ནད་པ་ལ་དགོས་མཁོ་ཡོད་ཚེ་ངས་ནུས་པ་ཡོད་ཚད་འབུལ་ངེས་ཡིན། ཞེས་འདི་ནི་ཕ་ཡུལ་སི་ཁྲོན་ཀང་ཨན་ནས་ཡིན་པའི་རྒྱ་རིགས་སྨན་པ་ལི་ཧྲེང་ཕུའུ་ཡིས་གསར་འགོད་པ་ལ་བཤད་པའི་སྐད་ཆ་དུམ་བུ་ཞིག་རེད།
སྨན་པ་ལི་ཧྲེང་ཕུའུ་༢༠༠༨ལོར་རྫོགས་ཆེན་བཻཌཱུརྱ་གསོ་དཔྱད་གླིང་དུ་ཡོང་ཞིང་། ཁོས་བཤད་པ་ལྟར་ན་སྐབས་དེར་ས་གནས་འདི་ཧ་ཅང་རྗེས་ལུས་དང་ཆ་རྐྱེན་ཧ་ཅང་ཞན་པོ་ཡིན་ཞིང་སྨན་ཁང་བཙུགས་ནས་ཀྱང་ལོ་གསུམ་ལས་མིན་པས་ནད་པ་ཧ་ཅང་མང་ཞིང་། རྒྱུན་དུ་སྨན་གྱིས་མི་འདང་བ་དང་སྨན་པས་མི་འདང་བ། གཞུང་ལམ་དང་རང་འབབ་ཆུ་སོགས་ཀྱི་དཀའ་ངལ་ཆེན་པོ་ཡོད་ཟེར། ཅུང་ཐག་རིང་བའི་ནད་པ་བྱུང་ཚེ་ང་ཚོས་འཕྲུལ་རྟ་ཞོན་ནས་ཆུ་ཚོད་གཉིས་བར་བསུ་སར་འགྲོ་དགོས། འཕྲུལ་རྟ་མི་ཐར་སར་རྟ་ཞོན་ནས་འགྲོ་དགོས། ང་རང་རྟ་ཐོག་ནས་ཐེངས་འགར་ལྷུང་མྱངས་ཟེར། སྐབས་འགར་ནད་པ་མང་དུས་ཉིན་མཚན་གསུམ་ལ་མགྱོགས་ཐུག་ཁོ་ན་ཟ་མྱངས་ཟེར། རྗེས་སུ་ཞུའུ་རི་ཚོགས་པའི་རོགས་སྐྱོར་འོག་སྨན་ཁང་གི་ཆ་རྐྱེན་ཡང་ཇེ་ལེགས་གྱུར་སོང་བས་རྒྱུན་མཐོང་གི་ནད་གཞི་ཕལ་ཆེར་སྨན་ཁང་འདིའི་ཕྱི་རུ་འགྲོ་མི་དགོས་པར་བཅོས་ཐུབ། གལ་ཏེ་བཅོས་མི་ཐུབ་པའི་ནད་ཡིན་ན་དེ་ལས་རིམ་པ་མཐོ་བའི་སྨན་ཁང་དུ་སྐྱེལ་བཞིན་ཡོད་ཟེར།
སྨན་ཁང་འདིར་བསྡད་ནས་མི་ལོ་བཅུ་བདུན་གྱི་དྲན་ཚོར་ཟབ་ཤོས་ནི། སྨན་ཁང་འདིས་ཉེ་འཁོར་གྱི་མང་ཚོགས་ལ་ཞབས་ཞུ་ཡག་པོ་བསྒྲུབས་པས་མ་ཚད་སྨན་ཁང་འདིའི་སྨན་རིན་ཡང་དམའ་བ་དང་། སྐབས་འགར་ཆ་རྐྱེན་ཞན་པའི་ནད་པ་ལ་སྨན་རིན་ཡང་མི་ལེན་པར་མ་ཟད་ད་དུང་ཟ་མ་ཡང་སྟེར་བཞིན་ཡོད། སྨན་ཁང་གི་བྱ་བ་འདི་དག་མཐོང་དུས་ང་རང་ལ་སེམས་འགུལ་ཟབ་མོ་ཐེབས་ཏེ་སྨན་ཁང་འདི་ལས་ཁ་བྲལ་མི་ཐུབ་པའི་བརྩེ་བ་ཞིག་ཆགས་སོང་ཟེར།