འབྲས་ལྡན་སྟོན་གྱི་དུས་སུ་གསེར་མདོག་སྙེ་མའི་མགོ་ལྕོག་ལྡེམ་ལྡེམ་གཡོ་ཞིང་ནས་འབྲུ་སྔོན་མོའི་དྲི་བསུང་ཕྱོགས་བཞིར་འཐུལ། ཞིང་ཚིགས་སོ་སོ་ན་བརྔ་བསྡུ་འཕྲུལ་ཆས་ཀྱིས་ནས་བསྡུས་ཏེ་ནས་འབྲུ་ཚང་མ་འབྲུ་མཛོད་དུ་སྐྱེལ་བཞིན་པའི་དགའ་སྤྲོའི་རྣམ་པས་ཁེངས། དཀར་མཛེས་རྫོང་ལྷོ་པ་ཡུལ་ཤོག་འབྲོག་ཞིང་སྡེ་པའི་སྡེ་མི་རྣམས་ཀྱིས་ནས་ཀྱི་འབྲུ་རྡོག་རེ་རེ་ལ་ཞིབ་བཤེར་བྱས་ནས་ཁུག་མར་བླུགས་ཏེ། མགྱོགས་མྱུར་ངང་ནས་བསྡུ་བར་འགན་སྲུང་བྱས།
དཀར་མཛེས་རྫོང་ལ“དཀར་མཛེས་ཀྱི་དཀར་མཛེས”དང་། “ཁམས་བྱང་གི་ལྟེ་གནས”“སི་ཁྲོན་ནུབ་བྱང་ས་མཐོའི་འབྲུ་མཛོད”བཅས་ཀྱི་མིང་བྱང་གྲགས་ཅན་ཡོད་ལ། ཡུལ་འདི་སི་ཁྲོན་ཞིང་ཆེན་གྱི་ནུབ་བྱང་རྒྱུད་དང་དཀར་མཛེས་ཁུལ་གྱི་བྱང་རྒྱུད་དུ་ཆགས་ཡོད། རྨོ་ཞིང་གི་རྒྱ་ཁྱོན་ལ་མུའུ་ཁྲི་20ཡོད་པས“3+1”ཐོན་ལས་འཕེལ་རྒྱས་ཀྱི་བཀོད་པ་སྣེ་ཁྲིད་དུ་བྱས་ཏེ་ས་མཐོའི་ཁྱད་ལྡན་ཞིང་འབྲོག་ལས་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་བཏང་། ས་ཁམས་ཀྱི་གནས་བབ་བཟང་བ་དང་གནམ་གཤིས་དང་འཚམ་པའི་དབང་གིས་དཀར་མཛེས་རྫོང་གིས་ནས་ཐོན་ལས་སྟེ་གཙོ་ཁྲིད་ཐོན་ལས་ཀྱི་གྲས་སུ་བརྩིས་ཏེ་དེང་རབས་ཅན་གྱི་ཐོན་ལས་མ་ལག་ནུས་ཤུགས་ཡོད་རྒུས་བསྐྲུན་ཡོད་པ་རེད།
མུའུ་ཁྲི་12ཅན་གྱི“ལེ་བར་བརྒྱའི་ནས་ཞིང་”གི་བར་ཁྱམས་བསྐྲུན་པ།
G317རྒྱལ་ལམ་གྱི་འགྲམ་གཉིས་སུ། མུ་མཐའ་བྲལ་བའི་ས་ཞིང་དུ་བརྔ་བསྡུ་འཕྲུལ་འཁོར་ནས་ཞིང་དུ་གང་སར་རྒྱུག་པས་བྲེལ་ཟིང་གི་རྣམ་པས་ཁེངས་ཡོད།
མིག་སྔར། དཀར་མཛེས་རྫོང་གི་ནས་འབྲུ་འདེབས་འཛུགས་ཀྱི་གཞི་རྒྱ་བརྟན་མོར་ཆགས་ཡོད་ལ། དེའི་ཁྲོད་དུ་ནས་དང་སྲན་མ། གྲོ་བཅས་ཚུད་པའི་འབྲུ་རིགས་ལོ་ཧྲིལ་པོར་འདེབས་ཚད་རྒྱ་ཁྱོན་མུའུ་ཁྲི་16.8རྒྱུན་འཁྱོངས་བྱེད་ཐུབ་ཡོད། G317ས་མཐོའི་བགྲོད་ལམ་བརྒྱུད་དེ་བསྐྲུན་པའི“ལེ་བར་བརྒྱའི་ནས་ཞིང་”གི་ཁྱམས་ར་ལྟེ་བའི་ཁུལ་གྱི་རྒྱ་ཁྱོན་མུའུ་ཁྲི་12ཟིན་ལ། ད་ལྟ་རྫོང་ཡོངས་ཀྱི་ནས་ཐོན་ལས་འགྲེམས་སྟོན་སྒེའུ་ཁུང་གཙོ་བོར་གྱུར་ཡོད་པ་རེད། ཉེ་བའི་ལོ་ཤས་རིང་ལ་དཀར་མཛེས་རྫོང་གིས་ཚད་གཞི་མཐོ་བའི་ཞིང་ས་འཛུགས་སྐྲུན་ལ་སྐུལ་འདེད་ཤུགས་ཆེན་བཏང་བ་དང་། ཞིང་འཕྲུལ་ཉོ་སྒྲུབ་ཀྱི་ཁ་གསབ་སྲིད་ཇུས་དོན་འཁྱོལ། ཞིང་འཕྲུལ་སྤྱི་ཚོགས་ཅན་གྱི་ཞབས་ཞུ་རྩ་འཛུགས་སྐྱེད་སྲིང་བཅས་བྱས་པ་བརྒྱུད། ཞིང་ལས་ཀྱི་ཕྱོགས་བསྡུས་ཐོན་སྐྱེད་ནུས་པ་མངོན་གསལ་ཆེ་རུ་ཕྱིན་ཡོད། སོན་བཟང་ཁྱབ་གདལ་དང་ལག་རྩལ་མཐོར་འདེགས་བྱས་པར་བརྒྱུད། སྔོན་དཔག་བྱས་པ་ལྟར་ན་2025ལོར་ནས་ཀྱི་སྤྱིའི་ཐོན་འབོར་ཏུན་27805ཟིན་པ་དང་། ལོ་གོང་མ་དང་བསྡུར་ན་4.9%འཕར། མུའུ་རེའི་ཐོན་ཚད་སྤྱི་རྒྱ་230ཙམ་ཟིན་པས་མང་ཚོགས་ཀྱི་ཡོང་སྒོ་འཕར་སྣོན་དང་ཡུལ་སྐོར་འཕེལ་རྒྱས་ཀྱི་རྣམ་པ་བཟང་པོ་བསྐྲུན་པ་རེད།
དཀར་མཛེས་རྫོང་གིས་ད་དུང་ནས་ལས་སྣོན་ཞིབ་ཚགས་ཀྱི་ཐོན་ལས་འཕེལ་རྒྱས་བཏང་བ་དང་། ཞིང་ཆེན་གྱི་སྐར་རིམ་བཞི་པའི་ནས་ཀྱི་དེང་རབས་ཞིང་ལས་གླིང་གཞི་རྟེན་དུ་བྱས་ཏེ་ཐོན་ལས་སྦྲེལ་ཐག་ཧྲིལ་པོ་སྣུར་སྲིང་བྱ་རྒྱུར་སྐུལ་འདེད་བཏང་བ་རེད། ནས་ཀྱི་ཐོན་རྫས་སྣ་ཁ་30ལྷག་ཙམ་གསར་སྤེལ་བྱས་པ་དང་ལོ་རེར་སྤུས་ལེགས་སོན་བཟང་ཏུན་6000ལྷག་ཙམ་ལས་སྣོན་བྱས་པ་དང་ཆབས་ཅིག“གླིང་ཁུལ་དང་མཉམ་ལས་ཁང་དང་ཞིང་དུད”བཅས་ཟུང་དུ་འབྲེལ་བའི་ནས་ཀྱི་རྒྱུ་ཆའི་ཐད་ཀར་མངག་ཉོ་ཡི་ལམ་སྲོལ་ཧུར་ཐག་བཙུགས་ཏེ་ནས་ཉོ་སྒྲུབ་རིན་གོང་སྤྱི་རྒྱ་རེར་སྒོར་3ནས་སྒོར་6ལ་ཇེ་མཐོ་བཏང་བས་ཞིང་དུད་ཀྱི་འདེབས་འཛུགས་བྱེད་ཤུགས་ཆེ་རུ་བཏང་།
ཚན་རྩལ་གྱིས་ནས་ཀྱི་ཐོན་ཚད་སྔར་བས་མཐོ་རུ་བཏང་།
“ཚན་རྩལ་ལ་བརྟེན་པ་ནི་ནས་ཀྱི་ཐོན་ལས་ཀྱི་སྤུས་ཚད་མཐོ་རུ་གཏོང་བ་དང་ཕན་འབྲས་ཆེར་ཡོང་བའི་འགག་རྩ་ཡིན”“ཚན་རྩལ་དང་ཞིང་ལས་མཉམ་འདྲེས་གཏིང་ཟབ་བྱས་པ་བརྒྱུད། དཀར་མཛེས་རྫོང་གིས་སྲོལ་རྒྱུན་གྱི་འདེབས་འཛུགས་བྱེད་སྟངས་ནས་གྲངས་འཛིན་ཅན་དང་གནད་འཁེལ་ཅན་གྱི་ཤེས་ལྡན་ཞིང་ལས་ཐད་ལ་རིམ་བཞིན་ཕྱོགས་སྒྱུར་བྱས་ཏེ། ནས་ཀྱི་ཐོན་ལས་སྤུས་ཚད་མཐོ་བའི་འཕེལ་རྒྱས་འགྲོ་རྒྱུར་སྐུལ་འདེད་ནུས་ལྡན་གཏོང་བཞིན་ཡོད”ཅེས་དཀར་མཛེས་རྫོང་ཞིང་འབྲོག་གྲོང་གསེབ་དང་ཚན་རྩལ་ཅུས་ཀྱི་ཏང་ཙུའུ་ཧྲུའུ་ཅི། ཅུས་ཀྲང་ཡཱ་ཝུན་ཐའོ་ཡིས་དེ་ལྟར་ངོ་སྤྲོད་བྱས།
སོན་བཟང་གསོ་སྤེལ་ཐད་དཀར་མཛེས་རྫོང་གིས་ཞིང་ཆེན་དང་། ཁུལ། ཞིང་ལས་ཚན་རིག་ཁང་བཅས་དང་མཉམ་ལས་གཏིང་ཟབ་བྱས་ཏེ་ཞིང་འབྲེལ་མ་དངུལ་བསྡུ་སྒྲིལ་བྱས་ཏེ་སྤུས་ལེགས་ནས་དང་ཞིང་ལས་ལོ་ཏོག་གཞན་དག་གི་སོན་བཟང་ཁྱབ་གདལ་ཤུགས་ཆེན་བཏང་བ་དང་2025ལོར་རྫོང་ཡོངས་ཀྱིས་རིམ་རྩིས་ལྟར་ན། སྤུས་ལེགས་ས་བོན་དང་། རྫས་ལུད། ཞིང་སྨན། ས་བོན་གཞན་དག་ཉོ་སྒྲུབ་ཐད་མ་དངུལ་སྣ་ཚོགས་སྒོར་ཁྲི་1043བཏང་ནས། ནས་གཙོ་བོར་བྱས་པའི་ས་བོན་གྱི་རིགས་དང་ལག་རྩལ་ཞིང་ཁ་སོ་སོར་ཁྱབ་གདལ་བཏང་བ་རེད།
འཕྲུལ་ཆས་ཅན་གྱི་ཐོན་སྐྱེད་ཐད། དཀར་མཛེས་ཁུལ་ཞིང་ལས་འཕྲུལ་ཆས་ཁྱབ་གདལ་ལྟེ་གནས་ཀྱི་ཀྲུའུ་རེན་གཞོན་པ། མཐོ་རིམ་ཞིང་ལས་ལག་རྩལ་པ་ཕུང་ཧུང་ཝེ་ཡིས་ངོ་སྤྲོད་བྱས་པ་ལྟར་ན། དཀར་མཛེས་རྫོང་གིས་ཞིང་འཕྲུལ་སྒྲིག་ཆས་ཁྱབ་གདལ་དང་བཀོལ་སྤྱོད་ཐད་ཤུགས་སྣོན་བརྒྱབ་ཏེ་རིག་ནུས་གྲངས་འཛིན་ཅན་གྱི་བྱང་སྐར་སྤུན་བདུན་ཕྱོགས་སྟོན་ལག་རྩལ་སྤྱད་དེ་ཞིང་སའི་འབྲུ་རིགས་འདེབས་ཚད་དང་བསྡུ་ཚད་ཀྱི་ཕྱོགས་བསྡུས་འཕྲུལ་ཆས་ཅན་གྱི་ཆུ་ཚད་ཁྱོན་ཡོངས་ནས་མཐོ་རུ་བཏང་ཡོད། མིག་སྔར་དཀར་མཛེས་རྫོང་གི་ཞིང་སའི་འབྲུ་རིགས་བསྡུ་ཉར་གྱི་ཕྱོགས་བསྡུས་འཕྲུལ་ཆས་ཅན་གྱི་ཆུ་ཚད་73.52%ཟིན་པ་དང་དཀར་མཛེས་ཁུལ་གྱི་ཨང་དང་པོར་སླེབས་ཡོད་པ་རེད།
རིག་ལྡན་ཞིང་ལས་ཐད་ནས་གྲངས་འཛིན་དོ་དམ་སྟེགས་བུ་ཡིས་ས་རྒྱུའི་བཞའ་ཚན་ལྟ་ཞིབ་ཚད་ལེན་དང་། གནམ་གཤིས་རིག་ནུས་སྔོན་ཚུད་ཉེན་བརྡ། ལོ་ཏོག་སྐྱེ་འཚར་གྱི་འགུལ་རྣམ་དབྱེ་ཞིབ་སོགས་མ་ལག་བསྡུ་སྒྲིག་བྱས་ཏེ། ཚོང་སྦྲེལ་དྲ་བའི་སྒྲིག་ཆས་བརྒྱུད་ནས་ཞིང་ཁའི་གྲངས་གཞི་དུས་ཐོག་ཏུ་འཚོལ་བསྡུ་བྱས་ཏེ་རིག་ནུས་ཆུ་འདྲེན་དང་ཆུའི་ཐོན་ཁུངས་ལུགས་མཐུན་ངང་བེད་སྤྱོད་ཐུབ་པ་མངོན་འགྱུར་བྱས། མི་མེད་གནམ་གྲུའི་རྩི་ཤིང་སྲུང་སྐྱོང་གི་ལས་ཕྱོད་མིའི་ལས་ཕྱོད་དང་བསྡུར་ན་ལྡབ་50ཡི་ཡན་ཡིན་པས་ནད་འབུ་སྔོན་འགོག་དང་ཚོད་འཛིན་ནུས་ལྡན་གྱིས་ནས་ཀྱི་ཐོན་ཚད་དང་སྤུས་ཚད་ལ་འགན་ལེན་བྱས་ཡོད་པ་རེད།
ཚན་རྩལ་དང་ཞིང་ལས་མཉམ་འདྲེས་གཏིང་ཟབ་བྱས་པ་བརྒྱུད། དཀར་མཛེས་རྫོང་སྲོལ་རྒྱུན་གྱི་འབྲུ་རིགས་འདེབས་འཛུགས་བྱེད་སྟངས་ནས་རིམ་བཞིན་གྲངས་འཛིན་ཅན་དང་གནད་འཁེལ་ཅན་གྱི་རིག་ལྡན་ཞིང་ལས་ཐད་ལ་ཕྱོགས་སྒྱུར་བྱེད་བཞིན་ཡོད་པ་དང་། ནས་ཀྱི་ཐོན་ལས་སྤུས་ཚད་མཐོ་བའི་ངང་འཕེལ་རྒྱས་འགྲོ་རྒྱུར་སྐུལ་འདེད་ནུས་ལྡན་བཏང་སྟེ་གྲོང་གསེབ་དར་རྒྱས་དང་མང་ཚོགས་ཀྱི་ཡོང་སྒོ་འཕར་སྣོན་ཐད་ལ་འདེགས་སྐྱོར་བརྟན་པོ་བྱེད་བཞིན་ཡོད།