ཉེ་ཆར། དུས་ཆེན་མཉམ་དུ་གཏོང་། བརྩེ་བ་མཉམ་དུ་བསྐྲུན་ཞེས་པ་བརྗོད་དོན་གཙོ་བོར་བཟུང་སྟེ་བོད་ཀྱི་ལོ་སར་ལ་བྱིས་པ་ཚོས་བོད་གོས་གྱོན་ནས་སྤྲོ་གསེང་ལ་རོལ་བའི་བྱ་འགུལ་ཞིག་ལྷ་ས་གྲོང་ཁྱེར་ནོར་ནོར་ཚང་བྱིས་པའི་དཔེ་ཁང་དུ་སྤེལ་བ་རེད། བྱེད་སྒོ་སྤེལ་ཡུལ་དུ་གྲོགས་པོ་ཆུང་ཆུང་དང་ཁྱིམ་བདག་མང་པོ་ཞིག་མཉམ་དུ་འཛོམས་ནས་སྤྲོ་སྣང་གི་དུས་ཚོད་མཉམ་རོལ་སྒོས་མི་རིགས་མཐུན་སྒྲིལ་གྱི་བརྩེ་བ་ཟབ་མོ་མངོན་པར་བྱས་ཡོད།
བྱེད་སྒོ་དེ་བཀྲ་ཤིས་བདེ་སྐྱིད་ཀྱི་ཟློས་གར་འཁྲབ་སྟོན་དང་བསྟུན་ནས་འགོ་ཚུགས་ཤིང་། ངོ་མཚར་བའི་ཟློས་གར་གྱིས་ཚང་མའི་ཡིད་དབང་འཕྲོག་ནས་ཀུན་གྱི་དགའ་བསུ་ཆེན་པོ་ཐོབ། དེ་མིན་ནོར་ནོར་བྱིས་པའི་དཔེ་ཁང་གི་དགེ་རྒན་གྱིས་བོད་གོས་དང་བོད་ཀྱི་ལོ་སར་གོམས་སྲོལ་ངོ་སྤྲོད་ཞིབ་ཕྲ་བྱས་ཤིང་། ཚང་མས་མཉམ་དུ་བོད་ཀྱི་ཐུན་མོང་མ་ཡིན་པའི་ཟས་མཆོག་གྲོ་མ་མར་ཁུའམ་གྲོ་འབྲས་ཀྱི་བྲོ་བ་མྱངས་ལ། ད་དུང་བྱིས་པ་ཆུང་ཆུང་ཚོས་ཡུལ་དངོས་ནས་པང་གདན་ལག་འཐག་ཉམས་ལེན་བྱས་ཏེ་བོད་ཀྱི་སྲོལ་རྒྱུན་བཟོ་རྩལ་གྱི་མཛེས་པ་ཉམས་སུ་མྱོང་བ་རེད།
ཐེངས་འདིའི་འདུ་འཛོམས་ཀྱིས་གྲོགས་པོ་ཆུང་ཆུང་ཚོར་སྤེལ་རེས་དང་འགྲེམས་སྟོན་གྱི་སྟེགས་བུ་ཡག་མོ་ཞིག་མཁོ་འདོན་བྱས་པ་མ་ཟད། དམངས་སྲོལ་རིག་གནས་རྒྱུན་འཛིན་དང་མི་རིགས་མཐུན་སྒྲིལ་ལ་སྐུལ་འདེད་གཏོང་བའི་དྲོ་སྐྱིད་ཀྱི་འབྲེལ་ཟམ་ཞིག་བཙུགས་ཡོད་ལ། ཚང་མས་སྤྲོ་སྣང་ལྡན་པའི་བྱེད་སྒོའི་ཁྲོད་མཉམ་དུ་བོད་ཀྱི་ལོ་སར་བསུ་བཞིན། མི་རིགས་མཐུན་སྒྲིལ་གྱི་མེ་ཏོག་སྐྱོང་བ་རེད། །