བོད་ཤིང་སྦྲུལ་ལོའི་གནམ་ལོ་གསར་པའི་དུས་སྟོན་དལ་གྱིས་ཚེས་པ་དང་བསྟུན་ནས། འབའ་ཐང་རྫོང་ཉ་མགོ་ཆུ་གློག་གནས་སྤོས་གྲོང་གསར་ཡོངས་སུ་དུས་ཆེན་གྱི་དགའ་སྤྲོའི་རྣམ་པས་ཁེངས་ཡོད། སྲོལ་རྒྱུན་གྱི་ཉམས་ཀྱིས་ཕྱུག་པའི་བོད་པའི་གྲོང་ཚོ་དེ་རུ་ཁྱད་ལྡན་གནས་ཚང་གཉེར་སྐྱོང་བྱེད་མཁན་རྒྱལ་མཚན་ཚང་ཟེར་བའི་བོད་རིགས་ཀྱི་ཁྱིམ་ཚང་ཞིག་ཡོད་དེ། ཁོང་ཚོས་ཐུན་མིན་གྱི་ཡུལ་སྲོལ་ཐོག་ནས་དུས་ཆེན་གལ་ཆེན་འདི་ལ་རྟེན་འབྲེལ་ཞུ་བཞིན་ཡོད།
བོད་ཚེས་29ཉིན། དཔྱིད་ཀྱི་དཔལ་མོའི་ཉི་ཟེར་གྲོང་པའི་བཞིན་ཞལ་དུ་འཕྲོས་དུས། ཞིམ་མངར་ལྡན་པའི་ཇ་སྲུབ་མས་ཕོ་ཁ་གོང་ཞིང་། རྒྱལ་མཚན་ཚང་དུ་སྐུ་མགྲོན་གྱིས་ཁེངས་ཏེ་དགའ་སྤྲོའི་དགོད་སྒྲ་རྒྱུན་ཆད་མེད། སྐབས་དེར། ཐབ་ཚང་ནས་ཡིད་དབང་འགུག་པའི་དྲི་ཞིམ་འཐུལ་བ་དང་ཁྱིམ་བདག་གིས་ཉིན་དེའི་ཁྱད་ལྡན་ལྷན་འཛོམས་ཟ་མ་གྲ་སྒྲིག་བྱེད་བཞིན་ཡོད་ལ། མ་ཆེན་ཚོས་ནུས་ཤུགས་ཕྱུང་ནས་མཐུན་སྒྲིལ་དང་ཞི་མཐུན་མཚོན་པའི་འབའ་ཐང་གི་སྲོལ་རྒྱུན་ཟས་མཆོག་སྟེ་མཐུན་སྒྲིལ་ཕོ་ལོག་གཡོས་སྦྱོར་བྱེད་བཞིན་ཡོད། ཟོག་ཤ་དང་བོད་གྲོ་སོགས་བཟའ་བཅའི་རྒྱུ་ཆ་སྒྲིག་སྦྱོར་ཞིབ་ཚགས་བྱས་ནས་གྲུབ་པའི་ཟས་མཆོག་འདི་ནི། བོད་ཀྱི་ལོ་སར་སྐབས་འབའ་ཐང་བས་གསོལ་ལྕོག་ཐོག་ངེས་པར་དུ་སྒྲིག་པའི་ཟས་མཆོག་ཅིག་ཡིན་པར་མ་ཟད། དེ་བས་ཀྱང་བོད་མི་རིགས་ཀྱི་གཏིང་ཟབ་པའི་རིག་གནས་མཚོན་ཡོད། །
