བོད་ཀྱི་ཡིག་གཟུགས་སྒྱུ་རྩལ་དར་སྤེལ་བཏང་ནས་ཀྲུང་ཧྭའི་ཕུལ་བྱུང་རིག་གནས་རྒྱུན་འཛིན་གང་ལེགས་གཏང་ཆེད། སྤྱི་ཟླ་4པའི་ཚེས་30ཉིན། པདྨ་གསེར་སྨྱུག་རྟགས་མའི་བོད་ཀྱི་ཡིག་གཟུགས་འགྲན་སྡུར་སྐབས་གཉིས་པའི་གཟེངས་བསྟོད་མཛད་སྒོ་ཁྲེང་ཏུའུ་རུ་སྤེལ་བ་རེད།
ཐེངས་འདིའི་པདྨ་གསེར་སྨྱུག་རྟགས་མའི་བོད་ཀྱི་ཡིག་གཟུགས་འགྲན་སྡུར་སྐབས་གཉིས་པའི་གཟེངས་བསྟོད་མཛད་སྒོ་དང་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་བསུ་བའི་མཛད་སྒོ་རུ་ཀྲུང་ཧྭའི་རིག་གནས་སྤྱི་དང་ཁྱད་པར་དུ་བོད་ཀྱི་ཡིག་གཟུགས་སྒྱུ་རྩལ་ལ་ཉམས་མྱོང་དང་ཞིབ་འཇུག་གི་གྲུབ་འབྲས་བླ་ན་མཐོ་བའི་མཁས་པ་དང་། བོད་ཀྱི་རིག་གནས་དང་ཡིག་གཟུགས་ལ་ལྷག་བསམ་དཀར་ཞིང་དགའ་མོས་ཆེ་བའི་གྲོགས་པོ་གང་མང་ཞིག་ཕེབས་ཡོད།
རྒྱུས་ལོན་བྱུང་བ་ལྟར་ན། ཐེངས་འདིའི་ཡིག་གཟུགས་འགྲན་སྡུར་དུ་བོད་རང་སྐྱོང་ལྗོངས་ཀྱི་ལྷ་ས་དང་ཆབ་མདོ། ནག་ཆུ། ལྷོ་ཁ། མངའ་རིས་བཅས་དང་། མཚོ་སྔོན་ཞིང་ཆེན་གྱི་མཚོ་ལྷོ་དང་རྨ་ལྷོ། མགོ་ལོག །ཡུས་ཧྲུའུ། མཚོ་བྱང་བཅས་དང་། སི་ཁྲོན་ཞིང་ཆེན་གྱི་དཀར་མཛེས་དང་རྔ་བ། མུ་ལི། ཀན་སུའུ་ཡི་ཀན་ལྷོ། ཡུན་ནན་གྱི་བདེ་ཆེན། དེ་མིན་ཁྲེང་ཏུའུ་དང་ཟི་ལིང་། པེ་ཅིན་སོགས་ནས་འགྲན་ཞུགས་བརྩམས་ཆོས་ཉིས་སྟོང་ལྷག་འབྱོར་འདུག
འདི་ནི་ད་ལྟའི་བར་གྱི་བོད་ཀྱི་ཡིག་གཟུགས་སྐོར་གྱི་འགྲན་ཞུགས་བརྩམས་ཆོས་ཆེས་མང་བའི་འགྲན་སྡུར་ཞིག་ཏུ་གྱུར་ཡོད་ལ། ཐེངས་འདིའི་འགྲན་སྡུར་གྱི་གོ་རིམ་ཡོངས་ལ་ཆེད་མཁས་དཔྱད་འདེམས་པ་རྣམས་ཡུལ་དངོས་ལ་གདན་དྲངས་ནས་དྲང་པོ་དྲང་བཞག་དང་རྒྱུ་འབྲས་བློ་མིག་གིས་ཡིག་གཟུགས་ཀྱི་གཞུང་ལུགས་དང་འབྲི་རྩལ་གྱི་ཆུ་ཚད་ལྟར། འགྲན་ཞུགས་བརྩམས་ཆོས་རྣམས་དཔྱད་ཞིབ་ནན་མོ་བྱས་ཏེ་བྱ་དགའི་ཨང་རིམ་གཏན་འབེབས་བྱས་ཡོད།
ཐེངས་འདིའི་ཡིག་གཟུགས་འགྲན་སྡུར་ཁྲོད། མུ་རུ་བཀྲ་ཤིས་དོན་འགྲུབ་དང་བསྟན་འཛིན་རྒྱ་མཚོ་གཉིས་ལ་བྱ་དགའ་ཨང་དང་པོ་དང་། སྐྱི་སྤྲུལ་འཇིགས་མེད་བཀྲ་ཤིས་དང་ཤེས་རབ་རྒྱ་མཚོ་གཉིས་ལ་བྱ་དགའ་ཨང་གཉིས་པ། ཐུབ་བསྟན་ཆོས་འགྲུབ་དང་བསོད་ནམས། ཐུབ་བསྟན་དཔལ་ལྡན་དོན་འགྲུབ། རྒྱལ་མཚན། སྦྱིན་པ། འོད་སྲུང་འཚོ་བཅས་ལ་བྱ་དགའ་ཨང་གསུམ་པ་ཐོབ།
ལོ་ཆུང་བྱིས་པ་རྣམས་ནི་མེས་རྒྱལ་དང་མི་རིགས་ཀྱི་མ་འོངས་པ་ཡིན་ལ། བོད་ཀྱི་ཡིག་གཟུགས་རིག་གནས་ཀྱི་རྒྱུན་འཛིན་པའང་ཡིན། དེ་བས་ཐེངས་འདིའི་འགྲན་སྡུར་ཁྲོད་ཆེད་དུ་ལོ་ཆུང་གཞོན་ནུར་དམིགས་ནས་བྱ་དགའི་རྣམ་གྲངས་བཀོད་སྒྲིག་བྱས་ཡོད་ལ། བྲིས་པ་ཆུང་ཆུང་བསམ་འགྲུབ་ཚེ་རིང་དང་། བདེ་སྐྱིད་གཡང་མཚོ། དགེ་ལེགས་རྒྱ་མཚོ། བློ་བཟང་ཆོས་དབྱིངས། གངས་བརྩེ་དོན་ཡོད། ཕུན་ཚོགས་དབང་ཕྱུག་བཅས་ལ་ལོ་ཆུང་གཞོན་ནུའི་ཀ་རིམ་བྲིས་པའི་བྱ་དགའ་གནང་བ་རེད།
དེ་མིན་གླིང་དབོན་པདྨ་སྐལ་བཟང་། བཞད་པ་བསྟན་པ་རྒྱ་མཚོ། དཔའ་རིས་སངས་རྒྱས་གསུམ་ལ་རྫོགས་རིམ་གསུམ་པའི་ཡིག་མཁན་གྱི་མཚན་གསོལ་ཞིང་། འཇིགས་མེད་ཆོས་དར་དང་བསོད་ནམས་ཆོས་འབྱོར། བློ་བཟང་སྤེན་པ། དཔག་བསམ་དོན་གྲུབ། བཟང་ལྡན། ཟུར་ཚང་གཡང་འབུམ། ཨ་འཇམ། ཨ་སྨྱོན་སྐལ་བཟང་ཚེ་བརྟན། བསོད་ནམས་དབང་རྒྱལ། ཆོས་འཛིན། བཀྲ་ཤིས་ནོར་བུ། གཙང་པ་ཨ་བརྟན། ལྕགས་རྡོ་བཅས་ལ་རྫོགས་རིམ་ཡིག་མཁན་གྱི་མཚན་གསོལ་བ་རེད།
གཞན་ཡང་གླེང་རིན་ཆེ་བ་ཞིག་ནི་ཉག་རོང་བཀྲ་ཤིས་དཔལ་འབྱོར་དང་གཡུང་དྲུང་པད་རྡོར་གཉིས་ཀྱིས་ཉག་བྲོ་བྱ་རྒྱལ་རྒོད་པོའི་གཤོག་འགྱུར་གྱི་བྲོ་ཚིག་བཞི་བརྒྱ་ལ་ཉེ་བ་དེ་བོད་ཀྱི་ཡིག་གཟུགས་གཟབ་གཤར་གཉིས་ཀྱི་ལམ་ནས་ལེགས་པར་བྲིས་ཡོད་པ་དང་རིང་ཚད་ལ་སྨི་ཆིག་སྟོང་ལྔ་བཅུ་ལྷག་ཡོད་པའི་ཡིག་གཟུགས་བརྩམས་ཆོས་རིང་མོ་ལ་འཛམ་གླིང་ཟིན་ཐོའི་དཔང་ཡིག་དང་པདྨ་གསེར་བྲིས་གླིང་གི་ཆེད་ཞུས་འགྲེམ་སྟོན་གྱི་དཔང་ཡིག་གནང་བ་རེད། །