སི་ཁྲོན་ཞིང་ཆེན་མི་རིགས་མཐུན་སྒྲིལ་ཡར་ཐོན་གྱི་སྲོལ་ཡིག

ལེའུ་གསུམ་པ། མི་རིགས་ཁག་འགྲོ་འོང་སྤེལ་རེས་དང་མཉམ་འདྲེས་ཡོང་བར་སྐུལ་འདེད་གཏོང་བའི་སྐོར།

དོན་ཚན་སོ་གཉིས་པ། རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གིས་གྲོང་ཁྱེར་དང་གྲོང་གསེབ་འཛུགས་སྐྲུན་གྱི་བཀོད་སྒྲིག་འཆར་གཞི་དང་སྤྱི་པའི་ཞབས་ཞུའི་ཐོན་ཁུངས་བཀོད་སྒྲིག་གཅིག་གྱུར་གྱིས་འཆར་འགོད་བྱས་ཏེ། མི་རིགས་ཁག་འགྲོ་འོང་སྤེལ་རེས་དང་མཉམ་འདྲེས་ཡོང་བར་སྐུལ་འདེད་གཏོང་བའི་སྤྱི་ཚོགས་ཀྱི་སྤྱི་པའི་ཞབས་ཞུའི་སྒྲིག་སྲོལ་དང་ལམ་སྲོལ་འཛུགས་པ་དང་འཐུས་ཚང་དུ་གཏོང་བ་དང་། མི་རིགས་ཁག་མཉམ་སྡོད་མཉམ་སྦྱོང་དང་། མཉམ་སྒྲུབ་མཉམ་སྐྱིད། མཉམ་སྐྲུན་མཉམ་སྤྱོད་བཅས་ཀྱི་སྤྱི་ཚོགས་ཀྱི་ཆ་རྐྱེན་ཧུར་ཐག་གིས་བསྐྲུན་ཏེ། ཕན་ཚུན་སྦྱོར་བའི་རྣམ་པའི་སྤྱི་ཚོགས་ཀྱི་གྲུབ་ཚུལ་འཛུགས་སྐྱོང་དང་། མི་རིགས་ཁག་མཛའ་མཐུན་དང་ཕན་ཚུན་ལྟ་རེས་རོགས་རེས་བྱེད་པའི་སྤྱི་ཚོགས་ཀྱི་ཁོར་ཡུག་བསྐྲུན་དགོས།

དོན་ཚན་སོ་གསུམ་པ། ས་གནས་མི་དམངས་སྲིད་གཞུང་རིམ་པ་ཁག་གིས་མི་རིགས་ཁག་གི་བྱེས་འགྲོའི་མི་འབོར་ལ་གཞི་རྩའི་སྤྱི་པའི་ཞབས་ཞུ་ཆ་སྙོམས་ཅན་ལོངས་སུ་སྤྱོད་རྒྱུ་ཡོད་པར་འགན་སྲུང་བྱ་དགོས།

དོན་ཚན་སོ་བཞི་པ། རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་གི་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་གཙོ་སྐྱོང་སྡེ་ཁག་གིས་ངལ་རྩོལ་ལ་ལྟ་ཞིབ་བྱེད་ཤུགས་ཆེ་རུ་བཏང་ནས་མི་རིགས་ཁག་གི་སྤྱི་དམངས་འདྲ་མཉམ་ངང་ལས་ཀར་ཞུགས་པ་དང་ངལ་རྩོལ་གྱི་ཐོབ་ཆ་ཐོབ་པའི་ཁེ་དབང་འགན་སྲུང་བྱ་དགོས་པ་དང་། ལས་ཀར་ཞུགས་པར་མཐོང་ཆུང་དང་བསམ་ངན་བཅངས་ནས་གླ་ཕོགས་ཆད་པ་སོགས་ཁྲིམས་འགལ་བྱ་སྤྱོད་ལ་ཁྲིམས་ལྟར་ཆད་པ་གཅོད་དགོས།

དོན་ཚན་སོ་ལྔ་པ། ས་གནས་མི་དམངས་སྲིད་གཞུང་རིམ་པ་ཁག་གིས་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་སློབ་གསོ་དེ་རྒན་རྒོན་ལས་དོན་མ་ལག་ནང་བཅུག་སྟེ་མི་རིགས་མཐུན་སྒྲིལ་ཡར་ཐོན་བྱ་གཞག་ཁྲོད་ཀྱི་རྒན་རྒོན་གྱི་དགེ་མཚན་ལྡན་པའི་ནུས་པ་འདོན་སྤེལ་བྱས་ནས་རྒན་གསོའི་བྱ་གཞག་དང་མི་རིགས་མཐུན་སྒྲིལ་ཡར་ཐོན་བྱ་གཞག་མཉམ་འདྲེས་ངང་འཕེལ་རྒྱས་ཡོང་བར་སྐུལ་འདེད་གཏོང་དགོས།

དོན་ཚན་སོ་དྲུག་པ། ས་གནས་མི་དམངས་སྲིད་གཞུང་རིམ་པ་ཁག་དང་དེའི་འབྲེལ་ཡོད་སྡེ་ཁག(སྡེ་ཚན)གིས་བྱེད་སྟངས་དང་བྱེད་ཐབས་གསར་གཏོད་བྱས་ཏེ་གཞོན་ནུ་ལོ་ཆུང་གི་ཁྲོད་དུ་མི་རིགས་མཐུན་སྒྲིལ་ཡར་ཐོན་གྱི་སློབ་གསོ་དང་ལག་ལེན་གྱི་བྱེད་སྒོ་རྒྱ་ཁྱབ་ཏུ་སྤེལ་བ་དང་། གཞོན་ནུ་ལོ་ཆུང་ལ་མཐུན་སྒྲིལ་དང་། གོང་བུར་འགྲིལ་བ། སྣེ་ཁྲིད་བཅས་བྱས་ཏེ་མི་རིགས་མཐུན་སྒྲིལ་ཡར་ཐོན་གྱི་བྱ་གཞག་ནང་ཧུར་ཐག་ཞུགས་ནས་མི་རིགས་ཁག་གི་གཞོན་ནུ་ལོ་ཆུང་རྣམས་ཕན་ཚུན་རོགས་རམ་དང་ཕན་ཚུན་སློབ་སྦྱོང་བྱེད་པའི་ཁྲོད་མཉམ་དུ་འཚར་ལོངས་ཡོང་བར་སྐུལ་འདེད་གཏོང་དགོས།

དོན་ཚན་སོ་བདུན་པ། ས་གནས་མི་དམངས་སྲིད་གཞུང་རིམ་པ་ཁག་དང་དེའི་འབྲེལ་ཡོད་སྡེ་ཁག(སྡེ་ཚན།) འདྲི་གཅོད་ལས་ཁུངས། ཞིབ་དཔྱོད་ལས་ཁུངས་བཅས་ཀྱིས་མི་རིགས་ཁག་གི་སྤྱི་དམངས་ཀྱི་ཁྲིམས་མཐུན་ཁེ་དབང་ཁྲིམས་ལྟར་འགན་སྲུང་དང་། མི་རིགས་ཀྱི་རྒྱུ་རྐྱེན་དང་འབྲེལ་བ་ཡོད་པའི་གྱོད་གཞིའི་དོན་རྐྱེན་ཁྲིམས་ལྟར་ཐག་གཅོད་འོས་འཚམ་བྱ་དགོས། འགལ་བ་དང་རྩོད་གཞི་སྣ་མང་གི་འདུམ་འགྲིག་ལས་དོན་ཡག་པོ་བྱས་ཏེ་མི་རིགས་ཀྱི་རྒྱུ་རྐྱེན་དང་འབྲེལ་བ་ཡོད་པའི་འགལ་བ་དང་རྩོད་གཞི་འདུམ་འགྲིག་བྱ་རྒྱུ་དེ་གྲོང་ཁྱེར་དང་གྲོང་གསེབ་ཀྱི་སྡེ་ཁུལ་བཅོས་སྐྱོང་དང་ཞབས་ཞུའི་མ་ལག་འཛུགས་སྐྱོང་ནང་འཇུག་དགོས།

དོན་ཚན་སོ་བརྒྱད་པ། གྲོང་ཚོ(གྲོང་མི)ཨུ་ཡོན་ལྷན་ཁང་གིས་གྲོང་ཚོ(གྲོང་མི)ཡོངས་ཀྱི་རང་སྐྱོང་ནང་རྐྱེན་དང་ཀུན་སྤྱོད་དཔྱད་མོལ་ནང་རྐྱེན་འཐུས་སྒོ་ཚང་དུ་གཏོང་བ་དང་། ནང་དོན་ཕུན་སུམ་ཚོགས་ཤིང་རྣམ་པ་སྣ་ཚོགས་པའི་མང་ཚོགས་རང་བཞིན་གྱི་སྤེལ་རེས་བྱེད་སྒོ་སྤེལ་བ། རང་སྐྱོང་དང་ཁྲིམས་སྐྱོང་། སྤྱོད་བཟང་གིས་སྐྱོང་བ་བཅས་མཉམ་འདྲེས་ཡོང་བར་སྐུལ་འདེད་གཏོང་བ། ཡ་རབས་ཚུལ་ལྡན་དང་།

འཆམ་མཐུན། མཐུན་སྒྲིལ། ཡར་ཐོན་བཅས་ཡིན་པའི་གྲོང་ཚོ(སྡེ་ཁུལ)ཁོར་ཡུག་འཛུགས་སྐྱོང་བྱ་དགོས།

གྲོང་ཚོ(གྲོང་མི)ཨུ་ཡོན་ལྷན་ཁང་གིས་མི་རིགས་ཁག་གི་གྲོང་ཚོ(གྲོང་མི)མི་དམངས་ལ་མཐུན་སྒྲིལ་ཟབ་ཏུ་གཏོང་བ་དང་། ཕན་ཚུན་བརྩི་འཇོག་དང་ཕན་ཚུན་རོགས་རམ་བཅས་བྱ་རྒྱུའི་སློབ་གསོ་དང་ཁྲིད་སྟོན་བྱས་ཏེ། མི་རིགས་ཁག་གི་གྲོང་ཚོ(གྲོང་མི)མི་དམངས་སྒྲིག་འཛུགས་དང་བསྡུ་ལེན་བྱས་ནས་གྲོང་ཚོའི(སྡེ་ཁུལ)སྤྱི་པའི་ལས་དོན་དང་གཞི་རིམ་གྱི་དྲ་མིག་ཅན་གྱི་བཅོས་སྐྱོང་ནང་ཞུགས་སུ་འཇུག་དགོས།

གྲོང་ཚོ(སྡེ་ཁུལ)ཡིས་མི་རིགས་མཐུན་སྒྲིལ་ཡར་ཐོན་གྱི་དོན་ཚན་གྲོང་སྲོལ་དམངས་ཆིངས་དང་གྲོང་མིའི་སྤྱི་ཆིངས་ནང་འཇུག་པར་མ་ཟད་ལག་བསྟར་སྒྲིག་འཛུགས་བྱེད་པར་བསྔགས་སྐུལ་དང་རྒྱབ་སྐྱོར་བྱ་དགོས།

དོན་ཚན་སོ་དགུ་པ། རྩ་འཛུགས་གང་དང་སྐྱེ་བོ་སུ་ཞིག་གིས་ཀྱང་གཤམ་གསལ་གྱི་བྱ་སྤྱོད་སྤེལ་མི་ཆོག་སྟེ།

(གཅིག)ས་ཁོངས་དང་། མི་རིགས། ཡུལ་སྲོལ་གོམས་གཤིས། ཆོས་ལུགས་དད་མོས་སོགས་ལ་ཁ་གཡར་ནས་སྤྱི་པའི་ཞབས་ཞུ་འདོན་སྤྲོད་དང་ལེན་མི་བྱེད་པའམ་ཡང་ན་རྣམ་པ་འགྱུར་བའི་སྒོ་ནས་དང་ལེན་མི་བྱེད་པ་དང་། ཚོང་རར་ཞུགས་འཐུས་དང་འོས་སྐུལ་འོས་དཔོད་སོགས་ཀྱི་ཐད་ཚོད་འཛིན་ཆ་རྐྱེན་བཀོད་སྒྲིག་བྱེད་པའམ་རྣམ་པ་འགྱུར་བའི་སྒོ་ནས་བཀོད་སྒྲིག་བྱེད་པ།

(གཉིས།)མི་རིགས་ཀྱི་གྲུབ་ཆའི་རྐྱེན་གྱིས་དངུལ་རྩ་དང་འཛད་སྤྱོད། བོགས་མར་གཏོང་ལེན། མཚམས་སྦྱོར་སོགས་ཀྱི་ཚོང་ལས་ཞབས་ཞུ་འདོན་སྤྲོད་མི་བྱེད་པའམ་ཡང་ན་རྣམ་པ་བསྒྱུར་ནས་དང་ལེན་མི་བྱེད་པ།

(གསུམ།)ལས་བཟོ་པ་དང་ལས་མི་རྒྱུགས་ལེན་དང་བསྡུ་ལེན། གདན་ཞུ་བཅས་བྱེད་སྐབས་དམིགས་བསལ་གྱི་ས་ཁོངས་དང་མི་རིགས་ཀྱི་སྤྱི་དམངས་བསྡུ་ལེན་མི་བྱེད་པ་དང་གདན་ཞུ་མི་བྱེད་པ་སོགས་ཀྱི་བྱ་སྤྱོད་སྤེལ་བ།

(བཞི།)མི་རིགས་མི་འདྲ་བའི་སྤྱི་དམངས་བར་བྱུང་བའི་འགལ་བ་དང་རྩོད་གཞི་ངན་སེམས་བཅངས་ནས་འུད་སྒྲོག་དང་ཁྱབ་སྤེལ་བྱས་པ།

(ལྔ།)བསམ་བཞིན་དུ་མི་རིགས་ཀྱི་ཐོབ་ཐང་འུད་སྒྲོག་བྱས་ནས་བཙན་ཤེད་དམ་ཚུལ་མིན་གྱི་བྱེད་ཐབས་གཞན་དག་ལ་བརྟེན་ནས་ཁེ་ཕན་དོན་གཉེར་བྱས་པ།

(དྲུག)མི་རིགས་མཐུན་སྒྲིལ་དང་མི་རིགས་ཀྱི་བརྩེ་དུང་ལ་གནོད་འཚེ་གཏོང་བའི་བྱ་སྤྱོད་གཞན་དག（མུ་འགོད།）