གསེར་མདོག་གི་སྟོན་ཟླ་བཅུ་པར། ཀྲུང་གོའི་སྒྱུར་བཅོས་སྒོ་འབྱེད་ཀྱི་ལོ་རྒྱུས་ཀྱི་དུས་སྐབས་གལ་ཆེན་མང་པོ་བདེན་དཔང་བྱས་མྱོང་བའི་ཀྲུང་དབྱང་ཏང་གི་སློབ་གྲྭའི་ཚོམས་ཁང་ཆེན་མོའི་ནང་ཡང་བསྐྱར་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེའི་དུས་སྐབས་གལ་ཆེན་ཞིག་བསུས་ཡོང་བ་རེད།
ཟླ་10ཚེས་29ཉིན་ཞིང་ཆེན་དང་པུའུ་རིམ་པའི་འགོ་ཁྲིད་ལས་བྱེད་པ་གཙོ་བོས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་བྱེད་པའི་ཆེད་དོན་བགྲོ་གླེང་འཛིན་གྲྭ་འདི་གར་སློབ་འགོ་ཚུགས་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སློབ་འགོ་ཚུགས་པའི་མཛད་སྒོའི་ཐོག་གསུང་བཤད་གལ་ཆེན་གནང་། འདི་ནི་ཀྲུང་གོའི་ལུགས་ཀྱི་དེང་རབས་ཅན་གྱིས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེ་ཡོང་བར་ཕྱོགས་ཡོངས་ནས་སྐུལ་འདེད་གཏོང་བའི་གནད་འགག་གི་དུས་སྐབས་དང་། ཏང་ཡོངས་དང་རྒྱལ་ཡོངས་སུ་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པའི་གལ་ཆེ་བའི་དུས་སྐབས་སུ། ཏང་ཡོངས་ཀྱི་“འགག་རྩའི་ཉུང་ཤས་”ཀྱི་སྣེ་ཁྲིད་དེ་བློ་བརྟན་འགྱུར་མེད་ངང་སྒྱུར་བཅོས་སྒོ་འབྱེད་ཀྱི་དར་ཆ་མཐོན་པོར་སྒྲེང་བ་དང་། བློ་བརྟན་འགྱུར་མེད་ངང་སྒྱུར་བཅོས་མདུན་དུ་སྤེལ་བའི་“འགག་རྩའི་སློབ་ཚན་”ཞིག་རེད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱིས་དུས་རབས་གསར་པར་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པར་ཐོབ་པའི་ལོ་རྒྱུས་རང་བཞིན་གྱི་གྲུབ་འབྲས་ལ་ཕྱོགས་བསྡོམས་གཏིང་ཟབ་གནང་བ་དང་། ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་པའི་རིགས་པའི་གཞུང་ལུགས་གལ་ཆེན་དང་ལག་ལེན་གྱི་གནད་དོན་རབ་དང་རིམ་པ་རྒྱས་བཤད་གཏིང་ཟབ་གནང་ཞིང་། ལོ་རྒྱུས་ཀྱི་འགོ་ཚུགས་ས་གསར་པའི་ཐོག་ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱས་ཏེ། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བར་སླར་ཡང་སྐུལ་སློང་དང་བཀོད་སྒྲིག་གནང་། གསུང་བཤད་ཀྱི་བརྗོད་གཞི་ཚད་མཐོ་བ་དང་། བསམ་བློ་གཏིང་ཟབ་པ། རྒྱས་བཤད་གནད་ལ་འཁེལ་བ། ནང་དོན་ཕུན་སུམ་ཚོགས་པ་བཅས་ཡོད་པས་ཆབ་སྲིད་ཀྱི་རང་བཞིན་དང་། རིགས་པའི་གཞུང་ལུགས་ཀྱི་རང་བཞིན། དམིགས་གཏད་ཀྱི་རང་བཞིན། མཛུབ་སྟོན་གྱི་རང་བཞིན་བཅས་ཆེན་པོ་ལྡན་ཡོད་པས། ཏང་ཡོངས་དང་ལྷག་པར་དུ་མཐོ་རིམ་ལས་བྱེད་པས་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལ་ཕྱོགས་ཡོངས་ནས་གོ་བ་ཡང་དག་ལེན་པ་དང་། ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་པའི་མཛུབ་སྟོན་གྱི་བསམ་བློ་དང་། སྤྱིའི་དམིགས་འབེན། རྩ་དོན་གལ་ཆེན། ཚན་རིག་དང་མཐུན་པའི་བྱེད་ཐབས་བཅས་ཁོང་དུ་གཏིང་ཟབ་ཆུད་པ་དང་། སྒྱུར་བཅོས་ཀྱི་ཡིད་ཆེས་བརྟན་དུ་གཏོང་བ་དང་། སྒྱུར་བཅོས་ཀྱི་ཁ་ཕྱོགས་ཡང་དག་འཛིན་པ། སྒྱུར་བཅོས་ཀྱི་འགན་འཁྲི་འཁུར་སེམས་ཆེ་རུ་གཏོང་བ། སྒྱུར་བཅོས་ཀྱི་བསྒྲིལ་ཤུགས་གཅིག་ཏུ་སྡུད་པ་བཅས་བྱས་ཏེ་སྒྱུར་བཅོས་ཀྱི་བྱེད་ཐབས་ཁག་དོན་འཁྱོལ་གནད་ལ་འཁེལ་བ་དང་ཕན་འབྲས་ཐོན་པར་སྐུལ་འདེད་གཏོང་བའི་ཐད་དོན་སྙིང་ཧ་ཅང་གལ་ཆེན་ལྡན།
སྒྱུར་བཅོས་སྒོ་འབྱེད་ནི་ཏང་དང་མི་དམངས་ཀྱི་བྱ་གཞག་གོམ་སྟབས་ཆེན་པོས་དུས་རབས་ཀྱི་རྗེས་ཟིན་པའི་ཐབས་མཆོག་གལ་ཆེན་ཞིག་ཡིན། ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་རླབས་ཆེ་བའི་ལོ་རྒྱུས་ཀྱི་རང་དབང་དང་། ཆབ་སྲིད་ཀྱི་བློ་སྟོབས། འགན་འཁྲི་འཁུར་སེམས་ཆེན་པོ་བཅས་ལ་བརྟེན་ནས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱི་སྣེ་ཁྲིད་དེ་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱས་ཏེ་སྒྱུར་བཅོས་ཉིད་ཆ་ཤས་ནས་འཚོལ་ཞིབ་བྱེད་པ་དང་འགག་གཏོར་ལམ་འབྱེད་བྱེད་པ་ནས་མ་ལག་འདུས་གྲུབ་དང་ཕྱོགས་ཡོངས་ནས་ཟབ་སྤེལ་བྱེད་པའི་བར་གྱི་འཕོ་འགྱུར་མངོན་འགྱུར་བྱུང་བ་དང་། ཁྱབ་ཁོངས་ཁག་གི་རྨང་གཞིའི་རང་བཞིན་གྱི་ལམ་ལུགས་ཀྱི་སྒྲོམ་གཞི་གཞི་རྩའི་ཆ་ནས་ཆགས་ཡོད་པ། ཁྱབ་ཁོངས་མང་པོ་ཞིག་ལ་ལོ་རྒྱུས་རང་བཞིན་གྱི་འཕོ་འགྱུར་དང་། མ་ལག་རང་བཞིན་གྱི་བསྐྱར་བཟོ། སྤྱི་ཡོངས་རང་བཞིན་གྱི་སྒྲོམ་གཞི་བཅས་མངོན་འགྱུར་བྱུང་བ། ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་གཏན་འཁེལ་བྱས་པའི་སྒྱུར་བཅོས་ཀྱི་ལས་འགན་སྤྱིའི་ཆ་ནས་ལེགས་གྲུབ་བྱུང་བ། ཏང་དབུ་བརྙེས་ནས་ལོ་ངོ་100འཁོར་བའི་དུས་སྐབས་སུ་ཕྱོགས་སོ་སོའི་ལམ་ལུགས་སྔར་བས་འཐུས་ཚང་དང་སྔར་བས་གཏན་ཆགས་བཅས་ཀྱི་ཕན་འབྲས་མངོན་གསལ་དོད་པོ་ཐོབ་པའི་དམིགས་འབེན་མངོན་འགྱུར་བྱུང་བ། ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པ་དང་ཏང་གི་ལོ་བརྒྱ་དང་པོའི་འབད་འཐབ་དམིགས་འབེན་མངོན་འགྱུར་ཡོང་ཆེད་ལམ་ལུགས་ཀྱི་འགན་སྲུང་ནུས་ལྡན་མཁོ་འདོན་བྱེད་པ་བཅས་ཀྱིས་རང་རྒྱལ་ཉིད་ཕྱོགས་ཡོངས་ནས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་འཛུགས་སྐྲུན་བྱེད་པའི་འཐབ་ལམ་གསར་པར་བསྐྱོད་རྒྱུར་སྐུལ་འདེད་བཏང་ཡོད།
དུས་རབས་གསར་པ་སླེབས་ཚུན་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པའི་ལེགས་འགྲུབ་ཀྱི་ལག་ལེན་དང་རླབས་ཆེ་བའི་གྲུབ་འབྲས་ལ་ཕྱིར་མིག་ལྟ་སྐབས། ལོ་རྒྱུས་ཀྱི་སྡོམ་ཚིག་གསལ་པོ་ཞིག་མངོན་པ་སྟེ། ཏང་གི་སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པས་དུས་རབས་གསར་པར་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པ་དང་སྒྱུར་བཅོས་ཀྱི་འཐབ་ལམ་གསར་པ་མ་ལག་ལྡན་པའི་སྒོ་ནས་ཇུས་འགོད་བྱས་ཏེ་རང་རྒྱལ་གྱི་སྒྱུར་བཅོས་སྒོ་འབྱེད་ཀྱི་རྣམ་པ་གསར་རྐྱང་ཞིག་བཏོད་པ་དེར་དུས་རབས་འབྱེད་པའི་དོན་སྙིང་ལྡན། དུས་རབས་གསར་པར་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པར་ལག་ལེན་གྱི་གྲུབ་འབྲས་དང་། ལམ་ལུགས་ཀྱི་གྲུབ་འབྲས། རིགས་པའི་གཞུང་ལུགས་ཀྱི་གྲུབ་འབྲས་བཅས་གལ་ཆེན་ཐོབ་པ་དེ་ནི་རང་རྒྱལ་སྒྱུར་བཅོས་སྒོ་འབྱེད་བྱེད་པའི་ལོ་རྒྱུས་འཕེལ་རིམ་ནང་གི་བརྗིད་ཆེའི་ལེའུ་ཞིག་ཡིན་པས། ཕྱོགས་ཡོངས་ནས་འབྱོར་འབྲིང་སྤྱི་ཚོགས་སྐྲུན་ཐུབ་པ་དང་“ངོ་མཚར་ཆེན་པོ་གཉིས་”མུ་མཐུད་སྐྲུན་པར་སྒུལ་ཤུགས་ཆེན་པོ་དང་ལམ་ལུགས་ཀྱི་འགན་སྲུང་མཁོ་འདོན་བྱས་ཡོད་ལ། འཐབ་ལམ་གསར་པར་ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་པར་རྨང་གཞི་བརྟན་པོ་དང་རྩ་ཆེའི་ཉམས་མྱོང་མཁོ་འདོན་བྱས་ཡོད།
ཕྲེང་དུ་བསྟར་བའི་རི་ཚོགས་ཁྲོད། ས་ཆེན་འདེགས་བྱེད་རི་མཆོག་ཉིད།
དུས་རབས་གསར་པ་སླེབས་ཚུན་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པའི་ལེགས་འགྲུབ་བྱུང་བའི་ལག་ལེན་བྱས་པ་དང་དེའི་ཐད་རླབས་ཆེ་བའི་གྲུབ་འབྲས་ཐོབ་པའི་རྩ་བ་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་ཏང་ཀྲུང་དབྱང་གི་སྲོག་ཤིང་དང་ཏང་ཡོངས་ཀྱི་སྲོག་ཤིང་ཡིན་པའི་ཆ་ནས་སྣེ་ཁྲིད་ཕྱོགས་སྟོན་བྱེད་པ་དང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་ཚན་རིག་དང་མཐུན་པའི་མཛུབ་ཁྲིད་ལ་ཐུག་ཡོད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དུས་རབས་གསར་པར་ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་པར་སྐུ་ངོ་མས་འགོ་ཁྲིད་དང་། སྐུ་ངོ་མས་བཀོད་སྒྲིག །སྐུ་ངོ་མས་སྐུལ་འདེད་བཅས་གནང་བ་དང་། བསམ་བློ་དང་རིགས་པའི་གཞུང་ལུགས་གསར་གཏོད་ལ་བརྟེན་ནས་སྒྱུར་བཅོས་ལག་ལེན་གྱི་གསར་གཏོད་ལ་སྣེ་ཁྲིད་བྱེད་པ་དང་། སྒྱུར་བཅོས་ཀྱི་འགན་འཁྲི་དང་། སྒྱུར་བཅོས་ཀྱི་ཁ་ཕྱོགས། སྒྱུར་བཅོས་ཀྱི་དམིགས་འབེན། སྒྱུར་བཅོས་ཀྱི་ཐབས་ཇུས། སྒྱུར་བཅོས་ཀྱི་སྒུལ་ཤུགས། སྒྱུར་བཅོས་ཀྱི་བྱེད་ཐབས་སོགས་ཀྱི་ཐད་མ་ལག་ལྡན་པའི་སྒོ་ནས་རྒྱས་བཤད་གནང་སྟེ། ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱ་རྒྱུའི་སྐོར་གྱི་བསམ་བློ་གསར་པ་དང་། ལྟ་བ་གསར་པ། ཆོད་གཏམ་གསར་པ་བཅས་རབ་དང་རིམ་པ་བཏོན་ནས་དུས་རབས་གསར་པར་དར་ཆ་གང་འདྲ་ཞིག་བསྒྲེང་དགོས་པ་དང་། འགྲོ་ལམ་གང་འདྲ་ཞིག་ཐོག་བསྐྱོད་དགོས་པ། ཕྱོགས་ཡོངས་ནས་སྒྱུར་བཅོས་ཟབ་སྤེལ་བྱེད་དགོས་དོན་ཅི་ཡིན་པ། ཕྱོགས་ཡོངས་ནས་སྒྱུར་བཅོས་ཟབ་སྤེལ་ཇི་ལྟར་བྱེད་དགོས་པ་སོགས་ཀྱི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་ལ་ཚན་རིག་དང་མཐུན་པར་ལན་འདེབས་པ་དང་། ལག་ལེན་གསར་པར་མཛུབ་སྟོན་དང་འཕོ་འགྱུར་གསར་པར་སྣེ་ཁྲིད་བྱེད་པའི་ནང་བདེན་དོན་གྱི་སྟོབས་ཤུགས་དང་ལག་ལེན་གྱི་སྟོབས་ཤུགས་ཆེན་པོ་མངོན་ཡོད་ལ། ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་པར་བསམ་བློའི་མཚོན་ཆ་སྟོབས་ཆེན་ཞིག་ཀྱང་མཁོ་འདོན་བྱས་ཡོད།
ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་དགོས་ན་ངེས་པར་དུ་བདེན་སྲུང་གསར་གཏོད་ཀྱི་རྩ་དོན་གལ་ཆེན་སྟངས་འཛིན་ནན་པོ་དང་ཐོག་མཐའ་བར་གསུམ་དུ་བརྟན་སྲུང་བྱེད་དགོས།
བདེན་སྲུང་གསར་གཏོད་ནི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དུས་རབས་གསར་པའི་རྣམ་པ་མངོན་གསལ་དོད་པོ་ཞིག་ཡིན་ལ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་མཚོན་རྟགས་མངོན་གསལ་དོད་པོ་ཞིག་ཀྱང་ཡིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བདེན་སྲུང་གསར་གཏོད་ལ་དམིགས་ནས་རྒྱས་བཤད་གལ་ཆེན་རབ་དང་རིམ་པ་གནང་ཡོད།
——སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་དོན། “ངས་བདེན་སྲུང་གསར་གཏོད་བྱེད་དགོས་ཞེས་བཏོན་པ་སྟེ། བཀག་སྡོམ་རེངས་གྱུར་གྱི་ལམ་རྙིང་དུ་སྐྱོད་མི་རུང་ལ། དར་ཆ་བརྗེ་སྒྱུར་གྱི་ལོག་ལམ་དུའང་སྐྱོད་མི་རུང་། ལམ་འདི་གཉིས་ཀ་ནི་འཆི་ལམ་ཡིན་ཞེས་ནན་བཤད་བྱས་པ་ཡིན།” “ཏང་གི་ཕྱོགས་ཡོངས་ནས་འགོ་ཁྲིད་བྱ་རྒྱུ་རྒྱུན་འཁྱོངས་དང་། མར་ཁེ་སིའི་རིང་ལུགས་རྒྱུན་འཁྱོངས། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས། མི་དམངས་དམངས་གཙོའི་སྲིད་དབང་སྒེར་འཛིན་རྒྱུན་འཁྱོངས་བཅས་བྱས་ཏེ། སྤྱི་ཚོགས་ཀྱི་དྲང་སྙོམས་དྲང་གཞག་ལ་སྐུལ་འདེད་གཏོང་བ་དང་མི་དམངས་ཀྱི་བསོད་བདེ་ཆེ་རུ་གཏོང་རྒྱུ་དེ་འགོ་འཛུགས་ས་དང་དོན་ལ་བབས་སར་བྱེད་དགོས། དེ་དག་ཚང་མ་ནི་རྩ་བ་དང་། ཁ་ཕྱོགས། ཕུགས་རིང་བཅས་ལ་ཕན་པ་ཞིག་ཡིན་ལ། ཏང་གི་ངོ་བོ་དང་དམིགས་ཡུལ་མཚོན་པ་དང་། རང་རྒྱལ་གྱི་རྒྱལ་ཁབ་ཀྱི་གནས་ཚུལ་དང་མཐུན་པ། མི་དམངས་ཀྱི་རྩ་བའི་ཁེ་ཕན་དང་མཐུན་པ་བཅས་ཡིན་པས། དུས་གང་ཞིག་དང་གནས་ཚུལ་གང་འདྲ་ཞིག་གི་འོག་ཏུའང་གཡོ་འགུལ་སྤུ་ཙམ་ཡང་གཏོང་མི་རུང་།” “འཛམ་གླིང་ནི་སྐད་ཅིག་རེ་རེ་བཞིན་དུ་འགྱུར་ལྡོག་འགྲོ་བཞིན་ཡོད་པ་དང་། ཀྲུང་གོ་ཡང་སྐད་ཅིག་རེ་རེ་བཞིན་དུ་འགྱུར་ལྡོག་འགྲོ་བཞིན་ཡོད་པས། ང་ཚོས་རིགས་པའི་གཞུང་ལུགས་ཀྱི་ཐད་དུ་ངེས་པར་དུ་དུས་རབས་ཀྱི་རྗེས་ཟིན་དགོས་ཤིང་། རྒྱུན་ཆད་མེད་པར་ཆོས་ཉིད་ངོས་འཛིན་བྱེད་པ་དང་། རིགས་པའི་གཞུང་ལུགས་གསར་གཏོད་དང་། ལག་ལེན་གསར་གཏོད། ལམ་ལུགས་གསར་གཏོད། རིག་གནས་གསར་གཏོད་བཅས་དང་དེ་བཞིན་ཕྱོགས་གཞན་དག་གི་གསར་གཏོད་ལ་སྐུལ་འདེད་རྒྱུན་ཆད་མེད་པར་གཏོང་དགོས།”
——སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་དོན། “ང་ཚོས་སྒྲུབ་བཞིན་པ་ནི་སྔོན་ཆད་བསྒྲུབས་མྱོང་མེད་པའི་བྱ་གཞག་རླབས་པོ་ཆེ་ཡིན། བདེན་སྲུང་བྱས་ན་ད་གཟོད་ཁ་ཕྱོགས་མི་ནོར་བ་དང་རྩ་སློག་རང་བཞིན་གྱི་ནོར་འཁྲུལ་མི་འབྱུང་ལ། གསར་གཏོད་བྱས་ན་ད་གཟོད་དུས་རབས་ལ་སྟངས་འཛིན་དང་དུས་རབས་ལ་ཁྲིད་སྟོན་བྱེད་ཐུབ།” “ང་ཚོས་འགྲོ་ལམ་གྱི་གདེང་ཚོད་དང་། རིགས་པའི་གཞུང་ལུགས་ཀྱི་གདེང་ཚོད། ལམ་ལུགས་ཀྱི་གདེང་ཚོད། རིག་གནས་ཀྱི་གདེང་ཚོད་བཅས་བརྟན་པོ་འཆང་དགོས་ཞེས་ནན་བཤད་བྱེད་པ་ནི་རང་སྒོ་རང་གིས་བཀག་ནས་བརྩོན་མེད་བཏང་སྙོམས་གཏོང་དགོས་ཟེར་བ་མ་ཡིན་པར། ང་ཚོས་ངེས་པར་དུ་རྒྱུན་ཆད་མེད་པར་གསར་རྙེད་དང་། གསར་གཏོད། གསར་སྐྲུན། མདུན་སྐྱོད་བཅས་གང་ནུས་བྱས་ཏེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ལ་ནམ་ཡང་སྐྱེ་སྟོབས་ཀྱི་དཔལ་འབར་བ་བྱེད་དགོས་པ་དེ་ཡིན། དེ་དང་ཆབས་ཅིག་ང་ཚོས་དུས་ནམ་ཡང་བརྗེད་མི་རུང་བ་ཞིག་ནི། ང་ཚོས་འཐུས་ཚང་བཟོ་བ་དང་ལེགས་བཅོས་བྱེད་པ་ཐམས་ཅད་གཏན་འཁེལ་ཟིན་པའི་ཁ་ཕྱོགས་སུ་མུ་མཐུད་བསྐྱོད་རྒྱུ་ཡིན་པ་ལས་ཁ་ཕྱོགས་བསྒྱུར་རྒྱུ་མ་ཡིན་ལ། ང་ཚོའི་ཏང་དང་རྒྱལ་ཁབ་དང་མི་དམངས་བཅས་ཀྱི་ཆགས་ས་རྟེན་སའི་གཞི་མ་ཡལ་བར་འདོར་རྒྱུ་ནི་དེ་བས་ཀྱང་མ་ཡིན།”
——སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ནན་གསུང་གནང་དོན། “བདེན་སྲུང་དང་གསར་གཏོད་གཉིས་ཕན་ཚུན་གཅིག་གྱུར་ཡོང་རྒྱུ་རྒྱུན་འཁྱོངས་བྱེད་དགོས།” “བདེན་སྲུང་བྱས་ན་གཞི་ནས་གསར་གཏོད་ཉིད་ཐོག་མཐའ་བར་གསུམ་དུ་ཡང་དག་པའི་ཁ་ཕྱོགས་སུ་མདུན་སྐྱོད་ཡོང་རྒྱུ་འགན་ལེན་བྱེད་ཐུབ་པ་དང་། རྒྱུན་མཐུད་གསར་གཏོད་བྱས་ན་གཞི་ནས་བདེན་སྲུང་སྔར་བས་ཡག་པོ་བྱས་ཐུབ།” “བདེན་སྲུང་བྱས་ན་མར་ཁེ་སིའི་རིང་ལུགས་དང་སྤྱི་ཚོགས་རིང་ལུགས་ལས་ཁ་ཕྱོགས་འཛོལ་མི་རུང་། འོན་ཀྱང་གྲུ་རྟགས་ཤུལ་དུ་རལ་གྲི་འཚོལ་བ་མ་ཡིན་པར་ད་དུང་མདུན་དུ་སྐྱོད་པ་དང་དུས་བསྟུན་མདུན་སྐྱོད་བྱེད་དགོས། དེ་ལྟར་མ་བྱས་ན་རེངས་པོ་དང་། རྙིང་པ། དུས་ལས་ཡོལ་བ་བཅས་སུ་འགྱུར་ངེས་རེད།”
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བདེན་སྲུང་གསར་གཏོད་སྐོར་གྱི་རྒྱས་བཤད་གལ་ཆེན་གྱིས་གང་ཞིག་བདེན་སྲུང་གསར་གཏོད་ཡིན་པ་དང་། བདེན་སྲུང་གསར་གཏོད་བྱེད་དགོས་དོན་གང་ཡིན་པ། ཇི་ལྟར་བྱས་ན་བདེན་སྲུང་གསར་གཏོད་བྱེད་ཐུབ་པ་སོགས་ཀྱི་རིགས་པའི་གཞུང་ལུགས་དང་ལག་ལེན་གྱི་གནད་དོན་གལ་ཆེན་ལ་ལན་གཏིང་ཟབ་བཏབ་ཡོད། ཐེངས་འདིའི་འཛིན་གྲྭའི་སློབ་ཚུགས་མཛད་སྒོའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བདེན་སྲུང་གསར་གཏོད་བྱ་རྒྱུ་དེ་ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་པར་ངེས་པར་དུ་སྟངས་འཛིན་ནན་པོ་དང་ཐོག་མཐའ་བར་གསུམ་དུ་བརྟན་སྲུང་བྱེད་དགོས་པའི་རྩ་དོན་གལ་ཆེན་གྱི་མཐོ་ཚད་ཐོག་མཐོར་འདེགས་བཏང་ནས་འགྲེལ་བཤད་གཏིང་ཟབ་གནང་ཞིང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ལུགས་མུ་མཐུད་དུ་འཐུས་ཚང་དང་འཕེལ་རྒྱས་སུ་གཏོང་བ་དང་། རྒྱལ་ཁབ་ཀྱི་བཅོས་སྐྱོང་མ་ལག་དང་བཅོས་སྐྱོང་ནུས་པ་དེང་རབས་ཅན་དུ་འགྱུར་བའི་སྒྱུར་བཅོས་ཀྱི་སྤྱིའི་དམིགས་འབེན་རྒྱུན་འཁྱོངས་བྱས་ཏེ། ཐོག་མཐའ་བར་གསུམ་དུ་སྤྱིའི་དམིགས་འབེན་གྱིས་མཛུབ་ཁྲིད་བྱེད་པའི་ཁ་ཕྱོགས་དེད་ནས་མདུན་དུ་སྐྱོད་པ་དང་། སྒྱུར་བཅོས་བྱེད་དགོས་རིགས་མཐའ་གཅིག་ཏུ་སྒྱུར་བཅོས་བྱེད་པ་དང་སྒྱུར་བཅོས་བྱེད་མི་དགོས་རིགས་སྒྱུར་བཅོས་མི་བྱེད་པའི་ནན་གསུང་གནང་། དུས་རབས་འཕེལ་རྒྱས་ཀྱི་འཕེལ་ཕྱོགས་གསར་པ་དང་། ལག་ལེན་འཕེལ་རྒྱས་ཀྱི་བླང་བྱ་གསར་པ། མི་དམངས་མང་ཚོགས་ཀྱི་རེ་ལྟོས་གསར་པ་བཅས་དང་བསྟུན་ནས་དཔལ་འབྱོར་སྒྲིག་སྲོལ་སྒྱུར་བཅོས་ཞེས་པའི་གཙོ་གནད་འདི་མངོན་གསལ་དོད་པོ་ཡོང་བར་བྱས་ཏེ། ཕྱོགས་སོ་སོའི་སྒྱུར་བཅོས་ཕྱོགས་ཡོངས་ནས་མཐུན་སྦྱོར་ངང་སྐུལ་འདེད་གཏོང་བ་དང་། རིགས་པའི་གཞུང་ལུགས་གསར་གཏོད་དང་། ལག་ལེན་གསར་གཏོད། ལམ་ལུགས་གསར་གཏོད། རིག་གནས་གསར་གཏོད་དང་དེ་བཞིན་ཕྱོགས་གཞན་དག་གི་གསར་གཏོད་བཅས་ལ་སྐུལ་འདེད་ཤུགས་ཆེར་བཏང་སྟེ་ཀྲུང་གོའི་ལུགས་ཀྱི་དེང་རབས་ཅན་ལ་སྒུལ་ཤུགས་ཆེན་པོ་དང་ལམ་ལུགས་ཀྱི་འགན་སྲུང་མཁོ་འདོན་བྱེད་དགོས།
“བྱ་བ་གང་བསྒྲུབ་པར་བསྲུང་བྱའི་ཁྲིམས་ཡོད་ཚེ་ད་གཟོད་འགྲུབ་པའི་ངེས་པ་ལྡན།” སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་འཛིན་གྲྭའི་འགོ་ཚུགས་མཛད་སྒོའི་ཐོག་གི་རྒྱས་བཤད་དུམ་བུ་འདིས་མི་རྣམས་ལ་བསམ་གཞིག་གཏིང་ཟབ་བྱེད་དགོས་པ་ཞིག་ཏུ་ཆགས་ཡོད།
“མི་ལ་ལས་བཤད་པར། དུས་སྐབས་འདི་ལ་སླེབས་ཡོད་རུང་། ད་དུང་ཆུ་ལ་དཔགས་ནས་རབ་བརྒལ་བ་འདི་བག་འཁུམ་དང་སྙིང་ཆུང་ཞིག་མ་རེད་དམ།”
“རྒྱུས་མངའ་ཆེ་བའི་སྒྱུར་བཅོས་ནི་ཆུ་རྐྱལ་རྫིང་བུ་དང་འདྲ་སྟེ། ཐིག་རྟགས་ཡོད་པས་གང་ཞིག་ཆུ་སྲབ་ས་དང་གང་ཞིག་ཆུ་ཟབ་ས་ཕར་བལྟས་ཙམ་གྱིས་གོ་ཐུབ། ཡིན་ན་ཡང་དྲག་ཏུ་རྒྱུག་པའི་གཙང་པོའི་ནང་ཆུ་ལ་དཔགས་ནས་རབ་བརྒལ་དགོས་པ་མིན་ནམ། སྒྱུར་བཅོས་སྒོ་འབྱེད་བྱས་ནས་ལོ་ངོ་བཅུ་ཕྲག་འགའ་སོང་ཡོད་པས། ད་ལྟ་གནད་དོན་གང་ཡིན་པ་གསལ་པོ་ཤེས་ཡོད་ཅེས་ཟེར་བ་མིན། གལ་ཏེ་ཚང་མ་གསལ་པོར་ཤེས་ན་ད་དུང་སྒྱུར་བཅོས་བྱས་ནས་ཅི་བྱེད།”
སྐད་ཆ་འདིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྒྱུར་བཅོས་བརྟག་ཐབས་སྨྲ་བར་ཐོག་མར་ཉིད་ནས་ཚད་མཐོའི་མཐོང་ཆེན་གནང་བ་མཚོན་གྱི་ཡོད། སྒྱུར་བཅོས་ནི་མ་ལག་ལྡན་པའི་ལས་གྲྭ་ཞིག་ཡིན་པས། ཚན་རིག་དང་མཐུན་པའི་བྱེད་ཐབས་ལ་དང་དོད་བྱེད་དགོས། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་སྒྱུར་བཅོས་བྱེད་ཐབས་གལ་ཆེན་300ལྷག་ཙམ་བཏོན་པའི་ནང་དཔལ་འབྱོར་དང་། ཆབ་སྲིད། རིག་གནས། སྤྱི་ཚོགས། སྐྱེ་ཁམས་དཔལ་ཡོན་བཅས་དང་ཏང་འཛུགས་སྐྲུན་སོགས་ཁྱབ་ཁོངས་སོ་སོ་འདུས་ཡོད། ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱ་རྒྱུའི་ལས་འགན་ནི་སྣེ་མང་རྙོག་འཛིང་ལྡན་པ་ཞིག་ཡིན་པས། དོན་འཁྱོལ་ཡག་པོ་འཛིན་པ་དང་བདེ་བླག་ངང་སྐུལ་འདེད་གཏོང་དགོས་ན། ངེས་པར་དུ་ཕྱོགས་སོ་སོའི་འབྲེལ་བ་ཐག་གཅོད་ཡག་པོ་བྱེད་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མ་འོངས་པའི་སྒྱུར་བཅོས་ནང་གཙོ་གནད་དུ་ཐག་གཅོད་ལེགས་པོ་བྱེད་དགོས་པའི་“འབྲེལ་བ་ཆ་བཞི་”གསལ་བཤད་གཏིང་ཟབ་གནང་བ་སྟེ།
——སྒྱུར་བཅོས་དང་ཁྲིམས་སྐྱོང་ཕན་ཚུན་གཅིག་གྱུར་ཡོང་རྒྱུ་རྒྱུན་འཁྱོངས་བྱེད་དགོས། སྒྱུར་བཅོས་ཀྱི་ནུས་པར་བརྟེན་ནས་ཁྲིམས་སྐྱོང་འཐུས་སྒོ་ཚང་དུ་གཏོང་བ་དང་ཁྲིམས་སྐྱོང་ཁྱབ་ཁོངས་ཀྱི་སྒྱུར་བཅོས་སྔར་བས་ཟབ་སྤེལ་བྱས་ཏེ་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་རྒྱུན་ཆད་མེད་པར་འཐུས་སྒོ་ཚང་དུ་གཏོང་དགོས། སྒྱུར་བཅོས་ཀྱི་འགོག་རྐྱེན་སེལ་བ་དང་སྒྱུར་བཅོས་ཀྱི་གྲུབ་འབྲས་སྲ་བརྟན་དུ་གཏོང་བའི་ནང་ཁྲིམས་སྐྱོང་གི་དགེ་མཚན་ལྡན་པའི་ནུས་པ་སྔར་བས་འདོན་སྤེལ་གང་ལེགས་བྱེད་པ་དང་། ཁྲིམས་སྐྱོང་གི་བསམ་གཞིག་དང་ཁྲིམས་སྐྱོང་གི་བྱེད་ཐབས་སྤྱོད་མཁས་པོས་སྒྱུར་བཅོས་ལ་སྐུལ་འདེད་བཏང་སྟེ། སྒྱུར་བཅོས་གལ་ཆེན་ལ་ཁྲིམས་ཀྱི་གཞི་འཛིན་ས་ཡོད་པར་བྱེད་པ་དང་སྤྱི་དམངས་དང་ཁྲིམས་མི་ཡོངས་རྫོགས་ཀྱི་ཁྲིམས་མཐུན་ཁེ་དབང་འདྲ་མཉམ་ངང་སྲུང་སྐྱོབ་བྱེད་དགོས།
——གཏོར་འཛུགས་གཉིས་རྩོད་སྒྲུབ་གཅིག་གྱུར་ཡོང་རྒྱུ་རྒྱུན་འཁྱོངས་བྱེད་དགོས། གཏོར་འཛུགས་མཉམ་འཛིན་དང་། སྔོན་འཛུགས་རྗེས་གཏོར། འཛུགས་དགོས་རིགས་ཧུར་བརྩོན་དང་རང་འགུལ་གྱིས་འཛུགས་པ་དང་། གཏོར་དགོས་རིགས་འཛུགས་པའི་རྨང་གཞིའི་སྟེང་དུས་ཐོག་ཏུ་གཏོར་བ། གཏོར་འཛུགས་གཅིག་གྱུར་ནང་སྒྱུར་བཅོས་ཀྱི་གོམ་པ་མྱུར་བགྲོད་ཡོང་བ་བཅས་བྱེད་དགོས།
——སྒྱུར་བཅོས་དང་སྒོ་འབྱེད་ཕན་ཚུན་གཅིག་གྱུར་ཡོང་རྒྱུ་རྒྱུན་འཁྱོངས་བྱེད་དགོས། ལམ་ལུགས་ཅན་གྱི་སྒོ་འབྱེད་བརྟན་པོའི་ངང་རྒྱ་སྐྱེད་གཏོང་བ་དང་རང་འགུལ་ངང་རྒྱལ་སྤྱིའི་ཚད་གཞི་མཐོ་བའི་དཔལ་འབྱོར་ཉོ་ཚོང་སྒྲིག་སྲོལ་དང་སྦྲེལ་མཐུད་བྱས་ཏེ། ཕྱི་ཕྱོགས་ཉོ་ཚོང་དང་། ཕྱི་རྒྱལ་ཚོང་པའི་དངུལ་འཇོག །ཕྱི་ཕྱོགས་དངུལ་འཇོག་བཅས་ཀྱི་དོ་དམ་སྒྲིག་སྲོལ་སྒྱུར་བཅོས་ཟབ་སྤེལ་བྱས་ནས་ཚོང་ར་ཅན་དང་། ཁྲིམས་སྐྱོང་ཅན། རྒྱལ་སྤྱི་ཅན་བཅས་ཀྱི་ཚོང་གཉེར་ཁོར་ཡུག་རྩེ་གྲ་གཏོད་དགོས།
——བཀོད་སྒྲིག་དང་དོན་འཁྱོལ་གྱི་འབྲེལ་བ་ཐག་གཅོད་ཡག་པོ་བྱེད་དགོས། སྒྱུར་བཅོས་ཀྱི་ཇུས་གཞིའི་ཇུས་འགོད་བྱེད་པར་ངེས་པར་དུ་ཕྱི་རོལ་ཡུལ་གྱི་ཆོས་ཉིད་སྟངས་འཛིན་བྱེད་པ་དང་། སྒྱུར་བཅོས་བྱེད་ཐབས་ཁག་གི་མཐུན་སྦྱོར་མ་ལག་ལ་མཐོང་ཆེན་བྱེད་པ། སྒྱུར་བཅོས་ཁ་ཕྱོགས་ཀྱི་གཅིག་མཐུན་རང་བཞིན་ཆེ་རུ་གཏོང་བ། འགན་འཁྲི་ཁ་གསལ་དང་། འབྲེལ་ཐག་ཆ་ཚང་། གཅིག་ལ་གཅིག་འབྲེལ་བཅས་ཀྱི་ལས་ཀའི་ལམ་སྲོལ་འཛུགས་པ་དང་ཆ་ཚང་དུ་གཏོང་བ། ཕན་འབྲས་རྗེས་སྙེག་འདྲི་རྟོག་ལ་ཤུགས་རྒྱག་པ་བཅས་བྱས་ནས་སྒྱུར་བཅོས་བྱེད་ཐབས་དོན་འཁྱོལ་ཞིབ་ཕྲ་དང་དོན་ཐོག་ཏུ་འཁྱོལ་བར་སྐུལ་འདེད་གཏོང་དགོས།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྒྱས་བཤད་གཏིང་ཟབ་མོའི་སྒོ་ནས་ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་པའི་འཐབ་ཇུས་བཀོད་སྒྲིག་དེ་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་སྟོབས་ཤུགས་ཆེན་པོ་ཞིག་ཏུ་འགྱུར་བ་བྱེད་པར་བྱེད་ཐབས་ཀྱི་མཛུབ་སྟོན་དང་ལག་ལེན་གྱི་ཕྱོགས་སྟོན་མཁོ་འདོན་བྱས་ཡོད།
ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་པར་“འགག་རྩའི་ཉུང་ཤས་”ཀྱི་འགག་རྩའི་ནུས་པ་འདོན་སྤེལ་བྱེད་དགོས། འགོ་ཁྲིད་ལས་བྱེད་པ་དང་ལྷག་པར་དུ་མཐོ་རིམ་ལས་བྱེད་པས་ལས་འགན་གལ་ཆེན་འཁུར་ཡོད་པས་སྒྱུར་བཅོས་ཀྱི་སྐུལ་འདེད་པ་བྱེད་དགོས་ལ། སྒྱུར་བཅོས་ཀྱི་ལག་ལེན་པ་ཡང་བྱེད་དགོས། ཆབ་སྲིད་ཀྱི་འགན་འཁྲི་འཁུར་སེམས་དང་ལོ་རྒྱུས་ཀྱི་ལས་འགན་སྒྲུབ་སེམས་ཆེ་རུ་སྐྱེད་པ་དང་། འགག་སྒྲོལ་དཀའ་སེལ་དང་དཀའ་ངལ་ལ་མི་འཛེམ་པར་མདུན་དུ་སྐྱོད་པའི་ཆབ་སྲིད་ཀྱི་བློ་སྟོབས་ལ་བརྟེན་ནས་འགལ་བ་དང་གནད་དོན་ལ་ཁ་གཏད་འཇལ་བར་གཡོལ་ཐབས་མི་བྱེད་པ་དང་། གནད་དོན་རྙིང་པ་སེལ་བར་ཐེ་ཚོམ་མི་ཟ་བ། ཉེན་ཁ་དང་འགྲན་སློང་ལ་ཁ་གཏད་འཇལ་ཚེ་ཕྱིར་བཤོལ་མི་བྱེད་པ་བཅས་བྱས་ཏེ་ནུས་ཤུགས་ཡོད་རྒུས་སྒྱུར་བཅོས་དང་འཕེལ་རྒྱས་ཀྱི་གནམ་ས་གསར་པ་འབྱེད་དགོས། ཚན་རིག་དང་མཐུན་པའི་བྱེད་ཐབས་སྤྱོད་མཁས་པོ་བྱས་ཏེ་སྒྱུར་བཅོས་ལ་སྐུལ་འདེད་གཏོང་བ་དང་། མ་ལག་ལྡན་པའི་སྒོ་ནས་བཀོད་སྒྲིག་བྱེད་པ། ཇུས་འགོད་བྱས་ནས་སྒྲུབ་པ་བཅས་བྱེད་དགོས།
“ཁྱུང་ཆེན་མཁའ་ལ་ལྡིང་བ་ནི་གཤོག་སྒྲོ་གཅིག་ལ་བརྟེན་པ་མིན། གྱི་ལིང་བང་འགྲོས་མྱུར་བ་ནི་སུག་པ་གཅིག་ལ་བརྟེན་པ་མིན།” ཞེས་གསུངས་པ་ལྟར། ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱེད་པར་ངོས་འཛིན་གཅིག་མཐུན་ཁྱབ་ཆེན་པོའི་ངང་ཕྱོགས་བསྡུ་བྱེད་པ་དང་མཐུན་རྐྱེན་ཡོད་ཚད་སྐུལ་སློང་གང་ལེགས་བྱེད་དགོས། དེ་ནི་སྒྱུར་བཅོས་བདེ་བླག་ངང་མདུན་དུ་སྤེལ་བར་གལ་འགངས་ཧ་ཅང་ཆེ་བ་རེད། སྒྱུར་བཅོས་གླེང་ཕྱོགས་ཀྱི་ཁྲིད་སྟོན་ལས་ཀ་ཏན་ཏིག་ངང་ཡག་པོ་བསྒྲུབས་ནས་དྲང་ཕྱོགས་ཀྱི་དྲིལ་བསྒྲགས་ལ་ཤུགས་རྒྱག་པ་དང་། དབྱངས་རྟ་གཙོ་བོའི་སྐད་གསང་མཐོ་རུ་གཏོང་བ། དྲང་ནུས་བརྒྱུད་སྤྲོད་བྱེད་པ་བཅས་དགོས། ཚང་འཛོམས་གྲོས་ཚོགས་ཀྱི་《ཆོད་དོན་》ནང་བཏོན་པའི་རིགས་པའི་གཞུང་ལུགས་ཀྱི་ལྟ་བ་གལ་ཆེན་ལ་ཞིབ་འཇུག་དང་འགྲེལ་བཤད་རྒྱག་ཤུགས་ཆེ་རུ་གཏོང་བ་དང་། ལྷག་པར་དུ་གཞི་རིམ་དང་མང་ཚོགས་ལ་ཁ་ཕྱོགས་པའི་དྲིལ་བསྒྲགས་དང་འགྲེལ་བཤད་རྒྱག་པར་ཤུགས་བརྒྱབ་སྟེ་དུས་ཐོག་ཏུ་དོགས་གནད་གསལ་འགྲེལ་དང་། སྤྱི་ཚོགས་ཀྱི་དོ་ཁུར་ལ་ཨ་ལན་སློག་པ། ངོས་འཛིན་གཅིག་མཐུན་ཁྱབ་ཆེན་པོའི་ངང་ཕྱོགས་བསྡུ་བཅས་བྱས་ནས་ཏང་ཡོངས་དང་སྤྱི་ཚོགས་ཡོངས་ཀྱིས་ཐུན་མོང་ཐོག་སྒྱུར་བཅོས་དམ་འཛིན་བྱེད་པའི་བསམ་བློའི་རྨང་གཞི་དང་མང་ཚོགས་ཀྱི་རྨང་གཞི་བརྟན་དུ་གཏོང་དགོས། ལས་བྱེད་པ་དང་མང་ཚོགས་ལ་ཁྱོན་ཡོངས་ཀྱི་འདུ་ཤེས་ཆེ་རུ་སྐྱེད་པར་ཁྲིད་སྟོན་བྱས་ཏེ་སྒྱུར་བཅོས་ནང་གི་ཁེ་ཕན་གྱི་འབྲེལ་བ་ལེགས་སྒྲིག་དང་སྒེར་གྱི་ཁེ་གྱོང་ལ་ལྟ་སྟངས་ཡང་དག་འཛིན་དུ་འཇུག་དགོས།
དད་མོས་དང་། དད་སེམས། ཡིད་ཆེས་གསུམ་ནི་དུས་ནམ་ཡང་གལ་འགངས་ཆེན་པོ་ཡིན། ཆུང་བ་མི་ཞིག་དང་ཚོགས་པ་ཞིག་ནས་ཆེན་པོ་སྲིད་ཏང་ཞིག་དང་མི་རིགས་ཤིག་དང་རྒྱལ་ཁབ་ཅིག་གང་ཡིན་རུང་དེ་ལ་དད་མོས་དང་དད་སེམས། ཡིད་ཆེས་གསུམ་ཡོད་ན། ཇི་ཙམ་ཕམ་ཉེས་བྱུང་ན་དེ་ཙམ་གྱིས་འཐབ་འབད་བྱེད་པ་དང་། ཇི་ཙམ་གཡུལ་འཐབ་ན་དེ་ཙམ་གྱིས་དཔའ་ངར་རྒྱས་ངེས་རེད། དེ་ལྟར་མ་ཡིན་ན་མ་འཐབ་རང་ཕམ་དུ་འགྱུར་བ་དང་མ་བརྒྱབ་རང་འགྱེལ་དུ་འགྲོ་ངེས་རེད།
“ཀྲུང་གོའི་སྒྱུར་བཅོས་སྒོ་འབྱེད་ཀྱི་ལམ་བུར་རྒྱལ་ཁ་འཐོབ་ངེས་ཡིན་པའི་དད་སེམས་བརྟན་པོ་སྐྱེད་དགོས།” ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་མ་འཚོག་གོང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྲན་ཏུང་དུ་རྟོག་ཞིབ་གནང་སྐབས་སེམས་འགུལ་ཐེབས་པའི་ངང་“ང་ཚོ་ཚང་མ་ནི་འབད་འཐབ་བྱེད་མཁན་ཡིན། སྔོན་ཆད་ནས་ད་ལྟའི་བར་འབད་འཐབ་བྱེད། འོད་སྟོང་ལྡན་པའི་གྲུབ་འབྲས་དེ་འདྲ་ཐོབ་ཡོད། ང་ཚོའི་མ་འོངས་པའི་དམིགས་འབེན་ནི་ཧ་ཅང་གསལ་ལ་རླབས་ཆེ་བ་ཞིག་ཡིན་པས། དེ་མངོན་འགྱུར་བྱེད་དགོས་ན་ང་ཚོས་ད་དུང་མུ་མཐུད་དུ་དངོས་སྒྲུབ་འབད་འཐབ་ལ་བརྟེན་དགོས། ཡིད་ཆེས་དང་གདེང་ཚོད་ཡོད་པའི་སྒོ་ནས་ང་ཚོས་ཐུན་མོང་ཐོག་འབད་བརྩོན་བྱེད་དགོས།”
བསྐྱོད་མྱོང་བའི་ལམ་བུ་བརྗེད་མི་རུང་ལ། མདུན་སྐྱོད་ཀྱི་ལམ་བུར་ཡག་པོ་སྐྱོད་དགོས། ལོ་རྒྱུས་ཀྱི་འགོ་འཛུགས་ས་གསར་པའི་ཐོག་ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱེད་པ་དང་། སྒྱུར་བཅོས་ཀྱི་བྱེད་ཐབས་ཁག་གནད་ལ་འཁེལ་བའི་ངང་དོན་འཁྱོལ་དང་ཕན་འབྲས་ཐོན་པར་སྐུལ་འདེད་གཏོང་དགོས། གསར་གཏོད་རང་བཞིན་ལྡན་པའི་སྒོ་ནས་སྒྱུར་བཅོས་ལས་འགན་དོན་འཁྱོལ་ཡག་པོ་བྱེད་པ་དང་། ཕྱོགས་ཡོངས་ནས་སྒྱུར་བཅོས་སྔར་བས་ཟབ་སྤེལ་བྱ་རྒྱུ་བརྟན་པོའི་ངང་རྒྱང་རིང་དུ་བསྐྱོད་དེ། ཀྲུང་གོའི་ལུགས་ཀྱི་དེང་རབས་ཅན་གྱིས་ཕྱོགས་ཡོངས་ནས་རྒྱལ་ཁབ་སྟོབས་ལྡན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེ་ཡོང་བར་སྐུལ་འདེད་གཏོང་ཆེད་ཡངས་ཤིང་རྒྱ་ཆེ་བའི་མདུན་ལམ་གཏོད་དགོས།
གནམ་ལྷ་རྒྱལ་གྱིས་བསྒྱུར།