དེང་རབས་དགེ་ཕྲུག་ལམ་ལུགས་བཙུགས་ནས་ད་བར་སྡེ་དགེ་རྫོགས་ཆེན་བཻཌཱུརྱ་གསོ་དཔྱད་གླིང་གིས་སློབ་གསོ་དང་ལག་ལེན་ཟུང་དུ་འབྲེལ་ནས་སློབ་མ་གསོ་སྐྱོང་བྱེད་བཞིན་ཡོད། དཔེར་ན། བཟོ་རིག་འཛིན་གྲྭ་ལྟ་བུ་ལ་མཚོན་ན། ལོ་གཉིས་དང་གསུམ་གྱི་རིང་ལ་རིག་གཞུང་དང་ལག་ལེན་གཙོ་བོ་བྱས་ནས་ཀརྨ་སྒར་བྲིས་དང་། སྨན་གསར་སོགས་ལུགས་གཙོ་བོར་བཟུང་སྟེ་སློབ་ཁྲིད་བྱེད་པ་དང་། ལོ་གསུམ་པ་ལ་དངོས་སུ་དགེ་རྒན་གྱི་མཛུབ་སྟོན་འོག་རི་མོ་ཁོ་ན་སློབ་བཞིན་ཡོད། ད་རུང་རི་མོ་མཁས་ཆེན་དགེ་རྒན་མང་པོ་གདན་འདྲེན་ཞུས་ནས་སློབ་ཁྲིད་དང་མཛུབ་སྟོན་བྱེད་བཞིན་ཡོད།
བོད་ཀྱི་གསོ་བ་རིག་པའི་འཛིན་གྲྭ་ལྟ་བུ་ལ་མཚོན་ན། ལོ་གསུམ་གྱི་རིང་ལ་བོད་ཀྱི་གསོ་བ་རིག་པའི་ལུགས་ཆེན་གཉིས་ཏེ་བྱང་ཟུར་གཉིས་ཀྱི་ལུགས་བར་མ་ཆད་པའི་ཁྲིད་རྒྱུན་དང་། བོད་ཀྱི་གསོ་རིག་གི་རྩ་བའི་གཞུང་ལུགས་རྒྱུད་བཞིའི་ཁོག་དབུགས་གསོ་རིག་མཁས་པའི་ཚད་ལྡན་གཞུང་འགྲེལ་དང་ཉམས་མྱོང་མན་ངག་ཟབ་མོས་ཟུར་བརྒྱན་པའི་གཞུང་ལུགས་ཀྱི་འཆད་ཁྲིད་དང་། སྨན་ཁང་ཡུལ་དངོས་ནས་ནད་ཐོག་དཔྱད་བཅོས་ཀྱི་ལག་ལེན་དམར་ཁྲིད་དང་། སྨན་རྫས་ངོ་སྤྲོད། དུས་སུ་བཏུ་ཚུལ། སྨན་སྦྱོར་ལག་ལེན་བཅས་ཟུང་དུ་སྦྲེལ་ཏེ་བརྒྱུད་པའི་དབང་ལུང་མན་ངག་གི་སྲོལ་རྒྱུན་མ་ཉམས་པར་རིག་གཞུང་སློབ་ཁྲིད་བྱས་ཏེ་ལོ་བཞི་པ་ལ་ལག་ལེན་དངོས་སློབ་ཁྲིད་བྱེད་བཞིན་ཡོད། དཔེར་ན། དཔྱད་བཅོས་ཁང་དུ། བྱུགས་པ་དང་། སྐམ་ཁབ། གཏར་ཁ་སོགས་ལག་ལེན་དང་། ནད་ཐོ་འབྲི་སྟངས། རྩ་ཆུ་བལྟ་སྟངས། སྨན་སྤྲད་སྟངས་སོགས་སློབ་པ་དང་། ནུབ་སྨན་དུ་གནམ་ཁབ་རྒྱག་སྟངས། གློག་པར་རྒྱག་སྟངས། འདས་སྒྲའི་བརྟག་འཕྲུལ་ཁང་སོགས་སྨན་གྱི་སྡེ་ཚན་སོ་སོ་ནས་ཟླ་བ་རེར་རེས་མོས་ཀྱིས་སློབ་མ་ཡོངས་རྫོགས་ལ་ལག་ལེན་སློབ་ཁྲིད་བྱེད་བཞིན་ཡོད།
དགེ་རྒན་གྱིས་གས་རིག་འཛིན་གྲྭ་ལ་ལུས་ཀྱི་གྲུབ་ཚུལ་སབ་བཞིན་པ།
ཁྱད་པར་དུ་བོད་ཀྱི་གསོ་བ་རིག་པའི་དམིགས་ཡུལ་ཆེན་པོ་གཉིས་དམིགས་སུ་བཟུང་ནས་སྤྱི་ཚོགས་ཀྱི་བདེ་ཐང་འགན་ལེན་ཆེར་བཞེས་ཐོག །སྨན་ཁང་གིས་ཤེས་ལྡན་མི་སྣ་གསོ་སྐྱོང་དང་བོད་ཀྱི་གསོ་བ་རིག་པའི་ཆེད་ལས་ཀྱི་སློབ་མ་གང་མང་མང་ཞིག་ནད་བརྟག་སྨན་བཅོས་ཀྱི་འཐབ་ཕྱོགས་དང་པོར་ལག་ལེན་དངོས་དང་དངོས་སྦྱོང་བཅས་བྱས་ནས་ན་གཞོན་ཅན་དང་ཆེད་ལས་ཅན་གྱི་བོད་ཀྱི་གསོ་བ་རིག་པའི་ཤེས་ལྡན་མི་སྣའི་དཔུང་ཁག་ཅིག་འཛུགས་སྐྱོང་བྱེད་བཞིན་ཡོད།
མ་འོངས་པར་སྤྱི་ཚོགས་ནང་དངོས་སུ་ཞུགས་སྐབས་སུ་སྨན་པའི་ལས་གནས་དང་སློབ་གནས་རྒྱུགས་འཕྲོད་པ་སོགས་སུ་ཕན་འབྲས་ཆེ་བར་མ་ཟད་རང་ཉིད་ཀྱང་སྨན་པའི་ལས་ཀ་རང་རྐྱ་འཕེར་ཐུབ་པའི་གྲུབ་འབྲས་ཆེན་པོ་འཐོབ་བཞིན་ཡོད་པས། སླད་ཕྱིན་ཆད་ཀྱང་ལམ་ལུགས་བཟང་པོ་འདིའི་རྒྱུན་མུ་མཐུད་དུ་བསྐྱངས་ཏེ་རྒྱལ་ཁབ་དང་མི་རིགས་ལ་ཞབས་འདེགས་བྱེད་ཐུབ་པའི་ཤེས་ལྡན་མི་སྣ་སྔར་ལས་མང་བ་གསོ་སྐྱོང་བྱེད་པར་རམ་འདེགས་དང་མཐུན་རྐྱེན་སྦྱར་བའི་རེ་བ་འདོན་བཞིན་ཡོད།