བྲག་འགོ་ནི་གསར་བརྗེའི་ས་གཞི་ཞིག་རེད། 1936ལོར་དམར་དམག་འདི་གར་བཅའ་སྡོད་དང་ངལ་གསོ། སྦྱོང་སྒྲིག་བྱས་ནས་བྲག་འགོའི་མི་དམངས་དང་མཛའ་བརྩེ་ཟོལ་མེད་བཙུགས་པ་དང་། བྲག་འགོའི་མི་དམངས་ཀྱིས་དམར་དམག་ལ་འབྲུ་རིགས་གྲབས་གསོག་དང་། མ་དངུལ་གྲབས་གསོག །གྲོན་དངུལ་གྲབས་གསོག་བཅས་བྱས་ནས་དམག་དམངས་ཉ་ཆུ་ལྟ་བུའི་བརྩེ་དུང་གི་བསྟོད་གླུ་བླངས།
ད་ལྟ། བྲག་འགོ་ཡིས་གསར་བརྗེའི་བྲག་འགོ་ཞེས་པའི་རྒྱང་སྐྱོད་ཀྱི་བརྗོད་བྱ་གཙོ་བོའི་སྤུས་རྟགས་ཧུར་ཐག་བཏོད་དེ། གསར་བརྗེའི་རིག་གནས་ཐོན་ཁུངས་ནང་རྩ་བ་ཚུགས་པ་དང་། སྤྱི་ལེ་བརྒྱའི་གསར་བརྗེའི་རིག་གནས་ཁྱམས་རིང་དང་། རྒྱང་སྐྱོད་རིག་གནས་འགྲེམས་སྟོན་ལྟེ་གནས། རྒྱང་སྐྱོད་རིག་གནས་ཀྱི་བརྗོད་བྱ་གཙོ་བོའི་སྤྱི་གླིང་སོགས་འཛུགས་སྐྲུན་བྱས་ནས་གསར་བརྗེའི་ཐོན་ཁུངས་དེ་སྤུས་ཚད་མཐོ་བའི་འཕེལ་རྒྱས་ཀྱི་གསར་བརྗེའི་སྒུལ་ནུས་སུ་སྒྱུར་བཞིན་ཡོད།
མིག་སྔར། རྒྱང་སྐྱོད་ལྔ་གཅིག་ལུས་རྩལ་འགྲན་ཚོགས་ཀྱི་རྗེས་ཤུལ་སྤྱི་གླིང་འཛུགས་སྐྲུན་བྱེད་བཞིན་ཡོད་པ་དང་། སྤྱི་གླིང་གི་ལམ་ཐིག་ཧྲིལ་པོར་སྤྱི་ལེ་25ཡོད་པ་དང་། ཤར་ནས་ཤྭ་རྭ་ཐང་གྲོང་རྡལ་རྦ་དག་གྲོང་ཚོ་ནས་ནུབ་ཡར་སྡེ་ཡུལ་ཤོག་ལྕམ་བླ་གྲོང་ཚོའི་བར་ནི་རྒྱང་སྐྱོད་རྒྱལ་ཁབ་རིག་གནས་སྤྱི་གླིང་གི་བྲག་འགོའི་ལམ་དུམ་གྱི་ལྟེ་བའི་ཆ་ཤས་སུ་ཆགས་ཡོད། སྤྱི་གླིང་གིས་དམར་དམག་རྒྱང་སྐྱོད་བརྒྱུད་པའི་ལོ་རྒྱུས་ཀྱི་རྒྱབ་ལྗོངས་ལ་བརྟེན་ནས་གསར་བརྗེའི་རྗེས་ཤུལ་མང་པོ་སྡེབ་སྒྲིག་བྱས་ཏེ་གསར་བརྗེའི་རིག་གནས་ཉམས་ལེན་གྱི་ལམ་ཐིག་བསྐྲུན་ཡོད།
དམར་དམག་བྲག་འགོར་བཅའ་སྡོད་བྱས་རིང་རྒྱང་སྐྱོད་ལམ་བར་གྱི་ལུས་རྩལ་འགྲན་ཚོགས་ཆེ་གྲས་གཅིག་པུ་དེ་གཉེར་མྱོང་ཡོད། ཅེས་བྲག་འགོ་རྫོང་རྒྱང་སྐྱོད་རྒྱལ་ཁབ་རིག་གནས་སྤྱི་གླིང་སྲུང་སྐྱོང་འཛུགས་སྐྲུན་འགོ་ཁྲིད་ཚོ་ཆུང་གཞུང་ལས་ཁང་གི་ཀྲུའུ་རེན་ཧོ་ཡུང་གིས་བཤད་རྒྱུར། སྤྱི་གླིང་ནི་ལོ་རྒྱུས་དུམ་བུ་དེ་སྲོག་ཤིང་དུ་བྱས་ནས་དམར་དམག་གི་ས་ཞིང་དང་དམར་དམག་སྨན་ཁང་། དམར་དམག་གི་ཏང་གི་སློབ་གྲྭ་སོགས་གནའ་ཤུལ་མང་པོ་བསྡུ་སྒྲིལ་བྱས་ཏེ་རྒྱལ་ཡོངས་ཀྱི་ལམ་ཐིག་ཧྲིལ་པོར་ཕྱི་རོལ་དུ་འགྲེམས་སྟོན་བྱེད་པའི་རྣམ་པའི་ཐོག་ནས་མངོན་པའི་གསར་བརྗེའི་རིག་གནས་སློབ་གསོའི་རྟེན་གཞི་ཐོག་མ་ཡིན་ཟེར།
དམར་དམག་གི་ཞིང་ཁའི་ས་ཁོངས་ནི་ཡངས་ཤིང་རྒྱ་ཆེ་བའི་ས་ཞིང་ཡིན་ཞིང་། དམར་དམག་གི་ཁྲོན་པའི་ཉེ་འདབས་སུ་གསོན་ཉམས་ལྡན་པའི་འཇིམ་བརྐོས་ལ་བརྟེན་ནས་དམར་དམག་གིས་ཆུ་ལེན་པའི་སྣང་བརྙན་མངོན་པ་དང་། དམར་དམག་གི་སྡོང་པོའི་འོག་ཏུ་དམར་དམག་གིས་མི་སེར་ལ་འབྲུ་རིགས་བསྡུ་རོགས་དང་འབྲུ་རིགས་སྐྱེལ་རོགས་བྱེད་པའི་འཇིམ་བརྐོས་ཡོད། བྲག་འགོ་རྫོང་གིས“ངའི་སྨི་ཉིས་ཁྲི་ལྔ་སྟོང་”ཞེས་པའི་གསར་བརྗེའི་སློབ་གསོའི་རྟེན་གཞིའི་རྣམ་གྲངས་གསར་གཏོད་བྱས་ཏེ་ཡུལ་སྐོར་པར་རྒྱང་སྐྱོད་ལམ་བུ་ཉམས་ལེན་བྱེད་པར་བཀུག་པ་རེད།
སྤྱི་ལེ་25ཡི་ཉམས་ལེན་ལམ་ཐིག་བརྒྱུད། ཧོ་ཡུང་གིས་རེ་རེ་བཞིན་ངོ་སྤྲོད་གནང་བར། 《སྐྱ་རེངས་ཤར་བ》ཞེས་པའི་རྦ་དག་ས་ཚིགས་སུ་རྒྱང་སྐྱོད་སྙིང་སྟོབས་ཀྱི་འབྱུང་ཁུངས་མངོན་པ་དང་། 《རི་ཆུ་ཁྲི་སྟོང་མང་པོ》ཞེས་པའི་ཡིའུ་སི་ས་ཚིགས་ཀྱིས་རྩྭ་ལྷམ་དང་འཇིམ་བརྐོས་ལ་བརྟེན་ནས་སྤྱི་ཁྱབ་དམག་སྤྱི་ཀྲུའུ་ཏེ་ལགས་ཀྱིས་རྐང་རྗེན་དུ་ཡུར་བ་ཡུར་བའི་གཏམ་རྒྱུད་བསྐྱར་དུ་མངོན་པ། 《དཔའ་ངར་ཆེན་པོས་སྔོན་དུ་བསྐྱོད་པ》ཞེས་པའི་ཁྲོམ་སྐོར་ས་ཚིགས་སུ་དམར་དམག་གི་ལྔ་གཅིག་དམག་ཡོངས་ཀྱི་ལུས་རྩལ་འགྲན་ཚོགས་ཀྱི་རྣམ་པ་སླར་གསོ་བྱས་ཡོད། ལམ་ཐིག་ཧྲིལ་པོའི་བརྗོད་བྱ་གཙོ་བོའི་ས་ཚིགས་8ཀྱིས་གསར་བརྗེའི་རྗེས་ཤུལ་16སྦྲེལ་མཐུད་བྱས་ཏེ། གཏམ་རྒྱུད་ངོ་མར་བརྟེན་ནས་རྒྱང་སྐྱོད་ཀྱི་སྙིང་སྟོབས་གསོན་ཉམས་ལྡན་པའི་ངང་བརྒྱུད་སྤྲོད་བྱས་ཡོད་ཅེས་བཤད།
ཇི་ལྟར་བྱས་ནས་གསར་བརྗེའི་ཐོན་ཁུངས་གསོན་འགྱུར་བེད་སྤྱོད་བྱེད་དགོས་སམ། བྲག་འགོ་རྫོང་གི་འབྲེལ་ཡོད་འགན་འཁུར་པས། རྒྱང་སྐྱོད་ལྔ་གཅིག་ལུས་རྩལ་འགྲན་ཚོགས་ཀྱི་རྗེས་ཤུལ་སྤྱི་གླིང་གཞི་རྟེན་དུ་བྱས་ཏེ་གསར་བརྗེའི་ཡུལ་སྐོར་ཐོན་རྫས་དང་གྲངས་གཞི་ཅན་གྱི་ARགཏམ་རྒྱུད་མ་ལག་དང་ཞིབ་འཇུག་སློབ་སྦྱོང་མ་ལག་སོགས་འཛུགས་སྐྲུན་བྱས་པ་བརྒྱུད། གྲངས་གཞི་ཅན་གྱི་གསར་བརྗེའི་མཛེས་ལྗོངས་ཁུལ་དང་སྣ་མང་ཅན་གྱི་ལས་རྣམ་གཞི་གཅིག་ཏུ་འདུས་པའི་མཉམ་འདུས་རྣམ་པའི་རྟེན་གཞི་བསྐྲུན་ནས། རྗེས་ཤུལ་སྲུང་སྐྱོང་ལ་ཤུགས་སྣོན་རྒྱག་པ་དང་ཆབས་ཅིག་གྲོང་གསེབ་དར་རྒྱས་ལ་རོགས་རམ་བྱ་རྒྱུ་ཡིན་ཞེས་ངོ་སྤྲོད་བྱས།
ཉེ་བའི་ལོ་ཤས་རིང་། བྲག་འགོ་རྫོང་གིས་རྒྱང་སྐྱོད་རྒྱལ་ཁབ་རིག་གནས་སྤྱི་གླིང་འཛུགས་སྐྲུན་བྱ་རྒྱུ་གོ་སྐབས་སུ་བྱས་ཏེ། “སྲུང་སྐྱོབ་རྒྱུན་འཛིན་དང་། སྲོག་ཤིང་སྣེ་ཁྲིད། མཉམ་འདྲེས་མཐོར་གཏོང་”བཅས་ཀྱི་འཐབ་ཇུས་ལ་དམིགས་ནས། གསར་བརྗེའི་བྲག་འགོ་ཞེས་པའི་རྒྱང་སྐྱོད་ཀྱི་བརྗོད་བྱ་གཙོ་བོའི་སྤུས་རྟགས་འཛུགས་སྐྲུན་རྒྱུན་མཐུད་གཏིང་ཟབ་ཏུ་བཏང་སྟེ་གསར་བརྗེའི་ཡུལ་སྐོར་གྱི་ཤོང་ཚད་རྒྱ་སྐྱེད་དང་སྤུས་ཚད་མཐོ་རུ་གཏོང་བར་སྐུལ་འདེད་བཏང་ཡོད། གསར་བརྗེའི་ཐོན་ཁུངས་ལ་བརྟེན་ནས་ལོ་གཉིས་ལ་བསྟུད་མར“དམར་དམག་རྒྱང་སྐྱོད་ཀྱི་ལྔ་གཅིག་ལུས་རྩལ་འགྲན་ཚོགས”ལ་དྲན་གསོ་ཞུ་བའི་བྱེད་སྒོ་རབ་དང་རིམ་པ་སྤེལ་བ་དང་། “རྒྱང་སྐྱོད་ལམ་བུར་བསྐྱར་དུ་བསྐྱོད། དུས་རབས་གསར་པར་བྱས་རྗེས་འཇོག”ཅེས་པའི་ཏང་འཛུགས་བྱེད་སྒོ་ཐེངས་གྲངས་31སྒྲིག་འཛུགས་བྱས་ནས། ཞིང་ཆེན་ཕྱི་ནང་གི་ལས་ཁུངས་62དང་བསྡོམས་པས་མི་3266དེའི་ནང་ཞུགས་པར་སྐུལ་ཡོད་པ་རེད། །