སི་ཁྲོན་ནུབ་བྱང་གི་གྲང་མཐོའི་དབུས་རྒྱུད་དུ་གནས་པའི་གསེར་རྟ་རྫོང་དུ་དཀར་མཛེས་ཁུལ་བཙུགས་ནས་ལོ་75འཁོར་བའི་ད་ལོར་རྫོང་བཙུགས་ནས་ལོ་འཁོར་70བསུས། ལོ་ངོ་70རིང་། དེང་རབས་སློབ་གསོའི་མེ་སོན་གསེར་རྟའི་འཛིན་མའི་ཁྱོན་དུ་བཏབ་ཅིང་།
གསེར་རྟ་རྫོང་གིས་སྟོབས་ཤུགས་གཅིག་སྡུད་བྱས་ནས་རྨང་གཞི་གཉིས་ཀྱི་དམིགས་ཚད་འགག་སྒྲོལ་བྱེད་པ་དང་། ས་ཁོངས་ཡོངས་ཀྱི་ལོ་དགུའི་འགན་བབ་སློབ་གསོ་ཁྱབ་གདལ་གཏོང་བའི་ལས་གྲྭ་སྐུལ་འདེད་གཏོང་བ། འོས་འགན་སློབ་གསོ་སྤུས་ལེགས་དོ་སྙོམས་ངང་འཕེལ་རྒྱས་གཏོང་བར་སྐུལ་འདེད་གཏིང་ཟབ་གཏོང་བ། རྩ་ཆག་གཉིས་དང་ཁ་གསབ་གཅིག་གི་སྲིད་ཇུས་ཁྱོན་ཡོངས་ནས་དོན་འཁྱོལ་བྱེད་པ་དང་། སློབ་གསོའི་ཆེད་དོན་མ་དངུལ་མུ་མཐུད་དུ་མང་དུ་བཏང་བ་བརྒྱུད། སློབ་གསོའི་བྱ་གཞག་ལ་རྩ་བའི་རང་བཞིན་གྱི་འགྱུར་ལྡོག་བྱུང་ཡོད། དེ་སྔའི་སློབ་གསོའི་གཤོང་ས་འདི་ནས་རྟ་ཐོག་སློབ་ཁྲིད་ས་ཚུགས་ནས་དེང་རབས་ཅན་གྱི་སློབ་གྲྭ་དང་། སློབ་གྲྭར་འགྲོ་ས་ཡོད་པ་ནས་སློབ་གྲྭ་འགྲོ་ས་ཡག་པོ་ཡོད་པའི་བར་མཆོང་སྐྱོད་ལྟ་བུའི་འཕེལ་རྒྱས་མངོན་འགྱུར་བྱུང་ཡོད།
འཕེལ་རྒྱས། ཞག་སྡོད་ལམ་ལུགས་ཀྱི་སློབ་ཆུང་ནས་དེང་རབས་ཅན་གྱི་སློབ་གྲྭའི་འཕེལ་འགྱུར།
ས་མཐོའི་ས་ཁོངས་ཀྱི་ཁྱད་ཆོས་ལ་གཞིགས་ནས། གསེར་རྟའི་དེང་རབས་སློབ་གསོ་ནི་ཞག་སྡོད་ལམ་ལུགས་ཀྱི་སློབ་ཆུང་བཙུགས་པ་ནས་འགོ་ཚུགས་པ་ཞིག་རེད། འོན་ཀྱང་སྐབས་དེའི་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཆུ་ཚད་དམའ་བ་དང་ཕྱི་རོལ་ཡུལ་གྱི་ཆ་རྐྱེན་གྱི་དབང་གིས་སློབ་ཁང་དང་ཅོག་ཙེ་སོགས་སྒྲིག་ཆས་ཧ་ཅང་དཀོན་པོ་ཡིན་པས། རྒྱ་ཆེའི་དགེ་སློབ་ཚོས་དཀའ་ངལ་ཁྱད་བསད་དང་ས་གནས་དེ་གའི་གནས་བབ་དང་བསྟུན་ནས་སྤང་ཐང་དང་གུར་ནང་སློབ་ཁྲིད་བྱས་པས། འབྲོག་ཁུལ་གྱི་ཁྱད་ཆོས་ལྡན་པའི་སྦྲ་གུར་སློབ་ཆུང་བྱུང་བ་རེད།
ད་ཆ་གསེར་རྟ་རྫོང་གིས་བུ་བཅོལ་ཁང་ནས་དམའ་འབྲིང་བར་ཁྱབ་པའི་དེང་རབས་ཅན་གྱི་སློབ་གྲྭ་76བསྐྲུན་པ་དང་། སློབ་གསོའི་ཆ་འཕྲིན་ཅན་གྱི་ཁྱབ་ཚད་89%བར་མཐོ་རུ་ཕྱིན་པ་དང་། རིག་ནུས་སློབ་ཁྲིད་སྒྲིག་ཆས་ཀྱིས་འབྲོག་ཁུལ་གྱི་སློབ་ཁྲིད་དང་སྤུས་ལེགས་སློབ་གསོའི་ཐོན་ཁུངས་ཕན་ཚུན་འབྲེལ་མཐུད་ཐུབ་པ་བྱུང་ཡོད།
སློབ་མཚམས་འཇོག་པར་ཚོད་འཛིན་བྱས་ནས་སློབ་སྦྱོང་འགན་ལེན་ལ་ཕན་འབྲས་མངོན་གསལ་དོད་པོ་ཐོན་ཞིང་། འོས་འགན་སློབ་གསོའི་དུས་མཚམས་སུ་སློབ་ཞུགས་བྱེད་ཚད་དང་སྲ་བརྟན་བྱེད་ཚད་སོ་སོར་100%དང་98.5%ཟིན་ཡོད། རིམ་རྩིས་བྱས་ན་སྒོར་དུང་ཕྱུར་3.2བཏང་ནས“རྩ་ཆག་གསུམ་དང་ཁ་གསབ་གཅིག”སོགས་དམངས་ཕན་སྲིད་ཇུས་ལག་བསྟར་བྱས་ནས། སློབ་མ་མི་ཐེངས་ཁྲི་1.5ལྷག་ལ་ཕན་ཐོགས་ཡོད།
གསེར་རྟའི་སློབ་གསོ་ནི་ས་བབ་མཐོ་བའི་མི་རིགས་ས་ཁུལ་གྱི་སློབ་གསོ་དེང་རབས་ཅན་གྱི་ཁྱད་ཆོས་ལྡན་པའི་འཕེལ་རྒྱས་ཀྱི་ལམ་བུ་ཞིག་ལ་སྐྱོད་བཞིན་ཡོད།
མཆོང་བརྒལ། ཚད་ལྡན་ཅན་གྱི་སློབ་གྲྭའི་ཁང་པས་འབྲོག་ཁུལ་གྱི་གྲོང་ཚོར་འོད་སྣང་འཚེར་བ།
ཆེས་མཛེས་སྡུག་ལྡན་པའི་འཛུགས་སྐྲུན་སློབ་གྲྭར་ཡོད་ལ། ཆེས་བཟང་བའི་དབྱར་རྩྭ་དགུན་འབུ་སློབ་དེབ་ནང་དུ་ཡོད་ཅེས་པ་ནི་གསེར་རྟའི་ལས་བྱེད་མང་ཚོགས་ཀྱི་ཐུན་མོང་གི་ངོས་འཛིན་ཞིག་རེད། ད་ཆ་ཚད་ལྡན་ཅན་གྱི་སློབ་ཁང་གིས་འབྲོག་ཁུལ་གྱི་གྲོང་ཚོར་འོད་འཚེར་བ་དང་། ཆ་འཕྲིན་ཅན་གྱི་སློབ་ཚན་གྱིས་མིག་རྒྱང་བསྐྱེད་ཡོད། སློབ་གསོ་དྲང་གཞག་གི་ཉི་འོད་ས་མཐོའི་རྩྭ་ཐང་གང་སར་འཕྲོ་བས། གསེར་རྟའི་ཡུན་རིང་བདེ་འགོད་དང་གྲོང་གསེབ་དར་རྒྱས་ཡོང་བར་རིག་སྟོབས་ཀྱི་སྒུལ་ཤུགས་འཕྲུལ་འཁོར་སྟོབས་ལྡན་ཞིག་བསྣན་ཡོད། རྫོང་ཡོངས་སུ་ད་ཆ་རིམ་པ་ཁག་དང་རིགས་ཁག་གི་སློབ་གྲྭ་82ཡོད་པ་དང་། སློབ་གསོའི་ཐོག་དམངས་ཕན་སྲིད་ཇུས་ཁྱོན་ཡོངས་ནས་དོན་འཁྱོལ་བྱས་ཏེ་སློབ་མའི་སློབ་ཡོན་ཁྱོན་བསྡོམས་སྒོར་ཁྲི་4800ལྷག་དང་།
སློབ་མའི་འཚོ་བ་དང་འཚོ་བཅུད། དྲོད་ལེན་ཁ་གསབ། འབྲི་དེབ་རིན་པ་སོགས་སྒོར་ཁྲི་10439ལྷག་རྩ་ཆག་བཏང་ནས། ཁ་གསབ་ཁྱོན་ཡོངས་ལ་ཁྱབ་པ་བྱས་ཡོད།
མཚོ་གླག་འཆར་གཞི་བརྒྱུད་སློབ་མ་20ཙམ་ཅའོ་ཅང་ཆུས་ལས་རིགས་འབྲིང་རིམ་ཆེད་ལས་སློབ་གྲྭའི་ཐའེ་ཀྲོའུ་ལག་རྩལ་བཟོ་པའི་སློབ་གྲྭར་སློབ་སྦྱོང་བྱེད་པར་འགྲོ་རྒྱུར་རྒྱབ་སྐྱོར་བྱས་པ་དང་། མཐར་ཕྱིན་རྗེས་ཚང་མ་ཀྲེ་ཅང་ཆུ་ཤེལ་འོད་གློག་ཚན་རྩལ་མ་རྐང་ཚད་ཡོད་ཀུང་སིར་ལས་ཞུགས་བཀོད་སྒྲིག་བྱས། ས་གནས་གཞན་དུ་འཛིན་གྲྭ་གཉེར་བ་དང་ཁྱད་ཆོས་ལྡན་པའི་སློབ་གསོར་དུས་མཉམ་དུ་སྐུལ་འདེད་གཏོང་བ། སྐར་དམར་བུད་མེད་རྐང་རྩེད་སྤོ་ལོའི་རུ་ཁག་སོགས་ཁྱད་ཆོས་ལྡན་པའི་སྤུས་རྟགས་གསོ་སྐྱོང་བྱས་ཏེ། རིམ་པ་མང་བ་དང་སྤུས་ཚད་མཐོ་བའི་སློབ་གསོའི་མ་ལག་བཙུགས་པ་རེད།
མཐུན་སྦྱོར། ཁྱད་ཆོས་ལྡན་པའི་འཛིན་གྲྭས་སློབ་གསོའི་ལེའུ་གསར་པ་བྲིས།
ས་བབ་མཐོ་ཞིང་དབྱང་དབུགས་དཀོན་པའི་གནམ་གཤིས་དང་རྨང་གཞིའི་ཆ་རྐྱེན་ཞན་པའི་དབང་གིས་གསེར་རྟ་རྫོང་ལ་ཡུན་རིང་མཐོ་འབྲིང་གཉེར་བར་དཀའ་གནད་འཕྲད་ཡོད། གསེར་རྟའི་བྱིས་པ་མཐོ་འབྲིང་དུ་སློབ་སྦྱོང་བྱེད་པའི་ཐབས་ལམ་རྒྱ་བསྐྱེད་གཏོང་ཆེད། གསེར་རྟ་རྫོང་ཨུ་དང་རྫོང་མི་དམངས་སྲིད་གཞུང་གིས་ཚད་མཐོའི་མཐོང་ཆེན་བྱས་ཏེ། དམངས་ཕན་བདེ་ཐང་འཛིན་གྲྭའི་རྣམ་གྲངས་ལག་བསྟར་བྱས་ཏེ། པེ་ཁྲོན་རྫོང་ཨུ་དང་རྫོང་མི་དམངས་སྲིད་གཞུང་དང་མཛའ་མཐུན་གྲོས་མོལ་ཐེངས་མང་བྱས་པ་བརྒྱུད། 2024ལོའི་ཟླ་3པར་པེ་ཁྲོན་དུ་ས་གནས་གཞན་གྱི་མཐོ་འབྲིང་འཛིན་གྲྭ་གཉེར་བའི་མཉམ་ལས་གྲོས་མཐུན་ལ་དངོས་སུ་མིང་རྟགས་བཀོད་པ་རེད། 2024ལོའི་ཟླ་9པར་གསེར་རྟའི་ཁག་དང་པོའི་སློབ་མ་50གདམ་གསེས་ནན་པོ་བྱས་པ་བརྒྱུད། མཚོ་འཕགས་སྨི་3000གི་བར་ཁྱད་ཅན་གྱི་ས་གནས་གཞན་དུ་སློབ་སྦྱོང་བྱེད་པའི་འགྲུལ་བཞུད་བྱེད་འགོ་ཚུགས་པ་རེད། དམངས་ཕན་བདེ་ཐང་འཛིན་གྲྭའི་རྣམ་གྲངས་ཀྱིས་སྤུས་ལེགས་སློབ་གསོའི་ཐོན་ཁུངས་མཉམ་སྤྱོད་བྱས་པ་བརྒྱུད། གསེར་རྟ་མཐོ་འབྲིང་གི་སློབ་གསོ་འཕེལ་རྒྱས་རྗེས་ལུས་ཀྱི་གནད་དོན་ཐག་གཅོད་ནུས་ལྡན་བྱས་ནས། མི་རིགས་མཉམ་འདྲེས་ལ་སྐུལ་འདེད་བཏང་ཡོད།
མཉམ་ལས་འཚོལ་ཞིབ་འདི་འདྲ་ད་དུང་མུ་མཐུད་དུ་བྱེད་བཞིན་ཡོད། ད་ལོའི་ཟླ་7པའི་ཚེས་22ཉིན་དཀར་མཛེས་བོད་རིགས་རང་སྐྱོང་ཁུལ་མཐོ་འབྲིང་དང་གསེར་རྟ་རྫོང་མི་དམངས་སྲིད་གཞུང་གི་ཅའོ་ཙི་གསེར་རྟའི་འཛིན་གྲྭའི་མཉམ་ལས་སློབ་གཉེར་གྱི་གན་འཇོག་མཛད་སྒོ་གྲུབ་འབྲས་ཐོབ་པའི་ངང་འཚོགས་པ་རེད། 2025ལོའི་སྟོན་དུས་ཀྱི་སློབ་དུས་ནས་བཟུང་།
གསེར་རྟའི་སློབ་མ་50ལ་དཀར་མཛེས་བོད་རིགས་རང་སྐྱོང་ཁུལ་མཐོ་རིམ་སློབ་འབྲིང་དུ་སྤུས་ལེགས་ཀྱི་སློབ་གསོའི་ཐོན་ཁུངས་ལོངས་སུ་སྤྱོད་རྒྱུ་རེད། ཅའོ་ཙི་གསེར་རྟའི་འཛིན་གྲྭ་དང་གསེར་རྟ་དམངས་ཕན་བདེ་ཐང་འཛིན་གྲྭ་ནི་ཐབས་ལམ་གཅིག་མཐུན་ཡིན་པས། གསེར་རྟ་ནས་སྐྱེས་པའི་སློབ་མ་འཚར་ལོངས་བྱུང་ནས། ཤེས་ལྡན་མི་སྣར་འགྱུར་བར་སྔར་བས་སྟེགས་བུ་བསྐྲུན་ཡོད་པ་རེད།
རྟ་རྒྱབ་ཀྱི་གུར་ནས་རིག་ནུས་སློབ་གྲྭ་དང་། ཡིག་རྨོངས་སེལ་བའི་མཚན་མོའི་སློབ་གྲྭ་ནས་ཚེ་གང་སློབ་སྦྱོང་བྱེད་ཐུབ་པའི་གསེར་རྟའི་སློབ་གསོའི་ལོ་ངོ་70རིང་མཆོང་སྐྱོད་ལྟ་བུའི་འཕེལ་རྒྱས་ནི་ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་ཀྱི་གསོན་ཉམས་ལྡན་པའི་ལག་ལེན་ཞིག་རེད། གསེར་རྟའི་བུ་ཕྲུག་ཁྲི་6.4ཡིས་མུ་མཐུད་དུ་ཕྲུ་གུ་ཚང་མར་མི་ཚེའི་གཟི་བརྗིད་ལྡན་པའི་གོ་སྐབས་ཡོད་དུ་འཇུག་ཅེས་པའི་དུས་རབས་ཀྱི་ལན་འདེབས་བཞིན་ཡོད། སློབ་གསོའི་འོད་ཟེར་གྱིས་གསེར་རྟ་རྩྭ་ཐང་གི་འབྱུང་འགྱུར་སྔར་ལས་འོད་འཚེར་དུ་བཅུག་ཡོད་པ་རེད། །