དེའང་སྡེ་དགེའི་ཁྲི་རབས་ཀྱི་ཐོག་མ་བླ་ཆེན་བྱམས་པ་ཕུན་ཚོགས་ཀྱིས་སྔོན་གླིང་གི་ཆབ་འབངས་རྫོང་ཆེན་བཅོ་བརྒྱད་པོ་མངའ་འོག་ཏུ་བསྡུས་པ་སྟེ་སེང་ཆེན་ནོར་བུ་དགྲ་འདུལ་ནི་སྔོན་གླིང་ཚང་རྒྱལ་པོ་དང་ཕྱིས་སྡེ་དགེ་རྒྱལ་པོའི་ཁོངས་ཨ་ཕྱུག་གི་ས་ཆ་ལ། ཕ་ཡབ་གླིང་སྡེའི་རྒྱལ་པོ་གསུམ་གྱི་ཡ་གྱལ་སེང་བློན་རྒྱལ་པོ་དང་། མ་ཡུམ་འགོག་བཟའ་ཀླུ་ཡི་བུ་མོ་རྨ་བྱ་མཛེས་ལྡན་གཉིས་ཀྱི་སྲས་སུ་རབ་བྱུང་དང་པོའི་ས་སྟག་སྤྱི་ལོ་༡༠༣༨ལོ་ལ་སྐུ་འཁྲུངས། རབ་བྱུང་གཉིས་པའི་ས་ཕག་སྤྱི་ལོ་༡༡༡༩ལོར་སྐུ་ཡི་བཀོད་པ་བསྡུས། ཁོང་དགུང་ལོ་བཅུ་དྲུག་སོན་སྐབས། རྨ་ཁོག་རྡོ་རྗེའི་གདན་ལ་རྟ་རྒྱུག་རྒྱལ་ས་བཟུང་སྟེ་མཆོག་དམ་པ་རི་རབ་ཁ་ཡི་ཁྱུང་ཆེན། རྒྱ་མཚོའི་ནང་གི་ནོར་བུ། གླིང་སྡེ་ཀུན་གྱི་འགོ་འཛིན་མཛད། ཕ་ཟོག་ལས་སྐལ་བཅོ་བརྒྱད། གཏེར་ཟོག་ནོར་བུ་ཆ་བདུན་སོགས་དབང་དུ་བསྡུས་ནས། ཤར་མདོ་ཁམས་གླིང་དུ་རྫོང་ཆེན་བཅོ་བརྒྱད། རྫོང་ཆུང་ཞེ་བཞི། རྫོང་ཕྲན་ང་བཞི། རྫོང་འབྲིང་སོ་དགུ །གཡུལ་འགྱེད་གྲངས་མང་རྒྱལ་ཁ་བླངས།
ཡུལ་གྱི་ཁྱད་ཆོས་ལ་ཨ་ཕྱུག་ཚོ་པའི་གནས་བསྡུས་བཤད་སྲོལ་ལས། ས་ཨ་ཕྱུག་རི་ཐང་མར་རྒྱན་འདྲ། །ཕྱུག་འབྲི་མོ་ཡག་དོན་དེ་ནས་བྱུང་། །ཕྱུག་རྟ་ནོར་འཕེལ་དོན་དེ་ནས་བྱུང་། །གླིང་གེ་སར་སྐྱེས་བུའི་དང་རྩེ་ཡིན། །ཕོ་སྐྱེས་གཟུགས་ལེགས་དོན་དེ་ནས་བྱུང། །བསང་དགྲ་ལྷ་འཁོར་དོན་དེ་ནས་བྱུང་། །མ་འབྲུག་མོ་མོ་སྨན་དང་རྩེ་ཡིན། །ཡུལ་བུད་མེད་མཛེས་དོན་དེ་ནས་བྱུང་། །སྨན་ལག་བཅུད་ཆེ་དོན་དེ་ནས་བྱུང་ཞེས་གྲགས་སོ། །
གླིང་རྗེ་གེ་སར་རྒྱལ་པོའི་སྐྱེ་ཡུལ་འཁྲུངས་གླིང་མེ་ཏོག་ར་བ་ལས།འཁྲུངས་ཡུལ་གྱི་ཁྱད་ཆོས་སྐོར་ལ། ཇོ་རུའི་འཁྲུངས་ཡུལ་བཤད་དགོས་ན། །སྐྱིད་སོས་ཡག་གི་ཁ་མདོ་ལ། །ཆུ་གཉིས་ཆབ་མ་བརྡབ་འདྲ་ཡོད། །བྲག་གཉིས་མདའ་སྒྲོ་གཤིབ་འདྲ་ཡོད། །སྤང་གཉིས་བལ་སྟན་བཏིང་འདྲ་ཡོད། །མདུན་རི་ཁྱུང་ཚང་གཉན་པོ་ཡོད། །རྒྱབ་རི་བྲག་སྔོན་གཡུ་རྩེ་ཡོད། །གཡས་རི་སྟག་མོ་རྔམ་འཁྲུག་ཡོད། །གཡོན་རི་མདུང་རྩེ་བྲག་དམར་ཡོད། །ཅེས་གསུངས་པ་བཞིན་སྒྲུང་ཡིག་དང་ད་ལྟའི་ས་མིང་། མི་རྣམས་ཀྱི་ངག་རྒྱུན་བཅས་ཚང་མ་དེ་བཞིན་ཆགས།
གླིང་གེ་སར་རྒྱལ་པོའི་འཁྲུངས་ཡུལ་ཨ་ཕྱུག་ལ་སྔོན་གླིང་ཚང་རྒྱལ་པོ་དབང་ཆེན་གཡུ་རྒྱལ་གྱིས་བོད་རབ་བྱུང་བརྒྱད་པའི་ལྕགས་ཁྱི་སྤྱི་ལོ་༡༤༩༠ལོ་ཡས་མས་སུ་དབང་བསྒྱུར་གནང་སྐབས་གེ་སར་རྒྱལ་པོའི་རྗེས་དྲན་ཁང་རྟེན་དང་བརྟེན་པ་བཅས་ད་ལྟའི་ཨ་ཕྱུག་གེ་སར་ལྷ་ཁང་ཞེས་པ་དེ་གསར་དུ་བཞེངས་ཏེ། གླིང་གེ་སར་རྒྱལ་པོའི་ཁྲབ་རྨོག་འཁོར་གསུམ་དང་ན་བཟའ། མདའ་གཞུ། གྲི། བ་སོའི་ཐམ་ག་བཅས་དང་། གླིང་གི་ཕུ་ནུ་དཔའ་བརྟུལ་དང་མོ་སྨན་སོགས་ཀྱི་ཆས་རྫས་སྣ་ཚོགས་གྲངས་སྟོང་ཕྲག་ལས་བརྒལ་བ་ཡོད་པས། རིག་གནས་གསར་བརྗེའི་སྐབས་སུ་རྟེན་དང་བརྟེན་པར་བཅས་པ་བརླགས་ཤིང་། སྤྱི་ལོ་༡༩༩༩ལོའི་ཟླ་བ་༨ཚེས་༨ཉིན་བསྐྱར་བཞེངས་ལེགས་གྲུབ་ཡོང་བར། གེ་སར་རྒྱལ་པོ་གཙོས་པའི་དཔའ་ཐུལ་སུམ་ཅུ་དང་། ཚ་ཞང་འདན་མ་གཙོས་པའི་ཁྲ་གླག་སྤྱང་གསུམ།རྒྱ་ཚྭ་ཞལ་དཀར་གཙོས་པའི་ཡང་ཐུལ་དམ་པའི་མི་བདུན། ལྷ་ཆེན་ཚངས་པ་དཀར་པོ་གཙོས་པའི་གླིང་ལྷ་བརྒྱད། སེང་ལྕམ་འབྲུག་མོ་གཙོས་པའི་གླིང་གི་མོ་སྨན་བརྒྱད། རྒྱ་གར་གྱི་གྲུབ་ཆེན་བརྒྱད་ཅུ་སོགས་རྟེན་བཞེངས་གནང་བས་མཐོང་ན་ཡིད་དབང་འཕྲོག་ལ། ཐོས་ན་རྣ་བར་དོན་དང་ལྡན་པའོ། །
岭·格萨尔王庙（纪念堂）建在吉苏雅格康多那块酷似青蛙的巨石旁。据有关资料记载，该庙建于清道光年间，是当时的岭葱土司为纪念自己的先贤，特地在格萨尔王降生处修建。据说当时格萨尔王庙内除塑有格萨尔王跨马征战的威武铜像，还有爱妃珠牡以及岭六部上、中、下三十员大将、八十名英雄、十三位保护神、格萨尔王的十八个妃子、岭葱土司家的历史等。