བཙན་པོའི་ཞབས་རྗེས་བཀྲ་བའི་རི་གྲོང།

སྟེང་ཆེན་གྱི་གནས་མཆོག་རི་བོ་རྩེ་དྲུག་ལས་ཕྱིར་ལོག་རྗེས། ཆབ་མདོ་གྲོང་ཁྱེར་ན་ཡོད་པའི་གྲོགས་པོ་ཚོ་དང་ལྷན་དུ་འཛོམས་ཏེ་ཁ་བརྡ་ལབ་གླེང་ཡུན་རིང་བྱས་པ་ཡིན། ཁོང་ཚོ་ནི་ལོ་ངོ་ཉི་ཤུའི་སྔོན་ལ་ངའི་སློབ་མ་ཡིན་ལ། མང་ཤོས་ཀྱིས་ད་ལྟར་དགེ་རྒན་བྱེད་བཞིན་ཡོད། དགེ་རྒན་ཞིག་ཡིན་ན་སློབ་མ་ཚོ་ལ་དཔེ་ཆར་གཏན་དུ་ཁེལ་ཟིན་པའི་ཤེས་བྱ་བསླབ་དགོས་པས་མ་ཚད། རི་ཆུའི་རིག་གནས་དང་དེའི་བར་ལ་གནས་པའི་ལོ་རྒྱུས་རིག་གནས་ཀྱི་རྟགས་མཚན་རྣམས་ཀྱང་བསྟན་ཏེ། རང་རྒྱུས་རང་ལ་ཡོད་དུ་འཇུག་དགོས་པ་གལ་ཆེན་པོ་ཞིག་རེད། ལོ་ངོ་ཉི་ཤུའི་སྔོན་ལ་ང་ནི་རྩ་ཚིག་དང་དཔེར་བརྗོད་ཁོ་ན་བཤད་དེ་གླ་ཕོགས་ཟ་མཁན་ཞིག་ཡིན་ཡང་། བར་དུ་ལོ་ངོ་བཅུ་ཙམ་གྱི་རིང་ལ་ངས་རི་བོ་མཐོན་པོ་ཐོད་པས་མཇལ། ཆུ་བོ་ཆེན་པོའི་ཟམ་པར་བགྲོད། ལུང་པ་དོག་པོ་གོམ་པས་འཇལ་བས། དུས་དེང་སང་ང་ལ་ལོ་རྒྱུས་ཀྱི་རྗེས་ཤུལ་དང་རིག་གནས་ཀྱི་རྟགས་མཚན་སོགས་བསླབ་ཚན་ན་མེད་པ་མང་པོ་བཤད་རྒྱུ་ཡོད་མོད། ད་ལྟར་རྗེས་སུ་འབྲངས་ལ་སྣོད་དུ་རུང་བ་ཞིག་མེད་པས་ཅི་བྱ།

ཕྱི་ཉིན་སྔ་མོར་གནམ་ངོ་དྭངས་ཤིང་གསལ་བས་ཡང་བསྐྱར་རྟེན་འབྲེལ་འགྲིག་པའི་ཉིན་མོ་ཞིག་རེད། གྲོགས་པོ་ཚོའི་སྐུལ་སློང་དང་སྨོན་ལམ་སེམས་ནང་བཞག་སྟེ་དཔའ་ཤོད་རྫོང་གི་ཕྱོགས་སུ་སོང་། ལ་རྒྱབ་ཐུར་བབ་གང་མང་བྱས་རྗེས་སྐད་གྲགས་ཆེ་བའི་གྱ་གྱུ་བདུན་ཅུ་དོན་གཉིས་ཡོད་པའི་ཉི་ལ་རི་མགོར་སླེབས། ཉི་ལ་རི་བོ་ལས་བབ་སྟེ་སྐར་མ་གྲོང་སོགས་བརྒྱུད་ནས་རྒྱལ་མོ་རྔུལ་ཆུའི་འགྲམ་ལ་ཐོན། གྲོག་རོང་ཟབ་མོར་བཞུར་བའི་རྒྱལ་མོ་རྔུལ་ཆུའི་བཞུར་ཚད་མགྱོགས་ལ་ཆུ་ཡི་མདོག་ཁ་ནི་འདམ་ཁུ་ཅན་ཞིག་རེད། བོད་ཀྱི་ཡུལ་དུ་མིང་ལ་རྒྱལ་མོ་རྔུལ་ཆུ་ཞེས་པའི་ཆུ་བོ་གཉིས་ཡོད་དེ། གཅིག་ནི་གདང་ལ་རི་རྒྱུད་ཀྱི་ནུབ་ངོས་ནས་བྱུང་ཞིང་། བོད་རང་སྐྱོང་ལྗོངས་ཀྱི་འབྲི་རུ་རྫོང་ཁོངས་སུ་ནག་ཆུ་དང་སོག་ཆུ་འཛོམས་རྗེས་རྒྱལ་མོ་རྔུལ་ཆུ་ཞེས་འབོད། དེ་ནས་སོག་དང་དཔལ་འབར། སྟེང་ཆེན། ལྷོ་རྫོང་། དཔའ་ཤོད། མཛོ་སྒང་། ཚ་བ་རོང་། ཡུན་ནན་ཞིང་ཆེན་གྱི་ནུབ་རྒྱུད་བཅས་བརྒྱུད་དེ་ཕྱི་རོལ་དུ་འབབ་པ་དེ་རེད། གཞན་ཞིག་ནི་ཆུ་འགོ་སྨར་ཁོག་དང་རྡོ་སྟོད་ཀྱི་ཡུལ་ནས་འབབ་ཅིང་། ཛམ་ཐང་། ཁྲོ་སྐྱབས། ཆུ་ཆེན། བཙན་ལྷ། རོང་བྲག་སོགས་བརྒྱུད་དེ་ལུའོ་ཧྲན་བྱམས་ཆེན་གྱི་མདུན་ལ་རྨིན་ཅང་དང་འདྲེས་པ་དེ་ལ་ཟེར། ཆུ་བོ་དེ་གཉིས་ལས་ཕྱི་མ་དེ་ནི་སི་ཁྲོན་ཞིང་ཆེན་གྱི་རྔ་བ་ཁུལ་དང་དཀར་མཛེས་ཁུལ་གྱི་ཁོངས་ནས་བཞུར་བཞིན་ཡོད་པས་ངས་ཐེངས་མང་པོར་མཇལ་མྱོང་ལ། དེའི་རྒྱུད་དུ་དར་བའི་ཡུལ་སྲོལ་རིག་གནས་དང་བཅས་པ་ལ་ཆ་རྒྱུས་ཀྱང་ཅུང་ཟད་ཡོད་མོད། སྔ་མ་དེ་ནི་ཐེངས་དང་པོར་མཇལ་བ་ཡིན་པས། དེ་སྔོན་རྨ་ཆུ་དང་འབྲི་ཆུའི་འགོ་ཁུངས་སུ་སོང་བ་ལྟར་ཆུ་བོ་དེའི་ཆུ་འགོ་དང་ཆུ་གཞུང་དུ་སོང་སྟེ། ཆུ་ལ་དཔག་པའི་ཉ་མོ་དང་རི་ལ་དཔག་པའི་རི་དྭགས་ལྟ་བུའི་རིགས་རྒྱུད་འཕོ་ཚུལ་དང་། རིག་གནས་དར་ཚུལ་ལ་རྒྱུས་ལོན་བྱེད་འདོད་ཤིན་ཏུ་ཆེ་སྟེ། ཆུ་ཡི་འགོ་ཁུངས་དང་བཞུར་ལམ་མི་གཅིག་ཀྱང་བོད་མིང་གཅིག་པའི་ཆུ་བོ་དེ་གཉིས་བར་ལ་འབྲེལ་བ་ཡོད་ངེས་པས་སོ། །

གྲོག་རོང་ཟབ་མོས་བཙིར་གནོན་ཇི་ལྟར་བྱས་ཀྱང་། རྒྱལ་མོ་རྔུལ་ཆུའི་བཞུར་འགྲོས་མ་འཁྱོར་བར་རྦ་རླབས་མཁའ་ལ་འཕྱུར། བཞུར་སྒྲ་བྲག་ཅར་འཁོར་ཏེ་ཁ་བའི་ཡུལ་གྱི་གླུ་དབྱངས་ལེན་བཞིན། ཕྱི་རོལ་གྱི་ལྟད་མོར་ཕེབས་པའི་ཚུགས་ཀ་ལ་ང་རང་སེམས་གཏིང་ནས་ཡིད་སྨོན་སྐྱེས།

རྒྱལ་མོ་རྔུལ་ཆུའི་གཡས་ཕྱོགས་ཀྱི་ལུང་པ་དེ་དེད་ནས་དཔལ་ཤོད་རྫོང་དུ་སླེབས། རྫོང་དེ་ཆགས་ས་ནི་ཚ་དྲོད་ཆེ་བའི་རོང་ས་ཞིག་རེད། ལམ་འགྲམ་ལ་སྟར་ཀ་དང་ཀུ་ཤུ་སོགས་སིལ་ཏོག་བཙོང་མཁན་མང་པོ་འདུག །རྫོང་དེའི་དཔའ་སྟོད་གྲོང་པར་བྲག་བརྐོས་རི་མོ་ཞིག་ཡོད་ཟེར་ཡང་། རྟ་བཅིབས་ན་ཉིན་ལམ་གཅིག་ཙམ་འགོར་ཞེས་པས་འགྲོ་མ་ཐུབ། དེ་ནས་མུ་མཐུད་དེ་ར་འོག་མཚོའི་ཕྱོགས་སུ་སོང་། ལམ་བར་དུ་དཀར་མཛེས་ཁུལ་གྱི་ཉག་རོང་དང་དཔལ་ཡུལ། རྔ་བ་ཁུལ་གྱི་མཛོད་དགེ་སོགས་ནས་རྐང་ཐང་ངམ་བརྐྱངས་ཕྱག་བཙལ་ནས་ལྷ་ས་ལ་མཆོད་མཇལ་དུ་འགྲོ་མཁན་མང་པོ་ཐུག །ལ་ལ་ཉིན་ཞག་བཅོ་བརྒྱད་ཙམ་དང་འགའ་ཤས་ཟླ་བ་གཅིག་ལྷག་ཙམ་འགོར་སོང་ཟེར། ཁོང་ཚོས་རྒྱབ་ཏུ་ཁུར་བའི་ཁུར་པོ་རླངས་འཁོར་གཏོང་མཁན་རྣམས་ལ་ཉིན་ལམ་གཅིག་ཙམ་གྱི་ས་ཚུགས་བར་དུ་འཁུར་རོགས་ཞེས་པས། ངས་མཛོད་དགེ་ནས་ཡོང་བའི་མི་བཞིའི་ཁུར་པོ་རྣམས་རླངས་འཁོར་ནང་བཅུག་སྟེ་ཁོང་ཚོ་ཕྱི་དྲོར་ཚུགས་འབབ་སར་བཞག་པ་ཡིན།

ཉི་མས་ལ་མོ་བརྒྱབ་ཟིན་པས་དཀྱིལ་དག་ཡུལ་ཤོག་གི་ལམ་འགྲམ་གྱི་སྤང་ལེབ་ཅིག་ཏུ་ཞག་སྡོད་བྱས། ཇ་བསྐོལ་ཏེ་ཕོ་བ་རྒྱགས་ཚད་ཅིག་ཟོས་རྗེས་ཉིན་ལམ་གཅིག་གི་མཐོང་ཐོས་རྣམས་ཟིན་ཐོར་འབྲི་དུས། རྐང་ཐང་གིས་མཆོད་མཇལ་དུ་འགྲོ་མཁན་རྣམས་ད་རུང་མུ་མཐུད་དུ་འགྲོ་བཞིན་ཡོད་པ་ཚོར་ལ། བརྐྱངས་ཕྱག་འཚལ་མཁན་རྣམས་ཀྱིས་ཡན་ལག་ས་ལ་ཕབ་པའི་ཧྲག་སྒྲ་གསལ་པོར་ཐོས། ཁོང་ཚོ་ལས་འགའ་ཤས་ནི་འདས་པོ་ཞིག་གི་ཆེད་དུ། ས་ནག་པོ་འདོམ་པས་འཇལ་ཏེ་དབུས་ལྷ་སར་གནས་མཇལ་དུ་འགྲོ་མཁན་རེད་ལ། ལ་ལ་ནི་འགྱོད་བཤགས་ཤིག་གི་སླད་དུ། སྤྲིན་དཀར་པོ་ཐོད་པས་བསུས་ཏེ་རི་ཆུའི་བར་ལ་དད་པའི་མདུད་པ་རྒྱག་མཁན་རེད། རྒྱུས་མེད་མཁན་རྣམས་ཀྱིས་ཁོང་ཚོས་འདི་འདྲའི་དཀའ་སྤྱད་སྡུག་རུས་རྒྱག་པ་མཐོང་དུས། གལ་སྲིད་སྐྱེ་བ་ཕྱི་མ་མེད་ན་ཚེ་འདི་སྡུག་ལ་སྦྱར་བ་མིན་ནམ་ཞེས་བཤད་མོད། ཁོང་ཚོ་ནི་ཚེ་འདིའི་བདེ་སྐྱིད་ལ་དགའ་ཞིང་སྐྱེ་བ་ཕྱི་མའི་སྡུག་བསྔལ་ལ་ཡང་སྐྲག་ཤེས་མཁན་གྱི་མི་རིགས་ཤིག་ཡིན་པས། སྐྱེ་བ་ཕྱི་མའི་བདེ་བའི་ཞིང་ཁམས་ཞེས་རེ་ཞིང་སྒུག་པ་ཙམ་མ་ཡིན་པར། ཚེ་འདིའང་ཤམ་བྷ་ལའི་ཞིང་ཁམས་སུ་འགྱུར་བར་འབད་པ་རེད།

ཕྱི་ཉིན་སྔ་མོ་ནས་ལངས་ཏེ་ཨ་མཆོད་ལ་བརྒྱབ་རྗེས་ར་འོག་མཚོ་ཡོད་སར་སླེབས། ར་འོག་མཚོ་ནས་འབབ་པའི་ཆུ་བོ་བཞུར་སའི་ལུང་པ་དེ་ལ་ཕར་ལུང་གྲོག་རོང་ཟེར། ཆུ་སྣ་མང་པོ་འདུས་པའི་ཕར་ལུང་གཙང་པོའི་འབབ་ཡུལ་ཕར་ལུང་གྲོག་རོང་དུ་རྩྭ་རྩི་ཤིང་ཕུན་སུམ་ཚོགས་པས། འཛམ་གླིང་རྩི་ཤིང་གི་བང་མཛོད་ཅེས་པའི་མིང་ཡོད་ལ། གྲོང་རོང་གི་སྟོད་སྨད་བར་གསུམ་ན་གནམ་ངོའི་འགྱུར་ལྡོག་ལྟར་སྐད་སྙན་མོ་སྒྲོག་ཤེས་པའི་བྱ་བྱེའུ་དང་། འགྲོ་བ་མི་ལྟར་དགའ་སྐྱོ་ཆགས་སྡང་ཅན་གྱི་རི་དྭགས་གཅན་གཟན་མང་པོ་ཡོད་ངེས་པས། རང་བྱུང་ཁམས་ཀྱི་ལྷད་མེད་དྭངས་གཙང་དང་། འུར་མེད་ལྷིང་འཇགས། དགྲ་མེད་ཞི་མཐུན་གྱི་འཚོ་བར་དགའ་མཁན་ཚོ་ལ་མཚོན་ན། གནས་དེ་ནི་བདེ་ལྡན་གྱི་ཞིང་ཁམས་ཤིག་རེད།

ཕར་ལུང་གྲོག་རོང་གི་འདབས་ཙམ་ལ་སླེབས་དུས་པུར་རྒྱལ་གྱི་འཁྲུངས་ཡུལ་ཞེས་བྲིས་པའི་སྒོ་ཆེན་ཞིག་མཐོང་། བོད་ཀྱི་རྒྱལ་པོ་ཐོག་མ་གཉའ་ཁྲི་བཙན་པོ་ནི། རྒྱ་གར་ནས་ཡོང་བའམ་གནམ་ལས་བབས་པ་སོགས་བརྩད་བརྩད་པའི་མཐར། ཁོང་ནི་ས་ཆ་གཞན་པ་གང་ལས་ཀྱང་ཡོང་བ་མིན་པར་བོད་རང་གི་ཡུལ་སྤོ་བོ་ལ་འཁྲུངས་པ་ཡིན་ཞེས་ཚང་མས་ཁས་བླངས་པ་ལྟར། ས་ཆ་དེ་ནི་སྤོ་བོ་རྫོང་ཡིན་པ་ཤེས་ཏེ་མི་མང་པོ་ལ་གཉའ་ཁྲི་བཙན་པོ་འཁྲུངས་ས་དྲིས་ཀྱང་ལན་གསལ་པོར་འདེབས་མཁན་ཞིག་ལ་མ་ཐུག །མཐར་རྒན་པོ་ཞིག་གིས་འདི་ན་ནས་སོང་ན་ཟམ་པ་ཞིག་དང་ཐུག །ཟམ་པ་དེ་ནས་ཉིང་ཁྲིའི་ཕྱོགས་སུ་མ་འགྲོ་བར་གཡོན་ཕྱོགས་ཀྱི་ལུང་པ་ནང་སོང་ན། གཉའ་ཁྲི་བཙན་པོའི་ཕ་ཡུལ་མཇལ་ཐུབ་ཅེས་པས་དེ་ལྟར་དུ་སོང་ནས་ཟམ་པ་ཡོད་སར་སླེབས། ཟམ་པའི་ཁ་ལ་ས་དེ་གའི་མི་ཞིག་ལ་དྲིས་པ་ན། ཟམ་པའི་གཡོན་ཕྱོགས་ཀྱི་ཆུ་མདོ་གྲོང་རྡལ་གྱི་ཁོངས་སུ་ཡོད་རེད་ཟེར། དེ་ནས་སྤྱི་ལེ་བཅུ་དགུ་ཙམ་སོང་རྗེས་སྤོ་སྟོད་ཆུ་བོའི་ཟམ་པར་ཐུག །ཟམ་པ་ལ་མ་ཐར་བས་རྐང་ཐང་དུ་ཆུ་མདོ་གྲོང་རྡལ་ལ་སོང་། ཆུ་མདོ་ཞེས་པ་ནི་སྤོ་སྟོད་ཆུ་བོ་དང་ཡེར་པ་ཆུ་བོ་གཉིས་འཛོམས་ས་རེད། ས་གྲུ་གསུམ་དང་གནམ་གྲུ་གསུམ། ཆུ་གྲུ་གསུམ་ཞེས་པའི་ས་ཆ་དེར་ཆུ་མདོ་དགོན་པ་ཞེས་དགེ་ལུགས་དགོན་པ་ཞིག་ཆགས་འདུག

གཉའ་ཁྲི་བཙན་པོའི་འཁྲུངས་ཡལ་བྱ་མོ་ཁ། 

གཉའ་ཁྲི་བཙན་པོ་འཁྲུངས་སར་ཕྱོགས་ཡོང་ནས་རྒྱུས་ལོན་བྱེད་ཐུབ་པའི་ཆེད་དུ། ས་དེ་གའི་གླ་འཁོར་གཏོང་མཁན་པད་མ་རྣམ་རྒྱལ་ཞེས་པར་གླ་ཆ་འདང་ཚད་ཅིག་སྤྲད་དེ་ལམ་སྣ་འཁྲིད་རོགས་ཞུས། ལམ་བར་དུ་ཁོང་གིས་བཤད་རྒྱུར། གཉའ་ཁྲི་བཙན་པོའི་འཁྲུངས་ཡུལ་ནི་ད་ལྟར་ང་ཡོད་སའི་གྲོང་ཚོ་དེ་རེད། མིང་ལ་བྱ་མོ་ཁ་ཟེར། དེ་སྔོན་དཔའ་ཁངས་གྲོང་ཚོ་དང་བྱ་མོ་ཁ་གྲོང་ཚོ་སོ་སོ་ཡིན་ཡང་དེང་སང་གཉིས་ཀ་བསྡུས་ནས་སྤྱི་མིང་ལ་དཔའ་ཁངས་གྲོང་ཚོ་ཟེར་ཞེས་བཤད། བྱ་མོ་ཁ་ཞེས་པའི་གྲོང་ཚོ་དེར་དུད་ཁ་བཅོ་བརྒྱད་ཙམ་ཐ་རེ་ཐོ་རེ་ཆགས་འདུག །

གྲོང་པའི་སྟོད་ཀྱི་གཡས་ཕྱོགས་སུ་ས་འཕགས་ཞེས་པའི་རི་ཞིག་ཡོད་པ་དེ་ནི་གཞི་བདག་དང་།

དེའི་འོག་ལ་བསང་གཏོང་སའི་ལ་བཙས་ཤིག་ཀྱང་སྣང་། དཀྱིལ་དུ་རི་ཞིག་ཡོད་པ་དེ་ནི་ནོར་བུ་མེ་འབར་དང་འདྲ། གྲོང་པའི་རྒྱབ་ཀྱི་རི་བོར་ལུང་པ་ཆུང་ཆུང་མང་པོ་འདུག །ལུང་པ་སོ་སོར་ཆུ་ཕྲན་ཡོད་པས་ཆུ་དམར་རོང་ཆེན་བཅོ་བརྒྱད་ཅེས་འབོད། གནའ་སྔོན་མར་གྲོང་པའི་སྟོད་ལ་མཚོ་ཞིག་ཡོད་པ་དེ་འཕྱུར་བས་གྲོང་པ་ཐེངས་གཅིག་དེད་མྱོང་། ད་ལྟའི་གྲོང་པ་ནི་རྗེས་སུ་གསར་དུ་ཆགས་པ་རེད་ཟེར། གྲོང་མི་འགའ་ལ་དྲིས་ཀྱང་གཉའ་ཁྲི་བཙན་པོའི་ཕ་ཡུལ་འདི་རེད་ཟེར་བ་ཙམ་ལས། ཡང་སྙིང་འཁྲུངས་སའི་གནས་དང་རྗེས་ཤུལ་ཅི་ཡང་མཇལ་རྒྱུ་མི་འདུག་ལ། ལོ་ངོ་སྟོང་བརྒལ་ཟིན་པས་ཡོད་ཀྱང་སྲིད་རྒྱུ་མ་རེད་མོད། སྤོ་སྟོད་ཆུ་བོའི་རྒྱུད་ཀྱི་བྱ་མོ་ཁ་དང་ལ་ཕབ་བཅས་ལས་རྡོ་ཆས་གསར་པའི་དུས་ཀྱི་རྫ་ཆས་དང་སྲོག་ཆགས་ཀྱི་རུས་པ་མང་པོ་རྙེད་པར་གྲགས། བྱ་མོ་ཁ་གྲོང་པའི་རི་ཆུ་དང་རྩྭ་རྩི་ཤིང་། གྲོང་མི་རྣམས་ཀྱི་སྡོད་ཁང་དང་ས་ཞིང་བཅས་ལ་དམིགས་བསལ་གྱི་ཁྱད་ཆོས་ཡིད་དབང་འཕྲོག་པ་ཞིག་མེད་ནའང་། ལོ་རྒྱུས་ཀྱི་མི་སྣ་གྲགས་ཅན་ཞིག་གི་ཕ་ཡུལ་ཡིན་པས་མཐོང་ལམ་དུ་ཡོད་ཚད་གསོན་ཉམས་དོད་པ་ཞིག་རེད།

རང་གི་ཡོད་ཚད་གཞན་ལ་མ་བསྟུན་ན་རིན་ཐང་མེད་པ་ལྟ་བུའི་འདུ་ཤེས་ཀྱིས། གཉའ་ཁྲི་བཙན་པོ་ནི་ལྷ་ཡུལ་ལས་བབས་པ་རེད་ཟེར་བ་དང་། རྒྱ་གར་གྱི་ཤཱཀྱའི་རྒྱལ་རིགས་ལས་མཆེད་པ་རེད་ཟེར་བ་སོགས་ཀྱིས། ཆུང་དུས་ནས་ངའི་སྣང་བར་གཉའ་ཁྲི་བཙན་པོ་ནི་མི་མིན་པ་དང་། ཡང་ན་བོད་མི་མིན་པའི་སྣང་བ་ཤར་མྱོང་མོད། རྗེས་སུ་ཁོང་ནི་སྤོ་བོའི་ཡུལ་ནས་མོ་བཙུན་བྱ་བའི་བུད་མེད་ཅིག་ལས་འཁྲུངས་ཤིང་། ཆུང་དུས་ཀྱི་མིང་ལ་ཨུ་བེ་ར་ཟེར་བ་དང་། ལྕེ་ཡིས་ངོ་གདོང་ཁེབས་ཐུབ་པ། ལག་པའི་སོར་མོ་བར་དྲ་བས་འབྲེལ་ཡོད་པ། མིག་ནི་བྱ་མིག་ཅན་ཡིན་པ། སྤྱོད་པ་ཧ་ཅང་གདུག་རྩུབ་ཆེ་ཚུལ་ཞེས་བྲིས་ཡོད་པས། གཞི་ནས་གཉའ་ཁྲི་བཙན་པོ་ནི་རང་ས་རང་ཡུལ་ནས་འཁྲུངས་པའི་བོད་མི་ཞིག་ཡིན་པའི་ངེས་ཤེས་རྙེད། ལོ་རྒྱུས་མི་སྣ་ཡི་གཟུགས་བརྙན་ཞིབ་འབྲི་བྱེད་དུས་སྤྱིར་བཏང་གི་མི་ལས་བརྒལ་བར་སྒྲོ་བཏགས་ཀྱི་ཆ་མང་པོ་ཡོད་སྲིད་མོད། གཉའ་ཁྲི་བཙན་པོའི་སོར་མོའི་བར་བྱ་ཡི་སུག་པ་ལྟར་དྲ་བས་འབྲེལ་ཡོད་པ་དང་། མིག་ནི་བྱ་མིག་ཅན་ཡིན་པ་སོགས་ལས་ཁོང་གི་འཁྲུངས་ཡུལ་གྱི་རྣམ་པ་ཤུགས་སུ་བསྟན་པ་མིན་ནམ་སྙམ་སྟེ། སྤོ་སྟོད་ཆུ་བོའི་འགྲམ་ནས་བྱ་མོ་ཁ་གྲོང་པའི་གཡས་གཡོན་དང་རྒྱབ་ངོས། དཀྱིལ་ཁུལ་གྱི་རི་བོ་བཅས་ལ་བལྟས་ན། དངོས་གནས་བྱ་མོ་ཞིག་གིས་ཁ་གདངས་ནས་ལྕེ་བརྐྱངས་པ་དང་འདྲ་མོ་འདུག

ལོ་རྒྱུས་ལ་ཞིབ་གལ་ཆེ་ཞེས་པ་ལྟར་ཡིད་ལས་འདས་པའི་རྗོད་བྱེད་ཀྱི་ཚིག་གི་གསེང་དུ། དོན་གྱི་གནད་ཀ་ཞིག་འདུས་ཡོད་པ་དེ་ང་ཚོས་ཀློག་ཤེས་དགོས། དཀྲོལ་ཐུབ་དགོས།

ལོ་རྒྱུས་སྨྲ་བ་རྣམས་ཀྱིས། གཉའ་ཁྲི་བཙན་པོ་ཆུང་དུས་ནས་བྱད་གཟུགས་སྡུག་ཅིང་བྱ་སྤྱོད་རྩུབ་པས། ཡུལ་མི་རྣམས་ཀྱིས་སྤྱུགས་པ་རེད་ཟེར། ངའི་སྣང་བར་སྤོ་བོའི་བྱ་མོ་ཁ་རུ་སྐྱེས་པའི་ཨུ་བེ་ར་ཆུང་དུས་ནས་རིམ་བཞིན་ནར་སོན་རྗེས། གཟུགས་སྟོབས་ཆེ་ལ་ཤེད་ཤུགས་རྒྱས་པ་དང་། རྒྱལ་ཕྲན་སིལ་མའི་སྐབས་ཀྱི་རྒྱལ་པོའི་བཀའ་དང་དུ་མ་བླངས་པར་རང་དབང་རང་ཆེ་བྱས་པས། དབང་ཡོད་རྣམས་ཀྱི་མིག་གི་ཚེར་མར་ལྟ་བུར་གྱུར། བྱ་མོ་ཁ་རུ་ཡོད་པའི་རིང་ལ་དབང་བསྒྱུར་པའི་ཐུབ་ཚོད་མྱངས་ཤིང་།

གྲོང་མི་རྣམས་ཀྱིས་ལྐོག་ཏུ་འཕྱ་སྨོད་བྱས་ཀྱང་མར་མེ་ཐུར་དུ་བསྟན་ཡང་གྱེན་དུ་འབར་ཞེས་པ་ལྟར། གནས་སྐབས་སུ་ཨུ་བེ་ར་ཡི་གཉའ་ཕྲ་ལ་དཔུང་ཞུམ་ཡང་། སེམས་སུ་ནམ་ཉི་མ་ཞིག་ལ་ཇ་ལ་ཇ་ལན་དང་གཏམ་ལ་གཏམ་ལེན་སྤྲད་དགོས་པའི་ཕུགས་རེ་ཞིག་འཁྲུངས། ཕུགས་རེ་དེ་འཁྲུངས་པ་ནས་བཟུང་། དབང་ཡོད་རྣམས་ཀྱི་མདུན་དུ་མགོ་བོ་མ་བསྒུར་བར་ཐབས་ཀྱིས་བྱོལ་བ་དང་། དབང་མེད་ཚོ་དང་ལྷན་དུ་ཆུ་སྣ་གར་ཁྲིད་ཀྱི་རྗེས་སུ་མ་འབྲངས་པར། གྲོགས་མེད་ཁེར་རྐྱང་གིས་བྱ་མོ་ཁའི་ནམ་མཁར་འཕུར་རྩལ་སྦྱངས། འཕུར་རྩལ་སྦྱངས་ཏེ་ནམ་འཕང་གཅད་ལ་རན་སྐབས། ཁོང་གིས་རང་ཉིད་ཀྱི་ཕྱིའི་རྣམ་པ་དང་ནང་གི་བསམ་སྤྱོད་ནི་སུ་དང་ཡང་མི་འདྲ་བ་ཞིག་ཡིན་པ་ཤེས་ཀྱང་། ཡར་ལྟ་མར་ལྟ་བྱེད་དུས་ཕྱོགས་བཞིར་རི་བོས་བསྐོར་ཏེ་ནམ་མཁའ་མེ་ལོང་ཙམ་ལས་མཐོང་མི་ཐུབ་པ་དང་། གཡས་ལྟ་གཡོན་ལྟ་བྱེད་དུས་མཐའ་འཁོར་དུ་སྡང་མིག་དང་འཕྱ་སྨོད་ལས་རེ་བཅོལ་གྱི་མིག་མདངས་ཙམ་ཡང་མ་མཐོང་བས། ཡུལ་གཞན་དུ་འགྲོ་བའི་འདོད་པ་འགོག་མེད་དུ་སྐྱེས། ཕ་ཡུལ་དང་ཁ་བྲལ་ཏེ་ཡུལ་གཞན་དུ་འགྲོ་བ་ཙམ་གྱིས་རེ་འདུན་མི་འགྲུབ་པར་མི་འཁྱར་དུ་འགྱུར་སྲིད་པས། བསམ་བློ་བཏང་བཏང་བའི་མཐར་ཆུ་ཡི་ཆུ་འགོ་བཙལ་བ་ལྟར། མེས་པོ་ཚོ་ཐོག་མར་འོང་སའི་ཕྱོགས་སུ་གོམ་པ་སྤོ་འགོ་ཚུགས།

ན་གཞོན་ཨུ་བེ་ར་ཡིས་སྤོ་བོའི་ནུབ་ཕྱོགས་ཀྱི་རི་བོ་ནས་གྱེན་འཛེགས་ཐུར་བབ་བྱས་ཏེ། ཡར་ཀླུང་གཙང་པོ་དང་ཉང་ཆུའི་འདུས་མདོར་གནས་པའི་གྱང་ཐོ(ཏོ)རི་བོར་བབས་པ་ནི། རང་ཡུལ་རྒྱབ་ཏུ་བསྐྱུར། མི་ཡུལ་པང་དུ་བླངས་ནས་ཕྱི་རོལ་ཡུལ་གྱི་ལྟད་མོ་མཐོང་བའི་ས་ཚུགས་དང་པོ་རེད།

བྱ་རྒོད་ནམ་མཁར་འཕུར་བ་ནི་གནམ་ས་མིག་ལམ་དུ་ཚུད་པའི་ཆེད་དང་། བྱིའུ་ཞིང་ཁར་ལྡིང་བ་ནི་གཟན་འབྲུ་ཁ་རུ་རྙེད་པའི་སླད་དུ་རེད། ལོ་རྒྱུས་ཐོག་བྲག་སྐས་མེད་ལ་སྐས་བཙུགས་མཁན་དང་ཆུ་ཟམ་མེད་ལ་ཟམ་ལས་མཁན་ནི། ཨ་མའི་གོ་ཁ་དང་ཨ་ཕའི་སྒོ་ཐེམ་ལས་བྲལ་མཁན་ཁོ་ན་ཡིན་པས། ཁ་བའི་ཡུལ་དུ་རླབས་ཆེན་གྱི་ཕུགས་རེའི་ཆེད་དུ་རྒྱང་སྐྱོད་བྱེད་མཁན་ཐོག་མ་ནི་སྤོ་བོ་བྱ་མོ་ཁ་ཡི་ན་གཞོན་ཨུ་བེ་ར་རེད།

ང་རང་སྤོ་བོ་རྫོང་གི་བྱ་མོ་ཁ་ལས་བྲལ་ཏེ། གཡས་གཡོན་ལ་རྩྭ་རྩི་ཤིང་སྣ་ཚོགས་འཛོམས་པའི་རྒྱལ་ལམ་318བརྒྱུད་དེ། ཀླུ་ནང་གྲོང་རྡལ་དུ་སླེབས་དུས་མུན་རུབ་ལ་རན་པས། གཞུང་ལམ་འགྲམ་གྱི་མགྲོན་ཁང་ཐབས་ཆག་ཅིག་དུ་ཞག་སྡོད་བྱས་པ་ཡིན། ས་ཆ་དེའི་ལུང་པའི་མཐའ་བཞིར་ནགས་ཚལ་གྱིས་བསྐོར་ཞིང་། དཀྱིལ་ཁུལ་གྱི་སྤང་ངོས་སུ་མེ་ཏོག་རྣམ་པར་བཀྲ་བ་བཅས་ཀླུ་ཡི་ཡུལ་དང་མཚུངས་པས། ཀླུ་ནང་ཞེས་མིང་ཐོགས་པར་གྲགས་ལ་དོན་དུའང་ས་ཆ་སྐྱིད་པོ་ཞིག་རེད། ཞོགས་པར་ཆར་པ་ཟིམ་ཟིམ་འབབ་པའི་ནང་ནས་འགྲོ་འགོ་བཙུགས་ཏེ་སྤྱི་ལེ་བདུན་ཅུ་ལྷག་ཙམ་སོང་རྗེས། ཉིང་ཁྲི་གྲོང་ཁྱེར་ཡོད་ས་བྲག་ཡིབ་ཆུས་ནང་སླེབས། བྲག་ཡིབ་ཅེས་པ་ནི་གནའ་སྔོན་མར་དུད་ཁ་ལྔ་དྲུག་ཙམ་བྲག་རིའི་ཞབས་ཀྱི་ལྗོན་ཤིང་གི་བར་གསེང་དུ་ཡིབ་ནས་ཡོད་པ་ལྟར་ཆགས་པས་མིང་དེ་ལྟར་ཐོགས། གནམ་གཤིས་ཐོག་ནས་བཤད་ན་དགུན་དུས་གནམ་གཤིས་དྲོ་ལ་སྐམ་ཤས་ཆེ་བ་དང་། དབྱར་དུས་ཆར་ཆུ་འབེལ་ལ་བཞའ་ཚན་ཆེ་བས་ཤིང་སྣ་དང་སྨན་རྩྭ། ཤ་མོང་རིགས་དང་རི་དྭགས་གཅན་གཟན་གྱི་རིགས་སྣ་མང་སྣ་ཚོགས་འཛོམས་པའི་ས་ཆ་ཞིག་རེད་འདུག

ཀོང་པོའི་བོད་ཁང་རྙིང་པ།

ས་ཐག་རིང་པོ་ནས་ལ་མཐོན་པོར་དཀའ་བས་འཛེགས། ཆུ་ཆེན་པོ་གཟབ་ཀྱིས་བགྲོད་དེ་ཡོང་དོན་ནི། ཡར་ཀླུང་གཙང་པོ་དང་ཉང་ཆུ་གཉིས་ཉིང་ཁྲི་བྲག་ཡིབ་ཆུས་སུ་ལྷན་དུ་འདུས་ཚུལ་དང་། དེའི་འགྲམ་ངོགས་ཀྱི་ལོ་རྒྱུས་ཀྱི་རྗེས་ཤུལ། གནས་ཆེན་བོན་རི་དང་ལྷ་རི་གྱང་ཐོ་སོགས་དངོས་སུ་མཇལ་བའི་ཆེད་དུ་ཡིན་ཡང་། ས་གནས་ཆ་མེད་རྒྱུས་མེད་དུ་འགྲོ་ལམ་སྟོན་མཁན་དང་གནས་བཤད་བྱེད་མཁན་ཞིག་མེད་ན། ལོང་བས་འཁར་བ་གར་འཛུགས་ཀྱི་ཚུལ་ལས་མ་འདས་པས། གྲོགས་པོ་ཞིག་གིས་འབྲེལ་ལམ་བཙུགས་པ་ལྟར་ས་གནས་དེ་གའི་རིག་གནས་པ་རྒན་གངས་དགའ་ལགས་དང་འབྲེལ་བ་བྱས་རྗེས། ཁོང་གིས་ཁ་པར་གྱི་ལམ་ནས་ངོ་སྤྲོད་བྱས་པ་ནང་བཞིན། ཡར་ཀླུང་གཙང་པོ་དང་ཉང་ཆུ་གཉིས་ལྷན་དུ་འདུས་རྗེས་ཀྱི་འགྲམ་ངོགས་སུ་ཆགས་པའི་བོན་རིའི་ཕྱོགས་སུ་སོང་།

ཀོང་པོའི་དེ་མོའི་རྡོ་བརྐོས་རི་མོ།

བོན་རི་ཞེས་པའི་རི་རྒྱུད་ནི་ནུབ་ན་དམུ་རི་དང་དབུས་སུ་བོན་རི། ཤར་ལྷོ་ན་ལྷ་རི་གྱང་ཐོ་བཅས་རི་བོ་གསུམ་གྱིས་གྲུབ་པ་ཞིག་རེད་ལ། ས་དམའ་ས་ནས་བལྟས་ན་གསལ་པོར་མཐོང་མི་ཐུབ་མོད། ཡར་ཀླུང་གཙང་པོའི་ཕར་ཁ་ནས་ཚུར་བལྟས་ན། རི་བོ་དེ་གསུམ་གྱི་མཐོ་དམའ་དང་རྣམ་པ་ཧ་ཅང་གསལ་པོར་མཐོང་བྱུང་།

བོད་ཀྱི་སྟོད་སྨད་བར་གསུམ་དུ་སྐད་གྲགས་ཆེ་བའི་བོན་རི་རིན་ཆེན་སྤུངས་པ་དེ། གངས་ཏི་སེ་དང་འདྲ་བར་དད་ལྡན་རྣམས་ཀྱི་སེམས་ཀྱི་མཆོད་སྟེགས་སུ་ལྷང་ངེར་ལྷན་ནེར་འགྱིང་ཡོད་པ་ནི། སྟོན་པ་གཤེན་རབ་མི་བོ་ཆེ་ཀོང་ཡུལ་དུ་ཕེབས་དུས་བྱིན་གྱིས་བརླབས་པས་ཡིན་ལ། སྤྱི་ལོ་1330ལོར་བོན་གྱི་གྲུབ་ཐོབ་རི་པ་འབྲུག་གསས་ཀྱིས་གནས་སྒོ་ཕྱེ་བ་ནས་བཟུང་ཕྱོགས་བཞི་ནས་གནས་སྐོར་དུ་ཡོང་མཁན་རྒྱུན་མི་ཆད། ཉིན་དེར་ང་སྨན་རི་ཡུལ་ཤོག་ཡོད་སར་སླེབས་ཏེ་ལྟ་དུས། གནས་མཆོག་བོན་རི་ནི་ནགས་ཚལ་གྱིས་བརྒྱན་པ་དང་རི་འདབས་སུ་རྩྭ་རྩི་ཤིང་སྣ་ཚོགས་འཛོམས་ཤིང་། མདུན་དུ་ཡར་ཀླུང་གཙང་པོ་དང་ཉང་ཆུ་གཉིས་ལྷན་དུ་འདུས་རྗེས། དར་དཀར་པོ་ཞིག་རྒྱང་རིང་དུ་བརྐྱངས་པའི་ཚུལ་དུ་བཞུར་ཞིང་། བྱ་བྱེའུ་མང་པོས་འཕུར་ལྡིང་གར་ལ་རྩེན་པ་བཅས་ཁམས་དྭངས་ལ་རིག་པ་གསལ་བར་བྱེད་པའི་གནས་མཆོག་ཅིག་རེད།

མངའ་རིས་སུ་ཡོད་པའི་གངས་ཏི་སེ་དང་རྒྱལ་མོ་ཚ་བ་རོང་ན་ཡོད་པའི་རྒྱལ་མོ་རྨུ་རྡོ་དང་མི་འདྲ་བར། བོན་རི་ནི་བན་བོན་གང་ཡིན་ཡང་གཡོན་སྐོར་ལས་གཡས་སྐོར་བྱེད་སྲོལ་མི་འདུག །ཉིན་དེར་ཕྱོགས་སོ་སོ་ནས་ཡོང་བའི་གནས་སྐོར་བྱེད་མཁན་རྒན་དར་གཞོན་གསུམ་མང་པོར་ཐུག་བྱུང་། ངས་ཀྱང་སྐོར་ར་ཐེངས་གཅིག་རྒྱག་དགོས་བསམས་མོད། སྐོར་ར་གཅིག་ལ་ཉིན་གཉིས་འགོར་བ་ལྟར་ན། ངའི་དུས་ཚོད་ཀྱིས་མི་འདང་བས་སྐོར་མ་ཐུབ། བཤད་རྒྱུན་དུ་ཁོམ་ལོང་མེད་མཁན་རྣམས་ཀྱིས་མི་གཞན་ལ་གླ་ཆ་སྤྲད་ནས་རང་གི་ཚབ་ཏུ་སྐོར་ར་རྒྱག་བཅུག་སྲོལ་ཡོད་ཟེར་མོད། ང་ནི་རང་ངོའི་ཆེད་དུ་རང་སེམས་གསོ་བར་དགའ་བའི་རིགས་དེ་མིན་པས། གནས་ཆེན་རི་བོ་དེ་ཡི་ཞལ་མཐོང་ཚད། །ངན་སོང་འཇིགས་པའི་འཕྲང་ལས་སྐྱོབ་པར་ངེས། །གནས་མཆོག་ཕྱོགས་སུ་གོམ་པ་གཅིག་སྤོས་ན། །ཚེ་འདིའི་བར་ཆད་ཞི་ཞིང་བསམ་དོན་འགྲུབ། །ཅེས་པ་ལྟར་རྟེན་འབྲེལ་གྱི་ཚུལ་དུ་སྨན་རི་ཡུལ་ཤོག་ནས་རི་འདབས་ཙམ་ལ་སོང་རྗེས་ཕྱིར་ལོག་པ་ཡིན།

ཀོང་པོའི་རྡོ་བརྐོས། 

གལ་སྲིད་བོན་རིར་སྐོར་ར་གཅིག་རྒྱག་ཐུབ་ན། ཇོ་མོ་གླང་མ་དང་གངས་ཏི་སེ། རྨ་ཆེན་སྦོམ་ར། ཁ་བ་དཀར་པོ། གངས་དཀར་རི་བོ། རྒྱལ་མོ་རྨུ་རྡོ་སོགས་བསྐོར་བ་ལྟར་བོད་ཀྱི་རི་ཡི་གཟི་བྱིན་དང་ཆུ་ཡི་ཉམས་འགྱུར། གནམ་གྱི་སྒེག་ཉམས་དང་ས་ཡི་དཔྱད་པ། མི་ཡི་དད་མོས་དང་ཤིང་གི་རྣམ་ཤེས་སོགས་རི་ཆུའི་རིག་གནས་ཕུན་སུམ་ཚོགས་པ་ཡིས་མིག་རྒྱང་བསྲིང་ལ་སེམས་རྒྱ་ཆེ་རུ་གཏང་སྲིད་མོད། བོན་རིའི་རི་རྒྱུད་ཀྱི་བར་གསེང་དུ་བོད་བཙན་པོ་རྒྱལ་རབས་དང་འབྲེལ་བ་ཡོད་པའི་ཤུལ་རྗེས་མང་པོས་སྒུག་ཡོད་པས་མགྱོགས་མྱུར་དུ་ཕྱིར་ལོག་པ་ཡིན།

སྨན་རི་ཡུལ་ཤོག་ན་མངར་ཇ་དང་བོད་ཐུག་རྒྱག་ཚད་ཅིག་འཐུང་རྗེས། ཡུལ་མི་ཚོས་བསྟན་པ་ལྟར་ཀོང་པོ་དེ་མོའི་རྡོ་བརྐོས་ཡི་གེ་དེ་མཇལ་དུ་སོང་། ལམ་བར་དུ་བྱ་ཁྱུང་ལྷ་ཁང་ངམ་བྱ་ཁྱུང་དགོན་ཞེས་གཡུང་དྲུང་བོན་གྱི་དགོན་པ་ཞིག་ཡོད་པ་མཇལ། དེ་མིན་ས་གནས་འདིར་སྲིད་རྒྱལ་དགོན་ཆེན་དང་། སྟག་རྩེ་དགོན། ལྷ་རི་གྱང་ཐོ་དགོན། རྒྱལ་རི་དགོན། སྟག་བྲོ་ས་དགོན་སོགས་གཡུང་དྲུང་བོན་གྱི་དགོན་སྡེ་མི་ཉུང་བ་ཡོད་རེད་ཟེར། རྡོ་རིང་དེ་ནི་སྨན་རི་ཡུལ་ཤོག་གི་གཡུང་དྲུང་འཛིན་ཞེས་པའི་གྲོང་ཚོའི་ཞིང་ཁར་འདུག །དེའི་མཐའ་འཁོར་དུ་བོད་ཁང་རྙིང་པ་བརྩེགས་གཉིས་ཅན་འགའ་ཤས་དང་། རྡོ་ལ་བརྐོས་པའི་ལྷ་སྐུ་རྙིང་པ་མང་པོ་བཞེངས་ཡོད་པའི་རྡོ་འབུམ་ཞིག་ཀྱང་མཇལ་རྒྱུ་སྣང་། གཡུང་དྲུང་འཛིན་ཞེས་པ་ནི་སྔོན་མར་སྟོན་པ་གཤེན་རབ་མི་བོ་ཆེ་གནས་དེར་བྱོན་ནས། ལྷ་སྲིན་སྡེ་བརྒྱད་དང་ཡུལ་ལྷ་གཞི་བདག་རྣམས་གཡུང་དྲུང་གི་བསྟན་པ་སྲུང་མཁན་དུ་བསྐོས་པས་མ་ཚད། ནམ་ཡང་མི་འགྱུར་བའི་རྟགས་སུ་རྡོ་ལེབ་མོའི་ངོས་ལ། གཡུང་དྲུང་དཀར་པོའི་རི་མོ་འབུར་དུ་ཐོན་པ་ཞིག་གནང་བས་མིང་དེ་ལྟར་ཐོགས་པར་གྲགས། རྡོ་རིང་གི་ཡི་གེ་དེ་ནི་རྡོ་ཕ་བོང་ཞིག་གི་ངོས་ལེབ་མོ་ལ་བརྐོས་པ་ཞིག་རེད། ཐོག་ལ་ལྡིང་ཁང་ཕུབ་ནས་སྲུང་སྐྱོང་ཡག་མོ་བྱས་འདུག །བཀའ་གཙིགས་ཀྱི་ཡི་གེ་ལས་མཐོ་ས་རྣམས་གསལ་པོར་མཐོང་ཐུབ་མོད། དམའ་ས་རྣམས་དེ་ཙམ་གསལ་པོ་མ་རེད། རྡོ་རིང་གི་རྩ་བར་གཡུང་དྲུང་གི་རི་མོ་གཡས་འཁོར་མ་བཅུ་གསུམ་བརྐོས་ཡོད་པ་དང་། རྒྱབ་ངོས་སུ་བརྐོས་པའི་མ་ཎི་འབྲུ་དྲུག་གསལ་པོ་རེད། རྡོ་རིང་དེ་ནི་བཙན་པོ་ཁྲི་ལྡེ་སྲོང་བཙན་གྱིས་ཀོང་པོའི་དཀར་པོ་མང་པོ་རྗེ་ལ་གནང་བའི་བཀའ་གཙིགས་ཀྱི་ཡི་གེ་རྡོ་ལ་བརྐོས་པ་ཞིག་རེད་ལ། ད་ཕན་མི་ལོ་ཆིག་སྟོང་ཉིས་བརྒྱ་ཙམ་འདས་ཟིན། ངོ་སྤྲོད་བྱས་པ་ལྟར་ན། བཀའ་གཙིགས་ཀྱི་ཡི་གེ་དེར་བོད་ཀྱི་ལོ་རྒྱུས་ཐོག་གལ་ཆེ་བའི་གནད་དོན་ཁག་དྲུག་གསལ་བཤད་བྱས་ཡོད་དེ། གཅིག་ནི་རྒྱལ་པོ་གཉའ་ཁྲི་བཙན་པོ་ནས་གྲི་གུམ་བཙན་པོ་ཕན་ཆད་གསུང་རབས་བདུན་བྱུང་བའི་རིང་ཕོ་བྲང་ཕྱིང་བ་སྟག་རྩེར་བཞུགས་པ་དང་། གཉིས་ནི་རྒྱལ་པོ་གྲི་གུམ་བཙན་པོ་ལ་སྲས་གཉིས་ཡོད་པའི་གཅེན་ནི་ཉ་ཁྱི་དང་གཅུང་ནི་ཤ་ཁྱི་ཡིན་པ་གསལ་ཞིང་། སྲས་བྱ་ཁྲི་ཟེར་བ་ཡོད་ཚུལ་མི་གསལ་བ་དང་། གསུམ་ནི་ཀོང་དཀར་པོ་མང་པོ་རྗེ་ལ་ཡབ་ཁྲི་སྲོང་ལྡེ་བཙན་གྱིས་སྐབས་བཀའ་གཙིགས་གནང་བ་དེར་སླར་ཡང་རྒྱབ་གནོན་གྱི་བཀའ་གཙིགས་འདི་གནང་ཚུལ་དང་། བཞི་ནི་སྲས་གཅེན་གཅུང་གཉིས་ཀ་རྒྱལ་པོ་གྲི་གུམ་བཙན་པོའི་སྲས་ཡིན་པ་འདྲ་ཡང་། གཅུང་པོའི་གདུང་རྒྱུད་རྣམས་ཀྱིས་བཙན་པོའི་རྒྱལ་སྲིད་བཟུང་བ་དང་།

གཅེན་པོའི་གདུང་རྒྱུད་རྣམས་ཀོང་དཀར་པོ་མང་པོ་རྗེའི་རྒྱལ་ཕྲན་གྱི་གོ་གནས་ཙམ་དུ་བསྡད་དེ་དཔྱ་ཁྲལ་དང་རྟེན་འབུལ་སོགས་གང་ཡང་མི་དགོས་པར། ཀོང་པོའི་ཁུལ་དུ་རང་སྐྱོང་རྒྱལ་ཕྲན་གྱི་ཚུལ་དུ་གནས་ཆོག་པའི་བཀའ་གཙིགས་གནང་ཡོད་པ་དང་། ལྔ་ནི་སྲས་ཁྲི་སྲོང་ལྡེ་བཙན་གྱིས་བཀའ་གཙིགས་བསྐྱར་དུ་གནང་བ་དང་། དྲུག་ནི་བཙན་པོའི་དུས་སྐབས་ཀྱི་མངའ་འོག་ཏུ་གཏོགས་པའི་རྒྱལ་ཕྲན་རྣམས་དཔོན་འབངས་གཞན་དང་མི་འདྲ་བའི་དམིགས་བསལ་གྱི་ཐོབ་ཐང་ཡོད་ཚུལ་གསལ་པོར་བསྟན་ཡོད་པ་བཅས་སོ། །

ཀོང་པོ་དེ་མོའི་རྡོ་རིང་མཇལ་ཚར་རྗེས་སྟོན་པ་གཤེན་རབ་མི་བོ་ཆེ་དང་འབྲེལ་བ་ཡོད་པའི་ས་ཆ་ཞིག་ཏུ་སོང་།

ཡར་ཀླུང་གཙང་པོ་དང་ཉང་ཆུ་གཉིས་འདུས་པའི་ཆུ་བོའི་འགྲམ་ངོགས་སུ། ལྗོན་ཤིང་ནགས་ཚལ་དུ་འཁྲིགས་པའི་ན་ཐང་ཆེན་པོ་ཞིག་ཡོད་པ་དེ་ནི་ཀོང་པོ་བྲེ་སྣ་ཞེས་པའི་ས་ཆ་དེ་རེད། ངག་རྒྱུན་དུ་བདུད་ཁྱབ་པ་ལག་རིང་གིས་སྟོན་པ་གཤེན་རབ་མི་བོ་ཆེའི་རྟ་བརྐུས་ནས་ཀོང་ཡུལ་དུ་ཁྲིད། སྟོན་པ་གཤེན་རབ་མི་བོ་ཆེས་བདུད་དྲེགས་པ་ཅན་རྣམས་འདུལ་བའི་ཆེད་དུ། སྐབས་དེ་དང་བསྟུན་ནས་ཀོང་ཡུལ་ལ་ཕེབས་ཏེ་བདུད་ཁྱབ་པ་ལག་རིང་ལས་རྟ་རྣམས་འཕྲོག་པས་མ་ཚད། ཡུལ་དེའི་རི་ཆུ་ཚང་མ་བྱིན་གྱིས་བརླབས་པ་རེད་ཟེར། གཞུང་ལམ་གྱི་ཞབས་ལ་ཆུ་མིག་གཉིས་ཡོད་པ་དེ་ནི། སྐབས་དེར་སྟོན་པ་གཤེན་རབ་ཀྱིས་རྟ་རྣམས་ཕྱིར་འཕྲོག་རྗེས་བདུད་གྲིབ་སེལ་བའི་ཆེད་དུ་ཁྲུས་བྱེད་ས་རེད་ཟེར། དེ་ཡང་ཀོང་པོ་བྲེ་སྣ་ཞེས་པ་ནི་སྟོན་པ་གཤེན་རབ་མི་བོ་ཆེས་གསེར་དང་གཡུ་བྲེ་ལ་འཇལ་བའི་རྒྱུ་མཚན་གྱིས་མིང་དེ་ལྟར་ཐོགས་པ་དང་། ལ་ལས་བོད་ཀྱི་མེས་པོ་སྤྲེའུ་འགའ་ལྷོ་ཁ་ནས་ཀོང་པོར་འཕོས་ཏེ་གནས་བཅས་པས་སྤྲེའུ་སྣ་ཞེས་པ་རེད་ཅེས་ཀྱང་ཟེར་སྲོལ་འདུག

ཀོང་ཡུལ་བྲེ་སྣ་ནས་གཞུང་ལམ་དེད་དེ་ཉིང་ཁྲིའི་ཕྱོགས་སུ་ཡུན་རིང་འགྲོ་མ་དགོས་པར་ཀླུ་སྟེང་གྲོང་ཚོར་སླེབས། ཀླུ་མི་མགོན་དཀར་པོ་གནས་སའི་སྟེང་དུ་ཆགས་པས་མིང་དེ་ལྟར་འབོད། བཤད་སྲོལ་དུ་བདུད་ཁྱབ་པ་ལག་རིང་གིས་གནས་དེ་ན་སྟོན་པ་གཤེན་རབ་མི་བོ་ཆེ་ལ་དུག་བཏང་མྱོང་བ་ལྟར་ན། གནའ་སྔོན་མར་གྲོང་ཚོ་དེ་ན་དུག་ལས་སྲོལ་ཡོད་པ་འདྲ། ཡུལ་མི་འགའ་ལ་དེའི་སྐོར་དྲིས་ཀྱང་ཁ་ཡ་ཙམ་ཡང་མ་བྱས་པས་ཞིབ་ཕྲའི་གནས་ཚུལ་ཤེས་ཐབས་མ་བྱུང་། ང་རང་ཆུང་དུས་སུ་མི་རྒན་རྣམས་ཀྱིས་ལྷ་ས་ལ་མ་སླེབ་གོང་དུག་གཏོང་མཁན་ཡོད་ཚུལ་བཤད་པ་གོ་མྱངས་བ་ནི་ས་ཆ་དེ་མིན་ནམ་སྙམ། དེ་སྔོན་མི་རྣམས་གནས་སྐོར་དུ་འགྲོ་དུས་ཀླུ་སྟེང་གྲོང་ཚོ་དང་ཟུར་ནས་འགྲོ་ཚུལ་ཡང་བཤད་རྒྱུན་འདུག་མོད། དེང་སང་དེ་ལྟར་ཡིན་མི་སྲིད།

སྤོ་བོ་བྱ་མོ་ཁ་ཡི་ན་གཞོན་ཨུ་བེ་ར་ལ་མཚོན་ན། ཕ་ཡུལ་དང་རྒྱབ་གཏད་ནས་མི་ཡུལ་དུ་འགྲོ་དུས། ཐེངས་དང་པོར་ཚུགས་འབབ་ས་དང་ཆེས་ཐོག་མར་གཉའ་ཁྲི་བཙན་པོ་ཞེས་ཆོ་ལོ་ཐོབ་ས་ནི། ལྷ་རི་གྱང་ཐོ་ཞེས་པ་དེ་ཡིན་པས་རི་བོ་དེ་ཅིས་ཀྱང་འཚོལ་དུ་འགྲོ་དགོས།

བོན་རི་ཚུད་པའི་རི་རྒྱུད་དུ་ནུབ་ཕྱོགས་ན་དམུ་རི་དང་དབུས་ན་བོན་རི། ཤར་ལྷོའི་མཚམས་ན་ལྷ་རི་གྱང་ཐོ་ཞེས་བཤད་ཀྱང་། རི་འདབས་ནས་སོ་སོ་གསལ་པོར་ངོས་འཛིན་མི་ཐུབ་པས། ངས་ཀླུ་སྟེང་གྲོང་པའི་མི་རྒན་འགའ་ལ་དྲིས་པ་ན། གྲོང་པའི་རྒྱབ་ཀྱི་རི་དེ་རེད་ཟེར། གྲོང་པའི་དཀྱིལ་དབུས་ཀྱི་ས་མཐོ་སར་སོང་སྟེ་ལྟ་དུས། དེ་ཙམ་མཐོན་པོ་མིན་པའི་ལྷ་རི་གྱང་ཐོ་ནི་རྒྱལ་པོའི་རྒྱབ་ཡོལ་ཆེན་པོ་ཞིག་དང་འདྲ། མཐོ་ས་ནས་གནམ་སྔོན་པོའི་གདུགས་ཕུབ་པ་དང་། བར་སྐེད་དུ་སེམས་ཅན་སྣ་ཚོགས་ཀྱི་གནས་མཆོག་ནགས་ཚལ་ཚང་ཚིང་དུ་འཁྲིགས་ཤིང་། མདུན་ལ་གཙང་ཆུ་སྔོན་མོ་དལ་ཅག་གེར་འཁྱིལ། ངག་རྒྱུན་དུ་རི་དེ་ནི་སྟོན་པ་གཤེན་རབ་ཀྱིས་ལྷ་ཡི་རི་བོ་རུ་བྱིན་གྱིས་བརླབས་པ་དང་། རྒྱལ་པོ་གཉའ་ཁྲི་བཙན་པོས་ཞབས་ཀྱིས་བཅགས་པས་ཀུན་གྱི་སེམས་ནང་བླ་རུ་འཕགས་ཤིང་ལྷག་ཏུ་མཛེས།

རྫིང་བུ་ཆུང་ངུར་ཉ་མོ་ལ་རྐྱལ་རྩལ་རྒྱས་ཐབས་མེད་པས། ན་གཞོན་ཨུ་བེ་ར་ཡིས་མེས་པོ་ཚོ་འོངས་ཕྱོགས་ཀྱི་རླུང་བུ་འགམ་བཞིན་ལ་མོ་བརྒྱབ་སྟེ་ལྷ་རི་གྱང་ཐོར་སླེབས་དུས། མཐོང་ལམ་དུ་ཤར་བ་ནི་ཡར་ཀླུང་གཙང་པོ་དང་ཉང་ཆུ་གཉིས་མཐོ་ས་ནས་བཞུར་ཏེ་དམའ་ས་རུ་ལྷན་དུ་འཛོམས་རྗེས། སྔར་ལས་དྭངས་ཤིང་གཙང་ལ་བརྟན་ཞིང་བརླིང་བའི་སྒོ་ནས་རྒྱང་རིང་དུ་བཞུར་ཚུལ་རེད། རང་བྱུང་ཁོར་ཡུག་གིས་མི་ཞིག་གི་བསམ་བློའི་འདུ་ཤེས་དང་མིག་རྒྱང་རིང་ཐུང་ལ་ཁ་ལོ་བསྒྱུར་སྲིད་པས། རྒྱ་ཆེ་བའི་ནམ་མཁའ་རུ་སྤྲིན་དཀར་ནག་འཐབ་པ་ལྟར་ཨུ་བེ་ར་ཡི་སེམས་ནང་རང་དབང་དང་གཞན་དབང་། ཆེ་བསྟོད་དང་འཕྱ་སྨོད་བཅས་རླུང་ལྡང་ལ་སྤྲིན་གཡོ་བ་ལྟར་འཕྱུར་བར་བྱས། སྐབས་དེར། ཁོང་གིས་ལྷ་རི་གྱང་ཐོར་ངལ་གསོས་ཏེ་མེས་པོ་ཚོ་འོང་ཕྱོགས་སུ་ལྟ་དུས། ཡར་ཀླུང་གཙང་པོ་དང་ཉང་ཆུ་གཉིས་ནི་རྨུ་སྐས་ལྟར་རི་མཐོན་པོ་དགུ་ཡི་རྒྱབ་ནས་བཞུར་ཞིང་། ལུང་ཆེན་པོ་བཅུ་ཡི་ནང་ལ་རྒྱུག་བཞིན་ཡོད་པ་ནི་རང་ཉིད་བསུ་བའི་ཕོ་ཉ་རུ་མཐོང་ཡང་། རང་ནི་རྟ་རྒོད་ཁེར་འགྲོས་དང་གཡག་རྒོད་ཁེར་རྒྱུག་ལྟར་རྒྱབ་ལ་བརྟེན་ས་དང་མདུན་ལ་འཁེན་ས་མེད། ཏག་ཏག་སྐབས་དེར། རྒྱལ་ཕྲན་སིལ་མ་བཅུ་གཉིས་ནི་གཅིག་འོག་གཅིག་ཏུ་མི་ཚུད་པར། དུས་རྒྱུན་འཁྲུག་འཛིང་ཁོ་ན་ཡིས་ཚང་མའི་ལུས་སེམས་གཉིས་ཀ་སྡུག་གིས་མནར་ཡང་། ཀུན་གྱིས་ཁས་ལེན་པའི་དཔོན་པོ་ཞིག་སྐོ་ཐབས་མ་བྱུང། ཨུ་བེ་ར་ནི་ཕ་ཡུལ་དང་རྒྱབ་གཏད་དེ་སུ་ཞིག་གི་ཁོངས་སུའང་མ་གཏོགས་པའི་སྐྱེས་པ་ཕོ་ཞིག་ཡིན་པས། ཚང་མས་འདི་ནི་གནམ་སྔོན་པོ་ནས་ལས་ཀྱིས་བཀོད་པ་རེད་བསམས་ཏེ་རྒྱལ་པོར་བསྐོས་རྗེས། གཉའ་ལྟག་ལ་བཞག་པ་ལྟར་བརྩི་བཀུར་བྱས་ཏེ་མཚན་ལ་གཉའ་ཁྲི་བཙན་པོ་ཞེས་གསོལ།

ང་ཀླུ་སྟེང་གྲོང་པའི་དུད་ཁ་ཞིག་གི་ཤིང་བརྩིགས་ཐོག་ལངས་ཏེ་ལྷ་རི་གྱང་ཐོ་ལ་ལྟ་དུས། སེམས་པར་རི་འདི་ནི་ན་གཞོན་ཞིག་མི་འཁྱམ་ནས་རྒྱལ་སར་འཛེགས་པའི་སྐས་རིམ་ཞིག་རེད་ལ། བོད་བཙན་པོའི་རྒྱལ་རབས་ཀྱི་རྟེན་འབྲེལ་འགྲིག་ས་ཡང་རེད་བསམས་ཏེ། རང་དབང་མེད་པར་ལག་པའི་ཐལ་མོ་བྲང་ཁར་སྦྱར་དགོས་བྱུང་།

ང་ལྷ་རི་གྱང་ཐོའི་རི་སྐེད་དུ་འཛེགས་ཏེ་ཡར་ཀླུང་གཙང་པོར་ལྟ་དུས། མེས་པོ་ཚོས་ཆུ་བོ་ཞིག་གི་གཞུང་དེད་ནས་འོངས་རྗེས། རྒྱལ་ཕྲན་སིལ་མ་མང་པོས་གནམ་ས་བདག་པོ་བརྒྱབ་པ་དང་། རྗེས་རབས་པ་ཞིག་གིས་མེས་པོ་ཚོའི་འགོ་ཁུངས་བཙལ་ཏེ་བོན་ཤེས་པ་བཅུ་གཉིས་ཀྱི་དགོངས་པ་དར་ཆ་རུ་བསྒྲེངས་རྗེས། ཡར་ཀླུང་དུ་བོད་ཀྱི་རྒྱལ་པོ་ཐོག་མ་དང་བོད་ཀྱི་མཁར་རྫོང་ཐོག་མ། བོད་ཀྱི་འགྲོ་ལུགས་ཐོག་མ་སོགས་སྲོལ་བཏོད་ཚུལ་དྲན་མ་ཐག །རང་དབང་མེད་པར་རྒྱང་འབོད་ཅིག་བྱེད་དགོས་བྱུང་།

དེ་ནས་ཅུང་ཙམ་ཚུར་ཡོང་དུས་ཡར་ཀླུང་གཙང་པོ་དང་ཉང་ཆུ་གཉིས་ཀྱི་འདུས་སོ་གསལ་པོར་མཐོང་། གནས་དེ་ལ་མི་ཡུལ་སྐྱིད་མཐིང་ཞེས་འབོད་ཅིང་། གྲི་གུམ་བཙན་པོ་དང་འབྲེལ་བ་ཡོད་པའི་ས་ཆ་ཞིག་རེད་འདུག་སྟེ། ལོ་རྒྱུས་ནང་བཀོད་པ་ལྟར་ན། རྒྱལ་པོ་གྲི་གུམ་བཙན་པོ་དང་ལོ་ངམ་རྟ་རྫི་འཐབ་པ་ལས། རྒྱལ་པོ་བཀྲོངས་ཏེ་ཕུང་པོ་ཡར་ཀླུང་གཙང་པོར་འཕངས་པས་མ་ཚད། སྲས་ཆེ་བ་ཉ་ཁྲི་དང་ཆུང་བ་ཤ་ཁྲི་གཉིས་ཀོང་པོར་སྤྱུགས་པ་རེད། བུ་སྤུན་གཉིས་ཀོང་པོར་སླེབས་རྗེས་ཀོང་ཡུལ་བྲེ་སྣ་ནས་ཡབ་ཀྱི་ཕུང་པོ་རྙེད་དེ་མི་ཡུལ་སྐྱིད་མཐིང་ན་བང་སོ་བཏབ་པར་གྲགས། དེང་སང་མི་ཡུལ་སྐྱིད་མཐིང་ན་འཕྱོངས་རྒྱས་ལ་ཡོད་པའི་བོད་བཙན་པོའི་བང་སོ་ལྟ་བུའི་ཤུལ་རྗེས་ཤིག་ཀྱང་འདུག །ལ་ལས་གྲི་གུམ་བཙན་པོའི་བང་སོ་དེ་ན་མེད་ཚུལ་ཡང་བཤད་མོད། ལོ་རྒྱུས་ཡིག་ཆ་དང་དམངས་ཁྲོད་ངག་རྒྱུན། གནའ་རྫས་རྟོག་དཔྱོད་བཅས་ཕྱོགས་མང་པོ་ནས་ཞིབ་འཇུག་བྱེད་དགོས་པ་ལས་འོལ་ཚོད་བྱེད་རུང་བ་ཞིག་མ་རེད།

ཉིན་གཉིས་ཀྱི་རིང་ལ་ལོ་རྒྱུས་ཡིག་ཆ་ནང་བཀོད་པ་དང་། ཡུལ་མི་རྣམས་ཀྱིས་ལམ་སྣ་བསྟན་པ་ལྟར། སྤོ་བོ་དང་ཉིང་ཁྲིའི་ཁོངས་སུ་ཡར་རྒྱུག་མར་རྒྱུག་དང་ཕར་བཙལ་ཚུར་བཙལ་བྱས་པས། ལོ་རྒྱུས་ཀྱི་རྗེས་ཤུལ་དང་རིག་གནས་ཀྱི་མཚོན་རྟགས་གང་མང་མང་ཞིག་མཇལ་ཐུབ་བྱུང་། གོ་ལོ་ཐོས་ལོ་ཙམ་མ་ཡིན་པར་ཡུལ་དངོས་སུ་སོང་སྟེ་མིག་གིས་བལྟས་ཤིང་ལག་པས་རེག་ནས། ལོ་རྒྱུས་རིག་གནས་ཀྱིས་ཚོར་སྣང་མ་འདྲ་བ་དང་བག་ཆགས་ཟབ་མོ་བཞག་པ་དེ། སྟོན་དུས་སུ་སྨིན་པའི་སྟོན་ཐོག་ལྟ་བུ་གསེར་ལྡེམ་ལྡེམ་གྱི་འབྲས་བུར་བསྒོམས་ཏེ། རང་ཡུལ་རང་གིས་བསྐོར་བའི་ལམ་གྱི་རྒྱགས་ཕྱེ་རུ་འཁུར་དགོས་སོ། །