གསར་འགྱུར་ཁྲོད་ཀྱི་ཐ་སྙད་དང་ཚིག་གི་ལོ་ཙཱ་བྱེད་ཚུལ་ཅུང་ཙམ་བཤད་པ།

གཅིག ཐ་སྙད་ལོ་ཙཱ་བྱེད་ཚུལ།

2022ལོའི་པེ་ཅིན་དགུན་དུས་ཨོ་རྩལ་འགྲན་ཚོགས་ཀྱི་གསར་འགྱུར་དང་འབྲེལ་བའི་ཐ་སྙད་ལོ་ཙཱ་བྱས་པ་ལ། “冰鞋”“冰壶”སོགས་དོན་སྒྱུར་བྱས་པ་དང་། “འཁྱགས་ལྷམ”དང་“འཁྱགས་འཁྱིལ”ཞེས་རྒྱ་ཡིག་གི་འགྲོས་བཞིན་དུ་“འཁྱགས”ནི་སྔོན་ལ་ཐོན་ཡོད། དེ་ནི་རྒྱ་ཡིག་གི་དོན་དང་མཐུན་ལ་བོད་ཡིག་ཏུ་བརྗོད་ཀྱང་བདེ། ལ་ལ་རྒྱ་ཡིག་དང་མ་བསྟུན་པ་ཡང་ཡོད། དཔེར་ན“漏门”ནི“旗门”དོན་སྒྱུར་བྱས་པའི་རྨང་གཞིའི་ཐོག་ནས་དོན་ལ་གོ་བ་བླངས་ཏེ་ལོ་ཙཱ་བྱས་ཡོད། ཐ་སྙད་ལོ་ཙཱ་བྱེད་པར་མ་ཡིག་གི་དོན་ལས་གཞན་ཡི་གེའི་མང་ཉུང་དང་སྐད་ཆའི་གཏན་ཚིགས་ལ་ཡང་དང་དོད་བྱེད་དགོས་པ། དཔེར་ན“单板滑雪”ནི“ཡ་པང་གངས་ཤུད”ཅེས་བོད་ཡིག་ལ་ཡང་ཡི་གེ་བཞི་ཅན་དུ་ལོ་ཙཱ་བྱས་འདུག དེ་ནི་ཡི་གེ་རེ་རེ་བཞིན་རྒྱ་ཡིག་དང་ལྟོས་ཟླ་གྲུབ་ཡོད། གཞན་ལྟོས་ཟླ་གྲུབ་མེད་པ་ཡང་ཡོད་དེ། དཔེར་ན“北欧两项”ནི“ཡོ་རོབ་བྱང་མའི་རྣམ་གྲངས་གཉིས”ཞེས་ལོ་ཙཱ་བྱས་ཡོད། རྒྱ་ཡིག་ལ“北欧”ནི་བསྡུས་མིང་དང་། བོད་སྐད་ཀྱི་གཏན་ཚིགས་ཁྲོད“ཡོ་བྱང་”ཞེས་པའི་བསྡུས་མིང་ལ་གོ་རྒྱུ་ཅི་ཡང་མེད་པས“ཡོ་རོབ་བྱང་མའི་རྣམ་གྲངས་གཉིས”ཞེས་མིང་ཆ་ཚང་ལོ་ཙཱ་བྱས་པ་རེད། སྤྱིར་སྐད་ཡིག་ཅིག་ཏུ་སྐད་ཡིག་གཞན་ནས་ཆེད་སྤྱོད་ཐ་སྙད་གསར་པ་ཞིག་ལོ་ཙཱ་བྱེད་པར་དོན་སྒྱུར་བྱེད་པའི་དགོས་པ་མེད་ཚེ་སྒྲ་སོར་འཇོག་བྱས་ཆོག །དཔེར་ན“冰墩墩”“雪容融”ནི“པིང་ཏུན་ཏུན”“ཞོལ་རུང་རུང་”ཞེས་སྒྲ་རང་སོར་བཞག་ཡོད། དེ་ལྟར་སྒྲ་རང་སོར་བཞག་པས་དོན་ལ་འཁྲུལ་བ་མི་འབྱུང་བ་དང་གོ་བདེ་བའི་ཡོན་ཏན་ལྡན། གཞན་ཡང་རྒྱལ་སྤྱིའི་སྟེང་ཀུན་གྱིས་སྤྱོད་པའི་བརྡ་རྟགས་ཡོད་ཚེ་ཡང་རང་སོར་བཞག་ཆོག་སྟེ། “U型场地技巧”ཞེས་པའི་སྐབས་སུ“U”ཐད་ཀར་སོར་འཇོག་དང་ཡི་གེ་གཞན་དག་དོན་སྒྱུར་བྱས་འདུག །འདིའི་སྐབས་སུ་ལོ་ཙཱ་བས་རྒྱལ་སྤྱིའི་འགྲོ་ལུགས་ལྟར་དུ་འགྱུར་ཡིག་གིས་མ་ཡིག་གི་བརྡ་རྟགས་སྲུང་འཛིན་བྱས་པ་ཤེས་ནུས།

ཏོག་གསར་གློ་ཚད་རིམས་ནད་ཀྱི་རིང་ལ་རྒྱལ་ཡོངས་ལ་གནོད་པ་ཚབས་ཆེན་ཐེབས། སྐབས་དེ་དུས་ཏོག་གསར་གློ་ཚད་རིམས་འགོག་སྐོར་གྱི་གསར་འགྱུར་དུས་ཐོག་ཏུ་ལོ་ཙཱ་བྱེད་རྒྱུ་ནི་ཁ་ཚ་དགོས་གཏུག་གི་ལས་དོན་ཞིག་ཏུ་གྱུར། རྒྱ་ཡིག་ཐ་སྙད་དག་ལས“阿兹夫定片”ནི་ཆེད་སྤྱོད་ཀྱི་ཐ་སྙད་ཡིན་པས་སྒྲ་སོར་འཇོག་བྱས་ཡོད། དེ་ནི《སྒྲ་སྦྱོར་བམ་པོ་གཉིས་པ།》ཡི་ནང་དུ་རྒྱ་གར་དུ་ཡོད་ལ་བོད་དུ་མེད་པའི་རིགས་སྒྲ་སོར་འཇོག་བྱས་པ་དང་དོན་གཅིག་པ་རེད།“冰贴”ལྟ་བུའི་ཐ་སྙད་ཁ་ཤས་ལ“གྲང་འབྱར། འཁྱགས་འབྱར” ལྟར་ལོ་ཙཱའི་འགྱུར་གཉིས་རེ་བྱས་ཡོད། དེ་ནི་ལོ་ཙཱའི་དངོས་སྤྱོད་རང་བཞིན་ལ་བསམ་གཞིགས་བྱས་པ་སྟེ། ཕ་རོལ་པོས་དུས་ཚོད་ཐུང་ངུའི་ནང་དུ་གང་བདེ་བེད་སྤྱོད་བྱེད་ཐུབ་པའི་ཆེད་ཡིན། “大白”ནི་རིམ་ནད་སྐབས་སུ་གློ་བུར་དུ་བྱུང་བའི་ཐ་སྙད་ཅིག་རེད། རྒྱ་ཡིག་ལ“大白”ཞེས་འབོད་དུས་སྙིང་ཉེ་བའི་ཆ་ཡང་ཡོད། བོད་ཡིག་ལ“གོས་དཀར་ཅན”དང་“དཀར་ཆེན”ཞེས་ལོ་ཙཱ་བྱས་པར་སྙིང་ཉེ་བའི་ཆ་སྟོན་མི་ཐུབ་པས། ཐ་སྙད་ཀྱི་དོན་ཆ་ཚང་བོད་ཡིག་གིས་མཚོན་ཐུབ་མེད། “场所码”ནི་རིམས་ནད་སྐབས་སུ་གནས་གང་དུ་སོང་བ་བརྟག་བྱེད་ཅིག་ཡིན། དེ་ནི་བོད་ཡིག་ལ“གནས་ཡུལ་བཤེར་རྟགས”ཞེས་བྱ་ཚིག“བཤེར”ཁ་སྣོན་བྱས་ཡོད། དེ་ཁ་སྣོན་མ་བྱས་ཚེ“གནས་ཡུལ་རྟགས”ཞེ་ན་ས་རྟགས་དང་ཡུལ་རྟགས་ཙམ་ལས“场所码”ཡི་བྱེད་ནུས་མཚོན་མི་ནུས།

2024ལོའི་རྒྱལ་ཡོངས་ཚོགས་ཆེན་གཉིས་ཀྱི《སྲིད་གཞུང་གི་ལས་དོན་སྙན་སྒྲོན》སོགས་སྙན་སྒྲོན་ཆེན་པོ་དག་ཏུ“新质生产力”ཞེས་པའི་ཐ་སྙད་ཅིག་ཐོན་པ་དང་། ཀྲུང་དབྱང་རླུང་འཕྲིན་བརྙན་འཕྲིན་ཁང་གི་གསར་འགྱུར་ལེ་ཚན་ལས་ཐ་སྙད་འདི་དམིགས་བསལ་གྱི་སྒོ་ནས་གསལ་བཤད་མང་པོ་གནང་ལ། 2024ལོའི་གསར་འགྱུར་ཐ་སྙད་གཙོ་བོ་ཞིག་ཏུ་གྱུར་ཟིན། ཚོགས་ཆེན་གཉིས་གྲོལ་མ་ཐག“ཐོན་སྐྱེད་ནུས་ཤུགས་གསར་མ”ཞེས་ལོ་ཙཱ་བྱས། ཡིན་ཡང་དེ་ནི་རྒྱ་ཡིག་གི་དོན་དང་མི་མཐུན་པར་འདོད་དེ། ཐ་སྙད་འབྱུང་ཁུངས（词源学）ཐད་ནས་བསམ་བློ་བཏང་ན། “新质生产力”ཞེས་པའི“生产力”ནི་ཐོན་སྐྱེད་ནུས་ཤུགས་དང་། “新”ནི་གསར་པ་དང་གསར་མའི་དོན་ཡིན། ཐ་སྙད་འདི་ལ་གོ་བ་ལེན་པའི་གནད་འགག“质”ཡི་ཐོག་ཏུ་བབ་ཡོད། སྤྱིར་ལོ་ཙཱ་བྱེད་པར་མ་ཡིག་ལ་གོ་བ་ཡག་པོ་ལོན་རྒྱུ་ནི་རྨང་གཞིའི་ལས་ཀ་དང་། དེའི་ཐོག་ནས་སྐད་ཡིག་མི་གཅིག་པའི་བར་ནང་དོན་གནད་ལ་འབྱོར་བའི་སྒོ་ནས་བརྗེ་སྤོར་བྱེད་དགོས་པ་ཡིན། སྐབས་འདིར་གསར་འགྱུར་གྱི་དུས་ཐོག་རང་བཞིན་གཙོར་བཟུང་ནས་སྟབས་སྟབས་པོར་ལོ་ཙཱ་བྱས་པས“质”ཡི་དོན་མཚོན་ཐུབ་མེད།

“新疆”ནི་རང་རྒྱལ་གྱི་སྲིད་འཛིན་ས་ཁུལ་ཅིག་གི་མིང་དང་གསར་འགྱུར་ཁྲོད་དུ་རྒྱུན་དུ་ཐོན། 《བོད་རྒྱ་ཤན་སྦྱར་ཚིག་མཛོད།》 ལྟར་ན“ཞིན་ཅང་”ཞེས་ལོ་ཙཱ་བྱེད་དགོས། ལྷ་ས་གཙོ་བྱས་པའི་དབུས་གཙང་སྐད་དུ་གསལ་བྱེད་ཡི་གེ་ཞ་ཡི་སྒྲ་ཤ་དང་ཉེ་བར་ཀློག་པས། དབུས་གཙང་སྐད་དང་བསྟུན་པའི་ཆེད་དུ“ཤིན་ཅང་”ཞེས་ལོ་ཙཱ་བྱས་འདུག །ཡིན་ཡང་ད་ལྟ་ཡོངས་ཁྱབ་ཏུ་སྤྱོད་པའི《བོད་རྒྱ་ཚིག་མཛོད་ཆེན་མོ།》ཡི་སྒྲ་སྦྱོར་རྩ་དོན་བརྩི་སྲུང་བྱས་མེད་པ་དང་།

སི་ཁྲོན་དང་། མཚོ་སྔོན། ཀན་སུའུ། ཡུན་ནན་ཏུ“ཞིན་ཅང་”ཞེས་ལོ་ཙཱ་བྱས་པ་དང་མི་མཐུན་ལ། ཀྲུང་གོའི་མི་རིགས་ཡིག་སྒྱུར་ཅུས་ཀྱི་ཐ་སྙད་བཀས་བཅད་དང་ཡང་མི་མཐུན། སྲིད་འཛིན་ས་ཁུལ་གྱི་མིང་ནི་ཤིན་ཏུ་གལ་ཆེ་བས། བོད་ཡིག་ཁྲོད་གཅིག་གྱུར་བྱེད་དགོས་པ་དང་། འདི་ལྟར་དབུས་གཙང་སྐད་ཁོ་ན་དང་བསྟུན་ཐབས་བྱས་པ་དེ་ཅུང་མི་ལེགས་སྙམ།

གཉིས། ཚིག་ལོ་ཙཱ་བྱེད་ཚུལ།

ཏོག་གསར་གློ་ཚད་རིམས་འགོག་སྐོར་གྱི་ཚིག་ཐུང་ཐུང་ལོ་ཙཱ་བྱས་པ་ལ། དཔེར་ན“白衣执甲、逆行出征” ནི་བོད་ཡིག་ལ“གོས་དཀར་ཅན་གྱིས་གོ་ཆ་སྤྲས། དཔའ་ངར་ཆེན་པོས་ཉེན་སྣར་སྐྱོད།”ཅེས་ལོ་ཙཱ་བྱས་ཡོད། དེ་ལས“白衣执甲”ནི་ཐད་སྒྱུར་བྱས་ཡོད། “逆行出征”ཞེས་པའི“逆行”ནི་ལྡོག་ནས་སྐྱོད་པ་དང་། “出征”ནི་གཡུལ་དུ་སྐྱོད་པའི་དོན་རེད། དེ་ཐད་ཀར་སྒྱུར་ན་ཉེན་ཁའི་མདུན་བསུས་ཏེ་ལྡོག་ཕྱོགས་སུ་དཔུང་སྐྱོད་པ་ཅེས་པ་ཡིན། གསར་འགྱུར་ལོ་ཙཱའི་སྐབས་སུ་ལོ་ཙཱ་བའི་སྐད་ཡིག་གཉིས་བར་གྱི་བརྗེ་འགྱུར་ཤེས་དགོས་ཤིང་། ཐ་སྙད་དང་ཚིག་གི་བརྗེ་འགྱུར་ལ་བརྟེན་ནས་ཕན་ཚུན་བར་གྱི་མི་མཐུན་པའི་ཆ་སེལ་ཐབས་བྱེད་དགོས། སྐབས་འདིར་བོད་ཡིག་ལ“དཔའ་ངར་ཆེན་པོས་ཉེན་སྣར་སྐྱོད།” ཅེས་“逆行”དང་“出征”ནི“ཉེན་སྣར་སྐྱོད”དང་“དཔའ་ངར་ཆེན་པོ”གཉིས་སུ་བརྗེ་འགྱུར་བྱས་ཏེ་རྒྱ་བོད་སྐད་ཡིག་གཉིས་ཀྱི་མི་མཐུན་པའི་ཆ་སེལ་ནས་དོན་ལེགས་པར་མཚོན། “一测一扫三查验”ནི“བརྟག་གཅིག་བཤེར་གཅིག་དཔྱད་ཞིབ་གསུམ”ཞེས་ལོ་ཙཱ་བྱས་ཡོད། འདིའི་གྲངས་ཀ་ལ་ནང་དོན་ངེས་ཅན་ལྡན་པ་དང་། གནད་འགག་དང་དམིགས་བསལ་དུས་ཀྱི་ཁ་འབོད་ཅིག་ཀྱང་ཡིན་པས། ཡི་གེ་རེ་རེ་བཞིན་ལོ་ཙཱ་དང་། གྲངས་ཀ་དག་ཀྱང་སོར་འཇོག་བྱས་པ་རེད།

རྒྱུན་མཐོང་གི་ཚིག་ཐུང་ཐུང་ལོ་ཙཱ་བྱས་པ། དཔེར་ན“绿水青山就是金山银山”ཞེས་པ་ནི“རི་སྔོན་ཆུ་དྭངས་གསེར་དངུལ་རི་ཡིན”ཞེས་པའི་དོན་རེད། ཡིན་ཡང་བོད་ཡིག་ཏུ“རི་སྔོན་ཆུ་དྭངས་གསེར་དངུལ་རི་ལས་ལྷག་པ”ཞེས་ལོ་ཙཱ་བྱས་འདུག །ཚིག་ངོས་ནས་བལྟས་ཚེ་ཚིག་སྦྱོར་དང་ནང་དོན་སོགས་ཚང་མ་གཅིག་མཐུན་ཙམ་བྱུང་ཡོད། ཡིན་ཡང་བོད་ཡིག་ཁྲོད་དུ“ལྷག་པ”ཞེས་བསྡུར་བ་སྟོན་པའི་མིང་ཐོན། རྒྱ་ཡིག་གི་ཁྲོད་དུ་བསྡུར་བ་སྟོན་པའི་མིང་མེད་པ་དང་། “ལྷག་པ”ཞེས་སྣོན་སྒྱུར་བྱས་པ་ནི་གོ་བ་ལེན་ནོར་ཤོར་སོང་སྙམ་པའི་དོགས་པ་སྐྱེ་རུ་འཇུག

གོང་དུ་བོད་རང་སྐྱོང་ལྗོངས་བོད་ཡིག་ཐ་སྙད་བཀས་བཅད་ཨུ་ཡོན་ལྷན་ཁང་གིས་གསར་འགྱུར་ཁྲོད་ཀྱི་ཐ་སྙད་དང་ཚིག་ལོ་ཙཱ་བྱས་ཚུལ་དཔེར་བཀོད་ནས་དབྱེ་ཞིབ་བྱས་པ་ལ་སྡོམ་ཚིག་གསུམ་ཐོབ་སྟེ། གཅིག་ནས་ཐ་སྙད་དང་ཚིག་གི་ལོ་ཙཱ་ལ་དོན་སྒྱུར་དང་སྒྲ་སྒྱུར་གཉིས་ཀ་བྱས་པ་དང་གཙོ་ཆེ་བ་དོན་སྒྱུར་ཡིན། གཉིས་ནས་ཐ་སྙད་དང་ཚིག་ནི་རྒྱ་ཡིག་གི་མ་ཡིག་དང་ཕལ་ཆེར་ཡིག་འབྲུ་རེ་རེ་བཞིན་བསྟུན་ཐབས་བྱས་པ་དང་། དེ་ནི་གསར་འགྱུར་ལ་ནོར་འཛོལ་མི་འབྱུང་བར་ཕན། གསུམ་ནས་དམིགས་བསལ་གྱི་རྟགས་དང་ཨང་ཀི་ནི་རྒྱལ་སྤྱིའི་ཚད་གཞི་ལྟར་རང་སོར་བཞག་ཡོད། （རྩོམ་པ་པོ། བོད་ལྗོངས་ཉིན་རེའི་ཚགས་པར་ལས་ཁུངས་བོད་ཡིག་རྩོམ་སྒྲིག་པུའུ།）