གེ་སར་རྒྱལ་པོའི་ཕྲིན་ལས་སྐྱོང་བའི་རིག་པའི་དཔའ་མོ་།རྒྱལ་ཡོངས་གེ་སར་ལས་དོན་འགོ་ཁྲིད་ཚོ་ཆུང་གཞུང་ལས་ཁང་གི་ ཀྲུའུ་རེན་གཞོན་པ་འཇམ་དབྱངས་ཆོས་སྒྲོན།

སྔོན་འགྲོའི་ཞུ་མཆིད།

ང་རང་ཆུང་དུས་ཨ་མྱེ་དིས་ཆུང་དཔལ་ཆེན་གྱི་ཟུར་དུ་སྒྲུང་ངག་སྦྱོང་སྐབས་ནས་རྒན་འཇམ་དབྱངས་ཆོས་སྒྲོན་ལགས་ལ་ཆ་རྒྱུས་ཕྲན་བུ་ཡོད། ལས་ཀར་ཞུགས་རྗེས། ལས་ཀའི་འབྲེལ་བ་དང་རྐྱེན་ཁོང་གིས་བརྩམས་པའི་གེ་སར་རིག་གནས་སྐོར་གྱི་ཕྱག་རྩོམ་དང་འབྲེལ་ཡོད་ཆེད་དེབ་མང་པོ་བཀླགས་པར་མ་ཟད་ཁོང་ལ་ཆེད་དོན་བཅར་འདྲི་ཞིག་ཞུ་རྒྱུའི་འཆར་གཞི་ཡང་བཀོད་པ་ཡིན། འོན་ཀྱང་ས་སྐྱ་ལེགས་བཤད་དུ་ཆུ་ཕྲན་རྟག་ཏུ་ཀུ་ཅོ་སྒྲོག །རྒྱ་མཚོས་ཅ་ཅོ་ག་ལ་སྒྲོག་ཅེས་གསུངས་པ་ལྟར་རྒན་འཇམ་དབྱངས་ཆོས་སྒྲོན་ལགས་ནི་ཧ་ཅང་ཁེངས་སྐྱུང་ཆེ་ཞིང་ཁྱབ་བསྒྲགས་ལ་མི་བརྙེས་པ་ཞིག་ཡིན་པས། ངའི་རེ་བ་ལན་གྲངས་དུ་མ་དང་བླངས་མ་གནང་། ད་ཐེངས་གུས་པས་ཡང་བསྐྱར་རྒན་འཇམ་དབྱངས་ཆོས་སྒྲོན་ལགས་ལ་འབྲེལ་བ་ཞུས་མཐར་ཁོང་ལས་བྲེལ་ཤིན་ཏུ་ཆེ་ཡང་ང་རང་གི་བཅར་འདྲི་དང་ལེན་གནང་སོང་། བཅར་འདྲིའི་ནང་དོན་གཤམ་གསལ།

དྲི་བ་དྲིས་ལན།

གསར་འགོད་པ། རྒན་ལགས་སྐུ་ཁམས་བཟང་། ཐོག་མར་ངེད་གངས་ལྗོངས་ཉི་གཞོན་གྱི་བཅར་འདྲི་དང་ལེན་གནང་བར་ཐུགས་རྗེ་ཆེ་ཞུ། གཤམ་ལ་གུས་པས་ཀློག་པ་པོའི་ཚབ་ཞུས་ནས་ཁྱེད་ལ་དྲི་བ་ཁ་ཤས་ཞུ་རྒྱུ་ཡིན། དེ་ཡང་ཁྱེད་རང་བོད་ཀྱི་རིག་གནས་དར་ཁྱབ་ཤིན་ཏུ་ཆེ་བའི་ཁམས་སྡེ་དགེའི་རིག་གནས་ཁྱིམ་རྒྱུད་ཅིག་ཏུ་འཁྲུངས་པ་རྒྱུས་ལོན་བྱུང་། དེས་ན་ཕ་ཡུལ་དང་ཁྱིམ་ཚང་སློབ་གསོས་ཁྱེད་ཀྱི་འཚར་ལོངས་ལ་ཤུགས་རྐྱེན་ག་འདྲ་ཐེབས་ཡོད་དམ།

རྒན་འཇམ་དབྱངས་ཆོས་སྒྲོན། གསར་འགོད་པ་ཁམས་བཟང་། ང་རང་སྐྱེ་ས་ཚར་ས་ནི་སྡེ་དགེ་རེད། ཁྱེད་ཀྱིས་གསུངས་པ་ལྟར་སྤྱིར་སྡེ་དགེ་ནི་བོད་ཀྱི་སྲོལ་རྒྱུན་རིག་གནས་ཧ་ཅང་དར་རྒྱས་ཆེ་ས་ཞིག་ཡིན་ཞིང་། སྙན་པའི་གྲགས་པ་འབར་བའི་པར་ཁང་ཆོས་མཛོད་ཆེན་མོ་ནི་སྡེ་དགེའི་རིག་གནས་སྒོ་བྱང་ལྟ་བུ་ཆགས་ཡོད། བོད་རྒྱུད་ནང་བསྟན་གྱི་དགོན་སྡེའི་རིག་གནས་དང་། ཟུར་ལུགས་གསོ་རིག་དང་། ཀརྨ་སྒར་བྲིས། སྡེ་བྲིས་སོགས་ཐུན་མོང་མ་ཡིན་པའི་བོད་ཀྱི་སྲོལ་རྒྱུན་གསོ་རིག་དང་དམངས་སྲོལ་སྒྱུ་རྩལ་སོགས་ནི་སྡེ་དགེའི་མི་དམངས་ཀྱི་བློ་གྲོས་ཀྱི་སྙིང་བཅུད་ཡིན། ལྷག་པར་དུ་སྡེ་དགེ་ནི་གླིང་རྗེ་གེ་སར་རྒྱལ་པོའི་འཁྲུངས་ཡུལ་ཡིན་ལ་གླིང་སྒྲུང་གི་འབྱུང་གནས་ཀྱང་ཡིན་ཞེས་བརྗོད་ཅིང་། གླིང་རྗེ་བློན་སྐོར་གྱི་ངོ་མཚར་གཏམ་རྒྱུད་དང་། གནའ་ཤུལ་གནའ་རྫས། གླིང་སྒྲུང་བྲིས་མ་དང་པར་མ། གེ་སར་གར་འཆམ་སོགས་ས་ཁྱབ་རྡོ་ཁྱབ་ཏུ་གྱུར་ཡོད། རང་གི་ཁྱིམ་རྒྱུད་ལ་མཚོན་ན་ཕ་མེས་ནས་རིག་གནས་ལ་མཐོང་ཆེན་བྱེད་པའི་སྲོལ་རྒྱུན་ལྡན་ཞིང་། ང་རང་གི་ཡབ་དམ་པ་པར་དཔོན་བཀྲ་ཤིས་རྡོ་རྗེ་ནི་བོད་ཀྱི་སྲོལ་རྒྱུན་རིག་གནས་ལ་དད་འདུན་ཆེ་ཞིང་སྦྱངས་པ་ཉམས་ལེན་ཆེ་བ་ཞིག་ཡིན། དུས་རབས་གོང་མའི་བཅོས་བསྒྱུར་སྒོ་འབྱེད་ཀྱི་ཐོག་མའི་དུས་སྐབས་སུ་སྡེ་དགེ་པར་ཁང་ཆོས་མཛོད་ཆེན་མོར་ཕྱག་ལས་གནང་བར་ཕེབས་པར་མ་ཟད་པར་དཔོན་གཞོན་པའི་འགན་ཁུར་ནས་པར་དཔོན་བཀྲ་ཤིས་རྡོ་རྗེ་ཞེས་སྙན་གྲགས་ཆེན་པོ་བྱུང་ཡོད། ཁོང་གིས་པར་ཁང་ཆོས་མཛོད་ཀྱི་ཕྱིའི་བཟོ་བཀོད་རྣམ་པ་དང་ནང་རྟེན་པར་ཤིང་ཉམས་གསོ་སོགས་ཀྱི་ཐད་མཛད་རྗེས་ཆེན་པོ་བཞག་གནང་ཡོད། ང་རང་དེ་ལྟ་བུའི་ཁོར་ཡུག་ཅིག་ཏུ་འཚར་ལོངས་བྱུང་ཕྱིར། ཆུང་དུས་ནས་བོད་ཀྱི་སྲོལ་རྒྱུན་རིག་གནས་ཀྱི་བག་ཆགས་ཟམ་མོ་ཡོད་ཐོག་དེ་ལ་དགའ་ཞེན་ཡང་ཆེན་པོ་ཡོད།

གསར་འགོད་པ། ཁྱེད་པེ་ཅིན་དུ་ཕེབས་ནས་གེ་སར་རིག་གནས་ཞིབ་འཇུག་གི་ཕྱག་ལས་དེ་རྐྱེན་གང་འདྲ་ཞིག་གིས་བྱུང་བ་ཡིན་ནམ།

རྒན་འཇམ་དབྱངས་ཆོས་སྒྲོན། ང་རང་པེ་ཅིན་དུ་གེ་སར་རིག་གནས་ཞིབ་འཇུག་གི་ལས་ཀ་བྱས་པ་དེ་ཡང་གོ་སྐབས་སྟབས་འགྲིག་བྱུང་བ་ཞིག་ཡིན། གང་ལགས་ཤེ་ན། སྐབས་དེར་པེ་ཅིན་དུ་ལས་ཁུངས་གཞན་ལ་ལས་བསྒྱུར་བྱེད་པའི་གོ་སྐབས་ཀྱང་བྱུང་། འོན་ཀྱང་ཀྲུང་གོ་སྤྱི་ཚོགས་ཚན་རིག་ཁང་དུ་གེ་སར་རིག་གནས་ཞིབ་འཇུག་བྱེད་པའི་གོ་སྐབས་ཡོད་པ་ཤེས་འཕྲལ་དགའ་ཚོར་ཆེན་པོ་སྐྱེས། རྒྱུ་མཚན་ནི་ཁོར་ཡུག་གིས་རྐྱེན་པས་ང་རང་ལ་ཆུང་ངུའི་དུས་ནས་གླིང་སྒྲུང་དང་གེ་སར་རིག་གནས་སྐོར་མཐོང་ཐོས་མྱོང་གསུམ་ཡོད་པས་དེའི་ཐད་མི་གཞན་ལས་ལྷག་པའི་ཆ་རྒྱུས་དང་བཟང་ཆ་ལྡན་པར་སྙམ། ང་རང་གི་ཡབ་དམ་པ་ཡང་གླིང་སྒྲུང་གསན་རྒྱུར་ཐུགས་མཉེས་པོ་གནང་མཁན་ཞིག་ཡིན། དཔེར་ན་སྒྲུང་པ་གྲགས་ཅན་དཔལ་སྤུངས་མཁན་པོ་དིས་ཆུང་བློ་ཆོས་དང་། སྒྲུང་མ་གྲགས་ཅན་སྒྲོལ་མ་ལྷ་མཚོ་སོགས་ངའི་ཁྱིམ་དུ་ཕེབས་སྐབས་གླིང་སྒྲུང་འཆད་གྱེར་གནང་དུ་འཇུག་པ་སོགས་ཐོས་མྱོང་ཡོད། ཀྲུང་དབྱང་རླུང་འཕྲིན་བརྙན་འཕྲིན་ལས་ཁུངས་སུ་ཕྱག་ལས་གནང་མཁན་ངའི་བཟའ་ཟླ་ནག་རུ་ཚེ་དགའ་ལགས་ཀྱང་གླིང་སྒྲུང་ལ་ཆ་རྒྱུས་དང་དགའ་ཞེན་ཆེ་བ་ཞིག་ཡིན་སྟབས། གླིང་རྗེ་གེ་སར་གྱི་རྣམ་ཐར་ལ་ཞིབ་འཇུག་བྱེད་པའི་གོ་སྐབས་རྙེད་པ་ནི་རྟེན་འབྲེལ་བཟང་པོ་རེད་ཅེས་སྐུལ་མ་ཡང་གནང་།

དེ་ལྟར་ང་རང་གི་འདོད་མོས་དང་ཁྱིམ་མི་རྣམས་ཀྱི་བསམ་འཆར་མ་བགྲོས་གཅིག་མཐུན་བྱུང་སོང་། སྐབས་དེའི་རྒྱལ་ཡོངས་གེ་སར་ལས་དོན་འགོ་ཁྲིད་ཚོ་ཆུང་གཞུང་ལས་ཁང་གི་ཀྲུའུ་རེན་མཁྱེན་ལྡན་མ་དབྱང་ཨེན་ཧུང་སོགས་དབུ་ཁྲིད་ནས་ཀྱང་ང་རང་ལ་གེ་སར་རིག་གནས་ཤིན་ཏུ་དར་ཁྱབ་ཆེ་བའི་གླིང་གེ་སར་གྱི་འཁྲུངས་ཡུལ་སྡེ་དགེ་རུ་འཚར་ལོངས་བྱུང་བ་སོགས་གེ་སར་རིག་གནས་ཞིབ་འཇུག་གི་བཟང་ཆ་ལྡན་པར་ངོས་འཛིན་བྱས། དེ་ལྟར་2007ལོར་རྒྱལ་ཡོངས་གེ་སར་ལས་དོན་འགོ་ཁྲིད་ཚོ་ཆུང་གཞུང་ལས་ཁང་དུ་ལས་གནས་སྤོས་ཏེ་གེ་སར་རིག་གནས་ཞིབ་འཇུག་གི་ལས་ལ་དངོས་སུ་གཞོལ་འགོ་ཚུགས་པ་ཞིག་ཡིན།

གསར་འགོད་པ། ཁྱེད་ཀྱི་དཔྱད་རྩོམ་དག་ཀློག་སྐབས་གངས་ལྗོངས་ཀྱི་ས་གནས་མང་པོར་གེ་སར་རིག་གནས་རྟོག་ཞིབ་ཏུ་ཕེབས་པའི་ཚོར་སྣང་ཡོང་གི་འདུག །ཡུལ་དངོས་རྟོག་ཞིབ་ཀྱི་རྒྱུད་རིམ་ཁྲོད་ཁྱེད་ལ་བརྗེད་དཀའ་བའི་གནས་ཚུལ་མང་པོ་འཕྲད་ཡོད་ངེས་ལ་དཔེ་མཚོན་རེ་གཉིས་ཙམ་མཉམ་སྤྱོད་གནང་རོགས།

རྒན་འཇམ་དབྱངས་ཆོས་སྒྲོན། ང་རང་ཀྲུང་གོ་སྤྱི་ཚོགས་ཚན་རིག་ཁང་དུ་གེ་སར་རིག་གནས་ཞིབ་འཇུག་གི་ལས་གནས་འདི་ལ་ཞུགས་ནས་ད་བར་མྱོང་ཚོར་དང་གཏམ་རྒྱུད་མང་པོ་ཞུ་རྒྱུ་ཡོད། འདིར་དཔེ་མཚོན་གསུམ་ཙམ་མཉམ་སྤྱོད་ཞུ་རྒྱུ་ཡིན། དང་པོ་ནི་ཡུལ་དངོས་རྟོག་ཞིབ་ཐེངས་དང་པོ་བྱས་པའི་མྱོང་ཚོར་དེ་ཡིན། 2008ལོར། ང་རང་ཐེངས་དང་པོར་སི་ཁྲོན་དཀར་མཛེས་བོད་རིགས་རང་སྐྱོང་ཁུལ་སྡེ་དགེ་རྫོང་དུ་ས་ཡུལ་དངོས་ཀྱི་གེ་སར་རིག་གནས་རྟོག་ཞིབ་ཀྱི་ཚུལ་དུ་ཆས་པ་ཡིན། དེ་ཡང་དུས་ཡུན་ཟླ་བ་གཅིག་ཙམ་ནང་། སྡེ་དགེ་རྫོང་ཁོངས་ཀྱི་ཡུལ་ཤོག་23ལ་བསྐྱོད་པ་དང་། ནང་བསྟན་དགོན་སྡེ་མང་པོར་འབྲེལ་གཏུག་ཞུས་ཏེ། སྡེ་དགེའི་གེ་སར་རིག་གནས་ཀྱི་དམངས་ཁྲོད་ངག་རྒྱུན་དང་།

གནའ་ཤུལ་གནའ་རྫས། དམངས་ཁྲོད་སྒྲུང་པའི་གནས་ཚུལ། གླིང་སྒྲུང་པར་གཞིའི་ཁྱབ་ཚུལ། གླིང་སྒྲུང་ཟློས་གར་སྒྱུ་རྩལ་སོགས་ཀྱི་གནས་ཚུལ་རྒྱུས་ལོན་བྱས། སྒྲུང་མཁན་གྲགས་ཅན་དིས་ཆུང་དཔལ་ཆེན་དང་། རྫོགས་ཆེན་པདྨ་ཡེ་ཤེས་སོགས་སྡེ་དགེའི་མངའ་ཁོངས་ཀྱི་སྒྲུང་པ་གྲགས་ཅན་སོགས་ལ་བཅར་འདྲི་ཞུས་པ་དང་། གླིང་སྒྲུང་བྲིས་མ་སོགས་དཔེ་རྙིང་མི་ཉུང་བ་འཚོལ་སྡུད་བྱུང་། དེ་ཡང་ཐོས་པ་བརྒྱ་ལས་མཐོང་བ་གཅིག་དགའ་ཞེས་པའི་དཔེ་ལྟར། ཐེངས་འདིའི་རྟོག་ཞིབ་ནི་ང་རང་གི་ངོས་ནས་བརྗོད་ན་བརྗེད་དཀའ་བའི་མི་ཚེའི་མྱོང་བརྒྱུད་ཅིག་ཡིན་ཞིང་ཞིབ་འཇུག་གི་ལྟ་ཕྱོགས་ཐོག་ནས་གེ་སར་རིག་གནས་ལ་མྱོང་རོལ་བྱེད་པ་ནི་ཐེངས་དང་པོ་ཡིན། གླིང་རྗེ་བློན་གྱི་རྗེས་ཤུལ་དང་གོ་མཚོན་སོགས་ཤུལ་བཞག་དངོས་རྫས་རྣམས་དངོས་སུ་མཇལ་སྐབས་སེམས་ཀྱི་རྦ་རླབས་ལང་ལོང་དུ་འཕྱུར་ཞིང་། ཡུལ་དུས་ཕྱིར་ལོག་གི་སྣང་ཚོར་ཞིག་དབང་མེད་དུ་སྐྱེས། དུས་དེ་ནས་བཟུང་རང་ཉིད་ལ་བབ་འོས་ཀྱི་ལས་འགན་བསྐོས་པ་བཞིན་གེ་སར་རིག་གནས་ལ་ཞིབ་དཔྱད་བྱེད་པའི་འདུན་པ་ཡང་ཉིན་བཞིན་ཇེ་ཆེར་སོང་།

གཉིས་པ་ནི་སྡེ་དགེའི་སྒྲུང་པ་གྲགས་ཅན་དིས་ཆུང་དཔལ་ཆེན་ལགས་ལ་བཅར་འདྲི་ཞུས་པའི་མྱོང་བརྒྱུད་དེ་ཡིན། ངས་སྔ་ཕྱིར་ཁོང་ལ་ཁྱོན་བཅར་འདྲི་ཐེངས་ལྔ་ཙམ་ཞུ་མྱོང་ཡོད། བཅར་འདྲི་ཐེངས་ལྔ་པ་དེ་2018ལོའི་ཟླ་8པའི་ནང་ཡིན་ཞིང་། སྐབས་དེར་ཁོང་དགུང་ལོ་བརྒྱད་ཅུ་གྱ་བརྒྱད་ལ་ཕེབས་ཡོད། ཁོང་ལ་ཞལ་གྱེས་ཞུ་སྐབས། ངས་ཁོང་ལ་གེ་སར་ལས་དོན་ཐད་ཁྱེད་ལ་ཐུགས་རེའམ་མངགས་བཅོལ་གནང་རྒྱུ་ཅི་ཞིག་ཡོད་ཅེས་འདྲི་སྐབས། ཁོང་གིས་ཡུད་ཙམ་བསམ་གཞིགས་གནང་རྗེས་རྫོགས་ཆེན་པདྨ་ཡེ་ཤེས་ཀྱི་བུ་པདྨ་བཀྲ་ཤིས་སྐོར་གསུངས་ཤིང་། ཁོང་སྐད་ངག་ཆ་རྐྱེན་ལེགས་པ་དང་། སྒྲུང་ངག་སྙན་པོ་འདུག་ཅེས་བསྔགས་བརྗོད་གནང་བར་མ་ཟད། གལ་སྲིད་གོ་སྐབས་བྱུང་ན་ཁྱེད་ཀྱིས་འབྲེལ་ཡོད་ཕྱོགས་ལ་འོས་སྦྱོར་ཞུ་རོགས་ཞེས་གསུངས། ཁོང་གིས་རང་ཉིད་ཀྱི་བུ་རྒྱུད་ལ་རོགས་རམ་བྱེད་རོགས་མི་གསུངས་པར། མི་གཞན་གྱི་རྒྱུད་འཛིན་བྱ་གཞག་ཐུགས་ཁུར་གནང་བ་དེས་ང་རང་ལ་སེམས་འགུལ་ཚད་མེད་ཐེབས་བྱུང་། འདི་ལྟ་བུའི་བླ་ན་མེད་པའི་སྤྱོད་བཟང་ནི་ང་ཚོས་ཡིད་སྨོན་བྱེད་འོས་པ་ཞིག་ཡིན། ཁོང་གི་རེ་འདུན་བསྒྲུབ་ཕྱིར་ང་རང་གིས་རྫོགས་ཆེན་པདྨ་ཡེ་ཤེས་ཀྱི་སྲས་ཆུང་བ་པདྨ་བཀྲ་ཤིས་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་ལ་འོས་སྦྱོར་ཞུས་ནས་ཧོར་གླིང་གཡུལ་འགྱེད་ཆ་ཚང་ཞིག་སྒྲ་བཅུག་གནང་ཡོད།

གསུམ་པ་ནི་ལོ་ན་བགྲེས་ཤོས་ཀྱི་ཤོག་ཐོགས་སྒྲུང་པ་ཞིག་གསར་དུ་ཤེས་རྟོགས་བྱུང་བ་དེ་ཡིན། དེ་ཡང་2015ལོའི་ཟླ་2པར་ང་རང་གིས་ཆབ་མདོ་གྲོང་ཁྱེར་དུ་གེ་སར་རིག་གནས་རྟོག་ཞིབ་བྱེད་སྐབས་བྲག་གཡབ་གླང་ཆུང་དགོན་པའི་མཁན་པོ་གཞོན་ནུ་ཉི་མ་མཆོག་བརྒྱུད་པདྨ་རྡོ་རྗེ་ཞེས་པའི་སྒྲུང་མཁན་ཁྱད་པར་ཅན་ཞིག་ཡོད་པའི་སྐོར་རྒྱུས་ལོན་བྱུང་། དེ་ནས་2019ལོའི་ཟླ་9པར་སྒྲུང་མཁན་པདྨ་རྡོ་རྗེར་བཅར་འདྲི་ཐེངས་དང་པོ་ཞུས་པ་ཡིན། དུས་ཐུང་གླེང་མོལ་ཞུས་རྗེས《གྲུ་གུ་གོ་རྫོང་།》དུམ་བུ་དང་《འཁྲུངས་གླིང་།》བསྡུས་པ་སྒྲ་འཇུག་དང་བརྙན་པར་ཡང་བླངས། རྗེས་སུ་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན་གྱི་འཕྲིན་ཕྲན་སྟེགས་བུའི་ཐོག་པདྨ་རྡོ་རྗེའི་གནས་ཚུལ་སྐོར་ངོ་སྤྲོད་བྱས་པར་ལན་ཆ་ཡང་ཆེན་པོ་བྱུང་སོང་། དེ་ནས་ཆེད་དུ《ཀྲུང་གོའི་ལོ་རྒྱུས་སྙན་རྩོམ་བརྒྱའི་ལས་གཞི།》ཡིི་རྣམ་གྲངས་སུ་བོད་ལྗོངས་བྲག་གཡབ་རྫོང་གི་ཤོག་ཐོགས་སྒྲུང་པ་པདྨ་རྡོ་རྗེ་ཞེས་པའི་རྒྱལ་ཁབ་རིམ་པའི་ལས་གཞི་རེ་ཞུས་ལ་ཆོག་མཆན་ཐོབ། 2021ལོའི་ཟླ་7པའི་ནང་བདུན་ཕྲག་གཉིས་རིང་ཁོང་ལ་ཞིབ་ཕྲའི་བཅར་འདྲི་དང་གླིང་སྒྲུང་འཆད་གྱེར་སྒྲ་ཕབ་བརྙན་ལེན་བྱས་ནས་ཞིབ་འཇུག་གཏིང་ཟབ་བྱས་ཤིང་། སྐབས་དེར་ཁོང་དགུང་ལོ་93ལ་ཕེབས་ཡོད། འོན་ཀྱང་བློ་ཕམ་དགོས་པ་ཞིག་ལ་སྤྱི་ལོ་2022ལོའི་ཟླ་3པའི་ཚེས་9ཉིན་སྒྲུང་མཁན་ཁོང་ཚེ་ལས་འདས་པའི་གནས་ཚུལ་ཐོས་སོང་། ཤོག་ཐོགས་སྒྲུང་པ་ནི་སྒྲུང་པ་ཧ་ཅང་དཀོན་རིགས་ཤིག་ཡིན་ཞིང་།

པདྨ་རྡོ་རྗེ་ནི་ཕྱིས་སུ་བྲག་གཡབ་ས་ཁུལ་དང་ཐ་ན་བོད་ལྗོངས་ནས་ཤེས་རྟོགས་བྱུང་བའི་ཤོག་ཐོགས་སྒྲུང་པ་ཉག་གཅིག་དེ་ཡིན་ཞེས་བརྗོད་ཆོག

གསར་འགོད་པ། གླིང་གེ་སར་རྒྱལ་པོའི་སྒྲུང་ལ་རྣམ་པ་གསོན་ཅན་གྱི་ལོ་རྒྱུས་སྙན་རྩོམ་ཞེས་རྗོད་བཞིན་འདུག་པས། རྣམ་པ་གསོན་ཅན་ཟེར་བ་དེ་ལ་གོ་བ་ཅི་འདྲ་ལེན་དགོས་སམ།

རྒན་འཇམ་དབྱངས་ཆོས་སྒྲོན། གླིང་གེ་སར་རྒྱལ་པོའི་སྒྲུང་ལ་རྣམ་པ་གསོན་ཅན་གྱི་ལོ་རྒྱུས་སྙན་རྩོམ་ཞེས་བརྗོད་པར་གཙོ་བོ་གཤམ་གསལ་གྱི་རྒྱུ་མཚན་འགའ་ཤས་ཡོད་པ་སྟེ། གཅིག་ནས་རྒྱུན་འཛིན་གྱི་རྣམ་པ་གསོན་ཅན་ཡིན་པ། གཉིས་ནས་ནང་དོན་ཕུན་སུམ་ཇེ་ཚོགས་སུ་འགྲོ་བཞིན་པ། གསུམ་ནས་པོད་གྲངས་ཟམ་མི་ཆད་པར་མང་དུ་འགྲོ་བཞིན་པ་བཅས་རེད།

གསར་འགོད་པ། ཁྱེད་ཀྱིས་མིག་སྔར་རྒྱལ་ཁབ་ཀྱི་སྤྱི་ཚོགས་ཚན་རིག་ཐེབས་རྩའི་རྣམ་གྲངས་གླིང་སྒྲུང་ཤིང་པར་མ་དང་ཉར་ཚགས་སྐོར་གྱི་ཞིབ་འཇུག་ཅེས་པའི་རྣམ་གྲངས་ཤིག་སྒྲུབ་བཞིན་ཡོད་པ་ཤེས་རྟོགས་བྱུང་བས་དེའི་སྐོར་ངོ་སྤྲོད་མདོར་བསྡུས་ཤིག་གནང་རོགས།

རྒན་འཇམ་དབྱངས་ཆོས་སྒྲོན། རེད་ལགས། རྣམ་གྲངས་འདི་ནི་2003ལོའི་རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་དར་མེད་སྟོང་ཉེའི་ཞིབ་འཇུག་ཆེད་དམིགས་རྣམ་གྲངས་ཀྱི་ཁོངས་གཏོགས་གླིང་སྒྲུང་ཤིང་པར་མ་དང་ཉར་ཚགས་སྐོར་གྱི་ཞིབ་འཇུག་ཅེས་པ་དེ་ཡིན། དེ་ཡང་གླིང་གེ་སར་རྒྱལ་པོའི་སྒྲུང་གི་བྲིས་མ་དང་ཤིང་པར་མ་མགྱོགས་མྱུར་ཇེ་ཉུང་དུ་འགྲོ་བའི་གནས་ཚུལ་འོག་དེར་མྱུར་སྐྱོབ་དང་ཞིབ་འཇུག་བྱེད་རྒྱུ་མི་འདང་བའི་གནས་སུ་གྱར་ཡོད། དེས་ན་གླིང་སྒྲུང་ཤིང་པར་མར་ཞིབ་འཇུག་བྱ་རྒྱུ་དེ་ཡང་གལ་ཆེན་པོ་ཞིག་ཏུ་གྱུར་ཡོད་ཅིང་།

དཔེར་ན་གླིང་སྒྲུང་《ཁ་ཆེ་གཡུ་རྫོང་།》གི་ཤིང་པར་མ་ཁོ་ན་ལྟ་བུར་མཚོན་ན། པར་གཞིའི་འབྱུང་ཁུངས་སྐོར་སྡེ་དགེ་གླིང་ཚང་གི་ཤིང་པར་མ་དང་དཔལ་སྤུངས་དགོན་གྱི་ཤིང་པར་མ། པར་ཁང་ཆོས་མཛོད་ཆེན་མོའི་ཤིང་པར་མ་སོགས་བཤད་ཚུལ་སྣ་ཚོགས་བྱུང་འདུག །དོན་དངོས་ཐོག་ང་རང་གིས་ཡུལ་དངོས་བརྟག་དཔྱད་བྱས་པ་བརྒྱུད། གླིང་སྒྲུང་《ཁ་ཆེ་གཡུ་རྫོང་།》གི་མ་དཔེ་ཤིང་པར་ལྷ་ཐོག་དཀར་ལེགས་དགོན་ནས་ཡིན་ཞིང་། ལྷ་ཐོག་རྒྱལ་པོ་སྐུ་ཐོག་བཅུ་གཉིས་པ་བསོད་ནམས་འཇིགས་མེད་ཚེ་རིང་དབང་ཕྱུག་གིས་ཕབ་པར་མ་ཟད་པར་བརྐོས་སྒྲིག་འཛུགས་གནང་བ་ཞིག་ཡིན་པ་ཤེས་རྟོགས་བྱུང་།

དེར་བརྟེན་གླིང་སྒྲུང་ཤིང་པར་མ་འབྱུང་ཁུངས་མཐའ་དཔྱད་བྱེད་པ་ཁོ་ནར་ཡང་དོན་སྙིང་ཡང་ཆེན་པོ་ལྡན་པར་སྙམ། མིག་སྔར་ཤེས་རྟོགས་བྱུང་བའི་གླིང་སྒྲུང་ཤིང་པར་མ་ནི་སྡེ་དགེ་གླིང་ཚང་གི་པར་མ《ལྷ་གླིང་གབ་རྩེ་དགུ་སྐོར།》དང་《འཁྲུངས་གླིང་མེ་ཏོག་ར་བ།》《རྨ་ས་བཟུང་དར་དཀར་མདུད་པ།》《རྟ་རྒྱུག་ནོར་བུ་ཆ་བདུན།》བཅས་དང་། དཔལ་སྤུངས་དགོན་གྱི《སྟག་གཟིག་ནོར་རྫོང་།》 བོད་ལྗོངས་ཆབ་མདོ་གྲོང་ཁྱེར་འཇོ་མདའ་རྫོང་སྤོ་ལུ་དགོན་པའི《སྟག་གཟིག་ནོར་འགྱེད།》 འཇོ་མདའ་རྫོང་ཝ་ར་རི་ཁྲོད་ཀྱི་《དམྱལ་གླིང་རྫོགས་པ་ཆེན་པོ།》 ཆབ་མདོ་གྲོང་ཁྱེར་ཁ་རུབ་ཆུས་དཀར་ལེགས་དགོན་པའི《ཁ་ཆེ་གཡུ་རྫོང་།》 ཀན་སུའུ་བླ་བྲང་བཀྲ་ཤིས་འཁྱིལ་གྱི་《དམྱལ་གླིང་མུན་པ་རང་གསལ།》བཅས་ཡིན།

གསར་འགོད་པ། མ་འོངས་པར་རིག་གཞུང་ཞིབ་འཇུག་ཐད་འཆར་གཞི་གང་འདྲ་ཡོད།

རྒན་འཇམ་དབྱངས་ཆོས་སྒྲོན། ལོ་རྒྱུས་སྙན་རྩོམ་རིང་མོ《གླིང་གེ་སར་རྒྱལ་པོའི་སྒྲུང་།》འཛིན་སྐྱོང་སྤེལ་གསུམ་གྱི་བྱ་གཞག་ལ་སྲི་ཞུ་ཕྲན་བུ་བསྒྲུབ་པའི་བསྐལ་བ་ལྡན་པ་ང་རང་གི་གཟི་བརྗིད་དང་བསོད་ནམས་ཡིན་ཞིང་། རྗེས་སོར་མུ་མཐུད་འབད་པ་ལྷོད་མེད་ཀྱིས་སྲི་ཞུ་ལེགས་པར་བསྒྲུབ་པའི་ཆོད་སེམས་དང་སྤོབས་པ་ཡང་མཆིས། ཐུགས་རྗེ་ཆེ།

ངོ་སྤྲོད་མདོར་བསྡུས།

   འཇམ་དབྱངས་ཆོས་སྒྲོན་ལགས་ནི་མདོ་ཁམས་སྡེ་དགེའི་རིག་གནས་པའི་ཁྱིམ་རྒྱུད་ཅིག་ཏུ་འཁྲུངས་ཤིང་། ཆུང་ངུའི་སྐབས་སུ་ཡབ་ཀྱི་མདུན་ནས་ཡི་གེ་འབྲི་ཀློག་བསླབས་པ་དང་དེ་ནས་རིམ་བཞིན་སྡེ་དགེ་རྫོང་གི་སློབ་གྲྭ་ཆུང་འབྲིང་འགྲིམས་རྗེས། སྔ་རྗེས་སུ་དཀར་མཛེས་དགེ་འོས་སློབ་གྲྭ་དང་། ལྷོ་ནུབ་མི་རིགས་སློབ་ཆེན། ཀྲུང་དབྱང་མི་རིགས་སློབ་ཆེན་སོགས་སུ་སློབ་སྦྱོང་གནང་ཞིང་། ཀྲུང་དབྱང་མི་རིགས་སློབ་ཆེན་གྱི་བོད་རིག་པའི་འབུམ་རམས་པའི་སློབ་གནས་ཐོབ། ད་ལྟ་ཀྲུང་གོ་སྤྱི་ཚོགས་ཚན་རིག་ཁང་དུ་བོད་ཀྱི་ལོ་རྒྱུས་རིག་གནས་དང་སྒོས་སུ་གེ་སར་རིག་གནས་ཞིབ་འཇུག་གི་ཕྱག་ལས་གནང་མུས་ལ། རྒྱལ་ཡོངས་གེ་སར་ལས་དོན་འགོ་ཁྲིད་ཚོ་ཆུང་གཞུང་ལས་ཁང་གི་ཀྲུའུ་རེན་གཞོན་པ་དང་། ཀྲུང་གོ་སྤྱི་ཚོགས་ཚན་རིག་ཁང་གི་སློབ་གྲྭ་ཆེན་མོའི་རབ་འབྱམས་པའི་མཛུན་སྟོན་དགེ་རྒན་དང་ཞིབ་འཇུག་པ་གཞོན་པ་བཅས་ཡིན།

སྤྱི་ལོ་2012ལོ་ནས་2013ལོའི་བར། ཁོང་ཕུལ་བྱུང་འབུམ་རམས་ཞིབ་འཇུག་སློབ་མའི་སྤེལ་རེས་རྣམ་གྲངས་ཀྱི་ཁོངས་མིའི་ངོས་ནས་སྔ་ཨ་རིའི་ཧྭ་ཧྥུ་སློབ་ཆེན་དུ་སློབ་སྦྱོང་གནང་བར་ཕེབས། དེ་མིན་ད་དུང་མོང་གོལ་རྒྱལ་ཁབ་དང་། ནེ་པ་ལ་སོགས་རྒྱལ་ཁབ་ལ་རིག་གཞུང་སྤེལ་རེས་གནང་བར་ཕེབས།

འཇམ་དབྱངས་ཆོས་སྒྲོན་ལགས་ནི་ཞིབ་འཇུག་གྲུབ་འབྲས་མང་བའི་གེ་སར་རིག་གནས་ཞིབ་འཇུག་པ་ཞིག་ཡིན་ཞིང་《ཀྲུང་གོའི་བོད་རིག་པ།》དང་《བོད་ལྗོངས་ཞིབ་འཇུག》《བོད་ལྗོངས་སློབ་གྲྭ་ཆེན་མོའི་རིག་དེབ།》《ལྷོ་ནུབ་མི་རིགས་སློབ་ཆེན་གྱི་རིག་དེབ།》《ནུབ་བྱང་མི་རིགས་སློབ་ཆེན་གྱི་རིག་དེབ།》《གངས་ལྗོངས་ཉི་གཞོན།》སོགས་ཀྱི་ཐོག་ཏུ་རྒྱ་བོད་ཡིག་རིགས་གཉིས་ཀྱི་ཐོག་ནས་རིག་གཞུང་དཔྱད་རྩོམ་ལྔ་བཅུ་ལྷག་སྤེལ་ཟིན་པར་མ་ཟད། 《གླིང་གེ་སར་རྒྱལ་པོའི་ལོ་རྒྱུས་ལ་དཔྱད་པ།》དང་《སྡེ་དགེའི་གེ་སར་རིག་གནས་ཞིབ་འཇུག》《ཡུལ་མང་རྟོག་ཞིབ་ལས་འཕྲོས་པའི་གེ་སར་རིག་གནས་ཞིབ་འཇུག》《གླིང་གེ་སར་རྒྱལ་པོའི་གསོལ་མཆོད་ཕྱོགས་བསྒྲིགས།》《གླིང་སྒྲུང་གཅེས་བཏུས་ཇ་རོང་འབྲུ་རྫོང་།》《འཇར་གྱི་རྒྱལ་ཁབ་བཏུལ་བའི་གཡུལ་འགྱེད།》《གངས་ལྗོངས་ཀྱི་གཏམ་རྒྱུད།》《གྲོང་གསེབ་ཀྱི་ཁྲིམས་ལུགས་རྒྱུན་ཤེས།》སོགས་ཆེད་དེབ་དཔེ་སྐྲུན་འགྲེམས་སྤེལ་བྱས་ཡོད།

གཞན་ཡང་ཁོང་ལ་ཚན་རིག་ཞིབ་འཇུག་རྣམ་གྲངས་ཐད་ལའང་འགན་སྒྲུབ་ཉམས་མྱོང་ཕུན་སུམ་ཚོགས་པོ་ཡོད་ཅིང་། དེ་ཡང་རྒྱལ་ཁབ་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་གཙོ་གནད་རྣམ་གྲངས་གལ་ཆེན་གླིང་སྒྲུང་གི་སྒྲུང་པ་ཞིབ་འཇུག་ཅེས་པ་དང་། རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་གལ་ཆེའི་མངགས་བཅོལ་རྣམ་གྲངས་གླིང་སྒྲུང་མྱུར་སྐྱོབ་དང་ཞིབ་འཇུག་ཅེས་པ། ཀྲུང་གོའི་ལོ་རྒྱུས་སྙན་རྩོམ་བརྒྱའི་ལས་གཞི་ཞེས་པ། རྒྱལ་ཁབ་སྤྱི་ཚོགས་ཚན་རིག་ཐེབས་རྩའི་དར་མེད་སྟོང་ཉེའི་རིག་ཚན་ཞིབ་འཇུག་ལས་གཞི་ཞེས་པ། གླིང་སྒྲུང་པའི་ཞིབ་འཇུག་དང་གླིང་སྒྲུང་གཅེས་བཏུས་རྩོམ་སྒྲིག །དཔའ་བོའི་ལོ་རྒྱུས་སྙན་རྩོམ་གླིང་སྒྲུང་བརྟག་ཞིབ་དང་གྲངས་མཛོད་འཛུགས་སྐྱོང་། གླིང་སྒྲུང་བོད་རྒྱ་ཤན་སྦྱར་ཚད་ལྡན་མིང་མཛོད་ཆེན་མོ་སོགས་རྒྱལ་ཁབ་ཀྱི་གལ་ཆེའི་ཞིབ་འཇུག་རྣམ་གྲངས་མང་པོ་བསྒྲུབས་དང་སྒྲུབ་ཀྱི་མཆིས། །