རྔ་བའི་ས་མིང་ཐོགས་ཚུལ།

རྔ་བ་ནི་སི་ཁྲོན་གྱི་ནུབ་བྱང་མཚམས་ཀྱི་རྔ་བ་བོད་རིགས་ཆཱང་རིགས་རང་སྐྱོང་ཁུལ་གྱི་བྱང་ཕྱོགས་སུ་གནས། རྩོམ་ཡིག་འདིར་རྔ་བ་ཞེས་པའི་ས་མིང་ཐོགས་ཚུལ་གྱི་བཤད་རྒྱུན་མི་འདྲ་བ་དག་ཕན་ཚུན་བསྡུར་བ་བྱས་ཡོད་ཅིང་། དེ་ཡང་མིའི་རིགས་རིག་པའི་ཐབས་ལམ་དང་ཡིག་ཚང་སོགས་ལ་བརྟེན་ནས་རྔ་བ་ཞེས་ས་མིང་ཐོགས་ཚུལ་གྱི་བྱུང་རབས་དང་ངག་རྒྱུན་སོགས་ལ་དཔྱད་པ་བཏང་ནས། རྔ་བ་ཞེས་པའི་ས་མིང་གི་སྒྲ་དོན་སོགས་གསལ་བཤད་བྱས་ཡོད་དོ། །

གཅིག། རྔ་བ་ཞེས་པའི་ས་མིང་ཐོགས་ཚུལ་གྱི་བཤད་སྲོལ་མི་འདྲ་བ་གསུམ།

ལོ་རྒྱུས་ཡིག་ཚང་དང་ཡུལ་དངོས་བརྟག་དཔྱད་གཉིས་ཟུང་དུ་འབྲེལ་བ་ལ་བརྟེན་ན། ད་ལྟ་རྔ་བ་ཞེས་པའི་ས་མིང་ཐོགས་ཚུལ་ལ་བཤད་རྒྱུན་མི་འདྲ་བ་གསུམ་ཙམ་ཡོད་ཅིང་། དེ་ལས་དང་པོ་ནི་སྔ་དུས་སུ་སྟོད་མངའ་རིས་ཀྱི་མི་རྒྱུད་དག་ཡུལ་འདིར་གནས་ཆགས་ཤིང་། དེ་དག་གི་རྒྱུད་ལས་ཆད་པའམ་དེའི་རྒྱུད་ཡིན་པས་ན་མངའ་པའམ་རྔ་བ་ཞེས་མིང་ཐོགས་པ་ཡིན་ཞེས་བཤད། གཉིས་པ་བཙན་པོ་སྲོང་བཙན་སྒམ་པོས་མདོ་སྨད་དུ་དམག་འདྲེན་པའི་སྐབས་སུ་ད་ལྟའི་རྔ་བར་ཕེབས་ཤིང་། ཁོང་ནས་གནས་འདིའི་ཆགས་ཚུལ་ནི་དམག་རྔའི་དབྱིབས་དང་འདྲ་བར་གཟིགས་ནས། རྔ་བ་ཞེས་མིང་བཏགས་པ་ཡིན་ཞེས་ཀྱང་གྲགས། གསུམ་པ་དགེ་རྒན་ཆེན་མོ་ཡུལ་ལྷ་ཐར་ནས་རྔ་བ་ཞེས་པའི་མིང་འདི་ནི་ཏུན་ཧོང་ཡིག་རྙིང་ལས “ནང་སྐད”（南语）ཀྱི་དཔེ་རྙིང་ཤོག་དྲིལ་ཞིག་ཏུ་“vngva vpag”ཞེས་བྱུང་བ་ནི་རྔ་བའི་ཡུལ་ལུང་དུ་གོ་དགོས་ཞེས་གསུངས་པ་བཅས་སོ། །

གཉིས་པ། ཏུན་ཧོང་དཔེ་རྙིང་ཤོག་དྲིལ་ལས་རྔ་བ་ཞེས་པའི་མིང་བྱུང་ཡོད་ཚུལ་གྱི་སྐོར།

ཏུན་ཧོང་དཔེ་རྙིང་ཤོག་དྲིལ་ལས“རྔ་བ”ཞེས་པའི་ས་མིང་བྱུང་ཡོད་ཅེས་པའི་བཤད་ཚུལ་འདི་ནི་ཉེ་བའི་ཆར་གསར་དུ་བྱུང་བ་ཞིག་རེད། འདི་ནི་ལོ་རྒྱུས་ཡིག་ཚང་རིག་པ་རྒན་རྨེའུ་རུ་ཡུལ་ལྷ་ཐར་ལགས་ནས་ཐོག་མར་གསུངས་པ་ཞིག་རེད། དེ་ཡང་ཁོང་ནས་“རྔ་བ་ཞེས་པའི་མིང་འདི་ནི་བོད་དང་འབར་མའི་སྐད་རྒྱུན་གྱི་ཁོངས་སུ་གཏོགས་ཤིང་། དེ་ནི་ཐོག་མར་ཡཱ་ཁུ་པ་ཁོས（雅科·巴考）བརྩམས་པའི《ཏུན་ཧོང་བོད་ཡིག་ལོ་རྒྱུས་ཡིག་ཚང་》གི“དོན་ཆེན་གནད་བསྡུས”ལས“vngva vpag”ཉེ་བའི་བོད་རིག་ཞིབ་འཇུག་པ་དང་དབྱིན་ཇིའི་གླང་རབ་གཙུག་ལག་སློབ་ཆེན་གྱི་རྒན་ཐོ་མཱ་སུ（F.W.Thomas）ནས་སྔ་དུས་ཤོག་གྲངས་སྟོང་གཉིས་ལྷག་ཡོད་པའི་གླེགས་བམ་ཞིག་མཛད་ནས། ཏུན་ཧོང་གི་ཤོག་དྲིལ་འདི་ཡང་ཚོན་པར་དུ་བཏབས་པར་མ་ཟད། ལ་ཏིང་ཡི་གེའི་གཟུགས་སུ་ཡང་ཕབ། གཞན་ཡང་ཐོ་མཱ་སུ་ནས་ཤོག་དྲིལ་འདིའི་ཚིག་རེ་རེ་བཞིན་གང་དེའི་གཟུགས་དང་དོན་བཅས་ཕྱོགས་གཉིས་ནས་ཚོད་དཔག་བྱས་ཏེ་དབྱེ་ཞིབ་བྱས་ཡོད་པར་མ་ཟད། ཤོག་གྲངས་52ཡོད་པའི་ཚིག་ཕྱོགས་བསྒྲིགས་ཤིག་ཀྱང་བྲིས་ཡོད། གཞན་ཡང་ཤོག་དྲིལ་འདི་ལས་བྱུང་བའི་བརྡ་སྤྲོད་དང་། ཚིག་གི་འབྱུང་ཁུངས་སོགས་ཀྱི་སྐོར་ནས་བརྟག་དཔྱད་གནང་ཡོད་ཅིང་།

ཤོག་དྲིལ་འདི་ལས་བྱུང་བའི་ཐ་སྙད་དག་ཀྱང་བོད་སྐད་དང་། ཞཱ་ནུབ་མ་དང་། ཆའང་རིགས་ཀྱི་སྐད་བཅས་ཕན་ཚུན་བསྡུར་བ་བཏང་ནས་ཞིབ་འཇུག་གནང་ཡོད”ཅེས་བྱུང་། གཞན་ཡང་སྤྱི་ལོ་དུས་རབས་7པ་ནས་8པའི་བར་གྱི་བོད་ཡུལ་བྱང་ཤར་མཚམས་ཀྱི་ལོ་རྒྱུས་གནས་ཚུལ་དང་། ས་ཁམས་ཁོར་ཡུག་དང་ཆའང་རིགས་ཀྱི་ཚོ་བ་དག་གི་ཁྱབ་ཚུལ་ལ་གཞིགས་ནས། སྐད་རིགས་འདི་ལ “ནང་སྐད”ཅེས་སྦྱར་ཅི་ཡོད་པར་མ་ཟད། གསུང་རྩོམ་གྱི་མཚན་བྱང་ལ་ཡང་《ནང་།（Nan）བོད་རྒྱའི་མཚམས་ཀྱི་གནའ་རབས་ཀྱི་སྐད་རིགས》ཞེས་བཏགས་ཡོད་དོ། ། སྤྱིར་ཐོ་མཱ་སུ་ནས་བོད་ཡིག་གཞིར་བཟུང་ནས་ཤོག་དྲིལ་དེ་ལ་ཏིང་གི་ཡི་གེར་ཕབ་ཡོད་པ་ལས། རྔ་བ་ཞེས་པའི་ས་མིང་ལ་མཆན་འགྲེལ་སོགས་གང་ཡང་གནང་མེད། འོན་ཀྱང་། རྒན་ཡུལ་ལྷ་ཐར་ནས་ནང་སྐད་ལ་ཞིབ་འཇུག་གནང་བའི་སྐབས་སུ་རྔ་བ་ཞེས་པའི་མིང་ཐོགས་ཚུལ་ནི་མིག་སྔར་རིག་གཞུང་ཞིབ་འཇུག་གི་སྡེར་བལྟོས་བཅས་ཀྱི་བཤད་ཚུལ་ཆིག་རྐྱང་བ་ཞིག་ཏུ་ཆགས་ཡོད་པར་མ་ཟད། ནང་སྐད་ཀྱི་ཤོག་དྲིལ་དེ་ཡང་གང་དེའི་སྐད་རིགས་ཉམས་པའི་རྐྱེན་སོགས་ཀྱི་དབང་གིས་བཤད་ཚུལ་གང་དེ་ཡང་དག་ཡིན་པའི་སྒྲུབ་བྱེད་བཙན་པོ་ཞིག་མེད། འོན་ཀྱང་། བཤད་ཚུལ་འདི་ལ་མ་འོངས་པར་བདེན་དཔང་བྱུང་ན་ས་གནས་ཀྱི་རིག་གནས་ལ་ཞིབ་འཇུག་བྱེད་པར་ལེགས་སྐྱེས་ཆེན་པོ་ཕུལ་ཐུབ་པར་ངེས་སོ་ཞེས་ཀྱང་གསུངས་སོ། །

གསུམ་པ། རྔའི་དབྱིབས་དང་འདྲ་བས་རྔ་བ་ཞེས་ཐོགས་ཚུལ་གྱི་སྐོར།

རྔ་བའི་ས་དབྱིབས་ནི་རྔ་ཞིག་དང་འདྲ་བས་རྔ་བ་ཐོགས་ཞེས་པའི་བཤད་ཚུལ་ནི་ཐོག་མར་མཁས་དབང་དམུ་དགེ་བསམ་གཏན་ལགས་ཀྱིས་གསུངས་ཤིང་། ཁོང་ནས《བོད་ཀྱི་ལོ་རྒྱུས་ཀུན་དགའི་མེ་ལོང་》ལས“རྔ་བ་ཞེས་པ་ནི་རྨ་ཆུའི་ཁུག་པ་དྲུག་གི་གྲས་ཡིན”ཞེས་གསུངས་ཤིང་། ཁོང་གིས་རྔ་བ་ཞེས་པ་ནི་ས་དབྱིབས་ལ་བརྟེན་ནས་ཐོགས་པ་ཡིན་ཞིང་། དེ་ཡང་རྔ་བ་རྫོང་གི་ས་དབྱིབས་ནི་རྔ་ཟླུམ་པོ་ཞིག་གི་དབྱིབས་དང་འདྲ་བས་རྔ་བ་ཞེས་ཐོགས་པ་ཡིན་གསུངས། དམུ་དགེ་བསམ་གཏན་ལགས་ནི་རྔ་བ་ཞེས་པ་ནི་ས་དབྱིབས་ལ་བརྟེན་ནས་ཐོགས་པ་ཡིན་ཞེས་གསུང་མཁན་ཐོག་མ་ཡིན་པར་མ་ཟད། བཤད་ཚུལ་འདི་རང་ལུགས་སུ་འཛིན་མཁན་གྱི་མཁས་པ་ཐོག་མ་ཡང་ཡིན་ནོ། །དེ་ཡང་ཁོང་གིས“བཙན་པོ་སྲོང་བཙན་སྒམ་པོས་ཤར་འདུལ་མཛད་ནས་ཐོའུ་ཡོའུ་ཧྥེའི་དང་ཏང་ཤང་སོགས་དབང་དུ་བསྒྱུར་པའི་སྐབས་སུ། ཟུང་ཆུར་སླེབས་ནས་གྲ་སྒྲིག་བྱས་ཤིང་། སྐབས་དེར་བཙན་པོ་སྲོང་བཙན་སྒམ་པོས་ཟུང་ཆུ་ནས་སྤྱི་ལེ་སུམ་བརྒྱ་ཡས་མས་ཡོད་པའི་རྔ་བའི་གནས་འདིར་དམག་སྒར་བཏབས”ཞེས་གསུངས། གཞན་ཡང་བཤད་རྒྱུན་དུ་བཙན་པོ་སྲོང་བཙན་སྒམ་པོ་རྔ་བར་སླེབས་པའི་སྐབས་སུ། གང་དེའི་ས་དབྱིབས་ནི་རྔ་ཞིག་དང་འདྲ་བར་གཟིགས་ནས་དེར་རྔ་ཁོག་བཏག་ཅིང་། དུས་ཕྱིས་བཤད་རྒྱུན་འདི་ཟམ་མ་ཆད་པར་ད་ལྟའི་བར་དུ་གནས་ཞེས་ཀྱང་གྲགས། དེ་སྔོན་རྨེའུ་དཔལ་མགོན་འཕྲིན་ལས་རབ་བརྟན་གྱི་དྲུང་ཡིག་ཨ་ཁུ་ཆོས་འཕེལ་ནས་མཛད་པའི《རྔ་ཡུལ་ཀིརྟིའི་དགོན་གྱི་ཆགས་རབས》(སྤྱི་ལོ་1934ཡས་མས་སུ་མཛད།)ཞེས་པ་ལས་ཀྱང་རྔ་བ་ཞེས་པའི་མིང་ཐོགས་ཚུལ་གསུང་བའི་སྐབས་སུ་སའི་དབྱིབས་རྔ་དང་འདྲ་བས་དེ་ལྟར་ཐོགས་ཞེས་ཀྱང་བྱུང་ཞིང་། ཁོང་གིས་སྟོད་མངའ་རིས་ནས་ཆད་པས་ན་མངའ་པའམ་རྔ་བ་ཐོགས་ཞེས་པའི་བཤད་ཚུལ་གཞན་ལུགས་སུ་བྱས་ནས་དགག་ཡོད།

བཞི་པ། མངའ་རིས་ནས་ཆད་པས་མངའ་པའམ་རྔ་བ་ཞེས་འབོད་ཚུལ་གྱི་སྐོར།

རྔ་བ་ཞེས་པའི་ས་མིང་འདི་ནི་སྟོད་མངའ་རིས་ནས་ཆད་པས་ན་མངའ་པའམ་རྔ་བ་ཞེས་ཐོགས་པ་ཡིན་ཞེས་པའི་བཤད་ཚུལ་འདི་ནི་ད་ལྟའི་བར་དུ་བཤད་རྒྱུན་ཁྱབ་ཆེ་བ་དང་རྒྱུགས་ཆེ་བ་ཞིག་ཡིན། བཤད་ཚུལ་འདི་ནི་ཐོག་མར་དུས་རབས་ཉི་ཤུ་པའི་དུས་མགོའི་ས་གནས་ལོ་རྒྱུས་ཀྱི་ཡིག་ཆ་ལས་བྱུང་ཡོད། དེ་ཡང་དུས་རབས་སྔོན་མའི་ལོ་རབས་དྲུག་བཅུ་པའི་སྔོན་དུ་རྔ་བའི་ཞིང་འབྲོག་དུ་མར་དབང་བྱས་པའི་རྨེའུ་དཔལ་མགོན་འཕྲིན་ལས་རབ་བརྟན་གྱི་དྲུང་ཡིག་ཆེན་མོ་བློ་བཟང་ཆོས་འཕེལ་གྱིས་མཛད་པའི《རྔ་ཡུལ་ཀིརྟིའི་དགོན་གྱི་ཆགས་རབས》ལས་རྔ་བ་ཞེས་པའི་མིང་ཐོགས་ཀྱི་སྐོར་ནས། “རྨེའུ་ཚང་དང་། རྨེའུ་གོང་ཚང་། རྨེའུ་མོ་བ་ཚང་། རྨེའུ་ཤུལ་ཚང་། རྨེའུ་སྒང་ཚང་སོགས་ཀྱི་ཁྱིམ་རྒྱུད་ནི་མངའ་རིས་ལ་དྭགས་ནས་གནས་འདིར་སླེབས་ཤིང་། དེ་བས་ཐོགས་མའི་སྐབས་སུ་འདིར་མངའ་པ་ཞེས་བརྗོད་མོད། འོན་ཀྱང་། དུས་ཕྱིས་ཡི་གེ་འབྲི་ཚུལ་དང་ངག་ནས་འབོད་ཚུལ་ལ་འགྱུར་བ་བྱུང་ནས་རྔ་བ་ཞེས་བརྗོད་པ་ཡིན་ནོ” ཞེས་གསུངས། བཤད་ཚུལ་འདི་དང་འདྲ་བ་ཞིག་ནི་ཀྲུང་གོ་གསར་པ་དབུ་བརྙེས་པའི་རྗེས་སུ་ས་གནས་ཀྱི་ལོ་རྒྱུས་རྩོམ་སྒྲིག་ཨུ་ཡོན་ལྷན་ཁང་གིས་སྤྱི་ལོ་1983ལོར་དཔེ་སྐྲུན་བྱས་པའི《རྔ་བ་རྫོང་གི་ལོ་རྒྱུས》དང་སྤྱི་ལོ་1985ལོར་དཔེ་སྐྲུན་བྱས་པའི《རྔ་བ་རྫོང་གི་ས་མིང་རེའུ་མིག》ཅེས་པ་གཉིས་སུ་ཡང་མངའ་རིས་ནས་ཆད་པས་ན་མངའ་པའམ་རྔ་བ་ཞེས་ཐོགས་པ་ཡིན་པའི་བཤད་རྒྱུན་འདི་དྲངས་ཡོད་པར་མ་ཟད། དེ་ལ་ད་དུང་ཁ་སྐོང་གི་ཚུལ་དུ་ནང་དོན་འགའ་ཞིག་ཀྱང་བསྣན་ཡོད་དེ། དཔེར་ན“རྔ་བ་རྫོང་ཁོངས་ཀྱི་དགེ་འདུན་པ་རྣམས་འབྲས་སྤུངས་དང་དགེ་ལྡན་སོགས་སུ་ཕེབས་ནས་སློབ་གཉེར་གནང་བའི་སྐབས་སུ། མངའ་རིས་ཁང་ཚན་དུ་འཇོག་པ་ཡིན་ནོ”ཞེས་ཀྱང་བྲིས་ཡོད་དོ། ། དེ་ལས་གཞན་དུ་སྔ་དུས་སུ་རྔ་བ་རྫོང་ཁོངས་ཀྱི་དཔོན་པོ་དྲགས་ཤོས་རྨེའུ་དཔལ་མགོན་འཕྲིན་ལས་རབ་བརྟན་ཚང་དང་མངའ་རིས་ཀྱི་དཔོན་པོ་དག་གིས་ཕན་ཚུན་འཕྲིན་བསྐུར་ནས་ཉེ་འབྲེལ་དང་རིགས་གཅིག་པའི་ཚུལ་སོགས་མཚོན་རབས་ཡོད་ཅེས་དམངས་ཁྲོད་དུ་བཤད་རྒྱུན་ཁྱབ་ཆེའོ། །

ལྔ་པ། རྔ་བ་ཞེས་པའི་ས་མིང་ཐོགས་ཚུལ་གྱི་བཤད་པ་དག་གི་དཔྱད་བརྗོད།

རྔ་བ་ཞེས་པའི་ས་མིང་ཐོགས་ཚུལ་གྱི་བཤད་རྒྱུན་མི་འདྲ་བ་གསུམ་ལ་ཡང་རང་རང་གི་ལུགས་རེ་ཡོད་དེ། ཏུན་ཧོང་ཡིག་རྙིང་གི་ནང་སྐད་དུ་རྔ་བ་ཞེས་པའི་མིང་བྱུང་ཚུལ་དང་། ས་དབྱིབས་ཀྱི་ཆ་ནས་རྔ་ཞིག་དང་འདྲ་བས་དེ་ལྟར་ཐོགས་ཚུལ་དང་། མངའ་རིས་ནས་ཆད་པས་ན་མངའ་པའམ་རྔ་བ་ཞེས་ཐོགས་ཚུལ་བཅས་སོ། ། འོན་ཀྱང་། བཤད་ཚུལ་འདི་གསུམ་ལ་ཡང་ཡིག་ཚང་གི་རྒྱབ་རྟེན་ཚད་ལྡན་མེད་པས་དེ་དག་ལས་གང་ཞིག་ནི་ཡང་དག་པའོ་ཞེས་བཤད་ཁག་པོ་ཡིན། དེས་ན་བཤད་ཚུལ་འདི་གསུམ་ལས་གང་ཞིག་དག་པ་ཡིན་མིན་བརྟག་དགོས་ན། ངེས་པར་དུ་མིའི་རིགས་རིག་པའི་ཐབས་ལམ་སོགས་ལ་བརྟེན་ནས་ས་གནས་རང་གི་རིག་གནས་སུ་རྔ་བ་ཞེས་པའི་ས་མིང་ཐོགས་ཚུལ་ལ་བཤད་ཚུལ་ལམ་རྒྱུ་ཆ་གང་ཡོད་དང་། ས་གནས་ཀྱི་མིའི་བསམ་ཚུལ་ལས་རྔ་བ་ཞེས་པའི་ས་མིང་ཐོགས་ཚུལ་སྐོར་ཕྱོགས་བསྡུས་དང་། ས་མིང་ཐོགས་ཚུལ་གྱི་བཤད་རྒྱུན་དག་ལས་གང་ཞིག་ནི་ས་གནས་རང་གི་མིས་རང་ལུགས་སུ་བྱེད་པ་དང་། ས་མིང་གང་དེར་མངའ་བའི་རིག་གནས་ཀྱི་དོན་སྙིང་སོགས་ལ་ཡང་དཔྱད་པ་ཞིབ་མོ་གཏོང་དགོས་པ་ཞིག་རེད། དེས་ན་གུས་པས་མིའི་རིགས་རིག་པའི་ཐབས་ལམ་ལ་བརྟེན་ནས་རྔ་བ་ཞེས་པའི་ས་མིང་ཐོགས་ཚུལ་ལ་དམིགས་ཏེ་ཡུལ་དངོས་བརྟག་དཔྱད་བྱེད་པའི་སྐབས་སུ། གོང་གསལ་གྱི་ས་མིང་ཐོགས་ཚུལ་གྱི་བཤད་པ་མི་འདྲ་བ་གསུམ་གཞིར་བཟུང་ནས་ས་གནས་རང་གི་མི་སྣ་དག་ལ་བཅར་འདྲི་བྱས་པ་ཡིན། དེ་དག་ནི་དགོན་སྡེར་སྒྲུབ་པ་གནང་བཞིན་པའི་གྲྭ་པ་བགྲེས་པོ་བློ་བཟང་དང་། ས་གནས་ཀྱི་ལོ་རྒྱུས་རྩོམ་སྒྲིག་ཨུ་ཡོན་གྱི་ཚོགས་མི་འཇམ་དབྱངས། ན་གཞོན་རྩོམ་པ་པོ་རིན་ཆེན་དང་། བློན་ཚང་སྡེ་པའི་ཨ་ཁུ་འཇམ་ཁོ། རྒན་ཆོས་འཕེལ་བཅས་སོ། །གུས་པས་སློབ་མའི་ལས་ཐོབ་བཟུང་ནས་གོང་བཀོད་ཀྱི་རྒན་གཞོན་དང་སྤྱི་ཚོགས་འཚོ་བ་མི་འདྲ་བའི་ས་གནས་ཀྱི་མི་འདི་དག་ལ་རྔ་བ་ཞེས་པའི་ས་མིང་ཐོགས་ཚུལ་སྐོར་ནས་དྲི་བ་བྱེད་པ་ལས། ཚང་མའི་སྟོད་མངའ་རིས་ནས་མཆེད་པས་ན་མངའ་པའམ་རྔ་བ་ཞེས་ཐོགས་པར་བཤད་པ་ནི་དག་པར་སྣང་སྟེ། དེ་ནི་མདོ་དབུས་མཐོ་སྒང་གི་རིག་གནས་ཤར་ཕྱོགས་སུ་དར་བའི་ལོ་རྒྱུས་དང་མཐུན་པ་ཡིན་ཞེས་སོགས་གསུངས་སོ། །

ས་གནས་འདིར་མཚོན་ན། རྔ་བ་ཞེས་པའི་ས་མིང་ཐོགས་ཚུལ་ལ་ས་གནས་རང་གི་ཡིག་ཆ་ལ་བརྟེན་ནས་འགྲེལ་བཤད་བྱེད་པ་ལས། ཡིག་ཚང་གི་རྒྱབ་བརྟེན་གཞན་གང་ཡང་མེད་པའི་བར་དུ། ས་གནས་ཀྱི་མི་རྣམས་ནི་སྟོད་མངའ་རིས་ནས་མཆེད་པའི་བཤད་ཚུལ་གྱི་རྗེས་སུ་འབྲང་བར་གདོན་མི་ཟ་ཞིང་། བཤད་ཚུལ་འདི་རིགས་ཀྱིས་ནི་རྔ་བའི་མི་རྣམས་ཀྱི་ལོ་རྒྱུས་ཀྱི་འདོད་པ་སོགས་ཀྱི་དགོས་མཁོ་བསྐང་ཐུབ་པར་ངེས་སོ། །（འཇིགས་ཁོ། བོད་ལྗོངས་སློབ་ཆེན་རིག་གཞུང་སློབ་གླིང་གི་མི་རིགས་རིག་པའི་ཆེད་ལས་ཀྱི་རབ་འབྱམས་པའི་ཞིབ་འཇུག་སློབ་མ། གནམ་ལྷུན་གྲུབ། བོད་ལྗོངས་སློབ་ཆེན་རིག་གཞུང་སློབ་གླིང་གི་ཀྲུང་གོའི་གནའ་སྲོལ་ཡིག་ཚང་རིག་པའི་ཆེད་ལས་ཀྱི་འབུམ་རམས་པ།）