འགྲོས་མགྱོགས་པའི་ཧྲེན་ཀྲེན་དམིགས་བསལ་ས་ཁུལ་དུ་འཚོ་བ་དལ་མོ་རོལ་བའི“དྲི་ཟའི་དགའ་ཚལ”ཞིག་ཡོད། ཧྲང་ཝེ་གྲོང་པ་ནི་ཧྲེན་ཀྲེན་གྲོང་ཁྱེར་ལུང་ཧྭ་ཆུས་སུ་གནས་པ་དང་ལོ་ངོ་400ལྷག་གི་ལོ་རྒྱུས་ལྡན་པའི་ཁོ་ཅ་པའི་གྲོང་པ་རྙིང་པ་ཞིག་ཡིན།
དུས་རབས་20པའི་ལོ་རབས་90པར། ཧྲང་ཝེ་གྲོང་པས་ཐོན་ལས་རིགས་སྒྱུར་ཁྲོད“ཡོང་འབབ་གསུམ་དང་ཁ་གསབ་གཅིག”གི་ཁེ་ལས་ནང་འདྲེན་བྱས་ཏེ། མ་དངུལ་བཏང་ནས་ཧྲང་ཝེ་བཟོ་ལས་གླིང་ཁུལ་བསྐྲུན་པ་དང་ས་གནས་དེ་གའི་གྲོང་མི་མང་པོ་ཞིག་གཅིག་རྗེས་གཉིས་མཐུད་དུ་སྡོད་ཁང་རྙིང་པ་ནས་སྤོས་པ་རེད།
2017ལོ་ནས་བཟུང་། སྲིད་གཞུང་གིས་རང་བྱུང་སྐྱེ་ཁམས་རྨང་གཞི་དང་རིག་གནས་གསར་གཏོད་ཁྱད་ཆོས་སུ་བརྩིས་ཐོག །སྒྱུ་རྩལ་ཤེས་ལྡན་མི་སྣ་ནང་འདྲེན་བྱས་ནས་ཧྲང་ཝེ་གྲོང་པ་ལ་བཅའ་སྡོད་དང་། སྒྱུ་རྩལ་ལ་བརྟེན་ནས་གནའ་གྲོང་ལ་གསོན་ཤུགས་བསྐྱེད་པས། རིག་གནས་ཀྱིས་གྲོང་གསེབ་དར་རྒྱས་གཏོང་བར་མངོན་འགྱུར་བྱུང་།
ད་ལྟའི་ཧྲང་ཝེ་གྲོང་པ་རུ་ལོ་བརྒྱའི་ལོ་རྒྱུས་ལྡན་པའི་བཙན་རྫོང་5དང་ཁོ་ཅ་པའི་ཁང་རྙིང་50ལ་ཉེ་བ་སོར་འཇོག་བྱས་ཡོད་པར་མ་ཟད། སྒྱུ་རྩལ་མཁས་ཅན་ལས་དོན་ཁང་དང་དངོས་མང་བཤམས་སྟོན་ཁང་། འགྲེམས་སྟོན་ཁང་སོགས་ནམ་མཁའི་སྐར་ཚོགས་བཀྲ་བ་ལྟར་གྱུར་ཡོད། རིག་གནས་སྒྱུ་རྩལ་གྱི་ཤེས་ལྡན་མི་སྣ་བརྒྱ་ཙམ་དེ་གར་འཛོམས་པ་དང་། ཁྱད་ལྡན་རིག་གནས་བྱེད་སྒོ་སྣ་ཚོགས་ལ་བརྟེན་ནས་མི་ཐེངས་ཁྲི་7ཙམ་ནང་འདྲེན་བྱས་ཡོད།
སྒྱུ་རྩལ་གྱི་ཉམས་འགྱུར་ཟབ་མོའི་ཁྲོད་ཧྲང་ཝེ་གྲོང་པ་ལ་གསོན་ཤུགས་པ་གསར་པ་རྒྱས་ཡོད།
དེ་དང་དུས་མཚུངས་སུ། “ཧྲང་ཝེའི་མ་དཔེ”ལ་གཞན་དག་གིས་རྒྱུན་ཆད་མེད་པར་སློབ་སྦྱོང་དང་ཁྱབ་གདལ་བཏང་བས། མཐའ་འཁོར་གྱི་ཨུ་ཏི་ཞ་དང་ཞི་ཁེང་སོགས་ཁོ་ཅ་གནའ་གྲོང་གིས་ཀྱང་འཕོ་འགྱུར་གསར་པ་བསུ་བཞིན་མཆིས། །