ཀྲུང་གོའི་རྣམ་པའི་དེང་རབས་ཅན་ལ། མི་དམངས་བླ་ན་མེད་ཅིང་། དམངས་འཚོ་གཙིགས་ཆེན་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཁག་ཅིག་གི"ལོ་ལྔའི་འཆར་གཞི་བཅོ་ལྔ་པའི"དུས་སྐབས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་བཞུགས་མོལ་ཚོགས་འདུ་གཙོ་སྐྱོང་གནང་བར་མ་ཟད་གསུང་བཤད་གལ་ཆེན་ཡང་གནང་སྟེ། "ལོ་ལྔའི་འཆར་གཞི་བཅོ་ལྔ་པའི"དུས་སྐབས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་འཆར་གཞི་འགོད་པར་བླང་བྱ་གསལ་པོ་བཏོན་པ་དང་། ཐོག་མའི་བསམ་འདུན་མི་བརྗེད་པར་མི་དམངས་ལ་བདེ་སྐྱིད་བསྐྲུན་རྒྱུ་དེ་རྩ་བའི་རིན་ཐང་གཉེར་ཕྱོགས་སུ་འཛིན་དགོས་ཞེས་ནན་གསུངས་གནང་བ་རེད།
"ལོ་ལྔའི་འཆར་གཞི་དང་པོ"ནས"ལོ་ལྔའི་འཆར་གཞི་བཅུ་བཞི་པའི"བར་ང་ཚོའི་ཏང་གིས་བསྒྱུར་བཅོས་དམ་འཛིན་དང་འཕེལ་རྒྱས་ལ་སྐུལ་འདེད་གཏོང་བ་དེ་མཐར་གཏུགས་ནས་བཤད་ན་མི་དམངས་ཀྱིས་འཚོ་བ་སྔར་བས་སྐྱིད་པོ་རོལ་ཐུབ་པའི་ཆེད་དུ་ཡིན་པ་དེ་ཐོག་མཐའ་བར་གསུམ་དུ་འགྱུར་བ་མེད་པ་དང་གཡོ་འགུལ་སྤུ་ཙམ་ཡང་མེད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་བདེ་སྐྱིད་འཚོ་བར་བཅངས་པའི་མི་དམངས་ཀྱི་རེ་འདོད་དེ་འབད་འཐབ་དམིགས་ཚད་དུ་བརྩི་རྒྱུ་མཐའ་འཁྱོངས་ཀྱིས་དམངས་འཚོ་འགན་ལེན་དང་ལེགས་སུ་གཏང་རྒྱུར་ཤུགས་སྣོན་བརྒྱབ་པ་དང་། མི་དམངས་མང་ཚོགས་ཀྱི་སེམས་ཁྲལ་དང་དཀའ་ངལ། རེ་སྒུག་གི་གནད་དོན་ཐག་གཅོད་བྱ་རྒྱུར་ཤུགས་སྣོན་བརྒྱབ་ནས། མི་དམངས་མང་ཚོགས་ཀྱི་ཐོབ་ཚོར་སྐྱིད་ཚོར། བདེ་ཚོར་རྒྱུན་ཆད་མེད་པར་གོང་མཐོར་བཏང་། མི་རེའི་ཆ་སྙོམས་སྔོན་དཔག་ཚེ་ཚད་ལོ་79བར་མཐོ་རུ་བཏང་བ་དང་། མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་41314བར་མང་དུ་བཏང་། གཞི་རྩའི་རྒན་གསོའི་འགན་བཅོལ་དང་སྨན་བཅོས་འགན་བཅོལ་སོ་སོར་མི་དུང་ཕྱུར་10.7དང་མི་དུང་ཕྱུར་13.3ཟིན་ཡོད། དངོས་གནས་དྲང་གནས་ཀྱི་གྲངས་ཀ་རེ་རེ་དང་། མིག་མཐོང་ལག་ཟིན་གྱི་འགྱུར་ལྡོག་རེ་རེ་ལས། མི་དམངས་ཀྱི་དཔའ་ངར་ཞུམ་མེད་ཀྱི་འགན་འཁྲི་འཁུར་སེམས་མཚོན་པ་དང་། མི་དམངས་ལ་བདེ་སྐྱིད་སྐྲུན་པའི་བྱ་གཞག་མཚོན་ཡོད།
ཆེས་གཏིང་ཟབ་པའི་འགྱུར་ལྡོག་ནི་མི་ལ་རག་ལས། ཆེས་རྩ་བའི་ཁེ་ཕན་དེ་མི་ལ་དབང་། ཆེས་ཆེ་བའི་སྒུལ་ཤུགས་ནི་མི་ལས་བྱུང་བ་ཡིན། དུས་རབས་གསར་པ་ནས་བཟུང་། རང་རྒྱལ་གྱི་འཕེལ་རྒྱས་ལ་ལོ་རྒྱུས་དེབ་ཐེར་དུ་འགོད་འོས་པའི་གྲུབ་འབྲས་རླབས་པོ་ཆེ་ཐོབ་པའི་རྒྱུ་རྐྱེན་གལ་ཆེན་ཞིག་ནི་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ནས། མི་དམངས་མང་ཚོགས་ཁྲོད་གནས་པའི་བློ་གྲོས་དང་སྟོབས་ཤུགས་སྐུལ་སློང་གང་ལེགས་བྱས་པ་དེ་རེད། འཛམ་གླིང་ཐོག་གི་གཞི་ཁྱོན་ཆེ་ཤོས་ཀྱི་སློབ་གསོའི་མ་ལག་བསྐྲུན་པ་ནས་ངལ་རྩོལ་པའི་བྱང་ཚད་མཐོ་རུ་ནུས་ལྡན་གཏོང་བ་དང་གསར་གཏོད་ཀྱི་མི་མངོན་པའི་ནུས་པ་འདོན་སྤེལ་བྱེད་པའི་བར་རྣམ་གྲངས་དཔྱད་ཞིབ་དང་། ཤེས་ལྡན་མི་སྣར་གདེང་འཇོག་སྒྲིག་གཞི་དཔྱད་དཔོག་བཅས་ཀྱི་སྒྱུར་བཅོས་གཏིང་ཟབ་ཏུ་བཏང་ནས། ཕྱོགས་སོ་སོའི་ཤེས་ལྡན་མི་སྣར་རང་གནས་རང་ཐོབ་དང་རང་ནུས་གང་ཡོད་འདོན་དུ་བཅུག་པ། སྐྱེ་ཁམས་ཤེས་དཔལ་འཛུགས་སྐྱོང་ཐད་ཀུན་ཕན་ཆེ་ཤོས་ཀྱི་དམངས་འཚོའི་བདེ་སྐྱིད་བསྐྲུན་པ་ནས་སྤྱི་ཚོགས་ཡོངས་ཀྱིས་ཐུན་མོང་ཐོག་སྐྱེ་ཁམས་ཁོར་ཡུག་སྲུང་སྐྱོང་བྱེད་པའི་ནང་སྐྱེས་སྒུལ་ཤུགས་འཕེལ་བ་བྱས། ས་འགུལ་དང་ཆུ་ལོག་སོགས་རང་བྱུང་གནོད་འཚེ་ལས་རྣམ་པར་རྒྱལ་བའི་ཁྲོད་ནས་མི་དམངས་དུང་ཕྱུར་མང་པོས་བློ་སྟོབས་གཅིག་སྒྲིལ་དང་ཕན་ཚུན་ལྟ་རེས་རོགས་རེས་བྱས་ཡོད། མི་དམངས་ནི་ཉེན་ཁ་དང་འགྲན་སློང་མཐའ་དག་ལས་རྣམ་པར་རྒྱལ་བའི་སྟོབས་ཤུགས་ཀྱི་འབྱུང་ཁུངས་ཡིན་པ་དང་། ཐམས་ཅད་མི་དམངས་ཀྱི་ཆེད་དུ་ཡིན་པ་དང་ཐམས་ཅད་མི་དམངས་ལ་བརྟེན་རྒྱུ་མཐའ་འཁྱོངས་བྱས་ན། ཞུམ་མེད་མདུན་སྐྱོད་ཀྱི་བརྗིད་རྔམ་ལྡན་པའི་སྟོབས་ཤུགས་ཆེན་པོ་གོང་བུར་བསྒྲིལ་ནས་ཀྲུང་གོའི་རྣམ་པའི་དེང་རབས་ཅན་རྒྱུན་ཆད་མེད་པར་འཕེལ་རྒྱས་གཏོང་བ་ལག་ལེན་དངོས་ཀྱི་ཐོག་ནས་གསལ་པོར་མཚོན་ཡོད།
མི་དམངས་ཡོངས་ཀྱི་ཐུན་མོང་གི་བྱ་གཞག་ཀྱང་ཉེན་ཁ་དང་འགྲན་སློང་གིས་ཁེངས་ཤིང་དཀའ་སྤྱད་འབད་བརྩོན་བྱ་དགོས་པའི་བྱ་གཞག་རླབས་པོ་ཆེ་ཞིག་རེད། མདུན་ལམ་ནི་རླུང་ཞི་རླབས་འཇགས་མིན་ལ། རྒྱལ་ཁ་ནི་ལས་སླ་མོ་ཞིག་མིན། དེང་སྐབས་འཛམ་གླིང་གི་ལོ་བརྒྱའི་འགྱུར་ལྡོག་ཇེ་མགྱོགས་སུ་འགྲོ་བ་དང་། ཕྱི་རོལ་གྱི་གནོན་ཤུགས་དང་བཀག་འགོག་རྒྱུན་ཆད་མེད་པར་རིམ་འཕར་བྱུང་བས། རྒྱལ་ནང་གི་བསྒྱུར་བཅོས་འཕེལ་རྒྱས་བརྟན་བརླིང་གསུམ་གྱི་ལས་འགན་དཀའ་ཚེགས་ཆེ་ཞིང་ལྗིད་རྫོབ་ཆེ། མིག་མདུན་གྱི་དཀའ་ངལ་དང་འགྲན་སློང་ལས་རྣམ་པར་རྒྱལ་བའམ་ཡང་ན་ཕུགས་ཡུན་གྱི་འཕེལ་རྒྱས་ཀྱི་དགེ་མཚན་ཟབ་འཛུགས་དང་། བརྗིད་ཉམས་ལྡན་པའི་འཕེལ་རྒྱས་ཀྱི་དམིགས་འབེན་མངོན་འགྱུར་བྱེད་པ་གང་ཞིག་ཡིན་རུང་ཚང་མར་མི་དམངས་ཡོངས་སྐུལ་སློང་བྱས་ནས་མཉམ་དུ་བསམ་བློ་གཏོང་བ་དང་། མཉམ་དུ་སྒྲུབ་པ། དཀའ་ཁག་ལ་མི་འཛེམ་པར་མདུན་དུ་སྐྱོད་པ། འགག་སྒྲོལ་དཀའ་སེལ་བཅས་བྱས་ཏེ་མི་དམངས་ལ་རྩེ་གཅིག་ཏུ་བརྟེན་ནས་ལོ་རྒྱུས་ཀྱི་བྱ་གཞག་རླབས་པོ་ཆེ་གསར་པ་གཏོད་དགོས། རྒྱང་སྐྱོད་ཀྱི་ལམ་བུ་གསར་པའི་ཐོག །ཐོག་མཐའ་བར་གསུམ་དུ་མི་དམངས་སེམས་ནང་གི་གནས་བབ་མཐོ་ཤོས་སུ་བཞག་ནས་ཆེས་རྒྱ་ཆེའི་མི་དམངས་ཀྱི་རྩ་བའི་ཁེ་ཕན་མངོན་འགྱུར་ཡག་པོ་དང་། སྲུང་སྐྱོང་ཡག་པོ། འཕེལ་རྒྱས་ཡག་པོ་བཏང་ནས། མི་དམངས་ཡོངས་ཀྱི་ཧུར་བརྩོན་རང་བཞིན་དང་། རང་འགུལ་རང་བཞིན། གསར་གཏོད་རང་བཞིན་བཅས་རྒྱུན་ཆད་མེད་པར་སྐུལ་སློང་བཏང་ན། ཀྲུང་གོའི་རྣམ་པའི་དེང་རབས་ཅན་ལ་ཐོག་མཐའ་བར་གསུམ་དུ་ཆེས་སྲ་ཞིང་བརྟན་པའི་རྨང་གཞི་དང་ཆེས་གཏིང་ཟབ་པའི་སྟོབས་ཤུགས་ཡོད།
མིག་སྔར། མི་དམངས་མང་ཚོགས་ཀྱིས་སྤུས་ཚད་མཐོ་བའི་འཚོ་བར་བཅངས་པའི་དགོས་མཁོ་ཉིན་བཞིན་ཆེ་རུ་འགྲོ་བ་དང་བདེ་སྐྱིད་འཚོ་བར་བཅངས་པའི་རེ་འདོད་དེ་བས་ཆེ་རུ་འགྲོ་བཞིན་ཡོད། འཕེལ་རྒྱས་གཏོང་རིང་དམངས་འཚོ་འགན་སྲུང་དང་ལེགས་བཅོས་བྱས་ནས་ཐུན་མོང་ཐོག་ཕྱུག་པོར་འགྱུར་བར་སྐུལ་འདེད་བརྟན་པོ་གཏོང་རྒྱུ་ནི་ཀྲུང་གོའི་རྣམ་པའི་དེང་རབས་ཅན་གྱི་ལས་འགན་གལ་ཆེན་ཞིག་ཡིན། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི《ཆོད་དོན》ནང་མི་དམངས་ཀྱི་འཚོ་བའི་སྤུས་ཚད་མཐོ་རུ་གཏོང་བར་དམིགས་ནས་ཡོང་འབབ་བགོ་བཤའི་ལམ་ལུགས་འཐུས་ཚང་དུ་གཏོང་བ་དང་། སྤུས་ཚད་མཐོ་ཞིང་ལས་ཞུགས་གང་ལེགས་བྱེད་པར་སྐུལ་འདེད་གཏོང་བའི་ནང་རྐྱེན་འཐུས་ཚང་དུ་གཏོང་བ། གཞི་རྩའི་རྒན་གསོའི་འགན་བཅོལ་རྒྱལ་ཡོངས་ཀྱི་གཅིག་གྱུར་འཆར་འགོད་ལམ་ལུགས་འཐུས་ཚང་དུ་གཏོང་བ་སོགས་བསྒྱུར་བཅོས་བྱེད་ཐབས་རབ་དང་རིམ་པ་བཏོན་ཡོད། ང་ཚོས་ཆུ་ཐིགས་རྟག་ཏུ་འབབ་པའི་སྙིང་སྟོབས་དར་སྤེལ་གཏོང་བ་དང་། དོན་དངོས་དང་ཟུང་འབྲེལ་བྱས་ཏེ་གསར་གཏོད་རང་བཞིན་ལྡན་པའི་སྒོ་ནས་དོན་འཁྱོལ་དམ་འཛིན་ཡག་པོ་བྱེད་པ། གཞི་རྩའི་སྤྱི་པའི་ཞབས་ཞུའི་ལམ་ལུགས་མ་ལག་སྔར་ལས་འཐུས་ཚང་དུ་གཏོང་བ། ཀུན་ཕན་རང་བཞིན་དང་། རྨང་གཞིའི་རང་བཞིན། མཐའ་སྐྱོང་རང་བཞིན་བཅས་ལྡན་པའི་དམངས་འཚོ་འཛུགས་སྐྱོང་བྱེད་ཤུགས་ཆེ་རུ་བཏང་ནས་དེང་རབས་ཅན་གྱི་འཛུགས་སྐྲུན་གྱི་གྲུབ་འབྲས་སྔར་ལས་མང་བ་དང་སྔར་ལས་དྲང་སྙོམས་ཀྱི་སྒོ་ནས་མི་དམངས་ཡོངས་ལ་ཕན་ཁེ་འཐོབ་པར་བྱ་དགོས། གང་ཐུབ་ཅི་ཐུབ་དང་འཁོས་དཔག་ལས་སྒྲུབ་མཐའ་འཁྱོངས་བྱས་ཏེ་ཐབས་བརྒྱ་ཇུས་སྟོང་གིས་གྲོང་ཁྱེར་དང་གྲོང་གསེབ་ཀྱི་མང་ཚོགས་ཀྱི་ཡོང་འབབ་བརྟན་པོའི་ངང་འཕར་སྣོན་གཏོང་བ་དང་། སེམས་རྣལ་དུ་ཕབ་ནས་མང་ཚོགས་ཀྱི་དཀའ་སྡུག་དང་རེ་སྒུག་གི་གནད་དོན་ཐག་གཅོད་ཤུགས་ཆེན་བྱས་ཏེ། མི་ཕྱོགས་ཡོངས་ནས་འཕེལ་རྒྱས་ཡོང་བ་དང་མི་དམངས་ཡོངས་རྫོགས་ཐུན་མོང་ཐོག་ཕྱུག་པོར་འགྱུར་བར་སྐུལ་འདེད་གཏོང་བར་དོན་དངོས་རང་བཞིན་ལྡན་པའི་འཕེལ་རྒྱས་སྔར་ལས་མངོན་གསལ་དོད་པོ་ཡོང་བ་བྱ་དགོས།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས། མི་སེར་དང་འབྲེལ་བ་ཡོད་པའི་དོན་དག་གི་འགག་རྩ་ནི་དོན་དངོས་ལ་ཐུག་ཡོད་པས་སྲིད་ཇུས་དང་བྱེད་ཐབས་ཁག་དངོས་དངོས་རྗེན་རྗེན་དང་ཕན་འབྲས་དངོས་ཐོན་པ་བྱེད་དགོས་ཞེས་ནན་གསུངས་གནང་ཡོད། རྒྱང་སྐྱོད་ཀྱི་ལམ་བུ་གསར་པའི་ཐོག །མི་དམངས་ལ་བདེ་སྐྱིད་སྐྲུན་པའི་རྩ་བའི་རིན་ཐང་གཉེར་ཕྱོགས་ཁོང་དུ་བརྟན་པོ་ཆུད་པ་བྱས་ཏེ། ཐོག་མཐའ་བར་གསུམ་དུ་མི་དམངས་ཀྱིས་བསམ་བློ་གཏོང་སར་བསམ་བློ་གཏོང་བ་དང་མི་དམངས་ཀྱིས་ཁ་ཏ་བསླབ་བྱ་བྱེད་པ་དང་བྱ་བ་རེ་རེ་བཞིན་སྒྲུབ་པ་དང་བྱ་བ་རེ་རེ་བཞིན་སྒྲུབ་ནས་གྲུབ་འབྲས་དངོས་དང་ཕན་འབྲས་དངོས་ལ་བརྟེན་ནས་དམངས་ཀྱི་སེམས་ཁྲལ་སེལ་བ་དང་། དམངས་འཚོར་ཕན་འདོགས་པ། དམངས་སེམས་དྲོ་སྐྱིད་སྦྱིན་པ་བཅས་བྱས་ཏེ་མཛེས་སྡུག་ལྡན་པའི་འཚོ་བར་བཅངས་པའི་མི་དམངས་ཀྱི་རེ་འདོད་རྒྱུན་ཆད་མེད་པར་མངོན་འགྱུར་ཡོང་བ་བྱས་ན། ང་ཚོའི་བྱ་གཞག་ནི་ངེས་པར་དུ་འགྲུབ་ངེས། །