འཇུ་རབ་གསལ་ནི་ལོ་རབས་བརྒྱད་ཅུ་པའི་སྨད་ལ་ཁམས་མི་ཉག་ཏུ་སྐྱེས་ཤིང་། ལོ་བཅོ་ལྔ་ཙམ་གྱི་རིང་བོད་ཀྱི་སྲོལ་རྒྱུན་རིག་གནས་དང་ནང་བསྟན་རིག་གཞུང་སོགས་ལ་སྦྱངས་པ་བྱས། སྤྱི་ལོ་2011ལོ་ནས་སྒྱུ་རྩལ་གྱི་ལས་སུ་ཞུགས་ཏེ། ད་ལྟའི་བར་རྩོམ་རིག་དང་རི་མོ། འདྲ་པར། ཇུས་འགོད་སོགས་ཀྱིས་ལྟ་ཀློག་མཁན་ལ་བག་ཆགས་ཅུང་ཟབ་མོ་བཞག །ད་ལྟ་དཔལ་རི་གླིང་ཧི་མ་ལ་ཡ་དེང་རབས་སྒྱུ་རྩལ་ཁང་གི་འགན་འཛིན་པ་དང་། ཀྲུང་གོའི་དམངས་སྲོལ་པར་ལེན་མཐུན་ཚོགས་ཀྱི་ཚོགས་མི། དཀར་མཛེས་ཁུལ་རྩོམ་རིག་མཐུན་ཚོགས་ཀྱི་ཚོགས་མི་ཡིན།
ཁོང་ནི་སྲོལ་རྒྱུན་ཐང་གའི་རི་མོ་དང་། སྣུམ་ཚོན། ཆུ་ཚོན། འགྱིག་ཚོན། རབ་བཏགས་རི་མོ། གློག་རྡུལ་རི་མོ། ཚེམ་དྲུབ་རི་མོ། བྱིས་སྒྲུང་གི་བར་བཅུག་རི་མོ་བཅས་ལ་བྱང་ཆ་ཆེ་ཞིང་གསར་གཏོད་ཉམས་འགྱུར་གྱིས་ཕྱུག་ཡོད། ད་ལྟའི་བར་པེ་ཅིང་དང་ཁྲེང་ཏུའུ། ཧྲང་ཧེ་སོགས་ནས་གཞུང་སྒེར་གྱི་རི་མོའི་འགྲེམས་སྟོན་གང་མང་ལ་ཞུགས་ཤིང་མཐོ་ཚོང་ཡང་ཐེངས་འགར་བྱས། 2021ལོ་ནས་བཟུང་དེང་རབས་སྒྱུ་རྩལ་སྐོར་ལ་ཞིབ་འཇུག་དང་གསར་རྩོམ་བྱེད་པར་ཞུགས་ཤིང་2022ལོར་ཁྲེང་ཏུའུ་ཐོ་ནེ་ལོ·ལན་པོ་ཅི་ཉི་ལྟེ་གནས་སུ་ཟླ་གཅིག་རིང་དཔལ་རི་གླིང་ཧི་མ་ལ་ཡའི་དེང་རབས་སྒྱུ་རྩལ་ཞེས་པ་འགྲེམས་སྟོན་བྱས། 2024ལོར་བོད་རབ་རྒྱན་ཤིང་འབྲུག་ལོའི་བརྗོད་དོན་རི་མོ་བརྩམས་ནས་དགའ་བསུ་ཆེན་པོ་ཐོབ་ཅིང། ད་ལོར་སླར་ཡང་ཤིང་སྦྲུལ་ལོའི་བརྗོད་དོན་རི་མོ་བརྩམས་ཆོས་ཀློག་པ་རྣམས་ལ་ལོ་སར་གྱི་ལེགས་སྐྱེས་སུ་ཕུལ་ཡོད། །
རྟེན་འབྲེལ།
འཇིག་རྟེན་ཆགས་ནས་བཟུང་དུ་ནས། །
སྦྲུལ་ཞེས་བྱ་བའི་ལྟོ་འཕྱེ་ནི། །
རྒྱུ་ནོར་བདག་ཏུ་འཛིན་པ་ཡི། །
ཆུ་གནས་ཀླུ་ཡི་རིགས་སུ་གྱུར། །
བཀྲ་ཤིས།
སློབ་དཔོན་ཆེན་པོ་ཀླུ་སྒྲུབ་ཀྱིས། །
ཀླུ་ཤིང་སྡོང་པོ་རབ་རྒྱས་པའི། །
གདེངས་ཀ་སྦྲུལ་གྱི་ཀླུ་ཡུལ་དུ། །
འབུམ་ནི་གདན་དུ་དྲངས་པ་ཡིན། །
ཕྱྭ་གཡང་།
ཡ་ཐོག་ཚེ་ལོ་དཔག་མེད་དུས། །
ལྗོན་བཟང་ཡོངས་འདུ་ས་བརྟོལ་ལ། །
འབུ་སྦྲུལ་ཞིག་གིས་དཀྲིས་གྱུར་ཏེ། །
འདོད་དགུའི་ཆར་ཆེན་རྟག་ཏུ་ཕབ། །
དགེ་ལེགས།
རིག་བྱེད་རྣམས་ཀྱི་གཏམ་རྒྱུད་དུ། །
ལས་ཀྱིས་བསྐྲུན་པའི་འཇིག་རྟེན་འདི། །
རབ་འབྱམས་སྦྲུལ་གྱི་འཁོར་ལོའི་ནང་། །
འཇིག་དང་འཁྲུལ་བ་ཡིན་ཞེས་གྲགས། །
དཔལ་ཡོན།
ལྷ་ཀླུ་གཉན་ཞེས་འབོད་པ་གང་། །
ཀླུ་ཡིས་སྐྱོང་བའི་ས་ཕྱོགས་སུ། །
རིན་ཆེན་གཏེར་དང་དཔལ་འབྱོར་དང་། །
རྟ་ནོར་ལུག་གསུམ་འཕེལ་བ་ཡིན། །
བསོད་ནམས།
ས་སྟེང་འགྲོ་བ་མིའི་ལུས་སུ། །
སྲོག་རྟེན་ཤིང་གི་ལྗོན་བཟང་སྐྱེས། །
དེ་ལ་ཚེ་ཐག་སྦྲུལ་གྱིས་ནི། །
དཀྲིས་བསྐོར་རྒྱག་དང་ཡོངས་སུ་གྲོལ། །
ཞི་བདེ།
གདེངས་ཀ་ཀླུ་ཡི་རྒྱལ་པོ་དེས། །
བཀྲ་ཤིས་གཡང་གི་དུང་དཀར་འབུད། །
ཆར་ཆུ་དུས་སུ་འབབ་པ་དང་། །
དཀར་ནག་འབྲུ་ཡི་ལོ་ལེགས་པའོ། །
གསོན་ཤུགས།
སྦྲུལ་ཡིག་སྦྲུལ་གྱི་གྲུབ་སྟངས་ནས། །
འདས་དང་མ་འོངས་ད་ལྟ་དུས། །
འཇིག་རྟེན་འདི་ཡི་ཕྱི་དང་ནང་། །
གསང་བ་ལ་སོགས་འཁྲུལ་མེད་རྟོགས། །
ཕུན་ཚོགས།
གངས་ཅན་ཁ་བའི་ཡུལ་ལྗོངས་ཀྱི། །
སྦྲུལ་ཡིག་སྦྲུལ་གྱི་རྣམ་བཤད་དུ། །
སྦྲུལ་ནི་གྲངས་ཀ་ལྔ་བརྒྱད་ཐིག །
བདུན་དང་ཆུ་ལས་གྲུབ་པར་འདོད། །