དཔལ་ཆེན་རྡོ་རྗེ་ལགས་ནི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་ནས་ཡིན་ཞིང་། ཆུང་བྱིས་པའི་དུས་ནས་གླུ་དབྱངས་ལ་དགའ་ཞེན་ཆེ་བས། ལོ་ན་དགུ་ཙམ་ནས་རོལ་ཆ་སྦྱངས། 2013ལོར་ཆེད་ལས་དགེ་རྒན་གྱི་དྲུང་ནས་རོལ་དབྱངས་དང་སྒྲ་སྙན་སྦྱངས། 2017ལོ་ནས་2018ལོའི་བར། ཁྲེང་ཏུའུ་གྲོང་ཁྱེར་དུ་ནུབ་གླིང་རོལ་ཆ་སྟེ་གནའ་རབས་རྒྱུད་དྲུག་ཆེད་སྦྱོང་དང་ནུབ་ལུགས་སྒྲ་སྙན་གྷི་ཐ་ལ་མ་ལག་ཚང་བའི་ངང་སློབ་སྦྱོང་བྱས། 2019ལོར་སི་ཁྲོན་རོལ་དབྱངས་སློབ་གླིང་ནས་གནའ་བོའི་གྷི་ཐ་དཀྲོལ་ལེན་རིམ་པ་བཅུ་པའི་དཔང་རྟགས་བླངས། དེ་མིན་སྒྲ་སྙན་དང་གནའ་བོའི་གྷི་ཐ་སྐོར་གྱི་འགྲན་སྡུར་མང་པོར་ཞུགས་ཏེ་ཀྲུང་ཞིན་རྒྱལ་སྤྱིའི་གྷི་ཐ་འགྲན་བསྡུར་གྱི་བྱ་དགའ་ཨང་གཉིས་པ་དང་མཚོ་སྔོན་རྒྱང་བསྒྲགས་བརྙན་འཕྲིན་ཁང་གི་མི་རིགས་མཐུན་སྒྲིལ་རྟགས་མའི་སྒྲ་སྙན་རྡུང་ལེན་འགྲན་སྡུར་སྐབས་བདུན་པའི་ཨང་གསུམ་པ་སོགས་ཐོབ། 2021ལོར་ཀྲུང་གོའི་གྷི་ཐའི་རྒྱལ་པོ་ཁུང་ཅི་ཧོང་དགེ་རྒན་དུ་བསྟེན་ནས་གྷི་ཐ་སྒྲ་སྙན་དཀྲོལ་གཏོང་སྦྱངས་པ་དང་ཆབས་ཅིག །ཧི་མ་ལ་ཡའི་གནའ་བོའི་རོལ་དབྱངས་ཀྱི་ཆེད་མཁས་པ་སྐུ་རྒྱབ་ཚུལ་ཁྲིམས་སྙིང་པོ་མཆོག་གི་མདུན་ནས་དཀྲོལ་གཏོང་ལ་སྔར་བས་འབད་བརྩོན་བྱས། ད་སྐབས་དཔལ་ཆེན་སྒྲ་སྙན་ལས་དོན་ཁང་གསར་འཛུགས་བྱས་ཏེ་སྒྲ་སྙན་སློབ་ཁྲིད་བྱེད་བཞིན་ཡོད།
གསར་འགོད་པ། དཔལ་ཆེན་རྡོ་རྗེ་ལགས། ཁྱེད་བདེ་མོ། ཁྱེད་ཀྱིས་ང་ཚོའི་བཅར་འདྲི་དང་ལེན་བྱས་པར་བཀའ་དྲིན་ཆེ། ཐོག་མར་ཁྱེད་ཀྱིས་རང་ཉིད་ཀྱི་རོལ་དབྱངས་ཀྱི་བརྒྱུད་ལམ་ངོ་སྤྲོད་མདོར་བསྡུས་བྱེད་རོགས།
དཔལ་ཆེན་རྡོ་རྗེ། ཁྱེད་བདེ་མོ། ང་རང་ཆུང་བྱིས་པའི་དུས་ནས་གླུ་དབྱངས་འགུག་པར་ཧ་ཅང་དགའ། ལྷག་པར་དུ་བོད་ཀྱི་སྲོལ་རྒྱུན་རོལ་དབྱངས་ལ་དགའ་ཞེན་ཆེ། དུས་རྒྱུན་གྱི་འཚོ་བའི་ཁྲོད་དུ་ཁྱིམ་མིའི་སྐད་ངག་སྙན་མོའི་འགྱུར་ཁུགས་དང་། ཡུལ་སྡེ་པའི་གླུ་ལེན་གར་རྩེད་ཀྱིས་ང་རང་ལ་ཤུགས་རྐྱེན་ཟབ་མོ་ཐེབས་ཡོད། དེའང་ང་ལ་སྒྲ་སྙན་དཀྲོལ་ཤེས་པ་དང་སྐད་ངག་ཀྱང་སྙན་པའི་ཞང་པོ་བཙུན་པ་ཞིག་ཡོད་ལ། ང་རང་ལོ་བདུན་བརྒྱད་ཙམ་ལ་སོན་སྐབས་ཕ་ཡུལ་གྱི་སྤང་ཐང་ནས་ལུ་གུ་འཚོ་ཞོར་ཁོང་གི་གམ་ནས་གླུ་ལེན་པ་དང་། སྒྲ་སྙན་སྦྱོང་འགོ་བརྩམས་པ་ཡིན། རང་ལོ་བཅོ་ལྔར་སོན་སྐབས་ཨ་ཕས་ང་རང་གནའ་མཁར་ཟི་ལིང་ལ་ཁྲིད་དེ་ལྷ་སའི་སྒྲ་སྙན་རྒྱུད་དྲུག་མ་ཞིག་ཉོ་རོགས་བྱས་བྱུང་། སྐབས་དེར་དགའ་སྤྲོ་ཆེན་པོ་སྐྱེས་པའི་ཚོར་བ་དེ་ད་ལྟ་ཚིག་འབྲུ་གང་གིས་ཀྱང་མཚོན་མི་ཐུབ་པ་ཞིག་རེད་ལ། དེ་ནས་བཟུང་སྒྲ་སྙན་དཀྲོལ་རྡུང་ངས་འཚོ་བའི་སྤྲོ་སྣང་འབའ་ཞིག་ཏུ་གྱུར།
གསར་འགོད་པ། ཁྱེད་རང་དཀྲོལ་ལེན་གྱི་སྒྱུ་རྩལ་ལ་ཤིན་ཏུ་བྱང་ཆུབ་པས། ཁྱེད་ཀྱིས་བལྟས་ན། བོད་ཀྱི་སྲོལ་རྒྱུན་རོལ་དབྱངས་དང་དེང་རབས་ཀྱི་ཆེད་ལས་རོལ་དབྱངས་སློབ་གསོའི་དབར་གྱི་འབྲེལ་བ་ཅི་འདྲ་ཞིག་རེད།
དཔལ་ཆེན་རྡོ་རྗེ། བོད་ཀྱི་རོལ་དབྱངས་ལ་ཐུན་མིན་གྱི་འགྱུར་ཁུགས་དང་ཡིད་དབང་འཕྲོག་ཤུགས་ལྡན་པས། དེས་ང་ཚོ་བོད་རིགས་མི་དམངས་ཀྱི་ལོ་རྒྱུས་དང་། རིག་གནས། བརྩེ་དུང་བཅས་མཚོན་ཡོད་ལ། རང་ཉིད་ལ་རྩ་ཆེའི་ཤུལ་བཞག་རིག་གནས་དེ་རྒྱུན་འཛིན་བྱེད་པའི་འགན་འཁྲི་ཡོད། ཡང་ནུབ་ཕྱོགས་རོལ་དབྱངས་ལ་སློབ་སྦྱོང་དང་རྒྱུས་ལོན་མེད་པའི་གོང་དུ། རང་མི་རིགས་ཀྱི་གླུ་དང་གཞས། གནའ་རབས་རོལ་དབྱངས་སོགས་ལ་དེ་འདྲའི་གསོན་ཉམས་དང་ཁྱད་ཆོས་ལྡན་པ་ཅི་ཡང་མ་ཤེས། ངས་བལྟས་ན་ནུབ་ཕྱོགས་རོལ་དབྱངས་ཀྱིས་ལོ་རྒྱུས་དང་རོལ་མོའི་གོ་དོན། སྙན་ཆ་དང་རྒྱབ་ལྗོངས་ཀྱི་རིན་ཐང་གཙོ་བོར་འཛིན་པ་ཞིག་ཡིན་འདུག །དེ་བཞིན་རང་མི་རིགས་ཀྱི་གླུ་དང་གཞས་ནི་མདོ་དབུས་མཐོ་སྒང་གི་ས་དབྱིབས་དང་མཁའ་དབུགས། འཚོ་བ་དང་དམངས་ཁྲོད་རིག་གནས་ལས་འཁྲུངས་པའི་ལོ་རྒྱུས་རང་བཞིན་ལྡན་པའི་མངའ་རིས་སྒོར་གཞས་ལྟ་བུ་སོགས་བརྗོད་ཀྱིས་མི་ལངས་པའི་སྐད་ངག་སྙན་འགྱུར་གྱི་སྒྱུ་རྩལ་ཕུན་སུམ་ཚོགས་པ་ཞིག་ཡོད། ང་ཚོས་རོལ་དབྱངས་དར་རྒྱས་གོང་འཕེལ་དུ་འགྲོ་དགོས་ན་གླུ་ཁོ་ན་བླངས་པས་མི་ནུས་པར། རང་གཞན་གཉིས་ཀྱི་རོལ་ཆ་ལ་སྦྱང་བ་གང་ལེགས་དང་། གནའ་དེང་ཟུང་འབྲེལ་གྱིས་ཐབས་ཤེས་སྤྱད་དེ་ལག་ལེན་བྱེད་རྒྱུ་ནི་ཧ་ཅང་གལ་ཆེ་བར་སྣང་།
གསར་འགོད་པ། ཁྱེད་རང་གིས་རོལ་དབྱངས་འཚོལ་བསྡུ་བྱེད་དུས་ཡུལ་ལུང་མི་འདྲ་བའི་སྒྲ་སྙན་རྣམས་ཀྱི་ཁྱད་ཆོས་ཀྱིས་བག་ཆགས་ཟབ་མོ་གང་འདྲ་བཞག་ཡོད་དམ།
དཔལ་ཆེན་རྡོ་རྗེ། སྒྲ་སྙན་ཞེས་པ་འདི་སྟོད་མངའ་རིས་ནས་དར་ཞིང་མིང་ལ་རྒོད་པོའམ་གོ་བོ་ཟེར། རིམ་བཞིན་དུས་རབས་ཀྱི་འཕེལ་འགྱུར་ཁྲོད་ཡར་ཀླུང་ཕྱོགས་སུ་དར་ནས་ལྷ་སའི་སྒྲ་སྙན་ཞེས་མིང་དེ་ཐོན་པ་དང་། དེང་སྐབས་མདོ་ཁམས་ཕྱོགས་སུ་ངོས་འཛིན་བྱེད་བཞིན་པའི་མངའ་རིས་སྒྲ་སྙན་ནི་ལྷ་སའི་སྒྲ་སྙན་ཡིན་ལ། ད་ལྟ་ཨ་མདོ་ཕྱོགས་ནས་དཀྲོལ་གཏོང་བྱེད་པའི་ཨ་མདོའི་བརྡུང་ལེན་གྱི་རིང་ལུགས་དེ་ནི། རོལ་ཆ་དབུས་ནས་མདོ་སྨད་ལ་དར་ཡང་སྒྲ་སྙན་ཁོ་རང་གི་རིག་གནས་གསོན་པོ་ཞིག་དར་ཐུབ་མེད་པ་འདྲ་སྟེ། གཏོང་སྟངས་སོགས་ནི་ཀན་སུའུ་བུན་རྫོང་གི་རྒྱའི་པི་ཝང་ཞེས་པའི་རོལ་ཆ་དེའི་ཤུགས་རྐྱེན་གཙོ་བོ་ཐེབས་པའི་དཀྲོལ་གཏོང་ལུགས་ཤིག་ཡིན་པར་འདོད། རྒོད་པོ་དང་སྒྲ་སྙན་གཉིས་ཀྱི་བཟོ་སྟངས་མི་འདྲ་ཞིང་ཆེ་ཆུང་ཡང་མི་གཅིག །རྒོད་པོ་ནི་སྐད་གསག་སྒྲིག་ཡིན་པ་དང་། ལྷ་སའི་སྒྲ་སྙན་ནི་སྐད་དབུས་སྒྲིག་ཡིན། དེ་གཉིས་ལ་འདྲ་ས་གཅིག་ཡོད་པ་ནི་གཉིས་ཀ་རྒྱུད་དྲུག་པ་ཅན་རེད། དེ་མིན་སྲིད་པ་གླུའི་རྒྱུད་དང་། སྲིད་པའི་ཆགས་ལུགས། འཇིག་རྟེན་དར་ལུགས། བྱིས་པའི་རྩེད་གཞས་དང་། སྟོད་གཞས། མངའ་རིས་སྒོར་གཞས། ཁམས་ཀྱི་འབའ་གཞས། གར་རོལ་གཞས་ཆེན་སོགས་མང་པོ་ཞིག་ཡོད། གཞན་བོད་ཀྱི་སྲོལ་རྒྱུན་རོལ་དབྱངས་དང་དེང་རབས་རོལ་དབྱངས་ཀྱི་གཞི་རྒྱུ་ཟུང་དུ་སྦྲེལ་ནས་རོལ་དབྱངས་ཀྱི་ཉམས་འགྱུར་གསར་པ་བཏོད་པར་གནད་འགག་ནི་སྲོལ་རྒྱུན་རིག་གནས་ལ་བརྩི་འཇོག་དང་གོ་བ་ལེན་རྒྱུ་དེ་ཡིན། དེའི་རྨང་གཞིའི་སྟེང་དེང་རབས་རོལ་དབྱངས་ཀྱི་གསར་རྩོམ་འདུ་ཤེས་དང་ཐབས་རྩལ་འདྲེས་ཡོད། མུ་མཐུད་དུ་ཚོད་ལྟ་དང་གསར་གཏོད་བྱས་པ་བརྒྱུད། ང་ཚོས་བོད་ཀྱི་རོལ་དབྱངས་ལ་གསོན་ཤུགས་གསར་པ་བསྣན་ཆོག
གསར་འགོད་པ། ཁྱེད་རང་གིས་སྒྲ་སྙན་གསར་པ་སྐོར་ཞིག་བཟོས་པའི་བརྒྱུད་རིམ་ངོ་སྤྲོད་ཅིག་གནང་རོགས།
དཔལ་ཆེན་རྡོ་རྗེ། ངས་ལོ་འདི་དག་གི་རིང་ལ་ས་ཆ་མང་པོར་འགྲིམས་ནས་ས་གནས་ཀྱི་རོལ་ཆ་འདྲ་མིན་མང་པོ་ཞིག་ཉར་ཚགས་བྱས་ཏེ། དེ་དག་གི་དཀྲོལ་གཏོང་སྐོར་ལ་སློབ་སྦྱོང་བྱས་པ་ཡིན། གནའ་མིའི་རྣམ་དཔྱོད་དང་བློ་གྲོས་ནི་རང་བྱུང་ཁམས་དང་འབྲེལ་བ་ངེས་ཅན་ཡོད་ལ། གནའ་བོའི་རོལ་ཆ་དག་ནི་ཚན་རིག་རང་བཞིན་ཅན་ཞིག་ཏུ་བཟོས་ཡོད་སྟབས་ང་ཚོས་སྤྱོད་སྐབས་ཧ་ཅང་སྟབས་བདེ་ཡིན། ངས་རོལ་ཆ་འདི་དག་མ་གཞི་བྱས་ཏེ་གནའ་དེང་ཟུང་འབྲེལ་གྱི་ལག་རྩལ་ཉམས་ལེན་བྱས་ནས། བཟོ་གྲྭ་ཚད་ལྡན་ཞིག་དང་མཉམ་འབྲེལ་བྱས་ཏེ། རྒྱུ་ཆར་ཤིང་ཡག་ཤོས་བཀོལ་ནས་བེད་སྤྱོད་དང་ཉར་ཚགས་ཀྱི་རིན་ཐང་གཉིས་འཛོམས་ཀྱི་རོལ་ཆ་ལེགས་ཤོས་ཤིག་བཟོ་བར་འབད་བཞིན་ཡོད། ཉེ་ལམ་བཟོས་པའི་རོལ་ཆའི་མིང་ལ་རྒྱུད་མངས་ཞེས་ཟེར་ཞིང་། མིང་འདི་ནི་དགེ་རྒན་སྐུ་རྒྱབ་ཚུལ་ཁྲིམས་སྙིང་པོ་དང་ཨ་ཁུ་ཚངས་དབང་དགེ་འདུན་བསྟན་པ་རྣམ་གཉིས་ཀྱིས་བཏགས་ཤིང་། ལྟག་བླ་མ་ཨོ་རྒྱན་ཆོས་འཕེལ་ལགས་ཀྱི་གདེང་འཇོག་གང་ལེགས་ཐོབ་ལ། ལྷ་རིས་སྒྱུ་རྩལ་པ་གྲགས་ཅན་ལེགས་སྨོན་གྱིས་རྒྱུད་མངས་ཞེས་པའི་ཡི་གེ་དེ་ཉིད་རི་མོའི་རྣམ་པ་ཅན་གྱི་རྟགས་མ་འདི་བྲིས་པ་ཡིན། རྒྱུད་མངས་གང་དེ་བྱིས་པ་ཚོ་ལ་ཆེད་དུ་དམིགས་ནས་བཟོས་པ་ཡིན་ལ་རིན་གོང་ཡང་རོལ་ཆ་གཞན་དང་བསྡུར་ན་ཆུང་། ཐེངས་འདིའི་སྒྲ་སྙན་ལ་རིགས་མི་འདྲ་བ་བཞི་ཡོད་ཅིང་ཆེ་ཆུང་ཡང་མ་འདྲ་བ་གསུམ་ཡོད། དེ་ཡང་བྱིས་པ་དང་བུད་མེད་ལ་དབང་བའི་སྒྲ་སྙན་རིགས་གཉིས་ཆེད་དུ་བཟོས་ཡོད། དེ་མིན་ཆེད་ལས་གླུ་ལེན་མཁན་སོགས་ལའང་གཅིག་བཟོས་ཡོད།
གསར་འགོད་པ། ཁྱེད་ཀྱིས་མ་འོངས་པའི་གླུ་དབྱངས་ལས་དོན་ལ་འཆར་འགོད་དང་རེ་བ་ཅི་ཞིག་ཡོད།
དཔལ་ཆེན་རྡོ་རྗེ། ངའི་རེ་བར་མུ་མཐུད་དུ་བོད་ཀྱི་རོལ་དབྱངས་ཀྱི་ཉིང་བཅུད་སྔོག་འདོན་གཏིང་ཟབ་བྱས་ཏེ། བརྩམས་ཆོས་མང་པོ་གསར་རྩོམ་བྱེད་ཐུབ་པར་སྨོན། ངས་ལོ་འདི་དག་གི་རིང་ལ་སྲོལ་རྒྱུན་རོལ་དབྱངས་དང་དམངས་ཁྲོད་གླུ་གཞས་སོགས་ཉར་ཚགས་ཀྱི་ལས་ལ་བརྩོན་པ་བསྐྱེད་དེ་བོད་ཀྱི་རོལ་དབྱངས་ལ་མོས་པ་ཡོད་མཁན་ཚོར་བོད་ཀྱི་རོལ་དབྱངས་དངོས་དེ་ཉམས་སུ་མྱོང་དུ་འཇུག་འདོད་པ་དང་། མུ་མཐུད་དུ་ས་ཆ་གང་མང་ལ་སོང་ནས་སྲོལ་རྒྱུན་གླུ་གཞས་ཉར་ཚགས་དང་རྒྱུད་འཛིན་དར་སྤེལ་ཅི་ཐུབ་བྱ་རྒྱུའི་སེམས་ཤུགས་བཅངས་ཡོད། དེ་དང་མཉམ་དུ་ང་རང་བོད་ཀྱི་ལུང་པ་སོ་སོར་སོང་ནས་བྱིས་པ་ཚོ་ལ་ཆེད་དུ་སྒྲ་སྙན་དང་འབྲེལ་བའི་རོལ་དབྱངས་ཟབ་སྦྱོང་འཛིན་གྲྭ་བསྒྲུབ་འཆར་ཡོད། ང་ཚོས་རྩ་ཆེ་བའི་ཤུལ་བཞག་རིག་གནས་འདི་རྒྱུན་འཛིན་བྱས་ཏེ། མཉམ་དུ་བོད་ཀྱི་རོལ་དབྱངས་རིག་གནས་ཀྱི་སྤེལ་རེས་དང་འཕེལ་རྒྱས་ལ་སྐུལ་འདེད་གཏོང་བར་རེ་སྒུག་བྱས་ཡོད། མཇུག་མཐར་ཚང་མས་བོད་ཀྱི་རོལ་དབྱངས་ལ་དོ་ཁུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། །