ད་ལོ་ནི་སྡེ་དགེ་རྫོགས་ཆེན་བཻཌཱུརྱ་གསོ་དཔྱད་གླིང་བཙུགས་ནས་བགྲང་བྱ་ཉི་ཤུ་འཁོར་བའི་དམིགས་བསལ་གྱི་དུས་སྟོན་ཞིག་ཡིན། མི་ལོ་ཉི་ཤུའི་རིང་དུ་བཻཌཱུརྱ་གསོ་དཔྱད་གླིང་དེས་མཐའ་ཁུལ་གྱི་ནད་པ་མང་པོའི་སྲོག་བསྐྱབས་པར་མ་ཟད་ཐོག་མཐའ་བར་གསུམ་དུ་གསོ་རིག་དང་བཟོ་རིག་སྐོར་གྱི་ཤེས་ལྡན་མི་སྣ་གསོ་སྐྱོང་བྱ་རྒྱུ་དེ་གལ་ཆེའི་ནང་གི་དོན་ཆེན་དུ་བརྩིས་ནས་སྔོན་རྗེས་སུ་གསོ་རིག་དང་བཟོ་རིག་སོགས་ཀྱི་འཛིན་གྲྭ་མང་པོ་གཉེར་ཏེ་བསྡོམས་པས་སྤྱི་ཚོགས་ལ་དགོས་གལ་ཆེ་བའི་མི་སྣ་༡༡༠༠ལྷག་ཙམ་གསོ་སྐྱོང་བྱས་པས་ཕན་འབྲས་རྒྱ་ཆེན་ཐོབ།
གསོ་རིག་འཛིན་གྲྭའི་དགེ་རྒན་གྱིས་སློབ་ཁྲིད་བྱེད་བཞིན་པ།
བཻཌཱུརྱ་གསོ་དཔྱད་གླིང་གིས་སི་ཁྲོན་ཞིང་ཆེན་བོད་ཡིག་སློབ་གྲྭ་དང་མཉམ་འབྲེལ་བྱས་ནས་གསོ་རིག་འཛིན་གྲྭ་གཉེར་ཚུལ།
སྤྱི་ལོ་༢༠༠༨ལོ་ནས་བཻཌཱུརྱ་གསོ་དཔྱད་གླིང་གིས་སི་ཁྲོན་ཞིང་ཆེན་བོད་ཡིག་སློབ་གྲྭ་དང་མཉམ་འབྲེལ་གྱི་གསོ་རིག་སྦྱོང་སའི་འཛིན་གྲྭ་བཙུགས་པའི་འགོ་བརྩམས། སྐབས་དེར་བཻཌཱུརྱ་གསོ་དཔྱད་གླིང་གི་གླིང་གཙོ་སྨན་པ་གུར་དགའ་རང་གིས་འགྲོ་སོང་བཙལ་ནས་སློབ་མ་༣༢བསྡུས། སློབ་མ་དེ་དག་སྤྱི་ལོ་༢༠༡༢ལོའི་ཟླ་༧པར་མཐར་ཕྱིན། དེའི་སྟོན་དུས་སུ་དཀར་མཛེས་ཁུལ་གཞུང་འབྲེལ་གྱི་འཕྲོད་བསྟེན་སྨན་པའི་རྒྱུགས་གྲལ་དུ་ཞུགས་མཁན་གྱི་མི་གྲངས་ཁུལ་ཡོངས་ཀྱི་སློབ་མ་ལྔ་བརྒྱ་ལྷག་ཡོད་པ་ལས་མཐར་ཕྱིན་རྒྱུགས་ཞུགས་སློབ་མ་༡༤ལས་སློབ་མ་༩ཡིས་རྒྱུགས་འབྲས་ཨང་དང་པོ་ནས་གསུམ་པ་དང་དྲུག་པ་ནས་དགུ་པའི་བར་གྱིས་ལས་རྒྱུགས་འཕྲོད་དེ་རྒྱལ་ཁབ་ཀྱི་ཚད་ལྡན་སྨན་ཁང་གི་ལས་གནས་ཐོབ་པའི་འབྲས་བུ་གཡུར་དུ་ཟ་བ་སྨིན་པས་གསོ་རིག་རྒྱུད་འཛིན་གྱི་མྱུ་གུ་གསོ་སྐྱོང་ལ་རེ་བ་དང་སྙིང་སྟོབས་ལྷག་ཏུ་བརྟས།
བཻཌཱུརྱ་གསོ་དཔྱད་གླིང་གིས་དཀར་མཛེས་ཁུལ་བོད་སྨན་ཁང་དང་དཀར་མཛེས་ཁུལ་འཕྲོད་བསྟེན་སློབ་གྲྭ་མཉམ་འབྲེལ་གྱིས་སློབ་མ་གསོ་སྐྱོང་བྱས་ཚུལ།
སྤྱི་ལོ་༢༠༡༢ནས་༢༠༡༤ལོའི་བར་དུ་སྡེ་དགེ་རྫོགས་ཆེན་བཻཌཱུརྱ་གསོ་དཔྱད་གླིང་གིས་དཀར་མཛེས་ཁུལ་བོད་སྨན་ཁང་དང་དཀར་མཛེས་ཁུལ་འཕྲོད་བསྟེན་སློབ་གྲྭ་དང་མཉམ་འབྲེལ་བྱས་ཏེ་སི་ཁྲོན་ཞིང་ཆེན་འབྲེལ་ཡོད་ལས་ཁུངས་ཀྱི་གྲོང་གསེབ་སྨན་པའི་གསོ་སྐྱོང་སྲིད་ཇུས་ལག་བསྟར་བྱ་ཆེད་གསར་དུ་གྲོང་གསེབ་སྨན་པའི་སློབ་མ་བརྒྱ་ལྷག་མཉམ་དུ་སྐྱེད་སྲིང་བྱ་བའི་འགོ་ཚུགས། སྤྱི་ལོ་༢༠༡༤ལོ་ནས་བཻཌཱུརྱ་གསོ་དཔྱད་གླིང་གིས་སློབ་མ༨༠ལྷག་བསྡུས་ནས་གསོ་སྐྱོང་དམིགས་བསལ་བྱས་ཏེ་མཐར་ཕྱིན་རྗེས་བོད་ལྗོངས་ཆབ་མདོ་དང་། འཇོ་མདའ། གཞིས་ཀ་རྩེ། ཚ་བ་སྒང་། མཚོ་སྔོན་ཁྲི་ཀ །སྐྱེ་རྒུ། པདྨ་རྫོང་། ཀན་སུའུ་ལན་ཀྲུའུ་སོགས་དང་། སི་ཁྲོན་རྔ་བ་ཁུལ། དཀར་མཛེས་ཁུལ་གྱི་རྫོང་ཁག་སོ་སོ་དང་། བོད་མདོ་དབུས་ཁམས་གསུམ་གྱི་སྒེར་བཙུགས་སྨན་ཁང་དང་འབྲེལ་ཡོད་ཀྱི་ལས་ཁུངས་སོགས་སུ་བྱ་བ་གཉེར་ཐུབ་པའི་གསོ་རིག་མི་སྣ་གསོ་སྐྱོང་བྱས་པས་སྤྱི་ཚོགས་ཀྱི་གདེང་འཇོག་དང་དགའ་བསུ་ཚད་མེད་ཐོབ་ཅིང་། ཁོང་ཅག་གི་ད་ལྟའི་འཚོ་བ་དང་མ་འོངས་རེ་འདུན་སོགས་མངོན་འགྱུར་བྱེད་པ་ལ་སྤོབས་པ་ལྷོད་མེད་བསྩལ་བ་དང་། ནད་བཅོས་ཉམས་མྱོང་དང་རིག་གནས་ཆུ་ཚད་སོགས་ཡར་རྒྱས་ཀྱི་གོམ་ཁ་མགྱོགས་སུ་འགྲོ་བཞིན་ཡོད་པས་བོད་རིགས་ཀྱི་ནད་པ་ཚོ་ལ་ཕན་འབྲས་ཆེན་པོ་འཐོབ་བཞིན་ཡོད།
བཻཌཱུརྱ་གསོ་དཔྱད་གླིང་དུ་སི་ཁྲོན་ཞིང་ཆེན་བོད་ཡིག་སློབ་གྲྭའི་དེང་རབས་དགེ་ཕྲུག་ལམ་ལུགས་ཀྱི་བོད་ལུགས་གསོ་རིག་འཛིན་གྲྭ་དང་མི་རིགས་མཛེས་རྩལ་འཛིན་གྲྭ་བཙུགས།
སྤྱི་ལོ་༢༠༡༨ལོར་སྡེ་དགེ་རྫོགས་ཆེན་བཻཌཱུརྱ་གསོ་དཔྱད་གླིང་དང་སི་ཁྲོན་ཞིང་ཆེན་བོད་ཡིག་སློབ་གྲྭ་གཉིས་ཀྱིས་མཉམ་འབྲེལ་གྱིས་སློབ་མ་སྐྱོང་བའི་འགོ་ཚུགས། སི་ཁྲོན་ཞིང་ཆེན་བོད་ཡིག་སློབ་གྲྭའི་དེང་རབས་དགེ་ཕྲུག་ལམ་ལུགས་ཀྱི་བོད་ལུགས་གསོ་རིག་འཛིན་གྲྭ་དང་མི་རིགས་མཛེས་རྩལ་འཛིན་གྲྭ་གཉིས་བཻཌཱུརྱ་གསོ་དཔྱད་གླིང་དུ་དངོས་སུ་བཙུགས་པ་དང་། སྤྱི་ལོ་༡༩༩༨ལོ་ནས་༢༠༢༥ལོའི་བར་གསོ་རིག་ཆེད་སྦྱོང་དང་། བཟོ་རིག་ཆེད་སྦྱོང་སློབ་མ་ཁྱོན་བརྒྱ་ཕྲག་དུ་མ་ལྷག་གསོ་སྐྱོང་བྱས་ཡོད།
༢༠༡༨ལོར་སྡེ་དགེ་རྫོང་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཅུས་མཉམ་འབྲེལ་གྱི་ངང་ནས་མི་རིགས་མཛེས་རྩལ་འཛིན་གྲྭ་དང་བཟའ་བཅའ་གཡོས་སྦྱོར་འཛིན་གྲྭ་བཅས་བཙུགས་ནས་བསྡོམས་པས་མི་སྣ་༢༢༠ལྷག་གསོ་སྐྱོང་བྱས།
མི་སྣ་གསོ་སྐྱོང་བྱེད་པའི་ཐད་ཀྱི་གྲུབ་འབྲས་ལ་ཕྱིར་མིག་ལྟ་བ།
སློབ་གསོའི་ལས་ཀ་ནི་མ་གཞི་དཀའ་ཚེགས་ཆེ་ལ་འགན་འཁྲི་ལྕི་ཞིང་དུས་ཡུན་རིང་པོར་རྒྱུན་འཁྱོངས་བྱེད་དགོས་པའི་ལས་རིགས་ཤིག་ཡིན་ན་ཡང་དུས་ཡུན་དེའི་རིང་ལ་དཀའ་ཁག་གདོང་ལེན་དང་གཟིགས་རྒྱང་རིང་པོའི་ངང་ནས་རྒྱུན་འཁྱོངས་བྱ་རྒྱུའི་ཆོད་སེམས་ནམ་ཡང་བོར་མ་མྱོང་། དེ་བས་རྫོགས་ཆེན་བཻཌཱུརྱ་གསོ་དཔྱད་གླིང་གིས་སློབ་གསོའི་གྲུབ་འབྲས་ལ་ཕྱོགས་བསྡོམས་ཀྱི་ཚུལ་དུ་ཉུང་ངུར་འགོད་ན། ༢༠༡༢ལོར་གསོ་རིག་འཛིན་གྲྭའི་མཐར་ཕྱིན་སློབ་མ་དཀར་མཛེས་ཁུལ་རྒྱལ་ཁབ་ཀྱི་ཤང་རིམ་པའི་སྨན་པའི་ཡིག་ཚད་ལ་ཞུགས་པ་དང་། ཤང་གྲོང་རྡལ་གྱི་སྨན་པ་༢༥བསྡུ་རྒྱུའི་ཁྲོད་མདུན་གྲལ་གྱི་སློབ་མ་༡༥ཡི་ནང་ནས་སློབ་མ་༡༤ནི་སྡེ་དགེ་རྫོགས་ཆེན་བཻཌཱུརྱ་གསོ་དཔྱད་གླིང་གི་མཐར་ཕྱིན་སློབ་མ་ཡིན་པ་རེད། ༢༠༡༦ལོའི་མཐར་ཕྱིན་སློབ་མ་སི་ཁྲོན་ཞིང་ཆེན་མི་རིགས་ས་ཁུལ་ཤང་གྲོང་སྨན་པའི་ནུས་རྩལ་འགྲན་སྡུར་ཆེན་མོའི་ནང་ཞུགས་སྐབས་ཨང་དང་པོ་ནས་བཅུ་པའི་བར་གྱི་བྱ་དགའི་ཨང་གྲངས་དགུ་སློབ་གྲྭ་དེའི་གསོ་རིག་འཛིན་གྲྭའི་མཐར་ཕྱིན་སློབ་མས་བླངས་པ་རེད། ༢༠༡༧ལོའི་ཟླ་བ་༨པར་སྡེ་དགེ་རྫོང་བོད་སྨན་ཁང་གིས་སྒྲིག་ཁོངས་གཏན་ཁེལ་བྱས་པའི་བོད་ལུགས་གསོ་རིག་གི་སྨན་པ་གསུམ་བསྡུས་པ་དང་། ཡིག་རྒྱུགས་ཁྲོད་ཚད་ཐིག་ལོན་པ་ཚང་མ་ནི་སློབ་གླིང་དེའི་༢༠༡༢ལོའི་མཐར་ཕྱིན་སློབ་མ་ཡིན་པ་རེད། ༢༠༡༩ལོར་བོད་ལྗོངས་བོད་ལུགས་གསོ་རིག་སློབ་ཆེན་གྱིས་སློབ་མ་༤༠བསྡུས་པ་དང་དེར་ཐོ་འགོད་བྱས་པའི་མི་གྲངས་༥༠༠ལས་བརྒལ་ཡང་༢༠༡༨ལོའི་སློབ་གླིང་དེའི་མཐར་ཕྱིན་སློབ་མ་༣གྱིས་རྒྱུགས་འཕྲོད་ཡོད་པ་རེད། ༢༠༢༢ལོར་ཁྲེང་ཏུའུ་ཀྲུང་ལུགས་གསོ་རིག་སློབ་ཆེན་གྱིས་དར་མའི་མཐོ་རྒྱུགས་ཀྱི་ཡིག་ཚད་བླངས་པ་དང་དེར་སློབ་གླིང་དེའི་༢༠༢༢ལོའི་མཐར་ཕྱིན་སློབ་མ་༩ཞུགས་པ་དང་། ༩པོས་ཡིག་ཚད་ལོན་ཞིང་ད་ལྟ་བོད་སྨན་དངོས་ཚན་འདོན་བཞིན་ཡོད། ༢༠༠༨ལོའི་མཐར་ཕྱིན་སློབ་མའི་ཁྲོད་དུ་སློབ་གྲོགས་གསུམ་གྱིས་ཤང་འཕྲོད་བསྟེན་ཁང་གི་འགོ་གཙོ་ཡི་ལས་གནས་ཁུར་ཡོད་ཅིང་། ཐེངས་དེའི་མཐར་ཕྱིན་སློབ་མས་ལོ་རེར་ནད་པ་ཁྲི་༡.༢ལ་སྨན་བཅོས་བྱེད་བཞིན་ཡོད། གཞན་ཡང་སློབ་གླིང་དེའི་བོད་ལུགས་གསོ་རིག་འཛིན་གྲྭའི་སློབ་མ་ཚོས་དགུན་གནང་གི་དུས་ཚོད་སྤྱད་དེ་ལི་ཐང་དང་ཉག་ཆུ་རྫོང་སོགས་སུ་སློབ་ཆེན་དང་། སློབ་འབྲིང་། སློབ་ཆུང་སློབ་མ་བཅས་ལ་གསབ་ཁྲིད་བྱས་པ་དང་། རོང་འབྲོང་མང་ཚོགས་ལ་བོད་ཡིག་གི་ཡིག་རྨོངས་འཛིན་གྲྭ་བཙུགས་ནས་རང་འདུན་གྱིས་སློབ་ཁྲིད་བྱེད་བཞིན་ཡོད། དགུན་གནང་གི་སློབ་མཚམས་དུས་ཚོད་ཅུང་ཙམ་རིང་བས་སློབ་མ་ཚོས་གངས་འཚུབ་དང་ལྷགས་རླུང་ལ་མ་འཛེམ་པར་གྲོང་ཚོ་སོ་སོར་བསྐྱོད་དེ་ནད་པར་བརྟག་དཔྱད་དང་འོས་འགན་སྨན་བཅོས་བྱེད་བཞིན་ཡོད།
དེག་རྒན་གྱིས་སློབ་ཁྲིད་བྱེད་བཞིན་པ།
མདོར་ན་སྡེ་དགེ་རྫོགས་ཆེན་བཻཌཱུརྱ་གསོ་དཔྱད་གླིང་གིས་ལོ་༡༧ཙམ་གྱི་རིང་ལ་གསོ་རིག་དང་བཟོ་རིག་སྐོར་གྱི་དམིགས་བསལ་མི་སྣ་གསོ་སྐྱོང་བྱ་བར་ཤུགས་སྣོན་བརྒྱབ་པ་ལ་གྲུབ་འབྲས་ཀྱང་ཡག་པོ་ཐོབ་ཡོད། གསོ་དཔྱད་གླིང་དེས་སྤྱི་ལོ་༢༠༠༨ལོ་ནས་ད་བར་བསྡོམས་པས་སློབ་མ་༡༡༠༠ལྷག་གསོ་སྐྱོང་བྱས་ཤིང་དེ་ལས་སྔོན་རྗེས་སུ་སློབ་མ་མང་པོས་ལས་ཁུངས་ནང་རྒྱུགས་འཕྲོད་པ་དང་། སློབ་མ་མང་པོས་ད་ལྟ་གསོ་རིག་གི་ལས་རྐང་ཐོག་ལས་དོན་སྒྲུབ་བཞིན་ཡོད་པ་དང་མི་སྒེར་གྱིས་བོད་སྨན་གྱི་སྨན་ཁང་གཉེར་མཁན་དང་རང་གིས་ལྷ་བཟོའི་ལས་དོན་ཁང་གཉེར་མཁན་ཡང་ཧ་ཅང་མང་པོ་ཡིན།
དགེ་རྒན་གྱིས་སྙིང་པར་འཕྲུལ་ཆས་སྤྱོད་སྟངས་སློབ་ཁྲིད་གནང་བཞིན་པ།