ཀ་ཁའི་མགོ་རྐང་བསྒྲིགས་པའི་རིག་པ་དེ་ཞན་རུང་། །
ཡུན་རིང་སེམས་ལ་ཉར་བའི་འཆར་ཡན་གྱི་རི་མོ། །
སྐད་ཆའི་རྩལ་ལ་སྦྱར་ནས་བུ་མོ་ཁྱོའི་སྣང་བརྙན། །
དེ་རིང་ངས་ཀྱང་སྙིང་རྗེའི་བདག་མོ་ཁྱོད་གླེང་ན། །
སྨུག་པ་ལང་ལོང་འཐིབས་པའི་རྫ་འདབས་དེའི་ལྷས་ན། །
བེའུ་རྡང་ལ་འདོགས་པའི་འབྲོག་མོ་ཁྱོད་དྲན་ན། །
དབྱར་གསུམ་སྦྲང་ཆར་སིལ་མའི་གོ་ཁྲབ་ཏེ་གྱོན་པའི། །
མི་ཁོམ་གནས་བརྒྱད་འཁོར་བའི་ཡུལ་དྲུང་གི་དཔའ་མོ། །
མེ་ཏོག་སྣ་བརྒྱ་བཞད་པའི་ཐང་ཆེན་གྱི་དཀྱིལ་ན། །
བེའུ་ཆུང་ཐང་ལ་འཚོ་བའི་ཞི་དུལ་གྱི་འབྲོག་མོ། །
སྤང་ཐང་མེ་ཏོག་སེར་ཆེན་མགོ་རྒྱན་རང་བྱས་པས། །
མཛེས་སྡུག་བུ་མོའི་དྭངས་རྩེ་འབྲོག་མོ་ཁྱེད་ལས་སུ། །
སྦྲ་རྒན་དུ་བ་ཅན་གྱི་ཕྱི་ནང་ན་རྒྱུ་བའི། །
གཤིས་བཟང་འབྲོག་མོ་ཆུང་ཆུང་སེམས་ཁུངས་ནས་གླེང་ན། །
སྐྱ་རེངས་ཐོད་ལ་བླངས་ནས་བཞོ་དབྱངས་ཀྱི་ཁྲོད་ན། །
བེའུ་རྡང་ནས་མངག་པའི་འབྲོག་མོ་དེ་སྙིང་རྗེ། །
འོ་ཇ་ལྷོག་ལྷོག་ཁོལ་བའི་ཐབ་ཁ་ཡི་གཡོན་ན། །
འབྲི་མོ་གཡང་ལྷ་མ་ཚོའི་དྲིན་ལན་རང་སེམས་ནས། །
འོ་མའི་མཆོད་ཁ་འཕེན་པའི་འབྲོག་མོ་ཁྱོད་གླེང་ན། །
བཙན་པོའི་ཕ་མཁར་སྨུག་པོའི་རྟག་བརྟན་གྱི་བདག་མོ། །