ཧྲང་ཧའེ་ནས་ཡོང་བའི་རྒྱ་རིགས་སྨན་པ་ཧན་ཁྲུན་ཡིང་གིས་བཻཌཱུརྱ་གསོ་དཔྱད་གླིང་དུ་ལོ་༡༧ཙམ་ལས་དོན་སྒྲུབ་པ།
དཔལ་འབྱོར་དར་རྒྱས་ཆེ་བའི་རྒྱ་ཡུལ་གྲོང་ཁྱེར་ཧྲང་ཧའེ་ཡི་སྨན་ཁང་ཆ་རྐྱེན་ཕུན་སུམ་ཚོགས་པའི་སྨན་ཁང་དུ་ལས་དོན་སྒྲུབ་བཞིན་པའི་རྒྱ་རིགས་བུད་མེད་སྨན་པ་ཞིག་རྫོགས་ཆེན་བཻཌཱུརྱ་གསོ་དཔྱད་གླིང་གི་སྨན་ཁང་དུ་ཡོང་ནས་ད་ལོ་མི་ལོ་༡༧ཏག་ཏག་འཁོར་འདུག །མོས་ས་གནས་དེ་གའི་ཕྱིའི་གྲོང་སྡེའི་འཛུགས་སྐྲུན་གྱི་འགྱུར་བ་དང་། ཁྱིམ་ཚང་གི་འགྱུར་བ། ཁོར་ཡུག་གི་འགྱུར་བ། འགྲིམ་འགྲུལ་དང་བརྡ་འཕྲིན་གྱི་འགྱུར་བ་སོགས་མཐོང་བས་མ་ཚད་སྨན་ཁང་འདི་ཐོག་མར་བཙུགས་པའི་དཀའ་ངལ་དང་བར་དུ་རིམ་བཞིན་འཕེལ་རྒྱས་བྱུང་ཚུལ། ད་ལྟ་ཕྱོགས་གང་ཐད་ཆ་རྐྱེན་བཟང་བའི་སྨན་ཁང་འདིའི་འཕོ་འགྱུར་གྱི་བདེན་དཔང་མི་སྣ་ཞིག་ཏུ་གྱུར། མོའི་མིང་ལ་ཧན་ཁྲུན་ཡིང་ཟེར་ཞིང་ཐོག་མར་སྨན་ཁང་འདིར་ཡོང་དུས་མོ་ལོ་༢༢དང་ད་ལྟ་ལོ་༣༩ཡིན། མོས་ལོ་ངོ་༡༧རིང་དུ་བོད་རིགས་ཀྱི་ཞིང་འབྲོག་མང་ཚོགས་དང་ལྷག་པར་དུ་རྫོགས་ཆེན་ཡུལ་གྱི་ནད་པ་ཅི་ཙམ་མང་པོའི་ནད་ཀྱི་སྡུག་བསྔལ་བསལ་བ་དང་། ལྷག་པར་དུ་སྔོན་ཆད་འབྲོག་པའི་ཨ་མ་ཚོས་ཕྲུ་གུ་ནོར་སླས་སུ་སྐྱེ་བ་སོགས་ཆ་རྐྱེན་ཞན་པས་ཕྲུ་གུ་གསོན་ཚད་ཧ་ཅང་དམའ་བ་རེད། བཻཌཱུརྱ་གསོ་དཔྱད་གླིང་གི་སྨན་ཁང་བཙུགས་ནས་བཟུང་འབྲོག་པའི་ཨ་མ་ཚོ་སྨན་ཁང་དུ་ཡོང་ནས་ཕྲུ་གུ་སྐྱེ་ཆོག་པས་ལོ་རེར་སྨན་ཁང་དེར་ཆ་སྙོམས་ཕྲུ་གུ་༦༠ལྷག་བཙའ་བས་མ་བུ་ཤི་བའི་གནས་ཚུལ་ཕལ་ཆེར་བྱུང་མེད། དེའི་ནང་སྨན་པ་ཧན་ཁྲུན་ཡིང་ནི་བྱས་རྗེས་ཆེ་ཤོས་དེ་ཡིན་པ་རེད། མི་ལོ་༡༧རིང་དུ་མོ་རང་གིས་ཀྱང་ནད་པ་ཅི་ཙམ་ལ་སྨན་བཅོས་བྱས་ཡོད་པ་རྩིས་ཐེབས་ཀྱི་མི་འདུག་ཟེར།
ཕྲུ་གུ་དེ་ཕ་མ་དང་མཉམ་དུ་སྨན་ཁང་དུ་སྲོག་སྐྱབས་མཁན་གྱི་སྨན་པ་ཧན་ཁྲུན་ཡིང་ལྟ་སར་ཡོང་བ།