ཐུན་མོང་དཔལ་འབྱོར་གོང་འཕེལ་གཏོང་བ།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“རྐང་འོག་ན་ས་འདམ་ག་ཚོད་ཡོད་ན། སེམས་ལ་བརྩེ་བ་དེ་འདྲ་གཉེར་ཡོད”ཅེས་ནན་གྱིས་བསྟན་པ་ནང་བཞིན། སྡེ་སྡོད་ལས་བྱེད་པ་ཞིག་ཡིན་པའི་ངོས་ནས། ལོ་ངོ་གཅིག་གི་གཞི་རིམ་ལག་ལེན་བརྒྱུད་སྡེ་སྡོད་ལས་དོན་ནི་ཐོབ་ཐང་ལ་འགྱུར་ལྡོག་གཏོང་ཐེངས་ཤིག་ཡིན་པར་མ་ཟད། བློ་སྦྱོང་དང་དམངས་ལ་ཞབས་འདེགས་ཞུ་བའི་ཚོད་བགམ་ཞིག་ཡིན་པ་གསལ་པོར་རྟོགས། ཉམས་མྱོང་འདིས་ང་ལ་གཞི་རིམ་འགྲིམ་ན། ད་གཟོད་དམངས་ཀྱི་སྙིང་གཏམ་གོ་ཐུབ་ལ། ཞིང་ཁ་རུ་ངལ་རྩོལ་བྱས་ཏེ་རྔུལ་ཆུ་གཏོར་ན། ད་གཟོད་སེམས་ལ་སྦས་པའི་རེ་འདུན་རྟོགས་ཐུབ་པའི་ངེས་ཤེས་གསལ་པོ་བྱུང་། གྲོང་གསེབ་ཁྱོན་ཡོངས་ནས་དར་རྒྱས་ལ་སྐུལ་འདེད་གཏོང་བའི་གཡུལ་ས་རུ“རྣལ་སེམས”གྱིས་ཁ་ཕྱོགས་གསལ་སྟོན་དང་། “བརྩེ་ཞེན”གྱིས་འབྲེལ་ཟམ་བཙུགས་ནས། “ནུས་ཤུགས་ཡོད་རྒུས”དཀའ་གནད་ཐག་གཅོད་བྱས་ན། ཏང་གི་དམངས་ཕན་སྲིད་ཇུས་དེ་དཔྱིད་ཆར་བཞིན་མི་སེར་ཀྱི་བསམ་པའི་གཏིང་ལ་དྲོད་ཁོལ་སྦྱིན་ཐུབ།
དབུལ་པོ་ཕྱིར་ལོག་སྔོན་འགོག་གི་བརྟག་བཤེར་བྱེད་བཞིན་པ།
བཞི་ལིང་སྡེ་པར་འབྱོར་པའི་དུས་ཐོག་མར། རྙོག་འཛིང་ཆེ་བའི་སྡེ་སྲོལ་དམངས་འདོད་ཀྱི་མདུན་དུ། ངས་ལས་དོན་རུ་ཁག་གི་སྣེ་ཁྲིད་དེ་རིམ་བཤེར་བཅར་འདྲི་ཐེངས་མང་བྱས། མཐར་རིགས་4དང་རྣམ་གྲངས་18ཚུད་པའི་འགུལ་རྣམ་རྩིས་ཐོ་བཟོས་ནས་ཐོན་ལས་ཁྱབ་རྒྱ་རི་མོ་དང་རྨང་གཞིའི་སྒྲིག་བཀོད་ཀྱི་ཞན་ཆ་གསལ་ཐོ་བྲིས། གྲངས་གཞི་གནད་ཁེལ་ཡོང་བར་འགན་ལེན་བྱ་ཆེད། ང་དང་སྡེ་པའི་ལས་བྱེད་པ་རྣམས་ཀྱིས་སྡེ་པའི་འཐུས་མི་སྒྲིག་འཛུགས་བྱས་ནས“དམངས་འཚོའི་རེ་འདུན་ཚོགས་འདུ”བསྡུས་པ་ཡིན། སྡེ་མིས་བཏོན་པའི“གློག་སྐུད་རྙིང་འགྱུར”གྱི་གནད་དོན་ལ་དམིགས་ནས། ངས་ལས་ཁུངས་ཀྱི་འགོ་ཁྲིད་ལ་སྙན་སེང་ཐེངས་མང་ཞུས་ཏེ་སྐུད་ལམ་བསྒྱུར་བཀོད་ཐད་ཆེད་དོན་མ་དངུལ་སྒོ་ཁྲི་30བརྩོན་ལེན་བྱས། ཨར་ལས་བྱེད་པའི་རིང་ལ་ལས་ཁུངས་ཀྱི་འགོ་ཁྲིད་ཡུལ་དངོས་སུ་འབྱོར་ནས་ལྟ་སྐུལ་གནང་བ་དང་། དོ་སྣང་བྱ་དགོས་པའི་དོན་ཚན་ལ་མཛུབ་ཁྲིད་བྱས། སྐུད་ལམ་བསྒྱུར་བཀོད་བྱས་རྗེས་དམངས་ཀྱི་སྡོད་ཁང་དུ་མེ་སྐྱོན་འབྱུང་ཉེན་ཆེ་བའི་རྐྱེན་ངན་རྩ་བ་ནས་མེད་པར་བཏང་། རྣམ་གྲངས་ལས་མཇུག་རྫོགས་ནས་རྩིས་ལེན་བྱེད་སྐབས། ལོ་ན་62ལོན་པའི་སྡེ་མི་དབང་ཆེན་གྱིས་ངའི་ལག་པར་འཇུས་ནས་ད་ཆ་ངའི་བློ་སེམས་བདེ་ལ་ཕབ་ཡོད་ཅེས་བཤད།
འགོ་ཁྲིད་ཀྱི་ཐུགས་ཁུར།
དམིགས་བསལ་ཚོགས་སྡེར་དོ་ཁུར་བྱ་རྒྱུ་ནི་ངའི་ལས་ཀ་གལ་ཆེན་ཞིག་ཡིན། གཞིས་ལུས་བྱིས་པའི་སློབ་གསོའི་གནད་དོན་ལ་དམིགས་ནས། ངས་སྡེ་པའི“ཨུ་ལྷན་གཉིས”དང་མཉམ་དུ“དབྱར་དགུན་གནང་གི་གསབ་སྦྱོར་འཛིན་གྲྭ”བཙུགས་ཏེ། སྡེ་པའི་སློབ་ཆེན་སློབ་མ་སྒྲིག་འཛུགས་བྱས་ཏེ་ལས་བྱ་ཟུར་ཁྲིད་བྱེད་དུ་བཅུག །འགྲོ་རོགས་དང་འདུག་རོགས་བྱས་ནས་བྱིས་པ་རྣམས་ཀྱི་འཚར་ལོངས་ཀྱི་སྟོང་ཆ་གསབ། རྒན་རྒོན་ཚོགས་སྡེར་དམིགས་ནས། ང་དང་སྡེ་པའི་ལས་བྱེད་པས“དངུལ་ལོ་གཅེས་སྐྱོང་བྱ་སྤྱོད”སྤེལ་ཏེ། ལོ་60ཡན་གྱི་རྒན་རྒོན་ལ་ཆུ་འཐུང་འཕྲུལ་ཆས་དང་དྲོད་སྲུང་མཁོ་ཆས་བྱིན། རིན་མི་དགོས་པའི་འོས་འགན་སྨན་བཅོས་སྒྲིག་འཛུགས་བྱས་ཏེ་བདེ་ཐང་བརྟག་དཔྱད་མ་ལག་བཙུགས་ནས། སྡེ་པ་ཡོངས་སུ་རྒན་བཀུར་གཞོན་གཅེས་ཀྱི་ཁོར་ཡུག་ལེགས་པོ་བསྐྲུན། བདེ་ཐང་རོགས་སྐྱོར་ཁྱབ་ཁོངས་སུ་ལས་ཁུངས་ཀྱིས་མཐུན་སྦྱོར་བྱས་པ་བརྒྱུད། ན་ནིང་ཁྲེང་ཏུའུ་གྲོང་ཁྱེར་མི་དམངས་སྨན་ཁང་བདུན་པ་དང་སི་ཁྲོན་ཁྲིམས་འཛིན་ཉེན་རྟོག་པའི་སྤྱི་ཁྱབ་སྨན་ཁང་གིས་བསྡོམས་པས་མི་ཐེངས་100ལྷག་ལ་སྨན་བཅོས་ཞབས་ཞུ་བཏོན། པུས་ཚིགས་བརྗེ་བའི་གཤགས་བཅོས་2དང་ཕོ་བའི་ནད་སྨན་བཅོས་བཤགས་བཅོས་1ལག་བསྟར་བྱས།
སྡེ་པ་རིམ་པའི་ཐུན་མོང་དཔལ་འབྱོར་གྱི“ཕྱི་ཤུན་སྟོང་པའི”གནད་དོན་ཐག་གཅོད་བྱ་ཆེད། ང་དང་སྡེ་པའི་ལས་བྱེད་པས་སྲིད་ཇུས“སྡེབ་སྒྲིག”ལ་སྐུལ་འདེད་བཏང་། ཡུལ་ཚོའི་ཏང་ཨུ་དང་སྲིད་གཞུང་གི་མཛུབ་ཁྲིད་འོག །སྡེ་པའི“ཨུ་ལྷན་གཉིས”གྱིས“ཏང་ཀྲི་པུའུ+མཉམ་ལས་ཁང་+ཞིང་དུད”ཀྱི་ཁེ་ཕན་འབྲེལ་མཐུད་ལམ་སྲོལ་འཚོལ་ཞིབ་བྱས་ཏེ། མཐོ་སྒང་གི་ལུག་མིག་མེ་ཏོག་ཚོད་འདེབས་རྣམ་གྲངས་ནང་འདྲེན་བྱས། ཉེན་འགན་མཉམ་འཁུར་བྱས་ནས་ཞིང་དུད་ལ་ཁེ་བཟང་ཐོབ་པར་འགན་ལེན་བྱས། ལོ་དེར་སྡེ་པ་སྤྱིའི་ཡོང་འབབ་སྒོར་ཁྲི་1.5ཙམ་འཕར་བ་དང་། ད་ལོར་འདེབས་རྒྱ་མུའུ་50ཆེ་རུ་གཏོང་འཆར་ཡོད། ཐོན་ལས་འཕེལ་རྒྱས་ཐད་སྡེ་པའི“ཨུ་ལྷན་གཉིས”ཀྱིས་ཡུན་རིང་ཐུང་གཉིས་ལ་དམིགས་ནས། སྡེ་མི་རྣམས་ལ་སྒོ་རའི་དཔལ་འབྱོར་འཕེལ་རྒྱས་གཏོང་བར་སྐུལ་མ་བཏང་། ཀུ་ཤུ་དང་ཁམ་སྡོང་རྐང་1500བཏབ་ནས་རྗེས་ཕྱོགས་ཀྱི་རིག་གནས་ཡུལ་སྐོར་ཐོན་ལས་འཕེལ་རྒྱས་གཏོང་བར་རྨང་གཞི་བཏིང་། ང་དང་སྡེ་པའི་ལས་བྱེད་པས་སྡེ་པའི་ཞིང་ལས་ཁེ་ལས་དང་གྲོས་མོལ་བྱས་པ་བརྒྱུད། ས་ཞིང་གླ་རིན་མུའུ་རེར་སྒོར་500ནས་མུའུ་རེར་སྒོར་600བར་མཐོ་རུ་བཏང་བ་དང་། ལས་བཟོའི་གླ་ཕོགས་20%འཕར་ནས་སྡེ་མིའི་ཡོང་འབབ་རྒྱུན་མཐུད་འཕར་སྣོན་ཡོང་བར་སྐུལ་ཁྲིད་བྱས།
སྡེ་སྡོད་ལས་དོན་གྱིས་ང་ལ“མི་དམངས་གཙིགས་སུ་འཛིན་པའི”ནང་དོན་ལ་ངེས་ཤེས་ལེགས་པོ་བསྐྱེད། སླད་ཕྱིན་གྱི་ལས་ཀའི་ཁྲོད་ངས་མུ་མཐུད་དུ“བློ་སེམས་རྣལ་མའི”རྨང་གཞི་བརྟན་པོ་འཛུགས་པ་དང་། “བརྩེ་བའི་སྟོབས་ཀྱིས”ཐོག་མའི་བསམ་འདུན་ལེགས་པོ་བསྐྱེད་པ། “ནུས་ཤུགས་ཡོད་རྒུས”ལས་འགན་ལག་བསྟར་བྱས་ཏེ། མང་ཚོགས་དང་ཉེ་བར་བཅར་བའི་འཕེལ་རྒྱས་ཀྱི་ལམ་སྣེ་འདྲེན་མཁན་བྱེད་པར་འབད་པ་ཧུར་ལེན་བྱ་རྒྱུ་ཡིན།
（རྩོམ་པ་པོ་ནི་ཁྲིམས་འཛིན་ཐིང་གིས་དཀར་མཛེས་ཁུལ་དཔལ་ཡུལ་རྫོང་འཛིང་ཁོག་ཡུལ་ཤོག་བཞི་ལིང་སྡེ་པར་མངགས་པའི་སྡེ་སྡོད་ཧྲུའུ་ཅི་དང་པོ་ཡིན།）