གཉན་པོ་གསང་བའི་རིག་མཛོད་ཁང་གི་བཀོད་པ་ཐུན་མིན་ལྟར་འཆད་པ།

ལུའ་ཝུན་ཧྭ་སགས་ཀྱིས་གཉན་པ་གསང་བའི་དཔེ་རྙིང་ལ་ཞིབ་འཇུག་བྱེད་བཞིན་པ།

དེ་ཡང་ལོ་ངོ་སྟོང་གི་ལོ་རྒྱུས་ཀྱི་མཛེས་ལྗོངས་ལ་ཕྱི་མིག་ལན་གཅིག་འཁོར་བའི་དཔྱོད་ཤེས་ཀྱི་རིག་ངོར་ཡེ་ནས་དག་མཉམ་བདེན་གཉིས་དབྱེར་མེད་ཡེ་ཤེས་རང་སྣང་བའི་དཀྱིལ་འཁོར་ཆེན་མོ། རིག་པ་རང་བྱུང་གིས་ཀློང་དུ་འོག་མིན་གསང་ཆེན་རོལ་པའི་ཕོ་བྲང་ནས་མ་བཅོས་ལྷུན་གྱིས་གྲུབ་པའི་གཞལ་མེད་ཁང་རྣམ་ཐར་སྒོ་གསུམ་གྱི་རང་བཞིན་མཚོན་པའི་བློས་སློང་ཆེན་མོ། ཕྱོགས་བཅུའི་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་དང་།

གཉན་པ་གསང་བར་ཉར་ཚགས་བྱས་པའི་དཔེ་རྙིང་རྩ་ཆེན།

གསུང་དང་། ཐུགས་རྡོ་རྗེའི་བདག་ཉིད་རྒྱ་ཆད་ཕྱོགས་ལྷུང་དང་བྲལ་བ་ལས། སྟོན་པ་ཀུན་ཏུ་བཟང་པོ་ཉིད་ལས་མི་གཞན་པའི་འཁོར་བསམ་གྱིས་མི་ཁྱབ་པས་བསྐོར་བའི་དབུས་སུ་རྒྱུད་ཀྱི་རྒྱལ་པོ་དེ་ཁོ་ན་ཉིད་ངེས་པའི་ཆོས་འཁོར་གྱི་སྙིང་པོ་བཞུགས་པ། མ་དག་འཁྲུལ་པའི་དྲི་མ་དབྱིངས་སུ་སྦྱངས་པར་བྱེད་པའི་བརྒྱད་ཁྲི་བཞི་སྟོང་ཆོས་ཕུང་གི་བཅུད་ཕྱུང་བ། སྐལ་བ་དམན་པ་རྣམས་ལ་གསང་བའི་རྒྱ་རིམ་པ་དགུས་བཏབ་པའི་གཉན་པོ་བཀའི་སྒོ་ནས་སྐུལ་བའི་རིག་པའི་གསང་མཛོད་ཆེན་མོ་ལགས་པས། དེ་ལྟ་བུའི་གཙུག་ལག་རབ་འབྱམས་རྒྱ་མཚོའི་དུས་གཅིག་ཏུ་འཁྱིལ་བའི་ཐར་པ་ཆེན་པོའི་གླིང་། ཞིང་ཁམས་ཀྱི་བཀོད་པ་ལྷུན་གྱིས་གྲུབ་པ། ལྟ་བས་ཆོག་མི་ཤེས་པའི་སྦས་དོན་གྱི་གསང་བ་བསམ་གྱིས་མི་ཁྱབ་པ་རྣམས། བརྡ་དོན་རྟགས་སུ་ཤར་བའི་ཚུལ་གྱིས་དཀའ་བའི་གནས་ཀྱི་གསང་བའི་རྒྱ་དུས་གཅིག་ཏུ་འགྲོལ་བར་བྱེད་པའི་མཐོང་གྲོལ་ཆེན་པོ་སྟེ། དེ་ཡང་འཇམ་དཔལ་སྒྱུ་འཕྲུལ་དྲ་བ་ལས། སངས་རྒྱས་སྐུ་ལྔའི་བདག་ཉིད་ཅན། ། ཁྱབ་བདག་ཡེ་ཤེས་ལྔ་ཡི་བདག །སངས་རྒྱས་ལྔ་བདག་ཅོད་པན་ཅན། །སྤྱན་ལྔ་ཆགས་པ་མེད་པ་འཆང་། །ཞེས་གསུངས་པ་ལྟར། འཁོར་ལོ་དང་། རྡོ་རྗེ། རལ་གྲི། པདྨ། ནོར་བུ། སོགས་རིགས་ལྔའི་རང་བཞིན་ལས་སྐུ་རྣམ་པར་སྣང་མཛད། གསུང་འོད་དཔག་མེད། ཐུགས་མི་སྐྱོད་པ། ཡོན་ཏན་རིན་ཆེན་འབྱུང་གནས། ཕྲིན་ལས་དོན་ཡོད་གྲུབ་པ་སྟེ་ཕུང་པོ་ལྔ་སྐུ་ལྔ་དང་། ས་སངས་རྒྱས་སྤྱན་མ། ཆུ་མ་མཱ་ཀི། མེ་གོས་དཀར་མོ། རླུང་དམ་ཚིག་སྒྲོལ་མ། ནམ་མཁའ་རྡོ་རྗེ་དབྱིངས་ཀྱི་དབང་ཕྱུག་མ་སྟེ་འབྱུང་བ་ལྔ་ཡུམ་ལྔ། མིག་སའི་སྙིང་པོ། རྣ་བ་ཕྱག་ན་རྡོ་རྗེ། སྣ་ནམ་མཁའི་སྙིང་པོ། ལྕེ་འཇིག་རྟེན་དབང་ཕྱུག ལུས་སྒྲིབ་པ་རྣམ་སེལ། ཡིད་ཀུན་ཏུ་བཟང་པོ་སྟེ་དབང་པོ་དྲུག་སེམས་དཔའ་དྲུག དུག་ལྔ་ཡེ་ཤེས་ལྔ་མངོན་དུ་གྱུར་ཏེ་། འཁོར་བ་མ་སྤངས་གནས་སུ་དག་པས་ནང་རྡོ་རྗེའི་ལུས་ཀྱི་ཕུང་ཁམས་སྐྱེ་མཆེད་ཀྱི་རང་གཟུགས་ཕྱིར་གཞལ་ཡས་ཁང་གི་རྣམ་པར་ཤར་བ་ནི། དེ་ཡང་སྒྱུ་འཕྲུལ་བརྒྱད་ཅུ་པ་ལས། རྩ་བ་མེད་པའི་སེམས་ཉིད་ནི། །ཆོས་རྣམ་ཀུན་གྱི་རྩ་བ་ཡིན། །ཞེས་པ་ལྟར། གསང་བ་དེ་ཁོ་ན་ཉིད་ཀྱི་རང་གདངས་འཁོར་འདས་སྣང་སྲིད་སྣོད་བཅུད་ཐམས་ཅད། སྐུ་དང་ཡེ་ཤེས་ཀྱི་ངོ་བོ་ལས་མ་འདས་པས་ཡིན་ལུགས་ཀྱི་གཤིས་སུ་དག་པ་རབ་འབྱམས་སུ་ཤར་ནས་གནས་སྣང་མཐུན་པའི་སྣང་བ་སྦྱིན་པའི་དཔལ་དང་ལྡན་པའོ།། དེ་དག་ནི་མཚན་དོན་གླེང་གཞི་དང་མཐུན་པར་སྣང་ཚུལ་ཙམ་དུ་ཐུན་མིན་རྒྱུད་དོན་ལྟར་བཀོད་པ་ཡིན།།

གཉན་པ་གསང་བར་ཉར་ཚགས་བྱེད་སྟངས།

མ་ལ་ཡཱ་ཡི་རླུང་གིས་གཏོར་བའི་བསུང་ཞིམ་མིན་ཡང་ཨ་སྔོན་གནམ་ལ་རྩེ་མོ་རེག་པའི་ལྷ་ཤིང་ཤུགས་པའི་ལྷན་སྐྱེས་དྲི་ལ་དུང་བ་ཡིན། །གངྒའི་ལྷ་མོས་ཀླུང་གི་རལ་པ་བསིག་པ་མིན་ཡང་དལ་གྱིས་རྒྱུ་བའི་གཙང་གསུམ་འབབ་ལྡན་རླབས་ཕྲེང་གཏོར་བའི་རྐང་པའི་གདུ་སིལ་ཁྲོལ་བར་ཡིན། །མཇུག་རིང་མདོངས་མཐའ་དགའ་བའི་གར་གྱིས་སྒྲོ་གུར་ཕུབ་པའི་མཛེས་སྡུག་མིན་ཡང་དབྱར་གྱི་ལང་ཚོའི་ཟ་འོག་རྣམ་བཀྲའི་བཀྲག་མདངས་འཚེར་བའི་མཛེས་ལྗོངས་ཡིན། །གྲགས་པས་སྤུངས་པའི་བྱ་རྒོད་ཕུང་པོའི་རི་བོ་མིན་ཡང་སྲིད་པ་ཆགས་པའི་གངས་དཀར་ལྷུན་པོ་ལྷ་བཤོས་བཤམ་འདྲའི་ཏི་སེ་གངས་ཀྱིས་འཛུམ་མདངས་ཡིན། ། ཞེས་པ་ནི་བར་སྐབས་ཀྱི་ཚིགས་སུ་བཅད་པའོ།།

གཉན་པོ་གསང་བའི་རིག་མཛོད་ཁང་གི་བཀོད་པ་ཐུན་མོང་ལྟར་འཆད་པའི་སྐོར།

གཉན་པོ་གསང་བ་ནི་སྤུ་རྒྱལ་གདུང་རབས་ཉེར་བརྒྱད་པ་ལྷ་ཐོ་ཐོ་རི་གཉན་བཙན་གྱི་སྐུ་དུས་སུ། ཕོ་བྲང་ཡུམ་བུ་བླ་སྒང་གི་ཡང་སྟེང་དུ་སྤང་ཀོང་ཕྱག་རྒྱ་མ་དང་། གསེར་གྱི་མཆོད་རྟེན་ཁྲུ་གང་ཅན་གཅིག མདོ་སྡེ་ཟ་མ་ཏོག སྙིང་པོ་ཡི་གེ་དྲུག་པ།  ཙིནྡྷ་མ་ཎིའི་རྐོས་ཕོར། མུ་དྲའི་ཕྱག་རྒྱ་རྣམས་མཁའ་ལས་བབས་ཏེ། གདུང་རབས་ལྔ་ནས་འདིའི་དོན་ཤེས་པ་འབྱུང་ཞེས་སྒྲ་གྲགས་པ་ལས། ཡི་གེའི་ཚིག་དོན་མ་གོ་བས་ངོ་མཚར་དུ་བཟུང་ནས་ཕོ་བྲང་གི་དཀོར་ཁང་དུ་མིང་ལ་གཉན་པོ་གསང་བར་བཏགས་ནས་མཆོད་པ་དང་བཅས་ཏེ་བཞུགས་སུ་གསོལ་བ་ནི་སྔོན་བྱུང་ལོ་རྒྱུས་ཀྱི་ཆེ་བ་ཡིན་ལ། གཉན་པོ་དང་གསང་བ་ཞེས་པའི་བརྡ་ཆད་དེ་ཡང་རྒྱལ་པོའི་བཀའ་གཙིགས་གཉན་པོའི་རྒྱས་བཏབ་སྟེ་གསང་བ་བྱས་པའི་དོན་ཡིན་ལ། རིག་མཛོད་ཅེས་པ་ནི་སྤང་ཀོང་ཕྱག་རྒྱ་མ་དང་། མདོ་སྡེ་ཟ་མ་ཏོག སྙིང་པོ་ཡི་གེ་དྲུག་པ་སོགས་ཡོངས་གྲགས་སྔོན་བྱུང་ལོ་རྒྱུས་དང་འབྲེལ་བའི་གཏམ་དང་སྦྱར་བར་བྱས་པར་ཞིབ་ཏུ་ཤེས་སོ།། རིག་མཛོད་ཁང་འདིར་སྤྱིར་ཐུན་མོངས་དང་ཐུན་མིན་སོགས་མདོ་སྔགས་རིག་གནས་དང་བཅས་པའི་གཞུང་ལུགས་སྐོར་དང་། བྱེ་བྲག་ཏུ་གླེགས་ཤིང་དང་གླེགས་ཐག་དཔེ་སྒྲོམ་དཔེ་ཆབ་སོགས་ཆོས་དཔེའི་མཁོ་དགུ་མ་ལུས་པར་ཡོངས་སུ་རྫོགས་པའི་ཤུལ་བཞག་གི་རིག་དངོས་བགྲང་གིས་མི་ལངས་བའི་དཔེ་མཛོད་ཁང་ཞིག་སྟེ། དེའི་རྒྱ་ཁྱོན་ནི་རྨིག་གྲུ་བཞི་མ་སྟོང་ལྷག་ལ་ཐོག་བརྩེགས་རིམ་པ་དགུ་ལ་གཉྫི་ར་སྟེ་མཛོད་ལྡན་གྱིས་རྒྱན་པ། ཁང་རྩེགས་འོག་མའི་འཁོར་ཁང་གི་ཁྱམས་རྣམ་ཤེས་ཚོགས་བརྒྱད་ལས་ཀུན་གཞི་མ་རིག་པ་མཚོན་བྱེད་དུ་མུན་པ་སྟུག་པོའི་སྨག་གིས་བསྒྲིབས་པའི་ཀློང་ནས་ཐོན་ཏེ་ཐོག་བརྩེགས་གཉིས་པར་སླེབས་པ་དང་། དེའི་སྟེང་གི་ལྟེ་བར་ཁོག་སྟོང་གི་སྒྲོམ་གྲུ་བཞི་ལས་དྲ་མིག་ཅན་གྱི་ལིང་ཚེ་ཆེན་པོ་བཞི་རེ་བྱས་པའི་ཕྱོགས་བཞིར་སྟེང་ཐོག་བཞི་རེ་བཞེངས་པ་དེས་རྟེན་འབྲེལ་ཡན་ལག་བཅུ་གཉིས་ལུགས་འབྱུང་ལྡོག་གི་རྣམ་པར་མཚོན་པ་བྱས་ཡོད། ལིང་ཚེ་ཆེན་པོ་བཞིས་རེ་རེའི་ངོས་སུ་དྲྭ་མིག་ཉིས་ཁྲི་ཆིག་སྟོང་བཞེངས་ཡོད་པས་བསྡོམས་བརྒྱད་ཁྲི་བཞི་སྟོང་སྟེ། འགོག་ལམ་ཡོན་ཏན་བརྒྱད་ལྡན་གྱི་རང་གཟུགས་ཆོས་ཕུང་བརྒྱད་ཁྲི་བཞི་སྟོང་མཚོན་པར་བྱས་ཡོད་ལ། ཐོག་བརྩེགས་རིམ་པ་དགུའི་ཡང་གསང་བླ་ན་མེད་པའི་ཐེག་པ་རིམ་དགུའི་རྣམ་བཞག་མཚོན་པ་དང་། སྟེང་དུ་མཐོངས་ཁེབས་ཟླུམ་པོར་འཁྱིལ་བའི་རང་འོད་ཕྱོགས་མཚམས་ཁོར་ཡུག་ཐམས་ཅད་ཁྱབ་བརྡལ་དུ་ཕྱིན་པ་ནི་འོད་གསལ་རྫོགས་པ་ཆེན་པོའི་གཞི་ལམ་འབྲས་གསུམ་གྱི་ཆོས་ཐམས་ཅད་རང་བྱུང་གསང་བའི་ཡེ་ཤེས་དེ་ཁོ་ན་ཉིད་ཐིག་ལེ་ཉག་གཅིག་གི་ངོ་བོ་རུ་མཁྱེན་པའི་ཀློང་གཅིག་ཏུ་བཟླུམ་པ་མཚོན་པར་བྱས་ཡོད།