ངེས་པར་དུ་རང་རྟོན་རང་ཚུགས་རྒྱུན་འཁྱོངས་བྱེད་དགོས།

གཅིག།

ང་ཚོས་ཐོག་མཐའ་བར་གསུམ་དུ་རྒྱལ་ཁབ་ཁག་གི་འཕེལ་རྒྱས་འགྲོ་ལམ་ནི་རྒྱལ་ཁབ་གང་དེའི་མི་དམངས་ཀྱིས་འདེམས་གསེས་བྱེད་དགོས་པར་འདོད་ཀྱི་ཡོད། “ཀྲུང་གོའི་མ་དཔེ་”ཞེས་པ་ནི་ཀྲུང་གོའི་མི་དམངས་ཀྱིས་རང་ཉིད་ཀྱི་འབད་འཐབ་ལག་ལེན་ནང་གསར་སྐྲུན་བྱས་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ཡིན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་ཆད་མེད་པར་འཕེལ་རྒྱས་འགྲོ་བ་དང་བསྟུན་ནས་ང་ཚོའི་ལམ་ལུགས་སྔར་ལས་གནད་སྨིན་འཐུས་ཚང་དུ་འགྱུར་ངེས་པ་དང་། རང་རྒྱལ་སྤྱི་ཚོགས་རིང་ལུགས་ལམ་ལུགས་ཀྱི་ཁྱད་འཕགས་རང་བཞིན་སྔར་ལས་མངོན་གསལ་དུ་འགྱུར་ངེས་པ། ང་ཚོའི་འགྲོ་ལམ་ཇི་ཙམ་བསྐྱོད་ན་དེ་ཙམ་གྱིས་རྒྱ་ཆེར་འགྱུར་ངེས་པ། རང་རྒྱལ་གྱི་འཕེལ་རྒྱས་འགྲོ་ལམ་གྱིས་འཛམ་གླིང་ལ་ཤུགས་རྐྱེན་ཇེ་ཆེར་ཐེབས་ངེས་པ་བཅས་ལ་ང་ཚོས་ཡིད་ཆེས་བྱེད་བཞིན་ཡོད།

(2013ལོའི་ཟླ་1ཚེས་5ཉིན་གསར་དུ་བདམས་ཐོན་བྱུང་བའི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན་གྱིས་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བསྟར་བའི་ཞིབ་གྲོས་འཛིན་གྲྭའི་ཐོག་གནང་བའི་གསུང་བཤད།)

གཉིས།

ཀྲུང་གོའི་ཕུགས་འདུན་མངོན་འགྱུར་བྱེད་དགོས་ན་ངེས་པར་དུ་ཀྲུང་གོའི་འགྲོ་ལམ་སྟེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ཐོག་སྐྱོད་དགོས། འགྲོ་ལམ་འདི་ནི་ལས་སླ་པོར་བྱུང་བ་ཞིག་མ་ཡིན་པར། དེ་ནི་སྒྱུར་བཅོས་སྒོ་འབྱེད་བྱས་པའི་ལོ་ངོ་30ལྷག་རིང་གི་ལག་ལེན་རླབས་པོ་ཆེ་ལས་བྱུང་བ་ཡིན་པ་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་60ལྷག་གི་རིང་ལ་བསྟུད་མར་འཚོལ་ཞིབ་བྱས་ཏེ་བསྐྱོད་པ་ཞིག་ཡིན་ལ། ཉེ་རབས་ནས་བཟུང་གི་ལོ་ངོ་170ལྷག་རིང་གི་ཀྲུང་ཧྭ་མི་རིགས་ཀྱི་འཕེལ་རིམ་ལ་ཕྱོགས་བསྡོམས་ཟབ་མོ་བྱས་པ་ལས་བསྐྱོད་ཡོང་བ་ཞིག་ཡིན་ཞིང་། ཀྲུང་ཧྭ་མི་རིགས་ཀྱི་ལོ་ངོ་5000ལྷག་རིང་གི་ཤེས་དཔལ་གྱི་ཆུ་རྒྱུན་རིང་མོ་རྒྱུན་འཛིན་བྱེད་པའི་ནང་བསྐྱོད་ཡོང་བ་ཞིག་ཡིན་པས། ལོ་རྒྱུས་ཀྱི་འབྱུང་ཁུངས་གཏིབ་ཟབ་མོ་དང་དངོས་ཡོད་ཀྱི་རྨང་གཞི་རྒྱ་ཆེན་པོ་ལྡན་པ་རེད། ཀྲུང་ཧྭ་མི་རིགས་ནི་གསར་སྐྲུན་གྱི་ནུས་སྟོབས་ཆེན་པོ་ལྡན་པའི་མི་རིགས་ཤིག་ཡིན་པས། ང་ཚོས་རླབས་ཆེན་གྱི་ཀྲུང་ཧྭའི་ཤེས་དཔལ་གསར་སྐྲུན་བྱས་ཡོད་ལ། ང་ཚོས་མུ་མཐུད་དེ་ཀྲུང་གོའི་རྒྱལ་ཁབ་ཀྱི་གནས་ཚུལ་དང་མཐུན་པའི་འཕེལ་རྒྱས་འགྲོ་ལམ་རྒྱ་སྐྱེད་དང་བདེ་བགྲོད་ཀྱང་བྱེད་ཐུབ་ངེས་རེད།

(2013ལོའི་ཟླ་3ཚེས་17ཉིན་སྐབས་བཅུ་གཉིས་པའི་རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་གྲོས་ཚོགས་ཐེངས་དང་པོའི་ཐོག་གནང་བའི་གསུང་བཤད།)

གསུམ།

རང་བཙན་རང་བདག་ནི་ང་ཚོའི་ཏང་གིས་ཀྲུང་གོའི་གནས་ཚུལ་དངོས་ལ་གཞིགས་ཏེ། ཏང་དང་མི་དམངས་ཀྱི་སྟོབས་ཤུགས་ལ་བརྟེན་ནས་གསར་བརྗེ་དང་། འཛུགས་སྐྲུན། སྒྱུར་བཅོས་གསུམ་སྤེལ་བ་ལས་བྱུང་བའི་ལྡོག་མེད་སྡོམ་ཚིག་ཡིན། འདས་མ་འོངས་ད་ལྟ་ཀུན་ཏུ་ང་ཚོས་རྒྱལ་ཁབ་དང་མི་རིགས་དར་རྒྱས་གཏོང་རྒྱུ་དེ་རང་ཉིད་ཀྱི་སྟོབས་ཤུགས་ཀྱི་གཞི་མའི་སྟེང་དུ་བཞག་ནས། མི་རིགས་ཀྱི་ལ་རྒྱ་དང་གདེང་ཚོད་རྒྱུན་འཁྱོངས་བྱེད་དགོས་པ་དང་། བློ་བརྟན་འགྱུར་མེད་ཀྱིས་རང་ཉིད་ཀྱི་འགྲོ་ལམ་དུ་སྐྱོད་དགོས།

རང་བཙན་རང་བདག་ནི་ཀྲུང་ཧྭ་མི་རིགས་ཀྱི་སྲོལ་རྒྱུན་བཟང་པོ་ཡིན་པ་དང་། ཀྲུང་གོའི་གུང་ཁྲན་ཏང་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱིས་ཏང་དང་རྒྱལ་ཁབ་འཛུགས་པའི་རྩ་དོན་གལ་ཆེན་པོ་ཡིན། ཀྲུང་གོ་འདི་བཞིན་མི་འབོར་མང་ལ་དཔལ་འབྱོར་དང་རིག་གནས་རྗེས་ལུས་ཡིན་པའི་ཤར་ཕྱོགས་ཀྱི་རྒྱལ་ཁབ་ཆེན་པོ་ཞིག་ཏུ་གསར་བརྗེ་དང་འཛུགས་སྐྲུན་སྤེལ་རྒྱུའི་རྒྱལ་ཁབ་ཀྱི་གནས་ཚུལ་དང་འགན་འཁྲི་དེས་ང་ཚོ་རང་ཉིད་ཀྱི་འགྲོ་ལམ་ཁོ་ནར་སྐྱོད་དགོས་པ་ཐག་བཅད་ཡོད་པ་རེད།

(2013ལོའི་ཟླ་12ཚེས་26ཉིན་བློ་མཐུན་མའོ་ཙེ་ཏུང་སྐུ་འཁྲུངས་ནས་ལོ་ངོ་120འཁོར་བར་དྲན་གསོ་ཞུ་བའི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད།)

བཞི།

སྤྱི་ལེ་གྲུ་བཞི་མ་ཁྲི་ཚོ་960ཡི་ས་གཞི་རྒྱ་ཆེན་པོའི་སྟེང་དུ་ལངས་ནས། ཀྲུང་ཧྭ་མི་རིགས་ཀྱིས་ཡུན་རིང་འབད་འཐབ་བྱས་ནས་གསོག་འཇོག་བྱས་པའི་རིག་གནས་ཀྱི་གསོ་བཅུད་ལ་རོལ་བ་དང་། ཀྲུང་གོའི་མི་དམངས་དུང་ཕྱུར་13གྱིས་གཅིག་ཏུ་འགྲིལ་བའི་སྟོབས་ཤུགས་མངའ་བས་ན། ང་ཚོ་རང་ལམ་རང་གིས་སྐྱོད་པར་གར་སྟེགས་རྒྱ་ཆེན་པོ་ཡོད་པ་དང་། ལོ་རྒྱུས་ཀྱི་བསགས་ནོར་འགྲན་ཟླ་བྲལ་བ་ཡོད་ལ། མདུན་སྐྱོད་ཀྱི་ཚུགས་ཤུགས་གཞན་དྲིང་མི་འཇོག་པ་ཡོད། ཀྲུང་གོའི་མི་དམངས་ལ་དེ་ལྟ་བུའི་ཡིད་ཆེས་ཡོད་དགོས་པ་དང་། ཀྲུང་གོ་བ་རེ་རེ་ཚང་མར་དེ་ལྟ་བུའི་ཡིད་ཆེས་ཡོད་དགོས།

(2013ལོའི་ཟླ་12ཚེས་26ཉིན་བློ་མཐུན་མའོ་ཙེ་ཏུང་སྐུ་འཁྲུངས་ནས་ལོ་ངོ་120འཁོར་བར་དྲན་གསོ་ཞུ་བའི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད།)

ལྔ།

རང་བཙན་རང་བདག་རྒྱུན་འཁྱོངས་བྱེད་ན། ཀྲུང་གོའི་དོན་དག་ནི་ངེས་པར་དུ་ཀྲུང་གོའི་མི་དམངས་རང་ཉིད་ཀྱིས་བདག་གིར་ལེན་དགོས་པ་དང་རང་ཉིད་ཀྱིས་ཐག་གཅོད་བྱ་རྒྱུ་རྒྱུན་འཁྱོངས་བྱེད་དགོས། འཛམ་གླིང་ན་ཀུན་ལ་འཕྲོད་པའི་འཕེལ་རྒྱས་གཏོང་ཕྱོགས་ཀྱི་དཔེ་སྲོལ་བྱེ་བྲག་པ་ཞིག་མེད་ལ། འགྱུར་བ་མེད་པའི་འཕེལ་རྒྱས་འགྲོ་ལམ་ཞིག་ཀྱང་མེད། ལོ་རྒྱུས་ཀྱི་ཆ་རྐྱེན་ནི་སྣ་མང་ཅན་ཡིན་པ་དེས་རྒྱལ་ཁབ་ཁག་གིས་གདམ་ག་བྱེད་པའི་འཕེལ་རྒྱས་འགྲོ་ལམ་ཡང་སྣ་མང་ཅན་ཡིན་པ་ཐག་གཅོད་ཀྱི་ཡོད། མིའི་རིགས་ཀྱི་ལོ་རྒྱུས་སྟེང་དུ་ཕྱི་རོལ་གྱི་སྟོབས་ཤུགས་ལ་བརྟེན་པ་དང་གཞན་གྱི་ཕྱི་རྗེས་འབྲངས་ནས་སྟོབས་འབྱོར་རྒྱས་པ་དང་དར་རྒྱས་བྱུང་བའི་མི་རིགས་དང་རྒྱལ་ཁབ་ནི་གཅིག་ཀྱང་མེད། དེ་ལྟར་བྱས་པའི་མཇུག་འབྲས་ནི་ལྡོག་མེད་དུ་ཕམ་ཉེས་འབྱུང་བ་མིན་ན་ལྡོག་མེད་དུ་གཞན་གྱི་ཟུར་གཏོགས་ཆགས་འགྲོ་བ་དེ་རང་རེད།

ང་ཚོའི་ཏང་གིས་གསར་བརྗེ་དང་། འཛུགས་སྐྲུན། སྒྱུར་བཅོས་གསུམ་ལ་འགོ་ཁྲིད་བྱེད་པའི་དུས་ཡུན་རིང་པོའི་ལག་ལེན་གྱི་ནང་དུ། དུས་ནམ་ཡིན་རུང་རང་བཙན་རང་བདག་གིས་མདུན་སྐྱོད་ཀྱི་འགྲོ་ལམ་འབྱེད་རྒྱུ་རྒྱུན་འཁྱོངས་བྱས་ཡོད་ཅིང་། རང་བཙན་རང་བདག་གིས་འཚོལ་ཞིབ་དང་ལག་ལེན་བྱེད་པའི་སྙིང་སྟོབས་འདི་འདྲ་དང་། རང་ཉིད་ཀྱི་འགྲོ་ལམ་ཐོག་སྐྱོད་རྒྱུ་རྒྱུན་འཁྱོངས་བྱེད་པའི་འགྱུར་མེད་ཀྱི་གདེང་ཚོད་དང་ཆོད་སེམས་འདི་འདྲ་ནི་ང་ཚོའི་ཏང་གི་རིགས་པའི་གཞུང་ལུགས་དང་ལག་ལེན་ཡོངས་རྫོགས་ཀྱི་རྟེན་གཞི་ཡིན་པ་དང་། ཏང་དང་མི་དམངས་ཀྱི་བྱ་གཞག་རྒྱུན་ཆད་མེད་པར་རྒྱལ་ཁ་ནས་རྒྱལ་ཁའི་ཕྱོགས་སུ་སྐྱོད་པའི་གཞི་རྩའི་འགན་སྲུང་ཡང་ཡིན།

(2013ལོའི་ཟླ་12ཚེས་26ཉིན་བློ་མཐུན་མའོ་ཙེ་ཏུང་སྐུ་འཁྲུངས་ནས་ལོ་ངོ་120འཁོར་བར་དྲན་གསོ་ཞུ་བའི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད།)

དྲུག།

རྒྱལ་ཁབ་ཅིག་གིས་བཅོས་སྐྱོང་མ་ལག་གང་འདྲ་ཞིག་གདམ་གསེས་བྱེད་མིན་ནི་རྒྱལ་ཁབ་དེའི་ལོ་རྒྱུས་སྲོལ་རྒྱུན་དང་། རིག་གནས་སྲོལ་རྒྱུན། དཔལ་འབྱོར་དང་སྤྱི་ཚོགས་འཕེལ་རྒྱས་ཆུ་ཚད་བཅས་ཀྱིས་ཐག་གཅོད་ཀྱི་ཡོད་པ་དང་། རྒྱལ་ཁབ་དེའི་མི་དམངས་ཀྱིས་ཐག་གཅོད་ཀྱི་ཡོད་པ་རེད། རང་རྒྱལ་གྱི་ད་ལྟའི་རྒྱལ་ཁབ་སྐྱོང་བའི་མ་ལག་ནི་རང་རྒྱལ་གྱི་ལོ་རྒྱུས་སྲོལ་རྒྱུན་དང་། རིག་གནས་སྲོལ་རྒྱུན། དཔལ་འབྱོར་དང་སྤྱི་ཚོགས་འཕེལ་རྒྱས་བཅས་ཀྱི་རྨང་གཞིའི་ཐོག་དུས་ཡུན་རིང་པོར་འཕེལ་རྒྱས་བྱུང་བ་དང་། རིམ་པས་ལེགས་སྒྱུར་བྱས་པ། ནང་སྐྱེས་རང་བཞིན་གྱི་འཕོ་འགྱུར་བྱུང་བ་བཅས་ཀྱི་འབྲས་བུ་ཡིན། རང་རྒྱལ་གྱི་རྒྱལ་ཁབ་སྐྱོང་བའི་མ་ལག་ལེགས་སྒྱུར་དང་འཐུས་ཚང་དུ་གཏོང་དགོས་ཀྱི་ཡོད་མོད། འོན་ཀྱང་ཇི་ལྟར་ལེགས་སྒྱུར་དང་། ཇི་ལྟར་འཐུས་ཚང་གཏོང་རྒྱུའི་ཐད་ལ་ང་ཚོར་ལྟ་ཕྱོགས་ཡོད་དགོས་པ་དང་ངེས་ཤུགས་ཡོད་དགོས། ཀྲུང་ཧྭ་མི་རིགས་ནི་ཆུ་བོ་ཐམས་ཅད་རྒྱ་མཚོར་འབབ་པ་ལྟར་གྱི་ཀུན་འདུ་མཉམ་གནས་ཀྱི་མི་རིགས་ཤིག་ཡིན་པ་དང་། ལོ་རྒྱུས་ཀྱི་འཕེལ་རྒྱུན་རིང་མོའི་ནང་དུ་རྒྱུན་ཆད་མེད་པར་གཞན་གྱི་ལེགས་ཆ་སློབ་སྦྱོང་བྱས་ཏེ་རང་ཆོས་སུ་བསྒྱུར་བས་གཞི་ནས་རང་རིགས་ཀྱི་ཁྱད་ཆོས་གྲུབ་ཡོད་པ་རེད། རབ་ཏུ་བརྟན་པའི་ལམ་ལུགས་ཀྱི་གདེང་ཚོད་མེད་ན་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པའི་བློ་སྟོབས་ཡོད་མི་སྲིད་པ་དང་། དེ་དང་འདྲ་བར་རྒྱུན་ཆད་མེད་པའི་སྒྱུར་བཅོས་དང་བྲལ་བ་ཡིན་ན་ལམ་ལུགས་ཀྱི་གདེང་ཚོད་ཀྱང་མཐའ་མི་འཁྱོལ་བ་དང་རྒྱུན་མི་འཁྱོངས་པ་རེད། ང་ཚོས་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་སྔར་བས་ཇེ་ལེགས་ཇེ་བཟང་དུ་གཏོང་རྒྱུ་དེ་ཡིན་པ་དང་། ང་ཚོས་ལམ་ལུགས་ཀྱི་གདེང་ཚོད་བརྟན་དགོས་ཟེར་བ་ནི་རང་སྒོ་རང་སྡོམ་བྱེད་དགོས་ཟེར་བ་མ་ཡིན་པར་རྒྱུན་ཆད་མེད་པར་སྒྲིག་སྲོལ་དང་ལམ་སྲོལ་གྱི་སྐྱོན་སེལ་ནས་ང་ཚོའི་ལམ་ལུགས་དེ་ཉིད་གནད་སྨིན་འཐུས་ཚང་དང་རྒྱུན་རིང་ཡོང་བར་བྱ་རྒྱུ་དེ་ཡིན།

(2014ལོའི་ཟླ་2ཚེས་17ཉིན་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་བྱས་ཏེ་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱ་རྒྱུའི་སྐོར་གྱི་ཆེད་དོན་ཞིབ་གྲོས་འཛིན་གྲྭའི་ཐོག་གནང་བའི་གསུང་བཤད།)

བདུན།

“ཧོའེ་ལྷོའི་ཡུལ་གྱི་ཚ་ལུ་མ། ཧོའེ་བྱང་ཡུལ་དུ་འབོད་མིང་གཞན།” ཞེས་ཟེར་བ་ལྟར། ང་ཚོས་ཕྱི་རྒྱལ་གྱི་ཆབ་སྲིད་དཔལ་ཡོན་གྱི་དགེ་མཚན་ཅན་གྱི་གྲུབ་འབྲས་དཔེ་ལྟ་བྱེད་དགོས་མོད། འོན་ཀྱང་ཀྲུང་གོའི་ཆབ་སྲིད་ལམ་ལུགས་ཀྱི་རྩ་བ་གཏན་ནས་འདོར་མི་རུང་། ཀྲུང་གོར་མངའ་ཁོངས་སྤྱི་ལེ་གྲུ་བཞི་མ་ཁྲི་ཚོ་960ལྷག་དང་མི་རིགས་56ཡོད་པ་ལ། ང་ཚོས་རྒྱལ་ཁབ་གང་གི་དཔེ་སྲོལ་ལྟར་སྒྲུབ་ཆོག་གམ། སུ་དང་གང་གིས་འདི་འདྲ་དང་དེ་འདྲ་བྱེད་དགོས་ཞེས་ང་ཚོར་བཀའ་བཀོད་གཏོང་ནུས་སམ། དེས་ན་སྣ་མང་ཕུན་སུམ་ཚོགས་པའི་འཛམ་གླིང་ལ་ཆ་མཚོན་ན། ང་ཚོས་ཁོང་ཡངས་ཀུན་ལེན་གྱི་རྣམ་འགྱུར་བཟུང་སྟེ་ཁེངས་སྐྱུང་གིས་གཞན་གྱི་དགེ་མཚན་སློབ་སྦྱོང་བྱེད་དགོས་པ་དང་། རང་བཙན་རང་བདག་གི་ལངས་ཕྱོགས་ཐོག་གཞན་གྱི་དགེ་མཚན་བསྡུ་ལེན་བྱས་ནས་རང་ཉིད་ཀྱི་རང་ཆོས་སུ་འགྱུར་བ་བྱེད་དགོས་པ་ལས། ཁྱི་གཟན་མི་ལྡད་དང་བཟང་ལད་ངན་ཆགས་གཏན་ནས་བྱེད་མི་ཉན། རྒྱལ་ཁབ་གཞན་གྱི་ཆབ་སྲིད་ལམ་ལུགས་འདྲ་སྤོ་འདྲ་བཤུ་བྱས་ན་མི་འཐུས་པ་དང་ས་ཆུ་མི་འཕྲོད་པ་ཡོང་སྲིད་ལ། སྟག་གི་རི་མོ་མ་འཁྱོངས་པར་ཁྱི་རྒན་རྒྱ་བོའི་གཟུགས་བརྙན་ལ་ཆགས་སྲིད་པ་དང་། ཐ་ན་རྒྱལ་ཁབ་ཀྱི་མདུན་ལམ་དང་ལས་དབང་འཕུང་ལ་སྦྱོར་སྲིད་པ་རེད། དེ་ཡང་རྒྱལ་ཁབ་རང་ཉིད་ཀྱི་ས་ཞིང་གཤིན་པོའི་སྟེང་དུ་རྩ་བ་ཚུགས་ཤིང་འཚོ་བཅུད་བླངས་པའི་ལམ་ལུགས་ཁོ་ན་དེ་གཞི་ནས་བློས་འཁེལ་ཤོས་དང་གོ་ཆོད་ཤོས་ཡིན་པ་རེད།

(2014ལོའི་ཟླ་9ཚེས་5ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་དབུ་བརྙེས་ནས་ལོ་ངོ་60འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད།)

བརྒྱད།

ཏང་ཡོངས་ཀྱིས་འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་བརྟན་པོ་འཆང་དགོས། དེང་དུས་འཛམ་གླིང་གི་སྲིད་ཏང་གང་དང་རྒྱལ་ཁབ་གང་དང་མི་རིགས་གང་ལ་གདེང་ཚོད་ཡོད་དམ་ཟེར་ན། ཀྲུང་གོའི་གུང་ཁྲན་ཏང་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ། ཀྲུང་ཧྭ་མི་རིགས་བཅས་ལ་ནི་གདེང་ཚོད་ལྡན་པའི་རྒྱུ་མཚན་ཆེ་ཤོས་ཡོད་ཅེས་བརྗོད་ཆོག། “མི་ལོ་ཉིས་བརྒྱ་འཚོ་བའི་གདེང་ཡོད་པས། ལེ་དབར་སུམ་སྟོང་རྐྱལ་བའི་སྤོབས་པ་ཡོད་”ཅེས་པའི་སྙིང་སྟོབས་ལྡན་ཚེ། ང་ཚོས་འཇིགས་པ་སྤུ་ཙམ་མེད་པར་དཀའ་ངལ་དང་འགྲན་སློང་མཐའ་དག་ལ་ཁ་གཏད་འཇལ་ཐུབ་པ་དང་། བློ་བརྟན་འགྱུར་མེད་ངང་གནམ་ས་གསར་པ་དང་ངོ་མཚར་གསར་པ་སྐྲུན་ཐུབ་ངེས་རེད།

(2016ལོའི་ཟླ་7ཚེས་1ཉིན་ཀྲུང་གོའི་གུང་ཁྲན་ཏང་དབུ་བརྙེས་ནས་ལོ་ངོ་95འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད།)

དགུ།

ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ནི་སྒྱུར་བཅོས་སྒོ་འབྱེད་བྱས་ཚུན་དུ་ཏང་གི་རིགས་པའི་གཞུང་ལུགས་དང་ལག་ལེན་ཆ་ཚང་གི་བརྗོད་བྱ་གཙོ་བོ་ཡིན་པ་དང་། ཏང་དང་མི་དམངས་ཀྱིས་དཀའ་སྡུག་ཚད་མེད་མྱངས་ཤིང་རིན་དོད་ཆེན་པོ་བཏང་ནས་ཐོབ་པའི་རྩ་བའི་གྲུབ་འབྲས་ཡིན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ནི་སྤྱི་ཚོགས་རིང་ལུགས་ཀྱི་དེང་རབས་ཅན་མངོན་འགྱུར་ཡོང་བ་དང་། མི་དམངས་ལ་དགའ་སྐྱིད་ལྡན་པའི་འཚོ་བ་གསར་སྐྲུན་བྱེད་པའི་འགྲོ་ལམ་ཉག་ཅིག་ཡིན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིགས་པའི་གཞུང་ལུགས་མ་ལག་ནི་ཏང་དང་མི་དམངས་ཀྱིས་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་བྱེད་པར་ཁྲིད་སྟོན་བྱེད་སྤྱད་ཀྱི་རིགས་པའི་གཞུང་ལུགས་ཡང་དག་པ་ཡིན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་ནི་དེང་རབས་ཀྲུང་གོ་ཡར་རྒྱས་གོང་འཕེལ་ཡོང་བའི་རྩ་བའི་ལམ་ལུགས་ཀྱི་འགན་ལེན་ཡིན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིག་གནས་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་དཔའ་ངར་ཆེན་པོས་མདུན་དུ་སྐྱོད་པར་སྐུལ་མ་གཏོང་སྤྱད་ཀྱི་བསམ་བློའི་སྟོབས་ཤུགས་ཆེན་པོ་ཡིན། ཏང་ཡོངས་ཀྱིས་འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་སྔར་ལས་རང་རྟོགས་ཀྱི་སྒོ་ནས་ཇེ་ཆེར་གཏོང་དགོས་ཤིང་། བཀག་སྡོམ་རེངས་གྱུར་གྱི་ལམ་རྙིང་དུ་མི་སྐྱོད་ལ། དར་ཆ་བརྗེ་སྒྱུར་གྱི་ལོག་ལམ་དུའང་མི་སྐྱོད་པར། ཆབ་སྲིད་ཀྱི་ངེས་ཤུགས་མཐའ་འཁྱོངས་དང་། དོན་དངོས་སྒྲུབ་ནས་རྒྱལ་ཁབ་གོང་དུ་སྤེལ་རྒྱུ་རྒྱུན་འཁྱོངས་བྱས་ཏེ། ཐོག་མཐའ་བར་གསུམ་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་དགོས།

(2017ལོའི་ཟླ་10ཚེས་18ཉིན་ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མིའི་ཚོགས་ཆེན་ཐེངས་བཅུ་དགུ་པའི་ཐོག་གནང་བའི་སྙན་ཞུ།)

བཅུ།

ཀྲུང་གོར་གཅིག་གྱུར་གྱི་མི་རིགས་མང་བ་དང་། མི་འབོར་དུང་ཕྱུར་13ལྷག་ཡོད་ལ་བསམ་པ་དང་རིག་གནས་ཀྱི་ཐད་ཚད་མཐོའི་མཐུན་སྒྲིལ་དང་གཅིག་གྱུར་ཡིན་པའི་རྒྱལ་ཁབ་ཅིག་ཆགས་ཡོད་པ་འདི་འདྲ་ནི་འཛམ་གླིང་ཐོག་ང་ཚོའི་རྒྱལ་ཁབ་མ་གཏོགས་མེད། ཀྲུང་གོའི་ལོ་ངོ་སྟོང་ཕྲག་འགའི་རིང་གི་འཕེལ་རྒྱས་ཀྱི་ལོ་རྒྱུས་རྒྱུན་ཆད་མ་མྱོང་ལ། ཐུན་མོང་མ་ཡིན་པའི་ཁྱད་ཆོས་ལྡན་ཞིང་བློ་རྒྱ་ཟབ་ཅིང་ཡངས་བའི་རིན་ཐང་ལྟ་བ་དང་ཤེས་དཔལ་མ་ལག་ཆགས་ཡོད་པ་འདི་འདྲ་ནི་འཛམ་གླིང་ཐོག་ང་ཚོའི་རྒྱལ་ཁབ་མ་གཏོགས་མེད། ཀྲུང་གོར་རང་རྒྱལ་གྱི་དོན་དངོས་དང་མཐུན་ཞིང་དུས་རབས་ཀྱི་ཁྱད་ཆོས་དང་མཐུན་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཆགས་པར་མ་ཟད་གྲུབ་འབྲས་ཀྱང་ཧ་ཅང་ཆེན་པོ་ཐོབ་ཡོད་པ་འདི་འདྲ་ནི་འཛམ་གླིང་ཐོག་ང་ཚོའི་རྒྱལ་ཁབ་མ་གཏོགས་མེད། ཀྲུང་གོར་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བ་དང་། ཏང་ཡོན་8900ལྷག་ཙམ་ཡོད་ཅིང་། སྒྲིག་འཛུགས་དམ་ཚགས་བྱས་པའི་ཀྲུང་གོའི་གུང་ཁྲན་ཏང་ཡོད་པར་མ་ཟད་ཀྲུང་གོར་ཡུན་རིང་སྲིད་དབང་སྐྱོང་བ་འདི་འདྲ་ནི་འཛམ་གླིང་ཐོག་ང་ཚོའི་རྒྱལ་ཁབ་མ་གཏོགས་མེད།

(2018ལོའི་ཟླ་1ཚེས་5ཉིན་གསར་དུ་བདམས་ཐོན་བྱུང་བའི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོ་བཅས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་བཅུ་དགུ་པའི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བསྟར་བའི་ཞིབ་གྲོས་འཛིན་གྲྭའི་ཐོག་གནང་བའི་གསུང་བཤད།)

བཅུ་གཅིག།

ངེས་པར་དུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་དུ་སྐྱོད་རྒྱུ་རྒྱུན་འཁྱོངས་བྱས་ཏེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་ཆད་མེད་པར་རྒྱུན་འཁྱོངས་དང་འཕེལ་རྒྱས་གཏོང་དགོས། སྒྱུར་བཅོས་སྒོ་འབྱེད་བྱས་པའི་ལོ་ངོ་40རིང་གི་ལག་ལེན་དངོས་ཀྱི་ཐོག་ནས་ང་ཚོར་ཁ་ཕྱོགས་ཀྱིས་མདུན་ལམ་ཐག་གཅོད་བྱེད་པ་དང་། འགྲོ་ལམ་གྱིས་ལས་དབང་ཐག་གཅོད་བྱེད་པས། ང་ཚོས་རང་གི་ལས་དབང་རང་ཉིད་ཀྱི་ལག་ཏུ་འཛིན་འདོད་ན། ཕུགས་བསམ་མི་འདོར་བ་དང་། འགྲོ་ལམ་མི་བསྒྱུར་བའི་བློ་རྩ་བརྟན་པོ་ཡོད་དགོས་པའི་བློ་སྐྱེད་བྱུང་ཡོད། སྒྱུར་བཅོས་སྒོ་འབྱེད་བྱས་ནས་ལོ་ངོ་40འདས་རིང་དུ། ང་ཚོའི་ཏང་གི་རིགས་པའི་གཞུང་ལུགས་དང་ལག་ལེན་ཡོད་ཚད་ཀྱི་བརྗོད་བྱ་གཙོ་བོ་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏོང་རྒྱུ་དེ་ཡིན། ལོ་ངོ་5000ལྷག་རིང་གི་ཤེས་དཔལ་དར་བའི་ལོ་རྒྱུས་དང་། མི་འབོར་དུང་ཕྱུར་13ལྷག་ཡོད་པའི་ཀྲུང་གོ་འདི་འདྲའི་རྒྱལ་ཁབ་ཆེན་པོ་ཞིག་ཏུ་སྒྱུར་བཅོས་དང་འཕེལ་རྒྱས་དོན་གཉེར་བྱེད་པ་ལ། བསྙོན་མེད་ཁུངས་བཙན་དུ་འཛིན་ཆོག་པའི་བསླབ་གཞི་གང་ཡང་མེད་ལ། ཀྲུང་གོའི་མི་དམངས་ལ་དབང་ཡོད་བཀོད་འདོམས་ཐུབ་མཁན་གྱི་སློབ་དཔོན་ཡང་མེད། སྐུ་ཞབས་ལུའུ་ཞུན་གྱིས་“གང་འདྲ་ཞིག་ལ་ལམ་ཟེར་རམ་ཞེ་ན། དེ་ནི་ལམ་མེད་སར་རྐང་པ་བཀྱག་ནས་བྱུང་བ་ཞིག་དང་། ཚེར་མས་ཁེངས་པའི་ས་ཐོག་བཏོད་ནས་བྱུང་བ་ཞིག་རེད་”ཅེས་གསུངས་ཡོད། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་ནི་དེང་རབས་ཀྲུང་གོས་གོམ་སྟབས་ཆེན་པོས་དུས་རབས་ཀྱི་རྗེས་ཟིན་པ་དང་། དུས་རབས་འཕེལ་རྒྱས་ཀྱི་སྣེ་འཁྲིད་པའི་འགྲོ་ལམ་ཆེན་པོ་ཞིག་ཡིན་པས། ངེས་པར་གཡོ་འགུལ་སྤུ་ཙམ་མེད་པར་སྐྱོད་དགོས།

(2018ལོའི་ཟླ་12ཚེས་18ཉིན་སྒྱུར་བཅོས་སྒོ་འབྱེད་བྱས་ནས་ལོ་ངོ་40འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད་ཀྱི་ཆ་ཤས་ཤིག་ཡིན།)

བཅུ་གཉིས།

ངས་ལྷམ་གོག་རྐང་པར་རན་མིན་དེ་གྱོན་མཁན་རང་ཁོ་ནས་ཤེས་ཀྱི་རེད་ལ། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་བཟང་མིན་དང་ཁྱད་འཕགས་ཡིན་མིན་དེ་ཀྲུང་གོའི་མི་དམངས་ཀྱིས་གསལ་ཐག་ཆོད་པ་ཞིག་ཤེས་ལ་སྐད་ཆ་ཤོད་དབང་ཆེ་ཤོས་ཀྱང་ཁོང་ཚོར་ཡོད་པ་རེད་ཅེས་ཡང་དང་ཡང་དུ་བཤད་ཀྱི་ཡོད། ཆབ་སྲིད་ཀྱི་གནད་དོན་གལ་ཆེན་འདིའི་ཐད་ང་ཚོར་ངེས་པར་དུ་ངེས་ཤུགས་དང་རང་གི་ལྟ་ཚུལ་ཡོད་དགོས་པ་ལས། རང་གི་ལྟ་བ་གཏན་ནས་འདོར་མི་རུང་ལ་རང་ཚུགས་གཏན་ནས་ཤོར་མི་རུང་བ་རེད། ཏང་ཡོངས་ཀྱི་བློ་མཐུན་ཡོངས་དང་ལྷག་པར་དུ་རིམ་པ་ཁག་གི་འགོ་ཁྲིད་ལས་བྱེད་པས་ཆབ་སྲིད་ཐོག་མི་གོ་ཤེས་ཅན་ཞིག་བྱེད་པའི་ཚེ། གལ་གནད་ཆེ་ཤོས་ཤིག་ནི་དུས་དང་རྣམ་པ་ཀུན་ཏུ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་བརྟན་པོར་བསྐྱེད་དེ། དངོས་གནས་“འཇིགས་པ་ཀུན་གྱིས་མི་གནོན་པས། །ཕྱོགས་ཀྱི་རླུང་ནག་བཏང་སྙོམས་འཇོག་”ཅེས་པ་ལྟ་བུ་ཞིག་བྱེད་ཐུབ་དགོས་པ་དེ་ཡིན།

(2019ལོའི་ཟླ་10ཚེས་31ཉིན་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཚང་འཛོམས་གྲོས་ཚོགས་ཐེངས་གཉིས་པའི་ཐོག་གནང་བའི་གསུང་བཤད།)

བཅུ་གསུམ།

དད་མོས་དང་དད་སེམས་ནི་དུས་དང་རྣམ་པ་ཀུན་ཏུ་གལ་ཆེན་ཡིན། གུང་ཁྲན་རིང་ལུགས་ལ་དད་མོས་བྱེད་པ་དང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལ་དད་སེམས་འཆང་བ་ནི་གུང་ཁྲན་ཏང་མིའི་ཆབ་སྲིད་ཀྱི་བླ་སྲོག་ལྟ་བུ་དང་། གུང་ཁྲན་ཏང་མིས་ཉམས་སད་གང་ཡོད་ཐེག་ཐུབ་པའི་བསམ་པའི་ཀ་རྟེན་ལྟ་བུ་ཡིན། དུས་རབས་གསར་པར་དད་མོས་དང་དད་སེམས་བརྟན་པོ་ཡོང་བར་གལ་ཆེ་ཤོས་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་བརྟན་པོ་ཡོང་བ་བྱ་རྒྱུ་དེ་རེད། ཏང་གི་ལོ་བརྒྱའི་འབད་འཐབ་ལོ་རྒྱུས་དང་གྲུབ་འབྲས་རླབས་པོ་ཆེ་ནི་ང་ཚོས་“གདེང་ཚོད་བཞི་”ཆེ་རུ་གཏོང་བའི་རྨང་གཞི་བརྟན་པོ་ཞིག་ཡིན།

(2021ལོའི་ཟླ་2ཚེས་20ཉིན་ཏང་གི་ལོ་རྒྱུས་སློབ་སྦྱོང་དང་སློབ་གསོའི་སྐུལ་སློང་ཚོགས་ཆེན་ཐོག་གནང་བའི་གསུང་བཤད།)

བཅུ་བཞི།

རང་ཉིད་ཀྱི་འགྲོ་ལམ་དུ་སྐྱོད་དགོས་པ་དེ་ནི་ཏང་གི་རིགས་པའི་གཞུང་ལུགས་དང་ལག་ལེན་ཡོད་ཚད་ཀྱི་གཞི་ཚུགས་ས་ཡིན་པ་དང་། དེ་བས་ཀྱང་ཏང་གི་ལོ་བརྒྱའི་འབད་འཐབ་ལས་བྱུང་བའི་ལོ་རྒྱུས་ཀྱི་སྡོམ་ཚིག་ཡིན། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ནི་ཏང་དང་མི་དམངས་ཀྱིས་དཀའ་བ་ཆེན་པོ་སྤྱད་ཅིང་རིན་དོད་ཆེན་པོ་བཏང་ནས་ཐོབ་པའི་གཞི་རྩའི་གྲུབ་འབྲས་ཡིན་པ་དང་། ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པའི་འགྲོ་ལམ་ཡང་དག་དེ་ཡིན། ང་ཚོས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་སུ་བཏང་སྟེ་དངོས་པོའི་དཔལ་ཡོན་དང་། ཆབ་སྲིད་ཀྱི་དཔལ་ཡོན། བསམ་པའི་དཔལ་ཡོན། སྤྱི་ཚོགས་ཀྱི་དཔལ་ཡོན། སྐྱེ་ཁམས་ཀྱི་དཔལ་ཡོན་བཅས་མཐུན་སྦྱོར་འཕེལ་རྒྱས་ཡོང་བར་སྐུལ་འདེད་བཏང་བར་བརྟེན། ཀྲུང་གོའི་ལུགས་ཀྱི་དེང་རབས་ཅན་གྱི་འགྲོ་ལམ་གསར་པ་བཏོད་ཡོད་པ་དང་། མིའི་རིགས་ཀྱི་ཤེས་དཔལ་གྱི་དཔེ་རྣམ་གསར་པ་བཏོད་ཡོད།

(2021ལོའི་ཟླ་7ཚེས་1ཉིན་ཀྲུང་གོའི་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད།)

བཅོ་ལྔ།

ཀྲུང་ཧྭ་མི་རིགས་ལ་ལོ་ངོ་5000ལྷག་གི་ལོ་རྒྱུས་འཕེལ་རིམ་ལས་བྱུང་བའི་གཟི་དཔལ་ལྡན་པའི་ཤེས་རིག་མངའ་བ་དང་། ཀྲུང་གོའི་གུང་ཁྲན་ཏང་ལ་ལོ་ངོ་བརྒྱའི་འབད་འཐབ་ཀྱི་ལག་ལེན་དང་ལོ་ངོ་70ལྷག་གི་རྒྱལ་སྲིད་སྐྱོང་བའི་ཉམས་མྱོང་ལྡན། ང་ཚོས་མིའི་རིགས་ཀྱི་ཤེས་དཔལ་གྱི་དགེ་མཚན་ཅན་གྱི་གྲུབ་འབྲས་ཡོད་ཚད་ལ་ཧུར་ཐག་གིས་སློབ་སྦྱོང་དང་དཔེ་ལྟ་བྱ་རྒྱུ་ཡིན་པ་དང་། ཕན་ཐོགས་ཡོད་པའི་གྲོས་གཞི་དང་སེམས་བཟང་གི་སྐྱོན་བརྗོད་བྱུང་ཚད་ལ་དགའ་བསུ་ཞུ་རྒྱུ་ཡིན་མོད། འོན་ཀྱང་“སློབ་དཔོན་”ཟོལ་གྱིས་བཀའ་བཀོད་དང་ལུང་ཁྲིད་རྫིག་རྫིག་བྱེད་པ་གཏན་ནས་ཁས་ལེན་གྱི་མིན། ཀྲུང་གོའི་གུང་ཁྲན་ཏང་དང་ཀྲུང་གོའི་མི་དམངས་ནི་རང་ཉིད་ཀྱིས་བདམས་པའི་འགྲོ་ལམ་ཐོག་གོམ་སྟབས་ཆེན་པོས་མདུན་སྐྱོད་བྱ་རྒྱུ་ཡིན་པ་དང་། ཀྲུང་གོའི་ཡར་རྒྱས་གོང་འཕེལ་གྱི་ལས་དབང་དེ་རང་ཉིད་ཀྱི་ལག་ཏུ་དམ་པོར་འཛིན་རྒྱུ་ཡིན།

(2021ལོའི་ཟླ་7ཚེས་1ཉིན་ཀྲུང་གོའི་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད།)

བཅུ་དྲུག།

རྒྱུགས་སྤྲོད་ལམ་གསར་ལ་ཆས་ཏེ་ང་ཚོས་མུ་མཐུད་དེ་རྒྱུགས་འབྲས་གཡུར་དུ་ཟ་བ་ལོན་ཐུབ་མིན་གྱི་གནད་འགག་ནི་ལོ་རྒྱུས་ཀྱི་གདེང་ཚོད་བརྟན་པོ་ཡོད་མེད་ལ་ཐུག་ཡོད། ལོ་བརྒྱའི་རིང་ལ། ང་ཚོའི་ཏང་གིས་ཀྲུང་གོའི་མི་དམངས་ལ་བདེ་སྐྱིད་སྐྲུན་པ་དང་ཀྲུང་ཧྭ་མི་རིགས་བསྐྱར་དར་ཡོང་བའི་ལས་ལ་གཞོལ་བ་དང་། མིའི་རིགས་ཡར་ཐོན་ཡོང་བ་དང་འཛམ་གླིང་ལ་སྤྱི་སྙོམས་ཆེན་པོ་ཡོང་བའི་ལས་ལ་གཞོལ་ཡོད་ཅིང་། གནམ་འོག་སྤྱི་ལ་དབང་བ་དང་མི་ཡུལ་གྱི་ལམ་བཟང་ཡང་དག་པ་འདི་ནི་ང་ཚོའི་ཏང་ལ་ལོ་རྒྱུས་ཀྱི་གདེང་ཚོད་ལྡན་པའི་གཏིང་ཤུགས་ཆེ་ཤོས་ཡིན་པ་དང་། ང་ཚོའི་ཏང་གིས་ཀྲུང་གོར་སྲིད་དབང་སྐྱོང་བར་མ་ཟད་དུས་ཡུན་རིང་པོར་སྲིད་དབང་སྐྱོང་བའི་ལོ་རྒྱུས་ཀྱི་གདེང་ཚོད་ཡིན་ལ། ང་ཚོའི་ཏང་གིས་མི་དམངས་ལ་མཐུན་སྒྲིལ་དང་སྣེ་ཁྲིད་བྱས་ཏེ་མུ་མཐུད་མདུན་སྐྱོད་བྱེད་པའི་ལོ་རྒྱུས་ཀྱི་གདེང་ཚོད་ཀྱང་ཡིན། དུས་དེ་རིང་ང་ཚོས་ཀྲུང་གོའི་གུང་ཁྲན་ཏང་གིས་ལོ་རྒྱུས་དང་མི་དམངས་ཀྱི་གདམ་ག་སྟོང་ཟད་དུ་བཏང་མེད་ཅེས་བཤད་ཆོག་ཆོག་ཡིན།

(2021ལོའི་ཟླ་12ཚེས་27ཉིན་དང་28ཉིན་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཏང་གི་ལོ་རྒྱུས་སློབ་སྦྱོང་དང་སློབ་གསོའི་ཆེད་དོན་དམངས་གཙོའི་འཚོ་བའི་ཚོགས་འདུ་གཙོ་སྐྱོང་མཛད་སྐབས་གནང་བའི་གསུང་བཤད།)

བཅུ་བདུན།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ངས་ས་གནས་སུ་རྟོག་ཞིབ་ཐེངས་70ལྷག་སོང་བ་ཡིན། ས་ཆ་ཚང་མར་ངས་ཏང་ལ་ལོ་རྒྱུས་ཀྱི་དོན་སྙིང་གལ་ཆེན་ལྡན་པའི་གསར་བརྗེའི་གནས་མཆོག་དང་། དམར་པོའི་གནས་རྙིང་། གསར་བརྗེའི་ལོ་རྒྱུས་ཀྱི་དྲན་གསོའི་གནས་ཡུལ་བཅས་ལ་མཇལ་བ་དང་། ལ་ལ་ནི་ཆེད་དུ་གསར་བརྗེའི་གནས་རྙིང་དང་དྲན་གསོའི་གནས་ཡུལ་ལ་མཇལ་བ་དང་། གནས་ཡུལ་གཙོ་བོ་རྣམས་ཕལ་ཆེར་མཇལ་ཚར་ཡོད། ས་ཆ་གང་ཞིག་ཏུ་སླེབས་སྐབས་ངས་གུས་བཀུར་གྱི་བསམ་པ་བཅངས་ནས་སྤྱིར་བཏང་མ་ཡིན་པའི་ལོ་ཟླ་དེ་དག་བསྐྱར་དྲན་བྱས་པ་དང་ཏང་གི་དཀའ་ཚེགས་ཆེ་བའི་ལོ་རྒྱུས་ལ་ཕྱིར་མིག་བལྟས་ཚེ། རྣམ་ཤེས་ལ་སྒུལ་ཤུགས་ཐེངས་གཅིག་ཐེབས་པ་དང་བསམ་བློ་ལ་གཙང་ཁྲུས་ཐེངས་གཅིག་བྱེད་པ་ཡིན། ངས་དེ་ལྟར་བྱེད་པའི་དམིགས་ཡུལ་ནི་ཏང་ཡོངས་དང་རྒྱལ་ཡོངས་དང་། ལྷག་པར་དུ་རྒྱ་ཆེའི་གཞོན་ནུ་ལོ་ཆུང་རྣམས་ཀྱིས་ཏང་གི་ལོ་རྒྱུས་སློབ་སྦྱོང་དང་ཏང་གི་ལོ་རྒྱུས་བློ་ལ་བརྟན་པོར་ངེས་པར་སྐུལ་འདེད་གཏོང་བ་དང་། ཁ་སང་གི་དཀའ་སྡུག་དང་འོད་སྟོང་བརྗེད་མི་རུང་ཞིང་། དེ་རིང་གི་འགན་འཁྲི་འཁུར་བར་ངོ་གནོང་མི་དགོས་པ། འབྱུང་འགྱུར་གྱི་ཕུགས་འདུན་རླབས་པོ་ཆེ་སྟོང་ཟད་དུ་མི་གཏོང་བ། དོན་དངོས་ཐོག་ལོ་རྒྱུས་མེ་ལོང་དུ་འཛིན་པ་དང་འབྱུང་འགྱུར་གསར་སྐྲུན་བྱེད་པ། ལོ་རྒྱུས་ཀྱི་གདེང་ཚོད་བརྟན་པོ་ཡོད་པ་བཅས་བྱེད་ཆེད་ཡིན། ང་ཚོས་རྒྱུན་འཁྱོངས་ལྷོད་མེད་ཀྱིས་དེ་ལྟར་བྱས་ན་ཕན་འབྲས་མངོན་གསལ་དོད་པོ་འཐོབ་ངེས་རེད།

(2022ལོའི་ཟླ་1ཚེས་11ཉིན་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བསྟར་བའི་ཆེད་དོན་ཞིབ་གྲོས་འཛིན་གྲྭའི་ཐོག་གནང་བའི་གསུང་བཤད།)

བཅོ་བརྒྱད།

ཀྲུང་གོའི་གུང་ཁྲན་ཏང་མི་ནི་ལོ་རྒྱུས་དོན་སྟོང་རིང་ལུགས་པ་དང་རིག་གནས་དོན་སྟོང་རིང་ལུགས་པ་མིན་པས། རང་རྒྱུད་བརྗེད་ཅིང་རང་ལུགས་དོར་མི་རུང་། རིམ་པ་ཁག་གི་འགོ་ཁྲིད་ལས་བྱེད་པ་ཚང་མས་ལོ་རྒྱུས་དང་ཕུལ་བྱུང་སྲོལ་རྒྱུན་རིག་གནས་ལ་གུས་བཀུར་བྱེད་པ་དང་། རིག་དངོས་སྲུང་སྐྱོབ་བེད་སྤྱོད་དང་རིག་གནས་ཤུལ་བཞག་སྲུང་སྐྱོབ་རྒྱུན་འཛིན་ལས་དོན་ལ་མཐོང་ཆེན་བྱས་ནས་ལོ་རྒྱུས་དང་གནའ་རྫས་རྟོག་ཞིབ་ལས་དོན་པར་ཞིབ་འཇུག་དང་། སློབ་སྦྱོང་ཟབ་སྤེལ། ཞིབ་སློབ་སྤེལ་རེས་བཅས་བྱེད་པར་སྲིད་ཇུས་ཀྱི་རྒྱབ་སྐྱོར་དེ་བས་མང་བ་མཁོ་འདོན་བྱེད་དགོས། ཀྲུང་ཧྭའི་ཤེས་དཔལ་རྒྱུན་འཛིན་བྱེད་པའི་སྤྱི་ཚོགས་ཀྱི་ཁོར་ཡུག་བཟང་པོ་བསྐྲུན་ནས་ཀྲུང་ཧྭའི་ཤེས་དཔལ་གྱི་འབྱུང་ཁུངས་འཚོལ་ཞིབ་ལས་གྲྭ་སོགས་ཀྱི་ཞིབ་འཇུག་གྲུབ་འབྲས་རྒྱ་ཁྱབ་ཏུ་དྲིལ་བསྒྲགས་བྱེད་པ་དང་། མང་ཚོགས་དང་ལྷག་པར་དུ་གཞོན་ནུ་ལོ་ཆུང་རྣམས་ལ་ཀྲུང་ཧྭའི་ཤེས་དཔལ་ལ་ངོས་འཛིན་དང་ཁས་ལེན་སྔར་ལས་ལེགས་པར་བྱེད་དགོས་པའི་སློབ་གསོ་དང་ཁྲིད་སྟོན་བྱས་ཏེ་ཀྲུང་གོ་བ་བྱེད་པའི་བློ་སྟོབས་དང་། སྙིང་རུས། གཏིང་ཤུགས་བཅས་ཆེ་རུ་གཏོང་དགོས།

(2022ལོའི་ཟླ་5ཚེས་27ཉིན་སྐབས་བཅུ་དགུ་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་སོ་དགུ་པའི་ཐོག་གནང་བའི་གསུང་བཤད།)

བཅུ་དགུ།

ངེས་པར་དུ་རང་རྟོན་རང་ཚུགས་རྒྱུན་འཁྱོངས་བྱེད་དགོས། ཀྲུང་གོའི་མི་དམངས་དང་ཀྲུང་ཧྭ་མི་རིགས་ཉེ་རབས་ཚུན་གྱི་སྡུག་བསྔལ་ཆེན་པོའི་གནས་ནས་བསྐྱར་དར་རླབས་པོ་ཆེའི་འོད་སྟོང་འབར་བའི་མདུན་ལྗོངས་ཀྱི་ཕྱོགས་སུ་བསྐྱོད་པ་ལ། དཔེ་ལྟ་སའི་སློབ་དེབ་གཏན་ནས་ཡོད་མ་མྱོང་ལ་སྤྱད་ཆོག་ཆོག་གི་དངོས་ལན་དེ་བས་ཀྱང་མེད། ཏང་གི་ལོ་བརྒྱའི་འབད་འཐབ་ལ་རྒྱལ་ཁ་ཐོབ་པའི་འགྲོ་ལམ་ནི་ཏང་གིས་མི་དམངས་ཀྱི་འགོ་ཁྲིད་དེ་རང་བཙན་རང་བདག་གིས་འཚོལ་ཞིབ་བྱས་ནས་གསར་དུ་བཏོད་པ་ཞིག་ཡིན། མར་ཁེ་སིའི་རིང་ལུགས་ཀྱི་ཀྲུང་གོའི་ལེ་ཚན་ནི་ཀྲུང་གོའི་གུང་ཁྲན་ཏང་མིས་རང་ཉིད་ཀྱི་སྟོབས་ཤུགས་ལ་བརྟེན་ནས་ལག་ལེན་བྱས་ཏེ་བྲིས་པ་ཞིག་ཡིན་ལ། དེའི་ནང་དུ་ཁྱབ་པའི་གཞི་རྩའི་གནད་གཅིག་ནི་ཀྲུང་གོའི་གནད་དོན་ལ་ངེས་པར་དུ་ཀྲུང་གོའི་རྒྱལ་ཁབ་ཀྱི་གཞི་རྩའི་གནས་ཚུལ་གཞིར་བཟུང་ནས་ཀྲུང་གོ་བ་རང་ཉིད་ཀྱིས་ལན་འདེབས་དགོས་པ་དེ་རེད། ང་ཚོས་མར་ཁེ་སིའི་རིང་ལུགས་ལ་བཅངས་པའི་དད་མོས་བརྟན་པོ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལ་བཅངས་པའི་དད་སེམས་བརྟན་པོ་རྒྱུན་འཁྱོངས་བྱེད་པ་དང་། འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་བརྟན་དུ་བཏང་སྟེ། སྔར་ལས་ཧུར་ཐག་གི་ལོ་རྒྱུས་ཀྱི་འགན་འཁྲི་འཁུར་སེམས་དང་གསར་སྐྲུན་སྙིང་སྟོབས་ལ་བརྟེན་ནས་མར་ཁེ་སིའི་རིང་ལུགས་འཕེལ་རྒྱས་གཏོང་བར་བྱས་རྗེས་གསར་པ་འཇོག་དགོས་པ་ལས། འགྱུར་ལྡོག་ལ་བསྟུན་མི་ཤེས་པ་དང་། བཀག་སྡོམ་རེངས་གྱུར་བྱེད་མི་རུང་ལ། འདྲ་སྤོ་འདྲ་བཤུས་དང་ཕྱི་གླིང་གི་ཤེས་རིག་བསླབས་ཀྱང་སྤྱོད་མི་ཤེས་པ་བྱེད་མི་རུང་།

(2022ལོའི་ཟླ་10ཚེས་16ཉིན་ཀྲུང་གོའི་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་ཉི་ཤུ་པའི་ཐོག་གནང་བའི་སྙན་ཞུ།)

ཉི་ཤུ།

ཀྲུང་གོའི་ལུགས་ཀྱི་དེང་རབས་ཅན་ལ་དངོས་པོའི་རྒྱུ་ནོར་ཕུན་སུམ་ཚོགས་པོ་ཡོང་བ་བྱེད་དགོས་ལ། བསམ་པའི་རྒྱུ་ནོར་ཡང་ཕུན་སུམ་ཚོགས་པོ་ཡོང་བ་དང་། བསམ་བློ་དང་རིག་གནས་ཐད་གདེང་ཚོད་དང་རང་སྟོབས་ཆེ་རུ་གཏོང་དགོས།

(2023ལོའི་ཟླ་2ཚེས་7ཉིན་གསར་དུ་བདམས་ཐོན་བྱུང་བའི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོ་བཅས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བསྟར་བའི་ཞིབ་གྲོས་འཛིན་གྲྭའི་ཐོག་གནང་བའི་གསུང་བཤད།)

ཉེར་གཅིག།

ཀྲུང་གོའི་ལུགས་ཀྱི་དེང་རབས་ཅན་ནི་རང་བཙན་རང་བདག་དང་རང་སྟོབས་རང་སྤེལ་རྒྱུན་འཁྱོངས་བྱེད་པ་དང་། མི་དམངས་ཡོངས་ཀྱི་དཀའ་སྤྱད་ངལ་རྩོལ་དང་གསར་གཏོད་གསར་སྐྲུན་ལ་བརྟེན་ནས་རང་ཉིད་འཕེལ་རྒྱས་དང་སྟོབས་ཆེར་གཏོང་བ། ནང་སྐྱེས་སྒུལ་ཤུགས་སྐུལ་སྤེལ་དང་ཞི་བདེའི་ངང་ཕྱི་རོལ་གྱི་ཐོན་ཁུངས་བེད་སྤྱོད་ཟུང་འབྲེལ་བྱེད་པའི་བྱེད་ཐབས་ལ་བརྟེན་ནས་རྒྱལ་ཁབ་འཕེལ་རྒྱས་མངོན་འགྱུར་བྱེད་པ་ཞིག་ཡིན། རྣམ་པ་གང་རུང་གི་ཐོག་ནས་མི་རིགས་གཞན་ལ་གཉའ་གནོན་དང་རྒྱལ་ཁབ་གཞན་གྱི་ཐོན་ཁུངས་དང་རྒྱུ་ནོར་འཕྲོག་བཅོམ་མི་བྱེད་པར་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་རང་ནུས་གང་ལྕོགས་ཀྱིས་རྒྱབ་སྐྱོར་དང་རོགས་རམ་བྱེད་པ་ཡིན།

(2023ལོའི་ཟླ་2ཚེས་7ཉིན་གསར་དུ་བདམས་ཐོན་བྱུང་བའི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོ་བཅས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བསྟར་བའི་ཞིབ་གྲོས་འཛིན་གྲྭའི་ཐོག་གནང་བའི་གསུང་བཤད།)

ཉེར་གཉིས།

ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་ངེས་པར་དུ་རང་བཙན་རང་བདག་དང་རང་ཚུགས་རང་དར་རྒྱུན་འཁྱོངས་དང་། རྒྱལ་ཁབ་དང་མི་རིགས་འཕེལ་རྒྱས་གཏོང་རྒྱུ་དེ་རང་ཉིད་ཀྱི་སྟོབས་ཤུགས་ཀྱི་གཞི་གནས་ཐོག་འཇོག་རྒྱུ་རྒྱུན་འཁྱོངས། རང་རྒྱལ་འཕེལ་རྒྱས་དང་ཡར་ཐོན་གྱི་ལས་དབང་དེ་རང་ཉིད་ཀྱི་ལག་ཏུ་དམ་པོར་འཛིན་རྒྱུ་རྒྱུན་འཁྱོངས་བཅས་བྱེད་དགོས།

(2023ལོའི་ཟླ་2ཚེས་7ཉིན་གསར་དུ་བདམས་ཐོན་བྱུང་བའི་ཀྲུང་དབྱང་ཨུ་ཡོན་ལྷན་ཁང་གི་ཨུ་ཡོན་དང་རྗེས་སྣོན་ཨུ་ཡོན། ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོ་བཅས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་ལེན་མཐར་ཕྱིན་བསྟར་བའི་ཞིབ་གྲོས་འཛིན་གྲྭའི་ཐོག་གནང་བའི་གསུང་བཤད།)

ཉེར་གསུམ།

རང་ལ་གདེང་ཚོད་ཡོད་ན་གཞི་ནས་རང་སྟོབས་ཆེ་རུ་གཏོང་ཐུབ། རིག་གནས་ཀྱི་གདེང་ཚོད་ཡོད་པའི་མི་རིགས་ཤིག་ཡིན་ཚེ་གཞི་ནས་ཡར་ལངས་ཐུབ་པ་དང་། བརྟན་པོར་ལངས་ཐུབ་པ། རྒྱང་རིང་དུ་འགྲོ་ཐུབ་པ་བཅས་ཡིན། ཀྲུང་ཧྭའི་ཤེས་དཔལ་དེ་ལོ་ངོ་སྟོང་ཕྲག་ཁ་ཤས་བརྒྱུད་ཀྱང་རྒྱུན་ཆད་མེད་པ་དང་། དཀའ་སྡུག་ཡང་ཡང་འཕྲད་ཀྱང་དུས་ཡུན་རིང་པོར་ཉམས་པ་མེད་པ་དེ་ནི་མིའི་རིགས་ཀྱི་ཤེས་དཔལ་གྱི་ངོ་མཚར་ཞིག་ཡིན་ལ། ང་ཚོའི་གདེང་ཚོད་ཀྱི་རྨང་གཞི་ཞིག་ཀྱང་ཡིན། རིག་གནས་ཀྱི་གདེང་ཚོད་བརྟན་པོ་ཡོད་པ་ནི་རང་ཉིད་ཀྱི་འགྲོ་ལམ་དུ་སྐྱོད་རྒྱུ་རྒྱུན་འཁྱོངས་བྱེད་པ་དེ་ཡིན། རིག་གནས་ཀྱི་གདེང་ཚོད་བརྟན་པོ་ཡོད་པའི་ལས་འགན་ཨང་དང་པོ་ནི་ཀྲུང་ཧྭ་མི་རིགས་ཀྱི་ལོ་རྒྱུས་ལག་ལེན་དང་དེང་རབས་ལག་ལེན་རླབས་པོ་ཆེ་ལ་གཞི་ཚུགས་པ་དང་། ཀྲུང་གོའི་གནས་ལུགས་ལ་བརྟེན་ནས་ཀྲུང་གོའི་ཉམས་མྱོང་ཕྱོགས་བསྡོམས་ཡག་པོ་བྱས་ཏེ་ཀྲུང་གོའི་ཉམས་མྱོང་དེ་ཀྲུང་གོའི་རིགས་པའི་གཞུང་ལུགས་སུ་མཐོར་འདེགས་བྱེད་ཅིང་། ལུང་ཚིག་སྣ་ཚོགས་ལ་རྨོངས་ཚོད་ཀྱིས་མི་བསྟུན་ལ་ཕྱི་རྒྱལ་གྱི་རིགས་པའི་གཞུང་ལུགས་ལད་ཟློས་ཀྱང་མི་བྱེད་པར་བསམ་པའི་ཐོག་རང་བཙན་རང་བདག་མངོན་འགྱུར་ཡོང་བ་བྱ་རྒྱུ་དེ་རེད། རིག་གནས་ཀྱི་གདེང་ཚོད་དེ་མི་རིགས་ཡོངས་ཀྱི་བསམ་བློའི་གཤིས་ཀ་དང་རིག་གནས་གཤིས་རྒྱུད་ནང་འདྲེས་པར་བྱས་ཏེ། ཡར་རྒྱས་གོང་འཕེལ་གྱི་ཉམས་འགྱུར་དང་དྲན་ཤེས་ཞི་དུལ་གྱི་སེམས་ཁམས་ཆགས་པར་བྱེད་དགོས།

(2023ལོའི་ཟླ་6ཚེས་2ཉིན་རིག་གནས་རྒྱུན་འཛིན་དང་འཕེལ་རྒྱས་ཀྱི་བཞུགས་མོལ་ཚོགས་འདུའི་ཐོག་གནང་བའི་གསུང་བཤད།)

ཉེར་བཞི།

ང་ཚོས་ངེས་པར་དུ་ཏང་དང་རྒྱལ་ཁབ་འཛུགས་པ་དང་། ཏང་དང་རྒྱལ་ཁབ་དར་བའི་རྩ་བར་གྱུར་པའི་མར་ཁེ་སིའི་རིང་ལུགས་འདི་ཉིད་རྒྱུན་འཁྱོངས་དང་། རང་རྒྱལ་ཁབ་དང་རང་མི་རིགས་ཀྱི་གཤིན་སར་རྩ་བ་ཚུགས་པའི་མར་ཁེ་སིའི་རིང་ལུགས་འཕེལ་རྒྱས་ཀྱི་གོམ་མཚམས་མི་འཇོག་པ་རྒྱུན་འཁྱོངས། ལོ་རྒྱུས་ཀྱི་གདེང་ཚོད་དང་རིག་གནས་ཀྱི་གདེང་ཚོད་བརྟན་པོར་གཏོང་བ། གནའ་བཟང་དེང་སྤྱོད་དང་རྙིང་དོར་གསར་སྤེལ་རྒྱུན་འཁྱོངས་བཅས་བྱེད་ཅིང་། མར་ཁེ་སིའི་རིང་ལུགས་སློབ་སྟོན་དུ་བཟུང་ནས་ཀྲུང་ཧྭའི་ལོ་ངོ་5000ལྷག་རིང་གི་ཤེས་དཔལ་གྱི་བང་མཛོད་ཕྱོགས་ཡོངས་ནས་སྔོག་འདོན་དང་། མར་ཁེ་སིའི་རིང་ལུགས་ལ་བརྟེན་ནས་ཀྲུང་ཧྭའི་སྲོལ་རྒྱུན་རིག་གནས་ནང་གི་གསོན་ཤུགས་ཀྱིས་ཕྱུག་པའི་ཕུལ་བྱུང་རྐྱེན་ཆ་སྐུལ་སློང་བྱེད་པ་དང་དེ་ལ་དུས་རབས་ཀྱི་ནང་དོན་གསར་པ་སྣོན་ཞིང་། ཀྲུང་ཧྭ་མི་རིགས་ཀྱི་སྙིང་སྟོབས་རླབས་པོ་ཆེ་དང་ཕུན་སུམ་ཚོགས་པའི་བློ་གྲོས་སྔར་ལས་གཏིང་ཟབ་པའི་སྒོ་ནས་མར་ཁེ་སིའི་རིང་ལུགས་སུ་འདྲེས་སྦྱོར་བྱེད་པ་དང་། མར་ཁེ་སིའི་རིང་ལུགས་ཀྱི་བསམ་བློའི་སྙིང་བཅུད་དང་ཀྲུང་ཧྭའི་སྲོལ་རྒྱུན་རིག་གནས་ཀྱི་སྙིང་བཅུད་ཕན་ནུས་ལྡན་པའི་སྒོ་ནས་འབྲེལ་མཐུད་བྱས་ཏེ་རིགས་པའི་གཞུང་ལུགས་ཀྱི་དགེ་མཚན་གསར་པར་འགྱུར་བ་བྱས་ནས་བསམ་བློའི་ཡང་རྩེ་གསར་པར་ཟམ་མི་འཆད་པར་འཛེག་དགོས།

(2023ལོའི་ཟླ་6ཚེས་30ཉིན་སྐབས་ཉི་ཤུ་པའི་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་དྲུག་པའི་ཐོག་གནང་བའི་གསུང་བཤད།)

ཉེར་ལྔ།

རིགས་པའི་གཞུང་ལུགས་སྟོབས་ཆེ་ན་གཞི་ནས་ཁ་ཕྱོགས་གསལ་བ་དང་། མི་སེམས་མཐུན་པ། བློ་ཤུགས་བརྟན་པ་བཅས་ཡོང་ཐུབ། བརྗོད་དོན་གཙོ་བོའི་སློབ་གསོའི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་། རྒྱུན་འཁྱོངས་ལྷོད་མེད་ཀྱིས་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པར་བརྟེན་ནས་བླ་སྲོག་གཏོད་པ། མར་ཁེ་སིའི་རིང་ལུགས་ཀྱི་ཉེར་མཁོའི་མཐུ་རྩལ་དངོས་འབྲེལ་སྦྱོང་བ། བསམ་བློ་ཚད་མཐོའི་གཅིག་གྱུར་ལ་བརྟེན་ནས་ཆབ་སྲིད་གཅིག་གྱུར་དང་བྱ་སྤྱོད་གཅིག་གྱུར་འགན་ལེན་བཅས་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བ་དང་འཚམ་པའི་ཆབ་སྲིད་ནུས་པ་དང་། འགོ་ཁྲིད་ནུས་པ། ལས་ཀའི་ནུས་པ་བཅས་ཕྱོགས་ཡོངས་ནས་མཐོ་རུ་གཏོང་དགོས། ཏང་གི་གསར་གཏོད་རིགས་པའི་གཞུང་ལུགས་ནང་ནས་སྤོབས་པ་ཆེན་པོས་འབད་བརྩོན་དང་དཔའ་ངར་ཆེན་པོས་མདུན་སྐྱོད་བྱེད་པའི་བསམ་པའི་སྒུལ་ཤུགས་བསྡུ་ལེན་བྱེད་མཁས་པོ་བྱེད་ཅིང་། ལོ་རྒྱུས་ཀྱི་གདེང་ཚོད་བརྟན་པོ་དང་འཐབ་རྩོད་ཀྱི་འཇོན་ནུས་སྦྱོང་བརྡར་བྱས་ནས་ཐོག་མཐའ་བར་གསུམ་དུ་བློ་རྩ་བརྟན་པོས་ཡར་རྒྱས་བརྩོན་ལེན་དང་དཀའ་ངལ་ལ་མི་འཛེམ་པར་མདུན་དུ་སྐྱོད་པའི་འབད་འཐབ་ཀྱི་རྣམ་འགྱུར་ཐོག་ནས་འཐབ་ལམ་གསར་པར་འབད་འབུངས་མདུན་སྐྱོད་དང་དུས་རབས་གསར་པར་བྱས་རྗེས་འཇོག་དགོས།

(2024ལོའི་ཟླ་2ཚེས་28ཉིན་རྒྱལ་ཡོངས་ཀྱི་ལས་བྱེད་པ་ཁག་དྲུག་པའི་སློབ་སྦྱོང་དང་གསོ་སྦྱོང་གི་སློབ་དེབ་ལ་བྲིས་པའི་འགོ་བརྗོད།)

ཉེར་དྲུག།

ཀྲུང་གོའི་དཔལ་འབྱོར་ནི་སྐྱོན་བྲལ་དང་རྒྱུན་མཐུད་ཐུབ་པ་ཞིག་ཡིན། ན་ནིང་ཀྲུང་གོའི་དཔལ་འབྱོར་འཕར་ཚད་འཛམ་གླིང་གི་དཔལ་འབྱོར་དངོས་ཚན་གཙོ་བོའི་ནང་མདུན་གྲལ་དུ་གནས་པ་དང་། འཛམ་གླིང་གི་དཔལ་འབྱོར་འཕར་སྣོན་ལ་ལེགས་སྐྱེས་འབུལ་ཚད་མུ་མཐུད་30%ལས་བརྒལ་ཡོད། དེ་ནི་ཀྲུང་གོའི་མི་དམངས་ཀྱིས་བསྒྲུབས་པ་ཞིག་ཡིན་ལ་རྒྱལ་སྤྱིའི་མཉམ་ལས་དང་ཡང་ཁ་འབྲལ་ཐབས་མེད། ཀྲུང་གོའི་འཕེལ་རྒྱས་དེ་དཀའ་ངལ་དང་འགྲན་སློང་སྣ་ཚོགས་བརྒྱུད་ནས་ད་གཟོད་དེ་རིང་ལ་སླེབས་པ་རེད། སྔོན་ཆད་“ཀྲུང་གོ་ཆག་འཇིག་སྨྲ་བའི་”དབང་གིས་ཆག་འཇིག་ཏུ་བྱུང་མེད་ལ། ད་ལྟའང་“ཀྲུང་གོ་རྩེར་མཐོང་སྨྲ་བའི་”དབང་གིས་རྩེར་མཐོང་དུ་འགྱུར་མི་སྲིད། ང་ཚོས་སྤུས་ཚད་མཐོ་བའི་འཕེལ་རྒྱས་ལ་མུ་མཐུད་སྐུལ་འདེད་གཏོང་བ་དང་ཀྲུང་གོའི་ལུགས་ཀྱི་དེང་རབས་ཅན་ལ་མུ་མཐུད་སྐུལ་འདེད་བཏང་ནས་ཀྲུང་གོའི་མི་དམངས་ལ་རྒྱུན་ཆད་མེད་པར་སྔར་ལས་ལེགས་པའི་འཚོ་བ་སྐྱེལ་དུ་འཇུག་པར་མ་ཟད། འཛམ་གླིང་རྒྱུན་མཐུད་ངང་འཕེལ་རྒྱས་གཏོང་ཆེད་ལེགས་སྐྱེས་དེ་བས་ཆེ་བ་འབུལ་རྒྱུ་ཡིན། ཀྲུང་གོའི་འཕེལ་རྒྱས་ཀྱི་མདུན་ལམ་ནི་འོད་སྟོང་ལྡན་པ་ཞིག་ཡིན། ང་ཚོར་འདི་འདྲའི་བློ་སྟོབས་དང་གདེང་ཚོད་ཡོད།

(2024ལོའི་ཟླ་3ཚེས་27ཉིན་ཨ་རིའི་བཟོ་ཚོང་ལས་རིགས་དང་འཐབ་ཇུས་རིག་གཞུང་ལས་རིགས་ཀྱི་འཐུས་མི་དང་མཉམ་དུ་མཇལ་འཛོམས་གནང་སྐབས་ཀྱི་གསུང་བཤད།)

རྟ་མགྲིན་སྐྱབས་ཀྱིས་བསྒྱུར།