའི་བཟོ་པའི་གྲལ་རིམ་གྱི་མང་ཚོགས་རྩ་འཛུགས་ཡིན། ཏང་གིས་བཟོ་ཚོགས་ལ་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་བྱེད་པ་ནི། དུས་ནམ་ཞིག་དང་གནས་ཚུལ་གང་འདྲ་ཞིག་ལ་ཐུག་ན་ཡང་གཡོ་འགུལ་མི་བྱེད་རུང་བ་དང་ཕྱོགས་འཛོལ་བྱེད་མི་རུང་། ཏང་གི་འགོ་ཁྲིད་རྒྱུན་འཁྱོངས་བྱ་རྒྱུ་ནི་ལྐོག་ཏུ་གྱུར་པ་དང་དོན་མེད་སྟོང་པ་ཞིག་མ་ཡིན་པས། རྣམ་པ་ཙམ་དུ་ཟད་མི་རུང་བར་ངེས་པར་དུ་ཕྱོགས་ཡོངས་དང་ནུས་ལྡན་ངང་བཟོ་ཚོགས་ལས་དོན་གྱི་བརྒྱུད་རིམ་ཧྲིལ་པོ་དང་ཕྱོགས་སོ་སོར་ལག་བསྟར་དོན་འཁྱོལ་བྱེད་དགོས། ལྷག་པར་དུ་དཔལ་འབྱོར་རྩ་འཛུགས་གསར་པ་དང་སྤྱི་ཚོགས་རྩ་འཛུགས་གསར་པ། ལས་ཞུགས་ཚོགས་པ་གསར་པ་བཅས་ཀྱི་ནང་དུ་བཟོ་ཚོགས་འཛུགས་སྐབས་ངེས་པར་དུ་ཐོག་མ་ཉིད་ནས་དར་ཆ་གསལ་སྒྲེང་གིས་ཏང་གི་འགོ་ཁྲིད་ནན་བཤད་དང་རྒྱུན་འཁྱོངས་བྱེད་དགོས། ཏང་ཀྲུང་དབྱང་གི་དབང་གྲགས་དང་གཅིག་སྡུད་གཅིག་གྱུར་གྱི་འགོ་ཁྲིད་ལ་མཐའ་གཅིག་ཏུ་སྲུང་སྐྱོང་བྱེད་དགོས་པ་དང་། བསམ་བློ་དང་ཆབ་སྲིད་དང་བྱ་སྤྱོད་བཅས་ཀྱི་ཐད་ཐོག་མཐའ་བར་གསུམ་དུ་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བ་རྒྱུན་འཁྱོངས་བྱས་ཏེ། བཟོ་ཚོགས་ལས་དོན་གྱི་ཁ་ཕྱོགས་ཡང་དག་པ་འགན་ལེན་བྱེད་དགོས། རྒྱུན་འཁྱོངས་ལྷོད་མེད་ཀྱིས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བེད་སྤྱད་ནས་བློ་སྒྲིམ་སེམས་སྐྱེད་དགོས་པ་དང་། རིགས་པའི་གཞུང་ལུགས་ཀྱིས་དྲག་ཆས་སྤྲས་རྒྱུ་དེ་གཏིང་ཟབ་ས་དང་དོན་དངོས་སུ་འགྲོ་བར་རྒྱུན་མཐུད་ངང་སྐུལ་འདེད་བཏང་སྟེ། ཏང་གི་གསར་གཏོད་རིགས་པའི་གཞུང་ལུགས་སློབ་སྦྱོང་དང་ལག་བསྟར་བྱེད་པའི་བསམ་བློའི་རང་རྟོགས་དང་བྱ་སྤྱོད་ཀྱི་རང་རྟོགས་རྒྱུན་ཆད་མེད་པར་ཤུགས་ཆེ་རུ་གཏོང་དགོས། “རྒྱལ་ཁབ་ཀྱི་དོན་ཆེན་”ཡིད་ལ་བརྟན་པོར་བཟུང་ནས། བཟོ་ཚོགས་ཀྱི་ལས་དོན་དང་ཏང་གི་ལྟེ་བའི་ལས་འགན་གྱི་ཟུང་འབྲེལ་བྱེད་ས་དང་འཇུག་སྒོ། ཤུགས་རྒྱག་ས་བཅས་གནད་ལ་འཁེལ་བ་འཚོལ་ནས་ཏང་ཀྲུང་དབྱང་གི་ཐབས་ཇུས་དང་བཀོད་སྒྲིག་བཟོ་ཚོགས་ཁོངས་གཏོགས་སུ་དོན་འཁྱོལ་མཐར་ཕྱིན་ཡོང་བར་སྐུལ་འདེད་བཏང་ནས་བཟོ་ཚོགས་ཀྱི་འགན་ནུས་འདོན་སྤེལ་སྔར་བས་ལེགས་པོ་བྱེད་དགོས། བསམ་བློ་ཆབ་སྲིད་ཀྱི་སྣེ་ཁྲིད་ལ་ཤུགས་རྒྱག་པ་དང་ལས་བཟོ་པའི་བསམ་བློ་ཆབ་སྲིད་ཀྱི་ལས་དོན་ལེགས་པོར་སྒྲུབ་དགོས་པ་དང་། རྒྱ་ཆེའི་ལས་བཟོ་པར་བློ་བརྟན་འགྱུར་མེད་ཀྱིས་ཏང་གི་སྐད་ཆར་ཉན་པ་དང་ཏང་གི་རྗེས་སུ་འབྲང་དགོས་པའི་སློབ་གསོ་དང་སྣེ་ཁྲིད་བྱས་ཏེ། བཟོ་པའི་གྲལ་རིམ་ནི་ཐོག་མཐའ་བར་གསུམ་དུ་ང་ཚོའི་ཏང་གི་ཆེས་བརྟན་པོ་དང་ཆེས་བློས་ཐུབ་ཀྱི་གྲལ་རིམ་རྨང་གཞི་ཡིན་པ་འགན་ལེན་བྱེད་དགོས།
གཉིས་པ། ལས་བཟོ་པ་དུང་ཕྱུར་མང་པོ་སྒྲིག་འཛུགས་དང་སྐུལ་སློང་བྱས་ཏེ་འཐབ་ལམ་གསར་པར་འབད་འབུངས་མདུན་སྐྱོད་དང་དུས་རབས་གསར་པར་བྱས་རྗེས་འཇོག་དགོས། བཟོ་ཚོགས་ཀྱི་ལས་དོན་བཤད་ན་བརྒྱ་བརྒྱ་སྟོང་སྟོང་ཞིག་ཡོད་མོད། ཆེས་རྩ་བར་གྱུར་པ་ནི་རྒྱ་ཆེའི་ལས་བཟོ་མང་ཚོགས་ཏང་གི་མཐའ་འཁོར་དུ་མཐུན་སྒྲིལ་དམ་པོ་བྱས་ཏེ། ཏང་གི་ལྟེ་བའི་ལས་འགན་མངོན་འགྱུར་ཡོང་ཆེད་མཐུན་སྒྲིལ་འབད་འཐབ་བྱ་རྒྱུ་དེ་རེད། བློ་གཅིག་སེམས་གཅིག་གིས་བཟོ་པའི་གྲལ་རིམ་ལ་བརྟེན་པའི་རྩ་བའི་ལམ་ཕྱོགས་རྒྱུན་འཁྱོངས་བྱེད་པ་དང་། རྒྱ་ཆེའི་ལས་བཟོ་མང་ཚོགས་ཀྱི་ཧུར་བརྩོན་རང་བཞིན་དང་རང་འགུལ་རང་བཞིན། གསར་གཏོད་རང་བཞིན་བཅས་འདོན་སྤེལ་གང་ལེགས་བྱས་ཏེ། རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་ཡོང་བར་ཕྱོགས་ཡོངས་ནས་སྐུལ་འདེད་གཏོང་བའི་བྱ་གཞག་རླབས་པོ་ཆེའི་ནང་ཧུར་ཐག་གིས་བཞུགས་དགོས། འཕེལ་རྒྱས་ཀྱི་འདུ་ཤེས་གསར་པ་ལག་ལེན་མཐར་ཕྱིན་བྱེད་པ་དང་འཕེལ་རྒྱས་ཀྱི་བཀོད་པ་གསར་པ་སྐྲུན་པ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་བཅས་ལ་དམིགས་ནས། རྣམ་པ་སྣ་ཚོགས་ཀྱི་ངལ་རྩོལ་དང་ནུས་རྩལ་འགྲན་སྡུར་རྒྱ་ཁྱབ་དང་གཏིང་ཟབ་ཏུ་སྤེལ་ཏེ། རྒྱ་ཆེའི་ལས་བཟོ་པའི་ངལ་རྩོལ་སྤྲོ་སེམས་དང་བག་ལ་ཉལ་བའི་གསར་གཏོད་ཀྱི་ནུས་པ་སྐུལ་སློང་བྱས་ཏེ་ལས་རིགས་སོ་སོ་དང་ཁྱབ་ཁོངས་སོ་སོ་རུ་གཙོ་ཤུགས་དམག་དཔུང་གི་ནུས་པ་འདོན་སྤེལ་བྱེད་དགོས། ངལ་རྩོལ་དཔེ་བཟང་ཅན་གྱི་སྙིང་སྟོབས་དང་ངལ་རྩོལ་གྱི་སྙིང་སྟོབས། བཟོ་བོའི་སྙིང་སྟོབས་བཅས་དར་སྤེལ་ཤུགས་ཆེན་བཏང་ནས། ངལ་རྩོལ་དཔེ་བཟང་དང་བཟོ་བོའི་དཔེ་སྟོན་གྱི་སྣེ་ཁྲིད་ནུས་པ་འདོན་སྤེལ་གང་ལེགས་དང་། རྒྱ་ཆེའི་ལས་བཟོ་པས་ཧུར་ཐག་གིས་ངལ་རྩོལ་བྱེད་པ་དང་གཞུང་དྲང་གིས་ངལ་རྩོལ་བྱེད་པ། གསར་གཏོད་རང་བཞིན་ལྡན་པའི་ངལ་རྩོལ་བྱེད་པ་བཅས་ཀྱི་ནང་དུ་ཕུགས་བསམ་འགྲུབ་པའི་སྐུལ་སློང་བྱེད་དགོས། ཚན་སློབ་ལ་བརྟེན་ནས་རྒྱལ་ཁབ་དར་རྒྱས་གཏོང་བའི་འཐབ་ཇུས་དང་ཤེས་ལྡན་མི་སྣ་ལ་བརྟེན་ནས་རྒྱལ་ཁབ་སྟོབས་ལྡན་དུ་གཏོང་བའི་འཐབ་ཇུས། གསར་གཏོད་ལ་བརྟེན་ནས་འཕེལ་རྒྱས་གཏོང་བའི་འཐབ་ཇུས་བཅས་ལག་ལེན་གཏིང་ཟབ་བྱེད་པར་དམིགས་ནས། ཐོན་ལས་ལས་བཟོ་པའི་དཔུང་ཁག་འཛུགས་སྐྲུན་དང་སྒྱུར་བཅོས་གཏིང་ཟབ་ཏུ་སྤེལ་བ་དང་། ཤེས་ཡོན་ཅན་དང་རྩལ་ནུས་ཅན། གསར་གཏོད་ཅན་བཅས་ཀྱི་ཐོན་ལས་ལས་བཟོ་པའི་དཔུང་ཁག་ཆེན་པོ་ཞིག་མགྱོགས་མྱུར་ངང་བཙུགས་ཏེ། རྒྱལ་ཁབ་ཆེན་པོའི་བཟོ་བོ་དང་ནུས་རྩལ་འཇོན་པའི་ཤེས་ལྡན་པ་སྔར་ལས་མང་བ་གསོ་སྐྱོང་བྱེད་དགོས།
གསུམ་པ། བསམ་པ་རྣམ་དག་གིས་དབང་ཆ་སྲུང་སྐྱོང་གི་ཞབས་ཞུའི་ལས་དོན་ལེགས་པོར་སྒྲུབ་དགོས། ཀྲུང་གོའི་ལུགས་ཀྱི་དེང་རབས་ཅན་ནི་མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བའི་དེང་རབས་ཅན་ཡིན། བཟོ་པ་གྲལ་རིམ་དང་རྒྱ་ཆེའི་ངལ་རྩོལ་མང་ཚོགས་ནི་སྤྱི་ཚོགས་ཀྱི་རྒྱུ་ནོར་གསར་སྐྲུན་མཁན་གཙོ་བོ་ཡིན། མི་དམངས་ཡོངས་རྫོགས་མཉམ་དུ་ཕྱུག་པོར་འགྱུར་བར་སྔར་བས་མིག་མཐོང་ལག་ཟིན་གྱི་འཕེལ་སྐྱེད་ཡོང་བར་སྐུལ་འདེད་གཏོང་དགོས་ན། ཐོག་མར་ངལ་རྩོལ་པ་དུང་ཕྱུར་མང་པོའི་ཐོག་ནས་མངོན་དགོས། བཟོ་ཚོགས་ནི་ལས་བཟོ་པའི་ཁེ་ཕན་གྱི་ཚབ་བྱེད་མཁན་དང་སྲུང་སྐྱོང་མཁན་ཡིན་པའི་ཆ་ནས། དབང་ཆ་སྲུང་སྐྱོང་གི་ཞབས་ཞུའི་གཞི་རྩའི་འགན་འཁྲི་ནན་ཏན་གྱིས་སྒྲུབ་དགོས་ཏེ། ལས་བཟོ་མང་ཚོགས་ཀྱི་བདེ་རྩར་ཐུག་པའི་ཁེ་ཕན་དང་འབྲེལ་བའི་གནད་དོན་དངོས་ཐག་གཅོད་བྱེད་པར་ཤུགས་འདོན་པ་དང་། ལྷག་པར་དུ་ལས་ཞུགས་རྣམ་པའི་ངལ་རྩོལ་པ་གསར་པའི་ཁྲིམས་མཐུན་ཁེ་དབང་སྲུང་སྐྱོང་བྱེད་པར་མཐོང་ཆེན་བྱེད་དགོས། བྱ་ལས་དང་ཁེ་ལས་སྡེ་ཚན་གྱི་དམངས་གཙོའི་དོ་དམ་ལ་ཤུགས་རྒྱག་དགོས་ཏེ། ལས་བཟོ་པའི་རེ་བ་ཞུ་བའི་འབྲེལ་ལམ་ཐོགས་མེད་བཟོ་བ་དང་། ལས་བཟོ་པས་ཁྲིམས་ལྟར་གནས་ལུགས་དང་མཐུན་ཞིང་གོ་རིམ་ལྡན་པའི་སྒོ་ནས་ཁེ་ཕན་དང་འབྲེལ་བའི་རེ་འདུན་བཤད་པ་དང་རང་ཉིད་ཀྱི་ཁེ་ཕན་ལ་སྲུང་སྐྱོང་བྱེད་པར་སྣེ་ཁྲིད་བྱས་ཏེ་ཞི་མཐུན་གྱི་ངལ་རྩོལ་འབྲེལ་བ་འཛུགས་པར་སྐུལ་འདེད་གཏོང་དགོས།
བཟོ་ཚོགས་ནི་ལས་བཟོ་པའི་ཁྱིམ་ཡིན་ལ། བཟོ་ཚོགས་ཀྱི་ལས་བྱེད་པ་ནི་ལས་བཟོ་པའི་“ཁྱིམ་མི་”ཡིན། བཟོ་ཚོགས་སྒྱུར་བཅོས་དང་འཛུགས་སྐྲུན་མུ་མཐུད་དུ་ཟབ་སྤེལ་བྱེད་དགོས་ཏེ། གཞི་རིམ་དམ་འཛིན་ཤུགས་ཆེན་བྱེད་པའི་ཁྲིད་ཕྱོགས་གསལ་པོ་བརྟན་པོར་འཛུགས་པ་དང་གཞི་རིམ་གྱི་རྨང་གཞི་བརྟན་དུ་གཏོང་བ། གཞི་རིམ་གྱི་གསོན་ཤུགས་སྐུལ་སློང་བྱེད་པ་བཅས་དང་། གཞི་རིམ་བཟོ་ཚོགས་ཀྱི་སྣེ་ཁྲིད་ནུས་པ་དང་རྩ་འཛུགས་ནུས་པ། ཞབས་ཞུའི་ནུས་པ་བཅས་རྒྱུན་ཆད་མེད་པར་ཆེ་རུ་གཏོང་དགོས། སྔར་ཡོད་ཀྱི་རྩ་འཛུགས་རྨང་གཞི་འཐུས་ཚང་དུ་གཏོང་བ་དང་། དཔལ་འབྱོར་གྱི་རྩ་འཛུགས་གསར་པ་དང་སྤྱི་ཚོགས་ཀྱི་རྩ་འཛུགས་གསར་པ། ལས་ཞུགས་ཀྱི་ཚོགས་པ་གསར་པ་བཅས་ཀྱིས་ཚོགས་པ་འཛུགས་རྒྱུ་དང་ཚོགས་པར་ཞུགས་རྒྱུར་རྒྱུན་མཐུད་དུ་སྐུལ་འདེད་བཏང་སྟེ། བཟོ་ཚོགས་རྩ་འཛུགས་ཀྱི་ཁེབས་ཚད་ཆེ་རུ་གཏོང་དགོས། ལས་དོན་སྒྲུབ་སྟངས་གསར་གཏོད་བྱས་ནས་ལས་བཟོ་མང་ཚོགས་ལ་གནད་འཕིགས་དང་སྙིང་ཉེ་བའི་ཞབས་ཞུ་མཁོ་འདོན་ཐུབ་པར་འབད་བརྩོན་བྱེད་དགོས། བཟོ་ཚོགས་ཀྱི་ལས་བྱེད་པས་ཏང་གི་མང་ཚོགས་ལམ་ཕྱོགས་ལག་བསྟར་བྱེད་དགོས་ཏེ། བརྟག་དཔྱད་ཞིབ་འཇུག་གཏིང་ཟབ་བྱེད་པ་དང་དུས་ལྟར་ལས་བཟོ་པའི་བསམ་ཚུལ་དང་རེ་འདུན་རྒྱུས་ལོན་བྱས་ནས་ལས་བཟོ་པར་ཞབས་འདེགས་ཞུ་བའི་ནུས་པ་རྒྱུན་ཆད་མེད་པར་ཤུགས་ཆེར་བཏང་ནས་བསམ་པ་རྣམ་དག་གིས་ལས་བཟོ་པའི་ཆེད་དུ་སྐད་ཆ་བཤད་པ་དང་བྱ་བ་སྒྲུབ་དགོས། རྒྱལ་ཡོངས་སྤྱི་ཁྱབ་བཟོ་ཚོགས་ནི་བཟོ་ཚོགས་རིམ་པ་ཁག་གི་འགོ་ཁྲིད་ལས་ཁུངས་ཡིན་པའི་ཆ་ནས། འགོ་ཁྲིད་ནས་རང་ངོས་འཛུགས་སྐྲུན་ལ་ཤུགས་རྒྱག་པ་དང་ཚད་ཤིང་དང་མིག་དཔེར་བྱས་ནས་ཏང་གིས་བློས་འཁེལ་བ་དང་མི་དམངས་ཡིད་ཆེས་པའི་དཔེ་སྟོན་ཆབ་སྲིད་ལས་ཁུངས་སུ་འགྱུར་བར་བྱེད་དགོས།
རིམ་པ་སོ་སོའི་ཏང་ཨུ་（ཏང་ཙུའུ་）ཡིས་བཟོ་ཚོགས་དང་བཟོ་ཚོགས་ལས་དོན་གྱི་འགོ་ཁྲིད་ལ་ཤུགས་རྒྱག་དགོས་པ་དང་། བཟོ་ཚོགས་ཀྱི་འགོ་ཁྲིད་ཚན་པ་ལེགས་འདེམས་ཧྲག་སྒྲིག་བྱས་ནས། བཟོ་ཚོགས་ཀྱི་ལས་བྱེད་པར་སྤྲོ་སེམས་འཁོལ་བའི་སེམས་ཁུར་དང་བླང་བྱ་ནན་མོ་བཏོན་ནས་བཟོ་ཚོགས་ཀྱི་ལས་བྱེད་པ་གསོ་སྐྱོང་དང་བཀོལ་སྤྱོད་བྱེད་པར་མཐོང་ཆེན་བྱེད་དགོས། བཟོ་ཚོགས་རྩ་འཛུགས་ཀྱི་ནུས་པ་འདོན་སྤེལ་བྱེད་པར་གཙིགས་སུ་འཛིན་དགོས་ཏེ། ལས་བཟོ་མང་ཚོགས་དང་བཟོ་ཚོགས་ལས་དོན་ལ་འཕྲད་པའི་གནད་དོན་གལ་ཆེན་དུས་ཐོག་ཏུ་ཞིབ་འཇུག་བྱས་ནས་བཟོ་ཚོགས་ཀྱིས་གསར་གཏོད་རང་བཞིན་ལྡན་པའི་ལས་དོན་སྒྲུབ་པར་རྒྱབ་སྐྱོར་བྱེད་དགོས། རིམ་པ་སོ་སོའི་སྲིད་གཞུང་གིས་སྲིད་གཞུང་དང་བཟོ་ཚོགས་ཀྱི་མཉམ་འབྲེལ་གྲོས་ཚོགས་ཀྱི་ནུས་པ་འདོན་སྤེལ་ཡག་པོ་བྱས་ནས་བཟོ་ཚོགས་ཀྱིས་ལས་བཟོ་མང་ཚོགས་ཀྱི་དཀའ་ངལ་དང་གནད་དོན་དངོས་ཐག་གཅོད་བྱེད་པར་རོགས་རམ་ཧུར་ཐག་བྱེད་དགོས།
སྒྲོལ་མ་འཚོས་བསྒྱུར།