སྤྱི་ཟླ་8པའི་ཚེས་24ནས་ཚེས་26ཉིན་བར། སྡེ་དགེ་རྫོང་གིས་གླིང་གེ་སར་རྒྱལ་པོའི་རོལ་དབྱངས་དུས་ཚིགས་ཀྱི་བྱེད་སྒོ་རབ་དང་རིམ་པ་སྤེལ་བ་དེ། སྲོལ་རྒྱུན་རིག་གནས་སྒྱུ་རྩལ་འགྲེམ་སྟོན་གྱིས་འབྲེལ་ཐག་བྱས་ཏེ། དཀར་མཛེས་ཁུལ་བཙུགས་ནས་ལོ་75འཁོར་བར་ལེགས་སྐྱེས་ཕུལ།
སྡེ་དགེ་ནི་གེ་སར་རྒྱལ་པོའི་འཁྲུངས་ཡུལ་དང་། གེ་སར་རྒྱལ་པོའི་རིག་གནས་ཀྱི་འབྱུང་ཁུངས་དང་རྒྱུན་འཛིན་ལྟེ་གནས་ཡིན་པའི་ཆ་ནས་ཕུན་སུམ་ཚོགས་པའི་མི་རིགས་རིག་གནས་ཤུལ་བཞག་ཡོད། ཉེ་བའི་ལོ་ཤས་རིང་། སྡེ་དགེ་ཡིས་རིག་གནས་དམངས་བདེ་དང་། རིག་གནས་དམངས་ཕན། རིག་གནས་དམངས་ཆེད་བཅས་ཀྱི་འདུ་ཤེས་རྒྱུན་འཁྱོངས་དང་། རིག་གནས་སྡེ་དགེ་འཛུགས་སྐྱོང་བྱ་རྒྱུ་དམ་འཛིན་བྱས་ཏེ་ལོ་རྒྱུས་སྙན་ངག་གི་རིག་གནས་རྒྱུན་འཛིན་དང་།
གར་སྟེགས་སྒྱུ་རྩལ་འགྲེམས་སྟོན། ལག་ཤེས་སྒྱུ་རྩལ་འགྲེམས་སྟོན་སོགས་སྣ་མང་བྱེད་སྒོ་བརྒྱུད་རིམ་ལྡན་པའི་སྒོ་ནས་སྤེལ་བ་དང་། རང་ཡུལ་གྱི་མི་རིགས་རིག་གནས་ཐོན་ཁུངས་སྔོག་འདོན་གཏིང་ཟབ། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་སྟོབས་ཤུགས་རྒྱུན་མཐུད་ངང་ཆེ་རུ་བཏང་སྟེ་མི་རིགས་མཐུན་སྒྲིལ་སྐུལ་འདེད་ལ་རིག་གནས་ཀྱི་འདེགས་སྐྱོར་བརྟན་པོ་མཁོ་འདོན་བྱས།
སྐབས་གཉིས་པའི《གླིང་གེ་སར་རྒྱལ་པོའི་རོལ་དབྱངས་དུས་ཚིགས》ཞེས་པའི་ཕ་ཡུལ་སྡེ་དགེའི་ཆེད་དོན་རོལ་དབྱངས་འདུ་ཚོགས་ནང་སྡེ་དགེ་ནས་ཐོན་པའི་མི་རིགས་ཁག་གི་གཞས་པ་མཉམ་འཛོམས་བྱས་ཏེ། མི་རིགས་ཀྱི་ཡུལ་སྲོལ་གོམས་གཤིས་ཀྱིས་ཁེངས་ལ་དེང་རབས་ཀྱི་ཉམས་འགྱུར་ཡང་ལྡན་པའི་འཁྲབ་སྟོན་ལ་བརྟེན་ནས་མཉམ་འགུལ་སྤེལ་རེས་དང་བརྩེ་སེམས་མཉམ་འདྲེས་ཀྱི་རྣམ་པ་ཟབ་མོ་ཞིག་བཏོད། ལྟད་མོ་བ་རྣམས་ཀྱི་ཡིད་སེམས་བཀུག་ཅིང་ཚུར་སྣང་ལན་ཆ་ཆེན་པོ་བྱུང་བ་དང་། མི་རིགས་མང་པོའི་བུ་ཕྲུག་གིས་སྒྱུ་རྩལ་སྤེལ་རེས་ཁྲོད་ངོས་འཛིན་གཅིག་མཐུན་ཇེ་ཟབ་ཏུ་བཏང་།
དུས་གཅིག་ཏུ་སྤེལ་བའི་རིག་གནས་སྡེ་དགེའི་དྲིལ་བསྒྲགས་ཕོ་ཉའི་འདེམས་སྒྲུག་འགྲན་བསྡུར་ཁྲོད། འགྲན་ཞུགས་པ་19ཡིས་སྲོལ་རྒྱུན་གྱོན་ཆས་འགྲེམས་སྟོན་དང་། སྒྱུ་རྩལ་འཁྲབ་སྟོན། བརྗོད་བྱ་གཙོ་བོའི་སྒྲོག་འགྲེལ་སོགས་ལྷུ་ཚིགས་མང་པོའི་འགྲན་བསྡུར་བརྒྱུད་དེ་སྡེ་དགེའི་མི་རིགས་མང་པོའི་རིག་གནས་མཉམ་གནས་མཉམ་དར་གྱི་གསོན་ཉམས་ལྡན་པའི་རྣམ་པ་མངོན་པར་བྱས་ཡོད། ཤེས་རྟོགས་བྱུང་བར་གཞིགས་ན། འདེམས་སྒྲུག་འགྲན་བསྡུར་གྱི་མཐའ་མའི་དཔྱད་འདེམས་བྱས་པའི་དྲིལ་བསྒྲགས་ཕོ་ཉ་དང་ཕུལ་བྱུང་བྱ་དགའ་ཐོབ་མཁན་གྱིས་ཕྱི་ཕྱོགས་སུ་སྡེ་དགེའི་རིག་གནས་བརྒྱུད་སྤེལ་བྱེད་པའི་འགན་འཁྲི་གལ་ཆེན་འཁུར་རྒྱུ་ཡིན་པ་རེད། སྡེ་དགེ་རྫོང་གིས་ཁོང་ཚོ་ཆེད་དོན་གསོ་སྐྱོང་འཆར་གཞིའི་ནང་ཞུགས་རྒྱུ་སྒྲིག་འཛུགས་བྱས་ཏེ་དངོན་མིན་ཤུལ་བཞག་རིག་གནས་ཁྱབ་གདལ་དང་ཡུལ་སྐོར་དྲིལ་བསྒྲགས། དེ་བཞིན་རིག་གནས་སྤེལ་རེས་སོགས་ལས་དོན་གཏིང་ཟབ་ཏུ་གཏང་རྒྱུ་རེད།
སྲོལ་རྒྱུན་གྱི་གླུ་གར་འཁྲབ་སྟོན་ནང་སྡེ་དགེ་རྫོང་ཨ་ཕྱུག་དང་འཁོར་ལོ་མདོ་སོགས་ས་གནས་ནས་ཡོང་བའི་འཁྲབ་སྟོན་ཚོགས་པས་རེ་རེ་བཞིན《གླིང་སྒྲུང་གི་ཞབས་བྲོ》དང་གླིང་སྒྲུང་། འབའ་བྲོ། རྩེ་མདའི་སྐོར་བྲོ་སོགས་རིག་གནས་ཀྱི་ནང་དོན་ཟབ་མོ་ལྡན་པ་དང་ས་གནས་ཀྱི་ཁྱད་ཆོས་འབུར་དུ་ཐོན་པའི་ལེ་ཚན་ཁག་གཅིག་མངོན་ཡོད། ལེ་ཚན་དེ་དག་གིས་མངོན་མིན་ཤུལ་བཞག་རིག་གནས་ཀྱི་རྩ་བ་དམ་སྲུང་བྱས་པར་མ་ཟད་དེང་རབས་ཀྱི་འཁྲབ་སྟོན་ནང་མཉམ་འདྲེས་ཀྱང་བྱས་པས། མི་རིགས་མང་པོའི་རིག་གནས་གསར་གཏོད་མཉམ་འདྲེས་ཀྱི་གསོན་ཤུགས་མངོན་ཡོད།
ད་ཐེངས་ཀྱི་བྱེད་སྒོས་ཆེད་ལས་དང་ལས་ཞོར་གྱི་དབྱེ་མཚམས་མེད་པར་བཟོས་ཏེ། དམངས་ཁྲོད་སྒྱུ་རྩལ་མཁས་ཅན་གར་སྟེགས་ཐོག་བཏོན་ནས་མང་ཚོགས་དེའི་ནང་ཞུགས་རིང་རིག་གནས་ཀྱི་ཡིད་དབང་འཕྲོག་ཤུགས་དངོས་སུ་མྱོང་ཚོར་ཐུབ་པ་བྱས་ཏེ། རིག་གནས་དམངས་ཕན་དང་རང་རྟོགས་ངང་རྒྱུན་འཛིན་ཐུབ་པ་བྱས་ཡོད། སྡེ་དགེའི་རིག་གནས་རྒྱང་བསྒྲགས་ཡུལ་སྐོར་ཅུས་ཀྱི་ཅུས་ཀྲང་གཞོན་པ་གཡང་མཚོས་ངོ་སྤྲོད་བྱས་པར་གཞིགས་ན། རོལ་དབྱངས་དུས་ཚིགས་རིང་ད་དུང་མཛུབ་རྩེའི་སྒྱུ་རྩལ་ཞེས་པའི་བརྗོད་དོན་གཙོ་བོའི་འགྲེམས་སྟོན་དང་གནའ་རྫས་སྤྲོ་སྣང་རིག་གནས་འགྲེམས་སྟོན་སོགས་ཀྱི་བྱེད་སྒོ་ཆ་ཚང་སྤེལ་ནས། ཉམས་ལེན་དང་ཁྱད་ལྡན་འཛད་སྤྱོད་དང་འཕྲིན་སྦྱོར་གསར་པར་བརྒྱུད་སྤེལ་བྱས་པར་བརྒྱུད་རིག་གནས་ཡུལ་སྐོར་མཉམ་འདྲེས་དང་ས་ཁོངས་ཀྱི་སྤུས་རྟགས་ལེགས་སུ་འགྲོ་རྒྱུར་སྐུལ་འདེད་ནུས་ལྡན་བཏང་།
ཉེ་བའི་ལོ་ཤས་རིང་། སྡེ་དགེ་རྫོང་གིས་རིག་གནས་འཛུགས་སྐྱོང་དམ་འཛིན་བྱ་གཞིར་བྱས་ཏེ། 《གླིང་གི་གནའ་བོའི་དབྱངས་རྟ》དང་《སྐྱིད་པའི་སྡེ་དགེ་ནས་ཏང་གི་བཀའ་དྲིན་གླུ་རུ་ལེན》སོགས་གྲོང་གསེབ་དར་རྒྱས་ལ་གཞིར་བཞག་པའི་ཕུལ་བྱུང་རིག་རྩལ་བརྩམས་ཆོས་མང་པོ་བཏོན་པར་མ་ཟད། སྨན་ཤོད་སྐོར་བྲོ་དང་འགུ་ཟིའི་གླིང་བྲོ་སོགས་མི་རིགས་ཀྱི་ཞབས་བྲོ་ཁྱབ་གདལ་ཤུགས་ཆེན་བཏང་ཡོད། གེ་སར་རྒྱལ་པོའི་རོལ་དབྱངས་དུས་ཚིགས་དང་དམངས་ཁྲོད་སྐོར་བྲོ་འགྲན་བསྡུར་སོགས་སྤུས་རྟགས་བྱེད་སྒོ་སྤེལ་བ་བརྒྱུད་མང་ཚོགས་དེ་བས་མང་བ་ཞིག་རིག་གནས་གསར་གཏོད་དང་གྲུབ་འབྲས་མཉམ་སྤྱོད་ནང་རང་འགུལ་ངང་ཞུགས་ཐུབ་པ་བྱས་ཏེ། རིག་གནས་མཉམ་འདྲེས་ལ་བརྟེན་ནས་མི་རིགས་མཉམ་འདྲེས་ལ་སྐུལ་འདེད་གཏོང་བའི་གསར་གཏོད་ཀྱི་ལམ་བུའི་ཐོག་བསྐྱོད་ཐུབ་པ་བྱེད་བཞིན་ཡོད། སྡེ་དགེ་རྫོང་དྲིལ་བསྒྲགས་པུའུ་ཡི་པུའུ་ཀྲང་ཚེ་རིང་སྒྲོལ་དཀར་གྱིས་བཤད་རྒྱུར། མ་འོངས་པར་སྡེ་དགེ་ཡིས་ཐོག་མཐའ་བར་གསུམ་དུ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་རྒྱུ་གཙོ་རྐང་དུ་བྱ་རྒྱུ་མཐའ་འཁྱོངས་བྱས་ཏེ། མི་རིགས་མང་པོའི་རིག་གནས་ཐོན་ཁུངས་སྐུལ་སློང་དང་རིག་གནས་དེ་བས་མང་བས་མི་རིགས་མཐུན་སྒྲིལ་ཡར་ཐོན་གྱི་ལག་ལེན་གསར་པ་འཚོལ་ཞིབ་བྱ་རྒྱུ་ཡིན། །