སི་ཁྲོན་ནུབ་རྒྱུད་ས་མཐོའི་G350ཡི་དོམ་ཁྲའི་ལམ་ཆེན་དང་G317གྱི་ས་མཐོའི་དར་གོས་ཚོང་ལམ་རིག་གནས་ཁྱམས་རའི་འབྲེལ་མཚམས་སུ་རྔམ་བརྗིད་ལྡན་པའི་སྦྲ་གུར་ཆེན་པོ་ཞིག་ས་ལ་ལྷུང་བའི་མུ་ཏིག་ཅིག་དང་འདྲ་བར་ལུང་བསྟན་རྩྭ་ཐང་གི་ཕང་པ་རུ་ལྷད་མེར་བཞད་ཡོད། འདི་ནི་2024ལོར་WRCAཡི་ཁས་ལེན་ཐོབ་པའི་འཛམ་གླིང་ཐོག་གི་སྦྲ་གུར་ཆེ་ཤོས་སྟེ། རྟའུ་རྫོང་ལུང་བསྟན་འབྲོག་རའི་ཚབ་མཚོན་རང་བཞིན་གྱི་འཛུགས་སྐྲུན་ཞིག་ཡིན་པ་རེད།
ན་ནིང་སྒོ་ཕྱེས་པ་ནས་བཟུང་། གནས་དེ་བླ་སྲོག་དང་ཐོན་ལས་རྨང་གཞིར་འཛིན་པའི་འབྲོག་ར་དེ་དཀར་མཛེས་ཁུལ་གྱི་རྒྱལ་སྤྱིའི་སྐྱེ་ཁམས་རིག་གནས་ཡུལ་སྐོར་བྱེད་ཡུལ་གཏོད་པའི་སྒེའུ་ཁུང་གལ་ཆེན་ཞིག་ཏུ་གྱུར་པར་མ་ཟད། ས་གནས་དེ་གའི་མང་ཚོགས་ལ་རྒྱ་ཁྱབ་ངང་ཕན་པ་ཐོབ་པའི་གྲོང་གསེབ་དར་རྒྱས་གཏོང་བའི་ཐབས་ལམ་གསར་པ་འཚོལ་ཞིབ་བྱས་ཡོད།
པར་ལེན་འདུ་གནས་ནས་རིག་གནས་ཉམས་ལེན་གཏིང་ཟབ་སྤེལ་ཏེ། ཡུལ་སྐོར་ལ་སྔར་ལས་བྲོ་བ་ལྡན་དུ་བཅུག
ལུང་བསྟན་འབྲོག་ར་ཐོག་མར་སྙན་གྲགས་རྒྱས་པ་དེ་འཛམ་གླིང་ཐོག་གི་ཆེས་ཆེ་བའི་སྦྲ་གུར་ཞེས་པའི་མཐོང་ཚོར་དེ་ལས་བྱུང་བ་རེད། འོན་ཀྱང་གཉེར་སྐྱོང་ཚོགས་པས་པར་ལེན་ཁོ་ན་ལ་བརྟེན་ནས་ཡུལ་སྐོར་བ་སྡོད་དཀའ་བ་རྟོགས། རྟའུ་རྫོང་ཡུལ་སྐོར་འཕེལ་རྒྱས་སྤྱི་གཉེར་ཁང་གི་སྤྱི་གཉེར་པ་ལི་ཝང་ཡན་གྱིས་བཤད་རྒྱུར། ལུང་བསྟན་རྩྭ་ཐང་ནི་འབྲོག་པའི་རིག་གནས་ལྷུན་ཆགས་སུ་ཡོད་པའི་གནས་ཤིག་ཡིན་པས། ང་ཚོས་ཡུལ་སྐོར་པ་ཚོར་འབྲོག་པའི་འཚོ་བ་དངོས་དེ་ཉམས་ལེན་བྱེད་དུ་འཇུག་བསམ་པ་ཡིན་ཞེས་བཤད།
ད་ཆ་ཡུལ་སྐོར་པ་ཚོས་དེ་གར་འོ་མ་བཞོ་བ་དང་། མར་ལེན་པ། ཐང་ག་འབྲི་བ། རྟ་ཞོན་ནས་ཕྱུགས་རྫི་བྱེད་པ་སོགས་དམངས་སྲོལ་གྱི་བྱེད་སྒོ་ཁག་སོ་དྲུག་མྱོང་རོལ་བྱེད་ཐུབ། སྒོར་198ནས་798བར་བཏང་ཚེ་ཟས་མཆོག་གི་བྲོ་བ་དང་། ལག་ལེན་སོགས་ཕྱོགས་ཡོངས་ནས་འབྲོག་པའི་ཤེས་རིག་ཉམས་སུ་མྱོང་ཐུབ།
ད་ལོའི་ཟླ་7པར་ལུང་བསྟན་འབྲོག་ར་དེ་བསྟན་འཛིན་དང་ཞང་ཙུའོ་གྱིས《བདེན་འཚོལ་ས་ཚུགས》བརྙན་ལེན་ཡུལ་གྱི་གྲས་ཤིག་ཏུ་བདམས་པས། ལུང་བསྟན་འབྲོག་ར་དགའ་བསུ་བྱེད་མཁན་དེ་བས་མང་དུ་ཕྱིན་པ་རེད།
ཕྱི་ལ་ལས་ཀར་འགྲོ་བ་ནས་ཁྱིམ་དུ་ལོག་སྟེ་ཕྱུག་འགྱུར་ལས་ལ་བརྩོན་པས། འབྲོག་པ་ཚོས་ཡུལ་སྐོར་ལ་བརྟེན་ནས་ཡོང་འབབ་རག
ཆེས་དགའ་འོས་ཤོས་ནི་མཐའ་འཁོར་འབྲོག་པ་རྣམས་ལ་ཡུལ་སྐོར་ལས་རིགས་ཁྲོད་དངོས་གནས་ཕན་ཐོགས་པ་དེ་རེད།
ལུང་བསྟན་གྲོང་རྡལ་མཁར་ཁ་གྲོང་ཚོའི་རིན་ཆེན་གྱིས་དགོད་བཞིན་བཤད་རྒྱུར། སྔོན་ཆད་ཁྲེང་ཏུའུ་ནས་ལས་ཀ་བྱེད་བཞིན་ཡོད། ད་ལྟ་ཕ་ཡུལ་དུ་ལོག་ནས་ལས་ཀ་བྱེད་བཞིན་ཡོད་པས། ཨ་མ་ལ་ལྟ་སྐྱོང་བྱེད་ཐུབ་པར་མ་ཟད། ཟླ་རེའི་གླ་ཕོགས་4000ལྷག་ཡང་ཐོབ་ཐུབ་ཟེར། ཁོ་ད་ལྟ་ལུང་བསྟན་འབྲོག་རའི་ཁོ་ཧྥེ་ཁང་གི་དོ་དམ་པར་གྱུར་ཡོད།
འབྲོག་ར་ཡིས་མཛེས་ལྗོངས་ཁུལ་དང་ཞིང་འབྲོག་དུད་ཚང་ཟུང་འབྲེལ་གྱི་རྣམ་པ་གསར་གཏོད་ཁྱབ་སྤེལ་བཏང་ནས། གྲོང་ཚོ་ཁག་དང་དུད་ཚང་ཁག་གི་ཡོང་འབབ་བརྟན་པོའི་ངང་འཕར་ཐུབ་པ་བྱས་ཡོད། ལུང་བསྟན་ཤང་ཏང་ཨུས་སྲིད་འཛིན་གྲོང་ཚོ་5ཡི་ཨུ་ལྷན་གཉིས་སྒྲིག་འཛུགས་བྱས་ནས། མཉམ་དུ་ཞོན་པའི་ཞབས་ཞུ་དོ་དམ་བྱས་ཏེ། རྟ་127བདམས་ནས། ལོ་ལྟར་གྲོང་ཚོའི་ཐུན་མོང་ལ་ཡོང་འབབ་སྒོར་300རག་པ་དང་། ཁྱད་ཆོས་ལྡན་པའི་ཚོང་ཁང་15བསྐྲུན་ནས། ལོ་རེར་བོགས་དངུལ་སྒོར་ཁྲི་1.5ཡོང་བ་དང་། ་གྲོང་ཚོ་5ཡི་ཁེ་སྤོགས་བགོ་བའི་འབྱུང་ཁུངས་སུ་གྱུར་ཡོད། རྟ་བསྐྱོན་མཐུན་ཚོགས་ཀྱི་འབྲོག་པ་དུད་ཚང་616ཡི་ཉིན་རེའི་ཡོང་འབབ་སྒོར་དྲུག་སྟོང་ཙམ་ཡོད་པ་དང་། ལོ་རེའི་ཡོང་འབབ་སྒོར་ཁྲི་200ལས་བརྒལ་ཡོད་པ་རེད།
ལུང་བསྟན་ཡུལ་ཤོག་གི་འགོ་འཛིན་ཀྲོའུ་དབྱིན་ཧྭ་ཡིས། ན་ནིང་རྟ་བསྐྱོན་ཡོང་འབབ་སྒོར་ཁྲི་260ཡིན་པ་དང་། ད་ལོར་སྔོན་དཔག་བྱས་ན་སྒོར་ཁྲི་300ལས་བརྒལ་ཐུབ་ཀྱི་རེད་ཅེས་དགའ་སྤྲོའི་ངང་ངོ་སྤྲོད་བྱས།
མཛེས་ལྗོངས་རྐྱང་པ་ནས་ས་ཁོངས་ཡོངས་ཀྱི་ཡུལ་སྐོར་བཏོད་དེ། རྟའུའི་རིག་གནས་ཡུལ་སྐོར་ཐོན་ལས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན།
ལུང་བསྟན་འབྲོག་རའི་གྲུབ་འབྲས་ནི་རྟའུ་རིག་གནས་ཡུལ་སྐོར་ཐོན་ལས་འཕེལ་རྒྱས་ཀྱི་བསྡུས་རིས་ཤིག་རེད། མིག་སྔའི་བར་རྟའུ་རྫོང་ལ་རིམ་པ་4Aཅན་3དང་རིམ་པ་3Aགྱི་མཛེས་ལྗོངས་ཁུལ་8ཡོད་པ་དང་།
གྲངས་འབོར་དེ་དཀར་མཛེས་ཁུལ་གྱི་ཨང་དང་པོར་སླེབས་ཡོད། ད་ལོའི་ཟླ་བརྒྱད་ཀྱི་ནང་རྫོང་ཡོངས་ཀྱིས་ཡུལ་སྐོར་པ་མི་ཐེངས་ཁྲི་132.86སྣེ་ལེན་བྱས་ནས། ཡུལ་སྐོར་ཡོང་འབབ་སྒོར་དུང་ཕྱུར་14.63ཟིན་ཡོད།
རྟའུ་རྫོང་རིག་གནས་རླུང་འཕྲིན་བརྙན་འཕྲིན་ཡུལ་སྐོར་ཅུས་ཀྱི་ཅུས་ཀྲང་གཞོན་པ་ཀྲུའུ་ཏན་ཏན་གྱིས་ཉེ་བའི་ལོ་ཤས་རིང་རྟའུ་རྫོང་སྲིད་གཞུང་གིས་རིམ་རྩིས་བྱས་ནས་སྒོར་དུང་ཕྱུར་5ཙམ་བཏང་ནས། ཡུལ་སྐོར་སྒྲིག་བཀོད་འཐུས་ཚང་དུ་བཏང་བ་དང་། ལྟ་ལྗོངས་སྟེགས་བུ་དང་པར་རྒྱག་ས་21བསྐྲུན། རིག་གནས་ཡུལ་སྐོར་ལས་གཉེར་མི་སྣ་མི་ཐེངས་1000ལྷག་གསོ་སྦྱོང་བྱས་པ་རེད། ད་ཆ་རྟའུ“རྒྱལ་སྤྱིའི་སྐྱེ་ཁམས་རིག་གནས་ཡུལ་སྐོར་དམིགས་སའི”དམིགས་ཚད་ཕྱོགས་སུ་བརྟན་པོའི་ངང་མདུན་སྐྱོད་བྱེད་བཞིན་ཡོད།
ཉི་མ་ནུབ་ལ་ཡལ་སྐབས། ཕྱི་དྲོའི་མཚམས་སྤྲིན་གྱི་འོད་སྣང་སྦྲ་གུར་མཁའ་ན་མཛེས་ཤིང་། བྲེལ་བས་ཁེངས་པའི་མ་བྱན་དག་གི་དུ་སྤྲིན་དགུང་ལ་འཐེན་ཞིང་། རྟ་ཕོའི་རྨིག་སྒྲ་དང་འབྲོག་པའི་དགོད་སྒྲ་རྒྱུན་མི་ཆད་པར་རྣ་ལམ་དུ་གྲགས་དུས། རིག་གནས་རྒྱུན་འཛིན་དང་། དམངས་འཚོ་ལེགས་བཅོས། སྐྱེ་ཁམས་སྲུང་སྐྱོང་བཅས་གཅིག་ཏུ་ཁུར་བའི་འཕེལ་རྒྱས་ཀྱི་ལམ་གསར་པ་དེ་སི་ཁྲོན་ནུབ་རྒྱུད་ས་མཐོའི་སྟེང་དུ་སྔར་བས་རྒྱ་ཆེ་རུ་འགྲོ་བཞིན་ཡོད། །