སྤྱི་ཟླ་9པའི་ཚེས་29ཉིན། སི་ཁྲོན་ཞིང་ཆེན་མི་རིགས་མཐུན་སྒྲིལ་ཡར་ཐོན་གཟེངས་བསྟོད་ཚོགས་ཆེན་ཁྲེང་ཏུའུ་རུ་འཚོགས། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ཨུའི་ཀྲུའུ་རེན་ཝང་ཞའོ་ཧུའེ་གྲོས་ཚོགས་སུ་ཞུགས་པ་དང་འབྲེལ་གསུང་བཤད་གནང་། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཞིང་ཆེན་སྲིད་གཞུང་གི་ཞིང་དཔོན་ཧྲི་ཞའོ་ལིན་གྱིས་ཚོགས་ཆེན་གཙོ་སྐྱོང་གནང་། ཞིང་ཆེན་སྲིད་གྲོས་ཀྱི་ཀྲུའུ་ཞི་ཐེན་ཞང་ལི། ཞིང་ཆེན་ཏང་ཨུའི་ཧྲུའུ་ཅི་གཞོན་པ། སྲིད་ཁྲིམས་ཨུ་ལྷན་གྱི་ཧྲུའུ་ཅི་ཡུས་ལི་ཅུན་ཚོགས་འདུར་ཞུགས།
ཚོགས་ཆེན་ཐོག་ཏུ། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་སི་ཁྲོན་ཞིང་ཆེན་མི་རིགས་མཐུན་སྒྲིལ་ཡར་ཐོན་དཔེ་བཟང་ཚོགས་པ་དང་དཔེ་བཟང་མི་སྒེར་ལ་གཟེངས་བསྟོད་གནང་བའི་སྐོར་གྱི་གཏན་འབེབས་ཞེས་པ་སྒྲོག་འདོན་བྱས། ཝང་ཞའོ་ཧུའེ། ཧྲི་ཞའོ་ལིན། ཐེན་ཞང་ལི། ཡུས་ལི་ཅུན་སོགས་ཀྱིས་དཔེ་བཟང་མི་སྣའི་སྐུ་ཚབ་ལ་བྱ་དགའ་གནང་། དཔེ་བཟང་ཚོགས་པའི་སྐུ་ཚབ་ཀེང་ཀྲང་དང་། ཝུའུ་ཀྲེན། དཔེ་བཟང་མི་སྒེར་གྱི་སྐུ་ཚབ་ལི་ཧན་རུང་། ཀྲང་ཡན་བཅས་ཀྱིས་སྤེལ་རེས་གཏམ་བཤད་བྱས།
ཝང་ཞའོ་ཧུའེ་ཡིས་གསུང་བཤད་སྐབས་སུ་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་བྱས་ནས། གཟེངས་བསྟོད་ཐོབ་པའི་དཔེ་བཟང་ཚོགས་པ་དང་མི་སྒེར་ལ་རྟེན་འབྲེལ་ཞུས། མི་རིགས་ལས་དོན་འཐབ་ཕྱོགས་ཀྱི་བློ་མཐུན་རྣམ་པར་འཚམས་འདྲི་ཞུས་པ་དང་། སི་ཁྲོན་གྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལ་ཐུགས་ཁུར་དང་རྒྱབ་སྐྱོར་གནང་མཁན་གྱི་ཕྱོགས་སོ་སོའི་མི་སྣ་ལ་བཀའ་དྲིན་ཆེ་ཞུས། གཟེངས་རྟགས་ཐོབ་པའི་ཚོགས་པ་དང་མི་སྒེར་གྱི་གཟི་བརྗིད་འདི་ཚོར་ཐུབ་པ་དང་། མུ་ནས་མུ་རུ་འབད་དེ། རང་རེའི་ཞིང་ཆེན་གྱི་མི་རིགས་མཐུན་སྒྲིལ་ཡར་ཐོན་བྱ་གཞག་འཕེལ་རྒྱས་ལ་སྐུལ་འདེད་གཏང་ཆེད་སླར་ཡང་གྲུབ་འབྲས་བཟང་པོ་དང་བྱས་རྗེས་གསར་པ་འཇོག་པའི་རེ་བ་ཡོད་ཅེས་གསུངས།
ཝང་ཞའོ་ཧུའེ་ཡིས། ང་ཚོའི་ཏང་གིས་དུས་ནམ་ཡང་མི་རིགས་ལས་དོན་ལ་གཙིགས་མཐོང་བྱེད་པ་དང་། གསར་གཏོད་རང་བཞིན་གྱི་སྒོ་ནས་ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་པའི་ཡང་དག་པའི་བགྲོད་ལམ་འབྱེད་ཡོད། མི་རིགས་ཁག་འདྲ་མཉམ་མཐུན་སྒྲིལ་དང་རོགས་རེས་འཆམ་མཐུན་གྱི་འབྲེལ་བ་འཕེལ་རྒྱས་གཏོང་བའི་རྣམ་པ་གསར་པ་འབྱེད་ཡོད། མི་རིགས་ས་ཁུལ་གྱི་དཔལ་འབྱོར་སྤྱི་ཚོགས་འཕེལ་རྒྱས་ལ་ཤུགས་འདོན་པ་དང་གྲངས་ཉུང་མི་རིགས་ཀྱི་མི་སེར་ཚོའི་འཚོ་བའི་ཐད་སྔར་བྱུང་མྱོང་མེད་པའི་ཡར་ཐོན་བྱུང་ཡོད། མི་རིགས་མཐུན་སྒྲིལ་ཡར་ཐོན་གྱི་མེ་ཏོག་ནི་སི་ཁྲོན་དུ་ཡུན་ནས་ཡུན་དུ་བཞད་པ་ཡིས། རྒྱལ་ཁབ་གཅིག་གྱུར་དང་མི་རིགས་མཐུན་སྒྲིལ་ནི་མི་རིགས་ཁག་གི་ཁེ་ཕན་ཆེ་ཤོས་ཡིན་པ་ར་སྤྲོད་པ་དང་། ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་པའི་བགྲོད་ལམ་ནི་ཡང་དག་པ་ཡིན་པ་ར་སྤྲོད་ཡོད། རླབས་ཆེ་བའི་མེས་རྒྱལ་དང་ཀྲུང་ཧྭ་མི་རིགས་ནི་དུས་ནམ་ཡང་ཀྲུང་ཧྭ་ཡི་བུ་དང་བུ་མོའི་ཆེས་རྒྱུན་རིང་བའི་བརྩེ་བ་བཅངས་ས་ཡིན། ང་ཚོས་གཏན་འཁེལ་གཉིས་བློ་བརྟན་འགྱུར་མེད་དུ་སྲུང་བ་དང་། སྲུང་སྐྱོབ་གཉིས་མཐའ་གཅིག་ཏུ་འགྲུབ་པའི་ཆབ་སྲིད་ཀྱི་མཐོ་ཚད་ལ་ལངས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་རིགས་ལས་དོན་ལ་ཤུགས་འདོན་པ་དང་ཇེ་ལེགས་གཏོང་བའི་སྐོར་གྱི་དགོངས་པ་གལ་ཆེན་དོན་འཁྱོལ་ཟབ་མོ་བྱས་ནས། བློ་བརྟན་འགྱུར་མེད་དུ་ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་པའི་ཡང་དག་པའི་བགྲོད་ལམ་དུ་གོམ་སྟབས་ཆེན་པོས་བསྙེག་དགོས་ཞེས་གསུངས།
ཝང་ཞའོ་ཧུའེ་ཡིས། གོམ་སྟབས་ཆེན་པོས་དུས་རབས་གསར་པ་དང་བགྲོད་ལམ་གསར་པར་སྙེག་ནས། འབད་པ་ཆེན་པོས་ཀྲུང་གོའི་ལུགས་ཀྱི་དེང་རབས་ཅན་གྱི་སི་ཁྲོན་གྱི་ལེའུ་གསར་པ་འགོད་དགོས་ན། ཞིང་ཆེན་ཡོངས་ཀྱི་མི་རིགས་ཁག་གི་མང་ཚོགས་ཀྱི་ཐུན་མོང་མཐུན་སྒྲིལ་དང་འབད་བརྩོན་ལ་རག་ལས་ཡོད། དུས་ནམ་ཡང་ཏང་གི་ཕྱོགས་ཡོངས་ནས་སྣེ་ཁྲིད་མཐའ་འཁྱོངས་དང་། བློ་སེམས་གཅིག་མཐུན་དུ་ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་བྱ་དགོས། ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་མཐའ་འཁྱོངས་བྱས་ཏེ། ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་སྔར་བས་མི་སེམས་སུ་ཟུག་འཇུག་དགོས། མི་རིགས་ས་ཁུལ་སྤུས་མཐོའི་འཕེལ་རྒྱས་ལ་ཤུགས་འདོན་པ་དང་། མི་རིགས་ཁག་གི་མང་ཚོགས་ཀྱི་འཚོ་བའི་སྤུས་ཚད་རྒྱུན་ཆད་མེད་པར་མཐོར་འདེགས་གཏོང་ཞིང་། ཐུན་མོང་ཕྱུག་འགྱུར་ཡོང་བར་འབད་དགོས། མི་རིགས་ཁག་གི་འགྲོ་འོང་སྤེལ་རེས་ལ་ཤུགས་འདོན་པ་དང་། མི་རིགས་ཁག་གི་མང་ཚོགས་སྔར་བས་མཉམ་གནས་མཉམ་སྦྱོང་དང་། མཉམ་སྒྲུབ་མཉམ་སྤྲོ་ཡོང་བར་བྱ་དགོས། མི་རིགས་ལས་དོན་ཁྲིམས་ལྟར་བཅོས་སྐྱོང་བྱ་རྒྱུར་ཤུགས་འདོན་པ་དང་། མི་རིགས་ས་ཁུལ་གྱི་སྤྱི་ཚོགས་བརྟན་བརླིང་དང་། ཡུན་རིང་བདེ་འགོད་འབྱུང་བར་འགན་སྲུང་བྱ་དགོས་ཞེས་གསུངས།
ཝང་ཞའོ་ཧུའེ་ཡིས། ཀྲུང་ཧྭ་མི་རིགས་ཐུན་མོང་ཚོགས་པའི་འདུ་ཤེས་བརྟན་པོ་འཛུགས་པ་དང་། མི་རིགས་མཐུན་སྒྲིལ་ཡར་ཐོན་ལས་དོན་ཡག་པོ་བསྒྲུབ་རྒྱུ་ནི། ཞིང་ཆེན་ཡོངས་ཀྱི་གོང་འོག་ཚང་མའི་ཐུན་མོང་གི་འགན་འཁྲི་ཡིན། རིམ་པ་ཁག་གི་ཏང་ཨུ་དང་སྲིད་གཞུང་། དེ་བཞིན་འབྲེལ་ཡོད་སྡེ་ཁག་གིས་མི་རིགས་ལས་དོན་ནི་གོ་གནས་གལ་ཆེན་དུ་འཛིན་དགོས། མི་རིགས་ས་ཁུལ་གྱི་ལས་བྱེད་པ་དང་འཇོན་མིའི་རུ་ཁག་འཛུགས་སྐྱོང་ལ་ཤུགས་འདོན་པ་དང་། སྤྱི་ཚོགས་ཡོངས་ཀྱིས་ཐུགས་ཁུར་རྒྱབ་སྐྱོར་དང་། མི་རིགས་མཐུན་སྒྲིལ་ཡར་ཐོན་བྱ་གཞག་ནང་མཉམ་དུ་ཞུགས་པའི་ཁོར་ཡུག་བསྐྲུན་དགོས་ཞེས་གསུངས་པ་རེད། །