ཀུན་སྤྱོད་ཤེས་རིག་ལུས་རྩལ་མཛེས་དཔྱོད་ངལ་རྩོལ་བཅས་པའི་སློབ་གསོ་ལྔ་ཕྱོགས་ཡོངས་ནས་ཡར་རྒྱས་ཡོང་བའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱེད་དགོས།

མི་གང་འདྲ་ཞིག་གསོ་སྐྱོང་བྱ་རྒྱུ་ནི་སློབ་གསོའི་གནད་དོན་གཙོ་བོ་ཡིན། གནའ་མིའི་གཏམ་ལ། “རྒྱལ་ཁབ་ལ་མཁས་པ་མང་ན། །རྒྱལ་ཁབ་སྐྱོང་བར་སྟོབས་དང་ལྡན། །རྒྱལ་ཁབ་ལ་མཁས་པ་ཉུང་ན། །རྒྱལ་ཁབ་སྐྱོང་བའི་སྟོབས་ཞན་ནོ། །” ཞེས་པ་ལྟར། ལོ་རྒྱུས་དང་དངོས་ཡོད་ཀྱི་ཐད་ནས་བལྟས་ན། རྒྱལ་ཁབ་གང་འདྲ་ཞིག་དང་སྤྱི་ཚོགས་གང་འདྲ་ཞིག་ཡིན་རུང་དེའི་ཆབ་སྲིད་ཀྱི་དབང་སྒྱུར་སྲུང་སྐྱོང་དང་སྤྱི་ཚོགས་བརྟན་བརླིང་མཐའ་འཁྱོངས་བྱེད་པའི་གཞི་རྩའི་ཐབས་ལམ་ནི་སློབ་གསོར་མ་བརྟེན་པ་གཅིག་ཀྱང་མེད། རང་རྒྱལ་ནི་ཀྲུང་གོའི་གུང་ཁྲན་ཏང་གིས་འགོ་ཁྲིད་བྱེད་པའི་སྤྱི་ཚོགས་རིང་ལུགས་ཀྱི་རྒྱལ་ཁབ་ཅིག་ཡིན། འདིས་ང་ཚོའི་སློབ་གསོས་ངེས་པར་དུ་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱ་རྒྱུ་དེ་རྩ་བའི་ལས་འགན་དུ་བཟུང་སྟེ། ཀྲུང་གོའི་གུང་ཁྲན་ཏང་གི་འགོ་ཁྲིད་དང་རང་རྒྱལ་སྤྱི་ཚོགས་རིང་ལུགས་ཀྱི་ལམ་ལུགས་ལ་བརྩི་བཀུར་ཞུ་བ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དོན་དུ་མི་ཚེ་གང་པོར་འབད་འཐབ་བྱེད་པའི་མི་རབས་ནས་མི་རབས་ཀྱི་ཤེས་ལྡན་མི་སྣ་གོ་ཆོད་གསོ་སྐྱོང་བྱེད་དགོས་པ་ཐག་བཅད་པ་རེད། ང་ཚོའི་སློབ་གསོས་སྤྱི་ཚོགས་རིང་ལུགས་གཏོར་བཤིག་གཏོང་མཁན་དང་དུར་ཁུང་རྐོ་མཁན་གསོ་སྐྱོང་གཏན་ནས་བྱེད་མི་རུང་ལ། “ཀྲུང་གོའི་ངོ་གདོང་ཡོད་ཀྱང་། ཀྲུང་གོའི་སེམས་པ་མེད་པ་དང་། ཀྲུང་གོའི་བརྩེ་སེམས་མེད་ལ། ཀྲུང་གོའི་ཉམས་སྣང་མེད་པའི་”མི་གཏན་ནས་གསོ་སྐྱོང་བྱེད་མི་རུང་། དེ་འདྲའི་མི་གསོ་སྐྱོང་བྱས་ན་སློབ་གསོའི་ཕམ་ཁ་རེད། སློབ་གསོའི་ཕམ་ཁ་ནི་རྩ་བའི་རང་བཞིན་གྱི་ཕམ་ཁ་ཡིན་པས། ང་ཚོས་ལོ་རྒྱུས་རང་བཞིན་གྱི་ནོར་འཁྲུལ་འདི་འདྲ་གཏན་ནས་བཟོ་མི་རུང་སྟེ། འདི་ནི་སློབ་གསོ་དེང་རབས་ཅན་དུ་སྐུལ་འདེད་གཏོང་བ་དང་། སློབ་གསོའི་རྒྱལ་ཁབ་སྟོབས་ལྡན་འཛུགས་སྐྲུན་བྱེད་པར་ངེས་པར་དུ་ཁོང་དུ་ཆུད་དགོས་པའི་ཡིན་མིན་ཆེན་པོའི་གནད་དོན་ཡིན་པས། གསང་འགེབས་དང་། གྲོས་མོལ། ནེམ་ནུར་བཅས་བྱ་རྒྱུ་གང་ཡང་མེད།

མེ་ཏོག་ལ་ཆུ་གཏོར་ན་རྩ་བར་གཏོར་དགོས་པ་དང་། མི་གསོ་སྐྱོང་བྱེད་ན་སེམས་པ་གསོ་སྐྱོང་བྱེད་དགོས། ང་ཚོས་ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང་ཞེས་བརྗོད་བཞིན་ཡོད་པས། སློབ་གསོ་དེང་རབས་ཅན་དུ་སྐུལ་འདེད་གཏོང་བར་ཐོག་མའི་བསམ་འདུན་བརྗེད་མི་རུང་སྟེ། མི་ཐམས་ཅད་གསོ་སྐྱོང་དང་། བརྒྱུད་རིམ་ཧྲིལ་པོའི་གསོ་སྐྱོང་། ཕྱོགས་མཐའ་ཡོངས་ནས་གསོ་སྐྱོང་བཅས་བྱེད་པའི་སྒྲིག་སྲོལ་དང་ལམ་སྲོལ་ཆ་ཚང་དུ་བཏང་སྟེ། སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་མི་རབས་ནས་མི་རབས་བར་རྒྱུན་ཆད་མེད་པར་གསོ་སྐྱོང་བྱེད་དགོས། འདི་ནི་སློབ་གསོའི་ལས་དོན་གྱི་རྩ་བའི་ལས་འགན་ཡིན་ལ། སློབ་གསོ་དེང་རབས་ཅན་གྱི་ཁ་ཕྱོགས་དང་དམིགས་འབེན་ཡང་ཡིན།

སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱེད་པ་ནི་གེགས་མེད་མྱུར་འགྲུབ་ཡོང་མི་སྲིད་པར། དཀའ་སྤྱད་འབད་བརྩོན་བྱས་ན་ད་གཟོད་འགྲུབ་ཐུབ་པའི་ལས་འགན་ཞིག་རེད། དུས་ཡུན་རིང་པོའི་ནང་། དགྲར་འཛིན་སྟོབས་ཤུགས་སྣ་ཚོགས་ཀྱིས་རང་རྒྱལ་ནུབ་ཕྱོགས་ཅན་དུ་སྒྱུར་བ་དང་ཁ་བྲལ་དུ་གཏོང་བའི་འཐབ་ཇུས་ལག་བསྟར་བྱེད་མཚམས་གཏན་ནས་བཞག་མ་མྱོང་ལ། ཀྲུང་གོའི་གུང་ཁྲན་ཏང་གི་འགོ་ཁྲིད་དང་རང་རྒྱལ་སྤྱི་ཚོགས་རིང་ལུགས་ཀྱི་ལམ་ལུགས་མགོ་རྟིང་སློག་པའི་གཏོར་བརླག་བྱ་སྤྱོད་སྤེལ་མཚམས་གཏན་ནས་བཞག་མྱོང་མེད་དེ། ཐོག་མཐའ་བར་གསུམ་དུ་རང་རྒྱལ་དུ་“ཁ་དོག་གསར་བརྗེ་”ཇུས་འགོད་བྱེད་རྩིས་བྱས་ཤིང་། ཁོ་ཚོས་འབད་བརྩོན་ཆེན་པོས་འཕྲོག་རེས་བྱེད་སའི་ཁྱབ་ཁོངས་ཆེ་ཤོས་ཤིག་ནི་ང་ཚོའི་གཞོན་ནུ་ལོ་ཆུང་དག་རེད། བློ་མཐུན་མའོ་ཙེ་ཏུང་གིས་སྔ་མོ་ནས་“བཙན་རྒྱལ་རིང་ལུགས་ཀྱིས། ང་ཚོའི་མི་རབས་དང་པོ་དང་གཉིས་པར་རེ་བ་མི་འདུག །མི་རབས་གསུམ་པ་དང་བཞི་པ་ཅི་འདྲ་ཡིན་ནམ་ཞེ་ན། རེ་བ་འདུག་ཅེས་བཤད་པ་རེད། བཙན་རྒྱལ་རིང་ལུགས་ཀྱི་སྐད་ཆ་འདི་བདེན་ནམ་མི་བདེན་ཞེ་ན། ངས་དེ་མི་བདེན་པའི་རེ་བ་བཅངས་མོད། འོན་ཀྱང་བདེན་ཡང་སྲིད།” ཅེས་གསུངས་མྱོང་བ་ལྟར། ད་ལྟ་རྩིས་ཤིག་བརྒྱབ་ན། སློབ་གྲྭར་ཡོད་པའི་མཐོ་རིམ་སློབ་གྲྭའི་སློབ་མ་ཕལ་ཆེར་མི་རབས་གསུམ་པའམ་མི་རབས་བཞི་པའི་གྲས་ཡིན་པ་དང་། རྗེས་སུ་ད་དུང་མི་རབས་ལྔ་པ་དང་དྲུག་པ། དེ་བཞིན་མི་རབས་བཅུ་ལྷག་དང་བཅུ་ཕྲག་ལྷག་གི་གནད་དོན་ཡོད། གཞོན་ནུ་ལོ་ཆུང་འཕྲོག་རྩོད་བྱེད་པའི་འཐབ་རྩོད་ནི་ཡུན་རིང་དང་ཛ་དྲག་ཅིག་ཡིན་པས་ང་ཚོ་ཕམ་མི་རུང་ལ་ཕམ་ཁ་ཐེག་མི་ནུས་པ་ཞིག་ཀྱང་རེད། ང་ཚོ་ངེས་པར་དུ་རྨོངས་གཉིད་ལས་སད་དགོས།

ང་ཚོས་གསོ་སྐྱོང་བྱེད་དགོས་པའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་རྣམས་ལ་གཞི་རྩའི་བྱང་ཚད་དང་བསམ་པའི་འཁྱེར་སོ་གང་འདྲ་ཞིག་ལྡན་དགོས་པ་དང་། ཇི་ལྟར་གསོ་སྐྱོང་བྱེད་དགོས་པའི་འགག་རྩ་ནི་ངས་བལྟས་ན་གཤམ་གསལ་གྱི་ཕྱོགས་འགའི་ཐད་ཀྱི་ལས་ཀ་ཡག་པོར་སྒྲུབ་དགོས་པར་འདོད་དེ།

གཅིག་ནི་ཕུགས་བསམ་དང་དད་སེམས་བརྟན་དུ་གཏོང་རྒྱུའི་ཐད་འབད་བརྩོན་བྱེད་དགོས། སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་ཞེས་པའི་ཚིག་འདིའི་ནང་གི་གཙོ་བོ་ནི་“སྤྱི་ཚོགས་རིང་ལུགས་”ཞེས་པ་འདི་ཡིན་ཞིང་། འདི་ནི་ང་ཚོས་མི་གང་འདྲ་ཞིག་གསོ་སྐྱོང་བྱེད་པའི་ཐད་ཀྱི་ངོ་བོའི་གཏན་འབེབས་ཡིན། ང་ཚོས་གསོ་སྐྱོང་བྱས་པའི་མི་ནི་ངེས་པར་དུ་གུང་ཁྲན་རིང་ལུགས་ཀྱི་ཕུགས་བསམ་ཆེན་པོ་དང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཐུན་མོང་གི་ཕུགས་བསམ་ལྡན་པ་ཞིག་ཡིན་དགོས། འདི་མེད་ན་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱ་རྒྱུ་དེ་འགྲུབ་མི་ཐུབ། ད་ལྟའི་གཞོན་ནུ་དང་ལོ་ཆུང་རྣམས་དུས་ཡུན་རིང་པོར་ཞི་བདེའི་ཁོར་ཡུག་ནང་དུ་འཚོ་བ་སྐྱེལ་བ་ཡིན་པས། མི་རིགས་ལ་ཤི་གསོན་ཆགས་འཇིག་ཡོང་བའི་སྡུག་བསྔལ་མྱངས་མ་མྱོང་བ་དང་། ཁྲག་བཏོན་འཐབ་འཛིང་གི་ཉམས་སད་ཐེག་མྱོང་མེད་ལ། དཀའ་ཚེགས་ཆེ་བའི་འབད་འཐབ་ནང་དུ་ཞུགས་མྱོང་མེད་པས་མི་ཚེའི་ཉམས་མྱོང་མང་པོ་མེད། གལ་ཏེ་ཁྲིད་སྟོན་ཡང་དག་མ་བྱས་པ་དང་ཡུན་རིང་པོར་སློབ་གསོ་མ་བཏང་ན། ཕུགས་བསམ་དང་དད་སེམས་ཡང་དག་པ་འཛུགས་དཀའ་བ་དང་། ཐ་ན་ལམ་ཁ་ནོར་ཡང་སྲིད། སློབ་མ་རྣམས་ལ་ཀྲུང་གོའི་ལོ་རྒྱུས་དང་ལྷག་པར་དུ་ཀྲུང་གོའི་ཉེ་རབས་དང་དེང་རབས་ཀྱི་ལོ་རྒྱུས། ཀྲུང་གོའི་གསར་བརྗེའི་ལོ་རྒྱུས། ཀྲུང་གོའི་གུང་ཁྲན་ཏང་གི་ལོ་རྒྱུས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ལོ་རྒྱུས། ཀྲུང་གོའི་སྒྱུར་བཅོས་སྒོ་འབྱེད་ཀྱི་ལོ་རྒྱུས་སོགས་ཀྱི་སློབ་གསོ་རྒྱག་ཤུགས་ཆེ་རུ་བཏང་ནས། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་རྒྱུན་འཁྱོངས་ལྷོད་མེད་ཀྱིས་གསོ་སྐྱོང་དང་དར་སྤེལ་གཏོང་དགོས། སྤྱི་ཚོགས་རིང་ལུགས་ཀྱིས་ད་གཟོད་ཀྲུང་གོ་སྐྱོབ་ཐུབ་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་བཏང་ན་ད་གཟོད་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་ཡོང་བ་མངོན་འགྱུར་བྱེད་ཐུབ། ལག་ལེན་ཐོག་ནས་ར་འཕྲོད་བྱུང་བའི་ལོ་རྒྱུས་ཀྱི་གཏན་ཚིགས་དང་དངོས་ཡོད་ཀྱི་གཏན་ཚིགས་འདི་སློབ་མ་ཚོར་གསལ་པོར་བཤད་དེ། སློབ་མ་ཚོའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་ཆེ་རུ་སྐྱེད་པ་དང་། འགལ་རྐྱེན་གང་གིས་ཀྱང་མགོ་མི་འཐོམ་པ་བཟོས་ཏེ། མི་རིགས་བསྐྱར་དར་ཡོང་བའི་དུས་རབས་ཀྱི་ལས་འགན་ལྗིད་མོ་ཕྲག་ཏུ་འཁུར་བའི་འདུན་པ་འཆང་དུ་འཇུག་དགོས།

གཉིས་ནི་རྒྱལ་གཅེས་རིང་ལུགས་ཀྱི་བརྩེ་ཞེན་ཟབ་མོ་འཛུགས་པའི་ཐད་འབད་བརྩོན་བྱེད་དགོས། རྒྱལ་གཅེས་རིང་ལུགས་ཀྱི་སློབ་གསོ་ནི་འཛམ་གླིང་རྒྱལ་ཁབ་ཁག་གི་སློབ་གསོའི་ངེས་པར་དུ་སློབ་དགོས་པའི་སློབ་ཚན་ཞིག་རེད། རྒྱལ་གཅེས་རིང་ལུགས་ནི་ཀྲུང་ཧྭ་མི་རིགས་ཀྱི་མི་རིགས་ཀྱི་སེམས་པ་དང་མི་རིགས་ཀྱི་བླ་སྲོག་ལྟ་བུ་ཡིན་པས། སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱེད་པར་ཐོག་མར་སློབ་མའི་རྒྱལ་གཅེས་བརྩེ་ཞེན་སྐྱེད་སྲིང་བྱེད་དགོས། 1935ལོར་ཀྲུང་ཧྭ་མི་རིགས་ཆགས་འཇིག་གི་ཉེན་ཁར་ཐུག་པའི་སྐབས་སུ་སློབ་གསོ་པ་གྲགས་ཅན་ཀྲང་པོ་ལིང་གིས་ནན་ཁའེ་སློབ་གྲྭ་ཆེན་མོའི་སློབ་འགོ་ཚུགས་པའི་མཛད་སྒོའི་ཐོག །ཁྱོད་ཀྲུང་གོ་བ་ཡིན་ནམ། ཁྱོད་ཀྲུང་གོ་ལ་དགའ་འམ། ཁྱོད་ཀྱིས་ཀྲུང་གོ་ཡག་པོ་ཡོང་བར་འདོད་དམ་ཞེས་དྲི་བ་གསུམ་བཏོན་ནས་དགེ་སློབ་ཡོངས་ཀྱི་རྒྱལ་གཅེས་འཐབ་སེམས་ཆེ་རུ་བསྐྱེད་པ་རེད། ངས་བལྟས་ན་དྲི་བ་འདི་གསུམ་ནི་ལོ་རྒྱུས་ཀྱི་དྲི་བ་རེད་ལ། དེ་བས་ཀྱང་དུས་རབས་ཀྱི་དྲི་བ་དང་། མ་འོངས་པའི་དྲི་བ་རེད། ང་ཚོས་མི་རབས་ནས་མི་རབས་བར་འདྲི་དགོས་ལ་ལན་ཡང་འདེབས་དགོས།

རྒྱལ་གཅེས་རིང་ལུགས་ཀྱི་སྙིང་སྟོབས་དར་སྤེལ་གཏོང་རྒྱུ་དེ་ལོ་ཆུང་བྱིས་པ་ནས་དམ་འཛིན་བྱེད་དགོས་པ་དང་། རྒྱལ་གཅེས་རིང་ལུགས་དེ་སློབ་གསོ་དང་བསམ་པའི་དཔལ་ཡོན་འཛུགས་སྐྲུན་གྱི་བརྒྱུད་རིམ་ཧྲིལ་པོར་ཁྱབ་པར་བྱེད་དགོས། སློབ་མར་རང་ཉིད་ཀྱི་ཕུགས་བསམ་དེ་མེས་རྒྱལ་གྱི་མདུན་ལམ་དང་། རང་ཉིད་ཀྱི་ལས་དབང་དེ་མི་རིགས་ཀྱི་ལས་དབང་དང་ཟུང་འབྲེལ་དམ་ཟབ་བྱེད་པའི་སློབ་གསོ་དང་ཁྲིད་སྟོན་བྱེད་པ་དང་། སློབ་མར་ཡང་དག་པའི་ལོ་རྒྱུས་ཀྱི་ལྟ་བ་དང་། མི་རིགས་ཀྱི་ལྟ་བ། རྒྱལ་ཁབ་ཀྱི་ལྟ་བ། རིག་གནས་ཀྱི་ལྟ་བ་བཅས་འཆང་བ་དང་རྒྱུན་འཁྱོངས་བྱེད་པར་ཁྲིད་སྟོན་བྱས་ཏེ། རྒྱལ་གཅེས་འདུ་ཤེས་དང་རྒྱལ་གཅེས་བརྩེ་སེམས་ཇེ་དྲག་ཏུ་གཏོང་བ་དང་། མི་རིགས་ཀྱི་སྤོབས་སེམས་དང་རང་ལ་ཡིད་ཆེས་བྱེད་ཤུགས་ཆེ་རུ་གཏོང་དགོས་ལ། རྒྱལ་གཅེས་རིང་ལུགས་ཀྱི་སྙིང་སྟོབས་དེ་སློབ་མའི་སེམས་གཏིང་དུ་རྩ་བ་བརྟན་པོར་ཚུགས་སུ་བཅུག་ནས། རང་ཉིད་ཀྲུང་གོ་བ་ཡིན་པ་དུས་དང་རྣམ་པ་ཀུན་ཏུ་མི་བརྗེད་པར་བྱེད་དགོས། རྒྱལ་ཁབ་ལ་དགའ་ཞེན་དང་ཏང་ལ་དགའ་ཞེན། སྤྱི་ཚོགས་རིང་ལུགས་ལ་དགའ་ཞེན་བཅས་བྱ་རྒྱུ་ཕན་ཚུན་གཅིག་གྱུར་ཡོང་བ་རྒྱུན་འཁྱོངས་བྱས་ན། རྒྱལ་གཅེས་རིང་ལུགས་ནི་གཞི་ནས་གསོན་ཉམས་ལྡན་པ་དང་བདེན་པ་ཡིན་ཞིང་། འདི་ནི་དེང་རབས་ཀྲུང་གོའི་རྒྱལ་གཅེས་རིང་ལུགས་ཀྱི་སྙིང་སྟོབས་ཀྱི་མཚོན་ཚུལ་ཆེས་གལ་ཆེན་ཞིག་ཡིན་ཞེས་ངས་ཐེངས་མང་ནན་བཤད་བྱས་པ་ཡིན། སློབ་མར་ཀྲུང་གོའི་གུང་ཁྲན་ཏང་ལ་དགའ་ཞེན་དང་བརྩི་བཀུར་བྱེད་པའི་སློབ་གསོ་དང་ཁྲིད་སྟོན་བྱས་ཏེ། ཏང་གི་བཀའ་ལ་ཉན་པ་དང་། ཏང་གི་རྗེས་སུ་འབྲང་བ། མི་དམངས་ཀྱི་ཁྲོད་དུ་རྩ་བ་ཚུགས་པ། རྒྱལ་ཁབ་ཀྱི་ཆེད་དུ་བློས་གཏོང་བ་བཅས་བྱ་རྒྱུའི་འདུན་པ་འཆང་དུ་འཇུག་དགོས།

གསུམ་ནི་ཀུན་སྤྱོད་བློ་སྦྱོང་ལ་ཤུགས་རྒྱག་རྒྱུའི་ཐད་འབད་བརྩོན་བྱེད་དགོས། མི་ལ་ཀུན་སྤྱོད་མེད་ན་རྩ་བ་ཚུགས་མི་ཐུབ་པས། མི་སྐྱེད་སྲིང་བྱེད་པའི་རྩ་བ་ནི་ཀུན་སྤྱོད་ལ་རག་ལས་ཡོད། ཀུན་སྤྱོད་སྔོན་ལ་འཛིན་པ་དང་། རང་གཅུན་རྩ་བར་འཛིན་པ་འདི་ནི་ཤེས་ལྡན་མི་སྣ་འཚར་ལོངས་ཡོང་བའི་གཞི་རྩའི་གཏན་ཚིགས་ཡིན། ཀུན་སྤྱོད་གསོ་སྦྱོང་དང་རང་གཅུན་བྱེད་ན་འདུན་མ་རིང་ས་མཐོ་ས་ནས་འཛིན་དགོས་པར་མ་ཟད། བཅོས་མིན་དངོས་ཡོད་ལ་གཞི་འཛུགས་དགོས། ཨའེ་དབྱིན་སི་ཐན་གྱིས་“ཆེད་ལས་ཀྱི་ཤེས་བྱར་བརྟེན་ནས་མི་ལ་སློབ་གསོ་བཏང་བ་ཙམ་གྱིས་མི་འདང་།” “སློབ་མར་རིན་ཐང་ལ་གོ་བ་ལེན་དུ་འཇུག་དགོས་པར་མ་ཟད་དུང་བ་ཤུགས་དྲག་པོ་ཆགས་སུ་འཇུག་དགོས། དེ་ནི་ཆེས་གཞི་རྩ་ཡིན། ཁོ་ཚོར་ངེས་པར་དུ་མཛེས་དཔྱོད་དང་ཀུན་སྤྱོད་ཐད་ཀྱི་དགེ་སྐྱོན་ལ་དབྱེ་འབྱེད་ཀྱི་ནུས་པ་མངོན་གསལ་ཡོད་དགོས་”ཞེས་གསུངས་པ་རེད། དེའི་རྐྱེན་གྱིས་ཀུན་སྤྱོད་སློབ་གསོ་ནི་སློབ་མ་སློབ་གྲྭར་ཞུགས་པའི་སློབ་ཚན་དང་པོ་ཡིན་ལ། སློབ་མ་སློབ་གྲྭ་དང་མ་བྲལ་སྔོན་གྱི་ཆེས་མཇུག་མཐའི་སློབ་ཚན་ཡང་ཡིན་པས། ངེས་པར་དུ་སློབ་མའི་སློབ་སྦྱོང་གི་ཐོག་མཐའ་བར་གསུམ་དུ་ཁྱབ་པར་བྱེད་པ་དང་། སློབ་གྲྭའི་ལས་དོན་གྱི་ཕྱོགས་གང་ཐད་དང་ལྷུ་ཚིགས་སོ་སོར་ཁྱབ་པར་བྱས་ཏེ། སློབ་གྲྭ་མི་གསོ་སྐྱོང་བྱེད་ས་ཞིག་ཏུ་དངོས་སུ་བསྒྱུར་བ་ལས་རྩལ་ནུས་སློབ་ཁྲིད་དང་མཐར་ཕྱིན་འཛིན་ཡིག་སྤྲོད་ས་ཙམ་མིན་པར་བྱེད་དགོས།

སློབ་མར་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་ལག་ལེན་བསྟར་བར་སློབ་གསོ་ཁྲིད་སྟོན་བྱ་རྒྱུ་རྒྱུན་འཁྱོངས་བྱས་ཏེ། སྤྱོད་ལམ་གྱིས་ལུས་དགེ་བར་བྱེད་པ་དང་། སྤྱི་པའི་ཀུན་སྤྱོད་ཀྱིས་སེམས་དགེ་བར་བྱེད་པ། ཀུན་སྤྱོད་ཆེན་པོས་བླ་སྲོག་སྐྱེད་པ་བཅས་བྱེད་དགོས། སློབ་མར་ཁྲིམས་སྐྱོང་སློབ་གསོ་གཏོང་རྒྱུར་ཤུགས་བརྒྱབ་ནས་སློབ་མར་སྒྲིག་བཀུར་ཁྲིམས་སྲུང་གི་གོམས་གཤིས་བཟང་པོ་ཆགས་སུ་འཇུག་དགོས། སྔོན་ཆད་མི་ཞིག་གིས་ནོ་པེལ་བྱ་དགའ་ཐོབ་མཁན་ཞིག་ལ། “ཁྱེད་ཀྱིས་སློབ་གྲྭ་གང་ནས་ཆེས་གལ་ཆེ་བའི་ཆ་དེ་བསླབས་པ་ཡིན་ནམ།” ཞེས་དྲིས་པར། ཁོང་གིས་“ངས་བུ་བཅོལ་ཁང་ནས་རང་ཉིད་ཀྱི་དངོས་པོ་མིན་ན་ལེན་མི་རུང་བ་དང་། ནོར་འཁྲུལ་ཤོར་ན་དགོངས་དག་ཞུ་དགོས་པ་བསླབས་པ་ཡིན།” “རྩ་བའི་ཆ་ནས་བཤད་ན། འདི་ནི་མི་ཚེ་གང་པོར་བསླབས་པའི་ཁྲོད་ཆེས་གལ་ཆེ་ཤོས་དེ་རེད།” ཅེས་གསུངས། སློབ་མར་བྱ་བ་ཆུང་ཆུང་ཡག་པོར་སྒྲུབ་པ་དང་དོན་དག་ཕྲན་ཚེགས་དོ་དམ་ཡག་པོ་བྱེད་པ་ནས་འགོ་རྩོམ་པར་སློབ་གསོ་དང་ཁྲིད་སྟོན་བྱས་ཏེ། ཏན་ཏན་ཏིག་ཏིག་གིས་ཀུན་སྤྱོད་ལེགས་པར་སྦྱངས་ཤིང་། དྲིན་གཟོ་ཤེས་པ། གཞན་ལ་རོགས་རམ་བྱེད་ཤེས་པ། ཁེངས་སྐྱུང་བཟོད་སྒོམ། རང་སྐྱོན་རང་བརྟག །རང་གཅུན་བཅས་བྱེད་ཤེས་པ། བརྩེ་སེམས་ཆེན་པོ་དང་ཀུན་སྤྱོད་ཆེན་པོ། དུང་སེམས་ཆེན་པོ་བཅས་ལྡན་པའི་མི་ཞིག་ཏུ་འགྱུར་བ་བཅས་བྱེད་དགོས།

སློབ་གྲྭར་གཅིག་བསྡུས་ཅན་དང་། མ་ལག་ཅན། རྒྱུན་མཐུད་རང་བཞིན་བཅས་ལྡན་པའི་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་སློབ་གསོ་གཏོང་བའི་ཐུན་མོང་མ་ཡིན་པའི་དགེ་མཚན་ལྡན་པས། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་སློབ་གསོ་གཏོང་བ་དེ་རྩ་བརྟན་སྲོག་སྐྱེད་ཀྱི་རྨང་གཞིའི་ལས་གྲྭར་བརྩིས་ཏེ། ཤེས་ལྡན་མི་སྣ་གསོ་སྐྱོང་བྱེད་པའི་བརྒྱུད་རིམ་ཧྲིལ་པོར་ཁྱབ་པར་བྱེད་དགོས། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཁྲོད་ཀྱི་བྱམས་བརྩེ་གཅེས་སུ་འཛིན་པ་དང་། དམངས་གཞི་རྩར་འཛིན་པ། ཁ་དན་ཚིག་ལ་གནས་པ། བདེན་དོན་ལ་བརྩི་མཐོང་ཆེ་བ། མཐུན་པ་གོང་ལ་བཀུར་བ། ས་སྟེང་སྤྱི་མཐུན་ཡོང་རྒྱུ་དོན་དུ་གཉེར་བ་བཅས་ཀྱི་དུས་རབས་ཀྱི་རིན་ཐང་གཏིང་ཟབ་མོའི་སྒོ་ནས་སྔོག་འདོན་དང་དར་སྤེལ་བྱས་ཏེ། སློབ་མར་རིན་ཐང་ལྟ་བའི་སློབ་གསོ་གཏོང་བའི་འཚོ་བཅུད་ཕུན་སུམ་ཚོགས་པར་བསྒྱུར་བ་དང་། སློབ་མར་རིག་གནས་ཀྱི་རྨང་གཞི་གསོག་འཇོག་བྱས་ནས་སློབ་མའི་རིག་གནས་ཀྱི་བྱང་ཚད་མཐོ་རུ་གཏོང་དགོས། ཞུན་བརྡར་དང་། གཞན་སྒྱུར། མཉམ་འདྲེས་བཅས་ཀྱི་ཐད་འབད་བརྩོན་བྱས་ཏེ། རྟེན་རྫས་བཤམས་མཛོད་ཁང་དུ་ཉར་བའི་རིག་དངོས་དང་། ས་གཞི་ཆེན་པོའི་སྟེང་དུ་བཤམས་པའི་ཤུལ་ནོར། གཙུག་ལག་དཔེ་ཆའི་ནང་གི་ཡི་གེ་བཅས་པ་དཔེ་ཁྲིད་མི་སྐྱོང་གི་ཐོན་ཁུངས་གྱ་ནོམ་པ་ཞིག་ཏུ་བསྒྱུར་བ་དང་། སློབ་མ་ཚོར་ནང་དོན་ཟབ་པའི་སློབ་ཚན་དང་སློབ་དེབ་དང་། གནའ་ཤུལ་གྲགས་ཅན་ལ་ལྟ་སྐོར་བྱེད་པའི་མྱོང་ཚོར་དངོས་ཀྱི་ཁྲོད་ནས་ཀྲུང་ཧྭའི་རིག་གནས་ཀྱི་འཕོ་འགྱུར་ཤེས་རྟོགས་དང་ཀྲུང་ཧྭའི་རིག་གནས་ཀྱི་རྩ་རྒྱུད་རྒྱུས་ལོན། ཀྲུང་ཧྭའི་རིག་གནས་ཀྱི་ཡིད་དབང་འཕྲོག་ཤུགས་ཉམས་ལེན་དང་ཀྲུང་ཧྭའི་རིག་གནས་ཀྱི་སྙིང་བཅུད་བསྡུ་ལེན་བཅས་བྱེད་དུ་བཅུག་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་གཞི་རྒྱུ་མི་རབས་ནས་མི་རབས་བར་རྒྱུན་འཛིན་ཐུབ་པར་བྱེད་དགོས།

བཞི་ནི་ཤེས་བྱ་དང་མཐོང་རྒྱ་ཆེ་རུ་གཏོང་བའི་ཐད་འབད་བརྩོན་བྱེད་དགོས། ཤེས་བྱ་སློབ་སྦྱོང་བྱ་རྒྱུ་ནི་སློབ་མའི་རང་འཁྲིའི་ལས་འགན་ཡིན། 《ཁུང་ཙིའི་གསུང་སྒྲོས་》ནང་། “སློབ་སྦྱོང་ལ་བརྩོན་ཞིང་དད་སེམས་འགྱུར་མེད་དང་། གཞན་ལ་འདྲི་ཞིང་རང་གིས་དཔྱད་ན། བྱམས་པ་ནི་དེའི་ཁྲོད་གནས་པ་ཡིན།” ཞེས་བརྗོད་པ་ལྟར། མ་བསླབས་ན་ཡོན་ཏན་མི་འཕེལ་བས། སློབ་མར་སློབ་སྦྱོང་གི་དུས་ཚོད་ལ་གཅེས་སྤྲས་དང་སེམས་རྣལ་དུ་ཕབ་ནས་སློབ་སྦྱོང་བྱེད་དགོས་པའི་སློབ་གསོ་དང་ཁྲིད་སྟོན་བྱས་ཏེ། ཤེས་བྱ་རྒྱ་ཆེ་ཞིང་གཏིང་ཟབ་པར་སློབ་སྦྱོང་བྱ་རྒྱུར་མཐོང་ཆེན་བྱེད་དགོས་ལ། སློབ་སྦྱོང་བྱེད་པའི་ཁྲོད་ནས་མཐོང་རྒྱ་སྐྱེད་པ་དང་ཡོན་ཏན་ཕུན་སུམ་ཚོགས་པར་གཏོང་བ། གནམ་འོག་གི་གནས་ལུགས་རྟོགས་པ། བྱ་དངོས་འཕེལ་རྒྱས་ཀྱི་ཆོས་ཉིད་ཁོང་དུ་ཆུད་པར་བྱེད་པ་དང་། ཤེས་བྱ་སློབ་པར་མཁས་པ་དང་། སློབ་སྦྱོང་བྱེད་པར་བརྩོན་པ། གསར་གཏོད་བྱེད་ཕོད་པ། ལག་ལེན་བྱེད་སྤོབས་པ་བཅས་བྱེད་ཐུབ་པ་དང་། བདེན་དོན་འཚོལ་བ་དང་། ཚུལ་ལུགས་རྟོགས་པ། གནས་ལུགས་གོ་བ་བཅས་ཀྱི་ཕྱོགས་སུ་མདུན་སྐྱོད་བྱེད་དགོས།

དུས་རབས་གསར་པའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་ལ་ཀྲུང་གོའི་བརྩེ་ཞེན་ཡོད་དགོས་པར་མ་ཟད། འཛམ་གླིང་གི་མིག་རྒྱང་དང་རྒྱལ་སྤྱིའི་མཐོང་རྒྱ་ཡང་ཡོད་དགོས། རང་རྒྱལ་གནའ་རབས་ཀྱི་དཔེ་ཆ་བ་རྣམས་ལ་སྔར་ནས་བློ་ལ་གནམ་འོག་བཅངས་ཤིང་། དུས་བབ་དང་བསྟུན་ནས་འཇིག་རྟེན་ལ་ཕན་པ་སྒྲུབ་པའི་ཕུགས་འདུན་ཡོད་ལ། ས་སྟེང་ཐམས་ཅད་སྤྱི་སྐལ་དང་འཛམ་གླིང་སྤྱི་སྙོམས་ཆེན་པོ་ཡོང་བའི་ཕུགས་བསམ་ཡང་བཅངས་ཡོད། སློབ་མར་འཛམ་གླིང་གི་གནས་བབ་དང་དེའི་འཕེལ་རྒྱས་དང་འགྱུར་ལྡོག་ལ་དོ་ཁུར་བྱེད་པའི་སློབ་གསོ་དང་ཁྲིད་སྟོན་བྱས་ཏེ། ཀྲུང་གོའི་བརྩེ་ཞེན་དང་གོ་ལ་ཧྲིལ་པོའི་མཐོང་རྒྱ་ལྡན་པའི་ཤེས་ལྡན་མི་སྣར་འགྱུར་བ་དང་། མེས་རྒྱལ་འཛུགས་སྐྲུན་བྱེད་པའི་འགན་འཁྲི་ཕྲག་ཏུ་འཁུར་ཐུབ་པར་མ་ཟད། འཛམ་གླིང་དང་མིའི་རིགས་ལ་བྱས་རྗེས་འཇོག་པའི་འགན་འཁྲིའང་འཁུར་བར་བྱེད་དགོས།

ལྔ་ནི་འབད་འཐབ་ཀྱི་སྙིང་སྟོབས་སྐྱེད་སྲིང་བྱེད་པའི་ཐད་འབད་བརྩོན་བྱེད་དགོས། ཕུགས་འདུན་ཆེན་པོ་ལྡན་པ་ནི་སློབ་སྦྱོང་ཡར་ཐོན་ཡོང་བའི་སྒུལ་ཤུགས་ཡིན། “ཕུགས་ཀྱི་འདུན་མ་མེད་གྱུར་ན། །བྱ་བ་གང་ཡང་འགྲུབ་མི་འགྱུར། །” “གནའ་དུས་དོན་ཆེན་བསྒྲུབས་པ་དག་ལ། ཀུན་ལས་འཕགས་པའི་ཡོན་ཏན་ཡོད་པ་ཁོ་ནར་མ་ཟད། བློ་བརྟན་འགྱུར་མེད་ཀྱི་ཕུགས་འདུན་ཡང་ངེས་པར་ཡོད་དོ། །” ངས་ཀྲུང་ཧྭ་མི་རིགས་བསྐྱར་དར་རླབས་པོ་ཆེ་མངོན་འགྱུར་བྱེད་པ་ནི་བདེ་བདེ་ལྷོད་ལྷོད་དང་རྔ་རྡུང་དར་འཕྱར་བྱས་པ་ཙམ་གྱིས་འགྲུབ་ཐུབ་པ་ཞིག་མིན་པས། སྔར་ལས་ལྗིད་རྫོབ་ཆེ་བ་དང་སྔར་ལས་དཀའ་ཚེགས་ཆེ་བའི་འབད་བརྩོན་བྱེད་དགོས་ཞེས་བཤད་མྱོང་། ད་ལྟའི་གཞོན་ནུ་དང་ལོ་ཆུང་མང་ཆེ་བ་ལྟོ་གོས་ལ་སེམས་ཁྲལ་བྱེད་མི་དགོས་པའི་ཁོར་ཡུག་ནང་འཚར་ལོངས་བྱུང་བ་ཡིན་པས་ཁོ་ཚོའི་འགན་འཁྲི་འཁུར་སེམས་དང་། བློ་རྩ་བརྟན་པོ། དཀའ་སྤྱད་སྡུག་རུས་བཅས་ཀྱི་སྙིང་སྟོབས་གསོ་སྐྱོང་བྱེད་པར་སྔོན་ཆད་ལས་འབད་བརྩོན་གང་མང་བྱེད་དགོས། ད་ལོའི་ཟླ་5པར། ངས་པེ་ཅིན་སློབ་གྲྭ་ཆེན་མོ་རུ་སློབ་གྲྭ་ཆེན་མོ་བ་རྣམས་ལ་“བརྩོན་པ་སྐྱེད། ཕུགས་འདུན་ཆེན་པོ་བསྐྱེད། འབད་འཐབ་བྱེད་མཁན་བྱེད་”ཅེས་པའི་རེ་བ་བཏོན་པ་ཡིན། དུས་ནམ་ཡིན་ཡང་འབད་འཐབ་ཀྱི་སྙིང་སྟོབས་འདོར་མི་རུང་ལ། དེ་ཡང་“ཕུགས་འདུན་དམའ་སར་མི་བསྙེག །ལས་དོན་དཀའ་བར་མི་གཡོལ།” ཞེས་པ་ལྟར་ཡིན་པ་གཞོན་ནུ་དང་ལོ་ཆུང་རྣམས་ལ་ཤེས་སུ་འཇུག་དགོས། སློབ་མར་དུས་རབས་ཀྱི་འོས་འགན་དང་འགན་འཁྲིའི་འདུ་ཤེས་ཐད་ཀྱི་སློབ་གསོ་གཏོང་དགོས་པ་དང་། སློབ་མར་སློབ་གསོ་དང་ཁྲིད་སྟོན་བྱས་ཏེ། གལ་ཏེ་མཚར་སྡུག་ལྡན་པའི་མི་ཚེ་གསར་སྐྲུན་བྱེད་འདོད་ན། ངེས་པར་དུ་ཕུགས་འདུན་ཆེན་པོ་ཡོད་དགོས་པ་དང་། འཁུར་ལེན་ཕོད་པ་དང་འབད་བརྩོན་ལྷོད་མེད་བྱེད་པའི་སྙིང་སྟོབས་སྐྱེད་པ། འབད་བརྩོན་བྱེད་པར་དཔའ་བའི་སྙིང་སྟོབས་དང་སྤྲོ་སྣང་ཡར་སྐྱེད་ཀྱི་མི་ཚེའི་རྣམ་འགྱུར་ལྡན་པ། བྱ་སྤྱོད་ལ་བརྟེན་ནས་ཤེས་བྱ་སློབ་གཉེར་བྱེད་པ་དང་ཤེས་ཡོན་ལ་བརྟེན་ནས་བྱ་སྤྱོད་ལ་སྐུལ་འདེད་གཏོང་བ། ཤེས་སྤྱོད་ཟུང་འབྲེལ་ངོ་མ་བྱེད་ཐུབ་པ། སྟོབས་ལྡན་ལས་སྒྲུབ་དང་གཡེལ་མེད་རང་བརྩོན་བྱེད་ཐུབ་པ་བཅས་བྱེད་དགོས་པ་ཤེས་སུ་འཇུག་དགོས།

དྲུག་ནི་ཕྱོགས་བསྡུས་བྱང་ཚད་མཐོ་རུ་གཏོང་རྒྱུའི་ཐད་འབད་བརྩོན་བྱེད་དགོས། སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་ངེས་པར་དུ་ཕྱོགས་ཡོངས་ནས་འཕེལ་རྒྱས་གཏོང་དགོས། རང་རྒྱལ་གྱི་ཀྲོའུ་རྒྱལ་རབས་ཀྱི་གཞུང་གི་སློབ་གྲྭས་སློབ་མ་ཚོར་གུས་ལུགས་དང་། རོལ་མོ། མདའ་རྩལ། སྐྱ་རྩལ། རྩོམ་རྩལ། རྩིས་རིག་བཅས་“རྩལ་དྲུག་”ཁོང་དུ་ཆུད་དགོས་པའི་བླང་བྱ་འདོན་པ་རེད། འདི་ནི་རིག་ཚན་དང་རྩིས་ཚན་གཉིས་ཀ་འཛོམས་ཡོད་པ་ཞིག་རེད། སློབ་མར་ཕྱོགས་བསྡུས་ནུས་པ་གསོ་སྐྱོང་བྱེད་པར་སློབ་གསོ་དང་ཁྲིད་སྟོན་བྱེད་པ་དང་། སློབ་མར་རོགས་རམ་བྱས་ཏེ་རང་གིས་རང་ལ་དོ་དམ་བྱེད་ཤེས་པ་དང་མི་གཞན་དང་མཉམ་ལས་བྱེད་ཤེས་པ། ཐུན་མོང་གི་འཚོ་བ་སྐྱེལ་ཤེས་པ་བཅས་བྱེད་པ་དང་། ཡ་མཚན་ཤེས་འདོད་ཀྱི་བསམ་པ་དང་འཆར་ཡན་གྱི་བསམ་བློ་སློང་བ། གསར་གཏོད་ཀྱི་བསམ་གཞིགས་གསོ་སྐྱོང་བྱེད་དགོས། གསར་གཏོད་སློབ་གསོ་དེ་སློབ་གསོའི་བྱེད་སྒོའི་བརྒྱུད་རིམ་ཧྲིལ་པོར་ཁྱབ་པར་བྱེད་པ་དང་། “གནས་ཐམས་ཅད་གསར་སྐྲུན་བྱེད་ས་དང་། དུས་ཐམས་ཅད་གསར་སྐྲུན་བྱེད་དུས། མི་ཐམས་ཅད་གསར་སྐྲུན་བྱེད་མཁན་”བཅས་ཡིན་པའི་སློབ་གསོའི་ཁོར་ཡུག་དར་སྤེལ་གཏོང་བ་དང་། སློབ་མ་རྣམས་ལ་བསམ་བློ་གཏོང་མཁས་པོ་དང་ལག་ལེན་ཧུར་ཐག་བསྟར་བར་བསྔགས་སྐུལ་བྱེད་པ། གསར་སྐྲུན་གྱི་སློབ་གསོར་བརྟེན་ནས་གསར་སྐྲུན་གྱི་ཤེས་ལྡན་མི་སྣ་གསོ་སྐྱོང་དང་། གསར་སྐྲུན་གྱི་ཤེས་ལྡན་མི་སྣར་བརྟེན་ནས་གསར་སྐྲུན་གྱི་རྒྱལ་ཁབ་སྐྲུན་པ་བཅས་བྱེད་དགོས།

ད་ལྟ་སྤྱི་ཚོགས་ཡོངས་ཀྱིས་གཞོན་ནུ་དང་ལོ་ཆུང་གི་གཟུགས་གཞི་བདེ་ཐང་ལ་སེམས་ཁུར་བྱེད་བཞིན་ཡོད། གཞོན་ནུ་དང་ལོ་ཆུང་གི་གཟུགས་གཞི་བདེ་ཐང་གི་ཆུ་ཚད་ནི་སྔར་བཞིན་སློབ་མའི་བྱང་ཚད་ཐད་ཀྱི་ཆད་སྐྱོན་ཡིན་ཞིང་། “རྒྱགས་རིལ་ཆུང་ཆུང་”དང་“མིག་ཤེལ་ཆུང་ཆུང་”མང་དུ་འགྲོ་བཞིན་ཡོད། ཉེ་ལམ། ངས་རང་རྒྱལ་གྱི་སློབ་མའི་རྒྱང་སྒྲིབ་མིག་ཅན་འབྱུང་ཚད་ཇེ་མཐོ་དང་ལོ་ན་ཇེ་ཆུང་དུ་འཕེལ་བའི་གནད་དོན་སྐོར་ལ་མཆན་བཀོད་མཛུབ་སྟོན་བྱས་པ་ཡིན། གནད་དོན་འདིས་བྱིས་པ་ཚོའི་ལུས་སེམས་བདེ་ཐང་ལ་ཤུགས་རྐྱེན་ཚབས་ཆེན་ཐེབས་པས། སློབ་གྲྭ་དང་སྤྱི་ཚོགས་ཡོངས་ཀྱིས་བྱ་སྤྱོད་སྤེལ་ནས་མཉམ་དུ་བྱིས་པ་ཚོའི་མིག་ལ་གཅེས་སྐྱོང་བྱས་ཏེ། ཁོ་ཚོར་གསལ་ལྷིང་ལྷིང་གི་མ་འོངས་པ་ཞིག་ཡོད་པར་བྱེད་དགོས། ལུས་རྩལ་སྦྱོང་བརྡར་ཐད་ཀྱང་སློབ་གྲྭ་དངོས་ཡོད་ཀྱི་གནད་དོན་མང་པོར་འཕྲད་ཡོད་པ་དང་། བློ་རྒྱ་ཆེར་སྐྱེད་ཀྱིས་བྱ་འགུལ་སྤེལ་མི་ཕོད་པར་ཆགས་ཡོད། ཡུན་རིང་འདི་ལྟར་སོང་ན་ག་ལ་འགྲིག །བློ་མཐུན་མའོ་ཙེ་ཏུང་གིས་གཞོན་ནུ་དང་ལོ་ཆུང་རྣམས་ལ་སེམས་ཁམས་གཡུང་མོ་དང་གཟུགས་གཞི་རྒོད་པོ་ཞིག་ཡོད་དགོས་ཞེས་གསུངས། བདེ་ཐང་ཨང་དང་པོ་ཡིན་པའི་སློབ་གསོའི་འདུ་ཤེས་སྐྱེད་པ་དང་། ལུས་རྩལ་སློབ་ཚན་ཆ་ཚང་ཞིང་འདང་ངེས་འཚོགས་ནས་སློབ་མ་ཚོར་ལུས་རྩལ་སྦྱོང་བརྡར་ཁྲོད་སྤྲོ་སྣང་ཉམས་སུ་མྱོང་བ་དང་། གཟུགས་གཞི་བདེ་ཐང་དུ་གཏོང་བ། མི་གཤིས་ཇེ་བཟང་དུ་གཏོང་བ། སྙིང་སྟོབས་ཞུན་བརྡར་བྱེད་པ་བཅས་ཀྱི་རོགས་རམ་བྱེད་དགོས།

མཛེས་པ་ནི་ཀུན་སྤྱོད་དྭངས་གཙང་དང་སྙིང་སྟོབས་ཕུན་སུམ་ཚོགས་སུ་གཏོང་བའི་འབྱུང་ཁུངས་གལ་ཆེན་ཡིན། མཛེས་པའི་གསོ་བཅུད་མེད་པའི་མི་ཚེ་ནི་སྣ་གཅིག་ཅན་དང་གསོན་ཉམས་བྲལ་བའི་མི་ཚེ་ཡིན། ད་ལོའི་ཟླ་8ཚེས་30ཉིན་ངས་ཀྲུང་དབྱང་མཛེས་རྩལ་སློབ་གླིང་གི་དགེ་རྒན་ཆེན་མོ་རྒན་པ་བརྒྱད་ལ་ཡིག་ལན་བསྐུར་སྐབས་ཆེད་དུ་གནད་དོན་འདི་ནན་བཤད་བྱས་ཡོད། ཁུང་ཙིས་སློབ་གསོ་ནི་“སྙན་ངག་ལས་དར་བ་”དང་“རོལ་མོ་ལས་གྲུབ་པ་”ཞིག་ཡིན་པར་འདོད་ཅིང་། དེའི་ནང་དུ་མཛེས་དཔྱོད་སློབ་གསོར་མཐོང་ཆེན་བྱེད་པ་འདུས་ཡོད། སྐུ་ཞབས་ཀྲུའུ་ཀོང་ཆན་ལ་གསུང་ཚིག་གྲགས་ཅན་ཞིག་ཡོད་དེ། “མི་སེམས་དྭངས་གཙང་ཡོང་དགོས་ན། སྔོན་ལ་མི་ཚེ་མཛེས་པར་གཏོང་དགོས།” ཞེས་གསུངས། གལ་ཏེ་གཞོན་ནུ་དང་ལོ་ཆུང་གི་བསམ་པའི་འཇིག་རྟེན་དུ་བྱིས་སྒྲུང་དང་། བྱིས་གླུ། རང་བྱུང་ཁམས་ཀྱི་སྤྲིན་པ་དང་། མེ་ཏོག །འབའ་འབུ་བྱ་བྱིའུ་སྐད་སྙན་བཅས་མེད་ཚེ། གལ་ཏེ་གཞོན་ནུ་དང་ལོ་ཆུང་གི་སེམས་ཁམས་འཇིག་རྟེན་དུ་ཡིད་དབང་འཕྲོག་པའི་དབྱངས་རྟ་དང་ཕུན་སུམ་ཚོགས་པའི་ཁ་དོག་མེད་ཚེ། གལ་ཏེ་གཞོན་ནུ་དང་ལོ་ཆུང་ལ་སྒྱུ་རྩལ་གྱི་དགའ་ཕྱོགས་དང་སྒྱུ་རྩལ་གྱི་བློ་སྦྱོང་མེད་ཚེ། ཕྱོགས་ཡོངས་ནས་འཕེལ་རྒྱས་ཡོང་མི་སྲིད་པ་ཡིན། ཕྱོགས་ཡོངས་ནས་སློབ་གྲྭའི་མཛེས་དཔྱོད་སློབ་གསོར་ཤུགས་རྒྱག་པ་དང་ལེགས་བཅོས་བྱེད་པ་དང་། མཛེས་དཔྱོད་སློབ་གསོའི་དགེ་རྒན་ཆ་ཚང་ཞིང་ཡག་པོ་བཀོད་སྒྲིག་བྱས་ཏེ། མཛེས་དཔྱོད་སློབ་གསོ་དང་རིག་གནས་ལ་བརྟེན་ནས་མི་གསོ་སྐྱོང་བྱ་རྒྱུ་རྒྱུན་འཁྱོངས་བྱེད་པ་དང་། སློབ་མའི་མཛེས་དཔྱོད་དང་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་བྱང་ཚད་མཐོ་རུ་གཏོང་དགོས།

ངལ་རྩོལ་གྱིས་ཀུན་སྤྱོད་གསོ་སྐྱོང་དང་། བློ་རིག་འཕེལ་བ། ལུས་སྟོབས་རྒྱས་པ། མཛེས་དཔྱོད་སྐྱེད་སྲིང་བཅས་བྱེད་ཐུབ། ཐེངས་འདིར། ཏང་ཀྲུང་དབྱང་གིས་གཟབ་ནན་གྱིས་ཞིབ་འཇུག་བྱས་པ་བརྒྱུད། ངལ་རྩོལ་སློབ་གསོ་དེ་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པའི་བླང་བྱའི་ནང་བཅུག་ནས་“ཀུན་སྤྱོད་ཤེས་རིག་ལུས་རྩལ་མཛེས་དཔྱོད་ངལ་རྩོལ་”གྱི་སྤྱིའི་བླང་བྱ་འདོན་རྒྱུ་ཐག་བཅད་ཡོད། ད་ལྟ་གཞོན་ནུ་དང་ལོ་ཆུང་ཁག་ཅིག་གི་ཁྲོད་དུ་ངལ་རྩོལ་གྱི་གྲུབ་འབྲས་ལ་གཅེས་འཛིན་མི་བྱེད་པ་དང་། ངལ་རྩོལ་བྱེད་འདོད་མེད་པ། ངལ་རྩོལ་བྱེད་མི་ཤེས་པ་བཅས་ཀྱི་སྣང་ཚུལ་བྱུང་ཡོད། སློབ་མའི་ནང་དུ་ངལ་རྩོལ་གྱི་སྙིང་སྟོབས་དར་སྤེལ་གཏོང་བ་དང་། སློབ་མར་ངལ་རྩོལ་ལ་བརྩི་མཐོང་དང་། ངལ་རྩོལ་ལ་བརྩི་འཇོག་བྱ་རྒྱུར་སློབ་གསོ་དང་ཁྲིད་སྟོན་བྱས་ཏེ། ངལ་རྩོལ་ཆེས་གཟི་བརྗིད་ལྡན་པ་དང་། ངལ་རྩོལ་ཆེས་བླ་ན་མེད་པ། ངལ་རྩོལ་ཆེས་རླབས་ཆེ་བ། ངལ་རྩོལ་ཆེས་མཛེས་སྡུག་ལྡན་པ་བཅས་ཀྱི་གནས་ལུགས་ཤེས་སུ་བཅུག་ན། ནར་སོན་རྗེས་དཀའ་སྤྱད་ངལ་རྩོལ་དང་ཚུལ་མཐུན་ངལ་རྩོལ། གསར་གཏོད་རང་བཞིན་གྱིས་ངལ་རྩོལ་བཅས་བྱེད་ཐུབ། མིག་སྔའི་ཁོར་ཡུག་དང་ཆ་རྐྱེན་དང་མཐུན་པའི་བྱེད་ཐབས་ནུས་ལྡན་སྤྱད་དེ་ངལ་རྩོལ་སློབ་གསོར་ཤུགས་རྒྱག་པ་དང་། རྣམ་པ་སྣ་ཚོགས་ཀྱི་ངལ་རྩོལ་ལག་ལེན་བྱ་རྒྱུ་སྒྲིག་འཛུགས་ཡག་པོ་བྱས་ཏེ་ལག་ལེན་ཁྲོད་སློབ་མ་ཚོར་ངལ་རྩོལ་གྱི་གོམས་གཤིས་འཇགས་པ་དང་། ངལ་རྩོལ་བྱེད་ཤེས་པ་དང་། ཧུར་བརྩོན་དང་གྲོན་ཆུང་བྱེད་ཤེས་པར་བྱེད་དགོས། འདི་ནི་རྒྱལ་ཁབ་སྟོབས་ལྡན་དང་མི་དམངས་ཕྱུག་འགྱུར་ཡོང་བའི་དོན་ཆེན་ཡིན་པས། སློབ་གསོའི་སྡེ་ཁག་གིས་སྡེ་ཁག་གཞན་དག་དང་མཉམ་དུ་ཞིབ་འཇུག་དང་བྱེད་ཐབས་བཏོན་ནས་དམ་འཛིན་ཏན་ཏིག་བྱེད་དགོས།

སློབ་མ་གསོ་སྐྱོང་བྱས་ཚུལ་བཟང་མིན་ནི་ཚད་གཞི་གང་འདྲ་ཞིག་གིས་ཚད་འཇལ་བ་དང་། ལྟ་སྟངས་གང་འདྲ་ཞིག་གིས་གསར་རྙེད་བྱས་མིན་ལ་བལྟ་དགོས། སློབ་གསོ་ནི་“ཕམ་ཁ་མྱོང་མཁན་”གསོ་སྐྱོང་བྱེད་པ་མིན་པས། སྐར་གྲངས་ཀྱིས་རྟགས་འགོད་པའི་བྱེད་སྟངས་འདི་ངེས་པར་དུ་རྩ་བ་ནས་བསྒྱུར་དགོས། སློབ་མ་རེ་རེ་ནི་ཐུན་མོང་མ་ཡིན་པའི་བྱེ་བྲག་གི་མི་རེ་རེ་ཡིན་ཞིང་། སྐྱེས་ཐོབ་དང་། འཇོན་ཐང་། དགའ་ཕྱོགས། ཁྱད་ཆོས་བཅས་གཅིག་འདྲ་མིན་པས་སྦྱངས་འབྲས་ཡག་པོ་ཡོད་པའི་སློབ་མ་ཁོ་ནར་དོ་ཁུར་བྱས་ཏེ། སློབ་མ་གཞན་མང་པོ་ཞིག་སྣང་མེད་དུ་བཞག་པ་དང་བརྗེད་ནས། སློབ་སྦྱོང་གི་གྲུབ་འབྲས་དང་འཚར་ལོངས་ཀྱི་སྤྲོ་སྣང་ཚོར་མི་ཐུབ་པ་དང་། ཡིད་ཆེས་མེད་པར་འགྱུར་བ་བྱ་མི་རུང་། སློབ་མར་བརྩི་འཇོག་དང་། སློབ་མར་བསམ་ཤེས། སློབ་མར་ཡིད་ཆེས། སློབ་མར་བསྔགས་སྐུལ་བཅས་བྱས་ཏེ། སློབ་མ་ཚང་མར་འདྲ་མཉམ་དྲང་གཞག་གི་ལྟ་སྟངས་འཛིན་དགོས་ལ། སློབ་མ་རེ་རེ་ནི་སྐྱོང་དུ་འོས་པའི་མི་ཡིན་པར་ཡིད་ཆེས་བྱས་ནས། སློབ་མ་རེ་རེའི་ལེགས་ཆ་དང་ཁྱད་ཆོས་རྟོགས་མཁས་པོ་བྱེད་དགོས། ལྷག་པར་དུ་གཞིས་སྲུང་བྱིས་པ་དང་། གྲོང་ཁྱེར་དང་གྲོང་གསེབ་ཀྱི་དཀའ་ངལ་ཡོད་པའི་བྱིས་པ། དབང་པོ་སྐྱོན་ཅན་བྱིས་པ། སློབ་སྦྱོང་དང་འཚར་ལོངས་བལྟོས་བཅས་ཀྱིས་རྗེས་ལུས་ཡིན་པའི་སློབ་མ་བཅས་ལ་སེམས་ཁུར་དང་གཅེས་སྐྱོང་བྱེད་དགོས། ཆིང་རྒྱལ་རབས་ཀྱི་སྙན་ངག་པ་ཡོན་མེར་མི་སེམས་འགུག་པའི་སྙན་ངག་ཅིག་ཡོད་དེ། “ཉི་འོད་མི་སླེབས་སྲིབ་ལོགས་སུ། །དཔྱིད་ཀྱི་དཔལ་མོ་ངང་གིས་ཤར། །ཕྲ་ཚོམ་སྔོ་དྲེག་མེ་ཏོག་ཀྱང་། །ཤིང་གི་པད་མར་འགྲན་ནས་བཞད། །” ཅེས་པ་ལྟར། སློབ་གསོའི་མིག་ཟུང་མེ་ཏོག་ལྡུམ་རའི་ནང་གི་མིག་ལ་འཚེར་བའི་པད་མ་ཁོ་ནར་ཅེར་ནས་བསྡད་ན་མི་འགྲིག་པར། གྱང་ཟུར་ན་མངོན་ཆུང་གིས་བཞད་པའི་སྔོ་དྲེག་མེ་ཏོག་ལའང་ཕྱོགས་དགོས།

ཀུན་སྤྱོད་ཤེས་རིག་ལུས་རྩལ་མཛེས་དཔྱོད་ངལ་རྩོལ་བཅས་ཕྱོགས་ཡོངས་ནས་གསོ་སྐྱོང་བྱེད་པའི་སློབ་གསོའི་མ་ལག་ཧུར་ཐག་གིས་བཙུགས་ནས་ཆུ་ཚད་སྔར་ལས་མཐོ་བའི་ཤེས་ལྡན་མི་སྣ་གསོ་སྐྱོང་བྱེད་པའི་མ་ལག་ཆགས་པར་བྱེད་དགོས། ཀུན་སྤྱོད་ལ་བརྟེན་ནས་མི་གསོ་སྐྱོང་བྱ་རྒྱུ་དེ་བསམ་བློ་ཀུན་སྤྱོད་ཀྱི་སློབ་གསོ་དང་། རིག་གནས་ཤེས་བྱའི་སློབ་གསོ། སྤྱི་ཚོགས་ལག་ལེན་གྱི་སློབ་གསོ་བཅས་ཀྱི་ལྷུ་ཚིགས་སོ་སོའི་ནང་འདྲེས་པར་བྱེད་པ་དང་། རྨང་གཞིའི་སློབ་གསོ་དང་ལས་རིགས་སློབ་གསོ། མཐོ་རིམ་སློབ་གསོ་བཅས་ཀྱི་ཁྱབ་ཁོངས་སོ་སོར་ཁྱབ་པར་བྱས་ཏེ། རིག་གཞུང་ཚན་ཁག་མ་ལག་དང་། སློབ་ཁྲིད་མ་ལག །བསླབ་གཞིའི་མ་ལག །དོ་དམ་མ་ལག་བཅས་ཀྱིས་དམིགས་འབེན་འདིར་དམིགས་ནས་ཇུས་འགོད་བྱེད་དགོས། དགེ་རྒན་གྱིས་དམིགས་འབེན་འདིར་དམིགས་ནས་སློབ་ཁྲིད་བྱེད་དགོས། སློབ་མས་དམིགས་འབེན་འདིར་དམིགས་ནས་སློབ་སྦྱོང་བྱེད་དགོས། དམིགས་འབེན་འདི་མངོན་འགྱུར་བྱེད་པར་གནོད་པའི་བྱེད་ཐབས་ཡིན་ཕྱིན་མཐའ་གཅིག་ཏུ་ཡོ་བསྲང་བྱེད་དགོས།

འདིར་ངས་ཡང་བསྐྱར་ནན་བཤད་བྱ་རྒྱུ་ཞིག་ནི་བསླབ་གཞི་འཛུགས་སྐྲུན་བྱ་རྒྱུར་མཐོང་ཆེན་བྱེད་དགོས་པ་དེ་ཡིན། བསླབ་གཞི་ནི་ཤེས་བྱ་བརྒྱུད་བསྒྲགས་བྱེད་པའི་གཞི་རྟེན་གཙོ་བོ་ཡིན་ཞིང་། རྒྱལ་ཁབ་ཅིག་དང་མི་རིགས་ཤིག་གི་རིན་ཐང་ལྟ་བའི་མ་ལག་མཚོན་པ་དང་། དགེ་རྒན་གྱིས་སློབ་ཁྲིད་བྱེད་པ་དང་སློབ་མས་སློབ་སྦྱོང་བྱེད་པའི་ལག་ཆ་གལ་ཆེན་ཞིག་ཡིན། བསླབ་གཞིས་མར་ཁེ་སིའི་རིང་ལུགས་ཀྱི་སློབ་སྟོན་གོ་གནས་རྒྱུན་འཁྱོངས་བྱེད་པ་དང་། མར་ཁེ་སིའི་རིང་ལུགས་ཀྲུང་གོ་ཅན་དུ་འགྱུར་བའི་བླང་བྱ་དང་། ཀྲུང་གོ་དང་ཀྲུང་ཧྭ་མི་རིགས་ཀྱི་གཤིས་ཉམས། ཏང་དང་རྒྱལ་ཁབ་ཀྱིས་སློབ་གསོར་བཏོན་པའི་གཞི་རྩའི་བླང་བྱ། རྒྱལ་ཁབ་དང་མི་རིགས་ཀྱི་གཞི་རྩའི་རིན་ཐང་ལྟ་བ། མིའི་རིགས་ཀྱི་རིག་གནས་ཤེས་བྱ་གསོག་འཇོག་དང་གསར་གཏོད་ཀྱི་གྲུབ་འབྲས་བཅས་མཚོན་དགོས། གྲངས་ཉུང་མི་རིགས་ཀྱི་ཡི་གེའི་བསླབ་གཞིའི་འཛུགས་སྐྲུན་ལ་ཤུགས་ཆེན་པོ་རྒྱག་དགོས། བསླབ་གཞི་འཛུགས་སྐྲུན་བྱེད་པར་ཆབ་སྲིད་ཀྱི་འགག་གནད་དམ་འཛིན་བྱེད་ཤུགས་ཆེ་རུ་གཏོང་དགོས། ཆབ་སྲིད་ཐད་ཡང་དག་མིན་པ་དང་གནད་ལ་མི་འཁེལ་བའི་བསླབ་གཞི་རྩ་བ་ནས་འདོན་མི་རུང་། སྟབས་བདེའི་སྒོ་ནས་ཆབ་སྲིད་ཀྱི་རྟགས་འགོད་པ་དང་། བསླབ་གཞིའི་མ་ལག་ཆ་ཚང་ཡིན་མིན་དང་གཏན་ཚིགས་ཆ་ཚང་ཡིན་མིན་ལ་མི་བལྟ་བར། ལུང་ཚིག་ལོག་འདྲེན་བྱས་ནས་ཆབ་སྲིད་ཀྱི་ནང་དོན་བཅུག་སྟེ་ར་མིན་ལུག་མིན་གྱི་བསླབ་གཞིའང་བཟོ་མི་རུང་། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ངས་ཡུལ་དུས་མི་འདྲ་བར་བསླབ་གཞི་འཛུགས་སྐྲུན་ཐད་ལ་བླང་བྱ་འགའ་བཏོན་མྱོང་ལ། འབྲེལ་ཡོད་ཕྱོགས་ཀྱིས་ཀྱང་ལས་ཀའི་བཀོད་སྒྲིག་བྱས་འདུག་པས། དོན་འཁྱོལ་དམ་འཛིན་ཡག་པོ་བྱེད་དགོས།

※འདི་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་2018ལོའི་ཟླ་9ཚེས་10ཉིན་རྒྱལ་ཡོངས་སློབ་གསོ་ཚོགས་ཆེན་ཐོག་གནང་བའི་གསུང་བཤད་ཀྱི་ཆ་ཤས་ཤིག་ཡིན།