“ཞིང་གསུམ”རྨང་གཞི་བརྟན་དུ་གཏོང་། གྲོང་གསེབ་ཁྱོན་ཡོངས་དར་རྒྱས་གཏོང་།

ཞིང་ལས་གཙོ་བོར་འཛིན་པ་ནི་རྒྱལ་ཁབ་ཀྱི་རྩ་གནད་ཡིན། ཀྲུང་གོའི་ལུགས་ཀྱི་དེང་རབས་ཅན་མངོན་འགྱུར་བྱེད་པར་ངེས་པར་དུ་གྲོང་གསེབ་ཁྱོན་ཡོངས་ནས་དར་རྒྱས་ཡོང་བར་སྐུལ་འདེད་ཇེ་མགྱོགས་སུ་གཏོང་དགོས། ཉེ་སྔོན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་གྱི"ཞིང་གསུམ"ལས་དོན་ལ་མཛུབ་ཁྲིད་བྱེད་པའི་ཀྲུང་དབྱང་གི་ཡིག་ཆ་ཨང་དང་པོ་13པ《ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་གྲོང་གསེབ་ཀྱི་བཅོས་བསྒྱུར་སྔར་བས་གཏིང་ཟབ་ཏུ་བཏང་ནས་གྲོང་གསེབ་ཁྱོན་ཡོངས་ནས་དར་རྒྱས་འགྲོ་རྒྱུར་ངེས་པ་དོན་གྱིས་སྐུལ་འདེད་གཏང་རྒྱུའི་སྐོར་གྱི་བསམ་འཆར》ཁྱབ་བསྒྲགས་བྱས་པ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས"ཞིང་གསུམ"ལས་དོན་ལ་ཐོག་མཐའ་བར་གསུམ་དུ་ཚད་མཐོའི་མཐོང་ཆེན་དང་གྲོང་གསེབ་ཁྱོན་ཡོངས་ནས་དར་རྒྱས་གཏང་རྒྱུར་སྐུལ་འདེད་གཏོང་བའི་ཚན་རིག་དང་མཐུན་པའི་བཀོད་སྒྲིག་གང་ལེགས་མཚོན་པ་དང་།

ཏང་ཡོངས་དང་སྤྱི་ཚོགས་ཡོངས་ལ་ཞིང་ལས་ལ་མཐོང་ཆེན་དང་ཞིང་ལས་སྟོབས་ཆེར་གཏོང་བའི་བརྡ་རྟགས་དྲག་པོ་སླར་ཡང་བཏང་བ་རེད། ས་གནས་ཁག་དང་སྡེ་ཚན་ཁག་གིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་དོན་འཁྱོལ་ནན་མོ་བྱས་ཏེ"ཞིང་གསུམ"ལས་དོན་རྨང་གཞི་རྒྱུན་ཆད་མེད་པར་བརྟན་དུ་བཏང་ནས། གྲོང་གསེབ་ཁྱོན་ཡོངས་ནས་དར་རྒྱས་ཡོང་རྒྱུར་སྐུལ་འདེད་གཏོང་བ་དང་ཞིང་ལས་སྟོབས་ལྡན་རྒྱལ་ཁབ་འཛུགས་སྐྱོང་བྱེད་པའི་དམིགས་ཚད་གཏན་འཁེལ་བྱས་ནས་འབད་འཐབ་ལྷོད་མེད་བྱེད་དགོས།

འདས་པའི་ལོ་གཅིག་གི་ནང་། རྙོག་འཛིང་ཛ་དྲག་ཆེ་བའི་རྒྱལ་ནང་དང་རྒྱལ་སྤྱིའི་གནས་བབ་ལ་གདོང་གཏད་ནས། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག་ས་གནས་ཁག་དང་སྡེ་ཚན་ཁག་གིས་ངེས་པ་དོན་གྱིས"ཞིང་གསུམ"ལས་དོན་ཡག་པོ་བསྒྲུབས་ནས། རང་རྒྱལ་གྱི་འབྲུ་རིགས་ཐོན་ཚད་རྒྱ་མ་དུང་ཕྱུར་ཁྲི་1.4ལས་ཐོག་མར་བརྒལ་བ་དང་། ཞིང་པའི་ཡོང་འབབ་བརྟན་པོའི་ངང་འཕར་བ་དང་གྲོང་གསེབ་ཀྱི་སྤྱི་ཚོགས་ཞི་མཐུན་བརྟན་བརླིང་བྱུང་ནས། དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་རྨང་གཞི་བརྟན་པོ་བཏིང་། ད་ལོ་ནི"ལོ་ལྔའི་འཆར་གཞི་བཅུ་བཞི་པའི"འཆར་འགོད་མཇུག་འགྲིལ་བའི་ལོ་ཞིག་ཡིན་ལ། དབུལ་གྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་ཆེར་གཏང་རྒྱུ་དེ་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་བྱེད་པའི་ལོ་5ཡི་བར་བརྒལ་དུས་སྐབས་ཀྱི་མཐའ་མའི་ལོ་ཞིག་ཀྱང་ཡིན་པས། "ཞིང་གསུམ"ལས་དོན་རྨང་གཞི་བརྟན་དུ་གཏང་རྒྱུར་དོན་སྙིང་གལ་ཆེན་ལྡན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པས་མཛུབ་ཁྲིད་བྱ་རྒྱུ་མཐའ་འཁྱོངས་ཀྱིས། ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུའི་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི"ཞིང་གསུམ"ལས་དོན་སྐོར་གྱི་རྣམ་བཤད་གལ་ཆེན་དང་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ། ཞིང་ལས་དང་གྲོང་གསེབ་སྔོན་ལ་འཕེལ་རྒྱས་གཏང་རྒྱུ་མཐའ་འཁྱོངས་དང་། ཐབས་བརྒྱ་ཇུས་སྟོང་གིས་ཞིང་ལས་ཀྱི་ཕན་འབྲས་ཆེ་རུ་གཏོང་བ་དང་། གྲོང་གསེབ་ཀྱི་གསོན་ཤུགས་ཆེ་རུ་གཏོང་བ། ཞིང་པའི་ཡོང་འབབ་མང་དུ་གཏོང་བ་བཅས་ལ་སྐུལ་འདེད་བཏང་ནས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་རྨང་གཞིའི་རྒྱབ་རྟེན་འདོན་སྤྲོད་བྱེད་དགོས།

"ཞིང་གསུམ"ལས་དོན་རྨང་གཞི་བརྟན་དུ་གཏོང་བར་ཐབས་བརྒྱ་ཇུས་སྟོང་གིས་ཞིང་ལས་ཀྱི་ཕན་འབྲས་ཆེ་རུ་གཏོང་དགོས། འབྲུ་རིགས་ནི་སྲིད་སྐྱོང་གི་ལས་ཀ་ཨང་དང་པོར་འཇོག་པ་དང་འབྲུ་རིགས་ཉེན་མེད་གནམ་འོག་བདེ་ལ་འགོད། འབྲུ་རིགས་བདེ་འཇགས་ལ་འགན་སྲུང་བྱེད་པ་ནི་དུས་དང་རྣམ་པ་ཀུན་ཏུ་རྒྱལ་ཇུས་དམངས་འཚོའི་དོན་ཆེན་ནང་གི་འགངས་ཆེན་ཡིན། འབྲུ་རིགས་སོགས་ཞིང་ལས་ཐོན་རྫས་གལ་ཆེན་མཁོ་སྤྲོད་འགན་སྲུང་བྱེད་ནུས་རྒྱུན་མཐུད་ངང་ཆེ་རུ་གཏོང་བ་དང་།

འབྲུ་རིགས་ཐོན་སྐྱེད་དམ་འཛིན་ལྷོད་མེད་བྱེད་པ། རྨོ་ཞིང་སྲུང་སྐྱོང་དང་སྤུས་ཚད་མཐོ་རུ་གཏོང་ཤུགས་ཆེ་རུ་གཏོང་བ། ཡུལ་བབ་དང་བསྟུན་ནས་ཞིང་ལས་ཀྱི་སྤུས་ཚད་གསར་པའི་ཐོན་སྐྱེད་ནུས་ཤུགས་འཕེལ་རྒྱས་གཏོང་བ། འབྲུ་རིགས་ས་ཞིང་དང་ལག་རྩལ་ལ་བརྟེན་ནས་དོན་འཁྱོལ་ཡོང་བར་སྐུལ་འདེད་གཏོང་བ་བཅས་བྱེད་དགོས། ཞིང་ལས་དར་རྒྱས་གཏོང་བ་དང་ཞིང་ལས་སྟོབས་ལྡན་དུ་གཏོང་བར་བསྒྱུར་བཅོས་ཟབ་སྤེལ་བྱ་རྒྱུའི་ཐབས་མཆོག་འདི་བེད་སྤྱོད་ཡག་པོ་བྱས་ནས། རྒྱུ་རྐྱེན་གཙོ་བོ་འགན་སྲུང་དང་བཀོད་སྒྲིག་ལེགས་འགྱུར་བྱེད་པའི་སྒྲིག་སྲོལ་དང་ནང་རྐྱེན་འཐུས་སྒོ་ཚང་དུ་གཏོང་བར་ཤུགས་རྒྱག་པ་དང་། གྲོང་གསེབ་ཀྱི་ས་ཞིང་འགན་གཙང་ལེན་པའི་འབྲེལ་བ་བརྟན་པོ་དང་འཐུས་སྒོ་ཚང་དུ་གཏོང་བ། གྲོང་གསེབ་ཀྱི་ཐུན་མོང་ཐོན་ཁུངས་དང་རྒྱུ་ནོར་དོ་དམ་དང་བེད་སྤྱོད་ཡག་པོ་བྱེད་པ། གྲོང་གསེབ་དར་རྒྱས་གཏོང་བར་མ་དངུལ་འཇོག་པ་དང་མ་དངུལ་འདུ་འཁོར་བྱེད་པའི་ནང་རྐྱེན་གསར་གཏོད་བྱེད་པ། གྲོང་གསེབ་ཀྱི་ཤེས་ལྡན་མི་སྣ་གསོ་སྐྱོང་དང་གྲོང་གསེབ་ཀྱི་བསྒྱུར་བཅོས་སྔར་ལས་གཏིང་ཟབ་ཏུ་སྤེལ་བ་དང་། གྲོང་གསེབ་དར་རྒྱས་གཏོང་བའི"མི་དང་ས་ཞིང་། དངུལ"སོགས་གཙོ་གནད་ཚོད་འཛིན་ནུས་ལྡན་དང་ཕན་ནུས་ལྡན་པའི་སྒོ་ནས་སེལ་ཐུབ་ན། ད་གཟོད་གྲོང་གསེབ་ཀྱི་ཐོན་ཁུངས་རྒྱུ་རྐྱེན་གསོན་ཤུགས་ཅན་དུ་འགྱུར་བ་དང་། རྒྱ་ཆེའི་ཞིང་པའི་ཧུར་སེམས་དང་གསར་གཏོད་རང་བཞིན་འདོན་སྤེལ་བྱེད་པ། སྤྱི་ཚོགས་ཡོངས་ཀྱིས་ཞིང་ལས་ལ་རྒྱབ་སྐྱོར་དང་ཞིང་ལས་དར་རྒྱས་གཏོང་བའི་སྟོབས་ཤུགས་གཅིག་བསྡུས་བྱེད་པ། ཞིང་ལས་སྤུས་ཚད་མཐོ་ཞིང་ལས་ཆོད་ཆེ་བའི་འཕེལ་རྒྱས་ཡོང་བར་སྐུལ་འདེད་སྔར་ལས་ལེགས་པ་གཏོང་བ་བཅས་བྱས་ཏེ། ཞིང་ལས་དང་གྲོང་གསེབ་དེང་རབས་ཅན་ལ་སྒུལ་ཤུགས་སྟོབས་ལྡན་སྣོན་དགོས།

"ཞིང་གསུམ"ལས་དོན་རྨང་གཞི་བརྟན་དུ་གཏོང་བར་ཐབས་བརྒྱ་ཇུས་སྟོང་གིས་གྲོང་གསེབ་ཀྱི་གསོན་ཤུགས་འཕེལ་བར་སྐུལ་འདེད་གཏོང་དགོས། གྲོང་གསེབ་ནི་ཞིང་ལས་ཐོན་སྐྱེད་ཀྱི་བར་སྟོང་གཞི་རྟེན་ཡིན་པར་མ་ཟད། རྒྱ་ཆེའི་ཞིང་པ་རྣམས་འཚོ་རྟེན་གྱི་ཁྱིམ་གཞིས་ཀྱང་ཡིན། གནས་སྡོད་དང་འཚམ་པའི་ལས་རིགས་དང་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་བྱེད་པར་སྐུལ་འདེད་ཤུགས་ཆེན་གཏོང་བ་དང་། རྫོང་ཁོངས་ཀྱི་གྲོང་ཁྱེར་དང་གྲོང་གསེབ་ཀྱི་འཆར་འགོད་བཀོད་སྒྲིག་གཅིག་གྱུར་འཆར་འགོད། རྨང་གཞིའི་སྒྲིག་བཀོད་གྲོང་གསེབ་ཏུ་མཆེད་པར་སྐུལ་འདེད། གྲོང་གསེབ་ཀྱི་གཞི་རྩའི་སྤྱི་པའི་ཞབས་ཞུའི་ཆུ་ཚད་མཐོ་རུ་གཏོང་བ། གྲོང་གསེབ་ཀྱི་སྐྱེ་ཁམས་ཁོར་ཡུག་བཅོས་སྐྱོང་བྱེད་ཤུགས་ཆེ་རུ་གཏོང་བ་བཅས་བྱེད་དགོས། གྲོང་གསེབ་བཅོས་སྐྱོང་མ་ལག་འཐུས་སྒོ་ཚང་དུ་གཏོང་བར་ཤུགས་རྒྱག་པ་དང་། གྲོང་གསེབ་ཀྱི་གཞི་རིམ་ཏང་རྩ་འཛུགས་འཛུགས་སྐྱོང་བྱེད་ཤུགས་ཆེ་རུ་གཏོང་བ། རྒྱུན་མཐུད་ངང་ཕྱི་ཚུལ་རིང་ལུགས་བཅོས་སྐྱོང་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་བ། ཡ་རབས་ཚུལ་ལྡན་གྱི་གྲོང་སྲོལ་འཛུགས་སྐྱོང་བྱེད་ཤུགས་ཆེ་རུ་གཏོང་བ་དང་།

གྲོང་གསེབ་ཀྱི་གོམས་སྲོལ་བསྒྱུར་བར་སྐུལ་འདེད་གཏོང་བ། གྲོང་གསེབ་བརྟན་བརླིང་དང་ལྷིང་འཇགས་ཡོང་བར་སྲུང་སྐྱོང་བཅས་བྱས་ཏེ། ངེས་པ་དོན་གྱིས་གྲོང་གསེབ་ཀྱི་སྤྱི་ཚོགས་གསོན་ཤུགས་ཀྱིས་ཁེངས་ཤིང་རིམ་ལྡན་བརྟན་བརླིང་ཡོང་བར་འགན་ལེན་ཏན་ཏིག་བྱ་དགོས།

"ཞིང་གསུམ"ལས་དོན་རྨང་གཞི་བརྟན་དུ་གཏོང་བར་ཐབས་བརྒྱ་ཇུས་སྟོང་གིས་ཞིང་པའི་ཡོང་འབབ་འཕར་སྣོན་ཡོང་བར་སྐུལ་འདེད་གཏོང་དགོས། དབུལ་གྲོལ་འགག་སྒྲོལ་གྱི་གྲུབ་འབྲས་རྒྱུན་མཐུད་སྲ་བརྟན་དང་རྒྱ་ཆེར་བཏང་ནས། བསམ་བློ་ལྷོད་གཡེང་དང་ལས་དོན་ལྷོད་གཡེང་སྔོན་འགོག་བྱས་ཏེ་གཞི་རྒྱ་རང་བཞིན་གྱི་དབུལ་པོ་བསྐྱར་ལོག་དང་དབུལ་པོར་འགྱུར་བའི་ཚད་ཐིག་ལས་མི་བརྒལ་བ་བྱེད་པ་དང་། གྲོང་གསེབ་ཀྱི་དབུལ་པོ་བསྐྱར་ལོག་དང་དབུལ་པོར་འགྱུར་རྒྱུ་སྔོན་འགོག་བྱེད་པའི་ལམ་སྲོལ་དང་། ཡོང་འབབ་དམའ་བའི་མི་འབོར་དང་དར་རྒྱས་འགྲོ་ཕྱི་བའི་ས་ཁུལ་ལ་རིམ་དབྱེ་རིགས་དབྱེའི་རོགས་སྐྱོར་ལམ་ལུགས་གཅིག་གྱུར་འཆར་འགོད་བྱས་ནས་འཛུགས་པ་དང་། དབུལ་གྲོལ་འགག་སྒྲོལ་ཐད་རྒྱལ་ཁབ་ཀྱིས་མ་དངུལ་བཏང་ནས་རྒྱུ་ནོར་ཆགས་པའི་ཕུགས་ཕན་དོ་དམ་ལམ་སྲོལ་འཐུས་ཚང་དུ་གཏོང་བ། གྲོང་གསེབ་ཀྱི་ལས་དོན་ཕན་འབྲས་ལ་ཞིབ་བཤེར་བྱེད་པའི་ཚད་གཞི་གལ་ཆེན་ཞིག་ནི་ཞིང་པའི་དངུལ་ཁུག་གང་ཡོད་མེད་ལ་བལྟ་དགོས། རྫོང་ཁོངས་ཀྱི་དམངས་ཕྱུག་ཐོན་ལས་རྒྱ་སྐྱེད་གཏོང་བར་ཤུགས་རྒྱག་པ་དང་། རང་རང་གི་ཁྱད་ཆོས་ལྡན་པའི་རྫོང་ཁོངས་དཔལ་འབྱོར་འཕེལ་རྒྱས་གཏོང་བ། གྲོང་གསེབ་ཀྱི་ཁྱད་ཆོས་ལྡན་པའི་ཐོན་ལས་འཕེལ་རྒྱས་གཏོང་བ། "ཡུལ་ཐོན་ཁྱད་རྫས"གང་ལེགས་འདོན་པ། གྲོང་གསེབ་ཀྱི་ཐོན་ལས་གསར་པ་དང་ལས་རྣམ་གསར་པ་གསོ་སྐྱོང་བཅས་བྱེད་དགོས། ཞིང་འབྲེལ་ཞིང་ཁྲིད་ཀྱི་ལམ་སྲོལ་འཐུས་ཚང་དུ་གཏོང་བ་དང་།

བྱེད་ཐབས་སྣ་ཚོགས་ལ་བརྟེན་ནས་ཞིང་པའི་ཡོང་འབབ་འཕར་སྣོན་ཡོང་བའི་ཐབས་ལམ་རྒྱ་སྐྱེད་བཏང་སྟེ་རྒྱ་ཆེའི་ཞིང་པར་གྲོང་གསེབ་ཀྱི་བསྒྱུར་བཅོས་དང་འཕེལ་རྒྱས་ཀྱི་གྲུབ་འབྲས་མཉམ་དུ་ལོངས་སུ་སྤྱོད་དུ་འཇུག་དགོས།

གྲོང་གསེབ་ཀྱི་བྱ་བ་ལེགས་པར་བསྒྲུབ་ནས་གྲོང་གསེབ་ཁྱོན་ཡོངས་ནས་དར་རྒྱས་ཡོང་བ་བྱ་རྒྱུའི་འགག་རྩ་ནི་ཏང་ལ་རག་ཡོད། ངེས་པར་དུ་རྒྱུན་འཁྱོངས་ལྷོད་མེད་ཀྱིས"ཞིང་གསུམ"གྱི་གནད་དོན་ཐག་གཅོད་ཡག་པོ་བྱ་རྒྱུ་དེ་ཏང་ཡོངས་ཀྱི་ལས་དོན་གལ་ཆེའི་ནང་གི་འགངས་ཆེར་བརྩིས་ནས་རིམ་པ་ལྔའི་ཧྲུའུ་ཅིས་གྲོང་གསེབ་དར་རྒྱས་གཏོང་བའི་ཆབ་སྲིད་ཀྱི་འགན་འཁྲི་བརྟན་དུ་གཏོང་བ་དང་། གྲོང་ཁྱེར་དང་གྲོང་གསེབ་མཉམ་འདྲེས་འཕེལ་རྒྱས་གཏོང་བའི་སྒྲིག་སྲོལ་དང་ནང་རྐྱེན་འཐུས་སྒོ་ཚང་དུ་གཏོང་བ། ཞིང་དར་ཞིང་ཕན་ཞིང་ཕྱུག་གི་རྒྱབ་སྐྱོར་ལམ་ལུགས་འཐུས་སྒོ་ཚང་དུ་གཏོང་བ། "ཁྲི་སྟོང་ལས་གྲྭའི"ཉམས་མྱོང་སློབ་སྦྱོང་དང་བེད་སྤྱོད་གཏིང་ཟབ་དང་ཏན་ཏིག་བྱེད་པར་སྐུལ་འདེད་གཏོང་བ། གྲོང་གསེབ་ཁྱོན་ཡོངས་ནས་དར་རྒྱས་གཏོང་བའི་ཕུགས་ཕན་སྒྲིག་སྲོལ་འཐུས་སྒོ་ཚང་བའི་ངང་སྐུལ་འདེད་གཏོང་དགོས། ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་སྔར་བས་མཐུན་སྒྲིལ་དམ་ཟབ་བྱས་ཏེ། དམ་པ་དོན་གཉེར་གྱི་སྙིང་སྟོབས་དར་སྤེལ་གཏོང་བ་དང་ཡུན་རིང་འབད་འཐབ་བྱེད་པའི་ངེས་ཤུགས་རྒྱུན་འཁྱོངས་བྱས་ནས། ཞིང་ལས་ཀྱི་རྨང་གཞི་དེ་བས་བརྟན་པ་དང་། གྲོང་གསེབ་ས་ཁུལ་སྔར་བས་འབྱོར་ཕྱུག་ལྡན་པ། ཞིང་པའི་འཚོ་བ་སྔར་བས་དྲོད་སྐྱིད་ལྡན་པར་ཞིང་ལས་སྟོབས་ལྡན་རྒྱལ་ཁབ་འཛུགས་སྐྱོང་གི་དམིགས་འབེན་ཐད་གོམ་པ་བརྟན་པོ་སྤོ་དགོས། །