སྤྱི་ཟླ་3པའི་ཚེས་14ཉིན་གྱི་ཞོགས་པའི་ཆུ་ཚོད་8གྱི་སྟེང་ལ། རྔ་བ་བོད་རིགས་ཆའང་རིགས་རང་སྐྱོང་ཁུལ་གྱི་འབར་ཁམས་གྲོང་རྡལ་ར་ཅོ་སྡེ་པའི་གནམ་གཤིས་དྲོད་གྲང་3℃ལས་མེད། གྲང་རླུང་འུར་འུར་ལྡང་། ངས་ལུས་ལ་བྱ་སྤུའི་དྲོད་ལྭ་གྱོན་ནས་ཏང་མང་ཚོགས་ཞབས་ཞུའི་ལྟེ་གནས་ཀྱི་ཕྱོགས་སུ་བསྐྱོད། ཐང་ཆེན་མདུན་དུ་བོད་ལྭ་གྱོན་པའི་རྒན་པ་དང་ཕྲུ་གུ་པང་དུ་བཟུང་བའི་བུད་མེད། ཤིང་དབྱུག་བརྟེན་པའི་གཞོན་ནུ་བཅས་གྲལ་རིང་མོ་གསུམ་བསྒྲིགས་ནས་ཡོད་ལ་ཁོ་ཚོའི་གདོང་ལ་རེ་སྒུག་གིས་ཁེངས།
སི་ཁྲོན་ཞིང་ཆེན་རུས་ནད་སྨན་ཁང་གིས་ར་ཅོ་སྡེ་པར་མངགས་པའི་སྡེ་སྡོད་ལས་དོན་རུ་མི་ཁག་དང་པོ་ཡིན་པའི་ངོས་ནས། ཉིན་དེ་ནི་ངས་ཡུན་རིང་པོར་གྲ་སྒྲིག་བྱས་པའི་འོས་འགན་སྨན་བཅོས་ཉིན་མོ་ཡིན། སྨན་པ་ཙོག་པུར་བསྡད་ནས་ལོ་ན་80ལོན་པའི་བགྲེས་སོང་ཕུན་ཚོགས་ཀྱི་པུས་མོ་སྐྲངས་པར་བརྟག་དཔྱད་བྱས་དུས། བགྲེས་སོང་ཁོས་ངའི་ལྭ་བར་བཟུང་ནས་སྐད་འདར་བཞིན་བཤད་རྒྱུར། དགེ་རྒན་ཀྲང་ལགས། ངའི་རྐང་པ་འདི་སྨན་བཅོས་བྱ་ཐུབ་བམ་ཞེས་དྲིས། ཁོའི་མིག་མདངས་སུ་སྐྱོ་བ་ཡོད་ལ་རེ་བ་ཡང་ཡོད།
ན་ནིང་ཟླ་བརྒྱད་པར། ང་རང་ར་ཅོ་སྡེ་པར་ཐོན་མ་ཐག་དེ་གའི་རུས་པའི་བདེ་ཐང་གནད་དོན་ཚབས་ཆེ་བས་ཧ་ལས་སོང་། བགྲེས་སོང་ཕུན་ཚོགས་ཀྱིས་པུས་ཚིགས་ལ་དབྱིབས་འགྱུར་ཚབས་ཆེན་བྱུང་ནའང་། སྔར་བཞིན་ལྷས་ར་རུ་པུས་མོ་ས་ལ་བཙུགས་ནས་ལྕི་བ་འཐུ་བཞིན་འདུག །ཨ་ཁུ་བསོད་ནམས་ལག་རྟེན་ལ་བརྟེན་ནས་འགྲོ་དགོས་འདུག Xའོད་ཀྱི་བརྙན་རིས་ལས་ཁོའི་པུས་ཚིགས་དེ་རླུང་འགྱུར་བྲག་རྡོ་དང་འདྲ་བ་མངོན། ཁྱིམ་ཚང་རེ་རེའི་སྒོ་ཁྱིམ་ལ་འགྲིམ་ནས་བརྟག་དཔྱད་བྱས་པ་ན། གྲོང་ཚོ་ཡོངས་ཀྱི་སྡེ་མི་298ཁྲོད་25%ལ་ཚད་མི་འདྲ་བའི་རུས་ནད་ཕོག་ཡོད། དེ་ལས་ཀྱང་ཡིད་སྐྱོ་བ་ཞིག་ལ། མི་མང་པོ་ཞིག་གིས་ཚིགས་དབྱིབས་འགྱུར་ཚབས་ཆེན་པོ་བྱུང་ཚེ་ད་གཟོད་སྨན་བཅོས་བྱེད་དུ་འགྲོ། ཉིན་དེའི་དགོང་མོ་ངས་སྡེ་སྡོད་ཉིན་ཐོར་འདི་འདྲ་ཞིག་བཀོད། “གནས་འདིར་མཁོ་བ་ནི་སྨན་བཅོས་ཐེངས་གཅིག་ཙམ་མ་ཡིན་པར། ཡུན་རིང་པོའི་རུས་པའི་བདེ་ཐང‘སྲུང་སྐྱོབ་དམག་འཁྲུག”ཞིག་དགོས་ཞེས་བྲིས།
སྣང་ཚུལ་དེར་འགྱུར་བ་གཏོང་ཆེད། ང་ཚོས“རིམ་གསུམ་འབྲེལ་འདེམས”ཀྱི་ལས་རྣམ་གསར་པ་བཏོད། ང་དང་སྡེ་སྡོད་ལས་དོན་རུ་ཁག་གི་ལས་གྲོགས་རྣམས་ཁྱིམ་ཚང་78ལ་ཕྱིན་ནས་བརྟག་དཔྱད་བྱས། སྡེ་པའི་ཏང་ཀྲི་པུའུ་ཧྲུའུ་ཅི་ཨ་སྒྲོན་དང་སྡེ་པའི་ཨུ་ལྷན་གྱི་ཀྲུའུ་རེན་དཔལ་ལྡན་གཉིས་ཀྱི་རོགས་རམ་འོག བོད་སྐད་རྐྱང་རྐྱང་བཤད་པའི་སྡེ་མིར་འབྲེལ་འདྲིས་བྱས་ནས་ཐོག་མའི་བརྟག་འདེམས་བྱས། འབར་ཁམས་གྲོང་ཁྱེར་མི་དམངས་སྨན་ཁང་གི་སྨན་པ་རྣམས་ཀྱིས་ང་ཚོས་མཁོ་འདོན་བྱས་པའི་དཔྱད་གཞི་ལྟར་བདེ་ཐང་ཡིག་ཚགས་སྒྲིག །ཉེན་ཚབས་ཆེ་བའི་མི་ཚོགས་ལ་ཁྱད་དུ་རྟགས་བརྒྱབ། མཇུག་མཐར་ངས་སྙན་ཞུ་ཕུལ་བ་བརྒྱུད་ཞིང་ཆེན་རུས་ནད་སྨན་ཁང་གི་ཆེད་མཁས་ཚོགས་པས་ནད་པ་སོ་སོར་མཐུན་པའི་སྨན་བཅོས་ཇུས་གཞི་བཟོས། ཆར་ཞོད་ཆེ་བའི་མཚན་མོ་དེར། བགྲེས་སོང་ཕུན་ཚོགས་ཀྱི་པུས་ཚིགས་དབྱིབས་འགྱུར་ཚབས་ཆེན་བྱུང་བ་ཤེས་རྗེས། མཚན་དགུང་གི་ཆུ་ཚོད་23དང་སྐར་མ་17ཡིན་ནའང་། ངས་སྨན་ཁང་གི་ཆེད་མཁས་པར་ཁ་པར་བཏང་བ་ཡིན། ཆུ་ཚོད་ཕྱེད་ཀ་ཙམ་ལ་ཁ་པར་བརྒྱབ་རྗེས། ང་ཚོས་བགྲེས་སོང་ཕུན་ཚོགས་ལ“སྨན་རྫས་ཚོད་འཛིན+དངོས་ལུགས་ཁམས་གསོ”གཉིས་འབྲེལ་གྱིས་སྐས་རིམ་སྨན་བཅོས་ཇུས་གཞི་གཏན་འཁེལ་བྱས་པ་ཡིན།
ཐེངས་འདིའི“རུས་པའི་བདེ་ཐང་ལ་གཅེས་སྐྱོང་དང་གྲོང་གསེབ་དར་རྒྱས་ལ་འདེགས་སྐྱོར་བྱེད་པའི”འོས་འགན་སྨན་བཅོས་བྱེད་སྒོ་ཡག་པོ་སྤེལ་བར་ང་ཚོས་ཉིན་གསུམ་ལ་གྲ་སྒྲིག་བྱས། འབར་ཁམས་གྲོང་ཁྱེར་གྱི་རིམ་པ་ཁག་གི་འགོ་ཁྲིད་ཀྱི་རྒྱབ་སྐྱོར་འོག །
ཞིང་ཆེན་རུས་ནད་སྨན་ཁང་གི་ཆེད་མཁས་ཚོགས་པ་ར་ཅོ་སྡེ་པར་ཡོང་ནས། ངང་རྒྱུད་རིང་པོས་སྡེ་མི་ཚང་མར་བརྟག་དཔྱད་བྱས་ནས་ཆེད་ལས་ཀྱི་སྨན་བཅོས་བསམ་འཆར་བཏོན། དེ་མིན་ང་ཚོས་ཀྲུང་ལུགས་སྨན་རྫས་400ལྷག་བྱིན་པ་དང་མི་ཐེངས་300ལྷག་ལ་སྨན་བཅོས་ཞབས་ཞུ་བཏོན། ང་རང་སེམས་འགུལ་ཐེབས་པ་ཞིག་ལ། དམ་པ་ཡུལ་ཚོ་ནས་རླངས་འཁོར་ལ་བསྡད་ནས་ཆུ་ཚོད་གཅིག་དང་ཕྱེད་ཀའི་ལམ་ཐག་བརྒྱུད་ནས་ཡོང་བའི་བོད་རིགས་གཞོན་ནུ་ཚེ་རིང་གིས་སྐད་ངག་འདར་བཞིན་ནད་ཐོ་མཐུག་པོ་དེ་བསྟན་ཞོར་སྨན་པར་འདི་ལྟར་འདྲི། སྨན་པ་ལགས། ངས་བཤགས་བཅོས་མ་བྱས་ན་ཆོག་གམ། དེའི་ལན་དུ་ང་ཚོའི་ཆེད་མཁས་སྨན་པས་དཔེ་གསོན་པོ་ཞིག་བཞག་པ་སྟེ། ནོར་གནག་གི་རྨིག་པ་བཅོས་པ་བཞིན་སྔ་ནས་བཅོས་ནས་ལེགས་པོ་འདུག །དེ་མ་ཡིན་པར་ཕྱི་སོང་ན་རྐང་པ་གཅོད་དགོས་འདུག་ཅེས་བཤད། ཚེ་རིང་གིས་དེར་ཉན་རྗེས་གདོང་ལ་འཛུམ་མདངས་མངོན།
འོས་འགན་སྨན་བཅོས་མཇུག་སྒྲིལ་སྐབས། ང་ཚོས་ཉེན་ཁ་ཆེ་བའི་ནད་པ་3གདམས་ནས་སྡེ་པ་ཡོངས་ཀྱི་རུས་པའི་བདེ་ཐང་གྲངས་མཛོད་ཐོག་མ་བཟོས། དེ་ལས་བགྲེས་སོང་ཕུན་ཚོགས་དང་བསོད་ནམས་གཉིས་ལ་ང་ཚོས་འགྲོ་རོགས་བྱས་ཏེ། ཞིང་ཆེན་རུས་ནད་སྨན་ཁང་དུ་སྨན་བཅོས་བྱས། འབར་ཁམས་གྲོང་ཁྱེར་མི་དམངས་སྨན་ཁང་གིས་ཀྱང་དུས་བཅད་ལྟར་མཚམས་འདྲི་བྱ་ངེས། ནད་རྟགས་ངོས་ཟིན་པའི་ནད་པ་ཚང་མར་ཀ་གསུམ་སྨན་ཁང་གིས་སྔོན་ལ་ཐོ་འགོད་བྱེད་དབང་བརྩོན་ལེན་བྱས། ཨ་སྒྲོན་གྱིས་ཆེད་མཁས་པ་རྣམས་ལ་ཁ་བཏགས་ཕུལ་དུས། ངས་རང་ཉིད་ཞིང་ཆེན་རུས་ནད་སྨན་ཁང་གི་ལས་གནས་ལ་ཞུགས་སྐབས་འགོ་ཁྲིད་རྒན་པས་ང་ལ་ང་ཚོ་བདེ་ཐང་གི་སྒོ་སྲུང་བ་བྱ་དགོས་ཞེས་པའི་གཏམ་གླེང་དེ་དྲན་བྱུང་།
སྡེ་སྡོད་ལས་དོན་རུ་མི་ཞིག་ཡིན་པའི་ངོས་ནས། རུས་པའི་བདེ་ཐང་ནི་གསོ་རིག་གི་གནད་དོན་ཞིག་ཡིན་པར་མ་ཟད། གྲོང་གསེབ་དར་རྒྱས་ལས་དོན་གྱི་ལྷུ་ཚིགས་གལ་ཆེན་ཞིག་ཀྱང་ཡིན་པར་ངེས་ཤེས་གསལ་པོ་བྱུང་། བོད་རིགས་སྤུན་ཟླ་རྣམས་ཀྱིས་རང་འགུལ་ངང་བརྟག་དཔྱད་དུ་འགྲོ་བ་དང་། ཞིང་ཆེན་རུས་ནད་སྨན་ཁང་གི་སྨན་བཅོས་ཚད་གཞི་སྡེ་པ་རིམ་པའི་བདེ་ཐང་དོ་དམ་ནང་འདྲེས་པ་ན། དེ་ནི་བདེ་ཐང་འགྲན་རྒྱུགས་ཀྱི་མགོ་བརྩམས་པ་གསལ་པོར་རྟོགས། ངས་སྡེ་སྡོད་ཉིན་ཐོར་རང་ཉིད་གངས་རིའི་སྟེང་གི་ལྕགས་གཟེར་བཞིན། ཚེ་སྲོག་གི་ལྗིད་ཚད་འདེགས་ཐུབ་ལ་གྲོང་ཁྱེར་དང་གྲོང་གསེབ་ཀྱི་བརྩེ་ཞེན་སྦྲེལ་ཐུབ་པའི་སྨོན་འདུན་ཞུ་ཞེས་བྲིས། །
（རྩོམ་པ་པོ་ནི་སི་ཁྲོན་ཞིང་ཆེན་རུས་ནད་སྨན་ཁང་གིས་རྔ་བ་བོད་རིགས་ཆའང་རིགས་ཁུལ་འབར་ཁམས་གྲོང་རྡལ་ར་ཅོ་སྡེ་པར་མངགས་པའི་སྡེ་སྡོད་ལས་དོན་རུ་མི་ཞིག་རེད།）