ཚེ་རིང་རྣམ་སྲས་སམ་ཝེར་མ་ནི་1998ལོར་སི་ཁྲོན་རྔ་བ་བོད་རིགས་ཆའང་རིགས་རང་སྐྱོང་ཁུལ་ཧུང་ཡོན་རྫོང་གི་ཕ་རུས་ཤིང་སྡོང་དང་མ་རུས་ཨ་སྐྱབས་གཉིས་ཏེ་འབྲོག་ཁྱིམ་ཞིག་ཏུ་སྐྱེས་པ་ཡིན། ཆུང་དུས་ནས་གཞུང་གཉེར་སློབ་གྲྭར་ཞུགས་ཤིང་སློབ་ཆུང་དང་དམའ་འབྲིང་ནི་རྩེད་མོའི་ནང་ནས་བསྐྱལ་བ་ཡིན་ལ་སྦྱང་འབྲས་ཡང་ལེགས། 2015ལོར་དམའ་གསུམ་མཐར་ཕྱིན་རྗེས་འབྲོག་ས་ནས་ཕོ་གསར་གྱི་སྣང་བས་མཚན་སྨག་རེ་རེ་བརྒལ་སྐབས་ཤིག་ལ་ཐ་མག་འཐེན་རྒྱུ་ལོབས་ཤིང་ཨ་རག་འཐུང་ནས་ལབ་རྒྱག་རྒྱུར་གོམས། 2017ལོ་སྟེ་མཐོ་འབྲིང་གཉིས་པའི་དགུན་གནང་སྐབས་འབྲོག་ས་ནས་རྐང་ཐང་ལ་བྲོས་ཏེ་བླ་བྲང་བཀྲ་ཤིས་འཁྱིལ་དུ་དགེ་རྒན་ཆོས་གྲགས་སོགས་ཀྱི་མདུན་ནས་སྙན་ངག་མེ་ལོང་དང་སུམ་རྟགས་ལ་སློབ་སྦྱོང་བྱས། 2018ལོར་མཐོ་འབྲིང་མཐར་ཕྱིན་རྗེས་ཡུལ་བཤོལ་བྱས་ཏེ་ལྷ་སར་སོང་། ཟ་ཁང་དང་ཨར་ཁང་དུ་ཞབས་ཞུ་བ་བྱས་ཤིང་ལམ་བཟང་སྐད་རིགས་སློབ་གྲྭའི་དབྱིན་ཡིག་འཛིན་གྲྭར་ཞུགས། དེ་མིན་ཁྲེང་ཏུའུ་དང་པེ་ཅིན་སོགས་ནས་ལོ་ངོ་གསུམ་ཙམ་གྱི་རིང་སྐད་ཡིག་དང་ཟ་མའི་གཡོས་སྦྱོར། ཡུལ་སྐོར་རིག་གནས་སོགས་ཀྱི་ཤེས་བྱ་ཅི་ནུས་ཤིག་སྦྱངས།
གཉིས་པ། བཅར་འདྲིའི་ལེའུ།
དྲི་བ། བོད་ཟས་ཞིབ་འཇུག་ལ་ཐོག་མར་འཇུག་པའི་བསམ་བློ་དེ་གང་ནས་བྱུང་བ་ཡིན།
ལན། ང་རང་ལོ་བརྒྱད་ཡིན་པའི་སྐབས་དེའི་དགུན་ཁར་ཨ་ཕྱི་ནད་ཀྱིས་བཟུང་ནས་མལ་སར་ལྷུང་། དགོང་མོ་ཞིག་ལ་ངས་ཤ་མོག་དང་ཤ་ཁུ་བཟོས་ཏེ་ནད་གཡོག་བྱས་པ་ཡིན། དེ་ནི་ངས་བཟོས་པའི་ཟ་མ་དང་པོ་ཡིན་ཡང་ད་སྐབས་འདང་བརྒྱབ་ན་ང་ནི་ཅུང་རྒྱས་སྤྲོས་བྱེད་པར་དགའ་པོ་ཡོད་དེ་སྡེར་བཤམས་དང་མཛེས་རྒྱན་ཏུ་མེ་ཏོག་ཅིག་བཟོས་པ་ད་རུང་དྲན། དེ་ནས་ཨ་ཕྱི་འདས་རྗེས་ང་རང་འབྲོག་སར་སོང་སྟེ་གནག་ཕྱུག་འཚོ་སྐྱོང་དང་ཟ་མ་གཡོས་སྦྱོར་གྱི་ལས་ལ་ཞུགས་ཤིང་ངེད་ཚང་གི་ཕྱི་ནང་གི་ལས་ཀ་མང་ཆེ་བ་ང་རང་གཅིག་པུས་བསྒྲུབས་པ་ཡིན། 2018ལོར་ཧུང་ཡོན་ནས་ཚད་ལྡན་གྱི་ཁྲོན་ཟས་སློབ་སྦྱོང་བྱས། ལོ་དེའི་དགུན་ཁ་ལྷ་ས་ནས་ཚོང་རའི་བོད་ཟས་སྟེ་བོད་ཐུག་དང་བག་ལེབ་ནས་འགོ་བརྩམས་ཏེ་སློབ་སྦྱོང་དང་ཟིན་བྲིས་བྱས་པ་ཡིན། སྟབས་ལེགས་པ་ཞིག་ལ་སློབ་སྦྱོང་གི་ཞོར་ཏུ་ཤམ་བྷ་ལ་སོགས་ཀྱི་ནུབ་ཟས་ཐབ་ཚང་དུ་ལས་ཀ་རག་ཐབས་བྱུང་། དེ་མ་ཟད་ལོ་བཅུ་གྲངས་ཤིག་ལ་མ་འཕྲད་པའི་ངའི་ཕུ་བོ་ནི་མ་སྐྱེས་ཨ་མའི་མ་བྱན་ཆེན་པོ་ཡིན་པས་ཁོང་གི་ཟ་མའི་བརྩམས་ཆོས་དང་ས་ཁུལ་མི་འདྲ་བའི་མིའི་ཁ་ཟས་རོལ་སྟངས་དང་བྲོ་བ། གཡོས་སྦྱོར་བྱེད་སྟངས་སོགས་ཀྱི་ཁ་བརྡ་མང་པོ་བྱས་པས་ང་ལ་བོད་ཀྱི་སྲོལ་རྒྱུན་ཟ་མ་བསྡུ་ཉར་བྱ་རྒྱུའི་བསམ་བློ་སྐྱེས།
དྲི་བ། ཁྱེད་ཀྱིས་ད་སྔའི་བར་བོད་ཟས་ག་ཚོད་ཅིག་ལ་ཞིབ་འཇུག་བྱས་པ་དང་བོད་ཟས་དེ་དག་འབྲོག་ཟས་གཙོ་ཆེའམ་རོང་ཟས་གཙོ་ཆེ་བ་ཡིན།
ལན། ད་བར་དུ་སྲོལ་རྒྱུན་བོད་ཟས་སྐྱབ་ར་འོ་ཤུན་དང་སྲེ་པེ་སོགས་སུམ་བརྒྱ་ལྷག་ཅིག་གི་གཡོས་སྦྱོར་བྱེད་སྟངས་དང་བོད་ཀྱི་མར་རྒྱན་བཅས་པ་ཟིན་བྲིས་བྱས་ཤིང་ཕལ་ཆེར་ཚང་མ་འབྲོག་ཟས་གཙོ་བོ་ཡིན།
དྲི་བ། བོད་ཟས་ཞིབ་འཇུག་གི་ཆེད་ས་ཆ་ག་ཚོད་ཅིག་ལ་སོང་འདུག་པ་དང་ཟ་ཁང་གཉེར་བ་སོགས་ཀྱི་ཉམས་མྱོང་ག་འདྲ་ཡོད།
ལན། 2020ལོར་ངས་ཐོག་མར་ལྷ་ས་ནས་སྒར་ཁ་ཞེས་པའི་ཨ་མདོའི་འབྲོག་ཟས་ཁང་ཞིག་གཉེར་བ་ཡིན། འདི་ནི་ངས་བོད་ཟས་ལས་ཀའི་ཐོག་མའི་གཞི་རྟེན་ཏུ་གྱུར་ཡོད། ནག་ཆུ། ལྷ་སའི་ཉེ་འགྲམ་གྱི་འབྲོག་ཁུལ། ཀན་ལྷོ། མཚོ་སྔོན་གྱི་འབྲོག་ཁུལ། དཀར་མཛེས། རྔ་ཁུལ་སོགས་བོད་ཀྱི་འབྲོག་ཁུལ་མི་ཉུང་བ་ཞིག་ལ་སོང་ནས་སྲོལ་རྒྱུན་བོད་ཟས་ཟིན་བྲིས་དང་སྒྲ་ཕབ། གཡོས་སྦྱོར་སོགས་བྱས། གཞན་ལྷ་ས་ནས་སྤང་རྒྱན་མེ་ཏོག་ཅེས་པའི་ནུབ་ལུགས་བོད་ཟས་སྟེ་སྒེར་པའི་ཐབ་ཚང་ཞིག་གཉེར་མྱོང་། དེ་མིན་ཕན་བདེ་བོད་ལུགས་ཟས་ཁང་དང་བསམ་སྐྱིད་གླིང་སོགས་ནས་བོད་ཟས་གཡོས་སྦྱོར་དང་མགྲོན་པོ་སྣེ་ལེན་སོགས་བྱས་མྱོང་།
དྲི་བ། ད་ལྟའི་བོད་ཟས་ཞིབ་འཇུག་གི་གནས་བབ་དེ་ཅི་འདྲ་ཞིག་རེད།
ལན། ངས་བསམ་ན་སྐྱོ་པོ་རེད། མང་པོ་ཞིག་གིས་བོད་མིའི་གཡོས་སྦྱོར་བྱས་པའི་ཟ་མ་ལ་བོད་ཟས་ཞེས་འབོད་བཞིན་འདུག་སྙམ། དེ་སྔོན་ཁྲེང་ཏུའུ་ནས་དགེ་རྒན་ཀརྨ་བདེ་ལེགས་ལགས་ཀྱི་བོད་ཟས་སྐོར་གྱི་བགྲོ་གླེང་ཞིག་གནང་ཞིང་། ངས་ཁོང་ལ་བོད་ཟས་ཞིབ་འཇུག་སྐོར་ནས་དྲི་བ་འགའ་དྲིས་མོད་ཉིན་དེར་ལན་ཡག་པོ་སྤྲད་མ་སོང་། ང་རང་གིས་བསམ་པར་བོད་ཟས་ནི་བོད་མི་རྣམས་མཐོ་སྒང་དུ་འཚོ་གནས་བྱས་པའི་དུས་བཞིའི་འགྱུར་བ་དང་ས་བབ་མཐོ་དམན་གྱིས་འཚོ་བ་ཟས་ཀྱི་ལོངས་སྤྱོད་དེ་རྒྱལ་པོ་དང་སྐུ་དྲག་སོགས་ཀྱི་ཕོ་བྲང་ནང་གི་ཞལ་ཟས་དང་། དུས་བཞིའི་འཕོ་འགྱུར་ཁྲོད་གནས་སྤོར་ཞིང་རྟ་དང་ནོར་ལུག་འཚོ་རྟེན་བྱེད་ཅིང་ཤ་རིགས་གཙོ་བོ་བྱེད་པའི་འབྲོག་ཁུལ་གྱི་ཟ་མ། ནམ་ཚའི་དྲོ་གྲང་གི་དབང་གིས་སྔོ་ཚལ་འདེབས་གསོ་བྱེད་ཐུབ་པའི་སོ་ནམ་རོང་ཕྱོགས་ཀྱི་ཟ་མ། དགོན་སྡེའི་ཟ་མ་དང་དགོན་སྡེའི་ཚོགས་ཐུག་སོགས་ནི་ཁྱད་ཆོས་ཆེན་པོ་ཡོད་ས་དང་བོད་ཀྱི་སྲོལ་རྒྱུན་ཟ་མ་ཞིབ་འཇུག་གི་ཁྲོད་དུ་མེད་དུ་མི་རུང་བའི་དོན་ཚན་རེ་ཡིན་ལ། དེ་དག་ལ་ལས་སྣོན་དང་གསར་བཅོས་བྱེད་དགོས་པ་ལས་མི་རིགས་གཞན་གྱི་ཟས་རིགས་དག་བོད་ཀྱི་མིས་གཡོས་སྦྱོར་བྱས་པ་ལ་བོད་ཟས་ཞེས་དང་བོད་ཟས་ལས་རིགས་ཞེས་བཤད་མཁན་དག་ནི་མི་རིགས་ཀྱི་མིང་བཏགས་པ་ཙམ་རེད་སྙམ།
དྲི་བ། མ་འོངས་པར་ཁྱེད་ལ་འཆར་གཞི་ག་འདྲ་ཡོད།
ལན། དགེ་རྒན་བན་ཤུལ་པས་ང་ལ་འདི་འདྲ་ཞིག་བཤད་མྱོང་སྟེ་ཟ་མ་ནི་གཙོ་བོ་ལྕེ་ཐོག་ཏུ་འབབ་དགོས་པ་ཞིག་ཡིན་ཟེར་བ་བཞིན། བོད་ཀྱི་སྲོལ་རྒྱུན་ཟ་མ་དེ་ནུབ་ལུགས་ཟ་མའི་སྡེར་བཤམས་དང་ཤར་ཕྱོགས་ཟ་མ་སྦྱོར་སྟངས་སོགས་སློབ་སྦྱོང་བྱས་ཐོག་བོད་ཀྱི་ཟ་མ་དག་མ་རེ་གཡོས་སྦྱོར་བྱེད་ཐུབ་པའི་ཟ་ཁང་ཞིག་གཉེར་རྒྱུ་ནི་མིག་སྔའི་ཆེས་ཐག་ཉེ་བའི་འཆར་གཞི་ཡིན། །