སི་ཁྲོན་བོད་བརྒྱུད་ནང་བསྟན་སློབ་གླིང་གི་ཧུར་ཐག་འབད་བརྩོན་གྱི་ལོ་ངོ་བཞི་བཅུ།

 ལོ་ངོ་བཞི་བཅུའི་མཚར་སྡུག་འོད་དུ་འཚེར། ལོ་ངོ་བཞི་བཅུའི་གྲུབ་འབྲས་གཡུར་དུ་ཟ། 2024ལོར་སི་ཁྲོན་བོད་བརྒྱུད་ནང་བསྟན་སློབ་གླིང་བཙུགས་ནས་ལོ་འཁོར་40ལོན་ཡོད། དེ་བཞིན་2024ལོའི་ཟླ་11པའི་ཚེས་29ཉིན། སི་ཁྲོན་བོད་བརྒྱུད་ནང་བསྟན་སློབ་གླིང་བཙུགས་ནས་ལོ་འཁོར་40ལོན་པའི་བཞུགས་མོལ་ཚོགས་འདུ་ཁྲེང་ཏུའུ་རུ་གཟབ་རྒྱས་ངང་འཚོགས་ཤིང་། གང་ས་གང་དུ་སྤྲོ་སེམས་འཁོལ་བའི་དུས་ཆེན་གྱི་རྣམ་པས་ཁེངས་འདུག

སི་ཁྲོན་བོད་བརྒྱུད་ནང་བསྟན་སློབ་གླིང་བཙུགས་ནས་ལོ་འཁོར་40ལོན་པའི་མུ་འབྲེལ་བྱེད་སྒོ་སྟེ་ཕུལ་བྱུང་མཐར་ཕྱིན་སློབ་མའི་དེབ་གསར་འགྲེམ་སྤེལ་ཚོགས་འདུའི་ཡུལ་དངོས།

སི་ཁྲོན་ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་ཡི་རྒྱུན་ལས་པུའུ་ཀྲང་གཞོན་པ་ཁྲེན་ཆོན་དང་། ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གི་ཡོན་ཀྲང་གཞོན་པ་ཀྲང་པིན་ཚོགས་འདུར་ཞུགས་པར་མ་ཟད་གསུང་བཤད་ཀྱང་གནང་བ་རེད། ཞིང་ཆེན་ཏང་ཨུའི་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ། ཞིང་ཨུའི་བོད་འབྲེལ་གཞུང་དོན་ཁང་གི་ཀྲུའུ་རེན་ཞུས་ཅུན་གྱིས་བཞུགས་མོལ་ཚོགས་འདུ་གཙོ་སྐྱོང་གནང་། ཀྲུང་གོའི་བོད་ལྗོངས་དྲ་བའི་སྤྱི་ཁྱབ་རྩོམ་སྒྲིག་པ་ཀྲོའུ་ཨའེ་མིང་དང་། ཞིང་ཆེན་སྲིད་གཞུང་གི་དྲུང་ཡིག་ཆེན་མོ་གཞོན་པ། ཞིང་ཆེན་ལས་ཁུངས་ལས་དོན་དོ་དམ་ཅུས་ཀྱི་ཅུས་ཀྲང་ཞེ་རྨིན། ཞིང་ཆེན་མི་རིགས་ཆོས་ལུགས་ཨུ་ཡོན་ལྷན་ཁང་གི་རིམ་པ་དང་པོའི་སྐོར་ཞིབ་པ་ཚུའེ་ཡུས་ཧྥེང་། སི་ཁྲོན་བོད་བརྒྱུད་ནང་བསྟན་སློབ་གླིང་གི་གླིང་གཙོ་རྒྱལ་བསྟན་བློ་བཟང་བྱམས་པ། སི་ཁྲོན་བོད་བརྒྱུད་ནང་བསྟན་སློབ་གླིང་གི་ཏང་ཙུའུ་ཧྲུའུ་ཅི། རྒྱུན་ལས་ཡོན་ཀྲང་གཞོན་པ་མཱ་ཡོན། ཞིང་ཆེན་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་སུའུ་ཆོན་བཅས་བཞུགས་མོལ་ཚོགས་འདུར་ཞུགས།

སི་ཁྲོན་བོད་བརྒྱུད་ནང་བསྟན་སློབ་གླིང་གི་དཔེ་མཛོད་ཁང་དུ་བོད་བརྒྱུད་ནང་བསྟན་གྱི་བསྟན་བཅོས་དང་དེ་མིན་བོད་རྒྱ་སྐད་གཉིས་ཀྱི་དཔེ་དེབ་མང་པོ་མཆིས་ཤིང་། མིག་སྔར་དཔེ་དེབ་ཁྲི་གཅིག་ལྷག་ཙམ་དང་ཚད་ལྡན་གྱི་གློག་རྡུལ་དཔེ་རྙིང་དང་གློག་རྡུལ་དཔྱད་རྩོམ་གྱི་ཐོན་ཁུངས་ཕུན་སུམ་ཚོགས་པོ་ཉར་ཡོད།

སི་ཁྲོན་བོད་བརྒྱུད་ནང་བསྟན་སློབ་གླིང་བཙུགས་ཚུན། བོད་བརྒྱུད་ནང་བསྟན་གྱི་རྒྱལ་གཅེས་ཆོས་གཅེས་ཀྱི་བྱང་ཚད་མཐོ་བའི་ཤེས་ལྡན་མི་སྣ་འབོར་ཆེན་ཞིག་གསོ་སྐྱོང་བྱས་ནས། སི་ཁྲོན་གྱི་ཁྱད་ཆོས་ལྡན་པ་དང་ས་གནས་རང་གི་དོན་དངོས་དང་མཐུན་པའི་སློབ་གཉེར་ལམ་བུའི་ཐོག་བསྐྱོད་དེ། བོད་བརྒྱུད་ནང་བསྟན་སྐྱོན་བྲལ་ངང་རྒྱུན་འཛིན་བྱ་རྒྱུར་སྐུལ་འདེད་བཏང་བ་དང་། སི་ཁྲོན་གྱི་བོད་འབྲེལ་ཁུལ་དང་རྫོང་གི་སྤྱི་ཚོགས་བརྟན་བརླིང་དང་དཔལ་འབྱོར་དང་སྤྱི་ཚོགས་འཕེལ་རྒྱས་མངོན་འགྱུར་ཡོང་བར་ལེགས་སྐྱེས་གལ་ཆེན་ཕུལ་ཡོད།

སི་ཁྲོན་བོད་བརྒྱུད་ནང་བསྟན་སློབ་གླིང་ལྷ་སྒང་སློབ་ཁུལ་གྱི་སྒོ་བྱང་འགེལ་བའི་མཛད་སྒོ། （1984ལོའི་ཟླ་7པ）

ལོ་ངོ་བཞི་བཅུའི་རིང་། སི་ཁྲོན་བོད་བརྒྱུད་ནང་བསྟན་སློབ་གླིང་གིས་བསམ་ཕོད་ཅིང་བསྒྲུབས་ཕོད་པ། ཚོད་ལྟ་བྱེད་ཕོད་པར་མ་ཟད། རྒྱུན་ཆད་མེད་པར་གསར་འབྱེད་གསར་གཏོད་བྱས་པས་རང་རེའི་ཞིང་ཆེན་གྱི་དེང་རབས་ནང་བསྟན་རིག་པའི་སློབ་གསོའི་སློབ་གླིང་གལ་ཆེན་ཞིག་ཏུ་འཕེལ་རྒྱས་ཕྱིན་ནས། སི་ཁྲོན་བོད་བརྒྱུད་ནང་བསྟན་སློབ་གླིང་སྣེ་འདྲེན་དུ་བྱེད་པ་དང་། རྔ་བ་དང་དཀར་མཛེས་ཡན་ལག་སློབ་གླིང་དང་ལེའང་ཧྲན་སློབ་ཁྲིད་ལྟེ་གནས་གཙོ་གནད་དུ་བྱེད་པ། གཙོ་གནད་དགོན་སྡེ་ཁག་གཅིག་སློབ་རིམ་གྲ་སྒྲིག་འཛིན་གྲྭར་བྱེད་པའི་རིམ་གསུམ་སློབ་གཉེར་མ་ལག་བཙུགས་པ་དང་། ཕུལ་དུ་བྱུང་བའི་བོད་བརྒྱུད་ནང་བསྟན་གྱི་དགེ་འདུན་པ་འབོར་ཆེན་ཞིག་གསོ་སྐྱོང་བྱས་ནས། མིག་མཐོང་ལག་ཟིན་གྱིས་བོད་བརྒྱུད་ནང་བསྟན་ཀྲུང་གོ་ཅན་དུ་འགྱུར་རྒྱུར་སྐུལ་འདེད་ནུས་ལྡན་བཏང་བའི་ཁྲོད་དགེ་མཚན་ལྡན་པའི་ནུས་པ་འདོན་སྤེལ་བྱས་ཡོད།

དཀར་མཛེས་སུ་ཕྱག་བཏབ་པའི་སློབ་ཁུལ་རྙིང་པའི་སློབ་གྲྭའི་འདུ་ཁང་།

ཚོགས་འདུ་གྲོལ་རྗེས། ཚོགས་ཞུགས་སྐུ་མགྲོན་རྣམས་ཀྱིས་འདུ་ཁང་ཆེན་མོ་དང་། སློབ་གྲྭའི་ལོ་རྒྱུས་ཁང་། དཔེ་རིས་འགྲེམས་སྟོན། པར་ལེན་འགྲེམས་སྟོན་བཅས་ལ་གཟིགས་སྐོར་གནང་བར་མ་ཟད། དུས་རིམ་གཉིས་པའི་ལས་གྲྭ་འཛུགས་སྐྲུན་བྱས་ཚུལ་ལ་ལྟ་སྦྱོང་ཡང་གནང་།

 བོད་ལྗོངས་དང་ཀན་སུའུ། མཚོ་སྔོན། ཡུན་ནན། ནང་སོག་སོགས་ཞིང་ཆེན་དང་རང་སྐྱོང་ལྗོངས་ཀྱི་བོད་བརྒྱུད་ནང་བསྟན་སློབ་གླིང་དང་ཡན་ལག་སློབ་གླིང་གི་འགན་འཁུར་བློ་མཐུན་དང་། སི་ཁྲོན་བོད་བརྒྱུད་ནང་བསྟན་སློབ་གླིང་དང་ཡན་ལག་སློབ་གླིང་།（སློབ་ཁྲིད་ལྟེ་གནས།） སི་ཁྲོན་ལྷ་རིག་སློབ་གླིང་། སི་ཁྲོན་གནམ་བདག་ཆོས་ལུགས་མཚན་ཉིད་སློབ་གླིང་།

སི་ཁྲོན་ཇོ་མོ་ནང་བསྟན་སློབ་གླིང་གི་འགན་ཁུར་བློ་མཐུན། ཁྲེང་ཏུའུ་གྲོང་ཁྱེར་དང་རྔ་བ་ཁུལ། དཀར་མཛེས་ཁུལ། ལིའང་ཧྲན་ཁུལ་བཅས་ཀྱི་ཏང་ཨུའི་འཐབ་ཕྱོགས་གཅིག་གྱུར་པུའུ་དང་། མི་རིགས་ཆོས་ལུགས་ཨུ་ལྷན། ནང་བསྟན་མཐུན་ཚོགས་སོགས་འབྲེལ་ཡོད་ལས་ཁུངས་ཀྱི་འགན་ཁུར་བློ་མཐུན། དེ་བཞིན་སི་ཁྲོན་བོད་བརྒྱུད་ནང་བསྟན་ལས་རིགས་ཀྱི་སྐུ་ཚབ་དང་སྤྱི་ཚོགས་ལས་རིགས་ཁག་གི་སྐུ་མགྲོན་མང་པོ་ཐེངས་འདིའི་བཞུགས་མོལ་ཚོགས་འདུར་ཞུགས་པ་རེད།

སི་ཁྲོན་བོད་བརྒྱུད་ནང་བསྟན་སློབ་གླིང་བཙུགས་ནས་ལོ་ངོ་བཞི་བཅུ་འཁོར་བའི་མུ་འབྲེལ་བྱེད་སྒོ་ལས་ཕུལ་བྱུང་མཐར་ཕྱིན་སློབ་མའི་དེབ་གསར་འགྲེམ་སྤེལ་ཚོགས་འདུའི་ཐོག ཕུལ་བྱུང་མཐར་ཕྱིན་སློབ་མ་གཉིས་ཀྱིས་དཔེ་དེབ་གསར་རྩོམ་གྱི་ཉམས་མྱོང་མཉམ་སྤྱོད་བྱས་པ་རེད། 2018ལོའི་འབྲིང་རིམ་ཡོན་གནས་འཛིན་གྲྭའི་རྫ་པ་ཚུལ་ཁྲིམས་ནོར་བུས་བརྩམས་པའི《མདོ་རྒྱུད་བསྟན་བཅོས་ཀུན་གྱི་དགོངས་པ་གཅིག་ཏུ་དྲིལ་ཏེ་ཀུན་གཞི་རྣམ་ཤེས་ལ་དཔྱད་པ།》ཞེས་པ་འདི་ནི་སློབ་གླིང་གི་ཕུལ་བྱུང་སློབ་མའི་མཐར་ཕྱིན་དཔྱད་རྩོམ་ཡིན་ལ། རང་རེའི་ཞིང་ཆེན་གྱིས་རིམ་གསུམ་ཡོན་གནས་ལམ་ལུགས་ཀྱི་དེང་རབས་སློབ་གསོར་སྐུལ་འདེད་བཏང་བའི་ཕུལ་བྱུང་གྲུབ་འབྲས་ཤིག་ཀྱང་ཡིན་པ་རེད། 2014ལོའི་འབྲིང་རིམ་ཡོན་གནས་འཛིན་གྲྭའི་ཆོས་འཛིན་གྱིས་བརྩམས་པའི《དབུ་མེད་ཡིག་གཟུགས་སློབ་དེབ།》ནི་དུས་ཡུན་རིང་པོའི་སློབ་ཁྲིད་ཀྱི་ཉམས་མྱོང་ཕྱོགས་བསྡོམས་དང་ཉིང་བཅུད་བསྡུ་ལེན་བྱས་པ་ཞིག་ཡིན་ལ། ནང་དོན་ཆ་ཚང་ཞིང་བེད་སྤྱོད་ཀྱི་རིན་ཐང་ཆེ་བའི་སློབ་དེབ་ཅིག་ཡིན་པར་མ་ཟད། སློབ་གླིང་གི་ཁྱད་ཆོས་ལྡན་པའི་སློབ་ཚན་མ་ལག་འཛུགས་སྐྱོང་བྱས་པའི་གྲུབ་འབྲས་གལ་ཆེན་ཞིག་ཀྱང་ཡིན་པ་རེད།

དེབ་གསར་གྱི་ནང་དོན་དང་དཔྱད་ཞིབ། སྒྲིག་གཞི་དང་རྗོད་བྱེད་ཚིག་གི་རྣམ་བཞག་སོགས་ཕྱོགས་གང་ཅིའི་ཐད་ནས་རྩོམ་པ་པོའི་ནང་བསྟན་རིག་པའི་ཁྱབ་ཁོངས་ཀྱི་མཁྱེན་རྒྱ་ཟབ་མོ་དང་ཐུན་མོང་མ་ཡིན་པའི་ལྟ་བ་མངོན་པ་དང་། ནང་བསྟན་རིག་པའི་ཆོས་དོན་འཆད་འགྲེལ་ལ་བཀྲག་མདངས་གསར་པ་བསྣན་པས་རིག་གཞུང་ཞིབ་འཇུག་གི་གྲུབ་འབྲས་ཕུལ་དུ་བྱུང་བ་ཞིག་ཡིན་ཞིང་། བོད་ཀྱི་ཡིག་གཟུགས་སློབ་ཚན་ལ་མཚོན་ན་བོད་ཀྱི་ཡིག་གཟུགས་ལ་འཇུག་པར་མེད་དུ་མི་རུང་བའི་དཔེ་དེབ་ཞིག་ཡིན་ལ། བོད་ཀྱི་ཡིག་གཟུགས་ཉམས་པ་སླར་གསོ་དང་མ་ཉམས་གོང་འཕེལ་ལ་དགེ་མཚན་ལྡན་པའི་ནུས་པ་ཐོན་ཡོད་པ་རེད།

ལས་བྱེད་པ་དང་གྲྭ་པའི་བར་གྱི་མཛའ་བརྩེའི་སྤོ་ལོ་འགྲན་སྡུར། 

སི་ཁྲོན་བོད་བརྒྱུད་ནང་བསྟན་སློབ་གླིང་ནི་ཞིང་ཆེན་ཡོངས་ཀྱི་བོད་བརྒྱུད་ནང་བསྟན་ལས་རིགས་ཀྱི་ཆེས་མཐོའི་ཆོས་ལུགས་སློབ་གླིང་ཡིན་པ་དང་། སློབ་གླིང་གིས་བོད་བརྒྱུད་ནང་བསྟན་ཀྲུང་གོ་ཅན་གྱི་ཁ་ཕྱོགས་མཐའ་འཁྱོངས་བྱས་ཏེ་ལོ་མང་རིང་ཕུལ་བྱུང་གྲྭ་བཙུན་གསོ་སྐྱོང་བྱ་རྒྱུར་གཞོལ་ནས་སྲིད་དོན་བསམ་བློ་ཆབ་སྲིད་སློབ་གསོ་དང་། ཆོས་ཁྲིམས་ཆོས་དོན་འཆད་འགྲེལ། ནང་བསྟན་ཞིབ་འཇུག །ཡོན་གནས་སློབ་གསོ་བཅས་གསར་གཏོད་འཕེལ་རྒྱས་བཏང་སྟེ། འབྲས་བུ་གཡུར་དུ་ཟ་བ་བླངས་ཡོད།

མ་འོངས་པར་སི་ཁྲོན་བོད་བརྒྱུད་ནང་བསྟན་སློབ་གླིང་གིས་ཏང་གིས་འགོ་ཁྲིད་རྒྱུན་འཁྱོངས་བྱ་རྒྱུ་དེ་སློབ་གཉེར་གྱི་ཐོག་མཐའ་བར་གསུམ་དུ་ཁྱབ་པ་བྱས་ཏེ་ཆབ་སྲིད་ཐད་བློ་འཁེལ་ཆོག་པ་དང་། ཆོས་ལུགས་ཐད་ཡོན་ཚད་མཐོ་བ། ཀུན་སྤྱོད་ཐད་མང་ཚོགས་ཀྱིས་ཁས་ལེན་ཐོབ་པ། འགག་རྩའི་དུས་སུ་ནུས་པ་ཐོན་ཐུབ་པའི་ཕུལ་བྱུང་གྲྭ་བཙུན་གསོ་སྐྱོང་བྱ་རྒྱུ་དེ་རྩ་བའི་ཁ་ཕྱོགས་སུ་བརྩི་བ་དང་། ཆོས་ཁྲིམས་ཆོས་དོན་འཆད་འགྲེལ་བྱ་རྒྱུ་དེ་ལས་འགན་གལ་ཆེན་དུ་བརྩི་བ། ཡོན་གནས་ཀྱི་ཤུགས་རྐྱེན་ཆེ་རུ་གཏང་རྒྱུ་དེ་འདེགས་སྐྱོར་ནུས་ལྡན་དུ་བརྩི་བ་བཅས་བྱས་ནས། ལས་འགན་འཁུར་ཕོད་པ་དང་། ལས་དོན་ལ་འབད་བརྩོན་བྱས་ཏེ། ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་འཛུགས་སྐྱོང་དང་། ཀྲུང་གོའི་ལུགས་ཀྱི་དེང་རབས་ཅན་གྱིས་ཀྲུང་ཧྭ་མི་རིགས་རླབས་ཆེའི་བསྐྱར་དར་ཡོང་བར་ཁྱོན་ཡོངས་ནས་སྐུལ་འདེད་གཏོང་བར་སྟོབས་ཤུགས་འབུལ་རྒྱུ་ཡིན་པ་རེད། །