གསར་འགྱུར་ལོ་ཙཱའི་ལས་ཀར་རགས་ཙམ་གླེང་བ།

གསར་འགྱུར་ལོ་ཙཱ་ནི་སྐད་རིགས་གཉིས་དབར་གསར་འགྱུར་གྱི་ཆ་འཕྲིན་གསར་ཤོས་ལོ་ཙཱ་བརྒྱུད་དེ་སྤེལ་རེས་བྱེད་པའི་ལས་ཀ་ཡིན་པ་དང་། དེར་ལས་ཀ་བྱེད་མཁན་གྱིས་སྐད་རིགས་གཉིས་ཀྱི་ཤེས་བྱ་ཡག་པོ་ཤེས་དགོས་པ་ལས་རོབ་ཙམ་ཤེས་པ་ཙམ་གྱིས་ལོ་ཙཱའི་ལས་ཀར་ཞུགས་ཚེ་ནོར་འཁྲུལ་མང་པོ་ཡོང་གི་ཡོད་པས་གཤམ་གྱི་ནང་དོན་ཁག་ནས་རང་གི་བསམ་བློ་ཏོག་ཙམ་གླེང་བ་ཡིན།

གཅིག །སྐད་རིགས་གཉིས་ལ་བྱང་ཆུབ་པ་ཞིག་དགོས་པ།

ལོ་ཙཱའི་ལས་ཀའི་ནང་སྐད་རིགས་གཉིས་ལས་སྒྱུར་ཡིག་གི་སྤུས་ཚད་ལ་འགན་ལེན་དགོས་ན་སྐད་རིགས་གཉིས་ཀྱི་ཤེས་བྱ་དང་རིག་གནས་ལ་བྱང་ཆུབ་པ་དགོས་པར་མ་ཟད་ཕྱོགས་གཉིས་ཀྱི་ཤེས་བྱར་སློབ་སྦྱོང་དགོས་པ་གལ་ཤིན་ཏུ་ཆེན་པོ་ཡིན། ཡིག་སྒྱུར་བྱ་གཞག་ནང་ཞུགས་མཁན་ལོ་ཙཱ་བའི་ཁ་གྲངས་ཧ་ཅང་མང་པོ་ཡོད་མོད། དེ་དག་གི་ཤེས་བྱའི་བྱང་ཚད་རིམ་པ་མི་གཅིག་པས་ཡིག་སྒྱུར་གྱི་སྤུད་ཚད་ལ་ཐད་ཀའི་ཤུགས་རྐྱེན་ཐེབས་པས། ལས་ཀའི་ནང་རྒྱུན་དུ་བསྒྱུར་བྱའི་དོན་ལོག་པ་དང་། དོན་འགལ་བ། སྒྱུར་བྱེད་ཚིག་སྐྱོན་ཅན་དང་། བརྗོད་པ་མི་བདེ་བ་སོགས་ཀྱི་སྐྱོན་ཆ་མང་པོ་གནས་པས་སྐད་རིགས་གཉིས་ཀྱི་བྱང་ཚད་མཐོ་རུ་གཏོང་དགོས་པ་ནི་གལ་འགངས་ཆེ་བར་མཐོང་།

རྒྱ་བོད་ཡིག་རིགས་གཉིས་ཀྱི་ཡིག་སྒྱུར་ཁྲོད། རྒྱ་ཡིག་གི་མ་ཡིག་ཞིག་བོད་ཡིག་ཏུ་སྒྱུར་དགོས་ན། རྒྱ་ཡིག་གི་མ་ཡིག་གི་ནང་དོན་ཡོངས་དཔྱིས་ཕྱིན་པ་རྟོགས་དགོས་པ་དང་། བོད་ཡིག་འབྲི་བར་བྱང་ཆུབ་ལ་དོན་དག་ནོར་བ་མེད་པར་ཁ་གསལ་གོ་བདེ་ཡོང་བ་དགོས། དེ་བཞིན་བོད་ཡིག་གི་མ་ཡིག་ཞིག་རྒྱ་ཡིག་ཏུ་སྒྱུར་དགོས་ན་བོད་ཡིག་གི་མ་ཡིག་དེར་གོ་བ་ཡག་པོ་ལོན་དགོས་པར་མ་ཟད་རྒྱ་ཡིག་འབྲི་བར་ཚིག་དོན་ནོར་བ་མེད་པར་ཇི་མ་ཇི་བཞིན་དགོས་པ་ཡིན། རྒྱ་བོད་སྐད་ཡིག་གཉིས་ཀར་སྦྱངས་པ་ལེགས་པོ་ཞིག་མེད་ན་ཡིག་སྒྱུར་ལས་ཀ་བྱ་རྒྱུ་ནི་ཤིན་ཏུ་དཀའ་བ་ཞིག་ཡིན་པར་ཤེས་ཐུབ།

དེར་བརྟེན། སྐད་རིགས་གཉིས་ལ་བྱང་ཆུབ་པའི་ལས་དོན་པས་ཡིག་སྒྱུར་བྱ་གཞག་ནང་ཞུགས་རྒྱུ་དང་ལས་དོན་སྤེལ་རྒྱུ་ནི་ཧ་ཅང་གལ་ཆེན་པོ་རེད།

གཉིས། སྐད་རིགས་གཉིས་དང་འབྲེལ་བའི་རིག་གནས་ལ་རྒྱུས་མངའ་དགོས་པ།

མི་རིགས་ཁག་གི་རིག་གནས་ནི་གནས་དེར་འགྲོ་འོང་དང་། སྤེལ་རེས། མཉམ་འདྲེས་བྱེད་པ་ལས་བྱུང་བ་ཞིག་ཡིན་པ་དང་དེའི་ནང་ཡིག་སྒྱུར་གྱིས་མི་རིགས་ཁག་དབར་འབྲེལ་བར་ནུས་པ་གལ་ཆེན་ཐོན་ཡོད། མི་རིགས་བར་ལ་རིག་གནས་སྤེལ་རེས་བྱེད་པའི་སློབ་དེབ་དང་གློག་བརྙན་སོགས་ཀྱི་འབྲས་བུ་མང་པོ་བྱུང་ཡོད་པ་ཡིག་སྒྱུར་ལ་བརྟེན་པ་དང་ཡིག་སྒྱུར་གྱི་སྤུད་ཚད་ཀྱིས་རིག་གནས་སྤེལ་རེས་ཀྱི་གྲུབ་འབྲས་ལ་ཐད་ཀའི་འབྲེལ་བ་ཡོད།

ལོ་ཙཱ་བའི་ལས་ཀ་བྱེད་མཁན་ཞིག་ཡིན་ཕྱིན་བསྒྱུར་བྱ་སྒྱུར་བྱེད་ཀྱི་སྐད་རིགས་གཉིས་ཀྱི་ཤེས་བྱར་བྱང་ཆུབ་པ་ཞིག་དགོས་པ་དང་སྐད་རིགས་གཉིས་ཀྱི་རིག་གནས་ལ་རྒྱུས་མངའ་དང་ཞིབ་འཇུག་ཡོད་ན་ཡིག་སྒྱུར་ནང་དོན་དེ་གཞན་དང་མི་འདྲ་བར་ཕུལ་དུ་བྱུང་བ་ཞིག་ཡོང་ངེས་རེད།

རྒན་ཡེ་ཤེས་དོན་གྲུབ་ལགས་ཀྱིས། “འཇིག་རྟེན་སྐད་དོད་ལོ་ཀ་དང་། །མིག་གི་དོན་ལ་ཙཀྴུ་འཇུག། །རྣམ་དབྱེའི་རྐྱེན་དང་སྲོག་ཞུགས་ཚེ། །ལོ་ཙཱ་འཇིག་རྟེན་མིག་གི་དོན། །

སྐད་དང་ཡི་གེ་དུ་མ་ལ། །མཁས་ཤིང་ཕན་ཚུན་བསྒྱུར་ནུས་པས། །འཇིག་རྟེན་ཤེས་རིག་མ་ལུས་གནད། །ལྟ་བའི་མིག་ལྡན་འཇིག་རྟེན་མིག །”ཅེས་སྐད་ཡིག་གཉིས་སམ་དུ་མ་ཤེས་ཤིང་ཕན་ཚུན་བསྒྱུར་ཅིང་། འཇིག་རྟེན་གྱི་ཁྱོན་ཀུན་ཏུ་འཚོ་ཞིང་གནས་པའི་མིའི་རིགས་སྤྱི་དང་། བྱེ་བྲག་རྒྱལ་ཁབ་དང་མི་རིགས་ཁག་གི་རིག་པའི་གནས་ལ་བལྟ་བའི་ཤེས་རབ་ཀྱི་མིག་དང་ལྡན་པའི་ཕྱིར་ན་ལོ་ཙཱ་བར་འཇིག་རྟེན་མིག་ཅེས་བརྗོད་པ་ཡིན་ཞེས་གསུངས།

གསུམ། གསར་འགྱུར་ཡིག་སྒྱུར་ལ་མཉེན་ཆས་ཀྱིས་རམ་འདེགས་ལས་ཡོངས་སུ་བརྟེན་ན་མི་འགྲིག

ད་ཆ་གསར་འགྱུར་ལ་ཚགས་པར་དང་བརྙན་འཕྲིན། རླུང་འཕྲིན་བཅས་སྲོལ་རྒྱུན་གྱི་གསར་འགྱུར་སྤེལ་སྟངས་མིན་པར། དྲ་བ་དང་སྐད་འཕྲིན། འཁྱུག་དབྱངས། ཐད་གཏོང་སོགས་གསར་འགྱུར་སྤེལ་སྟངས་ཡོད་པ་ལ་མྱུར་བའི་རང་བཞིན་གསལ་པོ་ཡོད། གསར་འགྱུར་སྤེལ་བའི་ཁྱད་ཆོས་འགྱུར་བ་བྱུང་བ་དེས་མྱུར་བའི་རང་བཞིན་གལ་ཆེར་གྱུར་ཡོད་པ་དང་གསར་འགྱུར་ནང་དོན་ནོར་འཁྲུལ་མེད་པའི་ཐོག་ནས་ཁ་གསལ་གོ་བདེ་ཡོད་དགོས་པས་ལོ་ཙཱ་བ་ཚོས་ཡིག་སྒྱུར་ལ་མཉེན་ཆས་བེད་སྤྱད་ན་མི་འགྲིག་པ་གང་མེད་ཀྱང་ཡོངས་སུ་བརྟེན་ན་ནོར་བ་མང་པོ་ཡོད་ངེས་རེད། ཡིག་སྒྱུར་མཉེན་ཆས་ཀྱིས་རྒྱུན་དུ་སྤྱོད་པའི་མིང་ཚིག་དང་བརྗོད་པ། ཆེད་ལས་ཅན་གྱི་ཚིག་སོགས་མཉེན་ཆས་ནང་ཡོད་པ་དང་སྒྲིག་སྦྱོར་བྱས་ནས་ཡིག་སྒྱུར་བྱེད་པ་ལས་གང་ཟག་མི་ཡིས་ཡིག་སྒྱུར་བྱེད་པ་བཞིན་མིང་ཚིག་མང་པོ་ལས་གྲུབ་པའི་བརྗོད་པ་དག་མ་ཡིག་གི་འགྲོ་སྟངས་བཞིན་སྒྱུར་བ་མང་སྟེ་བསྒྱུར་ཡིག་གི་རིག་གནས་དང་མི་མཐུན་པ་མང་བས་ནོར་འཁྲུལ་མང་པོ་ཡོང་སྲིད།

དེས་ན། གསར་འགྱུར་ཡིག་སྒྱུར་ནི་རིག་གནས་སྤེལ་རེས་བྱེད་པའི་ཐབས་ལམ་གལ་ཆེན་ཞིག་ཡིན་པ་དང་ཆ་འཕྲིན་ཤེས་རྟོགས་ཀྱི་ལམ་བུ་གལ་ཆེན་ཡང་ཡིན་པས། ལོ་ཙཱ་བ་ཚོས་རང་ངོས་ཀྱི་ལས་ཀའི་བྱང་ཚད་མཐོ་རུ་གཏོང་བར་མཐོང་ཆེན་དང་རིག་གནས་ཤེས་བྱར་སྦྱངས་པ་ཤུགས་ཆེན་བྱས་ཏེ་ཡིག་སྒྱུར་སྤུས་ཚད་དེ་བས་མཐོ་བ་དང་མི་རིགས་ཁག་གི་རིག་གནས་སྤེལ་རེས་ནུས་པ་གང་ལེགས་འདོན་ཐུབ་པ་བྱེད་དགོས། །