སྔོན་གླེང་།
རྒན་མཁར་རྨེའུ་བསམ་གཏན་ལགས་ཀྱི་དབྱིན་ཡིག་གི་དཔྱད་རྩོམ་ཕྱོགས་སྒྲིག《མདའ་དང་འཕང་》(The Arrow and the Spindle) ཞེས་པ་འདས་པོ་བདེ་ཁང་བསོད་ནམས་ཆོས་རྒྱལ་ལགས་ཀྱིས་བོད་འགྱུར་བྱས་ཤིང་། ཀྲུང་གོའི་བོད་རིག་པ་དཔེ་སྐྲུན་ཁང་གིས་སྔ་ཕྱིར་2007ལོར་དེབ་གཟུགས་གཉིས་ཅན་དཔེ་སྐྲུན་བྱས་པར་ཁྱོན་དཔྱད་རྩོམ་སུམ་ཅུ་ཡོད་པ་དང་། 2020ལོར་དེབ་གཟུགས་གསུམ་ཅན་དཔེ་སྐྲུན་བྱས་པར་སྔར་ཡོད་ཀྱི་སྟེང་ལ་དེབ་གཟུགས་གཅིག་དང་དཔྱད་རྩོམ་ཉེར་གཅིག་ཁ་སྣོན་བྱས་ཡོད་ལ། སྔ་ཕྱིར་ཁྱོན་དཔྱད་རྩོམ་ལྔ་གཅིག་ཡོད། ལྷག་པར་དུ་རྒན་ལགས་ནས་སྤྱི་ལོ་2020ལོའི་ཟླ་9པ་ནས་10པའི་བར་ཀྲུང་དབྱང་མི་རིགས་སློབ་ཆེན་དུ་དུས་ཡུན་ཟླ་ངོ་གཅིག་ཙམ་གྱི་རིང་ལ་འཆད་ཁྲིད་དང་བགྲོ་གླེང་གནང་བ་ཕྱིས་སུ《བོད་རིག་པའི་འཆད་ཁྲིད་གཅེས་བཏུས།》ཞེས་པའི་དེབ་ཏུ་བསྡུས་ནས་པར་དུ་བཏབ་པ་སོགས་འགྲེམ་སྤེལ་བྱུང་བས། བོད་ཡིག་གི་དཔྱད་རྩོམ་འབྲི་བའི་སྡིངས་ཆ་ཚད་གསར་པ་ཞིག་ཏུ་བསྟད་པ་ནི་བོད་ཡིག་གི་དཔྱད་རྩོམ་འབྲི་མཁན་ཞིག་ཡིན་ན་ངེས་ཤེས་ཟབ་མོ་ཡོད་པ་ཁོ་བོ་ཡིད་ཆེས་ལ། འདིར་དེབ་འདིའི་ཁ་བྱང་མདའ་དང་འཕང་ཞེས་པ་ལས་འཕྲོས་པའི་གཏམ་ཐུང་ངུ་ཞིག་འཆད་པ་ལ།
དངོས་གཞི།
ཉེ་ཆར། གཉེན་སྟོན་གྱི་མཛད་སྒོ་སྤེལ་འཆར་ལ་གཉེན་ཉེ་དུ་དང་གྲོགས་ཕན་ཚུན། ཁ་ཟླ་ངོ་ཤེས་མང་པོས་གྲོགས་ཚོམས་སོགས་སུ“སྟང་གི་སྲོག་མདའ་ཉ་མིག་དང་། །དཔྱལ་གྱི་གསེར་འཕང་གཡུ་ལོ་གཉིས། །དང་པོ་སྐྱེས་པ་སོ་སོར་སྐྱེས། །བར་དུ་སྨིན་པ་སོ་སོར་སྨིན། །ཐ་མར་བསྡུས་པ་གཅིག་ཏུ་བསྡུས། །”ཞེས་པ་དང་། ཡང་ན“ཕོ་སྲོག་དེ་ནི་མདའ་ལ་རྟེན། །མོ་སྲོག་དེ་ནི་འཕང་ལ་རྟེན། །མདའ་འཕང་གཉིས་ནི་ལྷ་ལ་བཅོལ། །མདའ་འཕང་དེ་ནི་མ་འབྲལ་ཅིག །”དང་“ཕོ་སྲོག་གསེར་གྱི་ཀ་བ་མ་འགྱེལ་ཞིག །མོ་སྲོག་གཡུ་ཡི་གདུང་མ་མ་ཆག་ཅིག”ལ་སོགས་པའི་བཀྲ་ཤིས་བདེ་ལེགས་ཀྱི་སྨོན་འདུན་དང་ཁ་གཡང་གི་ཚིག་དུམ་མང་དུ་མཐོང་རྒྱུ་འདུག་པ་འདི་དག་གི་འདྲེན་ས་གཙོ་བོ་ནི་བོན་གྱི་གཉེན་སྒྲིག་ཆོ་གའི་དཔེ་ཆ《མིང་སྲིང་དཔལ་བགོས་དང་ལྷ་འདོགས།》ཞེས་པ་དེ་ཡིན་པ་དང་། དེའང་རྒན་ལགས་ཀྱི《མདའ་དང་འཕང་།》ཞེས་པའི་ཆེད་དེབ་ཀྱི“བོན་གྱི་གཉེན་སྒྲིག་ཆོ་གའི་སྐོར”ཞེས་པར་གསལ་ཞིང་། དཔྱད་རྩོམ་དེ་ལས་མདའ་དེས་སྐྱེས་པ་ཕོའི་རྟགས་མཚོན་པ་དང་འཕང་དེས་སྐྱེས་མ་མོའི་རྟགས་མཚོན་བཞིན་ཡོད་པར་བཤད་ཅིང་། དེ་བཞིན་ཡིག་ཆ་རྙིང་པ་ཁག་ཏུ་ཕོ་མོ་གཉིས་ཆང་ས་རྒྱག་པའི་སྐབས་སུའང་། སྐྱེས་པ་ཕོ་དེས་ལག་ལ་མདའ་ཞིག་ཐོགས་དགོས་པ་དང་། སྐྱེས་མ་མོ་དེས་ལག་ལ་འཕང་གཅིག་ཉར་དགོས་པའི་སྲོལ་ལུགས་འདུག་པའི་ཚུལ་སོགས་བརྗོད་དེ། འདི་དག་ནི་ཆེས་གནའ་བོའི་བོད་ཀྱི་ལུགས་སྲོལ་ཡིན་པ་ཡིག་ཆ་རྙིང་པ་དང་དམངས་སྲོལ་ལ་ཁུངས་གཏུགས་ཞིབ་མོ་བྱས་ནས་བྲིས་ཡོད་པས་དེ་ལྟར་ལགས་ཤིང་། ཕྱིས་ཀྱི་དྲི་བ་ཞིག་གི་སྐབས་སུའང་རྒན་ལགས་ཀྱིས《མདའ་དང་འཕང་།》ཞེས་པའི་དཔེ་ཆའི་མིང་འདོགས་ཀྱང་དེ་ལྟར་ཡིན་པར་བཤད་ཡོད།
འདིར་ང་རང་གི་དེ་ལུགས་ཀྱི་འདོད་ཕྱོགས་ཙམ་ཞིག་གླེང་བ་ལ། ངའི(མདོ་སྨད་ཨ་མཆོག)ཡུལ་ཕྱོགས་ལྟ་བུར་མཚོན་ནའང་བུ་མག་པར་ཕྱིན་པའམ་བུ་མོ་མནའ་མར་ཕྱིན་པ་གང་ཡིན་རུང་ཁྱིམ་དེ་ནས་བུ་རྒྱུད་རྙེད་དེ་བུ་བུ་མོ་གང་རུང་དེ་ཕྱིར་ཕ་མའི་མ་ཁྱིམ་དུ་ཐོག་དང་པོར་ཁྲིད་ཡོང་དུས་མ་ཁྱིམ་དེས་བུ་ལ་རྟག་ཏུ“མདའ་སྐལ”ཞིག་སྟེར་སྲོལ་ཡོད་པ་དང་། བུ་མོ་ལ“འཕང་ལོ”ཞིག་སྟེར་སྲོལ་ཡོད་པ་འདི་དག་ད་ལྟའི་བར་དུ་འདུག་ཅིང་། གཞན། “གཉེན་ལམ་མདའ་ཡིས་ཕྱེས”ཞེས་པ་དང“གཉེན་ལམ་དར་གྱིས་ཕྱེས”ཞེས་པ་སོགས་ཀྱང་ཡོད་པ་ནི་ད་ལྟའི་ཡུལ་ཕྱོགས་རེ་འགར་གཉེན་སྒྲིག་སྟོན་མོའི་སྐབས་སུ་ཕོ་ཕྱོགས་ནས་མདའ་དར་བསྒྲོན་པ་མང་དུ་མཐོང་རྒྱུ་འདུག་པར་མ་ཟད། ཁོ་བོའི་ཡུལ་ཕྱོགས་སུ་ཆོས་རྒྱལ་སྲོང་བཙན་སྒམ་པོའི་རྣམ་ཐར་འཁྲབ་སྟོན་གྱི་དུས་སུ་བློན་ཆེན་མགར་སྟོང་བཙན་གྱིས་རྒྱ་ནག་ཁྲང་ཨན་མཁར་གྱི་ཤར་སྒོའི་ཐང་ནས་ཐང་གི་བུ་མོ་རྒྱ་བཟའ་ཀོང་ཇོ་ལ་མདའ་དར་བསྒྲོན་པའི་སྲོལ་ཞིག་འཁྲབ་ཀྱི་འདུག་པས། གནའ་བོའི་དུས་སུ་མདའ་ཡིས་ཏག་ཏག་ཕྱོགས་གཉིས་ཀྱི་བར་ལ་འབྲེལ་ལམ་འཛུགས་པའམ་གཉེན་ལམ་འཛུགས་པ་ཤོས་ཆེ་བར་བཤད་པ་ནི་གོར་མ་ཆག་གོ། །
ད་དུང་། ངའི་ཡུལ་ཕྱོགས་སུ་ཁྱིམ་གྱི་བུ་ཞིག་གིས་རྟ་ཁ་ཐུབ་པ་ནས(ཕལ་ཆེར་ལོ་ན་བཅོ་ལྔ་ཡས་མས་ཡིན)རུ་སྡེའམ་ཡུལ་ཕྱོགས་དེའི་ལ་བཙས་ལ་འགྲོ་དགོས་ཤིང་། ལ་བཙས་ལ་ཐོག་དང་པོར་འགྲོ་བའི་ཉིན་མ་དེ་ལ་ཡང་བུ་དེས་ངེས་པར་མདའ་ཞིག་ཐོགས་དགོས། ལ་བཙས་ལ་འགྲོ་བར་འགྲོ་རོགས་ཚོ་ལ་ཆང་དང་མར། ཞོ། གོ་རེ་སོགས་ཀྱི་གསོལ་ཁའང་སྤྲད་དགོས་ལ། དེ་ལ་ཡུལ་སྐད་དུ“ཁ་ཕབ”ཟེར། གཟན་བཅའ་དེ་དག་གཞི་བྱས་ནས་སྐྱེས་པ་ཚོ་ཉིན་གཅིག་ལ”བ(སྦྲའམ་བ་མའི་མིང་བསྡུས་པ་ཨེ་ཡིན་སྙམ) ཁ་འཛིན”སྲོལ་ཡོད། བ་ཁ་འཛིན་པ་ནི་ད་ལྟ་ལྟར་ན་ཇ་བསྐོལ་ནས་སྤྲོ་གསེང་གཏོང་བའི་བྱེད་སྒོ་ཞིག་རེད། བུ་དེར་ཁ་ཕབ་པ་ནས་རུ་སྡེ་ལུང་པའི་སྤྱི་ལས་ལ་ཞུགས་ཆོག་པའི་སྣང་ཚུལ་ཞིག་འདུག་ཅིང་། དེ་ནི་སྐྱེས་པ་ཕོའི“མྱི་གྲབས”ལ་བཅུག་ཅིང་ཚུད་པའི་སྲོལ་ཞིག་ཏུ་འདུག་པས། འདི་ནི་བུ་ཞིག་གི་ནར་སོན་པའི་ཆོ་ག(成人礼)ཞིག་ཏུའང་བརྩི་ཆོག །གཞན། མདོ་སྨད་བླ་བྲང་གི་མཐའ་འཁོར་དུ་བུ་མོ་ལོ་ན་བཅུ་གསུམ་ཡས་མས་ནས“སྐྲ་ཕབ”པའི་སྲོལ་ཞིག་ཀྱང་འདུག་ཅིང་། དེའང་སྐྱེས་མའི་གྲས་སུ་བཅུག་པའི་སྲོལ་ཞིག་ཏུ་མཐོང་ལ། སྐྲ་ཕབ་དུས་སུའང་འཕང་ལོ་སྤྲོད་པའི་སྲོལ་ཞིག་འདུག་པའི་བཤད་རྒྱུན་འདུག །འདིའང་བུ་མོ་ཞིག་གི་ནར་སོན་པའི་ཆོ་ག(成人礼)ཞིག་ཏུ་བརྩི་ཆོག་ཆོག་ཡིན། གང་ལྟར་སྐྱེས་པ་ཕོ་ཞིག་སྐྱེས་པ་ནས་མདའ་དང་འགྲོགས་ཤིང་ནར་སོན་དུས་མདའ་དང་འགྲོགས་པ་དང་། ལས་ཀྱང་མདའ་དང་འབྲེལ་བའི་ལས་བྱེད་ལ། སྐྱེས་མ་མོ་ཞིག་སྐྱེས་པ་ནས་འཕང་དང་འདྲིས་ཤིང་ནར་སོན་དུས་སུའང་འཕང་དང་འབྲེལ་བའི་ལས་བྱེད་པ་འདི་དག་ནི་ཆེས་གནའ་བོའི་སྲོལ་ལུགས་ཤིག་ཡིན་པ་གདོན་མི་ཟ།
དེ་ལྟར་མདའ་དང་འཕང་གིས་ཕོ་མོའི་ལས་ཤིག་མཚོན་བཞིན་ཡོད་པར་བཤད་ན། ཆེས་གནའ་བོའི་སྤྱི་ཚོགས་སུ་སྐྱེས་པ་ཕོ་ཡིན་ན་ཁྱིམ་གྱི་ཕྱི་ལོགས་སུ་མདའ་གཞུ་ཐོགས་ཏེ་རི་དྭགས་རྔོན་པ་དང་ཕྱུགས་ཟོག་སྐྱོང་བ། ནགས་ནང་ལ་འགྲོ་བ། ཞིང་ཁར་འགྲོ་བ། དགྲ་འདུལ་བ་སོགས་མདའ་དང་མ་བྲལ་བའི་འཚོ་བའི་བརྟུལ་ཞུགས་ཤིག་སྐྱོང་བར་བྱེད་ཅིང་། སྐྱེས་མ་མོ་ཡིན་ན་ཁྱིམ་ཕྱི་ནང་གཉིས་ལས་ནང་གི་ལས་ལ་བརྩོན་པ་སྟེ། ཟས་གཡོ་སྦྱོར་དང་འཁེལ་ཐགས། བཟོ་འཚེམ་ལ་སོགས་ཀྱི་ལས་ལ་བྲེལ་བཞིན་ཡོད་པས་ཡིན། དེའང་ཅི་ཞིག་གཡོ་སྦྱོར་བྱེད་བཞིན་ཡོད་ཅེ་ན། ཁྱིམ་གྱི་སྐྱེས་པ་གང་གིས་རི་དྭགས་རྔོན་པའི་ཤ་ཁྲག་དང་ཕྱུགས་རིགས་ཀྱི་དཀར་གསུམ་དམར་གསུམ(ཤ་ཁྲག་ཚིལ་གསུམ)དང་། ནགས་ཀྱི་ཟས་རིགས། ཞིང་ཁའི་ལོ་ཏོག་སོགས་གཡོ་བཞིན་ཡོད་ལ། ཅི་ཞིག་འཁེལ་ཐགས་བྱེད་བཞིན་ཡོད་ཅེ་ན། དེའང་ཕྱུགས་རིགས་ཀྱི་བལ་རྩིད་ཁུ་གསུམ་སོགས་ཀྱིས་གྱོན་ཆས་དང་སྣོད་ཆས། སྦྲ་གུར་སོགས་འཐག་བཞིན་ཡོད་པར་མ་ཟད། ཅི་ཞིག་བཟོ་འཚེམ་བྱེད་བཞིན་ཡོད་ཅེ་ན། དེའང་གོང་དུ་གླེང་བའི་རི་དྭགས་ཀྱི་པགས་པ་དང་ཕྱུགས་ཟོག་གི་ཀོ་བ། འཁལ་ཐགས་ཀྱི་སྣམ་བུ་སོགས་འཚེམ་བཟོ་བྱེད་བཞིན་ཡོད་པས། འདི་ལས་སྐྱེས་པ་ཕོ་ཡིས་མདའ་གཞུ་ཐོགས་ཏེ་གཙོ་བོ་ལྟོ་འཚོལ་བའི་ལས་ལ་ཞུགས་བཞིན་ཡོད་པ་དང་། སྐྱེས་མ་མོ་ཡིས་འཕང་ལོ་ཐོགས་ཏེ་གཙོ་བོ་རྒྱབ་འགེབ་པའི་ལས་ལ་བརྩོན་བཞིན་ཡོད། འདི་ནི་སྐྱེས་ཕོ་མོ་གཉིས་ཀྱི་སྐྱེ་ཁམས་ཀྱི་ཁྱད་ཆོས་ལྟར་ཕྱི་ནང་གི་ལས་བགོས་བྱས་པའི་མཇུག་འབྲས་ཤིག་ལས་མ་འདས་ཤིང་། ཁྱིམ་བཟའ་ཚང་ཞིག་ལ་མཚོན་ན་འདི་འདྲ་བའི་ཞིང་འབྲོག་གི་འཚོ་བའི་ལས་བགོས་ནི་ཧ་ཅང་འདྲ་མཉམ་གྱི་འཚོ་བ་ཞིག་ཏུ་གྱུར་ཡོད།
ཡང་ཅིག་བཤད་ན། མཐོ་སྒང་ཞིང་འབྲོག་གི་ཟས་སྤྱོད་དང་གྱོན་གོས་ཀྱི་འཚོ་བའི་ཁྱད་ཆོས་འདི་ནི་རང་མཁོ་རང་སྒྲུབ་ཀྱི་ཡུལ་དུས་དང་བསྟུན་པའི་འཚོ་བ་ཞིག་ཡིན་ལ། མཐོ་སྒང་དུ་གནས་འཆའ་བའི་བདེ་སྐྱིད་ལྡན་པའི་འཚོ་བ་སྐྱེལ་སྟངས་ཤིག་ཀྱང་ཡིན་པར་བརྗོད་ཆོག །དེ་བས་ལྟོ་གོས་ཀྱིས་ཟིན་པའི་འཚོ་བ་འདི་ནི་རིག་གནས་ཤིག་ཀྱང་ཡིན་པ་སྟེ། ད་ལྟའི་རིག་གནས་ཀྱི་དབྱེ་བ་འབྱེད་སྟངས་ལ་བཟའ་བཅའི་རིག་གནས་དང་རྒྱན་གོས་རིག་གནས་སོགས་ཡོད་པར་མ་ཟད། ཡུལ་སོ་སོའི་ཁྱད་ཆོས་ཀྱང་འཛོམས་ཡོད་པ་དང་། མེས་པོ་གོང་མ་ཚོའི་བློ་གྲོས་ཀྱི་རྩལ་ལས་ཐོན་པའི་འཚོ་ཚིས་སྒྲུབ་སྟངས་སམ་འཚོ་བ་རོལ་སྟངས་འདི་ནི་ལོ་ངོ་སྟོང་ཕྲག་ལ་བརྒྱུད་མྱོང་བའི་ཤུལ་བཞག་རྩ་ཆེན་གྱི་གྲས་སུ་བརྩི་ཆོག་པས། སྐྱ་བོའི་ཁྱིམ་ཐབ་སྐྱོང་ཞིང་འཚོ་ཚིས་གཉེར་བའི་འཚོ་བ་འདི་དག་ཡུལ་དུས་མི་གསུམ་ལ་འཕྲོད་ནས་ཡོད་ལ། དེ་བས། དེ་དག་མི་འདོར་རྒྱུ་ནི་ཧ་ཅང་གལ་ཆེན་པོར་མཐོང་ཞིང་། ཡུལ་དུས་དང་བསྟུན་པའི་ཁྱད་པར་དང་འགྱུར་བ་ཅུང་ཟད་ནི་ཡོད་ན་མོད་ཀྱང་། སྤྱིར་མཐོ་སྒང་སོགས་གྲང་གཤིས་ཆེ་བའི་ཡུལ་དུ་ཤ་རིགས་སོགས་བཅུད་ཅན་གྱི་ཟས་རིགས་བསྟེན་དགོས་པ་སོགས་སྨན་པ་མཁས་པའི་ངག་ལས་ཐོས་ཤིང་། སྐམ་ཤས་ཆེ་ཞིང་གྲང་ངར་ལྡན་པའི་གནམ་གཤིས་སུ་ཀོ་པགས་ཀྱི་གྱོན་གོས་རིགས་སོགས་འཕྲོད་པ་མངོན་སུམ་མྱོང་བས་གྲུབ་པ་ཞིག་ཡིན་པས། གོ་ལའི་ཤར་ནུབ་ལྟ་བུའི་ཡུལ་སྲོལ་དང་གོ་ལའི་ལྷོ་བྱང་ལྟ་བུའི་གནམ་གཤིས་ཀྱི་ཁྱད་པར་ལ་ལྟོས་པའི་ཡུལ་དུས་ཀྱི་ཟས་སྤྱོད་དང་བསྟུན་པ་ནི་ཧ་ཅང་གལ་ཆེ་བར་རིགས་སོ། །
མཇུག་སྡུད།
མདོར་ན། མཐོ་སྒང་གི་ཡུལ་གྲུ་འདི་ནས་འཚོ་ཞིང་གཞིས་ཆགས་པའི་མི་རིགས་ཤིག་གི་ཡར་ལྷ་གསོལ་དང་མར་སྲི་གནོན། བར་ཐབ་སྐྱོང་གི་སྐྱ་བོའི་འཚོ་བའི་རིག་གནས་ཀྱི་གྲས་གཙོ་བོར་གྱུར་བའི་བར་ཁྱིམ་ཐབ་སྐྱོང་བར་མདའ་དང་འཕང་ལ་ཁ་འབྲལ་ཐབས་མེད་ཅིང་། མདའ་དང་འཕང་ཡོད་པ་ལས་ལྟོ་དང་གོས་བྱུང་བ་དང་། ལྟོ་དང་གོས་བྱུང་བ་ལས་གཏམ་སྟེ་ཁ་ལ་རྒྱ་དང་གཟི་བརྗིད་དབང་ཐང་སོགས་བྱུང་། དེའི་ཕྱིར་མདའ་དང་འཕང་ནི་འཚོ་བའི་རྟེན་གཞི་དང་སྲོག་ཤིང་ལྟ་བུ་ཡིན་པས། ངག་རྒྱུན་དུ་བཤད་པའི་ལྟོ་གོས་གཏམ་གསུམ་ཞེས་པ་ལས་ལྟོ་གོས་གཉིས་ཀྱང་འདི་ལས་མ་འདས་ཤིང་། སྤྱི་ཚོགས་གང་འདྲ་ཞིག་ཡིན་ཀྱང་ལྟོ་གོས་མ་འབྱོར་བའི་གཏམ་ཞིག་ཤོད་ས་མེད་ཚོད་ཙམ་ཡིན་པས། ཐོག་མར་འཚོ་བའི་གཞི་རྟེན་དུ་གྱུར་བའི་མདའ་དང་འཕང་གི་ལས་རྣམས་འདོར་མི་ཉན་པར་ལྟོ་གོས་སྒྲུབ་པ་དང་དེ་ནས་གཏམ་གྱི་དོན་དག་བརྩད་བཅད་ན་ལེགས་སྙམ་པའི་ཉམས་མྱོང་ཞིག་ཀྱང་འཁོར་བའི་དཀའ་ཉོག་ཁྲོད་དུ་ངོས་ཟིན་སྤུ་སུད་མ་ཙམ་བྱུང་ལ། དེ་མ་ཡིན་པར་ལྟོ་གོས་ཀྱང་ཤོར་ཚར་ས་ཞིག་ནས་གཏམ་སྟེ་སྨྲ་བརྗོད་དང་སྨྲ་སྤོབས་ཀྱང་རེག་མི་སྲིད་པས། འཚོ་བའི་གཞི་རྩ་བོར་བའི་གཏམ་ནི་སྟོང་པ་ཁོ་ནར་ཟད་པའི་ངེས་ཤེས་ཀྱང་འདྲོངས་སོ། །(རྩོམ་པ་པོ། ལྷོ་ནུབ་མི་རིགས་སློབ་ཆེན་མཚན་ཉིད་རིག་པའི་སློབ་གླིང་གི2020ལོའི་མཚན་ཉིད་རིག་པའི་ཆེད་ལས་ཀྱི་འབུམ་རམས་ཞིབ་འཇུག་སློབ་མ་དང་། སི་ཁྲོན་བོད་བརྒྱུད་ནང་བསྟན་སློབ་གླིང་གི་དགེ་རྒན།)