གློག་བརྙན་འཁྲབ་ཁྲིད་པ་གྲགས་ཅན་བསྟན་འཛིན་དབང་རྒྱལ་གྱི་མི་ཚེའི་སྒྱུ་རྩལ་གྱི་ལམ་བུ་གླེང་བ།

མཚམས་སྦྱོར་མདོར་བསྡུས།

བསྟན་འཛིན་དབང་རྒྱལ་ལགས་ནི་ཤར་དུང་རིའི་འདབས་ཀྱི་འབྲོག་ཁྱིམ་དཀྱུས་མ་ཞིག་ནས་སྐྱེས་ཤིང་། དེ་སྔོན་མཛོད་དགེ་རྫོང་རྒྱང་བསྒྲགས་བརྙན་འཕྲིན་ཁང་དུ་བརྙན་ཕབ་ཀྱི་ལས་ལ་གཞོལ། ཕྱིས་སུ་པེ་ཅིན་གློག་བརྙན་སློབ་ཆེན་དུ་བརྙན་འཕྲིན་ལེ་ཚན་ཕབ་སྐྲུན་ལ་སློབ་སྦྱོང་བྱས་ཏེ་མཐར་གློག་བརྙན་བརྙན་འཕྲིན་ལས་རིགས་སུ་ལས་སྣེ་བསྒྱུར། ཁོང་ནི་ཀྲུང་དབྱང་བརྙན་འཕྲིན་ཁང་གི་དངོས་བཤུས་གློག་བརྙན་གྱི་གསར་རྩོམ་པ་གཙོ་བོའི་ཚོགས་པའི་གྲས་སུ་ཚུད་པའི་བོད་ཀྱི་གློག་བརྙན་འཁྲབ་ཁྲིད་པ་དང་པོ་ཡིན། གཏམ་རྒྱུད་གློག་བརྙན་བརྩམས་ཆོས་ལ《རླུང་》《གྲྭ་པ་ཆུང་ཆུང་གི་ལོ་སར》《ཤམ་བྷ་ལ་འཚོལ་བ》《དབང་མོའི་དབྱར་གཞུང་》སོགས་དང་།

དངོས་བཤུས་གློག་བརྙན་བརྩམས་ཆོས་ལ《མིག་འབྲུ་བ》《ཤམ་བྷ་ལའི་ཞིང་ཁམས》《ལོ་ལེགས་ཀྱིས་ཕྱུག་པའི་ཀྲུང་གོ》《ང་གནས་ས་ཆུ་བོའི་འགོ་ཁུངས་ཡིན》སོགས་ཡོད། ཁོང་གི་བརྩམས་ཆོས་ཁ་ཤས་ལ་2020ལོའི་སྐབས་15པའི་རོ་མའི་རྒྱལ་སྤྱིའི་གློག་བརྙན་དུས་ཆེན་གྱི་ཕྱི་སྐད་གློག་བརྙན་ལེགས་ཤོས་ཀྱི་བྱ་དགའ་དང་ཀྲའེ་ཕུའུ་ཨར་རྒྱལ་སྤྱིའི་གློག་བརྙན་དུས་ཆེན་གྱི་JIFFགཏམ་རྒྱུད་གློག་བརྙན་ཡག་ཤོས་སུ་མིང་འདོན་དང་། 2020ལོའི་ཧའེ་ནན་རྒྱལ་སྤྱིའི་གློག་བརྙན་དུས་ཆེན་གྱི་མི་གསར་པའི་མཚན་སྙན་གྱི་བརྙན་ཕབ་ལེགས་ཤོས་སུ་མིང་འདོན། སྐབས་25པའི་ཧྥུའུ་ཧྲན་རྒྱལ་སྤྱིའི་གློག་བརྙན་དུས་ཆེན་ཨེ་ཤེ་ཡའི་གློག་བརྙན་གྱི་སྒེའུ་ཁུང་རུ་བདམས་པ། 2021ལོའི་ཧྥུའུ་ཧྲན་རྒྱལ་སྤྱིའི་གཞོན་ནུ་ལོ་ཆུང་གི་གློག་བརྙན་དུས་ཆེན་ཐོག་འགྲེམ་སྟོན། FIRSTགཞོན་ནུའི་རྒྱལ་སྤྱིའི་གློག་བརྙན་དུས་ཆེན་གྱི་དངོས་བཤུས་གློག་བརྙན་ལེགས་ཤོས་སུ་མིང་འདོན། སྐབས་བཅུ་གཅིག་པའི་ཀྲུང་གོའི་རང་སྒེར་བརྙན་པར་འགྲེམས་སྟོན་ལོ་འཁོར་གྱི་དངོས་བཤུས་གློག་བརྙན་ལེགས་ཤོས་བཅུའི་བྱ་དགའ། ཀྲུང་གོའི་བརྙན་ཡོལ་གྱི་ལོ་འཁོར་གཉིས（ལུའོ་ཧྲན་ཅུའུ）ཐོག་འགྲེམ་སྟོན། སི་ཕེན་གྱི་Imagine Indiaརྒྱལ་སྤྱིའི་གློག་བརྙན་དུས་ཆེན་གྱི་འགྲེམ་སྟོན་ཚན་པའི་ནང་ཚུད་པ་སོགས་གྲུབ་འབྲས་མི་དམན་པ་བླངས་ཡོད་དོ། །

གསར་འགོད་པ། རྒན་བསྟན་འཛིན་དབང་རྒྱལ་ལགས། ཐོག་མར་ཁྱེད་རང་ནས་གློག་བརྙན་ལས་རིགས་ཀྱི་ལམ་ཁ་འདི་བདམས་དགོས་དོན་དང་དེར་ཅི་ལྟར་ཞུགས་ཚུལ་ཐད་ནས་ཅུང་ཙམ་གླེང་རོགས་ཞུ།

བསྟན་འཛིན་དབང་རྒྱལ། ང་རང་གློག་བརྙན་ལ་དགའ་ཞེན་ཆེ་བ་ནི་སེམས་གཏིང་ནས་བརྙན་གཟུགས་འཇིག་རྟེན་ལ་ཡིད་སྨོན་བྱེད་པས་ཡིན། དང་ཐོག་ངས་བརྙན་འཕྲིན་ཁང་དུ་བྱ་བ་སྒྲུབ་པ་ཡིན། སྨྱན་སྦྱོར་གསར་པའི་ཆེད་བརྗོད་གློག་བརྙན་དང་དངོས་བཤུས་བརྙན་ཐུང་མང་པོ་སྒྲིག་བཟོ་བྱེད་པར་ཞུགས། བརྒྱུད་རིམ་དེས་ང་ལ་བརྙན་ཕབ་ཀྱི་ཉམས་མྱོང་ཕུན་སུམ་ཚོགས་པོ་བསགས་ཡོད་ལ། གློག་བརྙན་ཕབ་སྐྲུན་ལ་སྤྲོ་བ་ཆེན་པོ་སྐྱེས་སུ་བཅུག 2007ལོར། ང་སྒེར་གྱིས་སྒོར་མོ་ཕུད་ནས་པེ་ཅིན་གློག་བརྙན་སློབ་གླིང་དུ་གློག་བརྙན་ཕབ་ལེན་ཟབ་སྦྱོང་བྱེད་དུ་སོང་། སྐབས་དེར། ང་དངོས་གཞིའི་འཛིན་གྲྭའི་སློབ་མའི་བརྩམས་ཆོས་ཕབ་ལེན་བྱེད་པར་ཞུགས་ཏེ། ལག་ལེན་གྱི་གོ་སྐབས་ཡོད་ཚད་དམ་འཛིན་བྱས། ལོ་དེ་དག་གི་རིང་ལ། ང་རང་དུས་ཡུན་རིང་པོར་ཁྲོན་བོད་མཐོ་སྒང་དུ་བསྐྱོད་དེ། ཀྲུང་དབྱང་བརྙན་འཕྲིན་ཁང་གི《ཤམ་བྷ་ལའི་ཞིང་ཁམས》དང་། 《ཀྲུང་གོའི་གཟུགས་བརྙན་ལོ་རྒྱུས》སོགས་ཀྱི་རང་བྱུང་སྤྱི་ཚོགས་རིགས་ཀྱི་དངོས་བཤུས་གློག་བརྙན་རྣམ་གྲངས་མང་པོ་ཕབ་ལེན་བྱེད་པར་ཞུགས་པ་ཡིན། མཐོ་སྒང་གི་བརྗིད་ཆགས་ལྡན་པའི་ཡུལ་ལྗོངས་དང་བབ་ཆགས་ཀྱི་དམངས་སྲོལ་ཚང་མ་ངའི་པར་སྣེའི་རྩ་ཆེའི་རྒྱུ་ཆ་ཡིན་ལ། ངའི་རྗེས་ཕྱོགས་ཀྱི་གློག་བརྙན་ཕབ་སྐྲུན་བྱེད་པར་རྨང་གཞི་བརྟན་པོའང་བཏིང་ཡོད།

གསར་འགོད་པ། 《རླུང་》ཞེས་པ་ནི་བོད་ཀྱི་བུད་མེད་བརྗོད་དོན་བྱས་པའི་གློག་བརྙན་བརྩམས་ཆོས་ཐོག་མ་དེ་རེད། སྔ་ཕྱིར་རྒྱལ་ཁབ་ཕྱི་ནང་གི་བྱ་དགའ་ཆེན་པོ་དགུ་ཐོབ་ལ། ཀུན་གྱིས་དོ་ཁུར་ཆེན་པོ་ཐོབ། ཁྱེད་ཀྱིས་བལྟས་ན་གློག་བརྙན་འདི་ལ་བོད་ཀྱི་རིག་གནས་ཁྱབ་སྤེལ་དང་དེ་བཞིན་བུད་མེད་ཀྱི་དཔྱད་བརྗོད་ཐད་དོན་སྙིང་ཅི་ཞིག་ལྡན་ཡོད་དམ།

བསྟན་འཛིན་དབང་རྒྱལ། ང་ལ་མཚོན་ན་བྱ་དགའ་དུ་མ་ཐོབ་པ་དང་གཟིགས་མོ་བའི་དོ་ཁུར་གནང་བར་དགའ་སྤྲོ་ཚད་མེད་སྐྱེས་བྱུང་། གློག་བརྙན་གྱི་ལམ་ཁ་རུ་སྔར་བས་ཆོད་སེམས་བརྟན་པོས་མདུན་སྐྱོད་བྱེད་པར་སྐུལ་མ་ཆེན་པོ་ཐེབས། དེའང་གློག་བརྙན་འདི་འཁྲབ་གཞུང་རྩོམ་པ་པོའི་བྱིས་དུས་ཀྱི་ལོ་རྒྱུས་ལ་གཞིགས་ནས་གསར་རྩོམ་བྱས་པ་དང་། བོད་རིགས་མང་ཚོགས་ཀྱི་དུས་རྒྱུན་འཚོ་བ་མངོན་པ་དང་མི་སྣའི་བརྩེ་དུང་གིས་རབ་ཏུ་ཕྱུག་པར་བྱས། བོད་ཀྱི་རིག་གནས་ཁྱབ་སྤེལ་གྱི་ངོས་ནས་བརྗོད་ན། གློག་བརྙན་གྱིས་བོད་ཁམས་ཀྱི་རང་བྱུང་མཛེས་ལྗོངས་དང་དམངས་སྲོལ་གྱི་ཉམས་འགྱུར་མངོན་པར་བྱས་ཡོད་ལ། མི་དེ་བས་མང་པོས་བོད་ཀྱི་རིག་གནས་ཀྱི་ཡིད་དབང་འཕྲོག་ཤུགས་ཤེས་རྟོགས་ཐུབ་པ་དང་དུས་མཚུངས་སྲོལ་རྒྱུན་གྱི་གོམས་སྲོལ་ཁྲོད་ཀྱི་གོམས་སྲོལ་ངན་པ་ཁག་གཅིག་མངོན་པ་དང་ཕྱིར་འདང་བརྒྱབ་པ་བརྒྱུད་ནས་བོད་ཀྱི་རིག་གནས་ཀྱི་རང་ངོས་ལ་ཞིབ་ལྟ་དང་འཕེལ་རྒྱས་ལ་སྐུལ་འདེད་གཏོང་ཐུབ་སྙམ། བུད་མེད་ཀྱི་བརྗོད་བྱར་དཔྱད་བརྗོད་བྱེད་པའི་ཐད་གློག་བརྙན་གྱིས་བོད་རིགས་བུད་མེད་ཚོའི་སྲོལ་རྒྱུན་རིག་གནས་ཁྲོད་འཕྲད་པའི་དཀའ་ངལ་དཔེར་ན་ཁྱིམ་ཚང་གི་གནས་བབ་ཞན་པ་དང་མཐོང་ཆུང་བྱེད་པ་སོགས་ལ་དོ་ཁུར་བྱས་ཏེ་སྤྱི་ཚོགས་ཀྱིས་བོད་རིགས་བུད་མེད་ཚོགས་སྤྱིར་དོ་ཁུར་བྱས་ཏེ་ཕོ་མོ་འདྲ་མཉམ་མངོན་འགྱུར་ཡོང་རྒྱུར་སྐུལ་འདེད་གཏོང་རྒྱུའི་རེ་བའང་མངོན་ཡོད། མ་འོངས་པར། ངས་བོད་ཀྱི་བརྗོད་གཞིར་མུ་མཐུད་གཞི་བཙུགས་ཏེ་བུད་མེད་ཀྱི་བརྗོད་གཞི་ལ་དོ་ཁུར་དང་གློག་བརྙན་གྱི་ལམ་ནས་མི་སེམས་འགུལ་བའི་གཏམ་རྒྱུད་དེ་བས་མང་བ་བརྗོད་ཅི་ཐུབ་བྱ་རྒྱུ་ཡིན།

གསར་འགོད་པ། གློག་བརྙན《རླུང་》ཞེས་པ་རྩོམ་པ་པོ་གྲགས་ཅན་ཨ་ལེགས་ཀྱི་སྒྲུང་ཐུང་《ཁྱི་ཕྲུག་དགེ་ལྷ》འཁྲབ་གཞུང་དུ་བསྒྱུར་བ་རེད། གོ་སྐབས་གང་འདྲ་ཞིག་གིས་ཁྱེད་ཀྱིས་བརྩམས་སྒྲུང་དེ་འཁྲབ་གཞུང་དུ་བདམས་པ་དང་། གཙོ་འཁྲབ་ཕོ་ནས་མོ་རུ་བསྒྱུར་ཏེ་བོད་ཀྱི་བུད་མེད་བརྗོད་དོན་ཐད་ཀྱི་གློག་བརྙན་ཞིག་ཏུ་གསར་རྩོམ་བྱས་པ་ཡིན།

བསྟན་འཛིན་དབང་རྒྱལ། ང་དང་དགེ་རྒན་ཨ་ལེགས་གཉིས་ནི་ཡུལ་གྲོགས་ཡིན། དུས་རྒྱུན་ཁོང་གི་བརྩམས་ཆོས་བཀླགས་རྒྱུར་ཤིན་ཏུ་དགའ། 《ཁྱི་ཕྲུག་དགེ་ལྷ》ཡི་གཏམ་རྒྱུད་དང་རྩོམ་རིག་རང་བཞིན་གྱིས་ངའི་ཡིད་སེམས་བཀུག་ཅིང་། དེར་ནང་དོན་ཟབ་མོ་སློག་རྒྱུ་ཡོད་པས། གཙོ་འཁྲབ་བུ་མོར་བསྒྱུར་བ་ཡིན། ཕྱོགས་གཅིག་ནས་ངས་བོད་རིགས་བུད་མེད་ཀྱི་འཚོ་གནས་རྣམ་པར་མྱོང་ཚོར་ཟབ་མོ་ཡོད་ལ། ཁོ་མོ་ཚོས་སྲོལ་རྒྱུན་གྱི་གོམས་སྲོལ་འོག་དྲང་བདེན་མིན་པ་སོགས་ཀྱི་དཀའ་སྡུག་མང་པོ་ཞིག་མྱངས་བཞིན་ཡོད་མོད། འོན་ཀྱང་རང་གི་གཞུང་དྲང་ལས་བརྩོན་གྱི་གཤིས་རྒྱུད་བཟང་པོ་ནམ་ཡང་རྒྱུད་ནས་འདོར་མྱོང་མེད། དེ་ནི་ཅི་འདྲའི་རྗེས་སུ་ཡི་རངས་བྱ་འོས་པ་ཞིག་རེད། དེ་བས་ངས་གློག་བརྙན་བརྒྱུད་ནས་ཁོ་མོ་ཚོའི་དཀའ་ངལ་དང་རང་རྒྱུད། གོ་རྟོགས་བཅས་མངོན་འདོད། ཕྱོགས་གཞན་ཞིག་ནས་གཙོ་འཁྲབ་བུ་མོར་བསྒྱུར་ན་གློག་བརྙན་དེ་བོད་ཀྱི་གློག་བརྙན་བརྗོད་གཞིའི་ཁྲོད་ཐུན་མིན་ཁྱད་ཆོས་ལྡན་པ་མ་ཟད། ད་དུང་དེ་བས་གཏིང་ཟབ་པའི་སྒོ་ནས་བུད་མེད་ཀྱི་བརྗོད་གཞི་གླེང་མོལ་བྱེད་ཐུབ།

གསར་འགོད་པ། ཁྱེད་ལ་མ་འོངས་པའི་གློག་བརྙན་གསར་རྩོམ་ཐད་འཆར་གཞི་དང་བསམ་ཚུལ་ཅི་ཞིག་ཡོད། མུ་མཐུད་དུ་བོད་ཀྱི་རིག་གནས་འཚོ་བ་དང་བུད་མེད་ཀྱི་བརྗོད་གཞི་གཙོ་བོར་འཛིན་རྒྱུ་ཡིན་ནམ།

བསྟན་འཛིན་དབང་རྒྱལ། མིག་སྔར་ཕྲེང་བསྟར་དངོས་བཤུས་གློག་བརྙན《སྙིང་ཉེ་བའི་དོམ་ཁྲ》དང《དངོས་སུ་བརྒྱུད་མྱོང་མཁན་གྱིས་བཤད་པ》ཞེས་པ་གྲ་སྒྲིག་བྱེད་བཞིན་ཡོད། མ་འོངས་པར་ངས་ད་དུང་བོད་ཀྱི་བརྗོད་གཞིར་དོ་ཁུར་བྱེད་ངེས་ཡིན། གང་ལགས་ཤེ་ན། དེ་ནི་ངའི་རྩ་བ་ཡིན། བོད་ཡུལ་དུ་ངོ་མཚར་ཕུན་སུམ་ཚོགས་པའི་གཏམ་རྒྱུད་དང་རིག་གནས་སྔོག་འདོན་བྱེད་རྒྱུ་ཡོད་པས་དེ་ནི་སྙིང་དོན་གཉིས་ལྡན་གྱི་རིན་ཐང་ལྡན་ཡོད་པ་ཞིག་རེད། བུད་མེད་བརྗོད་གཞིར་འཛིན་པའི་ཐད་ལ་ཡང་དོ་ཁུར་ཆེན་པོ་བྱེད་རྒྱུ་ཡིན། གལ་ཏེ་འོས་འཚམ་གྱི་གཏམ་རྒྱུད་དང་དེའི་སྐོར་གྱི་གསར་རྩོམ་གྱི་མྱོང་སྣང་རེ་སྐྱེས་ན། ངས་ཀྱང་གློག་བརྙན་བརྒྱུད་ནས་བུད་མེད་ཀྱི་ལས་དབང་ལ་དོ་ཁུར་བྱེད་ལུགས་མུ་མཐུད་མཚོན་པར་བྱ་རྒྱུ་ཡིན།

རྟག་ཏུ་བརྩོན་པ་མ་བཏང་ན། །མི་འགྲུབ་བྱ་བ་གང་ཡང་མེད། །འཁྲབ་ཁྲིད་པ་གྲགས་ཅན་བསྟན་འཛིན་དབང་རྒྱལ་གྱིས་བོད་ཀྱི་བུད་མེད་ཀྱི་ལས་དབང་ལ་དོ་ཁུར་དང་སྲོལ་རྒྱུན་གྱི་གོམས་སྲོལ་ལ་བསམ་གཞིགས་བྱས་ནས་གློག་བརྙན་འཁྲབ་ཁྲིད་ཀྱི་ལས་ལ་ནམ་ཡང་འབད་བཞིན་ཡོད། སླད་ཕྱིན་ང་ཚོར་ཕུལ་བྱུང་གི་བརྩམས་ཆོས་དེ་བས་མང་པོ་ཁྱེར་ཡོང་ནས་གློག་བརྙན་གསར་རྩོམ་ལས་མི་སེམས་འགུལ་བའི་གཏམ་རྒྱུད་མུ་མཐུད་བརྗོད་རྒྱུའི་རེ་བ་བྱེད་དོ། །