སྒྲ་སྦྱོར་བམ་གཉིས་ལས་ཡིག་སྒྱུར་བྱེད་ཐབས་གླེང་བ།

འཇིག་རྟེན་འདིའི་མིའི་རིགས་གཅིག་མཚུངས་དང་། དངོས་པོ་གཅིག་མཚུངས། དངོས་པོའི་ངོ་བོ་གཅིག་མཚུངས་ཡིན་རུང་།

ཡུལ་དུས་ཀྱི་དབང་གིས་དངོས་པོ་དེ་དག་ལ་མིང་ཚིག་གི་སྐབས་སུ་འབོད་ཚུལ་གྱི་སྒྲ་དང་། ཡི་གེའམ་བརྡ་རྟགས་འདྲ་མིན་སྣ་ཚོགས་ཐོན་ཁར། བརྗོད་པའི་སྐབས་སུ་ཡང་གོ་རིམ་འཇོག་ཚུལ་སྣ་ཚོགས་ཡོད་པ། དེ་དག་ནི་མི་རིགས་རང་ངོས་ཀྱི་སྐད་ཡིག་སྦྱོང་དུས་ཀྱི་དོན་གནད་ཡིན་པར་མ་ཟད། མི་རིགས་ཕན་ཚུན་གྱི་སྐད་ཡིག་ཕབ་སྒྱུར་བྱེད་དགོས་པའི་རྒྱུ་མཚན་གལ་ཆེན་ཞིག་ཀྱང་ཡིན། བོད་ཀྱི་ཡིག་སྒྱུར་གཞུང་ལུགས་སྔ་ཤོས་ནི་ཀུན་གྱིས་ཤེས་གསལ་ལྟར་སྒྲ་སྦྱོར་བམ་གཉིས་དེ་ལ་གོ་དགོས་སྙམ། དེ་ནི་བོད་བཙན་པོའི་སྐབས་སུ་བྱུང་བའི་ཡིག་སྒྱུར་དཔེ་ཆ་ཞིག་ཡིན་པ་དང་། རྗེས་ཀྱི་ཡིག་སྒྱུར་ཁྲོད་ཀྱི་གཞི་འཛིན་ས་གལ་ཆེན་ཞིག་ཡིན།

སྒྲ་སྦྱོར་བམ་གཉིས་ལས། ཡིག་སྒྱུར་གྱི་རྩ་བའི་ལས་འགན་ནི་མ་ཡིག་གང་ཡིན་པ་དེའི་བརྗོད་བྱའི་དོན་རྣམས་རྗོད་བྱེད་སྒྱུར་ཡིག་ཐོག་ཇི་བཞིན་ཕབ་རྒྱུ་དེ་ཡིན་པས། སྒྱུར་སྐབས་མ་ཡིག་གི་བརྗོད་དོན་བཙན་པར་བཟུང་རྒྱུ་ནི་རྩ་བའི་རྩ་བར་བཟུང་སྟེ་མ་ཡིག་གི་བརྗོད་བྱའི་དོན་དང་མི་འགལ་བར་དོན་དེ་ཁོ་ནའི་ཐོག་སླེབས་པ་བྱ་རྒྱུ་གཙོ་བོ་དང་། བསྒྱུར་བའི་དམིགས་ཡུལ་ནི་སྒྱུར་བྱེད་སྐད་ཡིག་དེ་དང་ཐད་ཀར་འབྲེལ་བ་ཡོད་པའི་མི་རྣམས་ནས་ཤེས་པར་བྱ་རྒྱུ་དེ་ཡིན་པས། བསྒྱུར་བའི་ཆོས་དེ་གང་ལ་དྲིལ་བསྒྲགས་སམ་བརྡ་སྤྲོད་ཡུལ་གྱི་མི་རིགས་ཏེ་བོད་པ་རང་གི་བརྡ་སྤྲོད་ལུགས་དང་མཐུན་པར་བྱས་ཏེ་བོད་མིར་གོ་བདེ་ཡོང་བར་གྱིས་ཞེས་བླང་བྱ་བཏོན་ཡོད།

༡ དོན་བསྒྱུར་ཇི་ལྟར་བྱས་ཚུལ།

ལེགས་སྦྱར་སྐད་ཀྱི་དོན་དང་མཐུན་པར་བོད་སྐད་དུའང་དེ་གསལ་བར་རྟོགས་ཐུབ་པའི་མིང་དུ་བསྒྱུར་བ་སྟེ། པཱ་ར་མི་ཏ་ཕ་རོལ་དུ་ཕྱིན་པ་ཞེས་བསྒྱུར་བ་ལྟ་བུ་སྟེ། ཕ་རོལ་དུ་ཕྱིན་པའི་དོན་ནི། དཔེར་ན་ཆུ་ཀླུང་ཆེན་པོའི་ཚུ་རོལ་ནས་ཕ་རོལ་དུ་བརྒལ་བའི་དོན་དང་། ཡོ་ག་རྣལ་འབྱོར་དུ་བསྒྱུར་བ་ནི། རྣལ་མ་སྟེ་ཡང་དག་པའི་དམིགས་ཡུལ་ལ་སེམས་རྩེ་གཅིག་ཏུ་མཉམ་པར་འཇོག་པའམ་འབྱོར་བའི་དོན་དང་མཐུན་པར་བསྒྱུར་བ་དང་། ས་ཏྭ་སེམས་དཔར་བསྒྱུར་བ་ནི། གཞན་གྱི་དོན་གྲུབ་པ་གཙོ་བོ་ཡིད་ལ་སེམས་པའི་ཆ་ནས་སེམས་པ་ཞེས་པ་ཡིན་ན་ཡང་། གཞན་དོན་སྒྲུབ་པ་ལ་མི་ཞུམ་པའི་སེམས་དཔའ་བ་དང་ལྡན་པའི་དོན་ཐོན་པར་བྱས་པ་ནི་ལོ་ཙཱ་བ་རྣམས་གཞན་དོན་སྒྲུབ་པ་ལ་མི་ཞུམ་པའི་སེམས་དཔའ་དང་ལྡན་པའི་དོན་ཐོན་པར་བྱས་པ་ནི་ལོ་ཙཱ་བ་རྣམས་ཀྱིས་ཇེ་གསལ་དུ་བཏང་བ་ལྟ་བུ་སྟེ། འདི་དག་ནི་དོན་བསྒྱུར་ཇི་ལྟར་བྱས་པའི་ཚུལ་མདོར་བསྡུས་པ་ཙམ་མོ། །

༢ ཐད་བསྒྱུར་ཇི་ལྟར་བྱས་ཚུལ།

ལེགས་སྦྱར་གྱི་ཡི་གེ་རེ་རེས་དོན་ཅི་སྟོན་བོད་སྐད་ལའང་དེ་དང་མཐུན་པར་ཐད་ཀ་ཐད་སོར་བསྒྱུར་བ་སྟེ། པྲ་ཛྙཱ་ཞེས་པ་ཤེས་རབ་ཡིན་ལ། པྲ་ནི་རབ་དང་མཆོག་གི་དོན་དང་། ཛྙཱ་ནི་ཤེས་རབ་དང་མཁྱེན་པའི་དོན་ཏེ། བོད་སྐད་དུ་རབ་ཤེས་ཞེས་པ་བརྗོད་པ་མཆོག་མི་བདེ་བས་ཤེས་རབ་དུ་བསྒྱུར་བ་དང་། སུ་དྷཱི་ཞེས་པ་བློ་བཟང་སྟེ། སུ་ནི་བཟང་པོ་དང་། དྷཱི་ནི་བློ་སྟེ། བརྗོད་བདེ་བའི་དབང་གིས་བློ་བཟང་ཞེས་བསྒྱུར་བ་དང་། རིན་པོ་ཆེ་ཨིནྡྲ་ནཱི་ལ་ཞེས་པ་དབང་སྔོན་ཏེ། ཨིནྡྲ་ནི་དབང་པོ་དང་། ནཱི་ལ་ནི་སྔོན་པོ་ཡིན་པས། དབང་སྔོན་དུ་བསྒྱུར་བ་སྟེ། འདི་ལྟ་བུའི་སྒོ་ནས་ཐད་བསྒྱུར་བྱས་པའི་ཚུལ་གོ་བར་བྱའོ། །

༣ སྒྲ་བསྒྱུར་ཏེ་ལེགས་སྦྱར་སྐད་རང་སོར་བཞག་པའི་སྐོར།

ལེགས་སྦྱར་གྱི་སྐད་བོད་སྐད་དུ་མ་བསྒྱུར་ན་གོ་སླ་བར་འགྱུར་བའི་རིགས་སྔགས་སྐད་རང་སོར་བཞག་པའི་ཚུལ་ལ་གཉིས་ལས།

(༡)ཡི་གེ་ཅུང་ཟད་ཀྱང་མ་འགྱུར་བར་རང་སོར་བཞག་པའི་སྐོར་ལ། དཔེར་ན། ཆུ་ལས་སྐྱེས་པའི་མེ་ཏོག་པདྨ། འདབ་མའི་དཀྱུས་ཕྲ་ཞིང་རིང་བའི་མེ་ཏོག་ཨུཏྤལ། དྲི་ཞིམ་གྱི་ངད་ལྡང་བའི་སྡོང་པོ་ཙནྡན། རྭ་ཅོ་དང་འདྲ་བའི་སྦུབས་སུ་སྐྱེས་པའི་མེ་ཏོག་ཙམྤ་ཀ།རྒྱ་གར་གྱི་ཆུ་ཀླུང་ཆེན་པོ་གངྒཱ་ཞེས་པ་ལྟ་བུ་རྣམས་ནི་སྔོན་བྱོན་ལོ་ཙཱ་བ་རྣམས་ཀྱིས་ཡིག་དོན་ལྟར་བསྒྱུར་ན་འགངས་མི་ཆེ་བར་བསམས་ནས། ཡི་གེ་ཡང་མ་འགྱུར་བར་བཀོད་པ་ཤུགས་ཆེ་སྟེ། གལ་ཏེ་བསྒྱུར་ན། གངྒཱ་ཞེས་པ་འགྲོ་ལྡན་མར་བསྒྱུར་ཆོག་ཀྱང་། དེ་ལྟར་མ་བསྒྱུར་བར་རང་སོར་བཞག་པའི་དགོས་པ་ནི། གངྒཱ་ཞེས་བརྗོད་ན་ཀུན་གྱིས་རྟོགས་སླ་བ་དང་། འགྲོ་ལྡན་མ་ཞེས་བསྒྱུར་ན་མངོན་བརྗོད་ཀྱི་ཚུལ་དུ་གྱུར་པས་ཀུན་གྱིས་རྟོགས་དཀའ་བའི་དབང་གིས་ཡིན་ནོ། །

གཞན་ཡང་མཚོ་ལས་སྐྱེས་པའི་པདྨ་དང་དྲོ་སར་སྐྱེས་པའི་ཙམྤ་ཀ་སོགས་བོད་བསིལ་བའི་ཡུལ་དུ་མི་སྐྱེ་བའི་དབང་གིས་བོད་རང་ལ་དེའི་མིང་བརྡ་མ་བྱུང་བའི་རྒྱུ་མཚན་གྱིས་བོད་སྐད་དུ་བསྒྱུར་བ་ལས་ལེགས་སྦྱར་སྐད་རང་སོར་བཞག་ན་གོ་སླ་བའི་དགོས་པ་ཡོད། དེ་ནི་དཔེར་ན་སྔོན་གྱི་དུས་སུ་བོད་ཀྱིས་སོན་འདེབས་མི་བྱེད་པའི་ཙོང་དང་ཀེའུ། ལ་ཕུག །སྐེ་ཙེ་སོགས་རྒྱ་ནག་གི་སྐད་སོར་བཞག་བྱས་པ་རིམ་གྱིས་ཅུང་ཟད་ཆག་པ་དེ་ད་ལྟ་བོད་རང་གི་སྐད་མཚན་ཉིད་པར་གྱུར་ཟིན་པར་མ་ཟད། དག་ཡིག་རྣམས་སུའང་དེ་ལྟར་བཀོད་པས་མཚོན། དཔེ་དེ་དང་འདྲ་བ་ནི་རྒྱ་ནག་ལ་མེད་པའི་རྩམ་པ་དང་། གངས་ཏི་སེ། ཡར་ཀླུང་གཙང་པོ་རྣམས་ཀྱི་མིང་ཡང་ཟུར་ཅུང་ཟད་རེ་ཉམས་ནས་འབོད་པའི་ཐ་སྙད་རྒྱ་ནག་ལ་དར་སོ་ཆེ་བ་དེ་བཞིན་ནོ། །

བོད་ཀྱི་གདངས་ལ་ཡང་སྔགས་སྐད་ཟུར་ཕྱིན་པ་ཐོན་མི་ཐོན་ཅི་རིགས་ཡོད་ཀྱང་། ཡི་གེ་ལ་སྔགས་ཡིག་ཇི་མ་ཇི་བཞིན་འབྲི་ཐུབ་པའི་གནད་ནི་བོད་ཡིག་གི་འབྱུང་ཁུངས་ལེགས་སྦྱར་གྱི་དབྱངས་གསལ་ལ་ཐུག་པ་དེ་ག་ཡིན་ལ། རྒྱ་ནག་གི་སྐད་ལ་སྔགས་ཡིག་གི་གདངས་ཇི་བཞིན་ཐོན་ཐབས་མེད་པ་ནི། རྒྱ་ནག་གི་སྐད་དང་ཡི་གེ་ལ་སྔགས་ཀྱི་གདངས་འགའ་རེ་ནི་ཇི་ལྟར་བྱས་ཀྱང་ཐོན་ཐབས་མེད་དེ། དཔེར་ན། ཨ་མི་ཏ་བྷ་འོད་དཔག་མེད་ལ་ཨ་མིས་ཐོ་ཧྥོ་དང་། རྗེ་བཙུན་བྱམས་པ་མི་ཏྲི་ལ་མུས་ལེ་དང་། ག་ཡ་ཞེས་པ་འོད་སྲུང་ལ་ཀྱ་ཡ། མཆོག་ཟུང་ཤ་རིའི་བུ་ལ་ཧྲེ་ལེས་ཙི་དང་། ཨ་ནནྟ་ཀུན་དགའ་བོ་ལ་ཨ་ནན་ཐོ་སོགས་རྒྱ་ནག་གི་ལོ་ཙཱ་བ་ཆེན་པོ་རྣམས་ཀྱིས་བཀའ་བསྟན་ནང་དུ་བསྒྱུར་ཡོད་པ་ལྟར་རོ། །

(༢) བོད་ཀྱི་ཁ་ལ་བདེ་བའི་ཆེད་དུ་ཡི་གེ་ཅུང་ཟད་རེ་འགྱུར་བ་ལྟར་དུ་གཞུང་རྣམས་སུ་བཀོད་པའི་སྐོར། ཛམྦུ་དཱི་བ་ཞེས་པ་འཛམ་བུའི་གླིང་དུ་འབོད་པ་ནི། དཱི་བ་ནི་གླིང་དུ་བསྒྱུར་བ་དོན་བསྒྱུར་དང་། ཛམྦུ་ཁ་ལ་བདེ་ཆེད་དུ་སྔོན་འཇུག་འ་སྦྱར། བརྩེགས་མ་ཕྲལ། རྣམ་དབྱེའི་འབྲེལ་སྒྲ་སྦྱར་ནས་བོད་ཡིག་གི་སྦྱོར་སྟངས་དང་བསྟུན་ཏེ་འཛམ་བུའི་གླིང་ཞེས་སུ་གྲུབ། དེ་བཞིན་དུ་ཀལྤ་ཞེས་པ་དུས་རིང་མོའི་མིང་ལ་བསྐལ་པ་ཞེས་སྔོན་འཇུག་བ་དང་ས་མགོ་སྦྱར་བ་དང་། ཀཏྤཱུར་ཞེས་པ་ཡི་གེ་ཕྲལ་བ་ཙམ་དུ་མ་ཟད་ཡི་གེ་འགྱུར་བའི་སྨན་ག་བུར་དང་། ཀུངྐུ་མ་ཞེས་པ་གུར་ཀུམ་དུ་འགྱུར་བ་དང་། སིང་ཧ་ཞེས་པ་སེངྒེའམ་སེང་གེ་རུ་འགྱུར་བ་དང་། པུསྟི་ཀ་ཞེས་པ་གླེགས་བམ་སྟེ་པོ་ཏི་རུ་འགྱུར་བ་སོགས་འདི་འདྲ་བགྲང་གིས་མི་ལང་བ་ཡོད་པས། འདིར་འགའ་རེ་དཔེར་བརྗོད་པ་ཙམ་གྱིས་གཞན་རྣམས་ཀྱང་མཚོན་པར་བྱའོ། །