དེའང་དཔལ་ས་སྐྱོང་སྡེ་དགེ་རྒྱལ་པོ་རིམ་བྱོན་གྱི་རྣམ་ཐར་དགེ་ལེགས་ནོར་བུའི་ཕྲེང་བ་སོགས་ལས། ཀུ་སེ་དང་། སྤོ་ལུ་སྔོན་གོ་འཇོ་དཔོན་མོའི་ཁོངས་གཏོགས་ཞིག་ཡིན་པ་བླ་ཆེན་བྱམས་པ་ཕུན་ཚོགས་སྐབས་ནས་སྡེ་དགེའི་ཁོངས་སུ་བསྡུས་ཞེས་པ་དང་། ཡང་བཀའ་ཤོག་རྙིང་པ་ཞིག་ལས།“མདོ་ཁམས་ས་ཡི་ལྟེ་བ། འོད་གསལ་ལྷའི་གདུང་རྒྱུད་བར་མ་ཆད་པའི་ས་སྐྱོང་སྡེ་དགེའི་མངའ་འབངས་སུ་གཏོགས་པའི་འབྲི་རྒྱུད་གསེར་ལྡན་མའི་གཡས་ཕྱོགས་མདོ་ཁམས་ཟལ་མོ་སྒང་གི་ཆར་གཏོགས་གཉུག་མ་གནས་པ། སྔོན་གོམས་བསོད་ནམས་ཀྱི་མཐུ་དང་། ལོ་པཎ་སྐྱེས་མཆོག་རྒྱ་མཚོའི་ཐུགས་བསྐྱེད་ཀྱི་དཔལ་ལས་ཉེ་བར་འཁྲུངས་པའི་བསྟན་པའི་གཞི་མ་ཡི་གེ་འབྲི་བརྐོས་ཀྱི་དཔལ་གྱི་འབྱོར་བའི་སྦས་རོང་ཀུ་སེ་ནས་མཁན་སློབ་ཆོས་གསུམ་གྱི་ལུགས་གཉིས་གཙང་མ།”ཞེས་འཁོད་འདུག
སྤྱིར་ཀུ་སེའི་མིང་འདི་ལ་ཀུ་སེ་དང་། ཀུ་ཚེ། སྐུ་ཚེ་ཞེས་པའི་འབྲི་ཚུལ་གསུམ་འདུག །ཀུ་སེ་ཞེས་པ་དེ་འབྲི་སྔ་ཤོས་དང་ཡོངས་གྲགས་སུ་མཐོང་བས་འདིར་ཀུ་སེ་ཞེས་གཅིག་གྱུར་བྱས་ཡོད། བོད་རང་སྐྱོང་ལྗོངས་བོད་སྐད་ཡིག་ལས་དོན་ཨུ་ཡོན་ལྷན་ཁང་གིས་སྤྱི་ལོ་༢༠༡༢ལོར་བསྒྲིགས་པའི་རྒྱ་བོད་ཤན་སྦྱར་ཐ་སྙད་གསར་བསྒྲིགས་ཞེས་པར། སྤོ་ལོ་དང་ཀུ་སེ་ཞེས་བྲིས་འདུག
ཀུ་སེ་སྤོ་ལུའི་བྱུང་རབས།
དེང་བོད་རང་སྐྱོང་ལྗོངས་ཆབ་མདོ་གྲོང་ཁྱེར་འཇོ་མདའ་རྫོང་སྤོ་ལུ་ཤང་གི་མངའ་ཁོངས་སུ་གནས་ཤིང་། རྒྱུན་སྡོད་མི་གྲངས་ལས་གཙོ་བོ་བོད་རིགས་ཡིན་ལ། བོད་ཡིག་དང་བོད་སྐད་བེད་སྤྱོད་བཞིན་ཡོད། ལོ་རྒྱུས་ཐོག་འཇོ་མདའ་ས་ཁུལ་ལ་འཕོ་འགྱུར་མང་པོ་བྱུང་ཡོད་པ་སྟེ། ༡༩༠༩ལོར་སྡེ་དགེ་ས་སྐྱོང་སྒེར་འཛིན་ལམ་ལུགས་མེད་པར་བཟོས་རྗེས། འཇོ་མདའ་ས་ཁུལ་ནི་སི་ཁྲོན་ནུབ་རྒྱུད་འདན་ཁོག་ཧྥུའུ་登科府ཡི་ཁོངས་སུ་བསྡུས། ༡༩༡༡ལོར་ས་གནས་དེ་ཐང་ཕུག་རྫོང་དུ་བསྒྱུར་ཞིང་། ༡༩༡༩ལོར་འཇོ་མདའ་སྤྱི་ལས་ཁང་བཙུགས་པ་དང་དེ་རྗེས་འཇོ་མདའ་རྫོང་དུ་བསྒྱུར་ཡོད། ༡༩༥༩ལོའི་ཟླ་༤པར་འཇོ་མདའ་རྫོང་དང་ནུབ་འདན་ཁོག་རྫོང་གཉིས་ཟླ་སྒྲིལ་བཏང་ནས་འཇོ་མདའ་རྫོང་ཞེས་ཆེ་རུ་སོང་། ༡༩༦༠ལོ་ནས་བཟུང་འཇོ་མདའ་རྫོང་ཆུས་༦དང་ཤང་༢༦ལ་བགོས་ཏེ། སྤོ་ལུ་ནི་ཆུས་༦པ་བྱས། ༡༩༦༢ལོའི་ཟླ་༥པར། འཇོ་མདའ་རྫོང་ཆུས་༡༠དང་ཤང་༥༠རུ་བགོས་ཏེ། སྤོ་ལུ་ནི་ཆུས་༡༠པ་བྱས། ༡༩༧༠ལོའི་ཟླ་༤པར། སྤོ་ལུ་ཆུས་གསར་བརྗེའི་ཨུ་ཡོན་ལྷན་ཁང་བཙུགས། ༡༩༧༨ལོར་སྤོ་ལུ་ཆུས་གསར་བརྗེའི་ཨུ་ཡོན་ལྷན་ཁང་མེད་པར་བཟོས་ནས་སྤོ་ལུ་ཆུས་གཞུང་ལས་ཁང་ཞེས་སུ་བསྒྱུར། ༡༩༨༤ལོའི་ཟླ་༡༠པར། ཤང་གསར་བརྗེའི་ཨུ་ཡོན་ལྷན་ཁང་དང་། ཀུང་ཧྲེ། ཐོན་སྐྱེད་རུ་ཁག་སོགས་ཤང་མི་དམངས་སྲིད་གཞུང་དང་། གྲོང་མི་ཨུ་ཡོན་ལྷན་ཁང་། རང་བྱུང་གྲོང་ཚོ་བཅས་སུ་སླར་གསོ་བྱས་པ་དང་། རྫོང་ཡོངས་སུ་ཆུས་༡༠དང་ཤང་༥༨དབྱེ་སྟེ་སྤོ་ལུ་ནི་སྔ་བཞིན་ཆུས་༡༠པའི་གྲས་སུ་བཞག་ཡོད། ༡༩༨༨ལོའི་ཟླ་༤པར། འཇོ་མདའ་རྫོང་གི་ཆུས་དང་ཤང་ལེགས་སྒྲིག་བྱས་ཏེ་ཆུས་༢དང་། གྲོང་རྡལ་༡ཤང་༡༨བཅས་སུ་བགོས་ཏེ་སྤོ་ལུ་ཤང་ནི་ཤང་༡༨པའི་གྲས་སུ་བཞག་སྟེ་ཁོངས་སུ་གྲོང་མིའི་ཨུ་ཡོན་ལྷན་ཁང་༡༦ཡོད། ༢༠༡༡ལོའི་ལོ་མཇུག་ཏུ་སྤོ་ལུ་ཤང་གི་ཁོངས་སུ་ཀུ་སེ་དང་། འཕྲང་ཟམ། ཨ་དམ། ངོ་འཕེལ། ཡེ་སངས། འབྲས་ཐོག །འབམ་གོང་། ཉིང་པ་བཅས་གྲོང་ཚོ་༨་ཡོད་པ་རེད། ༢༠༢༠ལོའི་ཟླ་༦པ་ནས་ད་བར་ཁོངས་གཏོགས་སུ་གོང་ཞུས་ཀྱི་སྲིད་འཛིན་གྲོང་ཚོ་༨ཡོད།
ཀུ་སེ་སྤོ་ལུའི་ས་གཤིས་ཁོར་ཡུག
ཀུ་སེ་སྤོ་ལུ་ནི་འབྲི་ཆུའི་ཆུ་ལག་རྩོམ་ཆུའི་ངོགས་གཉིས་ཏེ་བོད་ཤར་གྱི་འཕྲེད་རྒྱུག་ས་བབས་དང་། འབྲི་ཆུའི་འབབ་རྒྱུད་གཡས་ངོགས་ལ་ཆགས་ཡོད། དེ་འཇོ་མདའ་རྫོང་གྲོང་དང་བར་ཐག་སྤྱི་ལེ་༥༠ཙམ་ཡོད། གནས་དེར་རི་གཟར་གཡང་ལྷུང་གི་ཉེན་ཁ་ཆེ་བ། ནུབ་བྱང་ནས་ཤར་ལྷོའི་ཕྱོགས་སུ་གསེག་ཚད་ཆེ་བ། རྒྱ་མཚོའི་ངོས་ལས་མཐོ་ཚད་ཆ་སྙོམས་སྨི་༣༨༠༠ཡོད་པ་དང་། མཐོ་ཤོས་སྨི་༥༣༠༠ཟིན་པ། བལྟོས་བཅས་ཀྱི་མཐོ་ཚད་མཚོ་འཕགས་སྨི་༣༡༠༠ཙམ་ཡོད། ས་མཐོའི་དྲོད་ཁུལ་གྱི་བརླན་གཤེར་ཕྱེད་པའི་རི་ཁུལ་གྱི་གནམ་གཤིས་ཁུལ་དུ་གཏོགས་པས། སྐམ་དང་ཆར་དུས་ཀྱི་དབྱེ་བ་གསལ་པོ་ཡོད་པ་དང་། གནམ་གཤིས་འཕོ་འགྱུར་མངོན་གསལ་དོད་པོ་ཡིན་པ། ཉི་འོད་ཕོག་པའི་དུས་ཚོད་རིང་བ། ལོ་རེའི་ཆར་ཆུ་ཧའོ་སྨི་༥༤༨.༥ ཙམ་དང་། འཁྱག་གྲང་ཆུང་བའི་ཉིན་༦༠ནས་༨༠བར་ཙམ་ལས་མེད་ཅིང་ཆ་སྙོམས་དྲོད་ཚད་༦℃བཅས་སོ། །
ཀུ་སེ་སྤོ་ལུའི་ཐོན་ཁུངས།
གནམ་གཤིས་ཆ་རྐྱེན་འདི་འདྲ་ཞིག་གིས་ས་གནས་དེ་གའི་ཐུན་མོང་མ་ཡིན་པའི་སྐྱེ་ཁམས་ཡུལ་ལྗོངས་བསྐྲུན་པ་དེར་ནགས་ཚལ་རྒྱ་ཆེ་ཞིང་ཡངས་པ། ཤིང་རིགས་སྣ་ཚོགས་ལས་འཁྲིས་ཤིང་ནི་ས་གནས་དེ་གའི་དམིགས་བསལ་གྱི་ཤིང་བརྐོས་པར་ལེབ་ལ་སྤྱོད་ཆོག་པའི་སྲ་སྙི་སྙོམ་ཞིང་འཛེར་མ་ཉུང་བའི་ཤིང་རིགས་ཤིག་ཡིན། འབྲི་ཆུའི་ཆུ་ལག་རྩོམ་ཆུ་ཀུ་སེ་བརྒྱུད་དེ་འབབ་པས་ཕུན་སུམ་ཚོགས་པའི་ཆུ་ནུས་ཐོན་ཁུངས་འདུས་ཤིང་། སྤོ་ལུ་གྱེའི་རོང་ཆེན་སོགས་རང་བྱུང་གི་ཡུལ་ལྗོངས་གྲུབ་ལ་གདོང་གཏད་ཀྱི་རི་རྩེ་གཉིས་སྤྲིན་ལ་ཟུག་པ་འདྲ་བ་དང་། རི་མཐིལ་གྱི་ཆུ་བོ་དྭངས་པས་ཐང་གི་མེ་ལོང་བཞིན་ལྟ་ན་སྡུག་པའོ། །
ཀུ་སེ་སྤོ་ལུ་ནི་ཞིང་འབྲོག་ཟུང་འབྲེལ་ས་ཁུལ་གྱི་ཁོངས་སུ་གཏོགས་ཏེ། ནས་དང་གྲོ་ནི་ས་གནས་དེ་གའི་འབྲུ་རིགས་ལོ་ཏོག་གཙོ་བོ་ཡིན་པ་དང་། རྟ་ནོར་ལུག་སོགས་ཕྱུགས་རིགས་ཀྱིས་ས་གནས་དེ་གའི་ཐོན་སྐྱེད་དང་འཚོ་བའི་ཁྲོད་ནུས་པ་གལ་ཆེན་ཐོན་བཞིན་ཡོད། དེ་གའི་མང་ཚོགས་ཀྱིས་བོད་བརྒྱུད་སངས་རྒྱས་ཆོས་ལུགས་ལ་དད་པ་བྱེད་པ་དང་། སྐད་གྲགས་ཆེ་བའི་“པར་བརྐོས་ལག་ཤེས་ཀྱི་ཕ་ས”ཞེས་པའི་སྙན་གྲགས་ཡོད་པ་བཞིན་པར་བྲིས་བརྐོས་ཀྱི་བཟོ་རྩལ་ཕུལ་དུ་བྱུང་ཞིང་ལོ་རྒྱུས་ཡུན་རིང་ལྡན་པ་ནི་གཤམ་གསལ་ནས་ཤེས་པར་འཚལ།