འཐུས་མི་དང་ཨུ་ཡོན་གྱི་བགྲོད་ལམ་ཐོག རྔ་བ་ཁུལ་འབར་ཁམས་གྲོང་ཁྱེར་ནས་ཡོང་བའི་རྒྱལ་ཡོངས་དམངས་ཆེན་གྱི་འཐུས་མི་བཀྲ་ཤིས་དབང་མོས་རྒྱལ་ཡོངས་མི་དམངས་ལ་ཁོ་མོས་རྒན་གསོའི་ལས་དོན་བསྒྲུབས་པའི་ལོ་ངོ་བཅུ་དྲུག་གི་གཏམ་རྒྱུད་བཤད་ཡོད། ཁོ་མོའི་གཏམ་རྒྱུད་ནི་ལས་གནས་བརྟན་སྲུང་དང་ལས་ཀ་གསར་གཏོད་དང་འབྲེལ་བའི་གཏམ་རྒྱུད་ཅིག་ཡིན་ལ། སྤྱིར་བཏང་གི་བདག་སྐྱོང་ལས་བཟོ་པ་ཞིག་ནས་རྒན་རྒོན་བདག་སྐྱོང་ཁང་གི་འགོ་འཛིན་དུ་འཚར་ལོངས་བྱུང་བ་དང་། དེ་ནས་གཞི་རིམ་དུ་བཅའ་སྡོད་བྱེད་པའི་རྒྱལ་ཡོངས་མི་དམངས་འཐུས་མིའི་ཚོགས་ཆེན་གྱི་འཐུས་མིར་གྱུར་བའི་ངོ་མཚར་གཏམ་རྒྱུད་གླེང་ནས། ལོ་རབས་དགུ་བཅུ་པར་སྐྱེས་པའི་བུད་མེད་འདིས་ལོ་བཅུ་དྲུག་རིང་ལ་རྒན་རྒོན་བྱམས་ཀྱིས་སྐྱོང་བའི་གཏམ་རྒྱུད་སྙན་མོ་ཕྱོགས་བཅུར་བསྒྲགས་ཡོད། ཁོ་མོས་འགན་འཁྲི་སྒྲུབ་པའི་གཏམ་རྒྱུད་ལས་ཀྲུང་གོའི་རྒན་གསོའི་བྱ་གཞག་གི་འཕོ་འགྱུར་མཚོན་པར་མ་ཟད། རྒན་རྒོན་དཔལ་འབྱོར་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་བའི་མ་འོངས་པའི་མདུན་ལྗོངས་ཡག་པོ་ཡང་ངང་གིས་མཚོན་ཡོད།
གཞི་རིམ་གྱི་རྒན་གསོའི་ལས་ལ་གཞོལ་བའི་འཐུས་མི་ཞིག
2008ལོར་སྐབས་དེར་ལོ་བཅོ་བརྒྱད་ཡིན་པའི་བཀྲ་ཤིས་དབང་མོ་རྒན་གསོ་ཞབས་ཞུའི་ལས་ལ་ཞུགས་པ་རེད། རྒན་རྒོན་གྱི་ལུས་པོ་གཙང་བཀྲུ་དང་སེན་མོ་འབྲེག་པ། ལུས་ཁམས་བདེ་སྲུང་དང་སྙིང་གཏམ་ཚོགས་འདུ་སྒྲིག་འཛུགས་བྱས་པར་བརྒྱུད། ཁོ་མོས་རྒན་གསོ་ནི་འཚོ་བའི་ལྟ་སྐྱོང་ཙམ་མ་ཟད། སེམས་ཀྱི་རྒྱབ་རྟེན་ཡང་ཡིན་པ་རིམ་བཞིན་རྟོགས། རྒན་རྒོན་རྣམས་ལ་མཁོ་བ་ནི་མི་ཞིག་གིས་ཁོ་ཚོའི་སྐད་ཆ་ཉན་རྒྱུ་དེ་ཡིན་པ་ཚོར་ཞིང་། ངོས་ཟིན་འདི་ནི་ཁོ་མོའི་བྱ་གཞག་འདིའི་འགོ་འཛུགས་སར་ཆགས་ཡོད།
ལོ་ངོ་བཅུ་དྲུག་རིང་མོས་གཞི་རིམ་གྱི་རྒན་གསོ་ཞབས་ཞུའི་དཀའ་ངལ་དངོས་སུ་མྱོང་ཞིང་། ནད་གཡོག་འཇོན་མི་དཀོན་པ་དང་། ནད་གཡོག་གི་གཟིགས་སྐྱོང་ཐོབ་ཐང་དམའ་བ། གྲོང་གསེབ་ཀྱི་གཞིས་ལུས་རྒན་རྒོན་ལ་འགན་སྲུང་མི་འདང་བ་སོགས་ཀྱི་གནད་དོན་ལས་དེ་བས་ཡངས་ཤིང་རྒྱ་ཆེ་བའི་ལས་འགན་སྒྲུབ་པའི་གར་སྟེགས་སུ་བསྐྱོད་པར་སྐུལ་མ་བཏང་། རྒྱལ་ཡོངས་དམངས་ཆེན་གྱི་འཐུས་མིར་བདམས་ཐོན་བྱུང་རྗེས། མོ་རྔ་བ་ཁུལ་གྱི་གྲོང་ཚོ་དང་གྲོང་རྡལ་དུ་བརྟག་དཔྱད་ཞིབ་འཇུག་ཏུ་ཕེབས་ཤིང་།
དམངས་སྲིད་སྡེ་ཚན་དུ་ཕྱིན་ནས་གྲོང་གསེབ་ཀྱི་གཞིས་སྲུང་རྒན་རྒོན་གྱི་སེམས་གཏམ་ལ་ཉན་པ་དང་། གཞི་རིམ་གྱི་དཀའ་གནད་དག་སྲིད་ཇུས་ཀྱི་གྲོས་འགོར་བཏོན་ཡོད།
རྒན་གསོའི་དཀའ་གནད་ལ་ཁ་གཏད་གཅོག་སྟེ། རྒན་རྒོན་དཔལ་འབྱོར་མི་རིགས་ས་ཁུལ་དུ་རྩ་བ་ཚུགས་སུ་འཇུག་དགོས།
2024ལོའི་ཀྲུང་དབྱང་དཔལ་འབྱོར་ལས་དོན་ཚོགས་འདུའི་ཐོག །རྒན་རྒོན་དཔལ་འབྱོར་དེ་ནང་ཁུལ་གྱི་དགོས་མཁོ་ཆེ་རུ་གཏོང་བའི་ཤུགས་རྒྱག་ས་གལ་ཆེན་དུ་བརྩིས་ཡོད། དེ་ཡིས་བཀྲ་ཤིས་དབང་མོའི་སེམས་ཤུགས་ཆེ་རུ་བཏང་ཞིང་། འགན་འཁྲི་ཡང་ཆེན་པོ་ཡོད་པ་ཚོར་དུ་བཅུག །མོས་བལྟས་ན། མི་རིགས་ས་ཁུལ་གྱི་རྒན་རྒོན་དཔལ་འབྱོར་འཕེལ་རྒྱས་གཏོང་བར་འགྲན་སློང་གཉིས་ཐག་གཅོད་བྱ་དགོས་ཏེ། རྨང་གཞིའི་སྒྲིག་བཀོད་ཀྱི་མི་འདང་ས་ཁ་གསབ་བྱེད་དགོས་ལ། ཐོན་ལས་ཀྱི་སྒུལ་ཤུགས་ཀྱང་སྐུལ་སྤེལ་གཏོང་དགོས།
རིག་ནུས་ལ་བརྟེན་ནས་མཁོ་སྤྲོད་མཐར་ཐུག་གི་གནད་དོན་ཐག་གཅོད་བྱ་དགོས།
ས་མཐོའི་རྒན་རྒོན་ལ་ཡང་དུས་རབས་དང་བསྟུན་པའི་རྒན་གསོའི་དགོས་མཁོ་ཡོད། བཀྲ་ཤིས་དབང་མོས་ཚན་རྩལ་དང་རྒན་གསོ་མཉམ་འདྲེས་ཀྱི་གོ་སྐབས་མཐོང་ཞིང་། རིག་ནུས་རྒན་གསོ་ཚོད་ལྟའི་སྟེགས་བུ་འཛུགས་རྒྱུའི་སྐོར་གྱི་བསམ་བློ་བྱུང་། མོས་གཞི་གྲངས་ཆེན་པོ་སྤྱད་དེ་རྒན་རྒོན་གྱི་བདེ་ཐང་ཡིག་ཚགས་དང་ཞབས་ཞུའི་དགོས་མཁོ་བསྡུ་སྒྲིག་བྱས་ནས། སྨན་བཅོས་དང་ཁྱིམ་ལས་ཞབས་ཞུ་སོགས་སྤྱི་ཚོགས་ཀྱི་ཐོན་ཁུངས་སྦྲེལ་ནས། ཁྲོམ་རའི་ཚོང་གཉེར་བྱེད་མཁན་གྱིས་དགོས་མཁོ་གནད་ལ་འཁེལ་བའི་སྒོ་ནས་འབྲེལ་མཐུད་ཐུབ་པར་མ་ཟད། རྒན་རྒོན་ཚོར་གདམ་ག་དེ་བས་མང་བ་མཁོ་འདོན་བྱ་ཐུབ་ཅེས་བཏོན་ཡོད།
ཐོན་ལས་མཉམ་འདྲེས་བྱས་ཏེ་རྒན་གསོའི་ཁོར་ཡུག་གསར་པ་བསྐྲུན་དགོས།
རྔ་བ་ཁུལ་གྱི་ཐུན་མོང་མ་ཡིན་པའི་སྐྱེ་ཁམས་ཐོན་ཁུངས་ལ་དམིགས་ནས། བཀྲ་ཤིས་དབང་མོས་རྒན་གསོ་དང་རིག་གནས་ཡུལ་སྐོར་མཉམ་འདྲེས་ཇུས་གཞི་བཏོན་ཡོད། མོས་ས་གནས་སྲིད་གཞུང་གིས་ཚ་གཡོལ་བདེ་ཐང་གསོ་སྐྱོང་གནས་མཆོག་ཏུ་སྨན་བཅོས་ས་ཚིགས་དང་། བྱེད་སྒོའི་ལྟེ་གནས། རྒས་པོ་དང་འཚམ་པའི་སྒྲིག་ཆས་བཅས་ཆ་བསྒྲིགས་བསྐྲུན་དགོས་པའི་གྲོས་འགོ་བཏོན་པ་རེད། རྒན་རྒོན་རྣམས་དབྱར་ཁར་ཚ་གཡོལ་དུ་ཡོང་བ་དང་དགུན་ཁར་གྲོང་ཁྱེར་དུ་ལོག་ཐུབ་པས། གྲོང་ཁྱེར་གྱི་རྒན་གསོའི་གནོན་ཤུགས་ཆུང་དུ་གཏོང་ཐུབ་པར་མ་ཟད། གྲོང་གསེབ་ཀྱི་དཔལ་འབྱོར་ལ་སྐུལ་ཁྲིད་ཀྱང་བྱ་ཐུབ་ཟེར། བཀྲ་ཤིས་དབང་མོས་རྒན་གསོ་དང་ཡུལ་སྐོར། རྒན་གསོ་དང་སློབ་གསོ། རྒན་གསོ་དང་སྨན་བཅོས་སོགས་ལས་རིགས་གསར་པ་དང་། ཚོང་ལས་རྣམ་པ་གསར་པ་དེ་རྒན་རྒོན་དཔལ་འབྱོར་འཕེལ་རྒྱས་གཏོང་བའི་འགག་རྩ་རེད་བསམ་ཡོད།
འཇོན་མི་གསོ་སྐྱོང་བྱས་ནས་ནད་གཡོག་ལས་རིགས་ཀྱི་མདུན་ལྗོངས་རྒྱ་ཆེར་གཏོང་དགོས།
འཇོན་མི་སྡོད་དུ་འཇུག་ཐུབ་ན་གཞི་ནས་རྒན་གསོའི་བྱ་གཞག་ལ་མ་འོངས་ལམ་ཁ་ཡོད། བཀྲ་ཤིས་དབང་མོས་བརྟག་དཔྱད་བྱས་པ་ལྟར་ན། མི་རིགས་ས་ཁུལ་གྱི་རྒན་གསོའི་ལས་ཁུངས་ཀྱི་ནད་གཡོག་པ་བུད་འགྲོ་བའི་སྣང་ཚུལ་ཅུང་ཚབས་ཆེ་བས། མོས་ལས་རིགས་མ་ལག་འཐུས་ཚང་དུ་གཏང་རྒྱུའི་རེ་འབོད་བྱས་པ་སྟེ། འབྲིང་རིམ་ལས་རིགས་སློབ་གླིང་དང་ལག་རྩལ་བཟོ་ལས་སློབ་གླིང་གིས་ས་ཁོངས་ཀྱི་དགོས་མཁོ་དང་ལས་རིགས་ཀྱི་ལས་རྣམ་གསར་པ་དང་ཟུང་འབྲེལ་བྱས་ནས། རྒན་གསོ་ཆེད་ལས་བབ་བསྟུན་ལེགས་སྒྲིག་བྱས་ནས། ཆེད་ལས་རྣམ་པའི་འཇོན་མི་རྒྱུན་མཐུད་ངང་གསོ་སྐྱོང་བྱ་རྒྱུ་གལ་ཆེ་ལ། དེ་དང་ཆབས་ཅིག་རྒན་གསོ་ཞབས་ཞུའི་འཇོན་མིར་དེ་མཚུངས་ཀྱི་གླ་ཕོགས་ཡོང་འབབ་དང་འཕེལ་རྒྱས་ཀྱི་བར་སྟོང་མཁོ་འདོན་བྱས་ཏེ། འཇོན་མིར་བརྟེན་ནས་ལས་རིགས་ཀྱི་དཔལ་འབྱོར་ལེགས་པོར་འཕེལ་རྒྱས་འགྲོ་རྒྱུར་འདེགས་སྐྱོར་བྱེད་དགོས་ཞེས་བཏོན་ཡོད།
དྲང་གཞག་ལ་དམིགས་ཏེ་གྲོང་གསེབ་རྒན་རྒོན་གྱི་དམངས་འཚོའི་མ་མཐའི་ཚད་ཐིག་ཁག་ཐེག་བྱ་དགོས།
མི་རིགས་ས་ཁུལ་ནས་ཡོང་བའི་འཐུས་མི་ཞིག་ཡིན་པའི་ཆ་ནས། བཀྲ་ཤིས་དབང་མོས་ཐོག་མཐའ་བར་གསུམ་དུ་གནས་འདིའི་རྒན་རྒོན་ཚོ་སེམས་ལ་ཉར་ཡོད། ཁོ་མོ་ཡོད་སའི་བདག་སྐྱོང་ཁང་གི་རྒན་རྒོན་བརྒྱ་ཆའི་བདུན་ཅུ་གྲོང་གསེབ་ནས་ཡོང་བ་རེད། ད་ལོ་བཀྲ་ཤིས་དབང་མོའི་གྲོས་འགོ་གཙོ་བོ་མི་རིགས་ས་ཁུལ་གྱི་གྲོང་གསེབ་རྒན་རྒོན་གྱི་རྒན་གསོའི་འགན་བཅོལ་དང་གྲོང་ཁྱེར་དང་གྲོང་གསེབ་གྲོང་མིའི་གཞི་རྩའི་སྨན་བཅོས་འགན་བཅོལ་སོགས་ལ་དམིགས་ནས་གྲོས་འགོ་བཏོན་ཡོད།
བརྟན་སྲུང་དང་རེ་བ། རྒན་རྒོན་ཅན་དུ་འགྱུར་བའི་སྤྱི་ཚོགས་ལ་དྲོད་ཁོལ་སྦྱིན་དགོས།
བརྟན་སྲུང་ཞེས་པ་ནི་ཉིན་རེ་བཞིན་རྟག་ཏུ་འདུག་རོགས་བྱེད་པ་ཡིན་ལ། རེ་བ་ནི་རྒན་གསོའི་བྱ་གཞག་གི་མཚར་སྡུག་ལྡན་པའི་མ་འོངས་པ་རེད། ད་སྐབས་བཀྲ་ཤིས་དབང་མོ་གནས་སའི་བདག་སྐྱོང་ཁང་དེ་ས་གནས་གསར་པར་སྤོས་པས། རྒན་རྒོན་ཚོའི་དགོད་སྒྲ་ཇེ་མང་དུ་ཕྱིན་ཡོད། མོས་རྒན་རྒོན་དཔལ་འབྱོར་དེ་དངོས་སུ་རྒྱ་ཁྱབ་ཕྱིན་ནས། སྲིད་གཞུང་གི་རྒྱབ་སྐྱོར་ཡོད་པ་དང་། སྤྱི་ཚོགས་ཀྱི་ལག་རྩལ་ཡོད་པ། ལས་རིགས་ལ་གསོན་ཤུགས་རྒྱས་པའི་རྣམ་པ་ཡག་པོ་ཆགས་ནས། རྒན་རྒོན་ཚང་མས་ཚེ་མཇུག་གི་བདེ་སྐྱིད་ལོངས་སུ་སྤྱོད་དུ་འཇུག་པའི་རེ་བ་བཅངས་ཡོད། །