སི་ཁྲོན་ནུབ་རྒྱུད་ས་མཐོའི་གངས་རིའི་འདབས་སུ། ཆུ་ཚན་ཞིག་གིས་གྲོང་ཚོའི་ལས་དབང་བསྒྱུར་བཞིན་ཡོད། དཀར་མཛེས་ཁུལ་རྟའུ་རྫོང་ཤེལ་ཆུ་གྲོང་རྡལ་ཤིང་ཉག་གྲོང་ཚོས་ཀྲེ་ཅང་དང་སི་ཁྲོན་ཤར་ནུབ་རྒྱུད་ཀྱི་མཉམ་ལས་ལ་བརྟེན་ནས་ཆུ་ཚན་གྱི་ཐོན་ཁུངས་དེ་དམངས་ཕྱུག་དང་གྲོང་ཚོ་སྟོབས་ཆེར་གཏོང་བའི་བདེ་སྐྱིད་བསྐྲུན་པའི་ཆུ་ཚན་ཞིག་ཏུ་འགྱུར་བར་བྱས་ཏེ། སྲིད་གཞུང་གིས་ཁྲིད་སྟོན་དང་། ཁེ་ལས་ཀྱིས་གཉེར་སྐྱོང་། མང་ཚོགས་ལ་ཕན་ཐོག་པ་བཅས་ཀྱི་རྒྱུན་མཐུད་འཕེལ་རྒྱས་ཀྱི་ལམ་བུར་བསྐྱོད་དེ་དེ་སྔའི་ལྷིང་འཇགས་ཀྱི་བོད་གྲོང་ལ་ཡུལ་སྐོར་མགྲོན་པོས་ཁེངས་ཤིང་གསོན་ཤུགས་གསར་པ་བསྩལ།
2022ལོར། ཤིང་ཉག་གྲོང་ཚོས་ཏང་འཛུགས་སྐྱོང་གིས་ཁྲིད་སྟོན་དང་། རང་བྱུང་སྨན་ལུམས། ཁམས་གསོའི་གནས་མཆོག་གི་ངེས་གནས་གཏན་འཁེལ་བྱས་ཏེ་ཀྲེ་ཅང་ཅིན་ཧྭ་གྲོང་ཁྱེར་ཝུའུ་གྲོང་ཁུལ་གྱི་ཤར་ནུབ་རྒྱུད་མཉམ་ལས་མ་དངུལ་སྒོར་ཁྲི་500བཏང་བར་མ་ཟད། དཀར་མཛེས་ཁུལ་དམངས་འཐུས་དང་རྟའུ་རྫོང་ཨུ་དང་རྫོང་སྲིད་གཞུང་གི་རྒྱབ་སྐྱོར་ཐོབ་སྟེ། མ་དངུལ་སྒོར་ཁྲི་1240ལྷག་བསྡུ་སྒྲིལ་ཐུབ་ནས་ཆུ་ཚན་གྱི་རྣམ་གྲངས་ལག་བསྟར་བྱེད་འགོ་བརྩམས་པ་དང་། ཆུ་ཚན་གྱི་གླ་གཏོང་ཁང་པ་དང་། སྤྱི་པའི་ཆུ་ཚན་ཁང་། ཆུ་རྐྱལ་རྫིང་བུ། རླངས་འཁོར་འཇོག་ས། ཆུ་ཚན་གླིང་ག་བཅས་བསྐྲུན་པ་དང་ཆབས་ཅིག་སྔོ་ལྗང་ཅན་གྱི་སྒྲིག་ཆས་སྒྲིག་སྦྱོར་བྱས་པ་སྟེ། སྨི་གྲུ་བཞི་མ་6689.62ཟིན་པའི་ཆུ་ཚན་སྤྲོ་གསེང་ཁུལ་བསྐྲུན་པས། དེ་སྔའི་ས་སྟོང་ལུང་སྟོང་དུ་འདུ་འཛི་ཆེ་བའི་རྣམ་པ་གསར་པ་ཞིག་བསྐྲུན་ཡོད།
ཤིང་ཉག་གྲོང་ཚོ་གཅིག་པུའི་སྟོབས་ཤུགས་ཁོ་ནར་བརྟེན་ན། ཆུ་ཚན་དངོས་སུ་གཉེར་རྒྱུ་དཀའ། ཉེ་འགྲམ་གྱི་མདོ་སྐྱ་གྲོང་ཚོ། ཅོ་ཝན་གྲོང་ཚོ། རྟའུ་གྲོང་ཚོ་བཅས་ནི་མཉམ་སྡེབ་དཔལ་འབྱོར་ཞན་པའམ་ཡང་ན་ཐོན་ཁུངས་དཀོན་པས་ཚང་མའི་འཕེལ་རྒྱས་ཀྱི་གོ་སྐབས་རག་པར་རེ་སྒུག་བྱས་ཡོད། ཕྱག་རི་གྲོང་རྡལ་ཏང་ཨུའི་ཧྲུའུ་ཅི་གཞོན་པ། གྲོང་རྡལ་དཔོན་པོ་ལི་ཁྲུན་ཧྥུའུ་ཡིས་ངོ་སྤྲོད་བྱས་དོན། ཤེལ་ཆུ་གྲོང་རྡལ་ཏང་ཨུས་བརྟག་ཞིབ་གང་ལེགས་བྱས་རྗེས། གྲོང་ཚོ་བཞི་པོ་ཚོགས་པ་གཅིག་ཏུ་བསྡེབས་ཏེ། 2023ལོར། གྲོང་ཚོ་བཞི་པོའི་མཉམ་སྡེབ་དཔལ་འབྱོར་གྱི་མ་དངུལ་སྒོར་ཁྲི་400བསྡུས་ནས་ཆུ་ཚན་རྣམ་གྲངས་ནང་མ་རྐང་ཞུགས་པར་མ་ཟད། ད་དུང་གྲོང་ཚོའི་རྒྱུ་ནོར་བོགས་གཏོང་དང་ཁེ་ལས་གཉེར་སྐྱོང་བྱེད་པའི་རྣམ་པ་སྤྱད་དེ། ཁྲེང་ཏུའུ་གྲོང་ཁྱེར་ཡུས་ཧྥུའུ་སྐྱེ་ཁམས་ཞིང་ལས་ཚད་ཡོད་ཀུང་སིའི་སྒོར་ཁྲི་340གཏོང་བར་བཀུག་ནས་མཁྲེགས་ཆས་རིམ་སྤོར་དང་བཟའ་བཏུང་རོལ་རྩེད་ཞབས་ཞུ་འདོན་སྤྲོད་བྱས་ནས་ཆུ་ཚན་གྱི་རྣམ་གྲངས་དེ་ཡོང་འབབ་ལེན་ཐུབ་པའི་རྣམ་གྲངས་ཤིག་ཏུ་འགྱུར་ཐུབ་ཡོད།
2023ལོར་ལས་འགོ་བཙུགས་པ་ནས་ད་བར་ཚོང་གཉེར་བརྟན་པོ་བྱེད་ཐུབ་བྱུང་ཡོད། ཅེས་རྟའུ་རྫོང་ཤིང་ཉག་ཆུ་ཚན་མགྲོན་ཁང་གི་སྤྱི་གཉེར་ཝང་ཡུའེ་ཡིས་གདོང་ལ་འཛུམ་གྱིས་ཁེངས་ནས་ད་སྐབས་ཆུ་ཚན་གྱིས་ཉིན་རེར་ཆ་སྙོམས་རྫོང་ཕྱི་ནང་གི་ཡུལ་སྐོར་པ་མི་ཐེངས་200ལྷག་ཙམ་སྣེ་ལེན་ཐུབ་པ་དང་།
2024ལོར་གཅིག་པུར་ཡོང་འབབ་སྒོར་ཁྲི་220ལྷག་ཡོད་ཟེར།
ཆུ་ཚན་གྱི་ཚོང་བྲིན་ན། ཁེ་སྤོགས་བགོ་བ་དང་ལས་ཞུགས་ཀྱང་དེ་དང་མཉམ་དུ་བྱེད་ཐུབ་བྱུང་ཡོད། མ་རྐང་ནང་ཞུགས་པའི་བསྡུར་ཚད་ལྟར་བརྩིས་ན་ཤིང་ཉག་གྲོང་ཚོས་མ་རྐང་གི་བརྒྱ་ཆ་60.1ཟིན་པ་དང་ལོ་ལྟར་སྒོར་ཁྲི་24.4བགོ་ཐུབ་ཀྱི་ཡོད་པ་རེད། གྲོང་ཚོ་གཞན་གསུམ་གྱིས་སོ་སོའི་མ་རྐང་གི་བརྒྱ་ཆ་13.3ཟིན་ནས་གྲོང་ཚོ་རེར་ལོ་ལྟར་ཁེ་སྤོགས་སྒོར་ཁྲི་5.2བགོ་རྒྱུ་ཡོད། གྲོང་ཚོ་བཞི་པོའི་ལོ་རེར་ཆ་སྙོམས་ཁེ་སྤོགས་སྒོར་ཁྲི་40བགོ་བཞིན་པ་དང་། གྲོང་ཚོའི་མཉམ་སྡེབ་དཔལ་འབྱོར་དུས་མཚུངས་ལས་བརྒྱ་ཆ་50འཕར་བས། རྩིས་ཐོ་སྟོང་པ་དེ་རྒྱུ་ནོམ་པ་རུ་གྱུར་བར་མ་ཟད། ད་ལོའི་ཟླ་7པའི་ཟླ་མཇུག་ཏུ་དཀར་མཛེས་ཁུལ་གྱི་རོགས་སྐྱོར་རྒྱུ་ནོར་ཚད་ལྡན་དོ་དམ་རྟའུ་ཡུལ་དངོས་ཀྱི་བརྟག་དཔྱད་ཞིབ་འཇུག་བྱ་ཡུལ་གྱི་གྲས་ཤིག་ཏུ་གྱུར་ཡོད་པ་རེད།
གྲོང་མི་རྡོ་རྗེ་དབང་ཆེན་ནི་ཐད་ཀར་ཕན་ཁེ་ཐོབ་མཁན་ཞིག་རེད། དེ་སྔ་ཡོང་འབབ་གསོག་འདོད་ན་ཕྱིར་འགྲིམས་དགོས་ཀྱི་ཡོད། ད་སྐབས་སྒོ་རྩ་ནས་ལས་ཀ་བྱེད་ཐུབ་ཀྱི་ཡོད། ཅེས་མོས་ཆུ་ཚན་སྤྲོ་གསེང་ཁུལ་དུ་མགྲོན་ཁང་གི་འཕྲོད་བསྟེན་ཞབས་ཞུ་ལོ་གཉིས་ལ་བྱས། ཟླ་རེར་ཟླ་ཕོགས་སྒོར་3500ཡོད་པ་དང་། ཟས་སྡོད་ཚང་མ་འདུས་ཡོད། དེ་མིན་རྒན་རྒོན་དང་ཕྲུ་གུར་ལྟ་སྐྱོང་བྱེད་ཐུབ་པར་མ་ཟད། ད་དུང་ལོ་གཉིས་ལ་སྒོར་ཁྲི་8.4གསོག་ཐུབ་ཡོད། མིག་སྔར་ཀུང་སིར་ལས་གནས་བརྟན་པོ་8དང་གནས་སྐབས་ལས་གནས་3ཡོད་པ་དང་། ལོ་ལྟར་སྤྲོད་པའི་ལས་མིའི་གླ་ཆ་སྒོར་ཁྲི་33ལས་བརྒལ་ཡོད། གྲོང་མི་11གིས་ལས་ཀ་དེར་བརྟེན་ནས་ལོ་རེར་མི་རེར་ཆ་སྙོམས་ཡོང་འབབ་སྒོར་ཁྲི་3ལྷག་འཕར་ཐུབ་ཡོད།
ཡུལ་སྐོར་པའི་གདེང་འཇོག་བཟང་པོ་ནི་གསང་ཐབས་བྲལ་བ་ཞིག་རེད། མི་ལ་ལས་ད་ལྟ་ཞིག་གསོ་བྱས་པ་ཧ་ཅང་མཛེས་ལ། སྔོན་ཆད་ཀྱི་ཁྲུས་རྫིང་དང་མི་འདྲ་ཞེས་བསྟོད་བསྔགས་བྱས། ཡང་དབྱར་རྩྭ་བརྐོ་མཁན་ལ་མཚོན་ན་ལྷག་ཏུ་བང་ཁང་ལ་དགའ། ཉིན་གཅིག་ལ་སྒོར་20རེད། ཁ་ལག་བཀྲུ་ཐུབ་པ་དང་ལུས་པོའང་འཁྲུད་ཐུབ་པས། སྦྲ་གུར་ནང་དུ་སྡོད་པ་ལས་སྟབས་བདེ་ཞེས་ཉེ་འཁོར་གྱི་གྲོང་མི་རྣམས་ཀྱང་རྒྱུན་དུ་འདུག་ས་ཡོང་གི་ཡོད་ལ། གཟའ་མཇུག་ལ་ཐག་རིང་པོར་འགྲོ་མི་དགོས། གནས་འདི་ནི་ལྷོད་གཡེང་བྱེད་སའི་ས་ཆ་བཟང་པོ་ཞིག་རེད།
མགྲོན་པོར་སྔར་ལས་སྐྱིད་པོ་ཡོང་ཆེད། ད་ལོར་ཁེ་ལས་ཀྱིས་ཡང་བསྐྱར་འགུལ་སྟངས་གསར་པ་ཁ་སྣོན་བྱས་ཡོད་པ་སྟེ། ཡུལ་སྐོར་གུར་ཁང་7དང་སྨི་གྲུ་བཞི་ལྷམ་པ་150ཅན་གྱི་ཆུ་གསོག་རྫིང་བུ་གསར་སྐྲུན་བྱས་པར་མ་ཟད། ད་དུང་ཆེད་སྤྱོད་གློག་འཕྲིན་དང་སྐུད་ལམ་རིམ་སྤར་བྱས་ཏེ། ཆུ་རགས་རྒྱག་ས་སྐྲུན་པ་དང་སྒྲིག་བཀོད་རིམ་བཞིན་འཐུས་ཚང་དུ་བཏང་ཡོད།
དེའི་རྗེས་ཀྱི་འཆར་གཞི་གླེང་སྐབས། ཝང་ཡུའི་ཡི་རིག་ལམ་ཧ་ཅང་གསལ་པོ་རེད། སྔོན་ལ་སྐད་གྲགས་ཆེ་རུ་བཏང་ནས་དཔེ་ཆ་དམར་པོ་དང་འདར་དབྱིངས་སོགས་སུ་ཁྱབ་གདལ་གཏོང་རྩིས་ཡོད་ལ། ད་དུང་ཏན་ཏའོ་སྐོར་ལམ་ནས་བརྡ་ཁྱབ་བྱང་བུ་ཞིག་ཀྱང་འཛུགས་རྩིས་ཡོད། ནང་ཁུལ་ནས་དོ་དམ་དམ་འཛིན་དང་ལས་བཟོ་པའི་ཞབས་ཞུའི་ཆུ་ཚད་མཐོར་འདེགས་སུ་བཏང་སྟེ། མགྲོན་པོ་ཐེངས་གཅིག་ལ་ཡོང་བས་མི་ཚད་ཐེངས་མང་པོར་ཕྱིར་ཡོང་བར་འགུག་རྒྱུ་ཡིན་ཞེས་བཤད་བྱུང་།
ཤིང་ཉག་གྲོང་ཚོའི་ཆུ་ཚན་ལག་ལེན་ནི་རྟའུ་རྫོང་གི་ཐོན་ཁུངས་རྒྱུ་ནོར་དུ་འགྱུར་བའི་གསོན་ཉམས་དོད་ཅིང་རྐང་འཛིན་པ་ཞིག་རེད། ཏང་འཛུགས་སྐྱོང་ལ་བརྟེན་ནས་མཉམ་ཤུགས་ལ་ཁྲིད་སྟོན་བྱེད་པ་དང་། གྲོང་ཚོའི་ཁེ་ལས་མཉམ་འགུལ་ལ་བརྟེན་ནས་ཐོན་ལས་སྟོབས་ཆེར་གཏོང་བ། མང་ཚོགས་ཞུགས་ཏེ་གྲུབ་འབྲས་ལོངས་སུ་སྤྱོད་པ་སོགས་ས་མཐོའི་གྲོང་གསེབ་དེས་ཆུ་ཚན་གཅིག་གིས་གྲོང་གསེབ་དར་རྒྱས་གཏོང་བའི་ལམ་བུ་དངོས་བརྒྱུད་དེ་གྲོང་མིའི་འཚོ་བ་ཇེ་ལེགས་ནས་ཇེ་ལེགས་སུ་འགྲོ་བཞིན་ཡོད་དོ།